໕. ປຎ຺ຈມປຓ຺ຓາສກໍ

(໒໑) ໑. ສປ຺ປຸຣິສວຄ຺ໂຄ

໑. ສິກ຺ຂາປທສຸຕ຺ຕໍ

໒໐໑. ‘‘ອສປ຺ປຸຣິສຎ຺ຈ ໂວ, ຠິກ຺ຂເວ, ເທເສສ຺ສາມິ, ອສປ຺ປຸຣິເສນ ອສປ຺ປຸຣິສຕຣຎ຺ຈ; ສປ຺ປຸຣິສຎ຺ຈ, ສປ຺ປຸຣິເສນ ສປ຺ປຸຣິສຕຣຎ຺ຈ. ຕໍ ສຸຓາຖ, ສາຘຸກໍ ມນສິ ກໂຣຖ; ຠາສິສ຺ສາມີ’’ຕິ. ‘‘ເອວໍ, ຠນ຺ເຕ’’ຕິ ໂຂ ເຕ ຠິກ຺ຂູ ຠຄວໂຕ ປຈ຺ຈສ຺ໂສສຸໍ. ຠຄວາ ເອຕທໂວຈ –

‘‘ກຕໂມ ຈ, ຠິກ຺ຂເວ, ອສປ຺ປຸຣິໂສ? ອິຘ, ຠິກ຺ຂເວ, ເອກຈ຺ໂຈ ປາຓາຕິປາຕີ ໂຫຕິ, ອທິນ຺ນາທາຍີ ໂຫຕິ, ກາເມສຸມິຈ຺ຉາຈາຣີ ໂຫຕິ, ມຸສາວາທີ ໂຫຕິ, ສຸຣາເມຣຍມຊ຺ຊປມາທຏ຺ຐາຍີ ໂຫຕິ. ອຍໍ ວຸຈ຺ຈຕິ, ຠິກ຺ຂເວ, ອສປ຺ປຸຣິໂສ.

‘‘ກຕໂມ ຈ, ຠິກ຺ຂເວ, ອສປ຺ປຸຣິເສນ ອສປ຺ປຸຣິສຕໂຣ? ອິຘ, ຠິກ຺ຂເວ, ເອກຈ຺ໂຈ ອຕ຺ຕນາ ຈ ປາຓາຕິປາຕີ ໂຫຕິ, ປຣຎ຺ຈ ປາຓາຕິປາເຕ ສມາທເປຕິ; ອຕ຺ຕນາ ຈ ອທິນ຺ນາທາຍີ ໂຫຕິ, ປຣຎ຺ຈ ອທິນ຺ນາທາເນ ສມາທເປຕິ; ອຕ຺ຕນາ ຈ ກາເມສຸມິຈ຺ຉາຈາຣີ ໂຫຕິ, ປຣຎ຺ຈ ກາເມສຸມິຈ຺ຉາຈາເຣ ສມາທເປຕິ; ອຕ຺ຕນາ ຈ ມຸສາວາທີ ໂຫຕິ, ປຣຎ຺ຈ ມຸສາວາເທ ສມາທເປຕິ; ອຕ຺ຕນາ ຈ ສຸຣາເມຣຍມຊ຺ຊປມາທຏ຺ຐາຍີ ໂຫຕິ, ປຣຎ຺ຈ ສຸຣາເມຣຍມຊ຺ຊປມາທຏ຺ຐາເນ ສມາທເປຕິ. ອຍໍ ວຸຈ຺ຈຕິ, ຠິກ຺ຂເວ, ອສປ຺ປຸຣິເສນ ອສປ຺ປຸຣິສຕໂຣ.

‘‘ກຕໂມ ຈ, ຠິກ຺ຂເວ, ສປ຺ປຸຣິໂສ? ອິຘ, ຠິກ຺ຂເວ, ເອກຈ຺ໂຈ ປາຓາຕິປາຕາ ປຏິວິຣໂຕ ໂຫຕິ, ອທິນ຺ນາທານາ ປຏິວິຣໂຕ ໂຫຕິ, ກາເມສຸມິຈ຺ຉາຈາຣາ ປຏິວິຣໂຕ ໂຫຕິ, ມຸສາວາທາ ປຏິວິຣໂຕ ໂຫຕິ, ສຸຣາເມຣຍມຊ຺ຊປມາທຏ຺ຐານາ ປຏິວິຣໂຕ ໂຫຕິ. ອຍໍ ວຸຈ຺ຈຕິ, ຠິກ຺ຂເວ, ສປ຺ປຸຣິໂສ.

‘‘ກຕໂມ ຈ, ຠິກ຺ຂເວ, ສປ຺ປຸຣິເສນ ສປ຺ປຸຣິສຕໂຣ? ອິຘ, ຠິກ຺ຂເວ, ເອກຈ຺ໂຈ ອຕ຺ຕນາ ຈ ປາຓາຕິປາຕາ ປຏິວິຣໂຕ ໂຫຕິ, ປຣຎ຺ຈ ປາຓາຕິປາຕາ ເວຣມຓິຍາ ສມາທເປຕິ; ອຕ຺ຕນາ ຈ ອທິນ຺ນາທານາ ປຏິວິຣໂຕ ໂຫຕິ, ປຣຎ຺ຈ ອທິນ຺ນາທານາ ເວຣມຓິຍາ ສມາທເປຕິ; ອຕ຺ຕນາ ຈ ກາເມສຸມິຈ຺ຉາຈາຣາ ປຏິວິຣໂຕ ໂຫຕິ, ປຣຎ຺ຈ ກາເມສຸມິຈ຺ຉາຈາຣາ ເວຣມຓິຍາ ສມາທເປຕິ; ອຕ຺ຕນາ ຈ ມຸສາວາທາ ປຏິວິຣໂຕ ໂຫຕິ, ປຣຎ຺ຈ ມຸສາວາທາ ເວຣມຓິຍາ ສມາທເປຕິ; ອຕ຺ຕນາ ຈ ສຸຣາເມຣຍມຊ຺ຊປມາທຏ຺ຐານາ ປຏິວິຣໂຕ ໂຫຕິ, ປຣຎ຺ຈ ສຸຣາເມຣຍມຊ຺ຊປມາທຏ຺ຐານາ ເວຣມຓິຍາ ສມາທເປຕິ. ອຍໍ ວຸຈ຺ຈຕິ, ຠິກ຺ຂເວ, ສປ຺ປຸຣິເສນ ສປ຺ປຸຣິສຕໂຣ’’ຕິ [ປຸ. ປ. ໑໓໕]. ປຐມໍ.

໒. ອສ຺ສທ຺ຘສຸຕ຺ຕໍ

໒໐໒. ‘‘ອສປ຺ປຸຣິສຎ຺ຈ ໂວ, ຠິກ຺ຂເວ, ເທເສສ຺ສາມິ, ອສປ຺ປຸຣິເສນ ອສປ຺ປຸຣິສຕຣຎ຺ຈ; ສປ຺ປຸຣິສຎ຺ຈ, ສປ຺ປຸຣິເສນ ສປ຺ປຸຣິສຕຣຎ຺ຈ. ຕໍ ສຸຓາຖ…ເປ….

‘‘ກຕໂມ ຈ, ຠິກ຺ຂເວ, ອສປ຺ປຸຣິໂສ? ອິຘ, ຠິກ຺ຂເວ, ເອກຈ຺ໂຈ ອສ຺ສທ຺ໂຘ ໂຫຕິ, ອຫິຣິໂກ ໂຫຕິ, ອໂນຕ຺ຕປ຺ປີ ໂຫຕິ, ອປ຺ປສ຺ສຸໂຕ ໂຫຕິ, ກຸສີໂຕ ໂຫຕິ, ມຸຏ຺ຐສ຺ສຕິ ໂຫຕິ, ທຸປ຺ປຎ຺ໂຎ ໂຫຕິ. ອຍໍ ວຸຈ຺ຈຕິ, ຠິກ຺ຂເວ, ອສປ຺ປຸຣິໂສ.

‘‘ກຕໂມ ຈ, ຠິກ຺ຂເວ, ອສປ຺ປຸຣິເສນ ອສປ຺ປຸຣິສຕໂຣ? ອິຘ, ຠິກ຺ຂເວ, ເອກຈ຺ໂຈ ອຕ຺ຕນາ ຈ ອສ຺ສທ຺ໂຘ ໂຫຕິ, ປຣຎ຺ຈ ອສ຺ສທ຺ຘິເຍ [ອສທ຺ຘາຍ (ກ.)] ສມາທເປຕິ; ອຕ຺ຕນາ ຈ ອຫິຣິໂກ ໂຫຕິ, ປຣຎ຺ຈ ອຫິຣິກຕາຍ ສມາທເປຕິ; ອຕ຺ຕນາ ຈ ອໂນຕ຺ຕປ຺ປີ ໂຫຕິ, ປຣຎ຺ຈ ອໂນຕ຺ຕປ຺ເປ ສມາທເປຕິ; ອຕ຺ຕນາ ຈ ອປ຺ປສ຺ສຸໂຕ ໂຫຕິ, ປຣຎ຺ຈ ອປ຺ປສ຺ສຸເຕ ສມາທເປຕິ; ອຕ຺ຕນາ ຈ ກຸສີໂຕ ໂຫຕິ, ປຣຎ຺ຈ ໂກສຊ຺ເຊ ສມາທເປຕິ; ອຕ຺ຕນາ ຈ ມຸຏ຺ຐສ຺ສຕິ ໂຫຕິ, ປຣຎ຺ຈ ມຸຏ຺ຐສ຺ສຈ຺ເຈ [ມຸຏ຺ຐສຈ຺ເຈ (ສີ. ສ຺ຍາ. ກໍ. ປີ.)] ສມາທເປຕິ; ອຕ຺ຕນາ ຈ ທຸປ຺ປຎ຺ໂຎ ໂຫຕິ, ປຣຎ຺ຈ ທຸປ຺ປຎ຺ຎຕາຍ ສມາທເປຕິ. ອຍໍ ວຸຈ຺ຈຕິ, ຠິກ຺ຂເວ, ອສປ຺ປຸຣິເສນ ອສປ຺ປຸຣິສຕໂຣ.

‘‘ກຕໂມ ຈ, ຠິກ຺ຂເວ, ສປ຺ປຸຣິໂສ? ອິຘ, ຠິກ຺ຂເວ, ເອກຈ຺ໂຈ ສທ຺ໂຘ ໂຫຕິ, ຫິຣິມາ ໂຫຕິ, ໂອຕ຺ຕປ຺ປີ ໂຫຕິ, ພຫຸສ຺ສຸໂຕ ໂຫຕິ, ອາຣທ຺ຘວີຣິໂຍ ໂຫຕິ, ສຕິມາ ໂຫຕິ, ປຎ຺ຎວາ ໂຫຕິ. ອຍໍ ວຸຈ຺ຈຕິ, ຠິກ຺ຂເວ, ສປ຺ປຸຣິໂສ.

‘‘ກຕໂມ ຈ, ຠິກ຺ຂເວ, ສປ຺ປຸຣິເສນ ສປ຺ປຸຣິສຕໂຣ? ອິຘ, ຠິກ຺ຂເວ, ເອກຈ຺ໂຈ ອຕ຺ຕນາ ຈ ສທ຺ຘາສມ຺ປນ຺ໂນ ໂຫຕິ, ປຣຎ຺ຈ ສທ຺ຘາສມ຺ປທາຍ ສມາທເປຕິ; ອຕ຺ຕນາ ຈ ຫິຣິມາ ໂຫຕິ, ປຣຎ຺ຈ ຫິຣິມຕາຍ [ຫິຣິສມ຺ປທາຍ (ກ.)] ສມາທເປຕິ; ອຕ຺ຕນາ ຈ ໂອຕ຺ຕປ຺ປີ ໂຫຕິ, ປຣຎ຺ຈ ໂອຕ຺ຕປ຺ເປ ສມາທເປຕິ; ອຕ຺ຕນາ ຈ ພຫຸສ຺ສຸໂຕ ໂຫຕິ, ປຣຎ຺ຈ ພາຫຸສຈ຺ເຈ ສມາທເປຕິ; ອຕ຺ຕນາ ຈ ອາຣທ຺ຘວີຣິໂຍ ໂຫຕິ, ປຣຎ຺ຈ ວີຣິຍາຣມ຺ເຠ ສມາທເປຕິ; ອຕ຺ຕນາ ຈ ອຸປຏ຺ຐິຕສ຺ສຕິ ໂຫຕິ, ປຣຎ຺ຈ ສຕິອຸປຏ຺ຐາເນ [ສຕິປຏ຺ຐາເນ (ສີ. ສ຺ຍາ. ກໍ. ປີ.)] ສມາທເປຕິ; ອຕ຺ຕນາ ຈ ປຎ຺ຎາສມ຺ປນ຺ໂນ ໂຫຕິ, ປຣຎ຺ຈ ປຎ຺ຎາສມ຺ປທາຍ ສມາທເປຕິ. ອຍໍ ວຸຈ຺ຈຕິ, ຠິກ຺ຂເວ, ສປ຺ປຸຣິເສນ ສປ຺ປຸຣິສຕໂຣ’’ຕິ. ທຸຕິຍໍ.

໓. ສຕ຺ຕກມ຺ມສຸຕ຺ຕໍ

໒໐໓. ‘‘ອສປ຺ປຸຣິສຎ຺ຈ ໂວ, ຠິກ຺ຂເວ, ເທເສສ຺ສາມິ, ອສປ຺ປຸຣິເສນ ອສປ຺ປຸຣິສຕຣຎ຺ຈ; ສປ຺ປຸຣິສຎ຺ຈ, ສປ຺ປຸຣິເສນ ສປ຺ປຸຣິສຕຣຎ຺ຈ. ຕໍ ສຸຓາຖ…ເປ….

‘‘ກຕໂມ ຈ, ຠິກ຺ຂເວ, ອສປ຺ປຸຣິໂສ? ອິຘ, ຠິກ຺ຂເວ, ເອກຈ຺ໂຈ ປາຓາຕິປາຕີ ໂຫຕິ, ອທິນ຺ນາທາຍີ ໂຫຕິ, ກາເມສຸມິຈ຺ຉາຈາຣີ ໂຫຕິ, ມຸສາວາທີ ໂຫຕິ, ປິສຸຓວາໂຈ ໂຫຕິ, ຜຣຸສວາໂຈ ໂຫຕິ, ສມ຺ຜປ຺ປລາປີ ໂຫຕິ. ອຍໍ ວຸຈ຺ຈຕິ, ຠິກ຺ຂເວ, ອສປ຺ປຸຣິໂສ.

