໙. ນິພ຺ພານສຸຕ຺ຕໍ

໑໗໙. ອຖ ໂຂ ອາຍສ຺ມາ ອານນ຺ໂທ ເຍນາຍສ຺ມາ ສາຣິປຸຕ຺ໂຕ ເຕນຸປສງ຺ກມິ; ອຸປສງ຺ກມິຕ຺ວາ ອາຍສ຺ມຕາ ສາຣິປຸຕ຺ເຕນ ສທ຺ຘິໍ ສມ຺ໂມທິ. ສມ຺ໂມທນີຍໍ ກຖໍ ສາຣຓີຍໍ ວີຕິສາເຣຕ຺ວາ ເອກມນ຺ຕໍ ນິສີທິ. ເອກມນ຺ຕໍ ນິສິນ຺ໂນ ໂຂ ອາຍສ຺ມາ ອານນ຺ໂທ ອາຍສ຺ມນ຺ຕໍ ສາຣິປຸຕ຺ຕໍ ເອຕທໂວຈ – ‘‘ໂກ ນຸ ໂຂ, ອາວຸໂສ ສາຣິປຸຕ຺ຕ, ເຫຕຸ ໂກ ປຈ຺ຈໂຍ, ເຍນ ມິເຘກຈ຺ເຈ ສຕ຺ຕາ ທິຏ຺ເຐວ ຘມ຺ເມ ນ ປຣິນິພ຺ພາຍນ຺ຕີ’’ຕິ?

‘‘ອິຘາວຸໂສ ອານນ຺ທ, ສຕ຺ຕາ ອິມາ ຫານຠາຄິຍາ ສຎ຺ຎາຕິ ຍຖາຠູຕໍ ນປ຺ປຊານນ຺ຕິ, ອິມາ ຐິຕິຠາຄິຍາ ສຎ຺ຎາຕິ ຍຖາຠູຕໍ ນປ຺ປຊານນ຺ຕິ, ອິມາ ວິເສສຠາຄິຍາ ສຎ຺ຎາຕິ ຍຖາຠູຕໍ ນປ຺ປຊານນ຺ຕິ, ອິມາ ນິພ຺ເພຘຠາຄິຍາ ສຎ຺ຎາຕິ ຍຖາຠູຕໍ ນປ຺ປຊານນ຺ຕິ. ອຍໍ ໂຂ, ອາວຸໂສ ອານນ຺ທ, ເຫຕຸ ອຍໍ ປຈ຺ຈໂຍ, ເຍນ ມິເຘກຈ຺ເຈ ສຕ຺ຕາ ທິຏ຺ເຐວ ຘມ຺ເມ ນ ປຣິນິພ຺ພາຍນ຺ຕີ’’ຕິ.

‘‘ໂກ ປນາວຸໂສ ສາຣິປຸຕ຺ຕ, ເຫຕຸ ໂກ ປຈ຺ຈໂຍ, ເຍນ ມິເຘກຈ຺ເຈ ສຕ຺ຕາ ທິຏ຺ເຐວ ຘມ຺ເມ ປຣິນິພ຺ພາຍນ຺ຕີ’’ຕິ? ‘‘ອິຘາວຸໂສ ອານນ຺ທ, ສຕ຺ຕາ ອິມາ ຫານຠາຄິຍາ ສຎ຺ຎາຕິ ຍຖາຠູຕໍ ປຊານນ຺ຕິ, ອິມາ ຐິຕິຠາຄິຍາ ສຎ຺ຎາຕິ ຍຖາຠູຕໍ ປຊານນ຺ຕິ, ອິມາ ວິເສສຠາຄິຍາ ສຎ຺ຎາຕິ ຍຖາຠູຕໍ ປຊານນ຺ຕິ, ອິມາ ນິພ຺ເພຘຠາຄິຍາ ສຎ຺ຎາຕິ ຍຖາຠູຕໍ ປຊານນ຺ຕິ. ອຍໍ ໂຂ, ອາວຸໂສ ອານນ຺ທ, ເຫຕຸ ອຍໍ ປຈ຺ຈໂຍ, ເຍນ ມິເຘກຈ຺ເຈ ສຕ຺ຕາ ທິຏ຺ເຐວ ຘມ຺ເມ ປຣິນິພ຺ພາຍນ຺ຕີ’’ຕິ. ນວມໍ.