೨. ಕೋಸಿಯವಗ್ಗೋ

೧. ಕೋಸಿಯಸಿಕ್ಖಾಪದವಣ್ಣನಾ

೫೪೨. ಪಾಳಿಯಂ ‘‘ಕೋಸಿಯಕಾರಕೇ’’ತಿ ಏತ್ಥ ಕೋಸಂ ಕರೋನ್ತೀತಿ ಕೋಸಕಾರಕಾತಿ ಲದ್ಧವೋಹಾರಾನಂ ಪಾಣಕಾನಂ ಕೋಸತೋ ನಿಬ್ಬತ್ತಂ ಕೋಸಿಯಂ, ತಂ ಕರೋನ್ತೀತಿ ಕೋಸಿಯಕಾರಕಾ, ತನ್ತವಾಯಾ. ಸಂಹನನಂ ಸಙ್ಘಾತೋ, ವಿನಾಸೋತಿ ಅತ್ಥೋ. ಕೋಸಿಯಮಿಸ್ಸಕನ್ತಿ ಕೋಸಿಯತನ್ತುನಾ ಮಿಸ್ಸಂ. ‘‘ಅವಾಯಿಮ’’ನ್ತಿ ವುತ್ತತ್ತಾ ವಾಯಿತ್ವಾ ಚೇ ಕರೋನ್ತಿ, ಅನಾಪತ್ತಿ. ಅನಾಪತ್ತಿ ವಿತಾನಂ ವಾತಿಆದಿನಾ ವಿತಾನಾದೀನಂ ಅತ್ಥಾಯ ಕರಣೇಪಿ ತೇನಾಕಾರೇನ ಪರಿಭೋಗೇಪಿ ಅನಾಪತ್ತಿ ವುತ್ತಾ.

ಏವಮ್ಪಿ ಮಿಸ್ಸೇತ್ವಾ ಕತಮೇವ ಹೋತೀತಿ ಇಮಿನಾ ವಾತೇನ ಆಹರಿತ್ವಾ ಪಾತಿತೇಪಿ ಅಚಿತ್ತಕತ್ತಾ ಆಪತ್ತಿಯೇವಾತಿ ದಸ್ಸೇತಿ. ಕೋಸಿಯಮಿಸ್ಸಕತಾ, ಅತ್ತನೋ ಅತ್ಥಾಯ ಸನ್ಥತಸ್ಸ ಕರಣಂ ಕಾರಾಪನಂ, ಪಟಿಲಾಭೋ ಚಾತಿ ಇಮಾನೇತ್ಥ ತೀಣಿ ಅಙ್ಗಾನಿ.

ಕೋಸಿಯಸಿಕ್ಖಾಪದವಣ್ಣನಾ ನಿಟ್ಠಿತಾ.

೫೪೭. ಸುದ್ಧಕಾಳಕಸಿಕ್ಖಾಪದಂ ಉತ್ತಾನತ್ಥಮೇವ.

೩. ದ್ವೇಭಾಗಸಿಕ್ಖಾಪದವಣ್ಣನಾ

೫೫೨. ದ್ವೇಭಾಗಸಿಕ್ಖಾಪದೇ ಪನ ದ್ವೇ ಭಾಗಾತಿ ಉಕ್ಕಟ್ಠಪರಿಚ್ಛೇದೋ ಕಾಳಕಾನಂ ಅಧಿಕಗ್ಗಹಣಸ್ಸ ಪಟಿಕ್ಖೇಪವಸೇನ ಸಿಕ್ಖಾಪದಸ್ಸ ಪಞ್ಞತ್ತತ್ತಾ. ತತಿಯಂ ಓದಾತಾನಂ ಚತುತ್ಥಂ ಗೋಚರಿಯಾನನ್ತಿ ಅಯಂ ಹೇಟ್ಠಿಮಪರಿಚ್ಛೇದೋ ತೇಸಂ ಅಧಿಕಗ್ಗಹಣೇ ಪಟಿಕ್ಖೇಪಾಭಾವತೋ, ತಸ್ಮಾ ಕಾಳಕಾನಂ ಭಾಗದ್ವಯತೋ ಅಧಿಕಂ ನ ವಟ್ಟತಿ, ಸೇಸಾನಂ ಪನ ವುತ್ತಪ್ಪಮಾಣತೋ ಅಧಿಕಮ್ಪಿ ವಟ್ಟತಿ. ‘‘ಕಾಳಕಾನಂಯೇವ ಚ ಅಧಿಕಗ್ಗಹಣಸ್ಸ ಪಟಿಕ್ಖಿತ್ತತ್ತಾ ಕಾಳಕಾನಂ ಉಪಡ್ಢಂ ಓದಾತಾನಂ ವಾ ಗೋಚರಿಯಾನಂ ವಾ ಉಪಡ್ಢಂ ಗಹೇತ್ವಾಪಿ ಕಾತುಂ ವಟ್ಟತೀ’’ತಿ ವದನ್ತಿ, ‘‘ಅನಾಪತ್ತಿ ಬಹುತರಂ ಓದಾತಾನಂ ಬಹುತರಂ ಗೋಚರಿಯಾನಂ ಆದಿಯಿತ್ವಾ ಕರೋತಿ, ಸುದ್ಧಂ ಓದಾತಾನಂ ಸುದ್ಧಂ ಗೋಚರಿಯಾನಂ ಆದಿಯಿತ್ವಾ ಕರೋತೀ’’ತಿ ಇಮಿನಾ ತಂ ಸಮೇತಿ. ‘‘ಕಾಳಕೇ ಓದಾತೇ ಚ ಠಪೇತ್ವಾ ಸೇಸಾ ಗೋಚರಿಯೇಸುಯೇವ ಸಙ್ಗಹಂ ಗಚ್ಛನ್ತೀ’’ತಿ ವದನ್ತಿ. ದ್ವೇ ಕೋಟ್ಠಾಸಾ ಕಾಳಕಾನನ್ತಿ ಏತ್ಥ ಪನ ‘‘ಏಕಸ್ಸಪಿ ಕಾಳಕಲೋಮಸ್ಸ ಅತಿರೇಕಭಾವೇ ನಿಸ್ಸಗ್ಗಿಯಂ ಹೋತೀ’’ತಿ ಮಾತಿಕಾಟ್ಠಕಥಾಯಂ (ಕಙ್ಖಾ. ಅಟ್ಠ. ದ್ವೇಭಾಗಸಿಕ್ಖಾಪದವಣ್ಣನಾ) ತ್ತಂ, ತಂ ‘‘ಧಾರಯಿತ್ವಾ ದ್ವೇ ತುಲಾ ಆದಾತಬ್ಬಾ’’ತಿ ವಚನತೋ ತುಲಾಧಾರಣಾಯ ನ ಸಮೇತಿ. ನ ಹಿ ಲೋಮೇ ಗಣೇತ್ವಾ ತುಲಾಧಾರಣಾ ಕರೀಯತಿ, ಅಥ ಗಣೇತ್ವಾವ ಧಾರಯಿತಬ್ಬಂ ಸಿಯಾ, ಕಿಂ ತುಲಾಧಾರಣಾಯ, ತಸ್ಮಾ ಏವಮೇತ್ಥ ಅಧಿಪ್ಪಾಯೋ ಯುತ್ತೋ ಸಿಯಾ – ಅಚಿತ್ತಕತ್ತಾ ಸಿಕ್ಖಾಪದಸ್ಸ ಪುಬ್ಬೇ ತುಲಾಯ ಧಾರಯಿತ್ವಾ ಠಪಿತೇಸು ಏಕಮ್ಪಿ ಲೋಮಂ ತತ್ಥ ಪತೇಯ್ಯ, ನಿಸ್ಸಗ್ಗಿಯನ್ತಿ. ಅಞ್ಞಥಾ ದುಬ್ಬಿಞ್ಞೇಯ್ಯಭಾವತೋ ದ್ವೇ ತುಲಾ ನಾದಾತಬ್ಬಾ, ಊನಕತರಾವ ಆದಾತಬ್ಬಾ ಸಿಯುಂ.

ದ್ವೇಭಾಗಸಿಕ್ಖಾಪದವಣ್ಣನಾ ನಿಟ್ಠಿತಾ.

೪. ಛಬ್ಬಸ್ಸಸಿಕ್ಖಾಪದವಣ್ಣನಾ

೫೫೭. ಛಬ್ಬಸ್ಸಸಿಕ್ಖಾಪದೇ ಪನ ‘‘ಯೇಸಂ ನೋ ಸನ್ಥತೇ ದಾರಕಾ ಉಹದನ್ತಿಪಿ ಉಮ್ಮಿಹನ್ತಿಪಿ, ಯೇಸಂ ನೋ ಸನ್ಥತಾ ಉನ್ದೂರೇಹಿಪಿ ಖಜ್ಜನ್ತೀ’’ತಿ ಏವಂ ಪಾಳಿಪದಾನಂ ಸಮ್ಬನ್ಧೋ ವೇದಿತಬ್ಬೋ. ಹದ ಕರೀಸೋಸ್ಸಗ್ಗೇ, ಮಿಹ ಸೇಚನೇತಿ ಪನಿಮಸ್ಸತ್ಥಂ ಸನ್ಧಾಯಾಹ ‘‘ವಚ್ಚಮ್ಪಿ ಪಸ್ಸಾವಮ್ಪಿ ಕರೋನ್ತೀ’’ತಿ. ಪವಾರಣಾಉಪೋಸಥಪಾಟಿಪದದಿವಸೇಸು ಸನ್ಥತಂ ಕರಿತ್ವಾ ಪುನ ಛಟ್ಠೇ ವಸ್ಸೇ ಪರಿಪುಣ್ಣೇ ಪವಾರಣಾಉಪೋಸಥಪಾಟಿಪದದಿವಸೇಸು ಕರೋನ್ತೋ ‘‘ಛಬ್ಬಸ್ಸಾನಿ ಕರೋತೀ’’ತಿ ವುಚ್ಚತಿ. ದುತಿಯದಿವಸತೋ ಪಟ್ಠಾಯ ಕರೋನ್ತೋ ಪನ ಅತಿರೇಕಛಬ್ಬಸ್ಸಾನಿ ಕರೋತಿ ನಾಮ.

ಛಬ್ಬಸ್ಸಸಿಕ್ಖಾಪದವಣ್ಣನಾ ನಿಟ್ಠಿತಾ.

೫. ನಿಸೀದನಸನ್ಥತಸಿಕ್ಖಾಪದವಣ್ಣನಾ

೫೬೫-೬. ನಿಸೀದನಸನ್ಥತಸಿಕ್ಖಾಪದೇ ಪನ ಪಞ್ಞಾಯಿಸ್ಸತೀತಿ ಸಚೇ ಸಾ ಕತಿಕಾ ಮನಾಪಾ ಭವಿಸ್ಸತಿ, ಮನಾಪತಾಯ ಭಿಕ್ಖುಸಙ್ಘೋ ಸನ್ದಿಸ್ಸಿಸ್ಸತಿ. ಸಚೇ ಅಮನಾಪಾ, ಅಮನಾಪತಾಯ ಸನ್ದಿಸ್ಸಿಸ್ಸತೀತಿ ಅಧಿಪ್ಪಾಯೋ, ಆರಞ್ಞಕಙ್ಗಾದೀನಿ ತೀಣಿ ಪಾಳಿಯಂ ಪಧಾನಙ್ಗವಸೇನ ವುತ್ತಾನಿ, ಸೇಸಾನಿಪಿ ತೇ ಸಮಾದಿಯಿಂಸುಯೇವಾತಿ ವೇದಿತಬ್ಬಂ. ತೇನೇವಾಹ ‘‘ಸನ್ಥತೇ ಚತುತ್ಥಚೀವರಸಞ್ಞಿತಾಯಾ’’ತಿ. ಉಜ್ಝಿತ್ವಾತಿ ವಿಸ್ಸಜ್ಜೇತ್ವಾ.

