໓. ນຄໂຣປມສຸຕ຺ຕໍ

໖໗. ‘‘ຍໂຕ ໂຂ, ຠິກ຺ຂເວ, ຣຎ຺ໂຎ ປຈ຺ຈນ຺ຕິມໍ ນຄຣໍ ສຕ຺ຕຫິ ນຄຣປຣິກ຺ຂາເຣຫິ ສຸປຣິກ຺ຂຕໍ [ສຸປຣິກ຺ຂິຕ຺ຕໍ (ກ.)] ໂຫຕິ, ຈຕຸນ຺ນຎ຺ຈ ອາຫາຣານໍ ນິກາມລາຠີ ໂຫຕິ ອກິຈ຺ຉລາຠີ ອກສິຣລາຠີ. ອິທໍ ວຸຈ຺ຈຕິ, ຠິກ຺ຂເວ, ຣຎ຺ໂຎ ປຈ຺ຈນ຺ຕິມໍ ນຄຣໍ ອກຣຓີຍໍ ພາຫິເຣຫິ ປຈ຺ຈຕ຺ຖິເກຫິ ປຈ຺ຈາມິຕ຺ເຕຫິ.

‘‘ກຕເມຫິ ສຕ຺ຕຫິ ນຄຣປຣິກ຺ຂາເຣຫິ ສຸປຣິກ຺ຂຕໍ ໂຫຕິ? ອິຘ, ຠິກ຺ຂເວ, ຣຎ຺ໂຎ ປຈ຺ຈນ຺ຕິເມ ນຄເຣ ເອສິກາ ໂຫຕິ ຄມ຺ຠີຣເນມາ [ຄມ຺ຠີຣເນມິ (ກ.)] ສຸນິຂາຕາ ອຈລາ ອສມ຺ປເວຘີ [ອສມ຺ປເວຘິ (ສີ. ສ຺ຍາ.)]. ອິມິນາ ປຐເມນ ນຄຣປຣິກ຺ຂາເຣນ ສຸປຣິກ຺ຂຕໍ ໂຫຕິ ຣຎ຺ໂຎ ປຈ຺ຈນ຺ຕິມໍ ນຄຣໍ ອພ຺ຠນ຺ຕຣານໍ ຄຸຕ຺ຕິຍາ ພາຫິຣານໍ ປຏິຆາຕາຍ.

‘‘ປຸນ ຈປຣໍ, ຠິກ຺ຂເວ, ຣຎ຺ໂຎ ປຈ຺ຈນ຺ຕິເມ ນຄເຣ ປຣິຂາ ໂຫຕິ ຄມ຺ຠີຣາ ເຈວ ວິຕ຺ຖຕາ ຈ. ອິມິນາ ທຸຕິເຍນ ນຄຣປຣິກ຺ຂາເຣນ ສຸປຣິກ຺ຂຕໍ ໂຫຕິ ຣຎ຺ໂຎ ປຈ຺ຈນ຺ຕິມໍ ນຄຣໍ ອພ຺ຠນ຺ຕຣານໍ ຄຸຕ຺ຕິຍາ ພາຫິຣານໍ ປຏິຆາຕາຍ.

‘‘ປຸນ ຈປຣໍ, ຠິກ຺ຂເວ, ຣຎ຺ໂຎ ປຈ຺ຈນ຺ຕິເມ ນຄເຣ ອນຸປຣິຍາຍປໂຖ ໂຫຕິ ອຸຈ຺ໂຈ ເຈວ ວິຕ຺ຖໂຕ ຈ. ອິມິນາ ຕຕິເຍນ ນຄຣປຣິກ຺ຂາເຣນ ສຸປຣິກ຺ຂຕໍ ໂຫຕິ ຣຎ຺ໂຎ ປຈ຺ຈນ຺ຕິມໍ ນຄຣໍ ອພ຺ຠນ຺ຕຣານໍ ຄຸຕ຺ຕິຍາ ພາຫິຣານໍ ປຏິຆາຕາຍ.

