໘. ສໍໂຍຄສຸຕ຺ຕໍ

໕໑. ‘‘ສໍໂຍຄວິສໍໂຍຄໍ ໂວ, ຠິກ຺ຂເວ, ຘມ຺ມປຣິຍາຍໍ ເທເສສ຺ສາມິ. ຕໍ ສຸຓາຖ…ເປ… ກຕໂມ ຈ ໂສ, ຠິກ຺ຂເວ, ສໍໂຍໂຄ ວິສໍໂຍໂຄ ຘມ຺ມປຣິຍາໂຍ?

‘‘ອິຕ຺ຖີ, ຠິກ຺ຂເວ, ອຊ຺ຌຕ຺ຕໍ ອິຕ຺ຖິນ຺ທ຺ຣິຍໍ ມນສິ ກໂຣຕິ – ອິຕ຺ຖິກຸຕ຺ຕໍ ອິຕ຺ຖາກປ຺ປໍ ອິຕ຺ຖິວິຘໍ ອິຕ຺ຖິຈ຺ຉນ຺ທໍ ອິຕ຺ຖິສ຺ສຣໍ ອິຕ຺ຖາລງ຺ກາຣໍ. ສາ ຕຕ຺ຖ ຣຊ຺ຊຕິ ຕຕ຺ຣາຠິຣມຕິ. ສາ ຕຕ຺ຖ ຣຕ຺ຕາ ຕຕ຺ຣາຠິຣຕາ ພຫິທ຺ຘາ ປຸຣິສິນ຺ທ຺ຣິຍໍ ມນສິ ກໂຣຕິ – ປຸຣິສກຸຕ຺ຕໍ ປຸຣິສາກປ຺ປໍ ປຸຣິສວິຘໍ ປຸຣິສຈ຺ຉນ຺ທໍ ປຸຣິສສ຺ສຣໍ ປຸຣິສາລງ຺ກາຣໍ. ສາ ຕຕ຺ຖ ຣຊ຺ຊຕິ ຕຕ຺ຣາຠິຣມຕິ. ສາ ຕຕ຺ຖ ຣຕ຺ຕາ ຕຕ຺ຣາຠິຣຕາ ພຫິທ຺ຘາ ສໍໂຍຄໍ ອາກງ຺ຂຕິ. ຍຎ຺ຈສ຺ສາ ສໍໂຍຄປຈ຺ຈຍາ ອຸປ຺ປຊ຺ຊຕິ ສຸຂໍ ໂສມນສ຺ສໍ ຕຎ຺ຈ ອາກງ຺ຂຕິ. ອິຕ຺ຖຕ຺ເຕ, ຠິກ຺ຂເວ, ອຠິຣຕາ ສຕ຺ຕາ ປຸຣິເສສຸ ສໍໂຍຄໍ ຄຕາ. ເອວໍ ໂຂ, ຠິກ຺ຂເວ, ອິຕ຺ຖີ ອິຕ຺ຖຕ຺ຕໍ ນາຕິວຕ຺ຕຕິ.

‘‘ປຸຣິໂສ, ຠິກ຺ຂເວ, ອຊ຺ຌຕ຺ຕໍ ປຸຣິສິນ຺ທ຺ຣິຍໍ ມນສິ ກໂຣຕິ – ປຸຣິສກຸຕ຺ຕໍ ປຸຣິສາກປ຺ປໍ ປຸຣິສວິຘໍ ປຸຣິສຈ຺ຉນ຺ທໍ ປຸຣິສສ຺ສຣໍ ປຸຣິສາລງ຺ກາຣໍ. ໂສ ຕຕ຺ຖ ຣຊ຺ຊຕິ ຕຕ຺ຣາຠິຣມຕິ. ໂສ ຕຕ຺ຖ ຣຕ຺ໂຕ ຕຕ຺ຣາຠິຣໂຕ ພຫິທ຺ຘາ ອິຕ຺ຖິນ຺ທ຺ຣິຍໍ ມນສິ ກໂຣຕິ – ອິຕ຺ຖິກຸຕ຺ຕໍ ອິຕ຺ຖາກປ຺ປໍ ອິຕ຺ຖິວິຘໍ ອິຕ຺ຖິຈ຺ຉນ຺ທໍ ອິຕ຺ຖິສ຺ສຣໍ ອິຕ຺ຖາລງ຺ກາຣໍ. ໂສ ຕຕ຺ຖ ຣຊ຺ຊຕິ ຕຕ຺ຣາຠິຣມຕິ. ໂສ ຕຕ຺ຖ ຣຕ຺ໂຕ ຕຕ຺ຣາຠິຣໂຕ ພຫິທ຺ຘາ ສໍໂຍຄໍ ອາກງ຺ຂຕິ. ຍຎ຺ຈສ຺ສ ສໍໂຍຄປຈ຺ຈຍາ ອຸປ຺ປຊ຺ຊຕິ ສຸຂໍ ໂສມນສ຺ສໍ ຕຎ຺ຈ ອາກງ຺ຂຕິ. ປຸຣິສຕ຺ເຕ, ຠິກ຺ຂເວ, ອຠິຣຕາ ສຕ຺ຕາ ອິຕ຺ຖີສຸ ສໍໂຍຄໍ ຄຕາ. ເອວໍ ໂຂ, ຠິກ຺ຂເວ, ປຸຣິໂສ ປຸຣິສຕ຺ຕໍ ນາຕິວຕ຺ຕຕິ. ເອວໍ ໂຂ, ຠິກ຺ຂເວ, ສໍໂຍໂຄ ໂຫຕິ.

