໖. ສມາປຕ຺ຕິສຸຕ຺ຕໍ

໖. ‘‘ນ ຕາວ, ຠິກ຺ຂເວ, ອກຸສລສ຺ສ ສມາປຕ຺ຕິ ໂຫຕິ ຍາວ ສທ຺ຘາ ປຈ຺ຈຸປຏ຺ຐິຕາ ໂຫຕິ ກຸສເລສຸ ຘມ຺ເມສຸ. ຍໂຕ ຈ ໂຂ, ຠິກ຺ຂເວ, ສທ຺ຘາ ອນ຺ຕຣຫິຕາ ໂຫຕິ, ອສທ຺ຘິຍໍ ປຣິຍຸຏ຺ຐາຍ ຕິຏ຺ຐຕິ; ອຖ ອກຸສລສ຺ສ ສມາປຕ຺ຕິ ໂຫຕິ.

‘‘ນ ຕາວ, ຠິກ຺ຂເວ, ອກຸສລສ຺ສ ສມາປຕ຺ຕິ ໂຫຕິ ຍາວ ຫິຣີ ປຈ຺ຈຸປຏ຺ຐິຕາ ໂຫຕິ ກຸສເລສຸ ຘມ຺ເມສຸ. ຍໂຕ ຈ ໂຂ, ຠິກ຺ຂເວ, ຫິຣີ ອນ຺ຕຣຫິຕາ ໂຫຕິ, ອຫິຣິກໍ ປຣິຍຸຏ຺ຐາຍ ຕິຏ຺ຐຕິ; ອຖ ອກຸສລສ຺ສ ສມາປຕ຺ຕິ ໂຫຕິ.

‘‘ນ ຕາວ, ຠິກ຺ຂເວ, ອກຸສລສ຺ສ ສມາປຕ຺ຕິ ໂຫຕິ ຍາວ ໂອຕ຺ຕປ຺ປໍ ປຈ຺ຈຸປຏ຺ຐິຕໍ ໂຫຕິ ກຸສເລສຸ ຘມ຺ເມສຸ. ຍໂຕ ຈ ໂຂ, ຠິກ຺ຂເວ, ໂອຕ຺ຕປ຺ປໍ ອນ຺ຕຣຫິຕໍ ໂຫຕິ, ອໂນຕ຺ຕປ຺ປໍ ປຣິຍຸຏ຺ຐາຍ ຕິຏ຺ຐຕິ; ອຖ ອກຸສລສ຺ສ ສມາປຕ຺ຕິ ໂຫຕິ.

‘‘ນ ຕາວ, ຠິກ຺ຂເວ, ອກຸສລສ຺ສ ສມາປຕ຺ຕິ ໂຫຕິ ຍາວ ວີຣິຍໍ ປຈ຺ຈຸປຏ຺ຐິຕໍ ໂຫຕິ ກຸສເລສຸ ຘມ຺ເມສຸ. ຍໂຕ ຈ ໂຂ, ຠິກ຺ຂເວ, ວີຣິຍໍ ອນ຺ຕຣຫິຕໍ ໂຫຕິ, ໂກສຊ຺ຊໍ ປຣິຍຸຏ຺ຐາຍ ຕິຏ຺ຐຕິ; ອຖ ອກຸສລສ຺ສ ສມາປຕ຺ຕິ ໂຫຕິ.

‘‘ນ ຕາວ, ຠິກ຺ຂເວ, ອກຸສລສ຺ສ ສມາປຕ຺ຕິ ໂຫຕິ ຍາວ ປຎ຺ຎາ ປຈ຺ຈຸປຏ຺ຐິຕາ ໂຫຕິ ກຸສເລສຸ ຘມ຺ເມສຸ. ຍໂຕ ຈ ໂຂ, ຠິກ຺ຂເວ, ປຎ຺ຎາ ອນ຺ຕຣຫິຕາ ໂຫຕິ, ທຸປ຺ປຎ຺ຎາ [ທຸປ຺ປຎ຺ຎໍ (ກ.)] ປຣິຍຸຏ຺ຐາຍ ຕິຏ຺ຐຕິ; ອຖ ອກຸສລສ຺ສ ສມາປຕ຺ຕິ ໂຫຕີ’’ຕິ. ຉຏ຺ຐໍ.