೫. ನಿಸೀದನಸನ್ಥತಸಿಕ್ಖಾಪದವಣ್ಣನಾ

೫೬೫-೬. ನಿಸೀದನಸನ್ಥತಸಿಕ್ಖಾಪದೇ ಪನ ಪಞ್ಞಾಯಿಸ್ಸತೀತಿ ಸಚೇ ಸಾ ಕತಿಕಾ ಮನಾಪಾ ಭವಿಸ್ಸತಿ, ಮನಾಪತಾಯ ಭಿಕ್ಖುಸಙ್ಘೋ ಸನ್ದಿಸ್ಸಿಸ್ಸತಿ. ಸಚೇ ಅಮನಾಪಾ, ಅಮನಾಪತಾಯ ಸನ್ದಿಸ್ಸಿಸ್ಸತೀತಿ ಅಧಿಪ್ಪಾಯೋ, ಆರಞ್ಞಕಙ್ಗಾದೀನಿ ತೀಣಿ ಪಾಳಿಯಂ ಪಧಾನಙ್ಗವಸೇನ ವುತ್ತಾನಿ, ಸೇಸಾನಿಪಿ ತೇ ಸಮಾದಿಯಿಂಸುಯೇವಾತಿ ವೇದಿತಬ್ಬಂ. ತೇನೇವಾಹ ‘‘ಸನ್ಥತೇ ಚತುತ್ಥಚೀವರಸಞ್ಞಿತಾಯಾ’’ತಿ. ಉಜ್ಝಿತ್ವಾತಿ ವಿಸ್ಸಜ್ಜೇತ್ವಾ.

೫೬೭. ನಿಸೀದನಸನ್ಥತತ್ತಾ ನಿವಾಸನಪಾರುಪನಕಿಚ್ಚಂ ನತ್ಥೀತಿ ಆಹ ‘‘ಸಕಿಂ ನಿಸಿನ್ನಞ್ಚೇವ ನಿಪನ್ನಞ್ಚಾ’’ತಿ. ವಿದತ್ಥಿಮತ್ತನ್ತಿ ಸುಗತವಿದತ್ಥಿಂ ಸನ್ಧಾಯ ವದತಿ. ಇದಞ್ಚ ಹೇಟ್ಠಿಮಪರಿಚ್ಛೇದದಸ್ಸನತ್ಥಂ ವುತ್ತಂ. ‘‘ವಿತಾನಾದೀನಂಯೇವ ಅತ್ಥಾಯ ಕರಣೇ ಅನಾಪತ್ತಿವಚನತೋ ಸಚೇ ನಿಪಜ್ಜನತ್ಥಾಯ ಕರೋನ್ತಿ, ಆಪತ್ತಿಯೇವಾ’’ತಿ ತೀಸುಪಿ ಗಣ್ಠಿಪದೇಸು ವುತ್ತಂ. ಅಕಪ್ಪಿಯತ್ತಾ ಪನ ‘‘ಪರಿಭುಞ್ಜಿತುಂ ನ ವಟ್ಟತೀ’’ತಿ ವುತ್ತಂ. ಇದಞ್ಚ ನಿಸೀದನಸನ್ಥತಂ ನಾಮ ನಿಸೀದನಚೀವರಮೇವ, ನಾಞ್ಞನ್ತಿ ವದನ್ತಿ. ನಿಸೀದನಸಿಕ್ಖಾಪದೇಪಿ ನಿಸೀದನಂ ನಾಮ ಸದಸಂ ವುಚ್ಚತೀತಿ ಚ ಅಟ್ಠಕಥಾಯಞ್ಚಸ್ಸ ‘‘ಸನ್ಥತಸದಿಸಂ ಸನ್ಥರಿತ್ವಾ ಏಕಸ್ಮಿಂ ಅನ್ತೇ ಸುಗತವಿದತ್ಥಿಯಾ ವಿದತ್ಥಿಮತ್ತೇ ಪದೇಸೇ ದ್ವೀಸು ಠಾನೇಸು ಫಾಲೇತ್ವಾ ತಿಸ್ಸೋ ದಸಾ ಕರೀಯನ್ತಿ, ತಾಹಿ ದಸಾಹಿ ಸದಸಂ ನಾಮ ವುಚ್ಚತೀ’’ತಿ (ಪಾಚಿ. ಅಟ್ಠ. ೫೩೧) ವಚನತೋ ಇಧಾಪಿ ‘‘ನಿಸೀದನಂ ನಾಮ ಸದಸಂ ವುಚ್ಚತೀ’’ತಿ ಚ ‘‘ಸನ್ಥತೇ ಚತುತ್ಥಚೀವರಸಞ್ಞಿತಾಯಾ’’ತಿ ಚ ವಚನತೋ ತಂ ಯುತ್ತಂ ವಿಯ ದಿಸ್ಸತಿ. ಕೇಚಿ ಪನ ‘‘ನಿಸೀದನಸನ್ಥತಂ ಏಳಕಲೋಮಾನಿ ಸನ್ಥರಿತ್ವಾ ಸನ್ಥತಂ ವಿಯ ಕರೋನ್ತಿ, ತಂ ಅವಾಯಿಮಂ ಅನಧಿಟ್ಠಾನುಪಗಂ, ನಿಸೀದನಚೀವರಂ ಪನ ಛನ್ನಂ ಚೀವರಾನಂ ಅಞ್ಞತರೇನ ಕರೋತಿ ಅಧಿಟ್ಠಾನುಪಗಂ, ತಂ ಕರೋನ್ತಾ ಚ ನನ್ತಕಾನಿ ಸನ್ಥರಿತ್ವಾ ಸನ್ಥತಸದಿಸಂ ಕರೋನ್ತೀ’’ತಿ ವದನ್ತಿ, ವೀಮಂಸಿತ್ವಾ ಯುತ್ತತರಂ ಗಹೇತಬ್ಬಂ.

ನಿಸೀದನಸನ್ಥತಸಿಕ್ಖಾಪದವಣ್ಣನಾ ನಿಟ್ಠಿತಾ.