‘‘ກຕໂມ ຈ, ຠິກ຺ຂເວ, ອສປ຺ປຸຣິເສນ ອສປ຺ປຸຣິສຕໂຣ? ອິຘ, ຠິກ຺ຂເວ, ເອກຈ຺ໂຈ ອຕ຺ຕນາ ຈ ປາຓາຕິປາຕີ ໂຫຕິ, ປຣຎ຺ຈ ປາຓາຕິປາເຕ ສມາທເປຕິ; ອຕ຺ຕນາ ຈ ອທິນ຺ນາທາຍີ ໂຫຕິ, ປຣຎ຺ຈ ອທິນ຺ນາທາເນ ສມາທເປຕິ; ອຕ຺ຕນາ ຈ ກາເມສຸມິຈ຺ຉາຈາຣີ ໂຫຕິ, ປຣຎ຺ຈ ກາເມສຸມິຈ຺ຉາຈາເຣ ສມາທເປຕິ; ອຕ຺ຕນາ ຈ ມຸສາວາທີ ໂຫຕິ, ປຣຎ຺ຈ ມຸສາວາເທ ສມາທເປຕິ; ອຕ຺ຕນາ ຈ ປິສຸຓວາໂຈ ໂຫຕິ, ປຣຎ຺ຈ ປິສຸຓາຍ ວາຈາຍ ສມາທເປຕິ; ອຕ຺ຕນາ ຈ ຜຣຸສວາໂຈ ໂຫຕິ, ປຣຎ຺ຈ ຜຣຸສາຍ ວາຈາຍ ສມາທເປຕິ; ອຕ຺ຕນາ ຈ ສມ຺ຜປ຺ປລາປີ ໂຫຕິ, ປຣຎ຺ຈ ສມ຺ຜປ຺ປລາເປ ສມາທເປຕິ. ອຍໍ ວຸຈ຺ຈຕິ, ຠິກ຺ຂເວ, ອສປ຺ປຸຣິເສນ ອສປ຺ປຸຣິສຕໂຣ.

‘‘ກຕໂມ ຈ, ຠິກ຺ຂເວ, ສປ຺ປຸຣິໂສ? ອິຘ, ຠິກ຺ຂເວ, ເອກຈ຺ໂຈ ປາຓາຕິປາຕາ ປຏິວິຣໂຕ ໂຫຕິ, ອທິນ຺ນາທານາ ປຏິວິຣໂຕ ໂຫຕິ, ກາເມສຸມິຈ຺ຉາຈາຣາ ປຏິວິຣໂຕ ໂຫຕິ, ມຸສາວາທາ ປຏິວິຣໂຕ ໂຫຕິ, ປິສຸຓາຍ ວາຈາຍ ປຏິວິຣໂຕ ໂຫຕິ, ຜຣຸສາຍ ວາຈາຍ ປຏິວິຣໂຕ, ໂຫຕິ, ສມ຺ຜປ຺ປລາປາ ປຏິວິຣໂຕ ໂຫຕິ. ອຍໍ ວຸຈ຺ຈຕິ, ຠິກ຺ຂເວ, ສປ຺ປຸຣິໂສ.

‘‘ກຕໂມ ຈ, ຠິກ຺ຂເວ, ສປ຺ປຸຣິເສນ ສປ຺ປຸຣິສຕໂຣ? ອິຘ ຠິກ຺ຂເວ, ເອກຈ຺ໂຈ ອຕ຺ຕນາ ຈ ປາຓາຕິປາຕາ ປຏິວິຣໂຕ ໂຫຕິ, ປຣຎ຺ຈ ປາຓາຕິປາຕາ ເວຣມຓິຍາ ສມາທເປຕິ; ອຕ຺ຕນາ ຈ ອທິນ຺ນາທານາ ປຏິວິຣໂຕ ໂຫຕິ, ປຣຎ຺ຈ ອທິນ຺ນາທານາ ເວຣມຓິຍາ ສມາທເປຕິ; ອຕ຺ຕນາ ຈ ກາເມສຸມິຈ຺ຉາຈາຣາ ປຏິວິຣໂຕ ໂຫຕິ, ປຣຎ຺ຈ ກາເມສຸມິຈ຺ຉາຈາຣາ ເວຣມຓິຍາ ສມາທເປຕິ; ອຕ຺ຕນາ ຈ ມຸສາວາທາ ປຏິວິຣໂຕ ໂຫຕິ, ປຣຎ຺ຈ ມຸສາວາທາ ເວຣມຓິຍາ ສມາທເປຕິ; ອຕ຺ຕນາ ຈ ປິສຸຓາຍ ວາຈາຍ ປຏິວິຣໂຕ ໂຫຕິ, ປຣຎ຺ຈ ປິສຸຓາຍ ວາຈາຍ ເວຣມຓິຍາ ສມາທເປຕິ; ອຕ຺ຕນາ ຈ ຜຣຸສາຍ ວາຈາຍ ປຏິວິຣໂຕ ໂຫຕິ, ປຣຎ຺ຈ ຜຣຸສາຍ ວາຈາຍ ເວຣມຓິຍາ ສມາທເປຕິ; ອຕ຺ຕນາ ຈ ສມ຺ຜປ຺ປລາປາ ປຏິວິຣໂຕ ໂຫຕິ, ປຣຎ຺ຈ ສມ຺ຜປ຺ປລາປາ ເວຣມຓິຍາ ສມາທເປຕິ. ອຍໍ ວຸຈ຺ຈຕິ, ຠິກ຺ຂເວ, ສປ຺ປຸຣິເສນ ສປ຺ປຸຣິສຕໂຣ’’ຕິ. ຕຕິຍໍ.

໔. ທສກມ຺ມສຸຕ຺ຕໍ

໒໐໔. ‘‘ອສປ຺ປຸຣິສຎ຺ຈ ໂວ, ຠິກ຺ຂເວ, ເທເສສ຺ສາມິ, ອສປ຺ປຸຣິເສນ ອສປ຺ປຸຣິສຕຣຎ຺ຈ; ສປ຺ປຸຣິສຎ຺ຈ, ສປ຺ປຸຣິເສນ ສປ຺ປຸຣິສຕຣຎ຺ຈ. ຕໍ ສຸຓາຖ…ເປ….

‘‘ກຕໂມ ຈ, ຠິກ຺ຂເວ, ອສປ຺ປຸຣິໂສ? ອິຘ, ຠິກ຺ຂເວ, ເອກຈ຺ໂຈ ປາຓາຕິປາຕີ ໂຫຕິ, ອທິນ຺ນາທາຍີ ໂຫຕິ, ກາເມສຸມິຈ຺ຉາຈາຣີ ໂຫຕິ, ມຸສາວາທີ ໂຫຕິ, ປິສຸຓວາໂຈ ໂຫຕິ, ຜຣຸສວາໂຈ ໂຫຕິ, ສມ຺ຜປ຺ປລາປີ ໂຫຕິ, ອຠິຊ຺ຌາລຸ ໂຫຕິ, ພ຺ຍາປນ຺ນຈິຕ຺ໂຕ ໂຫຕິ, ມິຈ຺ຉາທິຏ຺ຐິໂກ ໂຫຕິ. ອຍໍ ວຸຈ຺ຈຕິ, ຠິກ຺ຂເວ, ອສປ຺ປຸຣິໂສ.

‘‘ກຕໂມ ຈ, ຠິກ຺ຂເວ, ອສປ຺ປຸຣິເສນ ອສປ຺ປຸຣິສຕໂຣ? ອິຘ, ຠິກ຺ຂເວ, ເອກຈ຺ໂຈ ອຕ຺ຕນາ ຈ ປາຓາຕິປາຕີ ໂຫຕິ, ປຣຎ຺ຈ ປາຓາຕິປາເຕ ສມາທເປຕິ…ເປ… ອຕ຺ຕນາ ຈ ອຠິຊ຺ຌາລຸ ໂຫຕິ, ປຣຎ຺ຈ ອຠິຊ຺ຌາຍ ສມາທເປຕິ; ອຕ຺ຕນາ ຈ ພ຺ຍາປນ຺ນຈິຕ຺ໂຕ ໂຫຕິ, ປຣຎ຺ຈ ພ຺ຍາປາເທ ສມາທເປຕິ, ອຕ຺ຕນາ ຈ ມິຈ຺ຉາທິຏ຺ຐິໂກ ໂຫຕິ, ປຣຎ຺ຈ ມິຈ຺ຉາທິຏ຺ຐິຍາ ສມາທເປຕິ. ອຍໍ ວຸຈ຺ຈຕິ, ຠິກ຺ຂເວ, ອສປ຺ປຸຣິເສນ ອສປ຺ປຸຣິສຕໂຣ.

‘‘ກຕໂມ ຈ, ຠິກ຺ຂເວ, ສປ຺ປຸຣິໂສ? ອິຘ, ຠິກ຺ຂເວ, ເອກຈ຺ໂຈ ປາຓາຕິປາຕາ ປຏິວິຣໂຕ ໂຫຕິ…ເປ… ອນຠິຊ຺ຌາລຸ ໂຫຕິ, ອພ຺ຍາປນ຺ນຈິຕ຺ໂຕ ໂຫຕິ, ສມ຺ມາທິຏ຺ຐິໂກ ໂຫຕິ. ອຍໍ ວຸຈ຺ຈຕິ, ຠິກ຺ຂເວ, ສປ຺ປຸຣິໂສ.

‘‘ກຕໂມ ຈ, ຠິກ຺ຂເວ, ສປ຺ປຸຣິເສນ ສປ຺ປຸຣິສຕໂຣ? ອິຘ, ຠິກ຺ຂເວ, ເອກຈ຺ໂຈ ອຕ຺ຕນາ ຈ ປາຓາຕິປາຕາ ປຏິວິຣໂຕ ໂຫຕິ, ປຣຎ຺ຈ ປາຓາຕິປາຕາ ເວຣມຓິຍາ ສມາທເປຕິ…ເປ… ອຕ຺ຕນາ ຈ ອນຠິຊ຺ຌາລຸ ໂຫຕິ, ປຣຎ຺ຈ ອນຠິຊ຺ຌາຍ ສມາທເປຕິ; ອຕ຺ຕນາ ຈ ອພ຺ຍາປນ຺ນຈິຕ຺ໂຕ ໂຫຕິ, ປຣຎ຺ຈ ອພ຺ຍາປາເທ ສມາທເປຕິ; ອຕ຺ຕນາ ຈ ສມ຺ມາທິຏ຺ຐິໂກ ໂຫຕິ, ປຣຎ຺ຈ ສມ຺ມາທິຏ຺ຐິຍາ ສມາທເປຕິ. ອຍໍ ວຸຈ຺ຈຕິ, ຠິກ຺ຂເວ, ສປ຺ປຸຣິເສນ ສປ຺ປຸຣິສຕໂຣ’’ຕິ. ຈຕຸຕ຺ຖໍ.

໕. ອຏ຺ຐງ຺ຄິກສຸຕ຺ຕໍ

໒໐໕. ‘‘ອສປ຺ປຸຣິສຎ຺ຈ ໂວ, ຠິກ຺ຂເວ, ເທເສສ຺ສາມິ, ອສປ຺ປຸຣິເສນ ອສປ຺ປຸຣິສຕຣຎ຺ຈ; ສປ຺ປຸຣິສຎ຺ຈ, ສປ຺ປຸຣິເສນ ສປ຺ປຸຣິສຕຣຎ຺ຈ. ຕໍ ສຸຓາຖ…ເປ….

‘‘ກຕໂມ ຈ, ຠິກ຺ຂເວ, ອສປ຺ປຸຣິໂສ? ອິຘ, ຠິກ຺ຂເວ, ເອກຈ຺ໂຈ ມິຈ຺ຉາທິຏ຺ຐິໂກ ໂຫຕິ, ມິຈ຺ຉາສງ຺ກປ຺ໂປ ໂຫຕິ, ມິຈ຺ຉາວາໂຈ ໂຫຕິ, ມິຈ຺ຉາກມ຺ມນ຺ໂຕ ໂຫຕິ, ມິຈ຺ຉາອາຊີໂວ ໂຫຕິ, ມິຈ຺ຉາວາຍາໂມ ໂຫຕິ, ມິຈ຺ຉາສຕິ ໂຫຕິ, ມິຈ຺ຉາສມາຘິ ໂຫຕິ. ອຍໍ ວຸຈ຺ຈຕິ, ຠິກ຺ຂເວ, ອສປ຺ປຸຣິໂສ.

‘‘ກຕໂມ ຈ, ຠິກ຺ຂເວ, ອສປ຺ປຸຣິເສນ ອສປ຺ປຸຣິສຕໂຣ? ອິຘ ຠິກ຺ຂເວ, ເອກຈ຺ໂຈ ອຕ຺ຕນາ ຈ ມິຈ຺ຉາທິຏ຺ຐິໂກ ໂຫຕິ, ປຣຎ຺ຈ ມິຈ຺ຉາທິຏ຺ຐິຍາ ສມາທເປຕິ; ອຕ຺ຕນາ ຈ ມິຈ຺ຉາສງ຺ກປ຺ໂປ ໂຫຕິ, ປຣຎ຺ຈ ມິຈ຺ຉາສງ຺ກປ຺ເປ ສມາທເປຕິ; ອຕ຺ຕນາ ຈ ມິຈ຺ຉາວາໂຈ ໂຫຕິ, ປຣຎ຺ຈ ມິຈ຺ຉາວາຈາຍ ສມາທເປຕິ; ອຕ຺ຕນາ ຈ ມິຈ຺ຉາກມ຺ມນ຺ໂຕ ໂຫຕິ, ປຣຎ຺ຈ ມິຈ຺ຉາກມ຺ມນ຺ເຕ ສມາທເປຕິ; ອຕ຺ຕນາ ຈ ມິຈ຺ຉາອາຊີໂວ ໂຫຕິ, ປຣຎ຺ຈ ມິຈ຺ຉາອາຊີເວ ສມາທເປຕິ; ອຕ຺ຕນາ ຈ ມິຈ຺ຉາວາຍາໂມ ໂຫຕິ, ປຣຎ຺ຈ ມິຈ຺ຉາວາຍາເມ ສມາທເປຕິ; ອຕ຺ຕນາ ຈ ມິຈ຺ຉາສຕິ ໂຫຕິ, ປຣຎ຺ຈ ມິຈ຺ຉາສຕິຍາ ສມາທເປຕິ; ອຕ຺ຕນາ ຈ ມິຈ຺ຉາສມາຘິ ໂຫຕິ, ປຣຎ຺ຈ ມິຈ຺ຉາສມາຘິມ຺ຫິ ສມາທເປຕິ. ອຍໍ ວຸຈ຺ຈຕິ, ຠິກ຺ຂເວ, ອສປ຺ປຸຣິເສນ ອສປ຺ປຸຣິສຕໂຣ.

