໗. ສກ຺ຂິຠພ຺ພສຸຕ຺ຕໍ

໗໑. ‘‘ຉຫິ, ຠິກ຺ຂເວ, ຘມ຺ເມຫິ ສມນ຺ນາຄໂຕ ຠິກ຺ຂຸ ອຠພ຺ໂພ ຕຕ຺ຣ ຕຕ຺ເຣວ ສກ຺ຂິຠພ຺ພຕໍ ປາປຸຓິຕຸໍ ສຕິ ສຕິ ອາຍຕເນ. ກຕເມຫິ ຉຫິ? ອິຘ, ຠິກ຺ຂເວ, ຠິກ຺ຂຸ ‘ອິເມ ຫານຠາຄິຍາ ຘມ຺ມາ’ຕິ ຍຖາຠູຕໍ ນປ຺ປຊານາຕິ, ‘ອິເມ ຐິຕິຠາຄິຍາ ຘມ຺ມາ’ຕິ ຍຖາຠູຕໍ ນປ຺ປຊານາຕິ, ‘ອິເມ ວິເສສຠາຄິຍາ ຘມ຺ມາ’ຕິ ຍຖາຠູຕໍ ນປ຺ປຊານາຕິ, ‘ອິເມ ນິພ຺ເພຘຠາຄິຍາ ຘມ຺ມາ’ຕິ ຍຖາຠູຕໍ ນປ຺ປຊານາຕິ, ອສກ຺ກຈ຺ຈກາຣີ ຈ ໂຫຕິ, ອສປ຺ປາຍກາຣີ ຈ. ອິເມຫິ ໂຂ, ຠິກ຺ຂເວ, ຉຫິ ຘມ຺ເມຫິ ສມນ຺ນາຄໂຕ ຠິກ຺ຂຸ ອຠພ຺ໂພ ຕຕ຺ຣ ຕຕ຺ເຣວ ສກ຺ຂິຠພ຺ພຕໍ ປາປຸຓິຕຸໍ ສຕິ ສຕິ ອາຍຕເນ.

‘‘ຉຫິ, ຠິກ຺ຂເວ, ຘມ຺ເມຫິ ສມນ຺ນາຄໂຕ ຠິກ຺ຂຸ ຠພ຺ໂພ ຕຕ຺ຣ ຕຕ຺ເຣວ ສກ຺ຂິຠພ຺ພຕໍ ປາປຸຓິຕຸໍ ສຕິ ສຕິ ອາຍຕເນ. ກຕເມຫິ ຉຫິ? ອິຘ, ຠິກ຺ຂເວ, ຠິກ຺ຂຸ ‘ອິເມ ຫານຠາຄິຍາ ຘມ຺ມາ’ຕິ ຍຖາຠູຕໍ ປຊານາຕິ, ‘ອິເມ ຐິຕິຠາຄິຍາ ຘມ຺ມາ’ຕິ ຍຖາຠູຕໍ ປຊານາຕິ, ‘ອິເມ ວິເສສຠາຄິຍາ ຘມ຺ມາ’ຕິ ຍຖາຠູຕໍ ປຊານາຕິ, ‘ອິເມ ນິພ຺ເພຘຠາຄິຍາ ຘມ຺ມາ’ຕິ ຍຖາຠູຕໍ ປຊານາຕິ, ສກ຺ກຈ຺ຈກາຣີ ຈ ໂຫຕິ, ສປ຺ປາຍກາຣີ ຈ. ອິເມຫິ ໂຂ, ຠິກ຺ຂເວ, ຉຫິ ຘມ຺ເມຫິ ສມນ຺ນາຄໂຕ ຠິກ຺ຂຸ ຠພ຺ໂພ ຕຕ຺ຣ ຕຕ຺ເຣວ ສກ຺ຂິຠພ຺ພຕໍ ປາປຸຓິຕຸໍ ສຕິ ສຕິ ອາຍຕເນ’’ຕິ. ສຕ຺ຕມໍ.