໔. ສີຫເສນາປຕິສຸຕ຺ຕໍ

໕໗. ເອວໍ ເມ ສຸຕໍ – ເອກໍ ສມຍໍ ຠຄວາ ເວສາລິຍໍ ວິຫຣຕິ ມຫາວເນ ກູຏາຄາຣສາລາຍໍ. ອຖ ໂຂ ສີໂຫ ເສນາປຕິ ເຍນ ຠຄວາ ເຕນຸປສງ຺ກມິ; ອຸປສງ຺ກມິຕ຺ວາ ຠຄວນ຺ຕໍ ອຠິວາເທຕ຺ວາ ເອກມນ຺ຕໍ ນິສີທິ. ເອກມນ຺ຕໍ ນິສິນ຺ໂນ ໂຂ ສີໂຫ ເສນາປຕິ ຠຄວນ຺ຕໍ ເອຕທໂວຈ – ‘‘ສກ຺ກາ ນຸ ໂຂ, ຠນ຺ເຕ, ສນ຺ທິຏ຺ຐິກໍ ທານຜລໍ ປຎ຺ຎາເປຕຸ’’ນ຺ຕິ?

‘‘ເຕນ ຫິ, ສີຫ, ຕຎ຺ເຎເວຕ຺ຖ ປຏິປຸຈ຺ຉິສ຺ສາມິ, ຍຖາ ເຕ ຂເມຍ຺ຍ ຕຖາ ນໍ ພ຺ຍາກເຣຍ຺ຍາສິ. ຕໍ ກິໍ ມຎ຺ຎສິ, ສີຫ, ອິຘ ທ຺ເວ ປຸຣິສາ – ເອໂກ ປຸຣິໂສ ອສ຺ສທ຺ໂຘ ມຈ຺ຉຣີ ກທຣິໂຍ ປຣິຠາສໂກ, ເອໂກ ປຸຣິໂສ ສທ຺ໂຘ ທານປຕິ ອນຸປ຺ປທານຣໂຕ. ຕໍ ກິໍ ມຎ຺ຎສິ, ສີຫ, ກໍ ນຸ ໂຂ [ກິໍ ນຸ ໂຂ (ກ.)] ອຣຫນ຺ໂຕ ປຐມໍ ອນຸກມ຺ປນ຺ຕາ ອນຸກມ຺ເປຍ຺ຍຸໍ – ‘ໂຍ ວາ ໂສ ປຸຣິໂສ ອສ຺ສທ຺ໂຘ ມຈ຺ຉຣີ ກທຣິໂຍ ປຣິຠາສໂກ, ໂຍ ວາ ໂສ ປຸຣິໂສ ສທ຺ໂຘ ທານປຕິ ອນຸປ຺ປທານຣໂຕ’’’ຕິ?

‘‘ໂຍ ໂສ, ຠນ຺ເຕ, ປຸຣິໂສ ອສ຺ສທ຺ໂຘ ມຈ຺ຉຣີ ກທຣິໂຍ ປຣິຠາສໂກ, ກິນ຺ຕໍ [ກິນ຺ຕິ (ກ.)] ອຣຫນ຺ໂຕ ປຐມໍ ອນຸກມ຺ປນ຺ຕາ ອນຸກມ຺ປິສ຺ສນ຺ຕິ! ໂຍ ຈ ໂຂ ໂສ, ຠນ຺ເຕ, ປຸຣິໂສ ສທ຺ໂຘ ທານປຕິ ອນຸປ຺ປທານຣໂຕ ຕໍເຍວ ອຣຫນ຺ໂຕ ປຐມໍ ອນຸກມ຺ປນ຺ຕາ ອນຸກມ຺ເປຍ຺ຍຸໍ’’.

‘‘ຕໍ ກິໍ ມຎ຺ຎສິ, ສີຫ, ກໍ ນຸ ໂຂ ອຣຫນ຺ໂຕ ປຐມໍ ອຸປສງ຺ກມນ຺ຕາ ອຸປສງ຺ກເມຍ຺ຍຸໍ – ‘ໂຍ ວາ ໂສ ປຸຣິໂສ ອສ຺ສທ຺ໂຘ ມຈ຺ຉຣີ ກທຣິໂຍ ປຣິຠາສໂກ, ໂຍ ວາ ໂສ ປຸຣິໂສ ສທ຺ໂຘ ທານປຕິ ອນຸປ຺ປທານຣໂຕ’’’ຕິ? ‘‘ໂຍ ໂສ, ຠນ຺ເຕ, ປຸຣິໂສ ອສ຺ສທ຺ໂຘ ມຈ຺ຉຣີ ກທຣິໂຍ ປຣິຠາສໂກ, ກິນ຺ຕໍ ອຣຫນ຺ໂຕ ປຐມໍ ອຸປສງ຺ກມນ຺ຕາ ອຸປສງ຺ກມິສ຺ສນ຺ຕິ! ໂຍ ຈ ໂຂ ໂສ, ຠນ຺ເຕ, ປຸຣິໂສ ສທ຺ໂຘ ທານປຕິ ອນຸປ຺ປທານຣໂຕ ຕໍເຍວ ອຣຫນ຺ໂຕ ປຐມໍ ອຸປສງ຺ກມນ຺ຕາ ອຸປສງ຺ກເມຍ຺ຍຸໍ’’.