‘‘ກຕໂມ ຈ, ຠິກ຺ຂເວ, ສປ຺ປຸຣິໂສ? ອິຘ, ຠິກ຺ຂເວ, ເອກຈ຺ໂຈ ສມ຺ມາທິຏ຺ຐິໂກ ໂຫຕິ, ສມ຺ມາສງ຺ກປ຺ໂປ ໂຫຕິ, ສມ຺ມາວາໂຈ ໂຫຕິ, ສມ຺ມາກມ຺ມນ຺ໂຕ ໂຫຕິ, ສມ຺ມາອາຊີໂວ ໂຫຕິ, ສມ຺ມາວາຍາໂມ ໂຫຕິ, ສມ຺ມາສຕິ ໂຫຕິ, ສມ຺ມາສມາຘິ ໂຫຕິ. ອຍໍ ວຸຈ຺ຈຕິ, ຠິກ຺ຂເວ, ສປ຺ປຸຣິໂສ.

‘‘ກຕໂມ ຈ, ຠິກ຺ຂເວ, ສປ຺ປຸຣິເສນ ສປ຺ປຸຣິສຕໂຣ? ອິຘ, ຠິກ຺ຂເວ, ເອກຈ຺ໂຈ ອຕ຺ຕນາ ຈ ສມ຺ມາທິຏ຺ຐິໂກ ໂຫຕິ, ປຣຎ຺ຈ ສມ຺ມາທິຏ຺ຐິຍາ ສມາທເປຕິ; ອຕ຺ຕນາ ຈ ສມ຺ມາສງ຺ກປ຺ໂປ ໂຫຕິ, ປຣຎ຺ຈ ສມ຺ມາສງ຺ກປ຺ເປ ສມາທເປຕິ; ອຕ຺ຕນາ ຈ ສມ຺ມາວາໂຈ ໂຫຕິ, ປຣຎ຺ຈ ສມ຺ມາວາຈາຍ ສມາທເປຕິ; ອຕ຺ຕນາ ຈ ສມ຺ມາກມ຺ມນ຺ໂຕ ໂຫຕິ, ປຣຎ຺ຈ ສມ຺ມາກມ຺ມນ຺ເຕ ສມາທເປຕິ; ອຕ຺ຕນາ ຈ ສມ຺ມາອາຊີໂວ ໂຫຕິ, ປຣຎ຺ຈ ສມ຺ມາອາຊີເວ ສມາທເປຕິ; ອຕ຺ຕນາ ຈ ສມ຺ມາວາຍາໂມ ໂຫຕິ, ປຣຎ຺ຈ ສມ຺ມາວາຍາເມ ສມາທເປຕິ; ອຕ຺ຕນາ ຈ ສມ຺ມາສຕິ ໂຫຕິ, ປຣຎ຺ຈ ສມ຺ມາສຕິຍາ ສມາທເປຕິ; ອຕ຺ຕນາ ຈ ສມ຺ມາສມາຘິ ໂຫຕິ, ປຣຎ຺ຈ ສມ຺ມາສມາຘິມ຺ຫິ ສມາທເປຕິ. ອຍໍ ວຸຈ຺ຈຕິ, ຠິກ຺ຂເວ, ສປ຺ປຸຣິເສນ ສປ຺ປຸຣິສຕໂຣ’’ຕິ. ປຎ຺ຈມໍ.

໖. ທສມຄ຺ຄສຸຕ຺ຕໍ

໒໐໖. ‘‘ອສປ຺ປຸຣິສຎ຺ຈ ໂວ, ຠິກ຺ຂເວ, ເທເສສ຺ສາມິ, ອສປ຺ປຸຣິເສນ ອສປ຺ປຸຣິສຕຣຎ຺ຈ; ສປ຺ປຸຣິສຎ຺ຈ, ສປ຺ປຸຣິເສນ ສປ຺ປຸຣິສຕຣຎ຺ຈ. ຕໍ ສຸຓາຖ…ເປ….

‘‘ກຕໂມ ຈ, ຠິກ຺ຂເວ, ອສປ຺ປຸຣິໂສ? ອິຘ, ຠິກ຺ຂເວ, ເອກຈ຺ໂຈ ມິຈ຺ຉາທິຏ຺ຐິໂກ ໂຫຕິ …ເປ… ມິຈ຺ຉາຎາຓີ ໂຫຕິ, ມິຈ຺ຉາວິມຸຕ຺ຕິ ໂຫຕິ. ອຍໍ ວຸຈ຺ຈຕິ, ຠິກ຺ຂເວ, ອສປ຺ປຸຣິໂສ.

‘‘ກຕໂມ ຈ, ຠິກ຺ຂເວ, ອສປ຺ປຸຣິເສນ ອສປ຺ປຸຣິສຕໂຣ? ອິຘ, ຠິກ຺ຂເວ, ເອກຈ຺ໂຈ ອຕ຺ຕນາ ຈ ມິຈ຺ຉາທິຏ຺ຐິໂກ ໂຫຕິ, ປຣຎ຺ຈ ມິຈ຺ຉາທິຏ຺ຐິຍາ ສມາທເປຕິ…ເປ… ອຕ຺ຕນາ ຈ ມິຈ຺ຉາຎາຓີ ໂຫຕິ, ປຣຎ຺ຈ ມິຈ຺ຉາຎາເຓ ສມາທເປຕິ; ອຕ຺ຕນາ ຈ ມິຈ຺ຉາວິມຸຕ຺ຕິ ໂຫຕິ, ປຣຎ຺ຈ ມິຈ຺ຉາວິມຸຕ຺ຕິຍາ ສມາທເປຕິ. ອຍໍ ວຸຈ຺ຈຕິ, ຠິກ຺ຂເວ, ອສປ຺ປຸຣິເສນ ອສປ຺ປຸຣິສຕໂຣ.

‘‘ກຕໂມ ຈ, ຠິກ຺ຂເວ, ສປ຺ປຸຣິໂສ? ອິຘ, ຠິກ຺ຂເວ, ເອກຈ຺ໂຈ ສມ຺ມາທິຏ຺ຐິໂກ ໂຫຕິ…ເປ… ສມ຺ມາຎາຓີ ໂຫຕິ, ສມ຺ມາວິມຸຕ຺ຕິ ໂຫຕິ. ອຍໍ ວຸຈ຺ຈຕິ, ຠິກ຺ຂເວ, ສປ຺ປຸຣິໂສ.

‘‘ກຕໂມ ຈ, ຠິກ຺ຂເວ, ສປ຺ປຸຣິເສນ ສປ຺ປຸຣິສຕໂຣ? ອິຘ, ຠິກ຺ຂເວ, ເອກຈ຺ໂຈ ອຕ຺ຕນາ ຈ ສມ຺ມາທິຏ຺ຐິໂກ ໂຫຕິ, ປຣຎ຺ຈ ສມ຺ມາທິຏ຺ຐິຍາ ສມາທເປຕິ…ເປ… ອຕ຺ຕນາ ຈ ສມ຺ມາຎາຓີ ໂຫຕິ, ປຣຎ຺ຈ ສມ຺ມາຎາເຓ ສມາທເປຕິ; ອຕ຺ຕນາ ຈ ສມ຺ມາວິມຸຕ຺ຕິ ໂຫຕິ, ປຣຎ຺ຈ ສມ຺ມາວິມຸຕ຺ຕິຍາ ສມາທເປຕິ. ອຍໍ ວຸຈ຺ຈຕິ, ຠິກ຺ຂເວ, ສປ຺ປຸຣິເສນ ສປ຺ປຸຣິສຕໂຣ’’ຕິ. ຉຏ຺ຐໍ.

໗. ປຐມປາປຘມ຺ມສຸຕ຺ຕໍ

໒໐໗. ‘‘ປາປຎ຺ຈ ໂວ, ຠິກ຺ຂເວ, ເທເສສ຺ສາມິ, ປາເປນ ປາປຕຣຎ຺ຈ; ກລ຺ຍາຓຎ຺ຈ, ກລ຺ຍາເຓນ ກລ຺ຍາຓຕຣຎ຺ຈ. ຕໍ ສຸຓາຖ…ເປ….

‘‘ກຕໂມ ຈ, ຠິກ຺ຂເວ, ປາໂປ? ອິຘ, ຠິກ຺ຂເວ, ເອກຈ຺ໂຈ ປາຓາຕິປາຕີ ໂຫຕິ…ເປ… ມິຈ຺ຉາທິຏ຺ຐິໂກ ໂຫຕິ. ອຍໍ ວຸຈ຺ຈຕິ, ຠິກ຺ຂເວ, ປາໂປ.

‘‘ກຕໂມ ຈ, ຠິກ຺ຂເວ, ປາເປນ ປາປຕໂຣ? ອິຘ, ຠິກ຺ຂເວ, ເອກຈ຺ໂຈ ອຕ຺ຕນາ ຈ ປາຓາຕິປາຕີ ໂຫຕິ, ປຣຎ຺ຈ ປາຓາຕິປາເຕ ສມາທເປຕິ…ເປ… ອຕ຺ຕນາ ຈ ມິຈ຺ຉາທິຏ຺ຐິໂກ ໂຫຕິ, ປຣຎ຺ຈ ມິຈ຺ຉາທິຏ຺ຐິຍາ ສມາທເປຕິ. ອຍໍ ວຸຈ຺ຈຕິ, ຠິກ຺ຂເວ, ປາເປນ ປາປຕໂຣ.

‘‘ກຕໂມ ຈ, ຠິກ຺ຂເວ, ກລ຺ຍາໂຓ? ອິຘ, ຠິກ຺ຂເວ, ເອກຈ຺ໂຈ ປາຓາຕິປາຕາ ປຏິວິຣໂຕ ໂຫຕິ…ເປ… ສມ຺ມາທິຏ຺ຐິໂກ ໂຫຕິ. ອຍໍ ວຸຈ຺ຈຕິ, ຠິກ຺ຂເວ, ກລ຺ຍາໂຓ.

‘‘ກຕໂມ ຈ, ຠິກ຺ຂເວ, ກລ຺ຍາເຓນ ກລ຺ຍາຓຕໂຣ? ອິຘ, ຠິກ຺ຂເວ, ເອກຈ຺ໂຈ ອຕ຺ຕນາ ຈ ປາຓາຕິປາຕາ ປຏິວິຣໂຕ ໂຫຕິ, ປຣຎ຺ຈ ປາຓາຕິປາຕາ ເວຣມຓິຍາ ສມາທເປຕິ…ເປ… ອຕ຺ຕນາ ຈ ສມ຺ມາທິຏ຺ຐິໂກ ໂຫຕິ, ປຣຎ຺ຈ ສມ຺ມາທິຏ຺ຐິຍາ ສມາທເປຕິ. ອຍໍ ວຸຈ຺ຈຕິ, ຠິກ຺ຂເວ, ກລ຺ຍາເຓນ ກລ຺ຍາຓຕໂຣ’’ຕິ. ສຕ຺ຕມໍ.

໘. ທຸຕິຍປາປຘມ຺ມສຸຕ຺ຕໍ

໒໐໘. ‘‘ປາປຎ຺ຈ ໂວ, ຠິກ຺ຂເວ, ເທເສສ຺ສາມິ, ປາເປນ ປາປຕຣຎ຺ຈ; ກລ຺ຍາຓຎ຺ຈ, ກລ຺ຍາເຓນ ກລ຺ຍາຓຕຣຎ຺ຈ. ຕໍ ສຸຓາຖ, ສາຘຸກໍ ມນສິກໂຣຖ; ຠາສິສ຺ສາມີ’’ຕິ. ເອວໍ…ເປ… ເອຕທໂວຈ –

‘‘ກຕໂມ ຈ, ຠິກ຺ຂເວ, ປາໂປ? ອິຘ, ຠິກ຺ຂເວ, ເອກຈ຺ໂຈ ມິຈ຺ຉາທິຏ຺ຐິໂກ ໂຫຕິ…ເປ… ມິຈ຺ຉາຎາຓີ ໂຫຕິ, ມິຈ຺ຉາວິມຸຕ຺ຕິ ໂຫຕິ. ອຍໍ ວຸຈ຺ຈຕິ, ຠິກ຺ຂເວ, ປາໂປ.

‘‘ກຕໂມ ຈ, ຠິກ຺ຂເວ, ປາເປນ ປາປຕໂຣ? ອິຘ, ຠິກ຺ຂເວ, ເອກຈ຺ໂຈ ອຕ຺ຕນາ ຈ ມິຈ຺ຉາທິຏ຺ຐິໂກ ໂຫຕິ, ປຣຎ຺ຈ ມິຈ຺ຉາທິຏ຺ຐິຍາ ສມາທເປຕິ…ເປ… ອຕ຺ຕນາ ຈ ມິຈ຺ຉາຎາຓີ ໂຫຕິ, ປຣຎ຺ຈ ມິຈ຺ຉາຎາເຓ ສມາທເປຕິ; ອຕ຺ຕນາ ຈ ມິຈ຺ຉາວິມຸຕ຺ຕິ ໂຫຕິ, ປຣຎ຺ຈ ມິຈ຺ຉາວິມຸຕ຺ຕິຍາ ສມາທເປຕິ. ອຍໍ ວຸຈ຺ຈຕິ, ຠິກ຺ຂເວ, ປາເປນ ປາປຕໂຣ.

‘‘ກຕໂມ ຈ, ຠິກ຺ຂເວ, ກລ຺ຍາໂຓ? ອິຘ, ຠິກ຺ຂເວ, ເອກຈ຺ໂຈ ສມ຺ມາທິຏ຺ຐິໂກ ໂຫຕິ …ເປ… ສມ຺ມາຎາຓີ ໂຫຕິ, ສມ຺ມາວິມຸຕ຺ຕິ ໂຫຕິ. ອຍໍ ວຸຈ຺ຈຕິ, ຠິກ຺ຂເວ, ກລ຺ຍາໂຓ.

