໕. ມຫານາມສຸຕ຺ຕໍ

໒໕. ເອກໍ ສມຍໍ ຠຄວາ ສກ຺ເກສຸ ວິຫຣຕິ ກປິລວຕ຺ຖຸສ຺ມິໍ ນິຄ຺ໂຣຘາຣາເມ. ອຖ ໂຂ ມຫານາໂມ ສກ຺ໂກ ເຍນ ຠຄວາ ເຕນຸປສງ຺ກມິ; ອຸປສງ຺ກມິຕ຺ວາ ຠຄວນ຺ຕໍ ອຠິວາເທຕ຺ວາ ເອກມນ຺ຕໍ ນິສີທິ. ເອກມນ຺ຕໍ ນິສິນ຺ໂນ ໂຂ ມຫານາໂມ ສກ຺ໂກ ຠຄວນ຺ຕໍ ເອຕທໂວຈ – ‘‘ກິຕ຺ຕາວຕາ ນຸ ໂຂ, ຠນ຺ເຕ, ອຸປາສໂກ ໂຫຕີ’’ຕິ? ‘‘ຍໂຕ ໂຂ, ມຫານາມ, ພຸທ຺ຘໍ ສຣຓໍ ຄໂຕ ໂຫຕິ, ຘມ຺ມໍ ສຣຓໍ ຄໂຕ ໂຫຕິ, ສງ຺ຆໍ ສຣຓໍ ຄໂຕ ໂຫຕິ; ເອຕ຺ຕາວຕາ ໂຂ, ມຫານາມ, ອຸປາສໂກ ໂຫຕີ’’ຕິ.

‘‘ກິຕ຺ຕາວຕາ ປນ, ຠນ຺ເຕ, ອຸປາສໂກ ສີລວາ ໂຫຕີ’’ຕິ? ‘‘ຍໂຕ ໂຂ, ມຫານາມ, ອຸປາສໂກ ປາຓາຕິປາຕາ ປຏິວິຣໂຕ ໂຫຕິ, ອທິນ຺ນາທານາ ປຏິວິຣໂຕ ໂຫຕິ, ກາເມສຸມິຈ຺ຉາຈາຣາ ປຏິວິຣໂຕ ໂຫຕິ, ມຸສາວາທາ ປຏິວິຣໂຕ ໂຫຕິ, ສຸຣາເມຣຍມຊ຺ຊປມາທຏ຺ຐານາ ປຏິວິຣໂຕ ໂຫຕິ; ເອຕ຺ຕາວຕາ ໂຂ, ມຫານາມ, ອຸປາສໂກ ສີລວາ ໂຫຕີ’’ຕິ.

‘‘ກິຕ຺ຕາວຕາ ປນ, ຠນ຺ເຕ, ອຸປາສໂກ ອຕ຺ຕຫິຕາຍ ປຏິປນ຺ໂນ ໂຫຕິ, ໂນ ປຣຫິຕາຍາ’’ຕິ? ‘‘ຍໂຕ ໂຂ, ມຫານາມ, ອຸປາສໂກ ອຕ຺ຕນາວ ສທ຺ຘາສມ຺ປນ຺ໂນ ໂຫຕິ, ໂນ ປຣໍ ສທ຺ຘາສມ຺ປທາຍ ສມາທເປຕິ [ສມາທາເປຕິ (?)]; ອຕ຺ຕນາວ ສີລສມ຺ປນ຺ໂນ ໂຫຕິ, ໂນ ປຣໍ ສີລສມ຺ປທາຍ ສມາທເປຕິ; ອຕ຺ຕນາວ ຈາຄສມ຺ປນ຺ໂນ ໂຫຕິ, ໂນ ປຣໍ ຈາຄສມ຺ປທາຍ ສມາທເປຕິ; ອຕ຺ຕນາວ ຠິກ຺ຂູນໍ ທສ຺ສນກາໂມ ໂຫຕິ, ໂນ ປຣໍ ຠິກ຺ຂູນໍ ທສ຺ສເນ ສມາທເປຕິ; ອຕ຺ຕນາວ ສທ຺ຘມ຺ມໍ ໂສຕຸກາໂມ ໂຫຕິ, ໂນ ປຣໍ ສທ຺ຘມ຺ມສ຺ສວເນ ສມາທເປຕິ; ອຕ຺ຕນາວ ສຸຕານໍ ຘມ຺ມານໍ ຘາຣຓຊາຕິໂກ ໂຫຕິ, ໂນ ປຣໍ ຘມ຺ມຘາຣຓາຍ ສມາທເປຕິ; ອຕ຺ຕນາວ ສຸຕານໍ ຘມ຺ມານໍ ອຕ຺ຖູປປຣິກ຺ຂິຕາ ໂຫຕິ, ໂນ ປຣໍ ອຕ຺ຖູປປຣິກ຺ຂາຍ ສມາທເປຕິ; ອຕ຺ຕນາວ ອຕ຺ຖມຎ຺ຎາຍ ຘມ຺ມມຎ຺ຎາຍ ຘມ຺ມານຸຘມ຺ມປ຺ປຏິປນ຺ໂນ ໂຫຕິ, ໂນ ປຣໍ ຘມ຺ມານຸຘມ຺ມປ຺ປຏິປຕ຺ຕິຍາ ສມາທເປຕິ. ເອຕ຺ຕາວຕາ ໂຂ, ມຫານາມ, ອຸປາສໂກ ອຕ຺ຕຫິຕາຍ ປຏິປນ຺ໂນ ໂຫຕິ, ໂນ ປຣຫິຕາຍາ’’ຕິ.