‘‘ກຖຎ຺ຈ, ຠິກ຺ຂເວ, ວິສໍໂຍໂຄ ໂຫຕິ? ອິຕ຺ຖີ, ຠິກ຺ຂເວ, ອຊ຺ຌຕ຺ຕໍ ອິຕ຺ຖິນ຺ທ຺ຣິຍໍ ນ ມນສິ ກໂຣຕິ – ອິຕ຺ຖິກຸຕ຺ຕໍ ອິຕ຺ຖາກປ຺ປໍ ອິຕ຺ຖິວິຘໍ ອິຕ຺ຖິຈ຺ຉນ຺ທໍ ອິຕ຺ຖິສ຺ສຣໍ ອິຕ຺ຖາລງ຺ກາຣໍ. ສາ ຕຕ຺ຖ ນ ຣຊ຺ຊຕິ, ສາ ຕຕ຺ຣ ນາຠິຣມຕິ. ສາ ຕຕ຺ຖ ອຣຕ຺ຕາ ຕຕ຺ຣ ອນຠິຣຕາ ພຫິທ຺ຘາ ປຸຣິສິນ຺ທ຺ຣິຍໍ ນ ມນສິ ກໂຣຕິ – ປຸຣິສກຸຕ຺ຕໍ ປຸຣິສາກປ຺ປໍ ປຸຣິສວິຘໍ ປຸຣິສຈ຺ຉນ຺ທໍ ປຸຣິສສ຺ສຣໍ ປຸຣິສາລງ຺ກາຣໍ. ສາ ຕຕ຺ຖ ນ ຣຊ຺ຊຕິ, ຕຕ຺ຣ ນາຠິຣມຕິ. ສາ ຕຕ຺ຖ ອຣຕ຺ຕາ ຕຕ຺ຣ ອນຠິຣຕາ ພຫິທ຺ຘາ ສໍໂຍຄໍ ນາກງ຺ຂຕິ. ຍຎ຺ຈສ຺ສາ ສໍໂຍຄປຈ຺ຈຍາ ອຸປ຺ປຊ຺ຊຕິ ສຸຂໍ ໂສມນສ຺ສໍ ຕຎ຺ຈ ນາກງ຺ຂຕິ. ອິຕ຺ຖຕ຺ເຕ, ຠິກ຺ຂເວ, ອນຠິຣຕາ ສຕ຺ຕາ ປຸຣິເສສຸ ວິສໍໂຍຄໍ ຄຕາ. ເອວໍ ໂຂ, ຠິກ຺ຂເວ, ອິຕ຺ຖີ ອິຕ຺ຖຕ຺ຕໍ ອຕິວຕ຺ຕຕິ.

‘‘ປຸຣິໂສ, ຠິກ຺ຂເວ, ອຊ຺ຌຕ຺ຕໍ ປຸຣິສິນ຺ທ຺ຣິຍໍ ນ ມນສິ ກໂຣຕິ – ປຸຣິສກຸຕ຺ຕໍ ປຸຣິສາກປ຺ປໍ ປຸຣິສວິຘໍ ປຸຣິສຈ຺ຉນ຺ທໍ ປຸຣິສສ຺ສຣໍ ປຸຣິສາລງ຺ກາຣໍ. ໂສ ຕຕ຺ຖ ນ ຣຊ຺ຊຕິ, ໂສ ຕຕ຺ຣ ນາຠິຣມຕິ. ໂສ ຕຕ຺ຖ ອຣຕ຺ໂຕ ຕຕ຺ຣ ອນຠິຣໂຕ ພຫິທ຺ຘາ ອິຕ຺ຖິນ຺ທ຺ຣິຍໍ ນ ມນສິ ກໂຣຕິ – ອິຕ຺ຖິກຸຕ຺ຕໍ ອິຕ຺ຖາກປ຺ປໍ ອິຕ຺ຖິວິຘໍ ອິຕ຺ຖິຈ຺ຉນ຺ທໍ ອິຕ຺ຖິສ຺ສຣໍ ອິຕ຺ຖາລງ຺ກາຣໍ. ໂສ ຕຕ຺ຖ ນ ຣຊ຺ຊຕິ, ຕຕ຺ຣ ນາຠິຣມຕິ. ໂສ ຕຕ຺ຖ ອຣຕ຺ໂຕ ຕຕ຺ຣ ອນຠິຣໂຕ ພຫິທ຺ຘາ ສໍໂຍຄໍ ນາກງ຺ຂຕິ. ຍຎ຺ຈສ຺ສ ສໍໂຍຄປຈ຺ຈຍາ ອຸປ຺ປຊ຺ຊຕິ ສຸຂໍ ໂສມນສ຺ສໍ ຕຎ຺ຈ ນາກງ຺ຂຕິ. ປຸຣິສຕ຺ເຕ, ຠິກ຺ຂເວ, ອນຠິຣຕາ ສຕ຺ຕາ ອິຕ຺ຖີສຸ ວິສໍໂຍຄໍ ຄຕາ. ເອວໍ ໂຂ, ຠິກ຺ຂເວ, ປຸຣິໂສ ປຸຣິສຕ຺ຕໍ ອຕິວຕ຺ຕຕິ. ເອວໍ ໂຂ, ຠິກ຺ຂເວ, ວິສໍໂຍໂຄ ໂຫຕິ. ອຍໍ ໂຂ, ຠິກ຺ຂເວ, ສໍໂຍໂຄ ວິສໍໂຍໂຄ ຘມ຺ມປຣິຍາໂຍ’’ຕິ. ອຏ຺ຐມໍ.