໕. ຫຕ຺ຖກສຸຕ຺ຕໍ

໑໒໘. ເອກໍ ສມຍໍ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ອຖ ໂຂ ຫຕ຺ຖໂກ ເທວປຸຕ຺ໂຕ ອຠິກ຺ກນ຺ຕາຍ ຣຕ຺ຕິຍາ ອຠິກ຺ກນ຺ຕວຓ຺ໂຓ ເກວລກປ຺ປໍ ເຊຕວນໍ ໂອຠາເສຕ຺ວາ ເຍນ ຠຄວາ ເຕນຸປສງ຺ກມິ; ອຸປສງ຺ກມິຕ຺ວາ – ‘‘ຠຄວໂຕ ປຸຣໂຕ ຐສ຺ສາມີ’’ຕິ ໂອສີທຕິເມວ ສໍສີທຕິເມວ [ໂອສີທຕິ ເຈວ ສໍສີທຕິ ຈ (ສີ. ປີ.), ໂອສີທຕິ ສໍສີທຕິ (ສ຺ຍາ. ກໍ.)], ນ ສກ຺ໂກຕິ ສຓ຺ຐາຕຸໍ. ເສຍ຺ຍຖາປິ ນາມ ສປ຺ປິ ວາ ເຕລໍ ວາ ວາລຸກາຍ ອາສິຕ຺ຕໍ ໂອສີທຕິເມວ ສໍສີທຕິເມວ, ນ ສຓ຺ຐາຕິ; ເອວເມວໍ ຫຕ຺ຖໂກ ເທວປຸຕ຺ໂຕ – ‘‘ຠຄວໂຕ ປຸຣໂຕ ຐສ຺ສາມີ’’ຕິ ໂອສີທຕິເມວ ສໍສີທຕິເມວ, ນ ສກ຺ໂກຕິ ສຓ຺ຐາຕຸໍ.

ອຖ ໂຂ ຠຄວາ ຫຕ຺ຖກໍ ເທວປຸຕ຺ຕໍ ເອຕທໂວຈ – ‘‘ໂອຬາຣິກໍ, ຫຕ຺ຖກ, ອຕ຺ຕຠາວໍ ອຠິນິມ຺ມິນາຫີ’’ຕິ. ‘‘ເອວໍ, ຠນ຺ເຕ’’ຕິ, ໂຂ ຫຕ຺ຖໂກ ເທວປຸຕ຺ໂຕ ຠຄວໂຕ ປຏິສ຺ສຸຕ຺ວາ ໂອຬາຣິກໍ ອຕ຺ຕຠາວໍ ອຠິນິມ຺ມິນິຕ຺ວາ ຠຄວນ຺ຕໍ ອຠິວາເທຕ຺ວາ ເອກມນ຺ຕໍ ອຏ຺ຐາສິ. ເອກມນ຺ຕໍ ຐິຕໍ ໂຂ ຫຕ຺ຖກໍ ເທວປຸຕ຺ຕໍ ຠຄວາ ເອຕທໂວຈ –

‘‘ເຍ ເຕ, ຫຕ຺ຖກ, ຘມ຺ມາ ປຸພ຺ເພ ມນຸສ຺ສຠູຕສ຺ສ ປວຕ຺ຕິໂນ ອເຫສຸໍ, ອປິ ນຸ ເຕ ເຕ ຘມ຺ມາ ເອຕຣຫິ ປວຕ຺ຕິໂນ’’ຕິ? ‘‘ເຍ ຈ ເມ, ຠນ຺ເຕ, ຘມ຺ມາ ປຸພ຺ເພ ມນຸສ຺ສຠູຕສ຺ສ ປວຕ຺ຕິໂນ ອເຫສຸໍ, ເຕ ຈ ເມ ຘມ຺ມາ ເອຕຣຫິ ປວຕ຺ຕິໂນ; ເຍ ຈ ເມ, ຠນ຺ເຕ, ຘມ຺ມາ ປຸພ຺ເພ ມນຸສ຺ສຠູຕສ຺ສ ນປ຺ປວຕ຺ຕິໂນ ອເຫສຸໍ, ເຕ ຈ ເມ ຘມ຺ມາ ເອຕຣຫິ ປວຕ຺ຕິໂນ. ເສຍ຺ຍຖາປິ, ຠນ຺ເຕ, ຠຄວາ ເອຕຣຫິ ອາກິຓ຺ໂຓ ວິຫຣຕິ ຠິກ຺ຂູຫິ ຠິກ຺ຂຸນີຫິ ອຸປາສເກຫິ ອຸປາສິກາຫິ ຣາຊູຫິ ຣາຊມຫາມຕ຺ເຕຫິ ຕິຕ຺ຖິເຍຫິ ຕິຕ຺ຖິຍສາວເກຫິ; ເອວເມວໍ ໂຂ ອຫໍ, ຠນ຺ເຕ, ອາກິຓ຺ໂຓ ວິຫຣາມິ ເທວປຸຕ຺ເຕຫິ. ທູຣໂຕປິ, ຠນ຺ເຕ, ເທວປຸຕ຺ຕາ ອາຄຈ຺ຉນ຺ຕິ ຫຕ຺ຖກສ຺ສ ເທວປຸຕ຺ຕສ຺ສ ສນ຺ຕິເກ ‘ຘມ຺ມໍ ໂສສ຺ສາມາ’ຕິ. ຕິຓ຺ຓາຫໍ, ຠນ຺ເຕ, ຘມ຺ມານໍ ອຕິຕ຺ໂຕ ອປ຺ປຏິວາໂນ ກາລງ຺ກໂຕ. ກຕເມສໍ ຕິຓ຺ຓໍ? ຠຄວໂຕ ອຫໍ, ຠນ຺ເຕ, ທສ຺ສນສ຺ສ ອຕິຕ຺ໂຕ ອປ຺ປຏິວາໂນ ກາລງ຺ກໂຕ; ສທ຺ຘມ຺ມສວນສ຺ສາຫໍ, ຠນ຺ເຕ, ອຕິຕ຺ໂຕ ອປ຺ປຏິວາໂນ ກາລງ຺ກໂຕ; ສງ຺ຆສ຺ສາຫໍ, ຠນ຺ເຕ, ອຸປຏ຺ຐານສ຺ສ ອຕິຕ຺ໂຕ ອປ຺ປຏິວາໂນ ກາລງ຺ກໂຕ. ອິເມສໍ ໂຂ ອຫໍ, ຠນ຺ເຕ, ຕິຓ຺ຓໍ ຘມ຺ມານໍ ອຕິຕ຺ໂຕ ອປ຺ປຏິວາໂນ ກາລງ຺ກໂຕ’’ຕິ.

‘‘ນາຫໍ ຠຄວໂຕ ທສ຺ສນສ຺ສ, ຕິຕ຺ຕິມຊ຺ຌຄາ [ຕິຕ຺ຕິ ຕິຕ຺ຕິສມ຺ຠວໍ (ກ.)] ກຸທາຈນໍ;

ສງ຺ຆສ຺ສ ອຸປຏ຺ຐານສ຺ສ, ສທ຺ຘມ຺ມສວນສ຺ສ ຈ.

‘‘ອຘິສີລໍ ສິກ຺ຂມາໂນ, ສທ຺ຘມ຺ມສວເນ ຣໂຕ;

ຕິຓ຺ຓໍ ຘມ຺ມານໍ ອຕິຕ຺ໂຕ, ຫຕ຺ຖໂກ ອວິຫໍ ຄໂຕ’’ຕິ. ປຎ຺ຈມໍ;