໙. ທານມຫປ຺ຜລສຸຕ຺ຕໍ

໕໒. ເອກໍ ສມຍໍ ຠຄວາ ຈມ຺ປາຍໍ ວິຫຣຕິ ຄຄ຺ຄຣາຍ ໂປກ຺ຂຣຓິຍາ ຕີເຣ. ອຖ ໂຂ ສມ຺ພຫຸລາ ຈມ຺ເປຍ຺ຍກາ ອຸປາສກາ ເຍນ ອາຍສ຺ມາ ສາຣິປຸຕ຺ໂຕ ເຕນຸປສງ຺ກມິໍສຸ; ອຸປສງ຺ກມິຕ຺ວາ ອາຍສ຺ມນ຺ຕໍ ສາຣິປຸຕ຺ຕໍ ອຠິວາເທຕ຺ວາ ເອກມນ຺ຕໍ ນິສີທິໍສຸ. ເອກມນ຺ຕໍ ນິສິນ຺ນາ ໂຂ ຈມ຺ເປຍ຺ຍກາ ອຸປາສກາ ອາຍສ຺ມນ຺ຕໍ ສາຣິປຸຕ຺ຕໍ ເອຕທໂວຈຸໍ – ‘‘ຈິຣສ຺ສຸຕາ ໂນ, ຠນ຺ເຕ [ຠນ຺ເຕ ສາຣິປຸຕ຺ຕ (ສີ.)], ຠຄວໂຕ ສມ຺ມຸຂາ ຘມ຺ມີກຖາ. ສາຘຸ ມຍໍ, ຠນ຺ເຕ, ລເຠຍ຺ຍາມ ຠຄວໂຕ ສມ຺ມຸຂາ ຘມ຺ມິໍ ກຖໍ [ຠຄວໂຕ ສນ຺ຕິກາ ຘມ຺ມິໍ ກຖໍ (ສີ.), ຠຄວໂຕ ຘມ຺ມິໍ ກຖໍ (ສ຺ຍາ.)] ສວນາຍາ’’ຕິ. ‘‘ເຕນຫາວຸໂສ, ຕທຫຸໂປສເຖ ອາຄຈ຺ເຉຍ຺ຍາຖ, ອປ຺ເປວ ນາມ ລເຠຍ຺ຍາຖ ຠຄວໂຕ ສມ຺ມຸຂາ [ຠຄວໂຕ ສນ຺ຕິເກ (ສ຺ຍາ.)] ຘມ຺ມິໍ ກຖໍ ສວນາຍາ’’ຕິ. ‘‘ເອວໍ, ຠນ຺ເຕ’’ຕິ ໂຂ ຈມ຺ເປຍ຺ຍກາ ອຸປາສກາ ອາຍສ຺ມໂຕ ສາຣິປຸຕ຺ຕສ຺ສ ປຏິສ຺ສຸຕ຺ວາ ອຸຏ຺ຐາຍາສນາ ອາຍສ຺ມນ຺ຕໍ ສາຣິປຸຕ຺ຕໍ ອຠິວາເທຕ຺ວາ ປທກ຺ຂິຓໍ ກຕ຺ວາ ປກ຺ກມິໍສຸ.