‘‘ກຕໂມ ຈ, ຠິກ຺ຂເວ, ກລ຺ຍາເຓນ ກລ຺ຍາຓຕໂຣ? ອິຘ, ຠິກ຺ຂເວ, ເອກຈ຺ໂຈ ອຕ຺ຕນາ ຈ ສມ຺ມາທິຏ຺ຐິໂກ ໂຫຕິ, ປຣຎ຺ຈ ສມ຺ມາທິຏ຺ຐິຍາ ສມາທເປຕິ…ເປ… ອຕ຺ຕນາ ຈ ສມ຺ມາຎາຓີ ໂຫຕິ, ປຣຎ຺ຈ ສມ຺ມາຎາເຓ ສມາທເປຕິ; ອຕ຺ຕນາ ຈ ສມ຺ມາວິມຸຕ຺ຕິ ໂຫຕິ, ປຣຎ຺ຈ ສມ຺ມາວິມຸຕ຺ຕິຍາ ສມາທເປຕິ. ອຍໍ ວຸຈ຺ຈຕິ, ຠິກ຺ຂເວ, ກລ຺ຍາເຓນ ກລ຺ຍາຓຕໂຣ’’ຕິ. ອຏ຺ຐມໍ.

໙. ຕຕິຍປາປຘມ຺ມສຸຕ຺ຕໍ

໒໐໙. ‘‘ປາປຘມ຺ມຎ຺ຈ ໂວ, ຠິກ຺ຂເວ, ເທເສສ຺ສາມິ, ປາປຘມ຺ເມນ ປາປຘມ຺ມຕຣຎ຺ຈ; ກລ຺ຍາຓຘມ຺ມຎ຺ຈ, ກລ຺ຍາຓຘມ຺ເມນ ກລ຺ຍາຓຘມ຺ມຕຣຎ຺ຈ. ຕໍ ສຸຓາຖ…ເປ….

‘‘ກຕໂມ ຈ, ຠິກ຺ຂເວ, ປາປຘມ຺ໂມ? ອິຘ, ຠິກ຺ຂເວ, ເອກຈ຺ໂຈ ປາຓາຕິປາຕີ ໂຫຕິ…ເປ… ມິຈ຺ຉາທິຏ຺ຐິໂກ ໂຫຕິ. ອຍໍ ວຸຈ຺ຈຕິ, ຠິກ຺ຂເວ, ປາປຘມ຺ໂມ.

‘‘ກຕໂມ ຈ, ຠິກ຺ຂເວ, ປາປຘມ຺ເມນ ປາປຘມ຺ມຕໂຣ? ອິຘ ຠິກ຺ຂເວ, ເອກຈ຺ໂຈ ອຕ຺ຕນາ ຈ ປາຓາຕິປາຕີ ໂຫຕິ, ປຣຎ຺ຈ ປາຓາຕິປາເຕ ສມາທເປຕິ…ເປ… ອຕ຺ຕນາ ຈ ມິຈ຺ຉາທິຏ຺ຐິໂກ ໂຫຕິ, ປຣຎ຺ຈ ມິຈ຺ຉາທິຏ຺ຐິຍາ ສມາທເປຕິ. ອຍໍ ວຸຈ຺ຈຕິ, ຠິກ຺ຂເວ, ປາປຘມ຺ເມນ ປາປຘມ຺ມຕໂຣ.

‘‘ກຕໂມ ຈ, ຠິກ຺ຂເວ, ກລ຺ຍາຓຘມ຺ໂມ? ອິຘ, ຠິກ຺ຂເວ, ເອກຈ຺ໂຈ ປາຓາຕິປາຕາ ປຏິວິຣໂຕ ໂຫຕິ…ເປ… ສມ຺ມາທິຏ຺ຐິໂກ ໂຫຕິ. ອຍໍ ວຸຈ຺ຈຕິ, ຠິກ຺ຂເວ, ກລ຺ຍາຓຘມ຺ໂມ.

‘‘ກຕໂມ ຈ, ຠິກ຺ຂເວ, ກລ຺ຍາຓຘມ຺ເມນ ກລ຺ຍາຓຘມ຺ມຕໂຣ? ອິຘ, ຠິກ຺ຂເວ, ເອກຈ຺ໂຈ ອຕ຺ຕນາ ຈ ປາຓາຕິປາຕາ ປຏິວິຣໂຕ ໂຫຕິ, ປຣຎ຺ຈ ປາຓາຕິປາຕາ ເວຣມຓິຍາ ສມາທເປຕິ…ເປ… ອຕ຺ຕນາ ຈ ສມ຺ມາທິຏ຺ຐິໂກ ໂຫຕິ, ປຣຎ຺ຈ ສມ຺ມາທິຏ຺ຐິຍາ ສມາທເປຕິ. ອຍໍ ວຸຈ຺ຈຕິ, ຠິກ຺ຂເວ, ກລ຺ຍາຓຘມ຺ເມນ ກລ຺ຍາຓຘມ຺ມຕໂຣ’’ຕິ. ນວມໍ.

໑໐. ຈຕຸຕ຺ຖປາປຘມ຺ມສຸຕ຺ຕໍ

໒໑໐. ‘‘ປາປຘມ຺ມຎ຺ຈ ໂວ, ຠິກ຺ຂເວ, ເທເສສ຺ສາມິ, ປາປຘມ຺ເມນ ປາປຘມ຺ມຕຣຎ຺ຈ; ກລ຺ຍາຓຘມ຺ມຎ຺ຈ, ກລ຺ຍາຓຘມ຺ເມນ ກລ຺ຍາຓຘມ຺ມຕຣຎ຺ຈ. ຕໍ ສຸຓາຖ…ເປ….

‘‘ກຕໂມ ຈ, ຠິກ຺ຂເວ, ປາປຘມ຺ໂມ? ອິຘ, ຠິກ຺ຂເວ, ເອກຈ຺ໂຈ ມິຈ຺ຉາທິຏ຺ຐິໂກ ໂຫຕິ…ເປ… ມິຈ຺ຉາຎາຓີ ໂຫຕິ, ມິຈ຺ຉາວິມຸຕ຺ຕິ ໂຫຕິ. ອຍໍ ວຸຈ຺ຈຕິ, ຠິກ຺ຂເວ, ປາປຘມ຺ໂມ.

‘‘ກຕໂມ ຈ, ຠິກ຺ຂເວ, ປາປຘມ຺ເມນ ປາປຘມ຺ມຕໂຣ? ອິຘ, ຠິກ຺ຂເວ, ເອກຈ຺ໂຈ ອຕ຺ຕນາ ຈ ມິຈ຺ຉາທິຏ຺ຐິໂກ ໂຫຕິ, ປຣຎ຺ຈ ມິຈ຺ຉາທິຏ຺ຐິຍາ ສມາທເປຕິ…ເປ… ອຕ຺ຕນາ ຈ ມິຈ຺ຉາຎາຓີ ໂຫຕິ, ປຣຎ຺ຈ ມິຈ຺ຉາຎາເຓ ສມາທເປຕິ; ອຕ຺ຕນາ ຈ ມິຈ຺ຉາວິມຸຕ຺ຕິ ໂຫຕິ, ປຣຎ຺ຈ ມິຈ຺ຉາວິມຸຕ຺ຕິຍາ ສມາທເປຕິ. ອຍໍ ວຸຈ຺ຈຕິ, ຠິກ຺ຂເວ, ປາປຘມ຺ເມນ ປາປຘມ຺ມຕໂຣ.

‘‘ກຕໂມ ຈ, ຠິກ຺ຂເວ, ກລ຺ຍາຓຘມ຺ໂມ? ອິຘ, ຠິກ຺ຂເວ, ເອກຈ຺ໂຈ ສມ຺ມາທິຏ຺ຐິໂກ ໂຫຕິ…ເປ… ສມ຺ມາຎາຓີ ໂຫຕິ, ສມ຺ມາວິມຸຕ຺ຕິ ໂຫຕິ. ອຍໍ ວຸຈ຺ຈຕິ, ຠິກ຺ຂເວ, ກລ຺ຍາຓຘມ຺ໂມ.

‘‘ກຕໂມ ຈ, ຠິກ຺ຂເວ, ກລ຺ຍາຓຘມ຺ເມນ ກລ຺ຍາຓຘມ຺ມຕໂຣ? ອິຘ, ຠິກ຺ຂເວ, ເອກຈ຺ໂຈ ອຕ຺ຕນາ ຈ ສມ຺ມາທິຏ຺ຐິໂກ ໂຫຕິ, ປຣຎ຺ຈ ສມ຺ມາທິຏ຺ຐິຍາ ສມາທເປຕິ…ເປ… ອຕ຺ຕນາ ຈ ສມ຺ມາຎາຓີ ໂຫຕິ, ປຣຎ຺ຈ ສມ຺ມາຎາເຓ ສມາທເປຕິ; ອຕ຺ຕນາ ຈ ສມ຺ມາວິມຸຕ຺ຕິ ໂຫຕິ, ປຣຎ຺ຈ ສມ຺ມາວິມຸຕ຺ຕິຍາ ສມາທເປຕິ. ອຍໍ ວຸຈ຺ຈຕິ, ຠິກ຺ຂເວ, ກລ຺ຍາຓຘມ຺ເມນ ກລ຺ຍາຓຘມ຺ມຕໂຣ’’ຕິ. ທສມໍ.

ສປ຺ປຸຣິສວຄ຺ໂຄ ປຐໂມ.

ຕສ຺ສຸທ຺ທານໍ –

ສິກ຺ຂາປທຎ຺ຈ ອສ຺ສທ຺ຘໍ, ສຕ຺ຕກມ຺ມໍ ອໂຖ ຈ ທສກມ຺ມໍ;

ອຏ຺ຐງ຺ຄິກຎ຺ຈ ທສມຄ຺ຄໍ, ທ຺ເວ ປາປຘມ຺ມາ ອປເຣ ທ຺ເວຕິ.

(໒໒) ໒. ປຣິສາວຄ຺ໂຄ

໑. ປຣິສາສຸຕ຺ຕໍ

໒໑໑. ‘‘ຈຕ຺ຕາໂຣເມ, ຠິກ຺ຂເວ, ປຣິສທູສນາ. ກຕເມ ຈຕ຺ຕາໂຣ? ຠິກ຺ຂຸ, ຠິກ຺ຂເວ [ອິຘ ຠິກ຺ຂເວ ຠິກ຺ຂຸ (ປີ. ກ.)], ທຸສ຺ສີໂລ ປາປຘມ຺ໂມ ປຣິສທູສໂນ; ຠິກ຺ຂຸນີ, ຠິກ຺ຂເວ, ທຸສ຺ສີລາ ປາປຘມ຺ມາ ປຣິສທູສນາ; ອຸປາສໂກ, ຠິກ຺ຂເວ, ທຸສ຺ສີໂລ ປາປຘມ຺ໂມ ປຣິສທູສໂນ; ອຸປາສິກາ, ຠິກ຺ຂເວ, ທຸສ຺ສີລາ ປາປຘມ຺ມາ ປຣິສທູສນາ. ອິເມ ໂຂ, ຠິກ຺ຂເວ, ຈຕ຺ຕາໂຣ ປຣິສທູສນາ.

‘‘ຈຕ຺ຕາໂຣເມ, ຠິກ຺ຂເວ, ປຣິສໂສຠນາ. ກຕເມ ຈຕ຺ຕາໂຣ? ຠິກ຺ຂຸ, ຠິກ຺ຂເວ, ສີລວາ ກລ຺ຍາຓຘມ຺ໂມ ປຣິສໂສຠໂນ; ຠິກ຺ຂຸນີ, ຠິກ຺ຂເວ, ສີລວຕີ ກລ຺ຍາຓຘມ຺ມາ ປຣິສໂສຠນາ; ອຸປາສໂກ, ຠິກ຺ຂເວ, ສີລວາ ກລ຺ຍາຓຘມ຺ໂມ ປຣິສໂສຠໂນ; ອຸປາສິກາ, ຠິກ຺ຂເວ, ສີລວຕີ ກລ຺ຍາຓຘມ຺ມາ ປຣິສໂສຠນາ. ອິເມ ໂຂ, ຠິກ຺ຂເວ, ຈຕ຺ຕາໂຣ ປຣິສໂສຠນາ’’ຕິ. ປຐມໍ.

໒. ທິຏ຺ຐິສຸຕ຺ຕໍ

໒໑໒. ‘‘ຈຕູຫິ, ຠິກ຺ຂເວ, ຘມ຺ເມຫິ ສມນ຺ນາຄໂຕ ຍຖາຠຕໍ ນິກ຺ຂິຕ຺ໂຕ ເອວໍ ນິຣເຍ. ກຕເມຫິ ຈຕູຫິ? ກາຍທຸຈ຺ຈຣິເຕນ, ວຈີທຸຈ຺ຈຣິເຕນ, ມໂນທຸຈ຺ຈຣິເຕນ, ມິຈ຺ຉາທິຏ຺ຐິຍາ – ອິເມຫິ ໂຂ, ຠິກ຺ຂເວ, ຈຕູຫິ ຘມ຺ເມຫິ ສມນ຺ນາຄໂຕ ຍຖາຠຕໍ ນິກ຺ຂິຕ຺ໂຕ ເອວໍ ນິຣເຍ.

‘‘ຈຕູຫິ, ຠິກ຺ຂເວ, ຘມ຺ເມຫິ ສມນ຺ນາຄໂຕ ຍຖາຠຕໍ ນິກ຺ຂິຕ຺ໂຕ ເອວໍ ສຄ຺ເຄ. ກຕເມຫິ ຈຕູຫິ? ກາຍສຸຈຣິເຕນ, ວຈີສຸຈຣິເຕນ, ມໂນສຸຈຣິເຕນ, ສມ຺ມາທິຏ຺ຐິຍາ – ອິເມຫິ ໂຂ, ຠິກ຺ຂເວ, ຈຕູຫິ ຘມ຺ເມຫິ ສມນ຺ນາຄໂຕ ຍຖາຠຕໍ ນິກ຺ຂິຕ຺ໂຕ ເອວໍ ສຄ຺ເຄ’’ຕິ. ທຸຕິຍໍ.

