໘. ທຸຕິຍສມຍສຸຕ຺ຕໍ

໒໘. ເອກໍ ສມຍໍ ສມ຺ພຫຸລາ ເຖຣາ ຠິກ຺ຂູ ພາຣາຓສິຍໍ ວິຫຣນ຺ຕິ ອິສິປຕເນ ມິຄທາເຍ. ອຖ ໂຂ ເຕສໍ ເຖຣານໍ ຠິກ຺ຂູນໍ ປຈ຺ຉາຠຕ຺ຕໍ ປິຓ຺ຑປາຕປຏິກ຺ກນ຺ຕານໍ ມຓ຺ຑລມາເຬ ສນ຺ນິສິນ຺ນານໍ ສນ຺ນິປຕິຕານໍ ອຍມນ຺ຕຣາກຖາ ອຸທປາທິ – ‘‘ໂກ ນຸ ໂຂ, ອາວຸໂສ, ສມໂຍ ມໂນຠາວນີຍສ຺ສ ຠິກ຺ຂຸໂນ ທສ຺ສນາຍ ອຸປສງ຺ກມິຕຸ’’ນ຺ຕິ?

ເອວໍ ວຸຕ຺ເຕ ອຎ຺ຎຕໂຣ ຠິກ຺ຂຸ ເຖເຣ ຠິກ຺ຂູ ເອຕທໂວຈ – ‘‘ຍສ຺ມິໍ, ອາວຸໂສ, ສມເຍ ມໂນຠາວນີໂຍ ຠິກ຺ຂຸ ປຈ຺ຉາຠຕ຺ຕໍ ປິຓ຺ຑປາຕປຏິກ຺ກນ຺ໂຕ ປາເທ ປກ຺ຂາເລຕ຺ວາ ນິສິນ຺ໂນ ໂຫຕິ ປລ຺ລງ຺ກໍ ອາຠຸຊິຕ຺ວາ ອຸຊຸໍ ກາຍໍ ປຓິຘາຍ ປຣິມຸຂໍ ສຕິໍ ອຸປຏ຺ຐເປຕ຺ວາ, ໂສ ສມໂຍ ມໂນຠາວນີຍສ຺ສ ຠິກ຺ຂຸໂນ ທສ຺ສນາຍ ອຸປສງ຺ກມິຕຸ’’ນ຺ຕິ.

ເອວໍ ວຸຕ຺ເຕ ອຎ຺ຎຕໂຣ ຠິກ຺ຂຸ ຕໍ ຠິກ຺ຂຸໍ ເອຕທໂວຈ – ‘‘ນ ໂຂ, ອາວຸໂສ, ໂສ ສມໂຍ ມໂນຠາວນີຍສ຺ສ ຠິກ຺ຂຸໂນ ທສ຺ສນາຍ ອຸປສງ຺ກມິຕຸໍ. ຍສ຺ມິໍ, ອາວຸໂສ, ສມເຍ ມໂນຠາວນີໂຍ ຠິກ຺ຂຸ ປຈ຺ຉາຠຕ຺ຕໍ ປິຓ຺ຑປາຕປຏິກ຺ກນ຺ໂຕ ປາເທ ປກ຺ຂາເລຕ຺ວາ ນິສິນ຺ໂນ ໂຫຕິ ປລ຺ລງ຺ກໍ ອາຠຸຊິຕ຺ວາ ອຸຊຸໍ ກາຍໍ ປຓິຘາຍ ປຣິມຸຂໍ ສຕິໍ ອຸປຏ຺ຐເປຕ຺ວາ, ຈາຣິຕ຺ຕກິລມໂຖປິສ຺ສ ຕສ຺ມິໍ ສມເຍ ອປ຺ປຏິປ຺ປສ຺ສທ຺ໂຘ ໂຫຕິ, ຠຕ຺ຕກິລມໂຖປິສ຺ສ ຕສ຺ມິໍ ສມເຍ ອປ຺ປຏິປ຺ປສ຺ສທ຺ໂຘ ໂຫຕິ. ຕສ຺ມາ ໂສ ອສມໂຍ ມໂນຠາວນີຍສ຺ສ ຠິກ຺ຂຸໂນ ທສ຺ສນາຍ ອຸປສງ຺ກມິຕຸໍ. ຍສ຺ມິໍ, ອາວຸໂສ, ສມເຍ ມໂນຠາວນີໂຍ ຠິກ຺ຂຸ ສາຍນ຺ຫສມຍໍ ປຏິສລ຺ລານາ ວຸຏ຺ຐິໂຕ ວິຫາຣປຈ຺ຉາຍາຍໍ ນິສິນ຺ໂນ ໂຫຕິ ປລ຺ລງ຺ກໍ ອາຠຸຊິຕ຺ວາ ອຸຊຸໍ ກາຍໍ ປຓິຘາຍ ປຣິມຸຂໍ ສຕິໍ ອຸປຏ຺ຐເປຕ຺ວາ, ໂສ ສມໂຍ ມໂນຠາວນີຍສ຺ສ ຠິກ຺ຂຸໂນ ທສ຺ສນາຍ ອຸປສງ຺ກມິຕຸ’’ນ຺ຕິ.