೫೬೭. ನಿಸೀದನಸನ್ಥತತ್ತಾ ನಿವಾಸನಪಾರುಪನಕಿಚ್ಚಂ ನತ್ಥೀತಿ ಆಹ ‘‘ಸಕಿಂ ನಿಸಿನ್ನಞ್ಚೇವ ನಿಪನ್ನಞ್ಚಾ’’ತಿ. ವಿದತ್ಥಿಮತ್ತನ್ತಿ ಸುಗತವಿದತ್ಥಿಂ ಸನ್ಧಾಯ ವದತಿ. ಇದಞ್ಚ ಹೇಟ್ಠಿಮಪರಿಚ್ಛೇದದಸ್ಸನತ್ಥಂ ವುತ್ತಂ. ‘‘ವಿತಾನಾದೀನಂಯೇವ ಅತ್ಥಾಯ ಕರಣೇ ಅನಾಪತ್ತಿವಚನತೋ ಸಚೇ ನಿಪಜ್ಜನತ್ಥಾಯ ಕರೋನ್ತಿ, ಆಪತ್ತಿಯೇವಾ’’ತಿ ತೀಸುಪಿ ಗಣ್ಠಿಪದೇಸು ವುತ್ತಂ. ಅಕಪ್ಪಿಯತ್ತಾ ಪನ ‘‘ಪರಿಭುಞ್ಜಿತುಂ ನ ವಟ್ಟತೀ’’ತಿ ವುತ್ತಂ. ಇದಞ್ಚ ನಿಸೀದನಸನ್ಥತಂ ನಾಮ ನಿಸೀದನಚೀವರಮೇವ, ನಾಞ್ಞನ್ತಿ ವದನ್ತಿ. ನಿಸೀದನಸಿಕ್ಖಾಪದೇಪಿ ನಿಸೀದನಂ ನಾಮ ಸದಸಂ ವುಚ್ಚತೀತಿ ಚ ಅಟ್ಠಕಥಾಯಞ್ಚಸ್ಸ ‘‘ಸನ್ಥತಸದಿಸಂ ಸನ್ಥರಿತ್ವಾ ಏಕಸ್ಮಿಂ ಅನ್ತೇ ಸುಗತವಿದತ್ಥಿಯಾ ವಿದತ್ಥಿಮತ್ತೇ ಪದೇಸೇ ದ್ವೀಸು ಠಾನೇಸು ಫಾಲೇತ್ವಾ ತಿಸ್ಸೋ ದಸಾ ಕರೀಯನ್ತಿ, ತಾಹಿ ದಸಾಹಿ ಸದಸಂ ನಾಮ ವುಚ್ಚತೀ’’ತಿ (ಪಾಚಿ. ಅಟ್ಠ. ೫೩೧) ವಚನತೋ ಇಧಾಪಿ ‘‘ನಿಸೀದನಂ ನಾಮ ಸದಸಂ ವುಚ್ಚತೀ’’ತಿ ಚ ‘‘ಸನ್ಥತೇ ಚತುತ್ಥಚೀವರಸಞ್ಞಿತಾಯಾ’’ತಿ ಚ ವಚನತೋ ತಂ ಯುತ್ತಂ ವಿಯ ದಿಸ್ಸತಿ. ಕೇಚಿ ಪನ ‘‘ನಿಸೀದನಸನ್ಥತಂ ಏಳಕಲೋಮಾನಿ ಸನ್ಥರಿತ್ವಾ ಸನ್ಥತಂ ವಿಯ ಕರೋನ್ತಿ, ತಂ ಅವಾಯಿಮಂ ಅನಧಿಟ್ಠಾನುಪಗಂ, ನಿಸೀದನಚೀವರಂ ಪನ ಛನ್ನಂ ಚೀವರಾನಂ ಅಞ್ಞತರೇನ ಕರೋತಿ ಅಧಿಟ್ಠಾನುಪಗಂ, ತಂ ಕರೋನ್ತಾ ಚ ನನ್ತಕಾನಿ ಸನ್ಥರಿತ್ವಾ ಸನ್ಥತಸದಿಸಂ ಕರೋನ್ತೀ’’ತಿ ವದನ್ತಿ, ವೀಮಂಸಿತ್ವಾ ಯುತ್ತತರಂ ಗಹೇತಬ್ಬಂ.

ನಿಸೀದನಸನ್ಥತಸಿಕ್ಖಾಪದವಣ್ಣನಾ ನಿಟ್ಠಿತಾ.

೬. ಏಳಕಲೋಮಸಿಕ್ಖಾಪದವಣ್ಣನಾ

೫೭೧. ಏಳಲೋಮಸಿಕ್ಖಾಪದೇ ಪನ ಆಸುಮ್ಭೀತಿ ಏತ್ಥ ‘‘ಅಸುಮ್ಭೀ’’ತಿ ಪಠನ್ತಿ. ಕಿಲನ್ತಾತಿ ಇಮಿನಾ ಕಿಲನ್ತತಾಯ ತೇ ಓನಮಿತ್ವಾ ಪಾತೇತುಂ ನ ಸಕ್ಕೋನ್ತೀತಿ ದಸ್ಸೇತಿ. ಅದ್ಧಾನಮಗ್ಗಪ್ಪಟಿಪನ್ನಸ್ಸಾತಿ ಇದಂ ವತ್ಥುಮತ್ತದೀಪನವಸೇನ ಪಾಳಿಯಂ ವುತ್ತಂ. ಯತ್ಥ ಕತ್ಥಚಿ ಪನ ಧಮ್ಮೇನ ಲಭಿತ್ವಾ ಗಣ್ಹಿತುಂ ವಟ್ಟತಿಯೇವ. ತಿಯೋಜನಪರಮನ್ತಿ ಚ ಗಹಿತಟ್ಠಾನತೋ ತಿಯೋಜನಪ್ಪಮಾಣಂ ದೇಸನ್ತಿ ಏವಮತ್ಥೋ ಗಹೇತಬ್ಬೋ.

೫೭೨. ಸಹತ್ಥಾತಿ ಕರಣತ್ಥೇ ನಿಸ್ಸಕ್ಕವಚನನ್ತಿ ಆಹ ‘‘ಸಹತ್ಥೇನಾ’’ತಿ. ಅಸನ್ತೇ ಹಾರಕೇತಿ ಪಾಳಿಯಂ ಭಿಕ್ಖುನೋ ಅನುರೂಪತಾದಸ್ಸನತ್ಥಂ ವುತ್ತಂ, ನ ಪನ ಹಾರಕೇ ವಿಜ್ಜಮಾನೇ ತಿಯೋಜನಬ್ಭನ್ತರೇ ಸಹತ್ಥಾ ಹರನ್ತಸ್ಸ ಆಪತ್ತಿದಸ್ಸನತ್ಥಂ. ತಿಯೋಜನತೋ ಬಹಿ ಬಹಿತಿಯೋಜನನ್ತಿ ಆಹ ‘‘ತಿಯೋಜನತೋ ಬಹಿ ಪಾತೇತೀ’’ತಿ. ತೇನ ಹರಿತೇಪಿ ಆಪತ್ತಿಯೇವಾತಿ ಸಉಸ್ಸಾಹತ್ತಾ ಅನಾಣತ್ತಿಯಾ ಹಟತ್ತಾ ಚ. ಸತಿಪಿ ಹಿ ಸಉಸ್ಸಾಹಭಾವೇ ಆಣತ್ತಿಯಾ ಚೇ ಹರತಿ, ಅನಾಪತ್ತಿ ‘‘ಅಞ್ಞಂ ಹರಾಪೇತೀ’’ತಿ ವಚನತೋ. ಅಞ್ಞೋ ಹರಿಸ್ಸತೀತಿ ಅಧಿಪ್ಪಾಯಾಭಾವತೋ ‘‘ಸುದ್ಧಚಿತ್ತೇನ ಠಪಿತ’’ನ್ತಿ ವುತ್ತಂ. ಸಉಸ್ಸಾಹತ್ತಾತಿ ತಿಯೋಜನಾತಿಕ್ಕಮನೇ ಸಉಸ್ಸಾಹತ್ತಾ. ಇದಞ್ಚ ‘‘ಅಞ್ಞೋ ಹರಿಸ್ಸತೀ’’ತಿ ಅಸುದ್ಧಚಿತ್ತೇನ ಠಪಿತಂ ಸನ್ಧಾಯ ವುತ್ತಂ, ಅಚಿತ್ತಕತ್ತಾತಿ ಇದಂ ಪನ ಸುದ್ಧಚಿತ್ತೇನ ಠಪಿತಂ ಸನ್ಧಾಯ. ಅನಾಪತ್ತಿ ಪಾಳಿಯಾ ನ ಸಮೇತೀತಿ ‘‘ತಿಯೋಜನಂ ಹರತೀ’’ತಿಆದಿಪಾಳಿಯಾ, ವಿಸೇಸತೋ ‘‘ಅಞ್ಞಂ ಹರಾಪೇತೀ’’ತಿ ಪಾಳಿಯಾ ಚ ನ ಸಮೇತಿ.

ಸಚೇ ಸಾಮಿಕಂ ಜಾನಾಪೇತ್ವಾ ಠಪೇತಿ, ಆಣತ್ತಿಯಾ ಹರಾಪೇತಿ ನಾಮಾತಿ ಆಹ ‘‘ಸಾಮಿಕಸ್ಸ ಅಜಾನನ್ತಸ್ಸೇವಾ’’ತಿ. ಅಗಚ್ಛನ್ತೇಪೀತಿ ಗಮನಂ ಉಪಚ್ಛಿನ್ದಿತ್ವಾ ಠಿತಯಾನೇಪಿ. ಹೇಟ್ಠಾ ವಾ ಗಚ್ಛನ್ತೋತಿ ಭೂಮಿಯಂ ಗಚ್ಛನ್ತೋ. ಅಞ್ಞಂ ಹರಾಪೇತೀತಿ ಏತ್ಥ ಅಞ್ಞ-ಗ್ಗಹಣೇನ ಸಾಮಞ್ಞತೋ ತಿರಚ್ಛಾನಗತಾಪಿ ಸಙ್ಗಹಿತಾತಿ ಆಹ – ‘‘ಅಞ್ಞಂ ಹರಾಪೇತೀತಿ ವಚನತೋ ಅನಾಪತ್ತೀ’’ತಿ. ಸುಙ್ಕಘಾತೇ ಆಪತ್ತಿ ಹೋತೀತಿ ಅಞ್ಞಂ ಹರಾಪೇನ್ತಸ್ಸ ಆಪತ್ತಿ. ತತ್ಥ ಅನಾಪತ್ತೀತಿ ಅಞ್ಞವಿಹಿತಸ್ಸ ಥೇಯ್ಯಚಿತ್ತಾಭಾವತೋ ಅನಾಪತ್ತಿ.