໓. ອກຕຎ຺ຎຸຕາສຸຕ຺ຕໍ

໒໑໓. ‘‘ຈຕູຫິ, ຠິກ຺ຂເວ, ຘມ຺ເມຫິ ສມນ຺ນາຄໂຕ ຍຖາຠຕໍ ນິກ຺ຂິຕ຺ໂຕ ເອວໍ ນິຣເຍ. ກຕເມຫິ ຈຕູຫິ? ກາຍທຸຈ຺ຈຣິເຕນ, ວຈີທຸຈ຺ຈຣິເຕນ, ມໂນທຸຈ຺ຈຣິເຕນ, ອກຕຎ຺ຎຸຕາ ອກຕເວທິຕາ [ອກຕຎ຺ຎຸຕາອກຕເວທິຕາຍ (ສີ.)] – ອິເມຫິ ໂຂ, ຠິກ຺ຂເວ, ຈຕູຫິ ຘມ຺ເມຫິ ສມນ຺ນາຄໂຕ ຍຖາຠຕໍ ນິກ຺ຂິຕ຺ໂຕ ເອວໍ ນິຣເຍ.

‘‘ຈຕູຫິ, ຠິກ຺ຂເວ, ຘມ຺ເມຫິ ສມນ຺ນາຄໂຕ ຍຖາຠຕໍ ນິກ຺ຂິຕ຺ໂຕ ເອວໍ ສຄ຺ເຄ. ກຕເມຫິ ຈຕູຫິ? ກາຍສຸຈຣິເຕນ, ວຈີສຸຈຣິເຕນ, ມໂນສຸຈຣິເຕນ, ກຕຎ຺ຎຸຕາກຕເວທິຕາ [ກຕຎ຺ຎຸຕາກຕເວທິຕາຍ (ສີ.)] – ອິເມຫິ ໂຂ, ຠິກ຺ຂເວ, ຈຕູຫິ ຘມ຺ເມຫິ ສມນ຺ນາຄໂຕ ຍຖາຠຕໍ ນິກ຺ຂິຕ຺ໂຕ ເອວໍ ສຄ຺ເຄ’’ຕິ. ຕຕິຍໍ.

໔. ປາຓາຕິປາຕີສຸຕ຺ຕໍ

໒໑໔. …ເປ… ປາຓາຕິປາຕີ ໂຫຕິ, ອທິນ຺ນາທາຍີ ໂຫຕິ, ກາເມສຸມິຈ຺ຉາຈາຣີ ໂຫຕິ, ມຸສາວາທີ ໂຫຕິ…ເປ… ປາຓາຕິປາຕາ ປຏິວິຣໂຕ ໂຫຕິ, ອທິນ຺ນາທານາ ປຏິວິຣໂຕ ໂຫຕິ, ກາເມສຸມິຈ຺ຉາຈາຣາ ປຏິວິຣໂຕ ໂຫຕິ, ມຸສາວາທາ ປຏິວິຣໂຕ ໂຫຕິ. ຈຕຸຕ຺ຖໍ.

໕. ປຐມມຄ຺ຄສຸຕ຺ຕໍ

໒໑໕. …ເປ… ມິຈ຺ຉາທິຏ຺ຐິໂກ ໂຫຕິ, ມິຈ຺ຉາສງ຺ກປ຺ໂປ ໂຫຕິ, ມິຈ຺ຉາວາໂຈ ໂຫຕິ, ມິຈ຺ຉາກມ຺ມນ຺ໂຕ ໂຫຕິ…ເປ… ສມ຺ມາທິຏ຺ຐິໂກ ໂຫຕິ, ສມ຺ມາສງ຺ກປ຺ໂປ ໂຫຕິ, ສມ຺ມາວາໂຈ ໂຫຕິ, ສມ຺ມາກມ຺ມນ຺ໂຕ ໂຫຕິ. ປຎ຺ຈມໍ.

໖. ທຸຕິຍມຄ຺ຄສຸຕ຺ຕໍ

໒໑໖. …ເປ… ມິຈ຺ຉາອາຊີໂວ ໂຫຕິ, ມິຈ຺ຉາວາຍາໂມ ໂຫຕິ, ມິຈ຺ຉາສຕິ ໂຫຕິ, ມິຈ຺ຉາສມາຘິ ໂຫຕິ…ເປ… ສມ຺ມາອາຊີໂວ ໂຫຕິ, ສມ຺ມາວາຍາໂມ ໂຫຕິ, ສມ຺ມາສຕິ ໂຫຕິ, ສມ຺ມາສມາຘິ ໂຫຕິ. ຉຏ຺ຐໍ.

໗. ປຐມໂວຫາຣປຖສຸຕ຺ຕໍ

໒໑໗. …ເປ… ອທິຏ຺ເຐ ທິຏ຺ຐວາທີ ໂຫຕິ, ອສຸເຕ ສຸຕວາທີ ໂຫຕິ, ອມຸເຕ ມຸຕວາທີ ໂຫຕິ, ອວິຎ຺ຎາເຕ ວິຎ຺ຎາຕວາທີ ໂຫຕິ…ເປ… ອທິຏ຺ເຐ ອທິຏ຺ຐວາທີ ໂຫຕິ, ອສຸເຕ ອສຸຕວາທີ ໂຫຕິ, ອມຸເຕ ອມຸຕວາທີ ໂຫຕິ, ອວິຎ຺ຎາເຕ ອວິຎ຺ຎາຕວາທີ ໂຫຕິ. ສຕ຺ຕມໍ.

໘. ທຸຕິຍໂວຫາຣປຖສຸຕ຺ຕໍ

໒໑໘. …ເປ… ທິຏ຺ເຐ ອທິຏ຺ຐວາທີ ໂຫຕິ, ສຸເຕ ອສຸຕວາທີ ໂຫຕິ, ມຸເຕ ອມຸຕວາທີ ໂຫຕິ, ວິຎ຺ຎາເຕ ອວິຎ຺ຎາຕວາທີ ໂຫຕິ…ເປ… ທິຏ຺ເຐ ທິຏ຺ຐວາທີ ໂຫຕິ, ສຸເຕ ສຸຕວາທີ ໂຫຕິ, ມຸເຕ ມຸຕວາທີ ໂຫຕິ, ວິຎ຺ຎາເຕ ວິຎ຺ຎາຕວາທີ ໂຫຕິ. ອຏ຺ຐມໍ.

໙. ອຫິຣິກສຸຕ຺ຕໍ

໒໑໙. …ເປ… ອສ຺ສທ຺ໂຘ ໂຫຕິ, ທຸສ຺ສີໂລ ໂຫຕິ, ອຫິຣິໂກ ໂຫຕິ, ອໂນຕ຺ຕປ຺ປີ ໂຫຕິ…ເປ… ສທ຺ໂຘ ໂຫຕິ, ສີລວາ ໂຫຕິ, ຫິຣິມາ ໂຫຕິ, ໂອຕ຺ຕປ຺ປີ ໂຫຕິ. ນວມໍ.

໑໐. ທຸສ຺ສີລສຸຕ຺ຕໍ

໒໒໐. ‘‘ຈຕູຫິ, ຠິກ຺ຂເວ, ຘມ຺ເມຫິ ສມນ຺ນາຄໂຕ ຍຖາຠຕໍ ນິກ຺ຂິຕ຺ໂຕ ເອວໍ ນິຣເຍ. ກຕເມຫິ ຈຕູຫິ? ອສ຺ສທ຺ໂຘ ໂຫຕິ, ທຸສ຺ສີໂລ ໂຫຕິ, ກຸສີໂຕ ໂຫຕິ, ທຸປ຺ປຎ຺ໂຎ ໂຫຕິ – ອິເມຫິ ໂຂ, ຠິກ຺ຂເວ, ຈຕູຫິ ຘມ຺ເມຫິ ສມນ຺ນາຄໂຕ ຍຖາຠຕໍ ນິກ຺ຂິຕ຺ໂຕ ເອວໍ ນິຣເຍ.

‘‘ຈຕູຫິ, ຠິກ຺ຂເວ, ຘມ຺ເມຫິ ສມນ຺ນາຄໂຕ ຍຖາຠຕໍ ນິກ຺ຂິຕ຺ໂຕ ເອວໍ ສຄ຺ເຄ. ກຕເມຫິ ຈຕູຫິ? ສທ຺ໂຘ ໂຫຕິ, ສີລວາ ໂຫຕິ, ອາຣທ຺ຘວີຣິໂຍ ໂຫຕິ, ປຎ຺ຎວາ ໂຫຕິ – ອິເມຫິ ໂຂ, ຠິກ຺ຂເວ, ຈຕູຫິ ຘມ຺ເມຫິ ສມນ຺ນາຄໂຕ ຍຖາຠຕໍ ນິກ຺ຂິຕ຺ໂຕ ເອວໍ ສຄ຺ເຄ’’ຕິ. ທສມໍ.

ປຣິສາວຄ຺ໂຄ [ໂສຠນວຄ຺ໂຄ (ສີ. ສ຺ຍາ. ກໍ. ປີ.)] ທຸຕິໂຍ.

ຕສ຺ສຸທ຺ທານໍ –

ປຣິສາ ທິຏ຺ຐິ ອກຕຎ຺ຎຸຕາ, ປາຓາຕິປາຕາປິ ທ຺ເວ ມຄ຺ຄາ;

ທ຺ເວ ໂວຫາຣປຖາ ວຸຕ຺ຕາ, ອຫິຣິກໍ ທຸປ຺ປຎ຺ເຎນ ຈາຕິ.

(໒໓) ໓. ທຸຈ຺ຈຣິຕວຄ຺ໂຄ

໑. ທຸຈ຺ຈຣິຕສຸຕ຺ຕໍ

໒໒໑. ‘‘ຈຕ຺ຕາຣິມານິ, ຠິກ຺ຂເວ, ວຈີທຸຈ຺ຈຣິຕານິ. ກຕມານິ ຈຕ຺ຕາຣິ? ມຸສາວາໂທ, ປິສຸຓາ ວາຈາ, ຜຣຸສາ ວາຈາ, ສມ຺ຜປ຺ປລາໂປ – ອິມານິ ໂຂ, ຠິກ຺ຂເວ, ຈຕ຺ຕາຣິ ວຈີທຸຈ຺ຈຣິຕານິ. ຈຕ຺ຕາຣິມານິ, ຠິກ຺ຂເວ, ວຈີສຸຈຣິຕານິ. ກຕມານິ ຈຕ຺ຕາຣິ? ສຈ຺ຈວາຈາ, ອປິສຸຓາ ວາຈາ, ສຓ຺ຫາ ວາຈາ, ມນ຺ຕວາຈາ [ມນ຺ຕາ ວາຈາ (ສີ. ສ຺ຍາ. ກໍ. ປີ.)] – ອິມານິ ໂຂ, ຠິກ຺ຂເວ, ຈຕ຺ຕາຣິ ວຈີສຸຈຣິຕານີ’’ຕິ. ປຐມໍ.

໒. ທິຏ຺ຐິສຸຕ຺ຕໍ

໒໒໒. ‘‘ຈຕູຫິ, ຠິກ຺ຂເວ, ຘມ຺ເມຫິ ສມນ຺ນາຄໂຕ ພາໂລ ອພ຺ຍຕ຺ໂຕ ອສປ຺ປຸຣິໂສ ຂຕໍ ອຸປຫຕໍ ອຕ຺ຕານໍ ປຣິຫຣຕິ, ສາວຊ຺ໂຊ ຈ ໂຫຕິ ສານຸວຊ຺ໂຊ ຈ ວິຎ຺ຎູນໍ; ພຫຸຎ຺ຈ ອປຸຎ຺ຎໍ ປສວຕິ. ກຕເມຫິ ຈຕູຫິ? ກາຍທຸຈ຺ຈຣິເຕນ, ວຈີທຸຈ຺ຈຣິເຕນ, ມໂນທຸຈ຺ຈຣິເຕນ, ມິຈ຺ຉາທິຏ຺ຐິຍາ – ອິເມຫິ ໂຂ, ຠິກ຺ຂເວ, ຈຕູຫິ ຘມ຺ເມຫິ ສມນ຺ນາຄໂຕ ພາໂລ ອພ຺ຍຕ຺ໂຕ ອສປ຺ປຸຣິໂສ ຂຕໍ ອຸປຫຕໍ ອຕ຺ຕານໍ ປຣິຫຣຕິ, ສາວຊ຺ໂຊ ຈ ໂຫຕິ ສານຸວຊ຺ໂຊ ຈ ວິຎ຺ຎູນໍ, ພຫຸຎ຺ຈ ອປຸຎ຺ຎໍ ປສວຕິ.

‘‘ຈຕູຫິ, ຠິກ຺ຂເວ, ຘມ຺ເມຫິ ສມນ຺ນາຄໂຕ ປຓ຺ຑິໂຕ ວິຍຕ຺ໂຕ ສປ຺ປຸຣິໂສ ອກ຺ຂຕໍ ອນຸປຫຕໍ ອຕ຺ຕານໍ ປຣິຫຣຕິ, ອນວຊ຺ໂຊ ຈ ໂຫຕິ ອນນຸວຊ຺ໂຊ ວິຎ຺ຎູນໍ, ພຫຸຎ຺ຈ ປຸຎ຺ຎໍ ປສວຕິ. ກຕເມຫິ ຈຕູຫິ? ກາຍສຸຈຣິເຕນ, ວຈີສຸຈຣິເຕນ, ມໂນສຸຈຣິເຕນ, ສມ຺ມາທິຏ຺ຐິຍາ – ອິເມຫິ ໂຂ, ຠິກ຺ຂເວ, ຈຕູຫິ ຘມ຺ເມຫິ ສມນ຺ນາຄໂຕ ປຓ຺ຑິໂຕ ວິຍຕ຺ໂຕ ສປ຺ປຸຣິໂສ ອກ຺ຂຕໍ ອນຸປຫຕໍ ອຕ຺ຕານໍ ປຣິຫຣຕິ, ອນວຊ຺ໂຊ ຈ ໂຫຕິ ອນນຸວຊ຺ໂຊ ວິຎ຺ຎູນໍ; ພຫຸຎ຺ຈ ປຸຎ຺ຎໍ ປສວຕີ’’ຕິ. ທຸຕິຍໍ.