ອຖ ໂຂ ຈມ຺ເປຍ຺ຍກາ ອຸປາສກາ ຕທຫຸໂປສເຖ ເຍນາຍສ຺ມາ ສາຣິປຸຕ຺ໂຕ ເຕນຸປສງ຺ກມິໍສຸ; ອຸປສງ຺ກມິຕ຺ວາ ອາຍສ຺ມນ຺ຕໍ ສາຣິປຸຕ຺ຕໍ ອຠິວາເທຕ຺ວາ ເອກມນ຺ຕໍ ອຏ຺ຐໍສຸ. ອຖ ໂຂ ອາຍສ຺ມາ ສາຣິປຸຕ຺ໂຕ ເຕຫິ ຈມ຺ເປຍ຺ຍເກຫິ ອຸປາສເກຫິ ສທ຺ຘິໍ ເຍນ ຠຄວາ ເຕນຸປສງ຺ກມິ; ອຸປສງ຺ກມິຕ຺ວາ ຠຄວນ຺ຕໍ ອຠິວາເທຕ຺ວາ ເອກມນ຺ຕໍ ນິສີທິ. ເອກມນ຺ຕໍ ນິສິນ຺ໂນ ໂຂ ອາຍສ຺ມາ ສາຣິປຸຕ຺ໂຕ ຠຄວນ຺ຕໍ ເອຕທໂວຈ –

‘‘ສິຍາ ນຸ ໂຂ, ຠນ຺ເຕ, ອິເຘກຈ຺ຈສ຺ສ ຕາທິສໍເຍວ ທານໍ ທິນ຺ນໍ ນ ມຫປ຺ຜລໍ ໂຫຕິ ນ ມຫານິສໍສໍ; ສິຍາ ປນ, ຠນ຺ເຕ, ອິເຘກຈ຺ຈສ຺ສ ຕາທິສໍເຍວ ທານໍ ທິນ຺ນໍ ມຫປ຺ຜລໍ ໂຫຕິ ມຫານິສໍສ’’ນ຺ຕິ? ‘‘ສິຍາ, ສາຣິປຸຕ຺ຕ, ອິເຘກຈ຺ຈສ຺ສ ຕາທິສໍເຍວ ທານໍ ທິນ຺ນໍ ນ ມຫປ຺ຜລໍ ໂຫຕິ ນ ມຫານິສໍສໍ; ສິຍາ ປນ, ສາຣິປຸຕ຺ຕ, ອິເຘກຈ຺ຈສ຺ສ ຕາທິສໍເຍວ ທານໍ ທິນ຺ນໍ ມຫປ຺ຜລໍ ໂຫຕິ ມຫານິສໍສ’’ນ຺ຕິ. ‘‘ໂກ ນຸ ໂຂ, ຠນ຺ເຕ, ເຫຕຸ ໂກ ປຈ຺ຈໂຍ ເຍນ ມິເຘກຈ຺ຈສ຺ສ ຕາທິສໍເຍວ ທານໍ ທິນ຺ນໍ ນ ມຫປ຺ຜລໍ ໂຫຕິ ນ ມຫານິສໍສໍ; ໂກ ນຸ ໂຂ, ຠນ຺ເຕ, ເຫຕຸ ໂກ ປຈ຺ຈໂຍ ເຍນ ມິເຘກຈ຺ຈສ຺ສ ຕາທິສໍເຍວ ທານໍ ທິນ຺ນໍ ມຫປ຺ຜລໍ ໂຫຕິ ມຫານິສໍສ’’ນ຺ຕິ?

‘‘ອິຘ, ສາຣິປຸຕ຺ຕ, ເອກຈ຺ໂຈ ສາເປໂຂ [ສາເປກ຺ໂຂ (ສ຺ຍາ.)] ທານໍ ເທຕິ, ປຕິພທ຺ຘຈິຕ຺ໂຕ [ປຕິພນ຺ຘຈິຕ຺ໂຕ (ກ.)] ທານໍ ເທຕິ, ສນ຺ນິຘິເປໂຂ ທານໍ ເທຕິ, ‘ອິມໍ ເປຈ຺ຈ ປຣິຠຸຎ຺ຊິສ຺ສາມີ’ຕິ ທານໍ ເທຕິ. ໂສ ຕໍ ທານໍ ເທຕິ ສມຓສ຺ສ ວາ ພ຺ຣາຫ຺ມຓສ຺ສ ວາ ອນ຺ນໍ ປານໍ ວຕ຺ຖໍ ຍານໍ ມາລາຄນ຺ຘວິເລປນໍ ເສຍ຺ຍາວສຖປທີເປຍ຺ຍໍ. ຕໍ ກິໍ ມຎ຺ຎສິ, ສາຣິປຸຕ຺ຕ, ທເທຍ຺ຍ ອິເຘກຈ຺ໂຈ ເອວຣູປໍ ທານ’’ນ຺ຕິ? ‘‘ເອວໍ, ຠນ຺ເຕ’’.

