໘. ປຣິຫານິສຸຕ຺ຕໍ

໑໕໘. ຕຕ຺ຣ ໂຂ ອາຍສ຺ມາ ສາຣິປຸຕ຺ໂຕ ຠິກ຺ຂູ ອາມນ຺ເຕສິ – ‘‘ອາວຸໂສ ຠິກ຺ຂເວ’’ຕິ. ‘‘ອາວຸໂສ’’ຕິ ໂຂ ເຕ ຠິກ຺ຂູ ອາຍສ຺ມໂຕ ສາຣິປຸຕ຺ຕສ຺ສ ປຈ຺ຈສ຺ໂສສຸໍ. ອາຍສ຺ມາ ສາຣິປຸຕ຺ໂຕ ເອຕທໂວຈ –

‘‘ໂຍ ຫິ ໂກຈິ, ອາວຸໂສ, ຠິກ຺ຂຸ ວາ ຠິກ຺ຂຸນີ ວາ ຈຕ຺ຕາໂຣ ຘມ຺ເມ ອຕ຺ຕນິ ສມນຸປສ຺ສຕິ, ນິຏ຺ຐເມຕ຺ຖ ຄນ຺ຕພ຺ພໍ – ‘ປຣິຫາຍາມິ ກຸສເລຫິ ຘມ຺ເມຫິ’. ປຣິຫານເມຕໍ ວຸຕ຺ຕໍ ຠຄວຕາ. ກຕເມ ຈຕ຺ຕາໂຣ? ຣາຄເວປຸລ຺ລຕ຺ຕໍ [ຣາຄເວປຸລ຺ລຕໍ (ສີ. ສ຺ຍາ. ກໍ. ປີ.)], ໂທສເວປຸລ຺ລຕ຺ຕໍ, ໂມຫເວປຸລ຺ລຕ຺ຕໍ, ຄມ຺ຠີເຣສຸ ໂຂ ປນສ຺ສ ຐານາຐາເນສຸ ປຎ຺ຎາຈກ຺ຂຸ ນ ກມຕິ. ໂຍ ຫິ ໂກຈິ, ອາວຸໂສ, ຠິກ຺ຂຸ ວາ ຠິກ຺ຂຸນີ ວາ ອິເມ ຈຕ຺ຕາໂຣ ຘມ຺ເມ ອຕ຺ຕນິ ສມນຸປສ຺ສຕິ, ນິຏ຺ຐເມຕ຺ຖ ຄນ຺ຕພ຺ພໍ – ‘ປຣິຫາຍາມິ ກຸສເລຫິ ຘມ຺ເມຫິ’. ປຣິຫານເມຕໍ ວຸຕ຺ຕໍ ຠຄວຕາ.

‘‘ໂຍ ຫິ ໂກຈິ, ອາວຸໂສ, ຠິກ຺ຂຸ ວາ ຠິກ຺ຂຸນີ ວາ ຈຕ຺ຕາໂຣ ຘມ຺ເມ ອຕ຺ຕນິ ສມນຸປສ຺ສຕິ, ນິຏ຺ຐເມຕ຺ຖ ຄນ຺ຕພ຺ພໍ – ‘ນ ປຣິຫາຍາມິ ກຸສເລຫິ ຘມ຺ເມຫິ’. ອປຣິຫານເມຕໍ ວຸຕ຺ຕໍ ຠຄວຕາ. ກຕເມ ຈຕ຺ຕາໂຣ? ຣາຄຕນຸຕ຺ຕໍ [ຣາຄຕນຸຕ຺ຕນໍ (ກ.)], ໂທສຕນຸຕ຺ຕໍ, ໂມຫຕນຸຕ຺ຕໍ, ຄມ຺ຠີເຣສຸ ໂຂ ປນສ຺ສ ຐານາຐາເນສຸ ປຎ຺ຎາຈກ຺ຂຸ ກມຕິ. ໂຍ ຫິ ໂກຈິ, ອາວຸໂສ, ຠິກ຺ຂຸ ວາ ຠິກ຺ຂຸນີ ວາ ອິເມ ຈຕ຺ຕາໂຣ ຘມ຺ເມ ອຕ຺ຕນິ ສມນຸປສ຺ສຕິ, ນິຏ຺ຐເມຕ຺ຖ ຄນ຺ຕພ຺ພໍ – ‘ນ ປຣິຫາຍາມິ ກຸສເລຫິ ຘມ຺ເມຫິ’. ອປຣິຫານເມຕໍ ວຸຕ຺ຕໍ ຠຄວຕາ’’ຕິ. ອຏ຺ຐມໍ.