‘‘ປຸນ ຈປຣໍ, ຠິກ຺ຂເວ, ຣຎ຺ໂຎ ປຈ຺ຈນ຺ຕິເມ ນຄເຣ ພຫຸໍ ອາວຸຘໍ ສນ຺ນິຈິຕໍ ໂຫຕິ ສລາກຎ຺ເຈວ ເຊວນິກຎ຺ຈ [ເຊວນິຍຎ຺ຈ (ສີ. ອຏ຺ຐ.)]. ອິມິນາ ຈຕຸຕ຺ເຖນ ນຄຣປຣິກ຺ຂາເຣນ ສຸປຣິກ຺ຂຕໍ ໂຫຕິ ຣຎ຺ໂຎ ປຈ຺ຈນ຺ຕິມໍ ນຄຣໍ ອພ຺ຠນ຺ຕຣານໍ ຄຸຕ຺ຕິຍາ ພາຫິຣານໍ ປຏິຆາຕາຍ.

‘‘ປຸນ ຈປຣໍ, ຠິກ຺ຂເວ, ຣຎ຺ໂຎ ປຈ຺ຈນ຺ຕິເມ ນຄເຣ ພຫຸພລກາໂຍ ປຏິວສຕິ, ເສຍ຺ຍຖິທໍ – ຫຕ຺ຖາໂຣຫາ ອສ຺ສາໂຣຫາ ຣຖິກາ ຘນຸຄ຺ຄຫາ ເຈລກາ ຈລກາ ປິຓ຺ຑທາຍກາ ອຸຄ຺ຄາ ຣາຊປຸຕ຺ຕາ ປກ຺ຂນ຺ທິໂນ ມຫານາຄາ ສູຣາ ຈມ຺ມໂຍຘິໂນ ທາສກປຸຕ຺ຕາ. ອິມິນາ ປຎ຺ຈເມນ ນຄຣປຣິກ຺ຂາເຣນ ສຸປຣິກ຺ຂຕໍ ໂຫຕິ ຣຎ຺ໂຎ ປຈ຺ຈນ຺ຕິມໍ ນຄຣໍ ອພ຺ຠນ຺ຕຣານໍ ຄຸຕ຺ຕິຍາ ພາຫິຣານໍ ປຏິຆາຕາຍ.

‘‘ປຸນ ຈປຣໍ, ຠິກ຺ຂເວ, ຣຎ຺ໂຎ ປຈ຺ຈນ຺ຕິເມ ນຄເຣ ໂທວາຣິໂກ ໂຫຕິ ປຓ຺ຑິໂຕ ພ຺ຍຕ຺ໂຕ ເມຘາວີ ອຎ຺ຎາຕານໍ ນິວາເຣຕາ ຎາຕານໍ ປເວເສຕາ. ອິມິນາ ຉຏ຺ເຐນ ນຄຣປຣິກ຺ຂາເຣນ ສຸປຣິກ຺ຂຕໍ ໂຫຕິ ຣຎ຺ໂຎ ປຈ຺ຈນ຺ຕິມໍ ນຄຣໍ ອພ຺ຠນ຺ຕຣານໍ ຄຸຕ຺ຕິຍາ ພາຫິຣານໍ ປຏິຆາຕາຍ.

‘‘ປຸນ ຈປຣໍ, ຠິກ຺ຂເວ, ຣຎ຺ໂຎ ປຈ຺ຈນ຺ຕິເມ ນຄເຣ ປາກາໂຣ ໂຫຕິ ອຸຈ຺ໂຈ ເຈວ ວິຕ຺ຖໂຕ ຈ ວາສນເລປນສມ຺ປນ຺ໂນ ຈ. ອິມິນາ ສຕ຺ຕເມນ ນຄຣປຣິກ຺ຂາເຣນ ສຸປຣິກ຺ຂຕໍ ໂຫຕິ ຣຎ຺ໂຎ ປຈ຺ຈນ຺ຕິມໍ ນຄຣໍ ອພ຺ຠນ຺ຕຣານໍ ຄຸຕ຺ຕິຍາ ພາຫິຣານໍ ປຏິຆາຕາຍ. ອິເມຫິ ສຕ຺ຕຫິ ນຄຣປຣິກ຺ຂາເຣຫິ ສຸປຣິກ຺ຂຕໍ ໂຫຕິ.