೫೭೫. ‘‘ತಂ ಹರನ್ತಸ್ಸಾತಿ ಪುನ ತಿಯೋಜನಂ ಹರನ್ತಸ್ಸಾ’’ತಿ ಮಹಾಗಣ್ಠಿಪದೇ ವುತ್ತಂ. ತಂ ಪನ ಮಾತಿಕಾಟ್ಠಕಥಾಯಂ ಅಙ್ಗೇಸು ‘‘ಪಠಮಪ್ಪಟಿಲಾಭೋ ಸತಿ ಇಮಿನಾ ವಚನೇನ ನ ಸಮೇತಿ. ‘‘ಪಠಮಪ್ಪಟಿಲಾಭೋ’’ತಿ ಹಿ ಇದಂ ದುತಿಯಪ್ಪಟಿಲಾಭೋ ಆಪತ್ತಿಯಾ ಅಙ್ಗಂ ನ ಹೋತೀತಿ ದೀಪೇತಿ, ತಸ್ಮಾ ಪಾಳಿಯಂ ಅಟ್ಠಕಥಾಯಞ್ಚ ವಿಸೇಸಾಭಾವತೋ ಅಚ್ಛಿನ್ನಂ ಪಟಿಲಭಿತ್ವಾ ಹರನ್ತಸ್ಸ ಪುನ ತಿಯೋಜನಾತಿಕ್ಕಮೇಪಿ ಅನಾಪತ್ತಿ ವುತ್ತಾತಿ ಅಮ್ಹಾಕಂ ಖನ್ತಿ. ಅಞ್ಞಥಾ ಅಚ್ಛಿನ್ನಂ ಪಟಿಲಭಿತ್ವಾ ಪುನ ತಿಯೋಜನಂ ಹರತೀತಿ ವದೇಯ್ಯ. ವೀಮಂಸಿತ್ವಾ ಯುತ್ತತರಂ ಗಹೇತಬ್ಬಂ. ಅನಾಪತ್ತಿ ಕತಭಣ್ಡನ್ತಿ ಏತ್ಥ ‘‘ಕಮ್ಬಲಕೋಜವಾದಿಕತಭಣ್ಡಮ್ಪಿ. ಪಕತಿಚೀವರೇ ಲಗ್ಗಲೋಮಾನಿ ಆಪತ್ತಿಂ ಜನೇನ್ತಿಯೇವಾ’’ತಿ ವದನ್ತಿ. ತನುಕಪತ್ತತ್ಥವಿಕನ್ತರೇ ಅಘಟ್ಟನತ್ಥಂ ಪಕ್ಖಿಪನ್ತಿ. ಪಕ್ಖಿತ್ತನ್ತಿ ಕಣ್ಣಚ್ಛಿದ್ದೇ ಪಕ್ಖಿತ್ತಂ. ನಿಧಾನಮುಖಂ ನಾಮಾತಿ ಇಮಿನಾ ಕತಭಣ್ಡಸಙ್ಖ್ಯಂ ನ ಗಚ್ಛತೀತಿ ದಸ್ಸೇತಿ. ಏಳಕಲೋಮಾನಂ ಅಕತಭಣ್ಡತಾ, ಪಠಮಪ್ಪಟಿಲಾಭೋ, ಅತ್ತನಾ ಆದಾಯ ವಾ ಅಞ್ಞಸ್ಸ ಅಜಾನನ್ತಸ್ಸ ಯಾನೇ ಪಕ್ಖಿಪಿತ್ವಾ ವಾ ತಿಯೋಜನಾತಿಕ್ಕಮನಂ, ಆಹರಣಪಚ್ಚಾಹರಣಂ, ಅವಾಸಾಧಿಪ್ಪಾಯತಾತಿ ಇಮಾನೇತ್ಥ ಪಞ್ಚ ಅಙ್ಗಾನಿ.

ಏಳಕಲೋಮಸಿಕ್ಖಾಪದವಣ್ಣನಾ ನಿಟ್ಠಿತಾ.

೫೭೬. ಏಳಕಲೋಮಧೋವಾಪನಸಿಕ್ಖಾಪದಂ ಉತ್ತಾನತ್ಥಮೇವ.

೮. ರೂಪಿಯಸಿಕ್ಖಾಪದವಣ್ಣನಾ

೫೮೩-೫೮೪. ರೂಪಿಯಸಿಕ್ಖಾಪದೇ ಪನ ಸತ್ಥುವಣ್ಣೋತಿ ಸತ್ಥುನಾ ಸಮಾನವಣ್ಣೋ. ಸತ್ಥುನೋ ವಣ್ಣೋ ಸತ್ಥುವಣ್ಣೋ, ಸತ್ಥುವಣ್ಣೋ ವಿಯ ವಣ್ಣೋ ಅಸ್ಸಾತಿ ಸತ್ಥುವಣ್ಣೋತಿ ಮಜ್ಝಪದಲೋಪೀಸಮಾಸೋ ದಟ್ಠಬ್ಬೋ. ಪಾಕತಿಕೋ ನಾಮ ಏತರಹಿ ಪಕತಿಕಹಾಪಣೋ. ರುಕ್ಖಫಲಬೀಜಮಯೋತಿ ತಿನ್ತಿಣಿಕಾದಿರುಕ್ಖಾನಂ ಫಲಬೀಜೇನ ಕತೋ. ಇಚ್ಚೇತಂ ಸಬ್ಬಮ್ಪೀತಿ ಯಥಾವುತ್ತಭೇದಂ ಸಬ್ಬಮ್ಪಿ ಚತುಬ್ಬಿಧಂ ನಿಸ್ಸಗ್ಗಿಯವತ್ಥು ಹೋತೀತಿ ಸಮ್ಬನ್ಧೋ. ಜಾತರೂಪಮಾಸಕೋತಿ ಸುವಣ್ಣಕಹಾಪಣೋ.

ಗಣ್ಹೇಯ್ಯಾತಿ ಅತ್ತನೋ ಅತ್ಥಾಯ ದೀಯಮಾನಂ ವಾ ಕತ್ಥಚಿ ಠಿತಂ ವಾ ನಿಪ್ಪರಿಗ್ಗಹಂ ದಿಸ್ವಾ ಸಯಂ ಗಣ್ಹೇಯ್ಯ. ‘‘ಇದಂ ಅಯ್ಯಸ್ಸ ಹೋತೂ’’ತಿ ಏವಂ ಸಮ್ಮುಖಾ ವಾ ‘‘ಅಸುಕಸ್ಮಿಂ ನಾಮ ಠಾನೇ ಮಮ ಹಿರಞ್ಞಸುವಣ್ಣಂ ಅತ್ಥಿ, ತಂ ತುಯ್ಹಂ ಹೋತೂ’’ತಿ ಏವಂ ಪರಮ್ಮುಖಾ ಠಿತಂ ವಾ ಕೇವಲಂ ವಾಚಾಯ ವಾ ಹತ್ಥಮುದ್ದಾಯ ವಾ ‘‘ತುಯ್ಹ’’ನ್ತಿ ವತ್ವಾ ಪರಿಚ್ಚತ್ತಸ್ಸ ಕಾಯವಾಚಾಹಿ ಅಪ್ಪಟಿಕ್ಖಿಪಿತ್ವಾ ಚಿತ್ತೇನ ಸಾದಿಯನಂ ಉಪನಿಕ್ಖಿತ್ತಸಾದಿಯನಂ ನಾಮ. ‘‘ಸಾದಿಯತೀ’’ತಿ ವುತ್ತಮೇವತ್ಥಂ ವಿಭಾವೇತಿ ‘‘ಗಣ್ಹಿತುಕಾಮೋ ಹೋತೀ’’ತಿ. ‘‘ಇದಂ ಗುತ್ತಟ್ಠಾನ’’ನ್ತಿ ಆಚಿಕ್ಖಿತಬ್ಬನ್ತಿ ಪಚ್ಚಯಪರಿಭೋಗಂಯೇವ ಸನ್ಧಾಯ ಆಚಿಕ್ಖಿತಬ್ಬಂ. ‘‘ಇಧ ನಿಕ್ಖಿಪಾಹೀ’’ತಿ ವುತ್ತೇ ‘‘ಉಗ್ಗಣ್ಹಾಪೇಯ್ಯ ವಾ’’ತಿ ವುತ್ತಲಕ್ಖಣೇನ ನಿಸ್ಸಗ್ಗಿಯಂ ಹೋತೀತಿ ಆಹ – ‘‘ಇಧ ನಿಕ್ಖಿಪಾಹೀತಿ ನ ವತ್ತಬ್ಬ’’ನ್ತಿ. ಪರತೋ ‘‘ಇಮಂ ಗಣ್ಹಾ’’ತಿ ನ ವತ್ತಬ್ಬನ್ತಿ ಏತ್ಥಾಪಿ ಏಸೇವ ನಯೋ. ಕಪ್ಪಿಯಞ್ಚ ಅಕಪ್ಪಿಯಞ್ಚ ನಿಸ್ಸಾಯ ಠಿತಮೇವ ಹೋತೀತಿ ಯಸ್ಮಾ ತತೋ ಉಪ್ಪನ್ನಪಚ್ಚಯಪರಿಭೋಗೋ ಕಪ್ಪತಿ, ತಸ್ಮಾ ಕಪ್ಪಿಯಂ ನಿಸ್ಸಾಯ ಠಿತಂ. ಯಸ್ಮಾ ಪನ ದುಬ್ಬಿಚಾರಣಾಯ ತತೋ ಉಪ್ಪನ್ನಪಚ್ಚಯಪರಿಭೋಗೋಪಿ ನ ಕಪ್ಪತಿ, ತಸ್ಮಾ ಅಕಪ್ಪಿಯಂ ನಿಸ್ಸಾಯ ಠಿತನ್ತಿ ವೇದಿತಬ್ಬಂ.

