໙. ວຓິຊ຺ຊສຸຕ຺ຕໍ

໗໙. ອຖ ໂຂ ອາຍສ຺ມາ ສາຣິປຸຕ຺ໂຕ ເຍນ ຠຄວາ ເຕນຸປສງ຺ກມິ; ອຸປສງ຺ກມິຕ຺ວາ ຠຄວນ຺ຕໍ ອຠິວາເທຕ຺ວາ ເອກມນ຺ຕໍ ນິສີທິ. ເອກມນ຺ຕໍ ນິສິນ຺ໂນ ໂຂ ອາຍສ຺ມາ ສາຣິປຸຕ຺ໂຕ ຠຄວນ຺ຕໍ ເອຕທໂວຈ – ‘‘ໂກ ນຸ ໂຂ, ຠນ຺ເຕ, ເຫຕຸ ໂກ ປຈ຺ຈໂຍ, ເຍນ ມິເຘກຈ຺ຈສ຺ສ ຕາທິສາວ ວຓິຊ຺ຊາ ປຍຸຕ຺ຕາ ເຉທຄາມິນີ ໂຫຕິ? ໂກ ປນ, ຠນ຺ເຕ, ເຫຕຸ ໂກ ປຈ຺ຈໂຍ, ເຍນ ມິເຘກຈ຺ຈສ຺ສ ຕາທິສາວ ວຓິຊ຺ຊາ ປຍຸຕ຺ຕາ ນ ຍຖາຘິປ຺ປາຍາ [ຍຖາຘິປ຺ປາຍໍ (ສີ.)] ໂຫຕິ? ໂກ ນຸ ໂຂ, ຠນ຺ເຕ ເຫຕຸ ໂກ ປຈ຺ຈໂຍ, ເຍນ ມິເຘກຈ຺ຈສ຺ສ ຕາທິສາວ ວຓິຊ຺ຊາ ປຍຸຕ຺ຕາ ຍຖາຘິປ຺ປາຍາ [ຍຖາຘິປ຺ປາຍໍ (ສີ.)] ໂຫຕິ? ໂກ ປນ, ຠນ຺ເຕ, ເຫຕຸ ໂກ ປຈ຺ຈໂຍ, ເຍນ ມິເຘກຈ຺ຈສ຺ສ ຕາທິສາວ ວຓິຊ຺ຊາ ປຍຸຕ຺ຕາ ປຣາຘິປ຺ປາຍາ ໂຫຕີ’’ຕິ?

‘‘ອິຘ, ສາຣິປຸຕ຺ຕ, ເອກຈ຺ໂຈ ສມຓໍ ວາ ພ຺ຣາຫ຺ມຓໍ ວາ ອຸປສງ຺ກມິຕ຺ວາ ປວາເຣຕິ – ‘ວທຕຸ, ຠນ຺ເຕ, ປຈ຺ຈເຍນາ’ຕິ. ໂສ ເຍນ ປວາເຣຕິ ຕໍ ນ ເທຕິ. ໂສ ເຈ ຕໂຕ ຈຸໂຕ ອິຕ຺ຖຕ຺ຕໍ ອາຄຈ຺ຉຕິ, ໂສ ຍຎ຺ຎເທວ ວຓິຊ຺ຊໍ ປໂຍເຊຕິ, ສາສ຺ສ ໂຫຕິ ເຉທຄາມິນີ.

‘‘ອິຘ ປນ, ສາຣິປຸຕ຺ຕ, ເອກຈ຺ໂຈ ສມຓໍ ວາ ພ຺ຣາຫ຺ມຓໍ ວາ ອຸປສງ຺ກມິຕ຺ວາ ປວາເຣຕິ – ‘ວທຕຸ, ຠນ຺ເຕ, ປຈ຺ຈເຍນາ’ຕິ. ໂສ ເຍນ ປວາເຣຕິ ຕໍ ນ ຍຖາຘິປ຺ປາຍໍ ເທຕິ. ໂສ ເຈ ຕໂຕ ຈຸໂຕ ອິຕ຺ຖຕ຺ຕໍ ອາຄຈ຺ຉຕິ, ໂສ ຍຎ຺ຎເທວ ວຓິຊ຺ຊໍ ປໂຍເຊຕິ, ສາສ຺ສ ນ ໂຫຕິ ຍຖາຘິປ຺ປາຍາ [ຍຖາຘິປ຺ປາຍໍ (ສີ. ກ.)].