‘‘ກຕເມສໍ ຈຕຸນ຺ນໍ ອາຫາຣານໍ ນິກາມລາຠີ ໂຫຕິ ອກິຈ຺ຉລາຠີ ອກສິຣລາຠີ? ອິຘ, ຠິກ຺ຂເວ, ຣຎ຺ໂຎ ປຈ຺ຈນ຺ຕິເມ ນຄເຣ ພຫຸໍ ຕິຓກຏ຺ໂຐທກໍ ສນ຺ນິຈິຕໍ ໂຫຕິ ອພ຺ຠນ຺ຕຣານໍ ຣຕິຍາ ອປຣິຕສ຺ສາຍ ຜາສຸວິຫາຣາຍ ພາຫິຣານໍ ປຏິຆາຕາຍ.

‘‘ປຸນ ຈປຣໍ, ຠິກ຺ຂເວ, ຣຎ຺ໂຎ ປຈ຺ຈນ຺ຕິເມ ນຄເຣ ພຫຸໍ ສາລິຍວກໍ ສນ຺ນິຈິຕໍ ໂຫຕິ ອພ຺ຠນ຺ຕຣານໍ ຣຕິຍາ ອປຣິຕສ຺ສາຍ ຜາສຸວິຫາຣາຍ ພາຫິຣານໍ ປຏິຆາຕາຍ.

‘‘ປຸນ ຈປຣໍ, ຠິກ຺ຂເວ, ຣຎ຺ໂຎ ປຈ຺ຈນ຺ຕິເມ ນຄເຣ ພຫຸໍ ຕິລມຸຄ຺ຄມາສາປຣຓ຺ຓໍ ສນ຺ນິຈິຕໍ ໂຫຕິ ອພ຺ຠນ຺ຕຣານໍ ຣຕິຍາ ອປຣິຕສ຺ສາຍ ຜາສຸວິຫາຣາຍ ພາຫິຣານໍ ປຏິຆາຕາຍ.

‘‘ປຸນ ຈປຣໍ, ຠິກ຺ຂເວ, ຣຎ຺ໂຎ ປຈ຺ຈນ຺ຕິເມ ນຄເຣ ພຫຸໍ ເຠສຊ຺ຊໍ ສນ຺ນິຈິຕໍ ໂຫຕິ, ເສຍ຺ຍຖິທໍ – ສປ຺ປິ ນວນີຕໍ ເຕລໍ ມຘຸ ຜາຓິຕໍ ໂລຓໍ ອພ຺ຠນ຺ຕຣານໍ ຣຕິຍາ ອປຣິຕສ຺ສາຍ ຜາສຸວິຫາຣາຍ ພາຫິຣານໍ ປຏິຆາຕາຍ. ອິເມສໍ ໂຂ, ຠິກ຺ຂເວ, ຈຕຸນ຺ນໍ ອາຫາຣານໍ ນິກາມລາຠີ ໂຫຕິ ອກິຈ຺ຉລາຠີ ອກສິຣລາຠີ.

