໕. ອຣກ຺ເຂຍ຺ຍສຸຕ຺ຕໍ

໕໘. ‘‘ຈຕ຺ຕາຣິມານິ, ຠິກ຺ຂເວ, ຕຖາຄຕສ຺ສ ອຣກ຺ເຂຍ຺ຍານິ, ຕີຫິ ຈ ອນຸປວຊ຺ໂຊ. ກຕມານິ ຈຕ຺ຕາຣິ ຕຖາຄຕສ຺ສ ອຣກ຺ເຂຍ຺ຍານິ? ປຣິສຸທ຺ຘກາຍສມາຈາໂຣ, ຠິກ຺ຂເວ, ຕຖາຄໂຕ; ນຕ຺ຖິ ຕຖາຄຕສ຺ສ ກາຍທຸຈ຺ຈຣິຕໍ ຍໍ ຕຖາຄໂຕ ຣກ຺ເຂຍ຺ຍ – ‘ມາ ເມ ອິທໍ ປໂຣ ອຎ຺ຎາສີ’ຕິ. ປຣິສຸທ຺ຘວຈີສມາຈາໂຣ, ຠິກ຺ຂເວ, ຕຖາຄໂຕ; ນຕ຺ຖິ ຕຖາຄຕສ຺ສ ວຈີທຸຈ຺ຈຣິຕໍ ຍໍ ຕຖາຄໂຕ ຣກ຺ເຂຍ຺ຍ – ‘ມາ ເມ ອິທໍ ປໂຣ ອຎ຺ຎາສີ’ຕິ. ປຣິສຸທ຺ຘມໂນສມາຈາໂຣ, ຠິກ຺ຂເວ, ຕຖາຄໂຕ; ນຕ຺ຖິ ຕຖາຄຕສ຺ສ ມໂນທຸຈ຺ຈຣິຕໍ ຍໍ ຕຖາຄໂຕ ຣກ຺ເຂຍ຺ຍ – ‘ມາ ເມ ອິທໍ ປໂຣ ອຎ຺ຎາສີ’ຕິ. ປຣິສຸທ຺ຘາຊີໂວ, ຠິກ຺ຂເວ, ຕຖາຄໂຕ; ນຕ຺ຖິ ຕຖາຄຕສ຺ສ ມິຈ຺ຉາອາຊີໂວ ຍໍ ຕຖາຄໂຕ ຣກ຺ເຂຍ຺ຍ – ‘ມາ ເມ ອິທໍ ປໂຣ ອຎ຺ຎາສີ’ຕິ. ອິມານິ ຈຕ຺ຕາຣິ ຕຖາຄຕສ຺ສ ອຣກ຺ເຂຍ຺ຍານິ.

‘‘ກຕເມຫິ ຕີຫິ ອນຸປວຊ຺ໂຊ? ສ຺ວາກ຺ຂາຕຘມ຺ໂມ, ຠິກ຺ຂເວ, ຕຖາຄໂຕ. ຕຕ຺ຣ ວຕ ມໍ ສມໂຓ ວາ ພ຺ຣາຫ຺ມໂຓ ວາ ເທໂວ ວາ ມາໂຣ ວາ ພ຺ຣຫ຺ມາ ວາ ໂກຈິ ວາ ໂລກສ຺ມິໍ ສຫຘມ຺ເມນ ປຏິໂຈເທສ຺ສຕິ – ‘ອິຕິປິ ຕ຺ວໍ ນ ສ຺ວາກ຺ຂາຕຘມ຺ໂມ’ຕິ. ນິມິຕ຺ຕເມຕໍ, ຠິກ຺ຂເວ, ນ ສມນຸປສ຺ສາມິ. ເອຕມຫໍ [ເອຕໍປຫໍ (ສີ. ສ຺ຍາ.)], ຠິກ຺ຂເວ, ນິມິຕ຺ຕໍ ອສມນຸປສ຺ສນ຺ໂຕ ເຂມປ຺ປຕ຺ໂຕ ອຠຍປ຺ປຕ຺ໂຕ ເວສາຣຊ຺ຊປ຺ປຕ຺ໂຕ ວິຫຣາມິ.