‘‘ອິຘ ປນ, ສາຣິປຸຕ຺ຕ, ເອກຈ຺ໂຈ ສມຓໍ ວາ ພ຺ຣາຫ຺ມຓໍ ວາ ອຸປສງ຺ກມິຕ຺ວາ ປວາເຣຕິ – ‘ວທຕຸ, ຠນ຺ເຕ, ປຈ຺ຈເຍນາ’ຕິ. ໂສ ເຍນ ປວາເຣຕິ ຕໍ ຍຖາຘິປ຺ປາຍໍ ເທຕິ. ໂສ ເຈ ຕໂຕ ຈຸໂຕ ອິຕ຺ຖຕ຺ຕໍ ອາຄຈ຺ຉຕິ, ໂສ ຍຎ຺ຎເທວ ວຓິຊ຺ຊໍ ປໂຍເຊຕິ, ສາສ຺ສ ໂຫຕິ ຍຖາຘິປ຺ປາຍາ [ຍຖາຘິປ຺ປາຍໍ (ສີ. ກ.)].

‘‘ອິຘ, ສາຣິປຸຕ຺ຕ, ເອກຈ຺ໂຈ ສມຓໍ ວາ ພ຺ຣາຫ຺ມຓໍ ວາ ອຸປສງ຺ກມິຕ຺ວາ ປວາເຣຕິ – ‘ວທຕຸ, ຠນ຺ເຕ, ປຈ຺ຈເຍນາ’ຕິ. ໂສ ເຍນ ປວາເຣຕິ ຕໍ ປຣາຘິປ຺ປາຍໍ ເທຕິ. ໂສ ເຈ ຕໂຕ ຈຸໂຕ ອິຕ຺ຖຕ຺ຕໍ ອາຄຈ຺ຉຕິ, ໂສ ຍຎ຺ຎເທວ ວຓິຊ຺ຊໍ ປໂຍເຊຕິ, ສາສ຺ສ ໂຫຕິ ປຣາຘິປ຺ປາຍາ [ປຣາຘິປ຺ປາຍໍ (ກ.)].

‘‘ອຍໍ ໂຂ, ສາຣິປຸຕ຺ຕ, ເຫຕຸ ອຍໍ ປຈ຺ຈໂຍ, ເຍນ ມິເຘກຈ຺ຈສ຺ສ ຕາທິສາວ ວຓິຊ຺ຊາ ປຍຸຕ຺ຕາ ເຉທຄາມິນີ ໂຫຕິ. ອຍໍ ປນ, ສາຣິປຸຕ຺ຕ, ເຫຕຸ ອຍໍ ປຈ຺ຈໂຍ, ເຍນ ມິເຘກຈ຺ຈສ຺ສ ຕາທິສາວ ວຓິຊ຺ຊາ ປຍຸຕ຺ຕາ ນ ຍຖາຘິປ຺ປາຍາ ໂຫຕິ. ອຍໍ ໂຂ ປນ, ສາຣິປຸຕ຺ຕ, ເຫຕຸ ອຍໍ ປຈ຺ຈໂຍ, ເຍນ ມິເຘກຈ຺ຈສ຺ສ ຕາທິສາວ ວຓິຊ຺ຊາ ປຍຸຕ຺ຕາ ຍຖາຘິປ຺ປາຍາ ໂຫຕິ. ອຍໍ ປນ, ສາຣິປຸຕ຺ຕ, ເຫຕຸ ອຍໍ ປຈ຺ຈໂຍ, ເຍນ ມິເຘກຈ຺ຈສ຺ສ ຕາທິສາວ ວຓິຊ຺ຊາ ປຍຸຕ຺ຕາ ປຣາຘິປ຺ປາຍາ ໂຫຕີ’’ຕິ. ນວມໍ.