໔. ເສຍ຺ຍາສຸຕ຺ຕໍ

໒໔໖. ‘‘ຈຕສ຺ໂສ ອິມາ, ຠິກ຺ຂເວ, ເສຍ຺ຍາ. ກຕມາ ຈຕສ຺ໂສ? ເປຕເສຍ຺ຍາ, ກາມໂຠຄິເສຍ຺ຍາ, ສີຫເສຍ຺ຍາ, ຕຖາຄຕເສຍ຺ຍາ. ກຕມາ ຈ, ຠິກ຺ຂເວ, ເປຕເສຍ຺ຍາ? ເຍຠຸຍ຺ເຍນ, ຠິກ຺ຂເວ, ເປຕາ ອຸຕ຺ຕານາ ເສນ຺ຕິ; ອຍໍ ວຸຈ຺ຈຕິ, ຠິກ຺ຂເວ, ເປຕເສຍ຺ຍາ.

‘‘ກຕມາ ຈ, ຠິກ຺ຂເວ, ກາມໂຠຄິເສຍ຺ຍາ? ເຍຠຸຍ຺ເຍນ, ຠິກ຺ຂເວ, ກາມໂຠຄີ ວາເມນ ປສ຺ເສນ ເສນ຺ຕິ; ອຍໍ ວຸຈ຺ຈຕິ, ຠິກ຺ຂເວ, ກາມໂຠຄິເສຍ຺ຍາ.

‘‘ກຕມາ ຈ, ຠິກ຺ຂເວ, ສີຫເສຍ຺ຍາ? ສີໂຫ, ຠິກ຺ຂເວ, ມິຄຣາຊາ ທກ຺ຂິເຓນ ປສ຺ເສນ ເສຍ຺ຍໍ ກປ຺ເປຕິ, ປາເທ ປາທໍ ອຈ຺ຈາຘາຍ, ອນ຺ຕຣສຕ຺ຖິມ຺ຫິ ນງ຺ຄຸຏ຺ຐໍ ອນຸປກ຺ຂິປິຕ຺ວາ. ໂສ ປຏິພຸຊ຺ຌິຕ຺ວາ ປຸຣິມໍ ກາຍໍ ອພ຺ຠຸນ຺ນາເມຕ຺ວາ ປຈ຺ຉິມໍ ກາຍໍ ອນຸວິໂລເກຕິ. ສເຈ, ຠິກ຺ຂເວ, ສີໂຫ ມິຄຣາຊາ ກິຎ຺ຈິ ປສ຺ສຕິ ກາຍສ຺ສ ວິກ຺ຂິຕ຺ຕໍ ວາ ວິສຏໍ ວາ, ເຕນ, ຠິກ຺ຂເວ, ສີໂຫ ມິຄຣາຊາ ອນຕ຺ຕມໂນ ໂຫຕິ. ສເຈ ປນ, ຠິກ຺ຂເວ, ສີໂຫ ມິຄຣາຊາ ນ ກິຎ຺ຈິ ປສ຺ສຕິ ກາຍສ຺ສ ວິກ຺ຂິຕ຺ຕໍ ວາ ວິສຏໍ ວາ, ເຕນ, ຠິກ຺ຂເວ, ສີໂຫ ມິຄຣາຊາ ອຕ຺ຕມໂນ ໂຫຕິ. ອຍໍ ວຸຈ຺ຈຕິ, ຠິກ຺ຂເວ, ສີຫເສຍ຺ຍາ.

‘‘ກຕມາ ຈ, ຠິກ຺ຂເວ, ຕຖາຄຕເສຍ຺ຍາ? ອິຘ, ຠິກ຺ຂເວ, ຕຖາຄໂຕ ວິວິຈ຺ເຈວ ກາເມຫິ…ເປ… ຈຕຸຕ຺ຖໍ ຌານໍ ອຸປສມ຺ປຊ຺ຊ ວິຫຣຕິ. ອຍໍ ວຸຈ຺ຈຕິ, ຠິກ຺ຂເວ, ຕຖາຄຕເສຍ຺ຍາ. ອິມາ ໂຂ, ຠິກ຺ຂເວ, ຈຕສ຺ໂສ ເສຍ຺ຍາ’’ຕິ. ຈຕຸຕ຺ຖໍ.