໗. ໂຣຄສຸຕ຺ຕໍ

໑໕໗. ‘‘ທ຺ເວເມ, ຠິກ຺ຂເວ, ໂຣຄາ. ກຕເມ ທ຺ເວ? ກາຍິໂກ ຈ ໂຣໂຄ ເຈຕສິໂກ ຈ ໂຣໂຄ. ທິສ຺ສນ຺ຕິ, ຠິກ຺ຂເວ, ສຕ຺ຕາ ກາຍິເກນ ໂຣເຄນ ເອກມ຺ປິ ວສ຺ສໍ ອາໂຣຄ຺ຍໍ ປຏິຊານມານາ, ທ຺ເວປິ ວສ຺ສານິ ອາໂຣຄ຺ຍໍ ປຏິຊານມານາ, ຕີຓິປິ ວສ຺ສານິ ອາໂຣຄ຺ຍໍ ປຏິຊານມານາ, ຈຕ຺ຕາຣິປິ ວສ຺ສານິ ອາໂຣຄ຺ຍໍ ປຏິຊານມານາ, ປຎ຺ຈປິ ວສ຺ສານິ ອາໂຣຄ຺ຍໍ ປຏິຊານມານາ, ທສປິ ວສ຺ສານິ ອາໂຣຄ຺ຍໍ ປຏິຊານມານາ, ວີສຕິປິ ວສ຺ສານິ ອາໂຣຄ຺ຍໍ ປຏິຊານມານາ, ຕິໍສມ຺ປິ ວສ຺ສານິ ອາໂຣຄ຺ຍໍ ປຏິຊານມານາ, ຈຕ຺ຕາຣີສມ຺ປິ ວສ຺ສານິ ອາໂຣຄ຺ຍໍ ປຏິຊານມານາ, ປຎ຺ຎາສມ຺ປິ ວສ຺ສານິ ອາໂຣຄ຺ຍໍ ປຏິຊານມານາ, ວສ຺ສສຕມ຺ປິ, ຠິຍ຺ໂຍປິ ອາໂຣຄ຺ຍໍ ປຏິຊານມານາ. ເຕ, ຠິກ຺ຂເວ, ສຕ຺ຕາ ສຸທຸລ຺ລຠາ [ທຸລ຺ລຠາ (ສີ. ສ຺ຍາ. ກໍ. ປີ.)] ໂລກສ຺ມິໍ ເຍ ເຈຕສິເກນ ໂຣເຄນ ມຸຫຸຕ຺ຕມ຺ປິ ອາໂຣຄ຺ຍໍ ປຏິຊານນ຺ຕິ, ອຎ຺ຎຕ຺ຣ ຂີຓາສເວຫິ.

‘‘ຈຕ຺ຕາໂຣເມ, ຠິກ຺ຂເວ, ປພ຺ພຊິຕສ຺ສ ໂຣຄາ. ກຕເມ ຈຕ຺ຕາໂຣ? ອິຘ, ຠິກ຺ຂເວ, ຠິກ຺ຂຸ ມຫິຈ຺ໂຉ ໂຫຕິ ວິຆາຕວາ ອສນ຺ຕຸຏ຺ໂຐ ອິຕຣີຕຣຈີວຣປິຓ຺ຑປາຕເສນາສນຄິລານປ຺ປຈ຺ຈຍເຠສຊ຺ຊປຣິກ຺ຂາເຣນ. ໂສ ມຫິຈ຺ໂຉ ສມາໂນ ວິຆາຕວາ ອສນ຺ຕຸຏ຺ໂຐ ອິຕຣີຕຣຈີວຣປິຓ຺ຑປາຕເສນາສນຄິລານປ຺ປຈ຺ຈຍເຠສຊ຺ຊປຣິກ຺ຂາເຣນ ປາປິກໍ ອິຈ຺ຉໍ ປຓິທຫຕິ ອນວຎ຺ຎປ຺ປຏິລາຠາຍ ລາຠສກ຺ກາຣສິໂລກປ຺ປຏິລາຠາຍ. ໂສ ອຸຏ຺ຐຫຕິ ຆຏຕິ ວາຍມຕິ ອນວຎ຺ຎປ຺ປຏິລາຠາຍ ລາຠສກ຺ກາຣສິໂລກປ຺ປຏິລາຠາຍ. ໂສ ສງ຺ຂາຍ ກຸລານິ ອຸປສງ຺ກມຕິ, ສງ຺ຂາຍ ນິສີທຕິ, ສງ຺ຂາຍ ຘມ຺ມໍ ຠາສຕິ, ສງ຺ຂາຍ ອຸຈ຺ຈາຣປສ຺ສາວໍ ສນ຺ຘາເຣຕິ. ອິເມ ໂຂ, ຠິກ຺ຂເວ, ຈຕ຺ຕາໂຣ ປພ຺ພຊິຕສ຺ສ ໂຣຄາ.

‘‘ຕສ຺ມາຕິຫ, ຠິກ຺ຂເວ, ເອວໍ ສິກ຺ຂິຕພ຺ພໍ – ‘ນ ມຫິຈ຺ຉາ ຠວິສ຺ສາມ ວິຆາຕວນ຺ໂຕ ອສນ຺ຕຸຏ຺ຐາ ອິຕຣີຕຣຈີວຣປິຓ຺ຑປາຕເສນາສນຄິລານປ຺ປຈ຺ຈຍເຠສຊ຺ຊປຣິກ຺ຂາເຣນ, ນ ປາປິກໍ ອິຈ຺ຉໍ ປຓິທຫິສ຺ສາມ ອນວຎ຺ຎປ຺ປຏິລາຠາຍ ລາຠສກ຺ກາຣສິໂລກປ຺ປຏິລາຠາຍ, ນ ອຸຏ຺ຐຫິສ຺ສາມ ນ ຆເຏສ຺ສາມ ນ ວາຍມິສ຺ສາມ ອນວຎ຺ຎປ຺ປຏິລາຠາຍ ລາຠສກ຺ກາຣສິໂລກປ຺ປຏິລາຠາຍ, ຂມາ ຠວິສ຺ສາມ ສີຕສ຺ສ ອຸຓ຺ຫສ຺ສ ຊິຆຈ຺ຉາຍ ປິປາສາຍ ຑໍສມກສວາຕາຕປສຣີສປສມ຺ຜສ຺ສານໍ ທຸຣຸຕ຺ຕານໍ ທຸຣາຄຕານໍ ວຈນປຖານໍ, ອຸປ຺ປນ຺ນານໍ ສາຣີຣິການໍ ເວທນານໍ ທຸກ຺ຂານໍ ຕິພ຺ພານໍ ຂຣານໍ ກຏຸການໍ ອສາຕານໍ ອມນາປານໍ ປາຓຫຣານໍ ອຘິວາສກຊາຕິກາ ຠວິສ຺ສາມາ’ຕິ. ເອວຎ຺ຫິ ໂວ, ຠິກ຺ຂເວ, ສິກ຺ຂິຕພ຺ພ’’ນ຺ຕິ. ສຕ຺ຕມໍ.