ເອວໍ ວຸຕ຺ເຕ ອຎ຺ຎຕໂຣ ຠິກ຺ຂຸ ຕໍ ຠິກ຺ຂຸໍ ເອຕທໂວຈ – ‘‘ນ ໂຂ, ອາວຸໂສ, ໂສ ສມໂຍ ມໂນຠາວນີຍສ຺ສ ຠິກ຺ຂຸໂນ ທສ຺ສນາຍ ອຸປສງ຺ກມິຕຸໍ. ຍສ຺ມິໍ, ອາວຸໂສ, ສມເຍ ມໂນຠາວນີໂຍ ຠິກ຺ຂຸ ສາຍນ຺ຫສມຍໍ ປຏິສລ຺ລານາ ວຸຏ຺ຐິໂຕ ວິຫາຣປຈ຺ຉາຍາຍໍ ນິສິນ຺ໂນ ໂຫຕິ ປລ຺ລງ຺ກໍ ອາຠຸຊິຕ຺ວາ ອຸຊຸໍ ກາຍໍ ປຓິຘາຍ ປຣິມຸຂໍ ສຕິໍ ອຸປຏ຺ຐເປຕ຺ວາ, ຍເທວສ຺ສ ທິວາ ສມາຘິນິມິຕ຺ຕໍ ມນສິກຕໍ ໂຫຕິ ຕເທວສ຺ສ ຕສ຺ມິໍ ສມເຍ ສມຸທາຈຣຕິ. ຕສ຺ມາ ໂສ ອສມໂຍ ມໂນຠາວນີຍສ຺ສ ຠິກ຺ຂຸໂນ ທສ຺ສນາຍ ອຸປສງ຺ກມິຕຸໍ. ຍສ຺ມິໍ, ອາວຸໂສ, ສມເຍ ມໂນຠາວນີໂຍ ຠິກ຺ຂຸ ຣຕ຺ຕິຍາ ປຈ຺ຈູສສມຍໍ ປຈ຺ຈຸຏ຺ຐາຍ ນິສິນ຺ໂນ ໂຫຕິ ປລ຺ລງ຺ກໍ ອາຠຸຊິຕ຺ວາ ອຸຊຸໍ ກາຍໍ ປຓິຘາຍ ປຣິມຸຂໍ ສຕິໍ ອຸປຏ຺ຐເປຕ຺ວາ, ໂສ ສມໂຍ ມໂນຠາວນີຍສ຺ສ ຠິກ຺ຂຸໂນ ທສ຺ສນາຍ ອຸປສງ຺ກມິຕຸ’’ນ຺ຕິ.