‘‘ຕຕ຺ຣ, ສາຣິປຸຕ຺ຕ, ຍ຺ວາຍໍ ສາເປໂຂ ທານໍ ເທຕິ, ປຕິພທ຺ຘຈິຕ຺ໂຕ ທານໍ ເທຕິ, ສນ຺ນິຘິເປໂຂ ທານໍ ເທຕິ, ‘ອິມໍ ເປຈ຺ຈ ປຣິຠຸຎ຺ຊິສ຺ສາມີ’ຕິ ທານໍ ເທຕິ. ໂສ ຕໍ ທານໍ ທຕ຺ວາ ກາຍສ຺ສ ເຠທາ ປຣໍ ມຣຓາ ຈາຕຸມຫາຣາຊິການໍ ເທວານໍ ສຫພ຺ຍຕໍ ອຸປປຊ຺ຊຕິ. ໂສ ຕໍ ກມ຺ມໍ ເຂເປຕ຺ວາ ຕໍ ອິທ຺ຘິໍ ຕໍ ຍສໍ ຕໍ ອາຘິປຈ຺ຈໍ ອາຄາມີ ໂຫຕິ ອາຄນ຺ຕາ ອິຕ຺ຖຕ຺ຕໍ.

‘‘ອິຘ ປນ, ສາຣິປຸຕ຺ຕ, ເອກຈ຺ໂຈ ນ ເຫວ ໂຂ ສາເປໂຂ ທານໍ ເທຕິ, ນ ປຕິພທ຺ຘຈິຕ຺ໂຕ ທານໍ ເທຕິ, ນ ສນ຺ນິຘິເປໂຂ ທານໍ ເທຕິ, ນ ‘ອິມໍ ເປຈ຺ຈ ປຣິຠຸຎ຺ຊິສ຺ສາມີ’ຕິ ທານໍ ເທຕິ; ອປິ ຈ ໂຂ ‘ສາຫຸ ທານ’ນ຺ຕິ ທານໍ ເທຕິ…ເປ… ນປິ ‘ສາຫຸ ທານ’ນ຺ຕິ ທານໍ ເທຕິ; ອປິ ຈ ໂຂ ‘ທິນ຺ນປຸພ຺ພໍ ກຕປຸພ຺ພໍ ປິຕຸປິຕາມເຫຫິ ນ ອຣຫາມິ ໂປຣາຓໍ ກຸລວໍສໍ ຫາເປຕຸ’ນ຺ຕິ ທານໍ ເທຕິ…ເປ… ນປິ ‘ທິນ຺ນປຸພ຺ພໍ ກຕປຸພ຺ພໍ ປິຕຸປິຕາມເຫຫິ ນ ອຣຫາມິ ໂປຣາຓໍ ກຸລວໍສໍ ຫາເປຕຸ’ນ຺ຕິ ທານໍ ເທຕິ; ອປິ ຈ ໂຂ ‘ອຫໍ ປຈາມິ, ອິເມ ນ ປຈນ຺ຕິ, ນາຣຫາມິ ປຈນ຺ໂຕ ອປຈນ຺ຕານໍ ທານໍ ອທາຕຸ’ນ຺ຕິ ທານໍ ເທຕິ…ເປ… ນປິ ‘ອຫໍ ປຈາມິ, ອິເມ ນ ປຈນ຺ຕິ, ນາຣຫາມິ ປຈນ຺ໂຕ ອປຈນ຺ຕານໍ ທານໍ ອທາຕຸ’ນ຺ຕິ ທານໍ ເທຕິ; ອປິ ຈ ໂຂ ‘ຍຖາ ເຕສໍ ປຸພ຺ພການໍ ອິສີນໍ ຕານິ ມຫາຍຎ຺ຎານິ ອເຫສຸໍ, ເສຍ຺ຍຖິທໍ – ອຏ຺ຐກສ຺ສ ວາມກສ຺ສ ວາມເທວສ຺ສ ເວສ຺ສາມິຕ຺ຕສ຺ສ ຍມທຄ຺ຄິໂນ ອງ຺ຄີຣສສ຺ສ ຠາຣທ຺ວາຊສ຺ສ ວາເສຏ຺ຐສ຺ສ ກສ຺ສປສ຺ສ ຠຄຸໂນ, ເອວໍ ເມ ອຍໍ ທານສໍວິຠາໂຄ ຠວິສ຺ສຕີ’ຕິ ທານໍ ເທຕິ…ເປ… ນປິ ‘ຍຖາ ເຕສໍ ປຸພ຺ພການໍ ອິສີນໍ ຕານິ ມຫາຍຎ຺ຎານິ ອເຫສຸໍ, ເສຍ຺ຍຖິທໍ – ອຏ຺ຐກສ຺ສ ວາມກສ຺ສ ວາມເທວສ຺ສ ເວສ຺ສາມິຕ຺ຕສ຺ສ ຍມທຄ຺ຄິໂນ ອງ຺ຄີຣສສ຺ສ ຠາຣທ຺ວາຊສ຺ສ ວາເສຏ຺ຐສ຺ສ ກສ຺ສປສ຺ສ ຠຄຸໂນ, ເອວໍ ເມ ອຍໍ ທານສໍວິຠາໂຄ ຠວິສ຺ສຕີ’ຕິ ທານໍ ເທຕິ; ອປິ ຈ ໂຂ ‘ອິມໍ ເມ ທານໍ ທທໂຕ ຈິຕ຺ຕໍ ປສີທຕິ, ອຕ຺ຕມນຕາ ໂສມນສ຺ສໍ ອຸປຊາຍຕີ’ຕິ ທານໍ ເທຕິ…ເປ… ນປິ ‘ອິມໍ ເມ ທານໍ ທທໂຕ ຈິຕ຺ຕໍ ປສີທຕິ, ອຕ຺ຕມນຕາ ໂສມນສ຺ສໍ ອຸປຊາຍຕີ’ຕິ ທານໍ ເທຕິ; ອປິ ຈ ໂຂ ຈິຕ຺ຕາລງ຺ກາຣຈິຕ຺ຕປຣິກ຺ຂາຣໍ ທານໍ ເທຕິ. ໂສ ຕໍ ທານໍ ເທຕິ ສມຓສ຺ສ ວາ ພ຺ຣາຫ຺ມຓສ຺ສ ວາ ອນ຺ນໍ ປານໍ ວຕ຺ຖໍ ຍານໍ ມາລາຄນ຺ຘວິເລປນໍ ເສຍ຺ຍາວສຖປທີເປຍ຺ຍໍ. ຕໍ ກິໍ ມຎ຺ຎສິ, ສາຣິປຸຕ຺ຕ, ທເທຍ຺ຍ ອິເຘກຈ຺ໂຈ ເອວຣູປໍ ທານ’’ນ຺ຕິ? ‘‘ເອວໍ, ຠນ຺ເຕ’’.

