໕. ປຐມສນ຺ທິຏ຺ຐິກສຸຕ຺ຕໍ

໔໗. ອຖ ໂຂ ໂມຬິຍສີວໂກ [ໂມລິຍສີວໂກ (ສີ. ປີ.), ໂມຬິສີວໂກ (ກ.)] ປຣິພ຺ພາຊໂກ ເຍນ ຠຄວາ ເຕນຸປສງ຺ກມິ; ອຸປສງ຺ກມິຕ຺ວາ ຠຄວຕາ ສທ຺ຘິໍ ສມ຺ໂມທິ. ສມ຺ໂມທນີຍໍ ກຖໍ ສາຣຓີຍໍ ວີຕິສາເຣຕ຺ວາ ເອກມນ຺ຕໍ ນິສີທິ. ເອກມນ຺ຕໍ ນິສິນ຺ໂນ ໂຂ ໂມຬິຍສີວໂກ ປຣິພ຺ພາຊໂກ ຠຄວນ຺ຕໍ ເອຕທໂວຈ – ‘‘‘ສນ຺ທິຏ຺ຐິໂກ ຘມ຺ໂມ, ສນ຺ທິຏ຺ຐິໂກ ຘມ຺ໂມ’ຕິ, ຠນ຺ເຕ, ວຸຈ຺ຈຕິ. ກິຕ຺ຕາວຕາ ນຸ ໂຂ, ຠນ຺ເຕ, ສນ຺ທິຏ຺ຐິໂກ ຘມ຺ໂມ ໂຫຕິ ອກາລິໂກ ເອຫິປສ຺ສິໂກ ໂອປເນຍ຺ຍິໂກ ປຈ຺ຈຕ຺ຕໍ ເວທິຕພ຺ໂພ ວິຎ຺ຎູຫີ’’ຕິ?

‘‘ເຕນ ຫິ, ສີວກ, ຕຎ຺ເຎເວຕ຺ຖ ປຏິປຸຈ຺ຉາມິ. ຍຖາ ເຕ ຂເມຍ຺ຍ ຕຖາ ນໍ ພ຺ຍາກເຣຍ຺ຍາສິ. ຕໍ ກິໍ ມຎ຺ຎສິ, ສີວກ, ສນ຺ຕໍ ວາ ອຊ຺ຌຕ຺ຕໍ ໂລຠໍ ‘ອຕ຺ຖິ ເມ ອຊ຺ຌຕ຺ຕໍ ໂລໂຠ’ຕິ ປຊານາສິ, ອສນ຺ຕໍ ວາ ອຊ຺ຌຕ຺ຕໍ ໂລຠໍ ‘ນຕ຺ຖິ ເມ ອຊ຺ຌຕ຺ຕໍ ໂລໂຠ’ຕິ ປຊານາສີ’’ຕິ? ‘‘ເອວໍ, ຠນ຺ເຕ’’. ‘‘ຍໍ ໂຂ ຕ຺ວໍ, ສີວກ, ສນ຺ຕໍ ວາ ອຊ຺ຌຕ຺ຕໍ ໂລຠໍ ‘ອຕ຺ຖິ ເມ ອຊ຺ຌຕ຺ຕໍ ໂລໂຠ’ຕິ ປຊານາສິ, ອສນ຺ຕໍ ວາ ອຊ຺ຌຕ຺ຕໍ ໂລຠໍ ‘ນຕ຺ຖິ ເມ ອຊ຺ຌຕ຺ຕໍ ໂລໂຠ’ຕິ ປຊານາສິ – ເອວມ຺ປິ ໂຂ, ສີວກ, ສນ຺ທິຏ຺ຐິໂກ ຘມ຺ໂມ ໂຫຕິ…ເປ….

‘‘ຕໍ ກິໍ ມຎ຺ຎສິ, ສີວກ, ສນ຺ຕໍ ວາ ອຊ຺ຌຕ຺ຕໍ ໂທສໍ…ເປ… ສນ຺ຕໍ ວາ ອຊ຺ຌຕ຺ຕໍ ໂມຫໍ…ເປ… ສນ຺ຕໍ ວາ ອຊ຺ຌຕ຺ຕໍ ໂລຠຘມ຺ມໍ…ເປ… ສນ຺ຕໍ ວາ ອຊ຺ຌຕ຺ຕໍ ໂທສຘມ຺ມໍ…ເປ… ສນ຺ຕໍ ວາ ອຊ຺ຌຕ຺ຕໍ ໂມຫຘມ຺ມໍ ‘ອຕ຺ຖິ ເມ ອຊ຺ຌຕ຺ຕໍ ໂມຫຘມ຺ໂມ’ຕິ ປຊານາສິ, ອສນ຺ຕໍ ວາ ອຊ຺ຌຕ຺ຕໍ ໂມຫຘມ຺ມໍ ‘ນຕ຺ຖິ ເມ ອຊ຺ຌຕ຺ຕໍ ໂມຫຘມ຺ໂມ’ຕິ ປຊານາສີ’’ຕິ? ‘‘ເອວໍ, ຠນ຺ເຕ’’. ‘‘ຍໍ ໂຂ ຕ຺ວໍ, ສີວກ, ສນ຺ຕໍ ວາ ອຊ຺ຌຕ຺ຕໍ ໂມຫຘມ຺ມໍ ‘ອຕ຺ຖິ ເມ ອຊ຺ຌຕ຺ຕໍ ໂມຫຘມ຺ໂມ’ຕິ ປຊານາສິ, ອສນ຺ຕໍ ວາ ອຊ຺ຌຕ຺ຕໍ ໂມຫຘມ຺ມໍ ‘ນຕ຺ຖິ ເມ ອຊ຺ຌຕ຺ຕໍ ໂມຫຘມ຺ໂມ’ຕິ ປຊານາສິ – ເອວໍ ໂຂ, ສີວກ, ສນ຺ທິຏ຺ຐິໂກ ຘມ຺ໂມ ໂຫຕິ ອກາລິໂກ ເອຫິປສ຺ສິໂກ ໂອປເນຍ຺ຍິໂກ ປຈ຺ຈຕ຺ຕໍ ເວທິຕພ຺ໂພ ວິຎ຺ຎູຫີ’’ຕິ.

‘‘ອຠິກ຺ກນ຺ຕໍ, ຠນ຺ເຕ, ອຠິກ຺ກນ຺ຕໍ, ຠນ຺ເຕ…ເປ… ອຸປາສກໍ ມໍ, ຠນ຺ເຕ, ຠຄວາ ຘາເຣຕຸ ອຊ຺ຊຕຄ຺ເຄ ປາຓຸເປຕໍ ສຣຓໍ ຄຕ’’ນ຺ຕິ. ປຎ຺ຈມໍ.