໕. ສິກ຺ຂາສຸຕ຺ຕໍ

໕. ‘‘ໂຍ ຫິ ໂກຈິ, ຠິກ຺ຂເວ, ຠິກ຺ຂຸ ວາ ຠິກ຺ຂຸນີ ວາ ສິກ຺ຂໍ ປຈ຺ຈກ຺ຂາຍ ຫີນາຍາວຕ຺ຕຕິ, ຕສ຺ສ ທິຏ຺ເຐວ [ທິຏ຺ເຐ ເຈວ (ສີ.)] ຘມ຺ເມ ປຎ຺ຈ ສຫຘມ຺ມິກາ ວາທານຸປາຕາ [ວາທານຸວາທາ (ອ. ນິ. ໘.໑໒; ອ. ນິ. ໓.໕໘)] ຄາຣຍ຺ຫາ ຐານາ ອາຄຈ຺ຉນ຺ຕິ. ກຕເມ ປຎ຺ຈ? ສທ຺ຘາປິ ນາມ ເຕ ນາໂຫສິ ກຸສເລສຸ ຘມ຺ເມສຸ, ຫິຣີປິ ນາມ ເຕ ນາໂຫສິ ກຸສເລສຸ ຘມ຺ເມສຸ, ໂອຕ຺ຕປ຺ປມ຺ປິ ນາມ ເຕ ນາໂຫສິ ກຸສເລສຸ ຘມ຺ເມສຸ, ວີຣິຍມ຺ປິ ນາມ ເຕ ນາໂຫສິ ກຸສເລສຸ ຘມ຺ເມສຸ, ປຎ຺ຎາປິ ນາມ ເຕ ນາໂຫສິ ກຸສເລສຸ ຘມ຺ເມສຸ. ໂຍ ຫິ ໂກຈິ, ຠິກ຺ຂເວ, ຠິກ຺ຂຸ ວາ ຠິກ຺ຂຸນີ ວາ ສິກ຺ຂໍ ປຈ຺ຈກ຺ຂາຍ ຫີນາຍາວຕ຺ຕຕິ, ຕສ຺ສ ທິຏ຺ເຐວ ຘມ຺ເມ ອິເມ ປຎ຺ຈ ສຫຘມ຺ມິກາ ວາທານຸປາຕາ ຄາຣຍ຺ຫາ ຐານາ ອາຄຈ຺ຉນ຺ຕິ.

‘‘ໂຍ ຫິ ໂກຈິ, ຠິກ຺ຂເວ, ຠິກ຺ຂຸ ວາ ຠິກ຺ຂຸນີ ວາ ສຫາປິ ທຸກ຺ເຂນ ສຫາປິ ໂທມນສ຺ເສນ ອສ຺ສຸມຸໂຂ [ອສ຺ສຸມຸໂຂປິ (ສ຺ຍາ.)] ຣຸທມາໂນ ປຣິປຸຓ຺ຓໍ ປຣິສຸທ຺ຘໍ ພ຺ຣຫ຺ມຈຣິຍໍ ຈຣຕິ, ຕສ຺ສ ທິຏ຺ເຐວ ຘມ຺ເມ ປຎ຺ຈ ສຫຘມ຺ມິກາ ປາສໍສາ ຐານາ [ປາສໍສໍ ຐານໍ (ສ຺ຍາ.)] ອາຄຈ຺ຉນ຺ຕິ. ກຕເມ ປຎ຺ຈ? ສທ຺ຘາປິ ນາມ ເຕ ອໂຫສິ ກຸສເລສຸ ຘມ຺ເມສຸ, ຫິຣີປິ ນາມ ເຕ ອໂຫສິ ກຸສເລສຸ ຘມ຺ເມສຸ, ໂອຕ຺ຕປ຺ປມ຺ປິ ນາມ ເຕ ອໂຫສິ ກຸສເລສຸ ຘມ຺ເມສຸ, ວີຣິຍມ຺ປິ ນາມ ເຕ ອໂຫສິ ກຸສເລສຸ ຘມ຺ເມສຸ, ປຎ຺ຎາປິ ນາມ ເຕ ອໂຫສິ ກຸສເລສຸ ຘມ຺ເມສຸ. ໂຍ ຫິ ໂກຈິ, ຠິກ຺ຂເວ, ຠິກ຺ຂຸ ວາ ຠິກ຺ຂຸນີ ວາ ສຫາປິ ທຸກ຺ເຂນ ສຫາປິ ໂທມນສ຺ເສນ ອສ຺ສຸມຸໂຂ ຣຸທມາໂນ ປຣິປຸຓ຺ຓໍ ປຣິສຸທ຺ຘໍ ພ຺ຣຫ຺ມຈຣິຍໍ ຈຣຕິ, ຕສ຺ສ ທິຏ຺ເຐວ ຘມ຺ເມ ອິເມ ປຎ຺ຈ ສຫຘມ຺ມິກາ ປາສໍສາ ຐານາ ອາຄຈ຺ຉນ຺ຕີ’’ຕິ. ປຎ຺ຈມໍ.