‘‘ຍໂຕ ໂຂ, ຠິກ຺ຂເວ, ຣຎ຺ໂຎ ປຈ຺ຈນ຺ຕິມໍ ນຄຣໍ ອິເມຫິ ສຕ຺ຕຫິ ນຄຣປຣິກ຺ຂາເຣຫິ ສຸປຣິກ຺ຂຕໍ ໂຫຕິ, ອິເມສຎ຺ຈ ຈຕຸນ຺ນໍ ອາຫາຣານໍ ນິກາມລາຠີ ໂຫຕິ ອກິຈ຺ຉລາຠີ ອກສິຣລາຠີ. ອິທໍ ວຸຈ຺ຈຕິ, ຠິກ຺ຂເວ, ຣຎ຺ໂຎ ປຈ຺ຈນ຺ຕິມໍ ນຄຣໍ ອກຣຓີຍໍ ພາຫິເຣຫິ ປຈ຺ຈຕ຺ຖິເກຫິ ປຈ຺ຈາມິຕ຺ເຕຫິ. ເອວເມວໍ ໂຂ, ຠິກ຺ຂເວ, ຍໂຕ ອຣິຍສາວໂກ ສຕ຺ຕຫິ ສທ຺ຘມ຺ເມຫິ ສມນ຺ນາຄໂຕ ໂຫຕິ, ຈຕຸນ຺ນຎ຺ຈ ຌານານໍ ອາຠິເຈຕສິການໍ ທິຏ຺ຐຘມ຺ມສຸຂວິຫາຣານໍ ນິກາມລາຠີ ໂຫຕິ ອກິຈ຺ຉລາຠີ ອກສິຣລາຠີ. ອຍໍ ວຸຈ຺ຈຕິ, ຠິກ຺ຂເວ, ອຣິຍສາວໂກ ອກຣຓີໂຍ ມາຣສ຺ສ ອກຣຓີໂຍ ປາປິມໂຕ. ກຕເມຫິ ສຕ຺ຕຫິ ສທ຺ຘມ຺ເມຫິ ສມນ຺ນາຄໂຕ ໂຫຕິ?

‘‘ເສຍ຺ຍຖາປິ, ຠິກ຺ຂເວ, ຣຎ຺ໂຎ ປຈ຺ຈນ຺ຕິເມ ນຄເຣ ເອສິກາ ໂຫຕິ ຄມ຺ຠີຣເນມາ ສຸນິຂາຕາ ອຈລາ ອສມ຺ປເວຘີ ອພ຺ຠນ຺ຕຣານໍ ຄຸຕ຺ຕິຍາ ພາຫິຣານໍ ປຏິຆາຕາຍ. ເອວເມວໍ ໂຂ, ຠິກ຺ຂເວ, ອຣິຍສາວໂກ ສທ຺ໂຘ ໂຫຕິ, ສທ຺ທຫຕິ ຕຖາຄຕສ຺ສ ໂພຘິໍ ‘ອິຕິປິ ໂສ…ເປ… ພຸທ຺ໂຘ ຠຄວາ’ຕິ. ສທ຺ເຘສິໂກ, ຠິກ຺ຂເວ, ອຣິຍສາວໂກ ອກຸສລໍ ປຊຫຕິ, ກຸສລໍ ຠາເວຕິ; ສາວຊ຺ຊໍ ປຊຫຕິ, ອນວຊ຺ຊໍ ຠາເວຕິ; ສຸທ຺ຘໍ ອຕ຺ຕານໍ ປຣິຫຣຕິ. ອິມິນາ ປຐເມນ ສທ຺ຘມ຺ເມນ ສມນ຺ນາຄໂຕ ໂຫຕິ.

‘‘ເສຍ຺ຍຖາປິ, ຠິກ຺ຂເວ, ຣຎ຺ໂຎ ປຈ຺ຈນ຺ຕິເມ ນຄເຣ ປຣິກ຺ຂາ ໂຫຕິ ຄມ຺ຠີຣາ ເຈວ ວິຕ຺ຖຕາ ຈ ອພ຺ຠນ຺ຕຣານໍ ຄຸຕ຺ຕິຍາ ພາຫິຣານໍ ປຏິຆາຕາຍ. ເອວເມວໍ ໂຂ, ຠິກ຺ຂເວ, ອຣິຍສາວໂກ ຫິຣີມາ ໂຫຕິ, ຫິຣີຍຕິ ກາຍທຸຈ຺ຈຣິເຕນ ວຈີທຸຈ຺ຈຣິເຕນ ມໂນທຸຈ຺ຈຣິເຕນ, ຫິຣີຍຕິ ປາປການໍ ອກຸສລານໍ ຘມ຺ມານໍ ສມາປຕ຺ຕິຍາ. ຫິຣີປຣິກ຺ໂຂ ໂຂ, ຠິກ຺ຂເວ, ອຣິຍສາວໂກ ອກຸສລໍ ປຊຫຕິ, ກຸສລໍ ຠາເວຕິ; ສາວຊ຺ຊໍ ປຊຫຕິ, ອນວຊ຺ຊໍ ຠາເວຕິ; ສຸທ຺ຘໍ ອຕ຺ຕານໍ ປຣິຫຣຕິ. ອິມິນາ ທຸຕິເຍນ ສທ຺ຘມ຺ເມນ ສມນ຺ນາຄໂຕ ໂຫຕິ.