໓. ອກຕຎ຺ຎຸຕາສຸຕ຺ຕໍ

໒໒໓. ‘‘ຈຕູຫິ, ຠິກ຺ຂເວ, ຘມ຺ເມຫິ ສມນ຺ນາຄໂຕ ພາໂລ ອພ຺ຍຕ຺ໂຕ ອສປ຺ປຸຣິໂສ ຂຕໍ ອຸປຫຕໍ ອຕ຺ຕານໍ ປຣິຫຣຕິ, ສາວຊ຺ໂຊ ຈ ໂຫຕິ ສານຸວຊ຺ໂຊ ວິຎ຺ຎູນໍ, ພຫຸຎ຺ຈ ອປຸຎ຺ຎໍ ປສວຕິ. ກຕເມຫິ ຈຕູຫິ? ກາຍທຸຈ຺ຈຣິເຕນ, ວຈີທຸຈ຺ຈຣິເຕນ, ມໂນທຸຈ຺ຈຣິເຕນ, ອກຕຎ຺ຎຸຕາ ອກຕເວທິຕາ – ອິເມຫິ…ເປ… ປຓ຺ຑິໂຕ… ກາຍສຸຈຣິເຕນ, ວຈີສຸຈຣິເຕນ, ມໂນສຸຈຣິເຕນ ກຕຎ຺ຎຸຕາກຕເວທິຕາ…ເປ…. ຕຕິຍໍ.

໔. ປາຓາຕິປາຕີສຸຕ຺ຕໍ

໒໒໔. … ປາຓາຕິປາຕີ ໂຫຕິ, ອທິນ຺ນາທາຍີ ໂຫຕິ, ກາເມສຸມິຈ຺ຉາຈາຣີ ໂຫຕິ, ມຸສາວາທີ ໂຫຕິ…ເປ… ປາຓາຕິປາຕາ ປຏິວິຣໂຕ ໂຫຕິ, ອທິນ຺ນາທານາ ປຏິວິຣໂຕ ໂຫຕິ, ກາເມສຸມິຈ຺ຉາຈາຣາ ປຏິວິຣໂຕ ໂຫຕິ, ມຸສາວາທາ ປຏິວິຣໂຕ ໂຫຕິ…ເປ…. ຈຕຸຕ຺ຖໍ.

໕. ປຐມມຄ຺ຄສຸຕ຺ຕໍ

໒໒໕. … ມິຈ຺ຉາທິຏ຺ຐິໂກ ໂຫຕິ, ມິຈ຺ຉາສງ຺ກປ຺ໂປ ໂຫຕິ, ມິຈ຺ຉາວາໂຈ ໂຫຕິ, ມິຈ຺ຉາກມ຺ມນ຺ໂຕ ໂຫຕິ…ເປ… ສມ຺ມາທິຏ຺ຐິໂກ ໂຫຕິ, ສມ຺ມາສງ຺ກປ຺ໂປ ໂຫຕິ, ສມ຺ມາວາໂຈ ໂຫຕິ, ສມ຺ມາກມ຺ມນ຺ໂຕ ໂຫຕິ…ເປ…. ປຎ຺ຈມໍ.

໖. ທຸຕິຍມຄ຺ຄສຸຕ຺ຕໍ

໒໒໖. … ມິຈ຺ຉາອາຊີໂວ ໂຫຕິ, ມິຈ຺ຉາວາຍາໂມ ໂຫຕິ, ມິຈ຺ຉາສຕິ ໂຫຕິ, ມິຈ຺ຉາສມາຘິ ໂຫຕິ…ເປ… ສມ຺ມາອາຊີໂວ ໂຫຕິ, ສມ຺ມາວາຍາໂມ ໂຫຕິ, ສມ຺ມາສຕິ ໂຫຕິ, ສມ຺ມາສມາຘິ ໂຫຕິ…ເປ…. ຉຏ຺ຐໍ.

໗. ປຐມໂວຫາຣປຖສຸຕ຺ຕໍ

໒໒໗. … ອທິຏ຺ເຐ ທິຏ຺ຐວາທີ ໂຫຕິ, ອສຸເຕ ສຸຕວາທີ ໂຫຕິ, ອມຸເຕ ມຸຕວາທີ ໂຫຕິ, ອວິຎ຺ຎາເຕ ວິຎ຺ຎາຕວາທີ ໂຫຕິ…ເປ… ອທິຏ຺ເຐ ອທິຏ຺ຐວາທີ ໂຫຕິ, ອສຸເຕ ອສຸຕວາທີ ໂຫຕິ, ອມຸເຕ ອມຸຕວາທີ ໂຫຕິ, ອວິຎ຺ຎາເຕ ອວິຎ຺ຎາຕວາທີ ໂຫຕິ…ເປ…. ສຕ຺ຕມໍ.

໘. ທຸຕິຍໂວຫາຣປຖສຸຕ຺ຕໍ

໒໒໘. … ທິຏ຺ເຐ ອທິຏ຺ຐວາທີ ໂຫຕິ, ສຸເຕ ອສຸຕວາທີ ໂຫຕິ, ມຸເຕ ອມຸຕວາທີ ໂຫຕິ, ວິຎ຺ຎາເຕ ອວິຎ຺ຎາຕວາທີ ໂຫຕິ…ເປ… ທິຏ຺ເຐ ທິຏ຺ຐວາທີ ໂຫຕິ, ສຸເຕ ສຸຕວາທີ ໂຫຕິ, ມຸເຕ ມຸຕວາທີ ໂຫຕິ, ວິຎ຺ຎາເຕ ວິຎ຺ຎາຕວາທີ ໂຫຕິ…ເປ…. ອຏ຺ຐມໍ.

໙. ອຫິຣິກສຸຕ຺ຕໍ

໒໒໙. … ອສ຺ສທ຺ໂຘ ໂຫຕິ, ທຸສ຺ສີໂລ ໂຫຕິ, ອຫິຣິໂກ ໂຫຕິ, ອໂນຕ຺ຕປ຺ປີ ໂຫຕິ…ເປ… ສທ຺ໂຘ ໂຫຕິ, ສີລວາ ໂຫຕິ, ຫິຣິມາ ໂຫຕິ, ໂອຕ຺ຕປ຺ປີ ໂຫຕິ…ເປ…. ນວມໍ.

໑໐. ທຸປ຺ປຎ຺ຎສຸຕ຺ຕໍ

໒໓໐. … ອສ຺ສທ຺ໂຘ ໂຫຕິ, ທຸສ຺ສີໂລ ໂຫຕິ, ກຸສີໂຕ ໂຫຕິ, ທຸປ຺ປຎ຺ໂຎ ໂຫຕິ…ເປ… ສທ຺ໂຘ ໂຫຕິ, ສີລວາ ໂຫຕິ, ອາຣທ຺ຘວີຣິໂຍ ໂຫຕິ, ປຎ຺ຎວາ ໂຫຕິ – ອິເມຫິ ໂຂ, ຠິກ຺ຂເວ, ຈຕູຫິ ຘມ຺ເມຫິ ສມນ຺ນາຄໂຕ ປຓ຺ຑິໂຕ ວິຍຕ຺ໂຕ ສປ຺ປຸຣິໂສ ອກ຺ຂຕໍ ອນຸປຫຕໍ ອຕ຺ຕານໍ ປຣິຫຣຕິ, ອນວຊ຺ໂຊ ຈ ໂຫຕິ ອນນຸວຊ຺ໂຊ ວິຎ຺ຎູນໍ, ພຫຸຎ຺ຈ ປຸຎ຺ຎໍ ປສວຕີ’’ຕິ. ທສມໍ.

໑໑. ກວິສຸຕ຺ຕໍ

໒໓໑. ‘‘ຈຕ຺ຕາໂຣເມ, ຠິກ຺ຂເວ, ກວີ. ກຕເມ ຈຕ຺ຕາໂຣ? ຈິນ຺ຕາກວິ, ສຸຕກວິ, ອຕ຺ຖກວິ, ປຏິຠານກວິ – ອິເມ ໂຂ, ຠິກ຺ຂເວ, ຈຕ຺ຕາໂຣ ກວີ’’ຕິ. ເອກາທສມໍ.

ທຸຈ຺ຈຣິຕວຄ຺ໂຄ ຕຕິໂຍ.

ຕສ຺ສຸທ຺ທານໍ –

ທຸຈ຺ຈຣິຕໍ ທິຏ຺ຐິ ອກຕຎ຺ຎູ ຈ, ປາຓາຕິປາຕາປິ ທ຺ເວ ມຄ຺ຄາ;

ທ຺ເວ ໂວຫາຣປຖາ ວຸຕ຺ຕາ, ອຫິຣິກໍ ທຸປ຺ປຎ຺ຎກວິນາ ຈາຕິ.

(໒໔) ໔. ກມ຺ມວຄ຺ໂຄ

໑. ສໍຂິຕ຺ຕສຸຕ຺ຕໍ

໒໓໒. ‘‘ຈຕ຺ຕາຣິມານິ, ຠິກ຺ຂເວ, ກມ຺ມານິ ມຍາ ສຍໍ ອຠິຎ຺ຎາ ສຈ຺ຉິກຕ຺ວາ ປເວທິຕານິ. ກຕມານິ ຈຕ຺ຕາຣິ? ອຕ຺ຖິ, ຠິກ຺ຂເວ, ກມ຺ມໍ ກຓ຺ຫໍ ກຓ຺ຫວິປາກໍ; ອຕ຺ຖິ, ຠິກ຺ຂເວ, ກມ຺ມໍ ສຸກ຺ກໍ ສຸກ຺ກວິປາກໍ; ອຕ຺ຖິ, ຠິກ຺ຂເວ, ກມ຺ມໍ ກຓ຺ຫສຸກ຺ກໍ ກຓ຺ຫສຸກ຺ກວິປາກໍ; ອຕ຺ຖິ, ຠິກ຺ຂເວ, ກມ຺ມໍ ອກຓ຺ຫອສຸກ຺ກໍ [ອກຓ຺ຫໍ ອສຸກ຺ກໍ (ສີ. ສ຺ຍາ. ປີ.) (ທີ. ນິ. ໓.໓໑໒; ມ. ນິ. ໒.໘໑)] ອກຓ຺ຫອສຸກ຺ກວິປາກໍ ກມ຺ມກ຺ຂຍາຍ ສໍວຕ຺ຕຕິ. ອິມານິ ໂຂ, ຠິກ຺ຂເວ, ຈຕ຺ຕາຣິ ກມ຺ມານິ ມຍາ ສຍໍ ອຠິຎ຺ຎາ ສຈ຺ຉິກຕ຺ວາ ປເວທິຕານີ’’ຕິ. ປຐມໍ.

໒. ວິຕ຺ຖາຣສຸຕ຺ຕໍ

໒໓໓. ‘‘ຈຕ຺ຕາຣິມານິ, ຠິກ຺ຂເວ, ກມ຺ມານິ ມຍາ ສຍໍ ອຠິຎ຺ຎາ ສຈ຺ຉິກຕ຺ວາ ປເວທິຕານິ. ກຕມານິ ຈຕ຺ຕາຣິ? ອຕ຺ຖິ, ຠິກ຺ຂເວ, ກມ຺ມໍ ກຓ຺ຫໍ ກຓ຺ຫວິປາກໍ; ອຕ຺ຖິ, ຠິກ຺ຂເວ, ກມ຺ມໍ ສຸກ຺ກໍ ສຸກ຺ກວິປາກໍ; ອຕ຺ຖິ, ຠິກ຺ຂເວ, ກມ຺ມໍ ກຓ຺ຫສຸກ຺ກໍ ກຓ຺ຫສຸກ຺ກວິປາກໍ; ອຕ຺ຖິ, ຠິກ຺ຂເວ, ກມ຺ມໍ ອກຓ຺ຫອສຸກ຺ກໍ ອກຓ຺ຫອສຸກ຺ກວິປາກໍ ກມ຺ມກ຺ຂຍາຍ ສໍວຕ຺ຕຕິ.

‘‘ກຕມຎ຺ຈ, ຠິກ຺ຂເວ, ກມ຺ມໍ ກຓ຺ຫໍ ກຓ຺ຫວິປາກໍ? ອິຘ, ຠິກ຺ຂເວ, ເອກຈ຺ໂຈ ສພ຺ຍາພຊ຺ຌໍ [ສພ຺ຍາປຊ຺ຌໍ (ສພ຺ພຕ຺ຖ)] ກາຍສງ຺ຂາຣໍ ອຠິສງ຺ຂໂຣຕິ, ສພ຺ຍາພຊ຺ຌໍ ວຈີສງ຺ຂາຣໍ ອຠິສງ຺ຂໂຣຕິ, ສພ຺ຍາພຊ຺ຌໍ ມໂນສງ຺ຂາຣໍ ອຠິສງ຺ຂໂຣຕິ. ໂສ ສພ຺ຍາພຊ຺ຌໍ ກາຍສງ຺ຂາຣໍ ອຠິສງ຺ຂຣິຕ຺ວາ, ສພ຺ຍາພຊ຺ຌໍ ວຈີສງ຺ຂາຣໍ ອຠິສງ຺ຂຣິຕ຺ວາ, ສພ຺ຍາພຊ຺ຌໍ ມໂນສງ຺ຂາຣໍ ອຠິສງ຺ຂຣິຕ຺ວາ ສພ຺ຍາພຊ຺ຌໍ ໂລກໍ ອຸປປຊ຺ຊຕິ. ຕເມນໍ ສພ຺ຍາພຊ຺ຌໍ ໂລກໍ ອຸປປນ຺ນໍ ສມານໍ ສພ຺ຍາພຊ຺ຌາ ຜສ຺ສາ ຜຸສນ຺ຕິ. ໂສ ສພ຺ຍາພຊ຺ເຌຫິ ຜສ຺ເສຫິ ຜຸຏ຺ໂຐ ສມາໂນ ສພ຺ຍາພຊ຺ຌໍ ເວທນໍ ເວທິຍຕິ [ເວທຍຕິ (ກ.) ອ. ນິ. ໖.໖໓] ເອກນ຺ຕທຸກ຺ຂໍ, ເສຍ຺ຍຖາປິ ສຕ຺ຕາ ເນຣຍິກາ. ອິທໍ ວຸຈ຺ຈຕິ, ຠິກ຺ຂເວ, ກມ຺ມໍ ກຓ຺ຫໍ ກຓ຺ຫວິປາກໍ.