ເອວໍ ວຸຕ຺ເຕ ອຎ຺ຎຕໂຣ ຠິກ຺ຂຸ ຕໍ ຠິກ຺ຂຸໍ ເອຕທໂວຈ – ‘‘ນ ໂຂ, ອາວຸໂສ, ໂສ ສມໂຍ ມໂນຠາວນີຍສ຺ສ ຠິກ຺ຂຸໂນ ທສ຺ສນາຍ ອຸປສງ຺ກມິຕຸໍ. ຍສ຺ມິໍ, ອາວຸໂສ, ສມເຍ ມໂນຠາວນີໂຍ ຠິກ຺ຂຸ ຣຕ຺ຕິຍາ ປຈ຺ຈູສສມຍໍ ປຈ຺ຈຸຏ຺ຐາຍ ນິສິນ຺ໂນ ໂຫຕິ ປລ຺ລງ຺ກໍ ອາຠຸຊິຕ຺ວາ ອຸຊຸໍ ກາຍໍ ປຓິຘາຍ ປຣິມຸຂໍ ສຕິໍ ອຸປຏ຺ຐເປຕ຺ວາ, ໂອຊຏ຺ຐາຍິສ຺ສ ຕສ຺ມິໍ ສມເຍ ກາໂຍ ໂຫຕິ ຜາສຸສ຺ສ ໂຫຕິ ພຸທ຺ຘານໍ ສາສນໍ ມນສິ ກາຕຸໍ. ຕສ຺ມາ ໂສ ອສມໂຍ ມໂນຠາວນີຍສ຺ສ ຠິກ຺ຂຸໂນ ທສ຺ສນາຍ ອຸປສງ຺ກມິຕຸ’’ນ຺ຕິ.

ເອວໍ ວຸຕ຺ເຕ ອາຍສ຺ມາ ມຫາກຈ຺ຈາໂນ ເຖເຣ ຠິກ຺ຂູ ເອຕທໂວຈ – ‘‘ສມ຺ມຸຂາ ເມຕໍ, ອາວຸໂສ, ຠຄວໂຕ ສຸຕໍ ສມ຺ມຸຂາ ປຏິຄ຺ຄຫິຕໍ – ‘ຉຍິເມ, ຠິກ຺ຂຸ, ສມຍາ ມໂນຠາວນີຍສ຺ສ ຠິກ຺ຂຸໂນ ທສ຺ສນາຍ ອຸປສງ຺ກມິຕຸໍ’’’.

‘‘ກຕເມ ຉ? ອິຘ, ຠິກ຺ຂຸ, ຍສ຺ມິໍ ສມເຍ ຠິກ຺ຂຸ ກາມຣາຄປຣິຍຸຏ຺ຐິເຕນ ເຈຕສາ ວິຫຣຕິ ກາມຣາຄປເຣເຕນ, ອຸປ຺ປນ຺ນສ຺ສ ຈ ກາມຣາຄສ຺ສ ນິສ຺ສຣຓໍ ຍຖາຠູຕໍ ນປ຺ປຊານາຕິ, ຕສ຺ມິໍ ສມເຍ ມໂນຠາວນີໂຍ ຠິກ຺ຂຸ ອຸປສງ຺ກມິຕ຺ວາ ເອວມສ຺ສ ວຈນີໂຍ – ‘ອຫໍ ໂຂ, ອາວຸໂສ, ກາມຣາຄປຣິຍຸຏ຺ຐິເຕນ ເຈຕສາ ວິຫຣາມິ ກາມຣາຄປເຣເຕນ, ອຸປ຺ປນ຺ນສ຺ສ ຈ ກາມຣາຄສ຺ສ ນິສ຺ສຣຓໍ ຍຖາຠູຕໍ ນປ຺ປຊານາມິ. ສາຘຸ ວຕ ເມ ອາຍສ຺ມາ ກາມຣາຄສ຺ສ ປຫານາຍ ຘມ຺ມໍ ເທເສຕູ’ຕິ. ຕສ຺ສ ມໂນຠາວນີໂຍ ຠິກ຺ຂຸ ກາມຣາຄສ຺ສ ປຫານາຍ ຘມ຺ມໍ ເທເສຕິ. ອຍໍ, ຠິກ຺ຂຸ, ປຐໂມ ສມໂຍ ມໂນຠາວນີຍສ຺ສ ຠິກ຺ຂຸໂນ ທສ຺ສນາຍ ອຸປສງ຺ກມິຕຸໍ.