‘‘ສຸປຎ຺ຎຕ຺ຕາ ໂຂ ປນ ເມ, ຠິກ຺ຂເວ, ສາວການໍ ນິພ຺ພານຄາມິນີ ປຏິປທາ. ຍຖາປຏິປນ຺ນາ ມມ ສາວກາ ອາສວານໍ ຂຍາ ອນາສວໍ ເຈໂຕວິມຸຕ຺ຕິໍ ປຎ຺ຎາວິມຸຕ຺ຕິໍ ທິຏ຺ເຐວ ຘມ຺ເມ ສຍໍ ອຠິຎ຺ຎາ ສຈ຺ຉິກຕ຺ວາ ອຸປສມ຺ປຊ຺ຊ ວິຫຣນ຺ຕິ. ຕຕ຺ຣ ວຕ ມໍ ສມໂຓ ວາ ພ຺ຣາຫ຺ມໂຓ ວາ ເທໂວ ວາ ມາໂຣ ວາ ພ຺ຣຫ຺ມາ ວາ ໂກຈິ ວາ ໂລກສ຺ມິໍ ສຫຘມ຺ເມນ ປຏິໂຈເທສ຺ສຕິ – ‘ອິຕິປິ ເຕ ນ ສຸປຎ຺ຎຕ຺ຕາ ສາວການໍ ນິພ຺ພານຄາມິນີ ປຏິປທາ. ຍຖາປຏິປນ຺ນາ ຕວ ສາວກາ ອາສວານໍ ຂຍາ…ເປ… ສຈ຺ຉິກຕ຺ວາ ອຸປສມ຺ປຊ຺ຊ ວິຫຣນ຺ຕີ’ຕິ. ນິມິຕ຺ຕເມຕໍ, ຠິກ຺ຂເວ, ນ ສມນຸປສ຺ສາມິ. ເອຕມຫໍ, ຠິກ຺ຂເວ, ນິມິຕ຺ຕໍ ອສມນຸປສ຺ສນ຺ໂຕ ເຂມປ຺ປຕ຺ໂຕ ອຠຍປ຺ປຕ຺ໂຕ ເວສາຣຊ຺ຊປ຺ປຕ຺ໂຕ ວິຫຣາມິ.

‘‘ອເນກສຕາ ໂຂ ປນ ເມ, ຠິກ຺ຂເວ, ສາວກປຣິສາ ອາສວານໍ ຂຍາ…ເປ… ສຈ຺ຉິກຕ຺ວາ ອຸປສມ຺ປຊ຺ຊ ວິຫຣນ຺ຕິ. ຕຕ຺ຣ ວຕ ມໍ ສມໂຓ ວາ ພ຺ຣາຫ຺ມໂຓ ວາ ເທໂວ ວາ ມາໂຣ ວາ ພ຺ຣຫ຺ມາ ວາ ໂກຈິ ວາ ໂລກສ຺ມິໍ ສຫຘມ຺ເມນ ປຏິໂຈເທສ຺ສຕິ – ‘ອິຕິປິ ເຕ ນ ອເນກສຕາ ສາວກປຣິສາ ອາສວານໍ ຂຍາ ອນາສວໍ ເຈໂຕວິມຸຕ຺ຕິໍ ປຎ຺ຎາວິມຸຕ຺ຕິໍ ທິຏ຺ເຐວ ຘມ຺ເມ ສຍໍ ອຠິຎ຺ຎາ ສຈ຺ຉິກຕ຺ວາ ອຸປສມ຺ປຊ຺ຊ ວິຫຣນ຺ຕີ’ຕິ. ນິມິຕ຺ຕເມຕໍ, ຠິກ຺ຂເວ, ນ ສມນຸປສ຺ສາມິ. ເອຕມຫໍ, ຠິກ຺ຂເວ, ນິມິຕ຺ຕໍ ອສມນຸປສ຺ສນ຺ໂຕ ເຂມປ຺ປຕ຺ໂຕ ອຠຍປ຺ປຕ຺ໂຕ ເວສາຣຊ຺ຊປ຺ປຕ຺ໂຕ ວິຫຣາມິ. ອິເມຫິ ຕີຫິ ອນຸປວຊ຺ໂຊ.

‘‘ອິມານິ ໂຂ, ຠິກ຺ຂເວ, ຈຕ຺ຕາຣິ ຕຖາຄຕສ຺ສ ອຣກ຺ເຂຍ຺ຍານິ, ອິເມຫິ ຈ ຕີຫິ ອນຸປວຊ຺ໂຊ’’ຕິ. ປຎ຺ຈມໍ.