໙. ອກ຺ຂຓສຸຕ຺ຕໍ

໒໙. ‘‘‘ຂຓກິຈ຺ໂຈ ໂລໂກ, ຂຓກິຈ຺ໂຈ ໂລໂກ’ຕິ, ຠິກ຺ຂເວ, ອສ຺ສຸຕວາ ປຸຖຸຊ຺ຊໂນ ຠາສຕິ, ໂນ ຈ ໂຂ ໂສ ຊານາຕິ ຂຓໍ ວາ ອກ຺ຂຓໍ ວາ. ອຏ຺ຐິເມ, ຠິກ຺ຂເວ, ອກ຺ຂຓາ ອສມຍາ ພ຺ຣຫ຺ມຈຣິຍວາສາຍ. ກຕເມ ອຏ຺ຐ? ອິຘ, ຠິກ຺ຂເວ, ຕຖາຄໂຕ ຈ ໂລເກ ອຸປ຺ປນ຺ໂນ ໂຫຕິ ອຣຫໍ ສມ຺ມາສມ຺ພຸທ຺ໂຘ ວິຊ຺ຊາຈຣຓສມ຺ປນ຺ໂນ ສຸຄໂຕ ໂລກວິທູ ອນຸຕ຺ຕໂຣ ປຸຣິສທມ຺ມສາຣຖິ ສຕ຺ຖາ ເທວມນຸສ຺ສານໍ ພຸທ຺ໂຘ ຠຄວາ, ຘມ຺ໂມ ຈ ເທສິຍຕິ ໂອປສມິໂກ ປຣິນິພ຺ພານິໂກ ສມ຺ໂພຘຄາມີ ສຸຄຕປ຺ປເວທິໂຕ; ອຍຎ຺ຈ ປຸຄ຺ຄໂລ ນິຣຍໍ ອຸປປນ຺ໂນ ໂຫຕິ. ອຍໍ, ຠິກ຺ຂເວ, ປຐໂມ ອກ຺ຂໂຓ ອສມໂຍ ພ຺ຣຫ຺ມຈຣິຍວາສາຍ.

‘‘ປຸນ ຈປຣໍ, ຠິກ຺ຂເວ, ຕຖາຄໂຕ ຈ ໂລເກ ອຸປ຺ປນ຺ໂນ ໂຫຕິ…ເປ… ສຕ຺ຖາ ເທວມນຸສ຺ສານໍ ພຸທ຺ໂຘ ຠຄວາ, ຘມ຺ໂມ ຈ ເທສິຍຕິ ໂອປສມິໂກ ປຣິນິພ຺ພານິໂກ ສມ຺ໂພຘຄາມີ ສຸຄຕປ຺ປເວທິໂຕ; ອຍຎ຺ຈ ປຸຄ຺ຄໂລ ຕິຣຈ຺ຉານໂຍນິໍ ອຸປປນ຺ໂນ ໂຫຕິ…ເປ….

‘‘ປຸນ ຈປຣໍ, ຠິກ຺ຂເວ…ເປ… ອຍຎ຺ຈ ປຸຄ຺ຄໂລ ເປຕ຺ຕິວິສຍໍ ອຸປປນ຺ໂນ ໂຫຕິ…ເປ….

‘‘ປຸນ ຈປຣໍ, ຠິກ຺ຂເວ…ເປ… ອຍຎ຺ຈ ປຸຄ຺ຄໂລ ອຎ຺ຎຕຣໍ ທີຆາຍຸກໍ ເທວນິກາຍໍ ອຸປປນ຺ໂນ ໂຫຕິ…ເປ….

‘‘ປຸນ ຈປຣໍ, ຠິກ຺ຂເວ…ເປ… ອຍຎ຺ຈ ປຸຄ຺ຄໂລ ປຈ຺ຈນ຺ຕິເມສຸ ຊນປເທສຸ ປຈ຺ຈາຊາໂຕ ໂຫຕິ, ໂສ ຈ ໂຫຕິ ອວິຎ຺ຎາຕາເຣສຸ ມິລກ຺ເຂສຸ [ມິລກ຺ຂູສຸ (ສ຺ຍາ. ກ.) ທີ. ນິ. ໓.໓໕໘], ຍຕ຺ຖ ນຕ຺ຖິ ຄຕິ ຠິກ຺ຂູນໍ ຠິກ຺ຂຸນີນໍ ອຸປາສການໍ ອຸປາສິການໍ…ເປ… ປຎ຺ຈໂມ ອກ຺ຂໂຓ ອສມໂຍ ພ຺ຣຫ຺ມຈຣິຍວາສາຍ.