‘‘ຕຕ຺ຣ, ສາຣິປຸຕ຺ຕ, ຍ຺ວາຍໍ ນ ເຫວ [ນເຫວ ໂຂ (ສີ. ສ຺ຍາ.)] ສາເປໂຂ ທານໍ ເທຕິ; ນ ປຕິພທ຺ຘຈິຕ຺ໂຕ ທານໍ ເທຕິ; ນ ສນ຺ນິຘິເປໂຂ ທານໍ ເທຕິ; ນ ‘ອິມໍ ເປຈ຺ຈ ປຣິຠຸຎ຺ຊິສ຺ສາມີ’ຕິ ທານໍ ເທຕິ; ນປິ ‘ສາຫຸ ທານ’ນ຺ຕິ ທານໍ ເທຕິ; ນປິ ‘ທິນ຺ນປຸພ຺ພໍ ກຕປຸພ຺ພໍ ປິຕຸປິຕາມເຫຫິ ນ ອຣຫາມິ ໂປຣາຓໍ ກຸລວໍສໍ ຫາເປຕຸ’ນ຺ຕິ ທານໍ ເທຕິ; ນປິ ‘ອຫໍ ປຈາມິ, ອິເມ ນ ປຈນ຺ຕິ, ນາຣຫາມິ ປຈນ຺ໂຕ ອປຈນ຺ຕານໍ ທານໍ ອທາຕຸ’ນ຺ຕິ ທານໍ ເທຕິ; ນປິ ‘ຍຖາ ເຕສໍ ປຸພ຺ພການໍ ອິສີນໍ ຕານິ ມຫາຍຎ຺ຎານິ ອເຫສຸໍ, ເສຍ຺ຍຖິທໍ – ອຏ຺ຐກສ຺ສ ວາມກສ຺ສ ວາມເທວສ຺ສ ເວສ຺ສາມິຕ຺ຕສ຺ສ ຍມທຄ຺ຄິໂນ ອງ຺ຄີຣສສ຺ສ ຠາຣທ຺ວາຊສ຺ສ ວາເສຏ຺ຐສ຺ສ ກສ຺ສປສ຺ສ ຠຄຸໂນ, ເອວໍ ເມ ອຍໍ ທານສໍວິຠາໂຄ ຠວິສ຺ສຕີ’ຕິ ທານໍ ເທຕິ; ນປິ ‘ອິມໍ ເມ ທານໍ ທທໂຕ ຈິຕ຺ຕໍ ປສີທຕິ, ອຕ຺ຕມນຕາ ໂສມນສ຺ສໍ ອຸປຊາຍຕີ’ຕິ ທານໍ ເທຕິ; ອປິ ຈ ໂຂ ຈິຕ຺ຕາລງ຺ກາຣຈິຕ຺ຕປຣິກ຺ຂາຣໍ ທານໍ ເທຕິ. ໂສ ຕໍ ທານໍ ທຕ຺ວາ ກາຍສ຺ສ ເຠທາ ປຣໍ ມຣຓາ ພ຺ຣຫ຺ມກາຍິການໍ ເທວານໍ ສຫພ຺ຍຕໍ ອຸປປຊ຺ຊຕິ. ໂສ ຕໍ ກມ຺ມໍ ເຂເປຕ຺ວາ ຕໍ ອິທ຺ຘິໍ ຕໍ ຍສໍ ຕໍ ອາຘິປຈ຺ຈໍ ອນາຄາມີ ໂຫຕິ ອນາຄນ຺ຕາ ອິຕ຺ຖຕ຺ຕໍ. ອຍໍ ໂຂ, ສາຣິປຸຕ຺ຕ, ເຫຕຸ ອຍໍ ປຈ຺ຈໂຍ ເຍນ ມິເຘກຈ຺ຈສ຺ສ ຕາທິສໍເຍວ ທານໍ ທິນ຺ນໍ ນ ມຫປ຺ຜລໍ ໂຫຕິ ນ ມຫານິສໍສໍ. ອຍໍ ປນ, ສາຣິປຸຕ຺ຕ, ເຫຕຸ ອຍໍ ປຈ຺ຈໂຍ ເຍນ ມິເຘກຈ຺ຈສ຺ສ ຕາທິສໍເຍວ ທານໍ ທິນ຺ນໍ ມຫປ຺ຜລໍ ໂຫຕິ ມຫານິສໍສ’’ນ຺ຕິ. ນວມໍ.