໓. ອິຏ຺ຐສຸຕ຺ຕໍ

໔໓. ອຖ ໂຂ ອນາຖປິຓ຺ຑິໂກ ຄຫປຕິ ເຍນ ຠຄວາ ເຕນຸປສງ຺ກມິ; ອຸປສງ຺ກມິຕ຺ວາ ຠຄວນ຺ຕໍ ອຠິວາເທຕ຺ວາ ເອກມນ຺ຕໍ ນິສີທິ. ເອກມນ຺ຕໍ ນິສິນ຺ນໍ ໂຂ ອນາຖປິຓ຺ຑິກໍ ຄຫປຕິໍ ຠຄວາ ເອຕທໂວຈ –

‘‘ປຎ຺ຈິເມ, ຄຫປຕິ, ຘມ຺ມາ ອິຏ຺ຐາ ກນ຺ຕາ ມນາປາ ທຸລ຺ລຠາ ໂລກສ຺ມິໍ. ກຕເມ ປຎ຺ຈ? ອາຍຸ, ຄຫປຕິ, ອິຏ຺ໂຐ ກນ຺ໂຕ ມນາໂປ ທຸລ຺ລໂຠ ໂລກສ຺ມິໍ; ວຓ຺ໂຓ ອິຏ຺ໂຐ ກນ຺ໂຕ ມນາໂປ ທຸລ຺ລໂຠ ໂລກສ຺ມິໍ; ສຸຂໍ ອິຏ຺ຐໍ ກນ຺ຕໍ ມນາປໍ ທຸລ຺ລຠໍ ໂລກສ຺ມິໍ; ຍໂສ ອິຏ຺ໂຐ ກນ຺ໂຕ ມນາໂປ ທຸລ຺ລໂຠ ໂລກສ຺ມິໍ; ສຄ຺ຄາ ອິຏ຺ຐາ ກນ຺ຕາ ມນາປາ ທຸລ຺ລຠາ ໂລກສ຺ມິໍ. ອິເມ ໂຂ, ຄຫປຕິ, ປຎ຺ຈ ຘມ຺ມາ ອິຏ຺ຐາ ກນ຺ຕາ ມນາປາ ທຸລ຺ລຠາ ໂລກສ຺ມິໍ.

‘‘ອິເມສໍ ໂຂ, ຄຫປຕິ, ປຎ຺ຈນ຺ນໍ ຘມ຺ມານໍ ອິຏ຺ຐານໍ ກນ຺ຕານໍ ມນາປານໍ ທຸລ຺ລຠານໍ ໂລກສ຺ມິໍ ນ ອາຍາຈນເຫຕຸ ວາ ປຕ຺ຖນາເຫຕຸ ວາ [ນ ປຕ຺ຖນາເຫຕຸ ວາ (ສ຺ຍາ. ກໍ. ປີ.)] ປຏິລາຠໍ ວທາມິ. ອິເມສໍ ໂຂ, ຄຫປຕິ, ປຎ຺ຈນ຺ນໍ ຘມ຺ມານໍ ອິຏ຺ຐານໍ ກນ຺ຕານໍ ມນາປານໍ ທຸລ຺ລຠານໍ ໂລກສ຺ມິໍ ອາຍາຈນເຫຕຸ ວາ ປຕ຺ຖນາເຫຕຸ ວາ ປຏິລາໂຠ ອຠວິສ຺ສ, ໂກ ອິຘ ເກນ ຫາເຍຖ?

‘‘ນ ໂຂ, ຄຫປຕິ, ອຣຫຕິ ອຣິຍສາວໂກ ອາຍຸກາໂມ ອາຍຸໍ ອາຍາຈິຕຸໍ ວາ ອຠິນນ຺ທິຕຸໍ ວາ ອາຍຸສ຺ສ ວາປິ ເຫຕຸ. ອາຍຸກາເມນ, ຄຫປຕິ, ອຣິຍສາວເກນ ອາຍຸສໍວຕ຺ຕນິກາ ປຏິປທາ ປຏິປຊ຺ຊິຕພ຺ພາ. ອາຍຸສໍວຕ຺ຕນິກາ ຫິສ຺ສ ປຏິປທາ ປຏິປນ຺ນາ ອາຍຸປຏິລາຠາຍ ສໍວຕ຺ຕຕິ. ໂສ ລາຠີ ໂຫຕິ ອາຍຸສ຺ສ ທິພ຺ພສ຺ສ ວາ ມານຸສສ຺ສ ວາ.