‘‘ເສຍ຺ຍຖາປິ, ຠິກ຺ຂເວ, ຣຎ຺ໂຎ ປຈ຺ຈນ຺ຕິເມ ນຄເຣ ອນຸປຣິຍາຍປໂຖ ໂຫຕິ ອຸຈ຺ໂຈ ເຈວ ວິຕ຺ຖໂຕ ຈ ອພ຺ຠນ຺ຕຣານໍ ຄຸຕ຺ຕິຍາ ພາຫິຣານໍ ປຏິຆາຕາຍ. ເອວເມວໍ ໂຂ, ຠິກ຺ຂເວ, ອຣິຍສາວໂກ ໂອຕ຺ຕປ຺ປີ ໂຫຕິ, ໂອຕ຺ຕປ຺ປຕິ ກາຍທຸຈ຺ຈຣິເຕນ ວຈີທຸຈ຺ຈຣິເຕນ ມໂນທຸຈ຺ຈຣິເຕນ, ໂອຕ຺ຕປ຺ປຕິ ປາປການໍ ອກຸສລານໍ ຘມ຺ມານໍ ສມາປຕ຺ຕິຍາ. ໂອຕ຺ຕປ຺ປປຣິຍາຍປໂຖ, ຠິກ຺ຂເວ, ອຣິຍສາວໂກ ອກຸສລໍ ປຊຫຕິ, ກຸສລໍ ຠາເວຕິ; ສາວຊ຺ຊໍ ປຊຫຕິ, ອນວຊ຺ຊໍ ຠາເວຕິ; ສຸທ຺ຘໍ ອຕ຺ຕານໍ ປຣິຫຣຕິ. ອິມິນາ ຕຕິເຍນ ສທ຺ຘມ຺ເມນ ສມນ຺ນາຄໂຕ ໂຫຕິ.

‘‘ເສຍ຺ຍຖາປິ, ຠິກ຺ຂເວ, ຣຎ຺ໂຎ ປຈ຺ຈນ຺ຕິເມ ນຄເຣ ພຫຸໍ ອາວຸຘໍ ສນ຺ນິຈິຕໍ ໂຫຕິ ສລາກຎ຺ເຈວ ເຊວນິກຎ຺ຈ ອພ຺ຠນ຺ຕຣານໍ ຄຸຕ຺ຕິຍາ ພາຫິຣານໍ ປຏິຆາຕາຍ. ເອວເມວໍ ໂຂ, ຠິກ຺ຂເວ, ອຣິຍສາວໂກ ພຫຸສ຺ສຸໂຕ ໂຫຕິ…ເປ… ທິຏ຺ຐິຍາ ສຸປ຺ປຏິວິທ຺ຘາ. ສຸຕາວຸໂຘ, ຠິກ຺ຂເວ, ອຣິຍສາວໂກ ອກຸສລໍ ປຊຫຕິ, ກຸສລໍ ຠາເວຕິ; ສາວຊ຺ຊໍ ປຊຫຕິ, ອນວຊ຺ຊໍ ຠາເວຕິ; ສຸທ຺ຘໍ ອຕ຺ຕານໍ ປຣິຫຣຕິ. ອິມິນາ ຈຕຸຕ຺ເຖນ ສທ຺ຘມ຺ເມນ ສມນ຺ນາຄໂຕ ໂຫຕິ.