‘‘ກຕມຎ຺ຈ, ຠິກ຺ຂເວ, ກມ຺ມໍ ສຸກ຺ກໍ ສຸກ຺ກວິປາກໍ? ອິຘ, ຠິກ຺ຂເວ, ເອກຈ຺ໂຈ ອພ຺ຍາພຊ຺ຌໍ ກາຍສງ຺ຂາຣໍ ອຠິສງ຺ຂໂຣຕິ, ອພ຺ຍາພຊ຺ຌໍ ວຈີສງ຺ຂາຣໍ ອຠິສງ຺ຂໂຣຕິ, ອພ຺ຍາພຊ຺ຌໍ ມໂນສງ຺ຂາຣໍ ອຠິສງ຺ຂໂຣຕິ. ໂສ ອພ຺ຍາພຊ຺ຌໍ ກາຍສງ຺ຂາຣໍ ອຠິສງ຺ຂຣິຕ຺ວາ, ອພ຺ຍາພຊ຺ຌໍ ວຈີສງ຺ຂາຣໍ ອຠິສງ຺ຂຣິຕ຺ວາ, ອພ຺ຍາພຊ຺ຌໍ ມໂນສງ຺ຂາຣໍ ອຠິສງ຺ຂຣິຕ຺ວາ ອພ຺ຍາພຊ຺ຌໍ ໂລກໍ ອຸປປຊ຺ຊຕິ. ຕເມນໍ ອພ຺ຍາພຊ຺ຌໍ ໂລກໍ ອຸປປນ຺ນໍ ສມານໍ ອພ຺ຍາພຊ຺ຌາ ຜສ຺ສາ ຜຸສນ຺ຕິ. ໂສ ອພ຺ຍາພຊ຺ເຌຫິ ຜສ຺ເສຫິ ຜຸຏ຺ໂຐ ສມາໂນ ອພ຺ຍາພຊ຺ຌໍ ເວທນໍ ເວທິຍຕິ ເອກນ຺ຕສຸຂໍ, ເສຍ຺ຍຖາປິ ເທວາ ສຸຠກິຓ຺ຫາ. ອິທໍ ວຸຈ຺ຈຕິ, ຠິກ຺ຂເວ, ກມ຺ມໍ ສຸກ຺ກໍ ສຸກ຺ກວິປາກໍ.

‘‘ກຕມຎ຺ຈ, ຠິກ຺ຂເວ, ກມ຺ມໍ ກຓ຺ຫສຸກ຺ກໍ ກຓ຺ຫສຸກ຺ກວິປາກໍ? ອິຘ, ຠິກ຺ຂເວ, ເອກຈ຺ໂຈ ສພ຺ຍາພຊ຺ຌມ຺ປິ ອພ຺ຍາພຊ຺ຌມ຺ປິ ກາຍສງ຺ຂາຣໍ ອຠິສງ຺ຂໂຣຕິ, ສພ຺ຍາພຊ຺ຌມ຺ປິ ອພ຺ຍາພຊ຺ຌມ຺ປິ ວຈີສງ຺ຂາຣໍ ອຠິສງ຺ຂໂຣຕິ, ສພ຺ຍາພຊ຺ຌມ຺ປິ ອພ຺ຍາພຊ຺ຌມ຺ປິ ມໂນສງ຺ຂາຣໍ ອຠິສງ຺ຂໂຣຕິ. ໂສ ສພ຺ຍາພຊ຺ຌມ຺ປິ ອພ຺ຍາພຊ຺ຌມ຺ປິ ກາຍສງ຺ຂາຣໍ ອຠິສງ຺ຂຣິຕ຺ວາ, ສພ຺ຍາພຊ຺ຌມ຺ປິ ອພ຺ຍາພຊ຺ຌມ຺ປິ ວຈີສງ຺ຂາຣໍ ອຠິສງ຺ຂຣິຕ຺ວາ, ສພ຺ຍາພຊ຺ຌມ຺ປິ ອພ຺ຍາພຊ຺ຌມ຺ປິ ມໂນສງ຺ຂາຣໍ ອຠິສງ຺ຂຣິຕ຺ວາ ສພ຺ຍາພຊ຺ຌມ຺ປິ ອພ຺ຍາພຊ຺ຌມ຺ປິ ໂລກໍ ອຸປປຊ຺ຊຕິ. ຕເມນໍ ສພ຺ຍາພຊ຺ຌມ຺ປິ ອພ຺ຍາພຊ຺ຌມ຺ປິ ໂລກໍ ອຸປປນ຺ນໍ ສມານໍ ສພ຺ຍາພຊ຺ຌາປິ ອພ຺ຍາພຊ຺ຌາປິ ຜສ຺ສາ ຜຸສນ຺ຕິ. ໂສ ສພ຺ຍາພຊ຺ເຌຫິປິ ອພ຺ຍາພຊ຺ເຌຫິປິ ຜສ຺ເສຫິ ຜຸຏ຺ໂຐ ສມາໂນ ສພ຺ຍາພຊ຺ຌມ຺ປິ ອພ຺ຍາພຊ຺ຌມ຺ປິ ເວທນໍ ເວທິຍຕິ ໂວກິຓ຺ຓສຸຂທຸກ຺ຂໍ, ເສຍ຺ຍຖາປິ ມນຸສ຺ສາ ເອກຈ຺ເຈ ຈ ເທວາ ເອກຈ຺ເຈ ຈ ວິນິປາຕິກາ. ອິທໍ ວຸຈ຺ຈຕິ, ຠິກ຺ຂເວ, ກມ຺ມໍ ກຓ຺ຫສຸກ຺ກໍ ກຓ຺ຫສຸກ຺ກວິປາກໍ.

‘‘ກຕມຎ຺ຈ, ຠິກ຺ຂເວ, ກມ຺ມໍ ອກຓ຺ຫອສຸກ຺ກໍ ອກຓ຺ຫອສຸກ຺ກວິປາກໍ ກມ຺ມກ຺ຂຍາຍ ສໍວຕ຺ຕຕິ? ຕຕ຺ຣ, ຠິກ຺ຂເວ, ຍມິທໍ ກມ຺ມໍ ກຓ຺ຫໍ ກຓ຺ຫວິປາກໍ ຕສ຺ສ ປຫານາຍ ຍາ ເຈຕນາ, ຍມິທໍ [ຍມ຺ປິທໍ (ສີ. ສ຺ຍາ. ກໍ. ປີ.)] ກມ຺ມໍ ສຸກ຺ກໍ ສຸກ຺ກວິປາກໍ ຕສ຺ສ ປຫານາຍ ຍາ ເຈຕນາ, ຍມິທໍ [ຍມ຺ປິທໍ (ສີ. ສ຺ຍາ. ກໍ. ປີ.)] ກມ຺ມໍ ກຓ຺ຫສຸກ຺ກໍ ກຓ຺ຫສຸກ຺ກວິປາກໍ ຕສ຺ສ ປຫານາຍ ຍາ ເຈຕນາ – ອິທໍ ວຸຈ຺ຈຕິ, ຠິກ຺ຂເວ, ກມ຺ມໍ ອກຓ຺ຫອສຸກ຺ກໍ ອກຓ຺ຫອສຸກ຺ກວິປາກໍ ກມ຺ມກ຺ຂຍາຍ ສໍວຕ຺ຕຕິ. ອິມານິ ໂຂ, ຠິກ຺ຂເວ, ຈຕ຺ຕາຣິ ກມ຺ມານິ ມຍາ ສຍໍ ອຠິຎ຺ຎາ ສຈ຺ຉິກຕ຺ວາ ປເວທິຕານີ’’ຕິ. ທຸຕິຍໍ.

໓. ໂສຓກາຍນສຸຕ຺ຕໍ

໒໓໔. ອຖ ໂຂ ສິຂາໂມຄ຺ຄລ຺ລາໂນ ພ຺ຣາຫ຺ມໂຓ ເຍນ ຠຄວາ ເຕນຸປສງ຺ກມິ; ອຸປສງ຺ກມິຕ຺ວາ ຠຄວຕາ ສທ຺ຘິໍ ສມ຺ໂມທິ. ສມ຺ໂມທນີຍໍ ກຖໍ ສາຣຓີຍໍ ວີຕິສາເຣຕ຺ວາ ເອກມນ຺ຕໍ ນິສີທິ. ເອກມນ຺ຕໍ ນິສິນ຺ໂນ ໂຂ ສິຂາໂມຄ຺ຄລ຺ລາໂນ ພ຺ຣາຫ຺ມໂຓ ຠຄວນ຺ຕໍ ເອຕທໂວຈ –

‘‘ປຸຣິມານິ, ໂຠ ໂຄຕມ, ທິວສານິ ປຸຣິມຕຣານິ ໂສຓກາຍໂນ ມາຓໂວ ເຍນາຫໍ ເຕນຸປສງ຺ກມິ; ອຸປສງ຺ກມິຕ຺ວາ ມໍ ເອຕທໂວຈ – ‘ສມໂຓ ໂຄຕໂມ ສພ຺ພກມ຺ມານໍ ອກິຣິຍໍ ປຎ຺ຎເປຕິ, ສພ຺ພກມ຺ມານໍ ໂຂ ປນ ອກິຣິຍໍ ປຎ຺ຎເປນ຺ໂຕ ອຸຈ຺ເຉທໍ ອາຫ ໂລກສ຺ສ – ກມ຺ມສຈ຺ຈາຍໍ [ກມ຺ມສຈ຺ຈາຍີ (ກ.)], ໂຠ, ໂລໂກ ກມ຺ມສມາຣມ຺ຠຏ຺ຐາຍີ’’’ຕິ.

‘‘ທສ຺ສນມ຺ປິ ໂຂ ອຫໍ, ພ຺ຣາຫ຺ມຓ, ໂສຓກາຍນສ຺ສ ມາຓວສ຺ສ ນາຠິຊານາມິ; ກຸໂຕ ປເນວຣູໂປ ກຖາສລ຺ລາໂປ! ຈຕ຺ຕາຣິມານິ, ພ຺ຣາຫ຺ມຓ, ກມ຺ມານິ ມຍາ ສຍໍ ອຠິຎ຺ຎາ ສຈ຺ຉິກຕ຺ວາ ປເວທິຕານິ. ກຕມານິ ຈຕ຺ຕາຣິ? ອຕ຺ຖິ, ພ຺ຣາຫ຺ມຓ, ກມ຺ມໍ ກຓ຺ຫໍ ກຓ຺ຫວິປາກໍ; ອຕ຺ຖິ, ພ຺ຣາຫ຺ມຓ, ກມ຺ມໍ ສຸກ຺ກໍ ສຸກ຺ກວິປາກໍ; ອຕ຺ຖິ, ພ຺ຣາຫ຺ມຓ, ກມ຺ມໍ ກຓ຺ຫສຸກ຺ກໍ ກຓ຺ຫສຸກ຺ກວິປາກໍ; ອຕ຺ຖິ, ພ຺ຣາຫ຺ມຓ, ກມ຺ມໍ ອກຓ຺ຫອສຸກ຺ກໍ ອກຓ຺ຫອສຸກ຺ກວິປາກໍ ກມ຺ມກ຺ຂຍາຍ ສໍວຕ຺ຕຕິ.

‘‘ກຕມຎ຺ຈ, ພ຺ຣາຫ຺ມຓ, ກມ຺ມໍ ກຓ຺ຫໍ ກຓ຺ຫວິປາກໍ? ອິຘ, ພ຺ຣາຫ຺ມຓ, ເອກຈ຺ໂຈ ສພ຺ຍາພຊ຺ຌໍ ກາຍສງ຺ຂາຣໍ ອຠິສງ຺ຂໂຣຕິ, ສພ຺ຍາພຊ຺ຌໍ ວຈີສງ຺ຂາຣໍ ອຠິສງ຺ຂໂຣຕິ, ສພ຺ຍາພຊ຺ຌໍ ມໂນສງ຺ຂາຣໍ ອຠິສງ຺ຂໂຣຕິ. ໂສ ສພ຺ຍາພຊ຺ຌໍ ກາຍສງ຺ຂາຣໍ ອຠິສງ຺ຂຣິຕ຺ວາ, ສພ຺ຍາພຊ຺ຌໍ ວຈີສງ຺ຂາຣໍ ອຠິສງ຺ຂຣິຕ຺ວາ, ສພ຺ຍາພຊ຺ຌໍ ມໂນສງ຺ຂາຣໍ ອຠິສງ຺ຂຣິຕ຺ວາ ສພ຺ຍາພຊ຺ຌໍ ໂລກໍ ອຸປປຊ຺ຊຕິ. ຕເມນໍ ສພ຺ຍາພຊ຺ຌໍ ໂລກໍ ອຸປປນ຺ນໍ ສມານໍ ສພ຺ຍາພຊ຺ຌາ ຜສ຺ສາ ຜຸສນ຺ຕິ. ໂສ ສພ຺ຍາພຊ຺ເຌຫິ ຜສ຺ເສຫິ ຜຸຏ຺ໂຐ ສມາໂນ ສພ຺ຍາພຊ຺ຌໍ ເວທນໍ ເວທິຍຕິ ເອກນ຺ຕທຸກ຺ຂໍ, ເສຍ຺ຍຖາປິ ສຕ຺ຕາ ເນຣຍິກາ. ອິທໍ ວຸຈ຺ຈຕິ, ພ຺ຣາຫ຺ມຓ, ກມ຺ມໍ ກຓ຺ຫໍ ກຓ຺ຫວິປາກໍ.

‘‘ກຕມຎ຺ຈ, ພ຺ຣາຫ຺ມຓ, ກມ຺ມໍ ສຸກ຺ກໍ ສຸກ຺ກວິປາກໍ? ອິຘ, ພ຺ຣາຫ຺ມຓ, ເອກຈ຺ໂຈ ອພ຺ຍາພຊ຺ຌໍ ກາຍສງ຺ຂາຣໍ ອຠິສງ຺ຂໂຣຕິ, ອພ຺ຍາພຊ຺ຌໍ ວຈີສງ຺ຂາຣໍ ອຠິສງ຺ຂໂຣຕິ, ອພ຺ຍາພຊ຺ຌໍ ມໂນສງ຺ຂາຣໍ ອຠິສງ຺ຂໂຣຕິ. ໂສ ອພ຺ຍາພຊ຺ຌໍ ກາຍສງ຺ຂາຣໍ ອຠິສງ຺ຂຣິຕ຺ວາ, ອພ຺ຍາພຊ຺ຌໍ ວຈີສງ຺ຂາຣໍ ອຠິສງ຺ຂຣິຕ຺ວາ, ອພ຺ຍາພຊ຺ຌໍ ມໂນສງ຺ຂາຣໍ ອຠິສງ຺ຂຣິຕ຺ວາ ອພ຺ຍາພຊ຺ຌໍ ໂລກໍ ອຸປປຊ຺ຊຕິ. ຕເມນໍ ອພ຺ຍາພຊ຺ຌໍ ໂລກໍ ອຸປປນ຺ນໍ ສມານໍ ອພ຺ຍາພຊ຺ຌາ ຜສ຺ສາ ຜຸສນ຺ຕິ. ໂສ ອພ຺ຍາພຊ຺ເຌຫິ ຜສ຺ເສຫິ ຜຸຏ຺ໂຐ ສມາໂນ ອພ຺ຍາພຊ຺ຌໍ ເວທນໍ ເວທິຍຕິ ເອກນ຺ຕສຸຂໍ, ເສຍ຺ຍຖາປິ ເທວາ ສຸຠກິຓ຺ຫາ. ອິທໍ ວຸຈ຺ຈຕິ, ພ຺ຣາຫ຺ມຓ, ກມ຺ມໍ ສຸກ຺ກໍ ສຸກ຺ກວິປາກໍ.

