໖. ທຸຕິຍສນ຺ທິຏ຺ຐິກສຸຕ຺ຕໍ

໔໘. ອຖ ໂຂ ອຎ຺ຎຕໂຣ ພ຺ຣາຫ຺ມໂຓ ເຍນ ຠຄວາ ເຕນຸປສງ຺ກມິ; ອຸປສງ຺ກມິຕ຺ວາ ຠຄວຕາ ສທ຺ຘິໍ ສມ຺ໂມທິ. ສມ຺ໂມທນີຍໍ ກຖໍ ສາຣຓີຍໍ ວີຕິສາເຣຕ຺ວາ ເອກມນ຺ຕໍ ນິສີທິ. ເອກມນ຺ຕໍ ນິສິນ຺ໂນ ໂຂ ໂສ ພ຺ຣາຫ຺ມໂຓ ຠຄວນ຺ຕໍ ເອຕທໂວຈ – ‘‘‘ສນ຺ທິຏ຺ຐິໂກ ຘມ຺ໂມ, ສນ຺ທິຏ຺ຐິໂກ ຘມ຺ໂມ’ຕິ, ໂຠ ໂຄຕມ, ວຸຈ຺ຈຕິ. ກິຕ຺ຕາວຕາ ນຸ ໂຂ, ໂຠ ໂຄຕມ, ສນ຺ທິຏ຺ຐິໂກ ຘມ຺ໂມ ໂຫຕິ ອກາລິໂກ ເອຫິປສ຺ສິໂກ ໂອປເນຍ຺ຍິໂກ ປຈ຺ຈຕ຺ຕໍ ເວທິຕພ຺ໂພ ວິຎ຺ຎູຫີ’’ຕິ?

‘‘ເຕນ ຫິ, ພ຺ຣາຫ຺ມຓ, ຕຎ຺ເຎເວຕ຺ຖ ປຏິປຸຈ຺ຉິສ຺ສາມິ. ຍຖາ ເຕ ຂເມຍ຺ຍ ຕຖາ ນໍ ພ຺ຍາກເຣຍ຺ຍາສິ. ຕໍ ກິໍ ມຎ຺ຎສິ, ພ຺ຣາຫ຺ມຓ, ສນ຺ຕໍ ວາ ອຊ຺ຌຕ຺ຕໍ ຣາຄໍ ‘ອຕ຺ຖິ ເມ ອຊ຺ຌຕ຺ຕໍ ຣາໂຄ’ຕິ ປຊານາສິ, ອສນ຺ຕໍ ວາ ອຊ຺ຌຕ຺ຕໍ ຣາຄໍ ‘ນຕ຺ຖິ ເມ ອຊ຺ຌຕ຺ຕໍ ຣາໂຄ’ຕິ ປຊານາສີ’’ຕິ? ‘‘ເອວໍ, ໂຠ’’. ‘‘ຍໍ ໂຂ ຕ຺ວໍ, ພ຺ຣາຫ຺ມຓ, ສນ຺ຕໍ ວາ ອຊ຺ຌຕ຺ຕໍ ຣາຄໍ ‘ອຕ຺ຖິ ເມ ອຊ຺ຌຕ຺ຕໍ ຣາໂຄ’ຕິ ປຊານາສິ, ອສນ຺ຕໍ ວາ ອຊ຺ຌຕ຺ຕໍ ຣາຄໍ ‘ນຕ຺ຖິ ເມ ອຊ຺ຌຕ຺ຕໍ ຣາໂຄ’ຕິ ປຊານາສິ – ເອວມ຺ປິ ໂຂ, ພ຺ຣາຫ຺ມຓ, ສນ຺ທິຏ຺ຐິໂກ ຘມ຺ໂມ ໂຫຕິ…ເປ….

‘‘ຕໍ ກິໍ ມຎ຺ຎສິ, ພ຺ຣາຫ຺ມຓ, ສນ຺ຕໍ ວາ ອຊ຺ຌຕ຺ຕໍ ໂທສໍ…ເປ… ສນ຺ຕໍ ວາ ອຊ຺ຌຕ຺ຕໍ ໂມຫໍ…ເປ… ສນ຺ຕໍ ວາ ອຊ຺ຌຕ຺ຕໍ ກາຍສນ຺ໂທສໍ…ເປ… ສນ຺ຕໍ ວາ ອຊ຺ຌຕ຺ຕໍ ວຈີສນ຺ໂທສໍ…ເປ… ສນ຺ຕໍ ວາ ອຊ຺ຌຕ຺ຕໍ ມໂນສນ຺ໂທສໍ ‘ອຕ຺ຖິ ເມ ອຊ຺ຌຕ຺ຕໍ ມໂນສນ຺ໂທໂສ’ຕິ ປຊານາສິ, ອສນ຺ຕໍ ວາ ອຊ຺ຌຕ຺ຕໍ ມໂນສນ຺ໂທສໍ ‘ນຕ຺ຖິ ເມ ອຊ຺ຌຕ຺ຕໍ ມໂນສນ຺ໂທໂສ’ຕິ ປຊານາສີ’’ຕິ? ‘‘ເອວໍ, ໂຠ’’. ‘‘ຍໍ ໂຂ ຕ຺ວໍ, ພ຺ຣາຫ຺ມຓ, ສນ຺ຕໍ ວາ ອຊ຺ຌຕ຺ຕໍ ມໂນສນ຺ໂທສໍ ‘ອຕ຺ຖິ ເມ ອຊ຺ຌຕ຺ຕໍ ມໂນສນ຺ໂທໂສ’ຕິ ປຊານາສິ, ອສນ຺ຕໍ ວາ ອຊ຺ຌຕ຺ຕໍ ມໂນສນ຺ໂທສໍ ‘ນຕ຺ຖິ ເມ ອຊ຺ຌຕ຺ຕໍ ມໂນສນ຺ໂທໂສ’ຕິ ປຊານາສິ – ເອວໍ ໂຂ, ພ຺ຣາຫ຺ມຓ, ສນ຺ທິຏ຺ຐິໂກ ຘມ຺ໂມ ໂຫຕິ ອກາລິໂກ ເອຫິປສ຺ສິໂກ ໂອປເນຍ຺ຍິໂກ ປຈ຺ຈຕ຺ຕໍ ເວທິຕພ຺ໂພ ວິຎ຺ຎູຫີ’’ຕິ.

‘‘ອຠິກ຺ກນ຺ຕໍ, ໂຠ ໂຄຕມ, ອຠິກ຺ກນ຺ຕໍ, ໂຠ ໂຄຕມ…ເປ… ອຸປາສກໍ ມໍ ຠວໍ ໂຄຕໂມ ຘາເຣຕຸ ອຊ຺ຊຕຄ຺ເຄ ປາຓຸເປຕໍ ສຣຓໍ ຄຕ’’ນ຺ຕິ. ຉຏ຺ຐໍ.