ನ ತೇನ ಕಿಞ್ಚಿ ಕಪ್ಪಿಯಭಣ್ಡಂ ಚೇತಾಪಿತನ್ತಿ ಏತ್ಥ ಚೇತಾಪಿತಂ ಚೇ, ನತ್ಥಿ ಪರಿಭೋಗುಪಾಯೋ, ತಸ್ಮಾ ಏವಂ ವುತ್ತಂ. ಅಕಪ್ಪಿಯಞ್ಹಿ ನಿಸ್ಸಗ್ಗಿಯಂ ವತ್ಥುಂ ಉಗ್ಗಣ್ಹಿತ್ವಾ ತಂ ಅನಿಸ್ಸಜ್ಜಿತ್ವಾವ ಚೇತಾಪಿತಂ ಕಪ್ಪಿಯಭಣ್ಡಂ ಸಙ್ಘಸ್ಸ ನಿಸ್ಸಟ್ಠಮ್ಪಿ ಸಬ್ಬೇಸಂ ನ ಕಪ್ಪತಿ. ಕೇಚಿ ಪನ ‘‘ಯಸ್ಮಾ ನಿಸ್ಸಗ್ಗಿಯಂ ವತ್ಥುಂ ಪಟಿಗ್ಗಹೇತ್ವಾ ಚೇತಾಪಿತಂ ಕಪ್ಪಿಯಭಣ್ಡಂ ಸಙ್ಘಸ್ಸ ನಿಸ್ಸಜ್ಜಾಮೀತಿ ನಿಸ್ಸಟ್ಠಂ ವಿನಾವ ಉಪಾಯಂ ಪರಿಭುಞ್ಜಿತುಂ ವಟ್ಟತಿ, ತಸ್ಮಾ ‘ನ ತೇನ ಕಿಞ್ಚಿ ಕಪ್ಪಿಯಭಣ್ಡಂ ಚೇತಾಪಿತ’ನ್ತಿ ವುತ್ತ’’ನ್ತಿ ವದನ್ತಿ. ‘‘ಆರಾಮಿಕಾನಂ ವಾ ಪತ್ತಭಾಗನ್ತಿ ಇದಂ ಗಿಹೀನಂ ಹತ್ಥಗತೋಪಿ ಸೋಯೇವ ಭಾಗೋತಿ ಕತ್ವಾ ವುತ್ತಂ. ಸಚೇ ಪನ ತೇನ ಅಞ್ಞಂ ಪರಿವತ್ತೇತ್ವಾ ಆರಾಮಿಕಾ ದೇನ್ತಿ, ಪರಿಭುಞ್ಜಿತುಂ ವಟ್ಟತೀ’’ತಿ ಮಜ್ಝಿಮಗಣ್ಠಿಪದೇ ಚೂಳಗಣ್ಠಿಪದೇ ಚ ವುತ್ತಂ. ತತೋ ಹರಿತ್ವಾತಿ ಅಞ್ಞೇಸಂ ಪತ್ತಭಾಗತೋ ಹರಿತ್ವಾ. ಕಸಿಣಪರಿಕಮ್ಮನ್ತಿ ಆಲೋಕಕಸಿಣಪರಿಕಮ್ಮಂ. ಮಞ್ಚಪೀಠಾದೀನಿ ವಾತಿ ಏತ್ಥ ‘‘ತತೋ ಗಹಿತಮಞ್ಚಪೀಠಾದೀನಿ ಪರಿವತ್ತೇತ್ವಾ ಅಞ್ಞಂ ಚೇ ಗಹಿತಂ, ವಟ್ಟತೀ’’ತಿ ವದನ್ತಿ. ಛಾಯಾಪೀತಿ ಭೋಜನಸಾಲಾದೀನಂ ಛಾಯಾಪಿ. ಪರಿಚ್ಛೇದಾತಿಕ್ಕನ್ತಾತಿ ಗೇಹಪರಿಚ್ಛೇದಂ ಅತಿಕ್ಕನ್ತಾ, ಛಾಯಾಯ ಗತಗತಟ್ಠಾನಂ ಗೇಹಂ ನಾಮ ನ ಹೋತೀತಿ ಅಧಿಪ್ಪಾಯೋ. ಮಗ್ಗೇನಪೀತಿ ಏತ್ಥ ‘‘ಸಚೇ ಅಞ್ಞೋ ಮಗ್ಗೋ ನತ್ಥಿ, ಮಗ್ಗಂ ಅಧಿಟ್ಠಹಿತ್ವಾ ಗನ್ತುಂ ವಟ್ಟತೀ’’ತಿ ವದನ್ತಿ. ಕೀತಾಯಾತಿ ತೇನ ವತ್ಥುನಾ ಕೀತಾಯ. ಉಪನಿಕ್ಖೇಪಂ ಠಪೇತ್ವಾ ಸಙ್ಘೋ ಪಚ್ಚಯೇ ಪರಿಭುಞ್ಜತೀತಿ ಸಚೇ ಉಪಾಸಕೋ ‘‘ಅತಿಬಹು ಏತಂ ಹಿರಞ್ಞಂ, ಇದಂ, ಭನ್ತೇ, ಅಜ್ಜೇವ ನ ವಿನಾಸೇತಬ್ಬ’’ನ್ತಿ ವತ್ವಾ ಸಯಂ ಉಪನಿಕ್ಖೇಪಂ ಠಪೇತಿ, ಅಞ್ಞೇನ ವಾ ಠಪಾಪೇತಿ, ಏತಂ ಉಪನಿಕ್ಖೇಪಂ ಠಪೇತ್ವಾ ತತೋ ಉದಯಂ ಪರಿಭುಞ್ಜನ್ತೋ ಸಙ್ಘೋ ಪಚ್ಚಯೇ ಪರಿಭುಞ್ಜತಿ, ತೇನ ವತ್ಥುನಾ ಗಹಿತತ್ತಾ ‘‘ಅಕಪ್ಪಿಯ’’ನ್ತಿ ವುತ್ತಂ.

೫೮೫. ಪತಿತೋಕಾಸಂ ಅಸಮನ್ನಾಹರನ್ತೇನ ಪಾತೇತಬ್ಬನ್ತಿ ಇದಂ ನಿರಪೇಕ್ಖಭಾವದಸ್ಸನಪರನ್ತಿ ವೇದಿತಬ್ಬಂ, ತಸ್ಮಾ ಪತಿತಟ್ಠಾನೇ ಞಾತೇಪಿಸ್ಸ ಗೂಥಂ ಛಡ್ಡೇನ್ತಸ್ಸ ವಿಯ ನಿರಪೇಕ್ಖಭಾವೋಯೇವೇತ್ಥ ಪಮಾಣನ್ತಿ ವೇದಿತಬ್ಬಂ. ಅಸನ್ತಸಮ್ಭಾವನಾಯಾತಿ ಅತ್ತನಿ ಅವಿಜ್ಜಮಾನಉತ್ತರಿಮನುಸ್ಸಧಮ್ಮಾರೋಚನಂ ಸನ್ಧಾಯ ವುತ್ತಂ. ಥೇಯ್ಯಪರಿಭೋಗೋ ನಾಮ ಅನರಹಸ್ಸ ಪರಿಭೋಗೋ. ಭಗವತಾ ಹಿ ಅತ್ತನೋ ಸಾಸನೇ ಸೀಲವತೋ ಪಚ್ಚಯಾ ಅನುಞ್ಞಾತಾ, ನ ದುಸ್ಸೀಲಸ್ಸ. ದಾಯಕಾನಮ್ಪಿ ಸೀಲವತೋ ಏವ ಪರಿಚ್ಚಾಗೋ, ನ ದುಸ್ಸೀಲಸ್ಸ ಅತ್ತನೋ ಕಾರಾನಂ ಮಹಪ್ಫಲಭಾವಸ್ಸ ಪಚ್ಚಾಸೀಸನತೋ. ಇತಿ ಸತ್ಥಾರಾ ಅನನುಞ್ಞಾತತ್ತಾ ದಾಯಕೇಹಿ ಚ ಅಪರಿಚ್ಚತ್ತತ್ತಾ ದುಸ್ಸೀಲಸ್ಸ ಪರಿಭೋಗೋ ಥೇಯ್ಯಪರಿಭೋಗೋ. ಇಣವಸೇನ ಪರಿಭೋಗೋ ಇಣಪರಿಭೋಗೋ, ಪಟಿಗ್ಗಾಹಕತೋ ದಕ್ಖಿಣಾವಿಸುದ್ಧಿಯಾ ಅಭಾವತೋ ಇಣಂ ಗಹೇತ್ವಾ ಪರಿಭೋಗೋ ವಿಯಾತಿ ಅತ್ಥೋ. ತಸ್ಮಾತಿ ‘‘ಸೀಲವತೋ’’ತಿಆದಿನಾ ವುತ್ತಮೇವತ್ಥಂ ಕಾರಣಭಾವೇನ ಪಚ್ಚಾಮಸತಿ. ಚೀವರಂ ಪರಿಭೋಗೇ ಪರಿಭೋಗೇತಿ ಕಾಯತೋ ಮೋಚೇತ್ವಾ ಮೋಚೇತ್ವಾ ಪರಿಭೋಗೇ. ಪುರೇಭತ್ತ…ಪೇ… ಪಚ್ಛಿಮಯಾಮೇಸು ಪಚ್ಚವೇಕ್ಖಿತಬ್ಬನ್ತಿ ಸಮ್ಬನ್ಧೋ. ತಥಾ ಅಸಕ್ಕೋನ್ತೇನ ಯಥಾವುತ್ತಕಾಲವಿಸೇಸವಸೇನ ಏಕಸ್ಮಿಂ ದಿವಸೇ ಚತುಕ್ಖತ್ತುಂ ತಿಕ್ಖತ್ತುಂ ದ್ವಿಕ್ಖತ್ತುಂ ಸಕಿಂಯೇವ ವಾ ಪಚ್ಚವೇಕ್ಖಿತಬ್ಬಂ.

ಸಚಸ್ಸ ಅಪಚ್ಚವೇಕ್ಖತೋವ ಅರುಣೋ ಉಗ್ಗಚ್ಛತಿ, ಇಣಪರಿಭೋಗಟ್ಠಾನೇ ತಿಟ್ಠತೀತಿ ಏತ್ಥ ‘‘ಹಿಯ್ಯೋ ಯಂ ಮಯಾ ಚೀವರಂ ಪರಿಭುತ್ತಂ, ತಂ ಯಾವದೇವ ಸೀತಸ್ಸ ಪಟಿಘಾತಾಯ…ಪೇ… ಹಿರಿಕೋಪೀನಪ್ಪಟಿಚ್ಛಾದನತ್ಥಂ, ಹಿಯ್ಯೋ ಯೋ ಮಯಾ ಪಿಣ್ಡಪಾತೋ ಪರಿಭುತ್ತೋ, ಸೋ ನೇವ ದವಾಯಾತಿಆದಿನಾ ಸಚೇ ಅತೀತಪರಿಭೋಗಪಚ್ಚವೇಕ್ಖಣಂ ನ ಕರೇಯ್ಯ, ಇಣಪರಿಭೋಗಟ್ಠಾನೇ ತಿಟ್ಠತೀ’’ತಿ ವದನ್ತಿ, ವೀಮಂಸಿತಬ್ಬಂ. ಸೇನಾಸನಮ್ಪಿ ಪರಿಭೋಗೇ ಪರಿಭೋಗೇತಿ ಪವೇಸೇ ಪವೇಸೇ. ಏವಂ ಪನ ಅಸಕ್ಕೋನ್ತೇನ ಪುರೇಭತ್ತಾದೀಸು ಪಚ್ಚವೇಕ್ಖಿತಬ್ಬಂ. ತಂ ಹೇಟ್ಠಾ ವುತ್ತನಯೇನೇವ ಸಕ್ಕಾ ವಿಞ್ಞಾತುನ್ತಿ ಇಧ ವಿಸುಂ ನ ವುತ್ತಂ. ಸತಿಪಚ್ಚಯತಾತಿ ಸತಿಯಾ ಪಚ್ಚಯಭಾವೋ, ಪಟಿಗ್ಗಹಣಸ್ಸ ಪರಿಭೋಗಸ್ಸ ಚ ಪಚ್ಚವೇಕ್ಖಣಸತಿಯಾ ಪಚ್ಚಯಭಾವೋ ಯುಜ್ಜತಿ, ಪಚ್ಚವೇಕ್ಖಿತ್ವಾವ ಪಟಿಗ್ಗಹೇತಬ್ಬಂ ಪರಿಭುಞ್ಜಿತಬ್ಬಞ್ಚಾತಿ ಅತ್ಥೋ. ತೇನೇವಾಹ ‘‘ಸತಿಂ ಕತ್ವಾ’’ತಿಆದಿ. ಏವಂ ಸನ್ತೇಪೀತಿ ಯದಿಪಿ ದ್ವೀಸುಪಿ ಠಾನೇಸು ಪಚ್ಚವೇಕ್ಖಣಾ ಯುತ್ತಾ, ಏವಂ ಸನ್ತೇಪಿ. ಅಪರೇ ಪನಾಹು ‘‘ಸತಿಪಚ್ಚಯತಾತಿ ಸತಿಭೇಸಜ್ಜಪರಿಭೋಗಸ್ಸ ಪಚ್ಚಯಭಾವೇ ಪಚ್ಚಯೇತಿ ಅತ್ಥೋ. ಏವಂ ಸನ್ತೇಪೀತಿ ಪಚ್ಚಯೇ ಸತಿಪೀ’’ತಿ, ತಂ ತೇಸಂ ಮತಿಮತ್ತಂ. ತಥಾ ಹಿ ಪಚ್ಚಯಸನ್ನಿಸ್ಸಿತಸೀಲಂ ಪಚ್ಚವೇಕ್ಖಣಾಯ ವಿಸುಜ್ಝತಿ, ನ ಪಚ್ಚಯಸಬ್ಭಾವಮತ್ತೇನ.