‘‘ກິຕ຺ຕາວຕາ ປນ, ຠນ຺ເຕ, ອຸປາສໂກ ອຕ຺ຕຫິຕາຍ ຈ ປຏິປນ຺ໂນ ໂຫຕິ ປຣຫິຕາຍ ຈາ’’ຕິ? ‘‘ຍໂຕ ໂຂ, ມຫານາມ, ອຸປາສໂກ ອຕ຺ຕນາ ຈ ສທ຺ຘາສມ຺ປນ຺ໂນ ໂຫຕິ, ປຣຎ຺ຈ ສທ຺ຘາສມ຺ປທາຍ ສມາທເປຕິ; ອຕ຺ຕນາ ຈ ສີລສມ຺ປນ຺ໂນ ໂຫຕິ, ປຣຎ຺ຈ ສີລສມ຺ປທາຍ ສມາທເປຕິ; ອຕ຺ຕນາ ຈ ຈາຄສມ຺ປນ຺ໂນ ໂຫຕິ, ປຣຎ຺ຈ ຈາຄສມ຺ປທາຍ ສມາທເປຕິ; ອຕ຺ຕນາ ຈ ຠິກ຺ຂູນໍ ທສ຺ສນກາໂມ ໂຫຕິ, ປຣຎ຺ຈ ຠິກ຺ຂູນໍ ທສ຺ສເນ ສມາທເປຕິ; ອຕ຺ຕນາ ຈ ສທ຺ຘມ຺ມໍ ໂສຕຸກາໂມ ໂຫຕິ, ປຣຎ຺ຈ ສທ຺ຘມ຺ມສ຺ສວເນ ສມາທເປຕິ; ອຕ຺ຕນາ ຈ ສຸຕານໍ ຘມ຺ມານໍ ຘາຣຓຊາຕິໂກ ໂຫຕິ, ປຣຎ຺ຈ ຘມ຺ມຘາຣຓາຍ ສມາທເປຕິ; ອຕ຺ຕນາ ຈ ສຸຕານໍ ຘມ຺ມານໍ ອຕ຺ຖູປປຣິກ຺ຂິຕາ ໂຫຕິ, ປຣຎ຺ຈ ອຕ຺ຖູປປຣິກ຺ຂາຍ ສມາທເປຕິ, ອຕ຺ຕນາ ຈ ອຕ຺ຖມຎ຺ຎາຍ ຘມ຺ມມຎ຺ຎາຍ ຘມ຺ມານຸຘມ຺ມປ຺ປຏິປນ຺ໂນ ໂຫຕິ, ປຣຎ຺ຈ ຘມ຺ມານຸຘມ຺ມປ຺ປຏິປຕ຺ຕິຍາ ສມາທເປຕິ. ເອຕ຺ຕາວຕາ ໂຂ, ມຫານາມ, ອຸປາສໂກ ອຕ຺ຕຫິຕາຍ ຈ ປຏິປນ຺ໂນ ໂຫຕິ ປຣຫິຕາຍ ຈາ’’ຕິ. ປຎ຺ຈມໍ.