໓. ສິກ຺ຂານິສໍສສຸຕ຺ຕໍ

໒໔໕. ‘‘ສິກ຺ຂານິສໍສມິທໍ, ຠິກ຺ຂເວ, ພ຺ຣຫ຺ມຈຣິຍໍ ວຸສ຺ສຕິ ປຎ຺ຎຸຕ຺ຕຣໍ ວິມຸຕ຺ຕິສາຣໍ ສຕາຘິປເຕຍ຺ຍໍ. ກຖຎ຺ຈ, ຠິກ຺ຂເວ, ສິກ຺ຂານິສໍສໍ ໂຫຕິ? ອິຘ, ຠິກ຺ຂເວ, ມຍາ ສາວການໍ ອາຠິສມາຈາຣິກາ ສິກ຺ຂາ ປຎ຺ຎຕ຺ຕາ ອປ຺ປສນ຺ນານໍ ປສາທາຍ ປສນ຺ນານໍ ຠິຍ຺ໂຍຠາວາຍ. ຍຖາ ຍຖາ, ຠິກ຺ຂເວ, ມຍາ ສາວການໍ ອາຠິສມາຈາຣິກາ ສິກ຺ຂາ ປຎ຺ຎຕ຺ຕາ ອປ຺ປສນ຺ນານໍ ປສາທາຍ ປສນ຺ນານໍ ຠິຍ຺ໂຍຠາວາຍ ຕຖາ ຕຖາ ໂສ ຕສ຺ສາ ສິກ຺ຂາຍ ອຂຓ຺ຑກາຣີ ໂຫຕິ ອຈ຺ຉິທ຺ທກາຣີ ອສພລກາຣີ ອກມ຺ມາສກາຣີ, ສມາທາຍ ສິກ຺ຂຕິ ສິກ຺ຂາປເທສຸ.

‘‘ປຸນ ຈປຣໍ, ຠິກ຺ຂເວ, ມຍາ ສາວການໍ ອາທິພ຺ຣຫ຺ມຈຣິຍິກາ ສິກ຺ຂາ ປຎ຺ຎຕ຺ຕາ ສພ຺ພໂສ ສມ຺ມາ ທຸກ຺ຂກ຺ຂຍາຍ. ຍຖາ ຍຖາ, ຠິກ຺ຂເວ, ມຍາ ສາວການໍ ອາທິພ຺ຣຫ຺ມຈຣິຍິກາ ສິກ຺ຂາ ປຎ຺ຎຕ຺ຕາ ສພ຺ພໂສ ສມ຺ມາ ທຸກ຺ຂກ຺ຂຍາຍ ຕຖາ ຕຖາ ໂສ ຕສ຺ສາ ສິກ຺ຂາຍ ອຂຓ຺ຑກາຣີ ໂຫຕິ ອຈ຺ຉິທ຺ທກາຣີ ອສພລກາຣີ ອກມ຺ມາສກາຣີ, ສມາທາຍ ສິກ຺ຂຕິ ສິກ຺ຂາປເທສຸ. ເອວໍ ໂຂ, ຠິກ຺ຂເວ, ສິກ຺ຂານິສໍສໍ ໂຫຕິ.

‘‘ກຖຎ຺ຈ, ຠິກ຺ຂເວ, ປຎ຺ຎຸຕ຺ຕຣໍ ໂຫຕິ? ອິຘ, ຠິກ຺ຂເວ, ມຍາ ສາວການໍ ຘມ຺ມາ ເທສິຕາ ສພ຺ພໂສ ສມ຺ມາ ທຸກ຺ຂກ຺ຂຍາຍ. ຍຖາ ຍຖາ, ຠິກ຺ຂເວ, ມຍາ ສາວການໍ ຘມ຺ມາ ເທສິຕາ ສພ຺ພໂສ ສມ຺ມາ ທຸກ຺ຂກ຺ຂຍາຍ ຕຖາ ຕຖາສ຺ສ ເຕ ຘມ຺ມາ ປຎ຺ຎາຍ ສມເວກ຺ຂິຕາ ໂຫນ຺ຕິ. ເອວໍ ໂຂ, ຠິກ຺ຂເວ, ປຎ຺ຎຸຕ຺ຕຣໍ ໂຫຕິ.