ನನು ಚ ‘‘ಪರಿಭೋಗೇ ಕರೋನ್ತಸ್ಸ ಅನಾಪತ್ತೀ’’ತಿ ಇಮಿನಾ ಪಾತಿಮೋಕ್ಖಸಂವರಸೀಲಂ ವುತ್ತಂ, ತಸ್ಮಾ ಪಚ್ಚಯಸನ್ನಿಸ್ಸಿತಸೀಲಸ್ಸ ಪಾತಿಮೋಕ್ಖಸಂವರಸೀಲಸ್ಸ ಚ ಕೋ ವಿಸೇಸೋತಿ? ವುಚ್ಚತೇ – ಪುರಿಮೇಸು ತಾವ ತೀಸು ಪಚ್ಚಯೇಸು ವಿಸೇಸೋ ಪಾಕಟೋಯೇವ, ಗಿಲಾನಪಚ್ಚಯೇ ಪನ ಯಥಾ ವತಿಂ ಕತ್ವಾ ರುಕ್ಖಮೂಲೇ ಗೋಪಿತೇ ತಸ್ಸ ಫಲಾನಿಪಿ ರಕ್ಖಿತಾನಿಯೇವ ಹೋನ್ತಿ, ಏವಮೇವ ಪಚ್ಚವೇಕ್ಖಣಾಯ ಪಚ್ಚಯಸನ್ನಿಸ್ಸಿತಸೀಲೇ ರಕ್ಖಿತೇ ತಪ್ಪಟಿಬದ್ಧಂ ಪಾತಿಮೋಕ್ಖಸಂವರಸೀಲಮ್ಪಿ ನಿಪ್ಫನ್ನಂ ನಾಮ ಹೋತಿ. ಗಿಲಾನಪಚ್ಚಯಂ ಅಪಚ್ಚವೇಕ್ಖಿತ್ವಾ ಪರಿಭುಞ್ಜನ್ತಸ್ಸ ಸೀಲಂ ಭಿಜ್ಜಮಾನಂ ಪಾತಿಮೋಕ್ಖಸಂವರಸೀಲಮೇವ ಭಿಜ್ಜತಿ, ಪಚ್ಚಯಸನ್ನಿಸ್ಸಿತಸೀಲಂ ಪನ ಪಚ್ಛಾಭತ್ತಪುರಿಮಯಾಮಾದೀಸು ಯಾವ ಅರುಣುಗ್ಗಮನಾ ಅಪಚ್ಚವೇಕ್ಖನ್ತಸ್ಸೇವ ಭಿಜ್ಜತಿ. ಪುರೇಭತ್ತಞ್ಹಿ ಅಪಚ್ಚವೇಕ್ಖಿತ್ವಾಪಿ ಗಿಲಾನಪಚ್ಚಯಂ ಪರಿಭುಞ್ಜನ್ತಸ್ಸ ಅನಾಪತ್ತಿ, ಇದಮೇತೇಸಂ ನಾನಾಕರಣಂ.

ಏವಂ ಪಚ್ಚಯಸನ್ನಿಸ್ಸಿತಸೀಲಸ್ಸ ವಿಸುದ್ಧಿಂ ದಸ್ಸೇತ್ವಾ ತೇನೇವ ಪಸಙ್ಗೇನ ಸಬ್ಬಾಪಿ ಸುದ್ಧಿಯೋ ದಸ್ಸೇತುಂ ‘‘ಚತುಬ್ಬಿಧಾ ಹಿ ಸುದ್ಧೀ’’ತಿಆದಿಮಾಹ. ತತ್ಥ ಸುಜ್ಝತಿ ಏತಾಯಾತಿ ಸುದ್ಧಿ, ಯಥಾಧಮ್ಮಂ ದೇಸನಾವ ಸುದ್ಧಿ ದೇಸನಾಸುದ್ಧಿ. ವುಟ್ಠಾನಸ್ಸಪಿ ಚೇತ್ಥ ದೇಸನಾಯ ಏವ ಸಙ್ಗಹೋ ದಟ್ಠಬ್ಬೋ. ಛಿನ್ನಮೂಲಾಪತ್ತೀನಂ ಪನ ಅಭಿಕ್ಖುತಾಪಟಿಞ್ಞಾವ ದೇಸನಾ. ಅಧಿಟ್ಠಾನವಿಸಿಟ್ಠೋ ಸಂವರೋವ ಸುದ್ಧಿ ಸಂವರಸುದ್ಧಿ. ಧಮ್ಮೇನ ಸಮೇನ ಪಚ್ಚಯಾನಂ ಪರಿಯೇಟ್ಠಿ ಏವ ಸುದ್ಧಿ ಪರಿಯೇಟ್ಠಿಸುದ್ಧಿ. ಚತೂಸು ಪಚ್ಚಯೇಸು ವುತ್ತವಿಧಿನಾ ಪಚ್ಚವೇಕ್ಖಣಾವ ಸುದ್ಧಿ ಪಚ್ಚವೇಕ್ಖಣಸುದ್ಧಿ. ಏಸ ತಾವ ಸುದ್ಧೀಸು ಸಮಾಸನಯೋ. ಸುದ್ಧಿಮನ್ತೇಸು ಸೀಲೇಸು ದೇಸನಾ ಸುದ್ಧಿ ಏತಸ್ಸಾತಿ ದೇಸನಾಸುದ್ಧಿ. ಸೇಸೇಸುಪಿ ಏಸೇವ ನಯೋ. ನ ಪುನ ಏವಂ ಕರಿಸ್ಸಾಮೀತಿ ಏತ್ಥ ಏವನ್ತಿ ಸಂವರಭೇದಂ ಸನ್ಧಾಯಾಹ. ಪಹಾಯಾತಿ ವಜ್ಜೇತ್ವಾ, ಅಕತ್ವಾತಿ ಅತ್ಥೋ. ದಾತಬ್ಬಟ್ಠೇನ ದಾಯಂ, ತಂ ಆದಿಯನ್ತೀತಿ ದಾಯಾದಾ, ಅನನುಞ್ಞಾತೇಸು ಸಬ್ಬೇನ ಸಬ್ಬಂ ಪರಿಭೋಗಾಭಾವತೋ ಅನುಞ್ಞಾತೇಸುಯೇವ ಚ ಪರಿಭೋಗಸಬ್ಭಾವಭಾವತೋ ಭಿಕ್ಖೂಹಿ ಪರಿಭುಞ್ಜಿತಬ್ಬಪಚ್ಚಯಾ ಭಗವತೋ ಸನ್ತಕಾ. ಧಮ್ಮದಾಯಾದಸುತ್ತಞ್ಚೇತ್ಥ ಸಾಧಕನ್ತಿ –

‘‘ಧಮ್ಮದಾಯಾದಾ ಮೇ, ಭಿಕ್ಖವೇ, ಭವಥ, ಮಾ ಆಮಿಸದಾಯಾದಾ. ಅತ್ಥಿ ಮೇ ತುಮ್ಹೇಸು ಅನುಕಮ್ಪಾ, ‘ಕಿನ್ತಿ ಮೇ ಸಾವಕಾ ಧಮ್ಮದಾಯಾದಾ ಭವೇಯ್ಯುಂ, ನೋ ಆಮಿಸದಾಯಾದಾ’’’ತಿ (ಮ. ನಿ. ೧.೨೯) –

ಏವಂ ಪವತ್ತಂ ಧಮ್ಮದಾಯಾದಸುತ್ತಞ್ಚ ಏತ್ಥ ಏತಸ್ಮಿಂ ಅತ್ಥೇ ಸಾಧಕಂ.

ಅವೀತರಾಗಾನಂ ತಣ್ಹಾಪರವಸತಾಯ ಪಚ್ಚಯಪರಿಭೋಗೇ ಸಾಮಿಭಾವೋ ನತ್ಥಿ, ತದಭಾವೇನ ವೀತರಾಗಾನಂ ತತ್ಥ ಸಾಮಿಭಾವೋ ಯಥಾರುಚಿ ಪರಿಭೋಗಸಬ್ಭಾವತೋ. ತಥಾ ಹಿ ತೇ ಪಟಿಕೂಲಮ್ಪಿ ಅಪ್ಪಟಿಕೂಲಾಕಾರೇನ ಅಪ್ಪಟಿಕೂಲಮ್ಪಿ ಪಟಿಕೂಲಾಕಾರೇನ ತದುಭಯಮ್ಪಿ ವಜ್ಜೇತ್ವಾ ಅಜ್ಝುಪೇಕ್ಖನಾಕಾರೇನ ಪಚ್ಚಯೇ ಪರಿಭುಞ್ಜನ್ತಿ, ದಾಯಕಾನಞ್ಚ ಮನೋರಥಂ ಪರಿಪೂರೇನ್ತಿ. ತೇನಾಹ – ‘‘ತೇ ಹಿ ತಣ್ಹಾಯ ದಾಸಬ್ಯಂ ಅತೀತತ್ತಾ ಸಾಮಿನೋ ಹುತ್ವಾ ಪರಿಭುಞ್ಜನ್ತೀ’’ತಿ. ಯೋ ಪನಾಯಂ ಸೀಲವತೋ ಪಚ್ಚವೇಕ್ಖಿತಪರಿಭೋಗೋ, ಸೋ ಇಣಪರಿಭೋಗಸ್ಸ ಪಚ್ಚನೀಕತ್ತಾ ಆಣಣ್ಯಪರಿಭೋಗೋ ನಾಮ ಹೋತಿ. ಯಥಾ ಹಿ ಇಣಾಯಿಕೋ ಅತ್ತನೋ ರುಚಿಯಾ ಇಚ್ಛಿತದೇಸಂ ಗನ್ತುಂ ನ ಲಭತಿ, ಏವಂ ಇಣಪರಿಭೋಗಯುತ್ತೋ ಲೋಕತೋ ನಿಸ್ಸರಿತುಂ ನ ಲಭತೀತಿ ತಪ್ಪಟಿಪಕ್ಖತ್ತಾ ಸೀಲವತೋ ಪಚ್ಚವೇಕ್ಖಿತಪರಿಭೋಗೋ ಆಣಣ್ಯಪರಿಭೋಗೋತಿ ವುಚ್ಚತಿ, ತಸ್ಮಾ ನಿಪ್ಪರಿಯಾಯತೋ ಚತುಪರಿಭೋಗವಿನಿಮುತ್ತೋ ವಿಸುಂಯೇವಾಯಂ ಪರಿಭೋಗೋತಿ ವೇದಿತಬ್ಬೋ. ಸೋ ಇಧ ವಿಸುಂ ನ ವುತ್ತೋ, ದಾಯಜ್ಜಪರಿಭೋಗೇಯೇವ ವಾ ಸಙ್ಗಹಂ ಗಚ್ಛತೀತಿ. ಸೀಲವಾಪಿ ಹಿ ಇಮಾಯ ಸಿಕ್ಖಾಯ ಸಮನ್ನಾಗತತ್ತಾ ಸೇಕ್ಖೋತ್ವೇವ ವುಚ್ಚತಿ. ಸಬ್ಬೇಸನ್ತಿ ಅರಿಯಾನಂ ಪುಥುಜ್ಜನಾನಞ್ಚ.