‘‘ເສຍ຺ຍຖາປິ, ຠິກ຺ຂເວ, ຣຎ຺ໂຎ ປຈ຺ຈນ຺ຕິເມ ນຄເຣ ພຫຸພລກາໂຍ ປຏິວສຕິ, ເສຍ຺ຍຖິທໍ – ຫຕ຺ຖາໂຣຫາ ອສ຺ສາໂຣຫາ ຣຖິກາ ຘນຸຄ຺ຄຫາ ເຈລກາ ຈລກາ ປິຓ຺ຑທາຍກາ ອຸຄ຺ຄາ ຣາຊປຸຕ຺ຕາ ປກ຺ຂນ຺ທິໂນ ມຫານາຄາ ສູຣາ ຈມ຺ມໂຍຘິໂນ ທາສກປຸຕ຺ຕາ ອພ຺ຠນ຺ຕຣານໍ ຄຸຕ຺ຕິຍາ ພາຫິຣານໍ ປຏິຆາຕາຍ. ເອວເມວໍ ໂຂ, ຠິກ຺ຂເວ, ອຣິຍສາວໂກ ອາຣທ຺ຘວີຣິໂຍ ວິຫຣຕິ ອກຸສລານໍ ຘມ຺ມານໍ ປຫານາຍ, ກຸສລານໍ ຘມ຺ມານໍ ອຸປສມ຺ປທາຍ, ຖາມວາ ທຬ຺ຫປຣກ຺ກໂມ ອນິກ຺ຂິຕ຺ຕຘຸໂຣ ກຸສເລສຸ ຘມ຺ເມສຸ. ວີຣິຍພລກາໂຍ, ຠິກ຺ຂເວ, ອຣິຍສາວໂກ ອກຸສລໍ ປຊຫຕິ, ກຸສລໍ ຠາເວຕິ; ສາວຊ຺ຊໍ ປຊຫຕິ, ອນວຊ຺ຊໍ ຠາເວຕິ; ສຸທ຺ຘໍ ອຕ຺ຕານໍ ປຣິຫຣຕິ. ອິມິນາ ປຎ຺ຈເມນ ສທ຺ຘມ຺ເມນ ສມນ຺ນາຄໂຕ ໂຫຕິ.

‘‘ເສຍ຺ຍຖາປິ, ຠິກ຺ຂເວ, ຣຎ຺ໂຎ ປຈ຺ຈນ຺ຕິເມ ນຄເຣ ໂທວາຣິໂກ ໂຫຕິ ປຓ຺ຑິໂຕ ພ຺ຍຕ຺ໂຕ ເມຘາວີ ອຎ຺ຎາຕານໍ ນິວາເຣຕາ ຎາຕານໍ ປເວເສຕາ ອພ຺ຠນ຺ຕຣານໍ ຄຸຕ຺ຕິຍາ ພາຫິຣານໍ ປຏິຆາຕາຍ. ເອວເມວໍ ໂຂ, ຠິກ຺ຂເວ, ອຣິຍສາວໂກ ສຕິມາ ໂຫຕິ ປຣເມນ ສຕິເນປກ຺ເກນ ສມນ຺ນາຄໂຕ ຈິຣກຕມ຺ປິ ຈິຣຠາສິຕມ຺ປິ ສຣິຕາ ອນຸສ຺ສຣິຕາ. ສຕິໂທວາຣິໂກ, ຠິກ຺ຂເວ, ອຣິຍສາວໂກ ອກຸສລໍ ປຊຫຕິ, ກຸສລໍ ຠາເວຕິ; ສາວຊ຺ຊໍ ປຊຫຕິ, ອນວຊ຺ຊໍ ຠາເວຕິ; ສຸທ຺ຘໍ ອຕ຺ຕານໍ ປຣິຫຣຕິ. ອິມິນາ ຉຏ຺ເຐນ ສທ຺ຘມ຺ເມນ ສມນ຺ນາຄໂຕ ໂຫຕິ.