‘‘ປຸນ ຈປຣໍ, ຠິກ຺ຂຸ, ຍສ຺ມິໍ ສມເຍ ຠິກ຺ຂຸ ພ຺ຍາປາທປຣິຍຸຏ຺ຐິເຕນ ເຈຕສາ ວິຫຣຕິ…ເປ… ຖິນມິທ຺ຘປຣິຍຸຏ຺ຐິເຕນ ເຈຕສາ ວິຫຣຕິ… ອຸທ຺ຘຈ຺ຈກຸກ຺ກຸຈ຺ຈປຣິຍຸຏ຺ຐິເຕນ ເຈຕສາ ວິຫຣຕິ… ວິຈິກິຈ຺ຉາປຣິຍຸຏ຺ຐິເຕນ ເຈຕສາ ວິຫຣຕິ… ຍໍ ນິມິຕ຺ຕໍ ອາຄມ຺ມ ຍໍ ນິມິຕ຺ຕໍ ມນສິກໂຣໂຕ ອນນ຺ຕຣາ ອາສວານໍ ຂໂຍ ໂຫຕິ, ຕໍ ນິມິຕ຺ຕໍ ນ ຊານາຕິ ນ ປສ຺ສຕິ, ຕສ຺ມິໍ ສມເຍ ມໂນຠາວນີໂຍ ຠິກ຺ຂຸ ອຸປສງ຺ກມິຕ຺ວາ ເອວມສ຺ສ ວຈນີໂຍ – ‘ອຫໍ ໂຂ, ອາວຸໂສ, ຍໍ ນິມິຕ຺ຕໍ ອາຄມ຺ມ ຍໍ ນິມິຕ຺ຕໍ ມນສິກໂຣໂຕ ອນນ຺ຕຣາ ອາສວານໍ ຂໂຍ ໂຫຕິ ຕໍ ນິມິຕ຺ຕໍ ນ ຊານາມິ ນ ປສ຺ສາມິ. ສາຘຸ ວຕ ເມ ອາຍສ຺ມາ ອາສວານໍ ຂຍາຍ ຘມ຺ມໍ ເທເສຕູ’ຕິ. ຕສ຺ສ ມໂນຠາວນີໂຍ ຠິກ຺ຂຸ ອາສວານໍ ຂຍາຍ ຘມ຺ມໍ ເທເສຕິ. ອຍໍ, ຠິກ຺ຂຸ, ຉຏ຺ໂຐ ສມໂຍ ມໂນຠາວນີຍສ຺ສ ຠິກ຺ຂຸໂນ ທສ຺ສນາຍ ອຸປສງ຺ກມິຕຸໍ.

‘‘ສມ຺ມຸຂາ ເມຕໍ, ອາວຸໂສ, ຠຄວໂຕ ສຸຕໍ ສມ຺ມຸຂາ ປຏິຄ຺ຄຫິຕໍ – ‘ອິເມ ໂຂ, ຠິກ຺ຂຸ, ຉ ສມຍາ ມໂນຠາວນີຍສ຺ສ ຠິກ຺ຂຸໂນ ທສ຺ສນາຍ ອຸປສງ຺ກມິຕຸ’’’ນ຺ຕິ. ອຏ຺ຐມໍ.