‘‘ນ ໂຂ, ຄຫປຕິ, ອຣຫຕິ ອຣິຍສາວໂກ ວຓ຺ຓກາໂມ ວຓ຺ຓໍ ອາຍາຈິຕຸໍ ວາ ອຠິນນ຺ທິຕຸໍ ວາ ວຓ຺ຓສ຺ສ ວາປິ ເຫຕຸ. ວຓ຺ຓກາເມນ, ຄຫປຕິ, ອຣິຍສາວເກນ ວຓ຺ຓສໍວຕ຺ຕນິກາ ປຏິປທາ ປຏິປຊ຺ຊິຕພ຺ພາ. ວຓ຺ຓສໍວຕ຺ຕນິກາ ຫິສ຺ສ ປຏິປທາ ປຏິປນ຺ນາ ວຓ຺ຓປຏິລາຠາຍ ສໍວຕ຺ຕຕິ. ໂສ ລາຠີ ໂຫຕິ ວຓ຺ຓສ຺ສ ທິພ຺ພສ຺ສ ວາ ມານຸສສ຺ສ ວາ.

‘‘ນ ໂຂ, ຄຫປຕິ, ອຣຫຕິ ອຣິຍສາວໂກ ສຸຂກາໂມ ສຸຂໍ ອາຍາຈິຕຸໍ ວາ ອຠິນນ຺ທິຕຸໍ ວາ ສຸຂສ຺ສ ວາປິ ເຫຕຸ. ສຸຂກາເມນ, ຄຫປຕິ, ອຣິຍສາວເກນ ສຸຂສໍວຕ຺ຕນິກາ ປຏິປທາ ປຏິປຊ຺ຊິຕພ຺ພາ. ສຸຂສໍວຕ຺ຕນິກາ ຫິສ຺ສ ປຏິປທາ ປຏິປນ຺ນາ ສຸຂປຏິລາຠາຍ ສໍວຕ຺ຕຕິ. ໂສ ລາຠີ ໂຫຕິ ສຸຂສ຺ສ ທິພ຺ພສ຺ສ ວາ ມານຸສສ຺ສ ວາ.

‘‘ນ ໂຂ, ຄຫປຕິ, ອຣຫຕິ ອຣິຍສາວໂກ ຍສກາໂມ ຍສໍ ອາຍາຈິຕຸໍ ວາ ອຠິນນ຺ທິຕຸໍ ວາ ຍສສ຺ສ ວາປິ ເຫຕຸ. ຍສກາເມນ, ຄຫປຕິ, ອຣິຍສາວເກນ ຍສສໍວຕ຺ຕນິກາ ປຏິປທາ ປຏິປຊ຺ຊິຕພ຺ພາ. ຍສສໍວຕ຺ຕນິກາ ຫິສ຺ສ ປຏິປທາ ປຏິປນ຺ນາ ຍສປຏິລາຠາຍ ສໍວຕ຺ຕຕິ. ໂສ ລາຠີ ໂຫຕິ ຍສສ຺ສ ທິພ຺ພສ຺ສ ວາ ມານຸສສ຺ສ ວາ.

‘‘ນ ໂຂ, ຄຫປຕິ, ອຣຫຕິ ອຣິຍສາວໂກ ສຄ຺ຄກາໂມ ສຄ຺ຄໍ ອາຍາຈິຕຸໍ ວາ ອຠິນນ຺ທິຕຸໍ ວາ ສຄ຺ຄານໍ ວາປິ ເຫຕຸ. ສຄ຺ຄກາເມນ, ຄຫປຕິ, ອຣິຍສາວເກນ ສຄ຺ຄສໍວຕ຺ຕນິກາ ປຏິປທາ ປຏິປຊ຺ຊິຕພ຺ພາ. ສຄ຺ຄສໍວຕ຺ຕນິກາ ຫິສ຺ສ ປຏິປທາ ປຏິປນ຺ນາ ສຄ຺ຄປຏິລາຠາຍ ສໍວຕ຺ຕຕິ. ໂສ ລາຠີ ໂຫຕິ ສຄ຺ຄານ’’ນ຺ຕິ.

‘‘ອາຍຸໍ ວຓ຺ຓໍ ຍສໍ ກິຕ຺ຕິໍ, ສຄ຺ຄໍ ອຸຈ຺ຈາກຸລີນຕໍ;

ຣຕິໂຍ ປຕ຺ຖຍາເນນ [ປຕ຺ຖຍມາເນນ (ກ.)], ອຸຬາຣາ ອປຣາປຣາ.

‘‘ອປ຺ປມາທໍ ປສໍສນ຺ຕິ, ປຸຎ຺ຎກິຣິຍາສຸ ປຓ຺ຑິຕາ;

‘‘ອປ຺ປມຕ຺ໂຕ ອຸໂຠ ອຕ຺ເຖ, ອຘິຄຓ຺ຫາຕິ ປຓ຺ຑິໂຕ.

‘‘ທິຏ຺ເຐ ຘມ຺ເມ ຈ [ທິຏ຺ເຐວ ຘມ຺ເມ (ສີ.)] ໂຍ ອຕ຺ໂຖ, ໂຍ ຈຕ຺ໂຖ ສມ຺ປຣາຍິໂກ;

ອຕ຺ຖາຠິສມຍາ ຘີໂຣ, ປຓ຺ຑິໂຕຕິ ປວຸຈ຺ຈຕີ’’ຕິ. ຕຕິຍໍ;