‘‘ປຸນ ຈປຣໍ, ຠິກ຺ຂເວ…ເປ… ອຍຎ຺ຈ ປຸຄ຺ຄໂລ ມຊ຺ຌິເມສຸ ຊນປເທສຸ ປຈ຺ຈາຊາໂຕ ໂຫຕິ, ໂສ ຈ ໂຫຕິ ມິຈ຺ຉາທິຏ຺ຐິໂກ ວິປຣີຕທສ຺ສໂນ – ‘ນຕ຺ຖິ ທິນ຺ນໍ, ນຕ຺ຖິ ຍິຏ຺ຐໍ, ນຕ຺ຖິ ຫຸຕໍ, ນຕ຺ຖິ ສຸກຕທຸກ຺ກຏານໍ ກມ຺ມານໍ ຜລໍ ວິປາໂກ, ນຕ຺ຖິ ອຍໍ ໂລໂກ, ນຕ຺ຖິ ປໂຣ ໂລໂກ, ນຕ຺ຖິ ມາຕາ, ນຕ຺ຖິ ປິຕາ, ນຕ຺ຖິ ສຕ຺ຕາ ໂອປປາຕິກາ, ນຕ຺ຖິ ໂລເກ ສມຓພ຺ຣາຫ຺ມຓາ ສມ຺ມຄ຺ຄຕາ ສມ຺ມາ ປຏິປນ຺ນາ ເຍ ອິມຎ຺ຈ ໂລກໍ ປຣຎ຺ຈ ໂລກໍ ສຍໍ ອຠິຎ຺ຎາ ສຈ຺ຉິກຕ຺ວາ ປເວເທນ຺ຕີ’ຕິ…ເປ….

‘‘ປຸນ ຈປຣໍ, ຠິກ຺ຂເວ…ເປ… ອຍຎ຺ຈ ປຸຄ຺ຄໂລ ມຊ຺ຌິເມສຸ ຊນປເທສຸ ປຈ຺ຈາຊາໂຕ ໂຫຕິ, ໂສ ຈ ໂຫຕິ ທຸປ຺ປຎ຺ໂຎ ຊໂຬ ເອຬມູໂຄ ອປ຺ປຏິພໂລ ສຸຠາສິຕທຸພ຺ຠາສິຕສ຺ສ ອຕ຺ຖມຎ຺ຎາຕຸໍ. ອຍໍ, ຠິກ຺ຂເວ, ສຕ຺ຕໂມ ອກ຺ຂໂຓ ອສມໂຍ ພ຺ຣຫ຺ມຈຣິຍວາສາຍ.

‘‘ປຸນ ຈປຣໍ, ຠິກ຺ຂເວ, ຕຖາຄໂຕ ຈ ໂລເກ ອນຸປ຺ປນ຺ໂນ ໂຫຕິ ອຣຫໍ ສມ຺ມາສມ຺ພຸທ຺ໂຘ…ເປ… ສຕ຺ຖາ ເທວມນຸສ຺ສານໍ ພຸທ຺ໂຘ ຠຄວາ. ຘມ຺ໂມ ຈ ນ ເທສິຍຕິ ໂອປສມິໂກ ປຣິນິພ຺ພານິໂກ ສມ຺ໂພຘຄາມີ ສຸຄຕປ຺ປເວທິໂຕ. ອຍຎ຺ຈ ປຸຄ຺ຄໂລ ມຊ຺ຌິເມສຸ ຊນປເທສຸ ປຈ຺ຈາຊາໂຕ ໂຫຕິ, ໂສ ຈ ໂຫຕິ ປຎ຺ຎວາ ອຊໂຬ ອເນຬມູໂຄ ປຏິພໂລ ສຸຠາສິຕທຸພ຺ຠາສິຕສ຺ສ ອຕ຺ຖມຎ຺ຎາຕຸໍ. ອຍໍ, ຠິກ຺ຂເວ, ອຏ຺ຐໂມ ອກ຺ຂໂຓ ອສມໂຍ ພ຺ຣຫ຺ມຈຣິຍວາສາຍ. ‘ອິເມ ໂຂ, ຠິກ຺ຂເວ, ອຏ຺ຐ ອກ຺ຂຓາ ອສມຍາ ພ຺ຣຫ຺ມຈຣິຍວາສາຍ’’’.

‘‘ເອໂກວ ໂຂ, ຠິກ຺ຂເວ, ຂໂຓ ຈ ສມໂຍ ຈ ພ຺ຣຫ຺ມຈຣິຍວາສາຍ. ກຕໂມ ເອໂກ? ອິຘ, ຠິກ຺ຂເວ, ຕຖາຄໂຕ ຈ ໂລເກ ອຸປ຺ປນ຺ໂນ ໂຫຕິ ອຣຫໍ ສມ຺ມາສມ຺ພຸທ຺ໂຘ ວິຊ຺ຊາຈຣຓສມ຺ປນ຺ໂນ ສຸຄໂຕ ໂລກວິທູ ອນຸຕ຺ຕໂຣ ປຸຣິສທມ຺ມສາຣຖິ ສຕ຺ຖາ ເທວມນຸສ຺ສານໍ ພຸທ຺ໂຘ ຠຄວາ. ຘມ຺ໂມ ຈ ເທສິຍຕິ ໂອປສມິໂກ ປຣິນິພ຺ພານິໂກ ສມ຺ໂພຘຄາມີ ສຸຄຕປ຺ປເວທິໂຕ. ອຍຎ຺ຈ ປຸຄ຺ຄໂລ ມຊ຺ຌິເມສຸ ຊນປເທສຸ ປຈ຺ຈາຊາໂຕ ໂຫຕິ, ໂສ ຈ ໂຫຕິ ປຎ຺ຎວາ ອຊໂຬ ອເນຬມູໂຄ ປຏິພໂລ ສຸຠາສິຕທຸພ຺ຠາສິຕສ຺ສ ອຕ຺ຖມຎ຺ຎາຕຸໍ. ອຍໍ, ຠິກ຺ຂເວ, ເອໂກວ ຂໂຓ ຈ ສມໂຍ ຈ ພ຺ຣຫ຺ມຈຣິຍວາສາຍາ’’ຕິ.