‘‘ຕໍ ກິໍ ມຎ຺ຎສິ, ສີຫ, ກສ຺ສ ນຸ ໂຂ ອຣຫນ຺ໂຕ ປຐມໍ ປຏິຄ຺ຄຓ຺ຫນ຺ຕາ ປຏິຄ຺ຄຓ຺ເຫຍ຺ຍຸໍ – ‘ໂຍ ວາ ໂສ ປຸຣິໂສ ອສ຺ສທ຺ໂຘ ມຈ຺ຉຣີ ກທຣິໂຍ ປຣິຠາສໂກ, ໂຍ ວາ ໂສ ປຸຣິໂສ ສທ຺ໂຘ ທານປຕິ ອນຸປ຺ປທານຣໂຕ’’’ຕິ? ‘‘ໂຍ ໂສ, ຠນ຺ເຕ, ປຸຣິໂສ ອສ຺ສທ຺ໂຘ ມຈ຺ຉຣີ ກທຣິໂຍ ປຣິຠາສໂກ, ກິນ຺ຕໍ ຕສ຺ສ ອຣຫນ຺ໂຕ ປຐມໍ ປຏິຄ຺ຄຓ຺ຫນ຺ຕາ ປຏິຄ຺ຄຓ຺ຫິສ຺ສນ຺ຕິ! ໂຍ ຈ ໂຂ ໂສ, ຠນ຺ເຕ, ປຸຣິໂສ ສທ຺ໂຘ ທານປຕິ ອນຸປ຺ປທານຣໂຕ ຕສ຺ເສວ ອຣຫນ຺ໂຕ ປຐມໍ ປຏິຄ຺ຄຓ຺ຫນ຺ຕາ ປຏິຄ຺ຄຓ຺ເຫຍ຺ຍຸໍ’’’.

‘‘ຕໍ ກິໍ ມຎ຺ຎສິ, ສີຫ, ກສ຺ສ ນຸ ໂຂ ອຣຫນ຺ໂຕ ປຐມໍ ຘມ຺ມໍ ເທເສນ຺ຕາ ເທເສຍ຺ຍຸໍ – ‘ໂຍ ວາ ໂສ ປຸຣິໂສ ອສ຺ສທ຺ໂຘ ມຈ຺ຉຣີ ກທຣິໂຍ ປຣິຠາສໂກ, ໂຍ ວາ ໂສ ປຸຣິໂສ ສທ຺ໂຘ ທານປຕິ ອນຸປ຺ປທານຣໂຕ’’’ຕິ? ‘‘ໂຍ ໂສ, ຠນ຺ເຕ, ປຸຣິໂສ ອສ຺ສທ຺ໂຘ ມຈ຺ຉຣີ ກທຣິໂຍ ປຣິຠາສໂກ, ກິນ຺ຕໍ ຕສ຺ສ ອຣຫນ຺ໂຕ ປຐມໍ ຘມ຺ມໍ ເທເສນ຺ຕາ ເທເສສ຺ສນ຺ຕິ! ໂຍ ຈ ໂຂ ໂສ, ຠນ຺ເຕ, ປຸຣິໂສ ສທ຺ໂຘ ທານປຕິ ອນຸປ຺ປທານຣໂຕ ຕສ຺ເສວ ອຣຫນ຺ໂຕ ປຐມໍ ຘມ຺ມໍ ເທເສນ຺ຕາ ເທເສຍ຺ຍຸໍ’’.