ಕಥಂ ಪುಥುಜ್ಜನಾನಂ ಇಮೇ ಪರಿಭೋಗಾ ಸಮ್ಭವನ್ತೀತಿ? ಉಪಚಾರವಸೇನ. ಯೋ ಹಿ ಪುಥುಜ್ಜನಸ್ಸಪಿ ಸಲ್ಲೇಖಪ್ಪಟಿಪತ್ತಿಯಂ ಠಿತಸ್ಸ ಪಚ್ಚಯಗೇಧಂ ಪಹಾಯ ತತ್ಥ ಅನುಪಲಿತ್ತೇನ ಚಿತ್ತೇನ ಪರಿಭೋಗೋ, ಸೋ ಸಾಮಿಪರಿಭೋಗೋ ವಿಯ ಹೋತಿ. ಸೀಲವತೋ ಪನ ಪಚ್ಚವೇಕ್ಖಿತಪರಿಭೋಗೋ ದಾಯಜ್ಜಪರಿಭೋಗೋ ವಿಯ ಹೋತಿ ದಾಯಕಾನಂ ಮನೋರಥಸ್ಸ ಅವಿರಾಧನತೋ. ತೇನೇವ ವುತ್ತಂ ‘‘ದಾಯಜ್ಜಪರಿಭೋಗೇಯೇವ ವಾ ಸಙ್ಗಹಂ ಗಚ್ಛತೀ’’ತಿ. ಕಲ್ಯಾಣಪುಥುಜ್ಜನಸ್ಸ ಪರಿಭೋಗೇ ವತ್ತಬ್ಬಮೇವ ನತ್ಥಿ ತಸ್ಸ ಸೇಕ್ಖಸಙ್ಗಹತೋ. ಸೇಕ್ಖಸುತ್ತಞ್ಹೇತಸ್ಸ ಅತ್ಥಸ್ಸ ಸಾಧಕಂ.

ಲಜ್ಜಿನಾ ಸದ್ಧಿಂ ಪರಿಭೋಗೋ ನಾಮ ಲಜ್ಜಿಸ್ಸ ಸನ್ತಕಂ ಗಹೇತ್ವಾ ಪರಿಭೋಗೋ. ಅಲಜ್ಜಿನಾ ಸದ್ಧಿನ್ತಿ ಏತ್ಥಾಪಿ ಏಸೇವ ನಯೋ. ಆದಿತೋ ಪಟ್ಠಾಯ ಹಿ ಅಲಜ್ಜೀ ನಾಮ ನತ್ಥೀತಿ ಇಮಿನಾ ದಿಟ್ಠದಿಟ್ಠೇಸುಯೇವ ಆಸಙ್ಕಾ ನ ಕಾತಬ್ಬಾತಿ ದಸ್ಸೇತಿ. ಅತ್ತನೋ ಭಾರಭೂತಾ ಸದ್ಧಿವಿಹಾರಿಕಾದಯೋ. ಸೋಪಿ ನಿವಾರೇತಬ್ಬೋತಿ ಯೋ ಪಸ್ಸತಿ, ತೇನ ನಿವಾರೇತಬ್ಬೋ. ಯಸ್ಮಾ ಅಲಜ್ಜೀಪರಿಭೋಗೋ ನಾಮ ಲಜ್ಜಿನೋ ವುಚ್ಚತಿ, ತಸ್ಮಾ ಆಪತ್ತಿ ನಾಮ ನತ್ಥಿ ಉಭಿನ್ನಮ್ಪಿ ಅಲಜ್ಜೀಭಾವತೋ, ‘‘ಅಲಜ್ಜೀಪರಿಭೋಗೋ’’ತಿ ಇದಂ ನಾಮಮತ್ತಮೇವ ನ ಲಬ್ಭತೀತಿ ವುತ್ತಂ ಹೋತಿ. ‘‘ಆಪತ್ತಿ ಪನ ಅತ್ಥಿಯೇವಾತಿ ವದನ್ತೀ’’ತಿ ತೀಸುಪಿ ಗಣ್ಠಿಪದೇಸು ವುತ್ತಂ.

ಅಧಮ್ಮಿಯೋತಿ ಅನೇಸನಾದೀಹಿ ಉಪ್ಪನ್ನೋ. ಧಮ್ಮಿಯೋತಿ ಭಿಕ್ಖಾಚರಿಯಾದೀಹಿ ಉಪ್ಪನ್ನೋ. ಸಙ್ಘಸ್ಸೇವ ದೇತೀತಿ ಭತ್ತಂ ಅಗ್ಗಹೇತ್ವಾ ಅತ್ತನಾ ಲದ್ಧಸಲಾಕಂಯೇವ ದೇತಿ. ಸಚೇ ಪನ ಲಜ್ಜೀ ಅಲಜ್ಜಿಂ ಪಗ್ಗಣ್ಹಾತಿ…ಪೇ… ಅನ್ತರಧಾಪೇತೀತಿ ಏತ್ಥ ಕೇವಲಂ ಪಗ್ಗಣ್ಹಿತುಕಾಮತಾಯ ಏವಂ ಕಾತುಂ ನ ವಟ್ಟತಿ, ಧಮ್ಮಸ್ಸ ಪನ ಸಾಸನಸ್ಸ ಸೋತೂನಞ್ಚ ಅನುಗ್ಗಹತ್ಥಾಯ ವಟ್ಟತೀತಿ ವೇದಿತಬ್ಬಂ. ಪುರಿಮನಯೇನ ‘‘ಸೋ ಆಪತ್ತಿಯಾ ಕಾರೇತಬ್ಬೋ’’ತಿ ವುತ್ತತ್ತಾ ಇಮಸ್ಸ ಆಪತ್ತಿಯೇವಾತಿ ವದನ್ತಿ. ಉದ್ದೇಸಗ್ಗಹಣಾದಿನಾ ಧಮ್ಮಸ್ಸ ಪರಿಭೋಗೋ ಧಮ್ಮಪರಿಭೋಗೋ. ಧಮ್ಮಾನುಗ್ಗಹೇನ ಗಣ್ಹನ್ತಸ್ಸ ಆಪತ್ತಿಯಾ ಅಭಾವೇಪಿ ಥೇರೋ ತಸ್ಸ ಅಲಜ್ಜಿಭಾವಂಯೇವ ಸನ್ಧಾಯ ‘‘ಪಾಪೋ ಕಿರಾಯ’’ನ್ತಿಆದಿಮಾಹ. ತಸ್ಸ ಪನ ಸನ್ತಿಕೇತಿ ಮಹಾರಕ್ಖಿತತ್ಥೇರಸ್ಸ ಸನ್ತಿಕೇ.

೫೮೬. ರಾಜೋರೋಧಾದಯೋತಿಆದಿ ‘‘ಇದಂ ಗಣ್ಹಿಸ್ಸಾಮೀ’’ತಿ ಚೇತನಾಮತ್ತಸಮ್ಭವತೋ ವುತ್ತಂ. ಅಸ್ಸತಿಯಾ ದಿನ್ನನ್ತಿ ಏತ್ಥ ಅಸ್ಸತಿಯಾ ದಿನ್ನಂ ನಾಮ ಅಪರಿಚ್ಚತ್ತಂ ಹೋತಿ, ತಸ್ಮಾ ದಸನ್ತೇ ಬದ್ಧಕಹಾಪಣಾದಿ ಅಸ್ಸತಿಯಾ ದಿನ್ನಂ ಭಿಕ್ಖುನಾ ವತ್ಥಸಞ್ಞಾಯ ಪಟಿಗ್ಗಹಿತಞ್ಚ, ತತೋ ನೇವ ರೂಪಿಯಂ ದಿನ್ನಂ, ನಾಪಿ ಪಟಿಗ್ಗಹಿತಞ್ಚ ಹೋತೀತಿ ಏತ್ಥ ಆಪತ್ತಿದೇಸನಾಕಿಚ್ಚಂ ನತ್ಥಿ, ತಂ ಪನ ದಾಯಕಾನಮೇವ ಪಟಿದಾತಬ್ಬಂ. ತೇನ ಅಕಪ್ಪಿಯವತ್ಥುನಾ ತೇ ಚೇ ದಾಯಕಾ ಸಪ್ಪಿಆದೀನಿ ಕಿಣಿತ್ವಾನ ಸಙ್ಘಸ್ಸ ತಸ್ಸ ಚ ಭಿಕ್ಖುನೋ ದೇನ್ತಿ, ಸಬ್ಬೇಸಂ ಕಪ್ಪತಿ ದಾಯಕಾನಂಯೇವ ಸನ್ತಕತ್ತಾ. ಅಟ್ಠಕಥಾಯಂ ಪನ ಪುಞ್ಞಕಾಮೇಹಿ ಪರಿಚ್ಚಜಿತ್ವಾ ದಿನ್ನಮೇವ ಸನ್ಧಾಯ ‘‘ಪುಞ್ಞಕಾಮಾ…ಪೇ… ರೂಪಿಯೇ ಅರೂಪಿಯಸಞ್ಞೀ ರೂಪಿಯಂ ಪಟಿಗ್ಗಣ್ಹಾತೀತಿ ವೇದಿತಬ್ಬೋ’’ತಿ ವುತ್ತಂ, ತಸ್ಮಾ ಪರಿಚ್ಚಜಿತ್ವಾ ದಿನ್ನಂ ವತ್ಥಸಞ್ಞಾಯ ಗಣ್ಹತೋಪಿ ನಿಸ್ಸಗ್ಗಿಯಮೇವ. ತೇನ ಯದಿ ತೇ ದಾಯಕಾ ನೋ ಆಗನ್ತ್ವಾ ಗಣ್ಹನ್ತಿ, ದಾಯಕೇ ಪುಚ್ಛಿತ್ವಾ ಅತ್ತನೋ ಅತ್ಥಾಯ ಚೇ ಪರಿಚ್ಚತ್ತಂ, ಸಙ್ಘೇ ನಿಸ್ಸಜ್ಜಿತ್ವಾ ಆಪತ್ತಿ ದೇಸೇತಬ್ಬಾ. ತವ ಚೋಳಕಂ ಪಸ್ಸಾಹೀಹಿ ಇಮಿನಾ ಗಿಹಿಸನ್ತಕೇಪಿ ‘‘ಇದಂ ಗಣ್ಹಥಾ’’ತಿಆದಿಅಕಪ್ಪಿಯವೋಹಾರೇನ ವಿಧಾನಂ ಭಿಕ್ಖುನೋ ನ ಕಪ್ಪತೀತಿ ದೀಪೇತಿ. ಏಕಪರಿಚ್ಛೇದಾನೀತಿ ಕಿರಿಯಾಕಿರಿಯಭಾವತೋ ಏಕಪರಿಚ್ಛೇದಾನಿ. ಜಾತರೂಪರಜತಭಾವೋ, ಅತ್ತುದ್ದೇಸಿಕತಾ, ಕಹಾಪಣಾದೀಸು ಅಞ್ಞತರಭಾವೋತಿ ಇಮಾನೇತ್ಥ ತೀಣಿ ಅಙ್ಗಾನಿ.

ರೂಪಿಯಸಿಕ್ಖಾಪದವಣ್ಣನಾ ನಿಟ್ಠಿತಾ.