‘‘ເສຍ຺ຍຖາປິ, ຠິກ຺ຂເວ, ຣຎ຺ໂຎ ປຈ຺ຈນ຺ຕິເມ ນຄເຣ ປາກາໂຣ ໂຫຕິ ອຸຈ຺ໂຈ ເຈວ ວິຕ຺ຖໂຕ ຈ ວາສນເລປນສມ຺ປນ຺ໂນ ຈ ອພ຺ຠນ຺ຕຣານໍ ຄຸຕ຺ຕິຍາ ພາຫິຣານໍ ປຏິຆາຕາຍ. ເອວເມວໍ ໂຂ, ຠິກ຺ຂເວ, ອຣິຍສາວໂກ ປຎ຺ຎວາ ໂຫຕິ ອຸທຍຕ຺ຖຄາມິນິຍາ ປຎ຺ຎາຍ ສມນ຺ນາຄໂຕ ອຣິຍາຍ ນິພ຺ເພຘິກາຍ ສມ຺ມາ ທຸກ຺ຂກ຺ຂຍຄາມິນິຍາ. ປຎ຺ຎາວາສນເລປນສມ຺ປນ຺ໂນ, ຠິກ຺ຂເວ, ອຣິຍສາວໂກ ອກຸສລໍ ປຊຫຕິ, ກຸສລໍ ຠາເວຕິ; ສາວຊ຺ຊໍ ປຊຫຕິ, ອນວຊ຺ຊໍ ຠາເວຕິ; ສຸທ຺ຘໍ ອຕ຺ຕານໍ ປຣິຫຣຕິ. ອິມິນາ ສຕ຺ຕເມນ ສທ຺ຘມ຺ເມນ ສມນ຺ນາຄໂຕ ໂຫຕິ. ອິເມຫິ ສຕ຺ຕຫິ ສທ຺ຘມ຺ເມຫິ ສມນ຺ນາຄໂຕ ໂຫຕິ.

‘‘ກຕເມສໍ ຈຕຸນ຺ນໍ ຌານານໍ ອາຠິເຈຕສິການໍ ທິຏ຺ຐຘມ຺ມສຸຂວິຫາຣານໍ ນິກາມລາຠີ ໂຫຕິ ອກິຈ຺ຉລາຠີ ອກສິຣລາຠີ? ເສຍ຺ຍຖາປິ, ຠິກ຺ຂເວ, ຣຎ຺ໂຎ ປຈ຺ຈນ຺ຕິເມ ນຄເຣ ພຫຸໍ ຕິຓກຏ຺ໂຐທກໍ ສນ຺ນິຈິຕໍ ໂຫຕິ ອພ຺ຠນ຺ຕຣານໍ ຣຕິຍາ ອປຣິຕສ຺ສາຍ ຜາສຸວິຫາຣາຍ ພາຫິຣານໍ ປຏິຆາຕາຍ. ເອວເມວໍ ໂຂ, ຠິກ຺ຂເວ, ອຣິຍສາວໂກ ວິວິຈ຺ເຈວ ກາເມຫິ…ເປ… ປຐມໍ ຌານໍ ອຸປສມ຺ປຊ຺ຊ ວິຫຣຕິ ອຕ຺ຕໂນ ຣຕິຍາ ອປຣິຕສ຺ສາຍ ຜາສຸວິຫາຣາຍ ໂອກ຺ກມນາຍ ນິພ຺ພານສ຺ສ.

‘‘ເສຍ຺ຍຖາປິ, ຠິກ຺ຂເວ, ຣຎ຺ໂຎ ປຈ຺ຈນ຺ຕິເມ ນຄເຣ ພຫຸໍ ສາລິຍວກໍ ສນ຺ນິຈິຕໍ ໂຫຕິ ອພ຺ຠນ຺ຕຣານໍ ຣຕິຍາ ອປຣິຕສ຺ສາຍ ຜາສຸວິຫາຣາຍ ພາຫິຣານໍ ປຏິຆາຕາຍ. ເອວເມວໍ ໂຂ, ຠິກ຺ຂເວ, ອຣິຍສາວໂກ ວິຕກ຺ກວິຈາຣານໍ ວູປສມາ…ເປ… ທຸຕິຍໍ ຌານໍ ອຸປສມ຺ປຊ຺ຊ ວິຫຣຕິ ອຕ຺ຕໂນ ຣຕິຍາ ອປຣິຕສ຺ສາຍ ຜາສຸວິຫາຣາຍ ໂອກ຺ກມນາຍ ນິພ຺ພານສ຺ສ.