‘‘ຕໍ ກິໍ ມຎ຺ຎສິ, ສີຫ, ກສ຺ສ ນຸ ໂຂ ກລ຺ຍາໂຓ ກິຕ຺ຕິສທ຺ໂທ ອພ຺ຠຸຄ຺ຄຈ຺ເຉຍ຺ຍ – ‘ໂຍ ວາ ໂສ ປຸຣິໂສ ອສ຺ສທ຺ໂຘ ມຈ຺ຉຣີ ກທຣິໂຍ ປຣິຠາສໂກ, ໂຍ ວາ ໂສ ປຸຣິໂສ ສທ຺ໂຘ ທານປຕິ ອນຸປ຺ປທານຣໂຕ’’’ຕິ? ‘‘ໂຍ ໂສ, ຠນ຺ເຕ, ປຸຣິໂສ ອສ຺ສທ຺ໂຘ ມຈ຺ຉຣີ ກທຣິໂຍ ປຣິຠາສໂກ, ກິນ຺ຕໍ ຕສ຺ສ ກລ຺ຍາໂຓ ກິຕ຺ຕິສທ຺ໂທ ອພ຺ຠຸຄ຺ຄຈ຺ຉິສ຺ສຕິ! ໂຍ ຈ ໂຂ ໂສ, ຠນ຺ເຕ, ປຸຣິໂສ ສທ຺ໂຘ ທານປຕິ ອນຸປ຺ປທານຣໂຕ ຕສ຺ເສວ ກລ຺ຍາໂຓ ກິຕ຺ຕິສທ຺ໂທ ອພ຺ຠຸຄ຺ຄຈ຺ເຉຍ຺ຍ’’.

‘‘ຕໍ ກິໍ ມຎ຺ຎສິ, ສີຫ, ໂກ ນຸ ໂຂ ຍໍຍເທວ ປຣິສໍ ອຸປສງ຺ກເມຍ຺ຍ, ຍທິ ຂຕ຺ຕິຍປຣິສໍ ຍທິ ພ຺ຣາຫ຺ມຓປຣິສໍ ຍທິ ຄຫປຕິປຣິສໍ ຍທິ ສມຓປຣິສໍ ວິສາຣໂທ ອຸປສງ຺ກເມຍ຺ຍ ອມງ຺ກຸຠູໂຕ – ‘ໂຍ ວາ ໂສ ປຸຣິໂສ ອສ຺ສທ຺ໂຘ ມຈ຺ຉຣີ ກທຣິໂຍ ປຣິຠາສໂກ, ໂຍ ວາ ໂສ ປຸຣິໂສ ສທ຺ໂຘ ທານປຕິ ອນຸປ຺ປທານຣໂຕ’’’ຕິ? ‘‘ໂຍ ໂສ, ຠນ຺ເຕ, ປຸຣິໂສ ອສ຺ສທ຺ໂຘ ມຈ຺ຉຣີ ກທຣິໂຍ ປຣິຠາສໂກ, ກິໍ ໂສ ຍໍຍເທວ ປຣິສໍ ອຸປສງ຺ກມິສ຺ສຕິ, ຍທິ ຂຕ຺ຕິຍປຣິສໍ ຍທິ ພ຺ຣາຫ຺ມຓປຣິສໍ ຍທິ ຄຫປຕິປຣິສໍ ຍທິ ສມຓປຣິສໍ ວິສາຣໂທ ອຸປສງ຺ກມິສ຺ສຕິ ອມງ຺ກຸຠູໂຕ! ໂຍ ຈ ໂຂ ໂສ, ຠນ຺ເຕ, ປຸຣິໂສ ສທ຺ໂຘ ທານປຕິ ອນຸປ຺ປທານຣໂຕ ໂສ ຍໍຍເທວ ປຣິສໍ ອຸປສງ຺ກເມຍ຺ຍ, ຍທິ ຂຕ຺ຕິຍປຣິສໍ ຍທິ ພ຺ຣາຫ຺ມຓປຣິສໍ ຍທິ ຄຫປຕິປຣິສໍ ຍທິ ສມຓປຣິສໍ ວິສາຣໂທ ອຸປສງ຺ກເມຍ຺ຍ ອມງ຺ກຸຠູໂຕ’’.

‘‘ຕໍ ກິໍ ມຎ຺ຎສິ, ສີຫ, ໂກ ນຸ ໂຂ ກາຍສ຺ສ ເຠທາ ປຣໍ ມຣຓາ ສຸຄຕິໍ ສຄ຺ຄໍ ໂລກໍ ອຸປປຊ຺ເຊຍ຺ຍ – ‘ໂຍ ວາ ໂສ ປຸຣິໂສ ອສ຺ສທ຺ໂຘ ມຈ຺ຉຣີ ກທຣິໂຍ ປຣິຠາສໂກ, ໂຍ ວາ ໂສ ປຸຣິໂສ ສທ຺ໂຘ ທານປຕິ ອນຸປ຺ປທານຣໂຕ’’’ຕິ? ‘‘ໂຍ ໂສ, ຠນ຺ເຕ, ປຸຣິໂສ ອສ຺ສທ຺ໂຘ ມຈ຺ຉຣີ ກທຣິໂຍ ປຣິຠາສໂກ, ກິໍ ໂສ ກາຍສ຺ສ ເຠທາ ປຣໍ ມຣຓາ ສຸຄຕິໍ ສຄ຺ຄໍ ໂລກໍ ອຸປປຊ຺ຊິສ຺ສຕິ! ໂຍ ຈ ໂຂ ໂສ, ຠນ຺ເຕ, ປຸຣິໂສ ສທ຺ໂຘ ທານປຕິ ອນຸປ຺ປທານຣໂຕ ໂສ ກາຍສ຺ສ ເຠທາ ປຣໍ ມຣຓາ ສຸຄຕິໍ ສຄ຺ຄໍ ໂລກໍ ອຸປປຊ຺ເຊຍ຺ຍ’’.