೯. ರೂಪಿಯಸಂವೋಹಾರಸಿಕ್ಖಾಪದವಣ್ಣನಾ

೫೮೭. ರೂಪಿಯಸಂವೋಹಾರಸಿಕ್ಖಾಪದೇ ಜಾತರೂಪಾದಿಚತುಬ್ಬಿಧಮ್ಪಿ ನಿಸ್ಸಗ್ಗಿಯವತ್ಥು ಇಧ ರೂಪಿಯಗ್ಗಹಣೇನೇವ ಗಹಿತನ್ತಿ ಆಹ ‘‘ಜಾತರೂಪರಜತಪರಿವತ್ತನ’’ನ್ತಿ. ಪಟಿಗ್ಗಹಿತಪರಿವತ್ತನೇತಿ ಸಾದಿತರೂಪಿಯಸ್ಸ ಪರಿವತ್ತನೇ, ಅಸಾದಿಯಿತ್ವಾ ವಾ ಕಪ್ಪಿಯೇನ ಗಾಹೇನ ಪಟಿಗ್ಗಹಿತರೂಪಿಯಪರಿವತ್ತನೇ.

೫೮೯. ಗ-ಕಾರಸ್ಸ ಕ-ಕಾರಂ ಕತ್ವಾ ‘‘ಸೀಸೂಪಕ’’ನ್ತಿ ಲಿಖಿತಂ, ಪದಭಾಜನೇ ಘನಕತನ್ತಿ ಪಿಣ್ಡಂ ಕತಂ. ಸತ್ಥುವಣ್ಣೋತಿಆದೀಸು ‘‘ಸತ್ಥುವಣ್ಣೋ ಚ ಕಹಾಪಣೋ ಚ…ಪೇ… ಯೇ ಚ ವೋಹಾರಂ ಗಚ್ಛನ್ತೀ’’ತಿ ಏವಂ ಸಬ್ಬತ್ಥ ಸಮುಚ್ಚಯೋ ವೇದಿತಬ್ಬೋ. ರೂಪಿಯೇ ರೂಪಿಯಸಞ್ಞೀತಿ ಸಕಸನ್ತಕಂ ವದತಿ. ರೂಪಿಯಂ ಚೇತಾಪೇತೀತಿ ಪರಸನ್ತಕಂ ವದತಿ. ‘‘ನಿಸ್ಸಗ್ಗಿಯವತ್ಥುನಾ ದುಕ್ಕಟವತ್ಥುಂ ವಾ ಕಪ್ಪಿಯವತ್ಥುಂ ವಾ ಚೇತಾಪೇನ್ತಸ್ಸಪಿ ಏಸೇವ ನಯೋ’’ತಿ ಇದಂ ಕಸ್ಮಾ ವುತ್ತಂ. ನ ಹಿ ‘‘ರೂಪಿಯೇ ರೂಪಿಯಸಞ್ಞೀ ಅರೂಪಿಯಂ ಚೇತಾಪೇತಿ, ನಿಸ್ಸಗ್ಗಿಯಂ ಪಾಚಿತ್ತಿಯ’’ನ್ತಿಆದಿತ್ತಿಕೋ ಪಾಳಿಯಂ ವುತ್ತೋತಿ ಆಹ ‘‘ಯೋ ಹೀ’’ತಿಆದಿ. ತಸ್ಸಾನುಲೋಮತ್ತಾತಿ ಏತ್ಥಾಯಮಧಿಪ್ಪಾಯೋ – ರೂಪಿಯಸಂವೋಹಾರೋ ನಾಮ ನ ಕೇವಲಂ ರೂಪಿಯೇನ ರೂಪಿಯಪರಿವತ್ತನಮೇವ, ಅಥ ಖೋ ‘‘ಅರೂಪಿಯೇ ರೂಪಿಯಸಞ್ಞೀ ರೂಪಿಯಂ ಚೇತಾಪೇತೀ’’ತಿ ವುತ್ತತ್ತಾ ಅರೂಪಿಯೇನ ರೂಪಿಯಚೇತಾಪನಮ್ಪಿ ರೂಪಿಯಸಂವೋಹಾರೋ ನಾಮ ಹೋತೀತಿ ಏತಸ್ಮಿಂ ಪಕ್ಖೇಪಿ ರೂಪಿಯೇ ಸತಿ ರೂಪಿಯಸಂವೋಹಾರೋಯೇವ ಹೋತೀತಿ ಅಯಮತ್ಥೋ ಅವುತ್ತೋಪಿ ವಿಞ್ಞಾಯತೀತಿ. ಅರೂಪಿಯಂ ನಾಮ ದುಕ್ಕಟವತ್ಥುಕಪ್ಪಿಯವತ್ಥೂನಿ. ಏಕನ್ತೇನ ರೂಪಿಯಪಕ್ಖೇತಿ ಏಕೇನ ಅನ್ತೇನ ರೂಪಿಯಪಕ್ಖೇತಿ ಅಯಂ ಅತ್ಥೋ ಗಹೇತಬ್ಬೋ. ‘‘ಏಕತೋ ರೂಪಿಯಪಕ್ಖೇ’’ತಿ ವಾ ಪಾಠೋ ವೇದಿತಬ್ಬೋ. ‘‘ಏಕರೂಪಿಯಪಕ್ಖೇ’’ತಿಪಿ ಪಠನ್ತಿ, ತತ್ಥಾಪಿ ಏಕತೋ ರೂಪಿಯಪಕ್ಖೇತಿ ಅಯಮೇವತ್ಥೋ ಗಹೇತಬ್ಬೋ.

ಕಪ್ಪಿಯವತ್ಥುನಾ ಕಪ್ಪಿಯವತ್ಥುನೋ ಕಯವಿಕ್ಕಯೇಪಿ ತಾವ ನಿಸ್ಸಗ್ಗಿಯಂ ಹೋತಿ, ದುಕ್ಕಟವತ್ಥುನಾ ದುಕ್ಕಟವತ್ಥುನೋ ಕಯವಿಕ್ಕಯೇ ಕಸ್ಮಾ ನ ಹೋತೀತಿ ಅನ್ಧಕಟ್ಠಕಥಾಯ ಅಧಿಪ್ಪಾಯೋ. ಇದಂ ಸಿಕ್ಖಾಪದಂ…ಪೇ… ಅರೂಪಿಯೇನ ಚ ರೂಪಿಯಚೇತಾಪನಂ ಸನ್ಧಾಯ ವುತ್ತನ್ತಿ ಸಮ್ಬನ್ಧೋ. ಇಧಾತಿ ಇಮಸ್ಮಿಂ ರೂಪಿಯಸಂವೋಹಾರಸಿಕ್ಖಾಪದೇ. ತತ್ಥಾತಿ ಕಯವಿಕ್ಕಯಸಿಕ್ಖಾಪದೇ. ತೇನೇವಾತಿ ಕಪ್ಪಿಯವತ್ಥುನಾಯೇವ.

ಪುನ ಕಪ್ಪಿಯಭಾವಂ ನೇತುಂ ಅಸಕ್ಕುಣೇಯ್ಯತ್ತಾ ‘‘ಮಹಾಅಕಪ್ಪಿಯೋ ನಾಮಾ’’ತಿ ವುತ್ತಂ. ‘‘ನ ಸಕ್ಕಾ ಕೇನಚಿ ಉಪಾಯೇನ ಕಪ್ಪಿಯೋ ಕಾತುನ್ತಿ ಇದಂ ಪಞ್ಚನ್ನಂಯೇವ ಸಹಧಮ್ಮಿಕಾನಂ ಅನ್ತರೇ ಪರಿವತ್ತನಂ ಸನ್ಧಾಯ ವುತ್ತಂ, ಗಿಹೀಹಿ ಪನ ಗಹೇತ್ವಾ ಅತ್ತನೋ ಸನ್ತಕಂ ಕತ್ವಾ ದಿನ್ನಂ ಸಬ್ಬೇಸಂ ಕಪ್ಪತೀ’’ತಿ ವದನ್ತಿ. ‘‘ನ ಸಕ್ಕಾ ಕೇನಚಿ ಉಪಾಯೇನ ಕಪ್ಪಿಯೋ ಕಾತು’’ನ್ತಿ ಪನ ಇಮಿನಾವ ಪಟಿಗ್ಗಹಿತರೂಪಿಯಂ ಅನಿಸ್ಸಜ್ಜಿತ್ವಾವ ತೇನ ಚೇತಾಪಿತಂ ಕಪ್ಪಿಯಭಣ್ಡಮ್ಪಿ ಸಙ್ಘಸ್ಸ ನಿಸ್ಸಟ್ಠಂ ಪರಿಭುಞ್ಜಿತುಂ ನ ವಟ್ಟತೀತಿ ಸಿದ್ಧಂ.

ಯೇ ಪನ ‘‘ಪಟಿಗ್ಗಹಿತರೂಪಿಯಂ ಅನಿಸ್ಸಜ್ಜಿತ್ವಾಪಿ ತೇನ ಪರಿವತ್ತಿತಂ ಕಪ್ಪಿಯಭಣ್ಡಂ ಸಙ್ಘಸ್ಸ ನಿಸ್ಸಟ್ಠಂ ಪರಿಭುಞ್ಜಿತುಂ ವಟ್ಟತೀ’’ತಿ ವದನ್ತಿ, ತೇಸಂ ‘‘ನ ಸಕ್ಕಾ ಕೇನಚಿ ಉಪಾಯೇನ ಕಪ್ಪಿಯೋ ಕಾತು’’ನ್ತಿ ಇದಂ ನ ಯುಜ್ಜತಿ. ತೇ ಪನೇತ್ಥ ಏವಂ ವದನ್ತಿ ‘‘ಯಸ್ಮಾ ನಿಸ್ಸಜ್ಜಿತಬ್ಬವತ್ಥುಂ ಅನಿಸ್ಸಜ್ಜಿತ್ವಾವ ಉಪರೂಪರಿ ಅಞ್ಞಂ ಅಞ್ಞಂಯೇವ ಕತಂ, ತಸ್ಮಾ ಪರಿಚ್ಛೇದಾಭಾವತೋ ಇಧ ನಿಸ್ಸಜ್ಜಿತುಂ ಅವತ್ವಾ ‘ನ ಸಕ್ಕಾ ಕೇನಚಿ ಉಪಾಯೇನ ಕಪ್ಪಿಯೋ ಕಾತು’ನ್ತಿ ವುತ್ತಂ, ಪರಿಚ್ಛೇದಾಭಾವತೋಯೇವ ‘ಮೂಲೇ ಮೂಲಸಾಮಿಕಾನಂ, ಪತ್ತೇ ಚ ಪತ್ತಸಾಮಿಕಾನಂ ದಿನ್ನೇ ಕಪ್ಪಿಯೋ ಹೋತೀ’ತಿ ಚ ನ ವುತ್ತ’’ನ್ತಿ. ಯದಿ ಪಟಿಗ್ಗಹಿತರೂಪಿಯಂ ಅನಿಸ್ಸಜ್ಜಿತ್ವಾ ಚೇತಾಪಿತಂ ಕಪ್ಪಿಯಭಣ್ಡಮ್ಪಿ ಸಙ್ಘಸ್ಸ ನಿಸ್ಸಟ್ಠಂ ಪರಿಭುಞ್ಜಿತುಂ ವಟ್ಟತಿ, ಏವಂ ಸನ್ತೇ ಇಧಾಪಿ ಅವಸಾನವತ್ಥುಂ ಗಹೇತ್ವಾ ಸಙ್ಘಸ್ಸ ನಿಸ್ಸಟ್ಠಂ ಕಸ್ಮಾ ನ ವಟ್ಟತಿ, ‘‘ಯೋ ಪನ ರೂಪಿಯಂ ಉಗ್ಗಣ್ಹಿತ್ವಾ…ಪೇ… ಪತ್ತೇ ಚ ಪತ್ತಸಾಮಿಕಾನಂ ದಿನ್ನೇ ಕಪ್ಪಿಯೋ ಹೋತೀ’’ತಿ ಇಮಿನಾಪಿ ಪಟಿಗ್ಗಹಿತರೂಪಿಯಂ ಅನಿಸ್ಸಜ್ಜಿತ್ವಾ ಚೇತಾಪಿತಂ ಕಪ್ಪಿಯಭಣ್ಡಮ್ಪಿ ಸಙ್ಘಸ್ಸ ನಿಸ್ಸಟ್ಠಂ ಪರಿಭುಞ್ಜಿತುಂ ನ ವಟ್ಟತೀತಿ ಸಿದ್ಧಂ. ಯದಿ ತಂ ನಿಸ್ಸಟ್ಠಂ ಪರಿಭುಞ್ಜಿತುಂ ವಟ್ಟೇಯ್ಯ, ‘‘ಮೂಲೇ ಮೂಲಸಾಮಿಕಾನಂ, ಪತ್ತೇ ಚ ಪತ್ತಸಾಮಿಕಾನಂ ದಿನ್ನೇ ಕಪ್ಪಿಯೋ ಹೋತೀ’’ತಿ ನ ವದೇಯ್ಯ. ಅಪರೇ ಪನೇತ್ಥ ಏವಂ ವದನ್ತಿ ‘‘ಯದಿ ಸಙ್ಘಸ್ಸ ನಿಸ್ಸಟ್ಠಂ ಹೋತಿ, ರೂಪಿಯಪಟಿಗ್ಗಾಹಕಸ್ಸ ನ ವಟ್ಟತಿ, ತಸ್ಮಾ ತಸ್ಸಪಿ ಯಥಾ ವಟ್ಟತಿ, ತಥಾ ದಸ್ಸನತ್ಥಂ ‘ಮೂಲೇ ಮೂಲಸಾಮಿಕಾನ’ನ್ತಿಆದಿ ವುತ್ತ’’ನ್ತಿ.