‘‘ກຖຎ຺ຈ, ຠິກ຺ຂເວ, ວິມຸຕ຺ຕິສາຣໍ ໂຫຕິ? ອິຘ, ຠິກ຺ຂເວ, ມຍາ ສາວການໍ ຘມ຺ມາ ເທສິຕາ ສພ຺ພໂສ ສມ຺ມາ ທຸກ຺ຂກ຺ຂຍາຍ. ຍຖາ ຍຖາ, ຠິກ຺ຂເວ, ມຍາ ສາວການໍ ຘມ຺ມາ ເທສິຕາ ສພ຺ພໂສ ສມ຺ມາ ທຸກ຺ຂກ຺ຂຍາຍ ຕຖາ ຕຖາສ຺ສ ເຕ ຘມ຺ມາ ວິມຸຕ຺ຕິຍາ ຜຸສິຕາ ໂຫນ຺ຕິ. ເອວໍ ໂຂ, ຠິກ຺ຂເວ, ວິມຸຕ຺ຕິສາຣໍ ໂຫຕິ.

‘‘ກຖຎ຺ຈ, ຠິກ຺ຂເວ, ສຕາຘິປເຕຍ຺ຍໍ ໂຫຕິ? ‘ອິຕິ ອປຣິປູຣໍ ວາ ອາຠິສມາຈາຣິກໍ ສິກ຺ຂໍ ປຣິປູເຣສ຺ສາມິ, ປຣິປູຣໍ ວາ ອາຠິສມາຈາຣິກໍ ສິກ຺ຂໍ ຕຕ຺ຖ ຕຕ຺ຖ ປຎ຺ຎາຍ ອນຸຄ຺ຄເຫສ຺ສາມີ’ຕິ – ອຊ຺ຌຕ຺ຕໍເຍວ ສຕິ ສູປຏ຺ຐິຕາ ໂຫຕິ. ‘ອິຕິ ອປຣິປູຣໍ ວາ ອາທິພ຺ຣຫ຺ມຈຣິຍິກໍ ສິກ຺ຂໍ ປຣິປູເຣສ຺ສາມິ, ປຣິປູຣໍ ວາ ອາທິພ຺ຣຫ຺ມຈຣິຍິກໍ ສິກ຺ຂໍ ຕຕ຺ຖ ຕຕ຺ຖ ປຎ຺ຎາຍ ອນຸຄ຺ຄເຫສ຺ສາມີ’ຕິ – ອຊ຺ຌຕ຺ຕໍເຍວ ສຕິ ສູປຏ຺ຐິຕາ ໂຫຕິ. ‘ອິຕິ ອສມເວກ຺ຂິຕໍ ວາ ຘມ຺ມໍ ປຎ຺ຎາຍ ສມເວກ຺ຂິສ຺ສາມິ, ສມເວກ຺ຂິຕໍ ວາ ຘມ຺ມໍ ຕຕ຺ຖ ຕຕ຺ຖ ປຎ຺ຎາຍ ອນຸຄ຺ຄເຫສ຺ສາມີ’ຕິ – ອຊ຺ຌຕ຺ຕໍເຍວ ສຕິ ສູປຏ຺ຐິຕາ ໂຫຕິ. ‘ອິຕິ ອຜຸສິຕໍ ວາ ຘມ຺ມໍ ວິມຸຕ຺ຕິຍາ ຜຸສິສ຺ສາມິ, ຜຸສິຕໍ ວາ ຘມ຺ມໍ ຕຕ຺ຖ ຕຕ຺ຖ ປຎ຺ຎາຍ ອນຸຄ຺ຄເຫສ຺ສາມີ’ຕິ – ອຊ຺ຌຕ຺ຕໍເຍວ ສຕິ ສູປຏ຺ຐິຕາ ໂຫຕິ. ເອວໍ ໂຂ, ຠິກ຺ຂເວ, ສຕາຘິປເຕຍ຺ຍໍ ໂຫຕິ. ‘ສິກ຺ຂານິສໍສມິທໍ, ຠິກ຺ຂເວ, ພ຺ຣຫ຺ມຈຣິຍໍ ວຸສ຺ສຕິ ປຎ຺ຎຸຕ຺ຕຣໍ ວິມຸຕ຺ຕິສາຣໍ ສຕາຘິປເຕຍ຺ຍ’ນ຺ຕິ, ອິຕິ ຍໍ ຕໍ ວຸຕ຺ຕໍ ອິທເມຕໍ ປຏິຈ຺ຈ ວຸຕ຺ຕ’’ນ຺ຕິ. ຕຕິຍໍ.