‘‘ເສຍ຺ຍຖາປິ, ຠິກ຺ຂເວ, ຣຎ຺ໂຎ ປຈ຺ຈນ຺ຕິເມ ນຄເຣ ພຫຸໍ ຕິລມຸຄ຺ຄມາສາປຣຓ຺ຓໍ ສນ຺ນິຈິຕໍ ໂຫຕິ ອພ຺ຠນ຺ຕຣານໍ ຣຕິຍາ ອປຣິຕສ຺ສາຍ ຜາສຸວິຫາຣາຍ ພາຫິຣານໍ ປຏິຆາຕາຍ. ເອວເມວໍ ໂຂ, ຠິກ຺ຂເວ, ອຣິຍສາວໂກ ປີຕິຍາ ຈ ວິຣາຄາ…ເປ… ຕຕິຍໍ ຌານໍ ອຸປສມ຺ປຊ຺ຊ ວິຫຣຕິ ອຕ຺ຕໂນ ຣຕິຍາ ອປຣິຕສ຺ສາຍ ຜາສຸວິຫາຣາຍ ໂອກ຺ກມນາຍ ນິພ຺ພານສ຺ສ.

‘‘ເສຍ຺ຍຖາປິ, ຠິກ຺ຂເວ, ຣຎ຺ໂຎ ປຈ຺ຈນ຺ຕິເມ ນຄເຣ ພຫຸໍ ເຠສຊ຺ຊໍ ສນ຺ນິຈິຕໍ ໂຫຕິ, ເສຍ຺ຍຖິທໍ – ສປ຺ປິ ນວນີຕໍ ເຕລໍ ມຘຸ ຜາຓິຕໍ ໂລຓໍ ອພ຺ຠນ຺ຕຣານໍ ຣຕິຍາ ອປຣິຕສ຺ສາຍ ຜາສຸວິຫາຣາຍ ພາຫິຣານໍ ປຏິຆາຕາຍ. ເອວເມວໍ ໂຂ ຠິກ຺ຂເວ, ອຣິຍສາວໂກ ສຸຂສ຺ສ ຈ ປຫານາ ທຸກ຺ຂສ຺ສ ຈ ປຫານາ ປຸພ຺ເພວ ໂສມນສ຺ສໂທມນສ຺ສານໍ ອຕ຺ຖງ຺ຄມາ ອທຸກ຺ຂມສຸຂໍ ອຸເປກ຺ຂາສຕິປາຣິສຸທ຺ຘິໍ ຈຕຸຕ຺ຖໍ ຌານໍ ອຸປສມ຺ປຊ຺ຊ ວິຫຣຕິ ອຕ຺ຕໂນ ຣຕິຍາ ອປຣິຕສ຺ສາຍ ຜາສຸວິຫາຣາຍ ໂອກ຺ກມນາຍ ນິພ຺ພານສ຺ສ. ອິເມສໍ ຈຕຸນ຺ນໍ ຌານານໍ ອາຠິເຈຕສິການໍ ທິຏ຺ຐຘມ຺ມສຸຂວິຫາຣານໍ ນິກາມລາຠີ ໂຫຕິ ອກິຈ຺ຉລາຠີ ອກສິຣລາຠີ.

‘‘ຍໂຕ ໂຂ, ຠິກ຺ຂເວ, ອຣິຍສາວໂກ ອິເມຫິ ສຕ຺ຕຫິ ສທ຺ຘມ຺ເມຫິ ສມນ຺ນາຄໂຕ ໂຫຕິ, ອິເມສຎ຺ຈ ຈຕຸນ຺ນໍ ຌານານໍ ອາຠິເຈຕສິການໍ ທິຏ຺ຐຘມ຺ມສຸຂວິຫາຣານໍ ນິກາມລາຠີ ໂຫຕິ ອກິຈ຺ຉລາຠີ ອກສິຣລາຠີ. ອຍໍ ວຸຈ຺ຈຕິ, ຠິກ຺ຂເວ, ອຣິຍສາວໂກ ອກຣຓີໂຍ ມາຣສ຺ສ ອກຣຓີໂຍ ປາປິມໂຕ’’ຕິ. ຕຕິຍໍ.