໖. ຊີວກສຸຕ຺ຕໍ

໒໖. ເອກໍ ສມຍໍ ຠຄວາ ຣາຊຄເຫ ວິຫຣຕິ ຊີວກມ຺ພວເນ. ອຖ ໂຂ ຊີວໂກ ໂກມາຣຠຈ຺ໂຈ ເຍນ ຠຄວາ ເຕນຸປສງ຺ກມິ; ອຸປສງ຺ກມິຕ຺ວາ ຠຄວນ຺ຕໍ ອຠິວາເທຕ຺ວາ ເອກມນ຺ຕໍ ນິສີທິ. ເອກມນ຺ຕໍ ນິສິນ຺ໂນ ໂຂ ຊີວໂກ ໂກມາຣຠຈ຺ໂຈ ຠຄວນ຺ຕໍ ເອຕທໂວຈ – ‘‘ກິຕ຺ຕາວຕາ ນຸ ໂຂ, ຠນ຺ເຕ, ອຸປາສໂກ ໂຫຕີ’’ຕິ? ‘‘ຍໂຕ ໂຂ, ຊີວກ, ພຸທ຺ຘໍ ສຣຓໍ ຄໂຕ ໂຫຕິ, ຘມ຺ມໍ ສຣຓໍ ຄໂຕ ໂຫຕິ, ສງ຺ຆໍ ສຣຓໍ ຄໂຕ ໂຫຕິ; ເອຕ຺ຕາວຕາ ໂຂ ຊີວກ, ອຸປາສໂກ ໂຫຕີ’’ຕິ.

‘‘ກິຕ຺ຕາວຕາ ປນ, ຠນ຺ເຕ, ອຸປາສໂກ ສີລວາ ໂຫຕີ’’ຕິ? ‘‘ຍໂຕ ໂຂ, ຊີວກ, ອຸປາສໂກ ປາຓາຕິປາຕາ ປຏິວິຣໂຕ ໂຫຕິ…ເປ… ສຸຣາເມຣຍມຊ຺ຊປມາທຏ຺ຐານາ ປຏິວິຣໂຕ ໂຫຕິ; ເອຕ຺ຕາວຕາ ໂຂ, ຊີວກ, ອຸປາສໂກ ສີລວາ ໂຫຕີ’’ຕິ.

‘‘ກິຕ຺ຕາວຕາ ປນ, ຠນ຺ເຕ, ອຸປາສໂກ ອຕ຺ຕຫິຕາຍ ປຏິປນ຺ໂນ ໂຫຕິ, ໂນ ປຣຫິຕາຍາ’’ຕິ? ‘‘ຍໂຕ ໂຂ, ຊີວກ, ອຸປາສໂກ ອຕ຺ຕນາວ ສທ຺ຘາສມ຺ປນ຺ໂນ ໂຫຕິ, ໂນ ປຣໍ ສທ຺ຘາສມ຺ປທາຍ ສມາທເປຕິ…ເປ… ອຕ຺ຕນາວ ອຕ຺ຖມຎ຺ຎາຍ ຘມ຺ມມຎ຺ຎາຍ ຘມ຺ມານຸຘມ຺ມປ຺ປຏິປນ຺ໂນ ໂຫຕິ, ໂນ ປຣໍ ຘມ຺ມານຸຘມ຺ມປ຺ປຏິປຕ຺ຕິຍາ ສມາທເປຕິ. ເອຕ຺ຕາວຕາ ໂຂ, ຊີວກ, ອຸປາສໂກ ອຕ຺ຕຫິຕາຍ ປຏິປນ຺ໂນ ໂຫຕິ, ໂນ ປຣຫິຕາຍາ’’ຕິ.

‘‘ກິຕ຺ຕາວຕາ ປນ, ຠນ຺ເຕ, ອຸປາສໂກ ອຕ຺ຕຫິຕາຍ ຈ ປຏິປນ຺ໂນ ໂຫຕິ ປຣຫິຕາຍ ຈາ’’ຕິ? ‘‘ຍໂຕ ໂຂ, ຊີວກ, ອຸປາສໂກ ອຕ຺ຕນາ ຈ ສທ຺ຘາສມ຺ປນ຺ໂນ ໂຫຕິ, ປຣຎ຺ຈ ສທ຺ຘາສມ຺ປທາຍ ສມາທເປຕິ; ອຕ຺ຕນາ ຈ ສີລສມ຺ປນ຺ໂນ ໂຫຕິ, ປຣຎ຺ຈ ສີລສມ຺ປທາຍ ສມາທເປຕິ; ອຕ຺ຕນາ ຈ ຈາຄສມ຺ປນ຺ໂນ ໂຫຕິ, ປຣຎ຺ຈ ຈາຄສມ຺ປທາຍ ສມາທເປຕິ; ອຕ຺ຕນາ ຈ ຠິກ຺ຂູນໍ ທສ຺ສນກາໂມ ໂຫຕິ, ປຣຎ຺ຈ ຠິກ຺ຂູນໍ ທສ຺ສເນ ສມາທເປຕິ; ອຕ຺ຕນາ ຈ ສທ຺ຘມ຺ມໍ ໂສຕຸກາໂມ ໂຫຕິ, ປຣຎ຺ຈ ສທ຺ຘມ຺ມສ຺ສວເນ ສມາທເປຕິ; ອຕ຺ຕນາ ຈ ສຸຕານໍ ຘມ຺ມານໍ ຘາຣຓຊາຕິໂກ ໂຫຕິ, ປຣຎ຺ຈ ຘມ຺ມຘາຣຓາຍ ສມາທເປຕິ; ອຕ຺ຕນາ ຈ ສຸຕານໍ ຘມ຺ມານໍ ອຕ຺ຖູປປຣິກ຺ຂິຕາ ໂຫຕິ, ປຣຎ຺ຈ ອຕ຺ຖູປປຣິກ຺ຂາຍ ສມາທເປຕິ; ອຕ຺ຕນາ ຈ ອຕ຺ຖມຎ຺ຎາຍ ຘມ຺ມມຎ຺ຎາຍ ຘມ຺ມານຸຘມ຺ມປ຺ປຏິປນ຺ໂນ ໂຫຕິ, ປຣຎ຺ຈ ຘມ຺ມານຸຘມ຺ມປ຺ປຏິປຕ຺ຕິຍາ ສມາທເປຕິ. ເອຕ຺ຕາວຕາ ໂຂ, ຊີວກ, ອຸປາສໂກ ອຕ຺ຕຫິຕາຍ ຈ ປຏິປນ຺ໂນ ໂຫຕິ ປຣຫິຕາຍ ຈາ’’ຕິ. ຉຏ຺ຐໍ.