‘‘ກຕມຎ຺ຈ, ພ຺ຣາຫ຺ມຓ, ກມ຺ມໍ ກຓ຺ຫສຸກ຺ກໍ ກຓ຺ຫສຸກ຺ກວິປາກໍ? ອິຘ, ພ຺ຣາຫ຺ມຓ, ເອກຈ຺ໂຈ ສພ຺ຍາພຊ຺ຌມ຺ປິ ອພ຺ຍາພຊ຺ຌມ຺ປິ ກາຍສງ຺ຂາຣໍ ອຠິສງ຺ຂໂຣຕິ, ສພ຺ຍາພຊ຺ຌມ຺ປິ ອພ຺ຍາພຊ຺ຌມ຺ປິ ວຈີສງ຺ຂາຣໍ ອຠິສງ຺ຂໂຣຕິ, ສພ຺ຍາພຊ຺ຌມ຺ປິ ອພ຺ຍາພຊ຺ຌມ຺ປິ ມໂນສງ຺ຂາຣໍ ອຠິສງ຺ຂໂຣຕິ. ໂສ ສພ຺ຍາພຊ຺ຌມ຺ປິ ອພ຺ຍາພຊ຺ຌມ຺ປິ ກາຍສງ຺ຂາຣໍ ອຠິສງ຺ຂຣິຕ຺ວາ, ສພ຺ຍາພຊ຺ຌມ຺ປິ ອພ຺ຍາພຊ຺ຌມ຺ປິ ວຈີສງ຺ຂາຣໍ ອຠິສງ຺ຂຣິຕ຺ວາ, ສພ຺ຍາພຊ຺ຌມ຺ປິ ອພ຺ຍາພຊ຺ຌມ຺ປິ ມໂນສງ຺ຂາຣໍ ອຠິສງ຺ຂຣິຕ຺ວາ ສພ຺ຍາພຊ຺ຌມ຺ປິ ອພ຺ຍາພຊ຺ຌມ຺ປິ ໂລກໍ ອຸປປຊ຺ຊຕິ. ຕເມນໍ ສພ຺ຍາພຊ຺ຌມ຺ປິ ອພ຺ຍາພຊ຺ຌມ຺ປິ ໂລກໍ ອຸປປນ຺ນໍ ສມານໍ ສພ຺ຍາພຊ຺ຌາປິ ອພ຺ຍາພຊ຺ຌາປິ ຜສ຺ສາ ຜຸສນ຺ຕິ. ໂສ ສພ຺ຍາພຊ຺ເຌຫິປິ ອພ຺ຍາພຊ຺ເຌຫິປິ ຜສ຺ເສຫິ ຜຸຏ຺ໂຐ ສມາໂນ ສພ຺ຍາພຊ຺ຌມ຺ປິ ອພ຺ຍາພຊ຺ຌມ຺ປິ ເວທນໍ ເວທິຍຕິ ໂວກິຓ຺ຓສຸຂທຸກ຺ຂໍ, ເສຍ຺ຍຖາປິ ມນຸສ຺ສາ ເອກຈ຺ເຈ ຈ ເທວາ ເອກຈ຺ເຈ ຈ ວິນິປາຕິກາ. ອິທໍ ວຸຈ຺ຈຕິ, ພ຺ຣາຫ຺ມຓ, ກມ຺ມໍ ກຓ຺ຫສຸກ຺ກໍ ກຓ຺ຫສຸກ຺ກວິປາກໍ.

‘‘ກຕມຎ຺ຈ, ພ຺ຣາຫ຺ມຓ, ກມ຺ມໍ ອກຓ຺ຫອສຸກ຺ກໍ ອກຓ຺ຫອສຸກ຺ກວິປາກໍ ກມ຺ມກ຺ຂຍາຍ ສໍວຕ຺ຕຕິ? ຕຕ຺ຣ, ພ຺ຣາຫ຺ມຓ, ຍມິທໍ ກມ຺ມໍ ກຓ຺ຫໍ ກຓ຺ຫວິປາກໍ ຕສ຺ສ ປຫານາຍ ຍາ ເຈຕນາ, ຍມິທໍ ກມ຺ມໍ ສຸກ຺ກໍ ສຸກ຺ກວິປາກໍ ຕສ຺ສ ປຫານາຍ ຍາ ເຈຕນາ, ຍມິທໍ ກມ຺ມໍ ກຓ຺ຫສຸກ຺ກໍ ກຓ຺ຫສຸກ຺ກວິປາກໍ ຕສ຺ສ ປຫານາຍ ຍາ ເຈຕນາ – ອິທໍ ວຸຈ຺ຈຕິ, ພ຺ຣາຫ຺ມຓ, ກມ຺ມໍ ອກຓ຺ຫອສຸກ຺ກໍ ອກຓ຺ຫອສຸກ຺ກວິປາກໍ ກມ຺ມກ຺ຂຍາຍ ສໍວຕ຺ຕຕິ. ອິມານິ ໂຂ, ພ຺ຣາຫ຺ມຓ, ຈຕ຺ຕາຣິ ກມ຺ມານິ ມຍາ ສຍໍ ອຠິຎ຺ຎາ ສຈ຺ຉິກຕ຺ວາ ປເວທິຕານີ’’ຕິ. ຕຕິຍໍ.

໔. ປຐມສິກ຺ຂາປທສຸຕ຺ຕໍ

໒໓໕. ‘‘ຈຕ຺ຕາຣິມານິ, ຠິກ຺ຂເວ, ກມ຺ມານິ ມຍາ ສຍໍ ອຠິຎ຺ຎາ ສຈ຺ຉິກຕ຺ວາ ປເວທິຕານິ. ກຕມານິ ຈຕ຺ຕາຣິ? ອຕ຺ຖິ, ຠິກ຺ຂເວ, ກມ຺ມໍ ກຓ຺ຫໍ ກຓ຺ຫວິປາກໍ; ອຕ຺ຖິ, ຠິກ຺ຂເວ, ກມ຺ມໍ ສຸກ຺ກໍ ສຸກ຺ກວິປາກໍ; ອຕ຺ຖິ, ຠິກ຺ຂເວ, ກມ຺ມໍ ກຓ຺ຫສຸກ຺ກໍ ກຓ຺ຫສຸກ຺ກວິປາກໍ; ອຕ຺ຖິ, ຠິກ຺ຂເວ, ກມ຺ມໍ ອກຓ຺ຫອສຸກ຺ກໍ ອກຓ຺ຫອສຸກ຺ກວິປາກໍ ກມ຺ມກ຺ຂຍາຍ ສໍວຕ຺ຕຕິ. ກຕມຎ຺ຈ, ຠິກ຺ຂເວ, ກມ຺ມໍ ກຓ຺ຫໍ ກຓ຺ຫວິປາກໍ? ອິຘ, ຠິກ຺ຂເວ, ເອກຈ຺ໂຈ ປາຓາຕິປາຕີ ໂຫຕິ, ອທິນ຺ນາທາຍີ ໂຫຕິ, ກາເມສຸມິຈ຺ຉາຈາຣີ ໂຫຕິ, ມຸສາວາທີ ໂຫຕິ, ສຸຣາເມຣຍມຊ຺ຊປມາທຏ຺ຐາຍີ ໂຫຕິ. ອິທໍ ວຸຈ຺ຈຕິ, ຠິກ຺ຂເວ, ກມ຺ມໍ ກຓ຺ຫໍ ກຓ຺ຫວິປາກໍ.

‘‘ກຕມຎ຺ຈ, ຠິກ຺ຂເວ, ກມ຺ມໍ ກຓ຺ຫສຸກ຺ກໍ ກຓ຺ຫສຸກ຺ກວິປາກໍ? ອິຘ, ຠິກ຺ຂເວ, ເອກຈ຺ໂຈ ສພ຺ຍາພຊ຺ຌມ຺ປິ ອພ຺ຍາພຊ຺ຌມ຺ປິ ກາຍສງ຺ຂາຣໍ ອຠິສງ຺ຂໂຣຕິ…ເປ… ອິທໍ ວຸຈ຺ຈຕິ, ຠິກ຺ຂເວ, ກມ຺ມໍ ກຓ຺ຫສຸກ຺ກໍ ກຓ຺ຫສຸກ຺ກວິປາກໍ.

‘‘ກຕມຎ຺ຈ, ຠິກ຺ຂເວ, ກມ຺ມໍ ອກຓ຺ຫອສຸກ຺ກໍ ອກຓ຺ຫອສຸກ຺ກວິປາກໍ ກມ຺ມກ຺ຂຍາຍ ສໍວຕ຺ຕຕິ? ຕຕ຺ຣ, ຠິກ຺ຂເວ, ຍມິທໍ ກມ຺ມໍ ກຓ຺ຫໍ ກຓ຺ຫວິປາກໍ…ເປ… ອິທໍ ວຸຈ຺ຈຕິ, ຠິກ຺ຂເວ, ກມ຺ມໍ ອກຓ຺ຫອສຸກ຺ກໍ ອກຓ຺ຫອສຸກ຺ກວິປາກໍ ກມ຺ມກ຺ຂຍາຍ ສໍວຕ຺ຕຕິ. ອິມານິ ໂຂ, ຠິກ຺ຂເວ, ຈຕ຺ຕາຣິ ກມ຺ມານິ ມຍາ ສຍໍ ອຠິຎ຺ຎາ ສຈ຺ຉິກຕ຺ວາ ປເວທິຕານີ’’ຕິ. ຈຕຸຕ຺ຖໍ.

໕. ທຸຕິຍສິກ຺ຂາປທສຸຕ຺ຕໍ

໒໓໖. ‘‘ຈຕ຺ຕາຣິມານິ, ຠິກ຺ຂເວ, ກມ຺ມານິ ມຍາ ສຍໍ ອຠິຎ຺ຎາ ສຈ຺ຉິກຕ຺ວາ ປເວທິຕານິ. ກຕມານິ ຈຕ຺ຕາຣິ? ອຕ຺ຖິ, ຠິກ຺ຂເວ, ກມ຺ມໍ ກຓ຺ຫໍ ກຓ຺ຫວິປາກໍ; ອຕ຺ຖິ, ຠິກ຺ຂເວ, ກມ຺ມໍ ສຸກ຺ກໍ ສຸກ຺ກວິປາກໍ; ອຕ຺ຖິ, ຠິກ຺ຂເວ, ກມ຺ມໍ ກຓ຺ຫສຸກ຺ກໍ ກຓ຺ຫສຸກ຺ກວິປາກໍ; ອຕ຺ຖິ, ຠິກ຺ຂເວ, ກມ຺ມໍ ອກຓ຺ຫອສຸກ຺ກໍ ອກຓ຺ຫອສຸກ຺ກວິປາກໍ ກມ຺ມກ຺ຂຍາຍ ສໍວຕ຺ຕຕິ.

‘‘ກຕມຎ຺ຈ, ຠິກ຺ຂເວ, ກມ຺ມໍ ກຓ຺ຫໍ ກຓ຺ຫວິປາກໍ? ອິຘ, ຠິກ຺ຂເວ, ເອກຈ຺ເຈນ ມາຕາ [ເອກຈ຺ໂຈ ມາຕຣໍ (ກ.)] ຊີວິຕາ ໂວໂຣປິຕາ ໂຫຕິ, ປິຕາ [ປິຕຣໍ (ກ.)] ຊີວິຕາ ໂວໂຣປິໂຕ [ໂວໂຣປິຕາ (ກ.)] ໂຫຕິ, ອຣຫໍ [ອຣຫນ຺ຕໍ (ກ.)] ຊີວິຕາ ໂວໂຣປິໂຕ [ໂວໂຣປິຕາ (ກ.)] ໂຫຕິ, ຕຖາຄຕສ຺ສ ທຸຏ຺ເຐນ ຈິຕ຺ເຕນ ໂລຫິຕໍ ອຸປ຺ປາທິຕໍ [ອຸປ຺ປາທິຕາ (ກ.)] ໂຫຕິ, ສງ຺ໂຆ ຠິນ຺ໂນ ໂຫຕິ. ອິທໍ ວຸຈ຺ຈຕິ, ຠິກ຺ຂເວ, ກມ຺ມໍ ກຓ຺ຫໍ ກຓ຺ຫວິປາກໍ.

‘‘ກຕມຎ຺ຈ, ຠິກ຺ຂເວ, ກມ຺ມໍ ສຸກ຺ກໍ ສຸກ຺ກວິປາກໍ? ອິຘ, ຠິກ຺ຂເວ, ເອກຈ຺ໂຈ ປາຓາຕິປາຕາ ປຏິວິຣໂຕ ໂຫຕິ, ອທິນ຺ນາທານາ ປຏິວິຣໂຕ ໂຫຕິ, ກາເມສຸມິຈ຺ຉາຈາຣາ ປຏິວິຣໂຕ ໂຫຕິ, ມຸສາວາທາ ປຏິວິຣໂຕ ໂຫຕິ, ປິສຸຓາຍ ວາຈາຍ ປຏິວິຣໂຕ ໂຫຕິ, ຜຣຸສາຍ ວາຈາຍ ປຏິວິຣໂຕ ໂຫຕິ, ສມ຺ຜປ຺ປລາປາ ປຏິວິຣໂຕ ໂຫຕິ, ອນຠິຊ຺ຌາລຸ ໂຫຕິ, ອພ຺ຍາປນ຺ນຈິຕ຺ໂຕ ໂຫຕິ, ສມ຺ມາທິຏ຺ຐິ [ສມ຺ມາທິຏ຺ຐິໂກ (ສີ. ສ຺ຍາ. ກໍ.)] ໂຫຕິ. ອິທໍ ວຸຈ຺ຈຕິ, ຠິກ຺ຂເວ, ກມ຺ມໍ ສຸກ຺ກໍ ສຸກ຺ກວິປາກໍ.