‘‘ມນຸສ຺ສລາຠໍ [ມນຸສ຺ສໂລກໍ (ສ຺ຍາ.)] ລທ຺ຘານ, ສທ຺ຘມ຺ເມ ສຸປ຺ປເວທິເຕ;

ເຍ ຂຓໍ ນາຘິຄຈ຺ຉນ຺ຕິ, ອຕິນາເມນ຺ຕິ ເຕ ຂຓໍ.

‘‘ພຫູ ຫິ ອກ຺ຂຓາ ວຸຕ຺ຕາ, ມຄ຺ຄສ຺ສ ອນ຺ຕຣາຍິກາ;

ກທາຈິ ກຣຫຈິ ໂລເກ, ອຸປ຺ປຊ຺ຊນ຺ຕິ ຕຖາຄຕາ.

‘‘ຕຍິທໍ [ຕສ຺ສິທໍ (ກ.)] ສມ຺ມຸຂີຠູຕໍ, ຍໍ ໂລກສ຺ມິໍ ສຸທຸລ຺ລຠໍ;

ມນຸສ຺ສປຏິລາໂຠ ຈ, ສທ຺ຘມ຺ມສ຺ສ ຈ ເທສນາ;

ອລໍ ວາຍມິຕຸໍ ຕຕ຺ຖ, ອຕ຺ຕກາເມນ [ອຕ຺ຖກາເມນ (ສີ. ສ຺ຍາ. ກ.)] ຊນ຺ຕຸນາ.

‘‘ກຖໍ ວິຊຎ຺ຎາ ສທ຺ຘມ຺ມໍ, ຂໂຓ ເວ [ໂວ (ສ຺ຍາ.)] ມາ ອຸປຈ຺ຈຄາ;

ຂຓາຕີຕາ ຫິ ໂສຈນ຺ຕິ, ນິຣຍມ຺ຫິ ສມປ຺ປິຕາ.

‘‘ອິຘ ເຈ ນໍ ວິຣາເຘຕິ, ສທ຺ຘມ຺ມສ຺ສ ນິຍາມຕໍ [ນິຍາມິຕໍ (ສ຺ຍາ.)];

ວາຓິໂຊວ ອຕີຕຕ຺ໂຖ, ຈິຣຕ຺ຕໍ [ຈິຣນ຺ຕໍ (ກ.)] ອນຸຕປິສ຺ສຕິ.

‘‘ອວິຊ຺ຊານິວຸໂຕ ໂປໂສ, ສທ຺ຘມ຺ມໍ ອປຣາຘິໂກ;

ຊາຕິມຣຓສໍສາຣໍ, ຈິຣໍ ປຈ຺ຈນຸໂຠສ຺ສຕິ.

‘‘ເຍ ຈ ລທ຺ຘາ ມນຸສ຺ສຕ຺ຕໍ, ສທ຺ຘມ຺ເມ ສຸປ຺ປເວທິເຕ;

ອກໍສຸ ສຕ຺ຖຸ ວຈນໍ, ກຣິສ຺ສນ຺ຕິ ກໂຣນ຺ຕິ ວາ.

‘‘ຂຓໍ ປຈ຺ຈວິທຸໍ ໂລເກ, ພ຺ຣຫ຺ມຈຣິຍໍ ອນຸຕ຺ຕຣໍ;

ເຍ ມຄ຺ຄໍ ປຏິປຊ຺ຊິໍສຸ, ຕຖາຄຕປ຺ປເວທິຕໍ.

‘‘ເຍ ສໍວຣາ ຈກ຺ຂຸມຕາ, ເທສິຕາທິຈ຺ຈພນ຺ຘຸນາ;

ເຕສຸ [ເຕສໍ (ກ.)] ຄຸຕ຺ໂຕ ສທາ ສໂຕ, ວິຫເຣ ອນວສ຺ສຸໂຕ.

‘‘ສພ຺ເພ ອນຸສເຍ ເຉຕ຺ວາ, ມາຣເຘຍ຺ຍປຣານຸເຄ;

ເຕ ເວ ປາຣງ຺ຄຕາ [ປາຣຄຕາ (ສີ. ສ຺ຍາ. ປີ.)] ໂລເກ, ເຍ ປຕ຺ຕາ ອາສວກ຺ຂຍ’’ນ຺ຕິ. ນວມໍ;