‘‘ຍານິມານິ, ຠນ຺ເຕ, ຠຄວຕາ ສນ຺ທິຏ຺ຐິການິ ທານຜລານິ ອກ຺ຂາຕານິ, ນາຫໍ ເອຕ຺ຖ ຠຄວໂຕ ສທ຺ຘາຍ ຄຈ຺ຉາມິ. ອຫມ຺ປິ ເອຕານິ ຊານາມິ. ອຫໍ, ຠນ຺ເຕ, ທາຍໂກ ທານປຕິ, ມໍ ອຣຫນ຺ໂຕ ປຐມໍ ອນຸກມ຺ປນ຺ຕາ ອນຸກມ຺ປນ຺ຕິ. ອຫໍ, ຠນ຺ເຕ, ທາຍໂກ ທານປຕິ, ມໍ ອຣຫນ຺ໂຕ ປຐມໍ ອຸປສງ຺ກມນ຺ຕາ ອຸປສງ຺ກມນ຺ຕິ. ອຫໍ, ຠນ຺ເຕ, ທາຍໂກ ທານປຕິ, ມຍ຺ຫໍ ອຣຫນ຺ໂຕ ປຐມໍ ປຏິຄ຺ຄຓ຺ຫນ຺ຕາ ປຏິຄ຺ຄຓ຺ຫນ຺ຕິ. ອຫໍ, ຠນ຺ເຕ, ທາຍໂກ ທານປຕິ, ມຍ຺ຫໍ ອຣຫນ຺ໂຕ ປຐມໍ ຘມ຺ມໍ ເທເສນ຺ຕາ ເທເສນ຺ຕິ. ອຫໍ, ຠນ຺ເຕ, ທາຍໂກ ທານປຕິ, ມຍ຺ຫໍ ກລ຺ຍາໂຓ ກິຕ຺ຕິສທ຺ໂທ ອພ຺ຠຸຄ຺ຄໂຕ – ‘ສີໂຫ ເສນາປຕິ ທາຍໂກ ກາຣໂກ ສງ຺ຆຸປຏ຺ຐາໂກ’ຕິ. ອຫໍ, ຠນ຺ເຕ, ທາຍໂກ ທານປຕິ ຍໍຍເທວ ປຣິສໍ ອຸປສງ຺ກມາມິ, ຍທິ ຂຕ຺ຕິຍປຣິສໍ…ເປ… ຍທິ ສມຓປຣິສໍ ວິສາຣໂທ ອຸປສງ຺ກມາມິ ອມງ຺ກຸຠູໂຕ. ຍານິມານິ, ຠນ຺ເຕ, ຠຄວຕາ ສນ຺ທິຏ຺ຐິການິ ທານຜລານິ ອກ຺ຂາຕານິ, ນາຫໍ ເອຕ຺ຖ ຠຄວໂຕ ສທ຺ຘາຍ ຄຈ຺ຉາມິ. ອຫມ຺ປິ ເອຕານິ ຊານາມິ. ຍຎ຺ຈ ໂຂ ມໍ, ຠນ຺ເຕ, ຠຄວາ ເອວມາຫ – ‘ທາຍໂກ, ສີຫ, ທານປຕິ ກາຍສ຺ສ ເຠທາ ປຣໍ ມຣຓາ ສຸຄຕິໍ ສຄ຺ຄໍ ໂລກໍ ອຸປປຊ຺ຊຕີ’ຕິ. ເອຕາຫໍ ນ ຊານາມິ, ເອຕ຺ຖ ຈ ປນາຫໍ, ຠຄວໂຕ ສທ຺ຘາຍ ຄຈ຺ຉາມີ’’ຕິ. ‘‘ເອວເມຕໍ, ສີຫ; ເອວເມຕໍ, ສີຫ! ທາຍໂກ, ສີຫ, ທານປຕິ ກາຍສ຺ສ ເຠທາ ປຣໍ ມຣຓາ ສຸຄຕິໍ ສຄ຺ຄໍ ໂລກໍ ອຸປປຊ຺ຊຕີ’’ຕິ. ຈຕຸຕ຺ຖໍ.