໘. ທກ຺ຂິຓສຸຕ຺ຕໍ

໗໘. ‘‘ຈຕສ຺ໂສ ອິມາ, ຠິກ຺ຂເວ, ທກ຺ຂິຓາ ວິສຸທ຺ຘິໂຍ. ກຕມາ ຈຕສ຺ໂສ? ອຕ຺ຖິ, ຠິກ຺ຂເວ, ທກ຺ຂິຓາ ທາຍກໂຕ ວິສຸຊ຺ຌຕິ, ໂນ ປຏິຄ຺ຄາຫກໂຕ; ອຕ຺ຖິ, ຠິກ຺ຂເວ, ທກ຺ຂິຓາ ປຏິຄ຺ຄາຫກໂຕ ວິສຸຊ຺ຌຕິ, ໂນ ທາຍກໂຕ; ອຕ຺ຖິ, ຠິກ຺ຂເວ, ທກ຺ຂິຓາ ເນວ ທາຍກໂຕ ວິສຸຊ຺ຌຕິ, ໂນ ປຏິຄ຺ຄາຫກໂຕ; ອຕ຺ຖິ, ຠິກ຺ຂເວ, ທກ຺ຂິຓາ ທາຍກໂຕ ເຈວ ວິສຸຊ຺ຌຕິ ປຏິຄ຺ຄາຫກໂຕ ຈ.

‘‘ກຖຎ຺ຈ, ຠິກ຺ຂເວ, ທກ຺ຂິຓາ ທາຍກໂຕ ວິສຸຊ຺ຌຕິ, ໂນ ປຏິຄ຺ຄາຫກໂຕ? ອິຘ, ຠິກ຺ຂເວ, ທາຍໂກ ໂຫຕິ ສີລວາ ກລ຺ຍາຓຘມ຺ໂມ; ປຏິຄ຺ຄາຫກາ ໂຫນ຺ຕິ ທຸສ຺ສີລາ ປາປຘມ຺ມາ [ປຏິຄ຺ຄາຫໂກ ໂຫຕິ ທຸສ຺ສີໂລ ປາປຘມ຺ໂມ (ສ຺ຍາ. ກໍ. ກ.) ມ. ນິ. ໓.໓໘໑ ໂອໂລເກຕພ຺ພໍ]. ເອວໍ ໂຂ, ຠິກ຺ຂເວ, ທກ຺ຂິຓາ ທາຍກໂຕ ວິສຸຊ຺ຌຕິ, ໂນ ປຏິຄ຺ຄາຫກໂຕ.

‘‘ກຖຎ຺ຈ, ຠິກ຺ຂເວ, ທກ຺ຂິຓາ ປຏິຄ຺ຄາຫກໂຕ ວິສຸຊ຺ຌຕິ, ໂນ ທາຍກໂຕ? ອິຘ, ຠິກ຺ຂເວ, ທາຍໂກ ໂຫຕິ ທຸສ຺ສີໂລ ປາປຘມ຺ໂມ; ປຏິຄ຺ຄາຫກາ ໂຫນ຺ຕິ ສີລວນ຺ໂຕ ກລ຺ຍາຓຘມ຺ມາ. ເອວໍ ໂຂ, ຠິກ຺ຂເວ, ທກ຺ຂິຓາ ປຏິຄ຺ຄາຫກໂຕ ວິສຸຊ຺ຌຕິ, ໂນ ທາຍກໂຕ.

‘‘ກຖຎ຺ຈ, ຠິກ຺ຂເວ, ທກ຺ຂິຓາ ເນວ ທາຍກໂຕ ວິສຸຊ຺ຌຕິ, ໂນ ປຏິຄ຺ຄາຫກໂຕ? ອິຘ, ຠິກ຺ຂເວ, ທາຍໂກ ໂຫຕິ ທຸສ຺ສີໂລ ປາປຘມ຺ໂມ; ປຏິຄ຺ຄາຫກາປິ ໂຫນ຺ຕິ ທຸສ຺ສີລາ ປາປຘມ຺ມາ. ເອວໍ ໂຂ, ຠິກ຺ຂເວ, ທກ຺ຂິຓາ ເນວ ທາຍກໂຕ ວິສຸຊ຺ຌຕິ, ໂນ ປຏິຄ຺ຄາຫກໂຕ.

‘‘ກຖຎ຺ຈ, ຠິກ຺ຂເວ, ທກ຺ຂິຓາ ທາຍກໂຕ ເຈວ ວິສຸຊ຺ຌຕິ ປຏິຄ຺ຄາຫກໂຕ ຈ? ອິຘ, ຠິກ຺ຂເວ, ທາຍໂກ ໂຫຕິ ສີລວາ ກລ຺ຍາຓຘມ຺ໂມ; ປຏິຄ຺ຄາຫກາປິ ໂຫນ຺ຕິ ສີລວນ຺ໂຕ ກລ຺ຍາຓຘມ຺ມາ. ເອວໍ ໂຂ, ຠິກ຺ຂເວ, ທກ຺ຂິຓາ ທາຍກໂຕ ເຈວ ວິສຸຊ຺ຌຕິ ປຏິຄ຺ຄາຫກໂຕ ຈ. ອິມາ ໂຂ, ຠິກ຺ຂເວ, ຈຕສ຺ໂສ ທກ຺ຂິຓາ ວິສຸທ຺ຘິໂຍ’’ຕິ. ອຏ຺ຐມໍ.