ದುತಿಯಪತ್ತಸದಿಸೋಯೇವಾತಿ ಇಮಿನಾ ಪಞ್ಚನ್ನಮ್ಪಿ ಸಹಧಮ್ಮಿಕಾನಂ ನ ಕಪ್ಪತೀತಿ ದಸ್ಸೇತಿ. ತತ್ಥ ಕಾರಣಮಾಹ ‘‘ಮೂಲಸ್ಸ ಸಮ್ಪಟಿಚ್ಛಿತತ್ತಾ’’ತಿ. ಅಥ ಮೂಲಸ್ಸ ಸಮ್ಪಟಿಚ್ಛಿತತ್ತಾ ರೂಪಿಯಪಟಿಗ್ಗಾಹಕಸ್ಸ ತಾವ ಅಕಪ್ಪಿಯೋ ಹೋತು, ಸೇಸಾನಂ ಪನ ಕಸ್ಮಾ ನ ಕಪ್ಪತೀತಿ ಮಞ್ಞಮಾನೋ ಪುಚ್ಛತಿ ‘‘ಕಸ್ಮಾ ಸೇಸಾನಂ ನ ಕಪ್ಪತೀ’’ತಿ. ಕಾರಣಮಾಹ ‘‘ಮೂಲಸ್ಸ ಅನಿಸ್ಸಟ್ಠತ್ತಾ’’ತಿ. ಪತ್ತಸ್ಸ ಕಪ್ಪಿಯಭಾವೇಪಿ ಸಮ್ಪಟಿಚ್ಛಿತಮೂಲಸ್ಸ ನಿಸ್ಸಜ್ಜಿತಬ್ಬಸ್ಸ ಅನಿಸ್ಸಟ್ಠತ್ತಾ ತೇನ ಗಹಿತಪತ್ತೋ ಸೇಸಾನಮ್ಪಿ ನ ಕಪ್ಪತಿ. ಯದಿ ಹಿ ತೇನ ಸಮ್ಪಟಿಚ್ಛಿತಮೂಲಂ ಸಙ್ಘಮಜ್ಝೇ ನಿಸ್ಸಟ್ಠಂ ಸಿಯಾ, ತೇನ ಕಪ್ಪಿಯೇನ ಕಮ್ಮೇನ ಆರಾಮಿಕಾದೀಹಿ ಗಹೇತ್ವಾ ದಿನ್ನಪತ್ತೋ ರೂಪಿಯಪಟಿಗ್ಗಾಹಕಂ ಠಪೇತ್ವಾ ಸೇಸಾನಂ ವಟ್ಟತಿ. ಅಪರೇ ಪನ ‘‘ಮೂಲಂ ಸಮ್ಪಟಿಚ್ಛಿತ್ವಾ ಗಹಿತಪತ್ತೋಪಿ ಯದಿ ಸಙ್ಘಸ್ಸ ನಿಸ್ಸಟ್ಠೋ, ಸೇಸಾನಂ ಕಪ್ಪತೀ’’ತಿ ವದನ್ತಿ. ಏವಂ ಸನ್ತೇ ‘‘ಮೂಲಸ್ಸ ಅನಿಸ್ಸಟ್ಠತ್ತಾ’’ತಿ ನ ವತ್ತಬ್ಬಂ, ‘‘ಸಙ್ಘಸ್ಸ ಅನಿಸ್ಸಟ್ಠತ್ತಾ’’ತಿ ಏವಮೇವ ವತ್ತಬ್ಬಂ.

ದುಬ್ಬಿಚಾರಿತತ್ತಾತಿ ಇಮಿನಾ ರೂಪಿಯಸಂವೋಹಾರೋ ಅನೇನ ಕತೋತಿ ದಸ್ಸೇತಿ. ಅಞ್ಞೇಸಂ ಪನ ವಟ್ಟತೀತಿ ಯಸ್ಮಾನೇನ ರೂಪಿಯಸಂವೋಹಾರಮತ್ತಮೇವ ಕತಂ, ನ ಮೂಲಂ ಸಮ್ಪಟಿಚ್ಛಿತಂ, ತಸ್ಮಾ ವಿನಯಕಮ್ಮವಸೇನ ಸಙ್ಘಸ್ಸ ನಿಸ್ಸಟ್ಠಕಾಲತೋ ಪಟ್ಠಾಯ ಅಞ್ಞೇಸಂ ವಟ್ಟತಿ. ಇಮಸ್ಮಿಂಯೇವ ಚ ಅತ್ಥೇ ಪಮಾಣಂ ದಸ್ಸೇನ್ತೋ ‘‘ಮಹಾಸುಮತ್ಥೇರಸ್ಸ ಕಿರಾ’’ತಿಆದಿಮಾಹ. ಅಪರೇ ಪನ ‘‘ದುಬ್ಬಿಚಾರಿತತ್ತಾತಿ ಇಮಿನಾ ಕೇವಲಂ ಗಿಹಿಸನ್ತಕಭಾವೇನ ಠಿತೇ ದುಬ್ಬಿಚಾರಿತಮತ್ತಂ ವುತ್ತಂ, ನ ರೂಪಿಯಸಂವೋಹಾರಾಪಜ್ಜನಂ, ತಸ್ಮಾ ರೂಪಿಯಸಂವೋಹಾರಾಭಾವತೋ ಸೋ ಪತ್ತೋ ನಿಸ್ಸಜ್ಜಿತುಂ ನ ಸಕ್ಕಾತಿ ತಸ್ಸ ನ ಕಪ್ಪತಿ, ಅನಿಸ್ಸಟ್ಠೋಪಿ ಅಞ್ಞೇಸಂ ಕಪ್ಪತಿ. ಅನಿಸ್ಸಟ್ಠಸ್ಸೇವ ಚ ಅಞ್ಞೇಸಂ ಕಪ್ಪಿಯಭಾವದಸ್ಸನತ್ಥಂ ‘ಮಹಾಸುಮತ್ಥೇರಸ್ಸ ಕಿರಾ’ತಿಆದಿವತ್ಥೂನಿ ಉದಾಹಟಾನಿ. ಸಙ್ಘಸ್ಸ ನಿಸ್ಸಜ್ಜೀತಿ ಇದಞ್ಚ ಅಞ್ಞೇಸಂ ಕಪ್ಪಿಯತ್ತಾ ಕೇವಲಂ ಸಙ್ಘಸ್ಸ ಪರಿಚ್ಚತ್ತಭಾವಂ ಸನ್ಧಾಯ ವುತ್ತಂ, ನ ಪನ ವಿನಯಕಮ್ಮವಸೇನ ಸಙ್ಘಸ್ಸ ನಿಸ್ಸಟ್ಠಭಾವಂ. ಇಮಸ್ಸ ಚ ಅತ್ಥಸ್ಸ ಸಪ್ಪಿಸ್ಸ ಪೂರೇತ್ವಾತಿ ಇದಂ ವಚನಂ ಸಾಧಕ’’ನ್ತಿ ವದನ್ತಿ.

೫೯೧. ರೂಪಿಯಪಟಿಗ್ಗಹಣರೂಪಿಯಸಂವೋಹಾರೇಸು ಯೇನ ಏಕೇಕಮೇವ ಕತಂ, ತೇನ ತತ್ಥ ತತ್ಥ ವುತ್ತನಯೇನೇವ ನಿಸ್ಸಜ್ಜಿತಬ್ಬಂ. ಯೇನ ಪನ ಪಟಿಗ್ಗಹಿತರೂಪಿಯೇನೇವ ಸಂವೋಹಾರೋ ಕತೋ, ತೇನ ಕಥಂ ನಿಸ್ಸಜ್ಜಿತಬ್ಬನ್ತಿ? ನಯಿದಂ ದುಕ್ಕರಂ, ‘‘ಅಹಂ, ಭನ್ತೇ, ನಾನಪ್ಪಕಾರಕಂ ರೂಪಿಯಸಂವೋಹಾರಂ ಸಮಾಪಜ್ಜಿ’’ನ್ತಿ ಏವಮೇವ ನಿಸ್ಸಜ್ಜಿತಬ್ಬಂ. ‘‘ಇಮಸ್ಮಿಂ ಸಿಕ್ಖಾಪದೇಪಿ ‘ಅರೂಪಿಯೇ ರೂಪಿಯಸಞ್ಞೀ, ಆಪತ್ತಿ ದುಕ್ಕಟಸ್ಸಾ’ತಿಆದಿತ್ತಿಕಸ್ಸ ಅವಸಾನಪದೇ ಅನಾಪತ್ತಿಯಾ ವುತ್ತತ್ತಾ ಕಪ್ಪಿಯವತ್ಥುವಸೇನೇವ ಇದಂ ತಿಕಂ ವುತ್ತ’’ನ್ತಿ ತೀಸುಪಿ ಗಣ್ಠಿಪದೇಸು ವುತ್ತಂ. ಕೇಚಿ ಪನ ‘‘ಅರೂಪಿಯಗ್ಗಹಣೇನ ಕಪ್ಪಿಯವತ್ಥುದುಕ್ಕಟವತ್ಥೂನಂ ಸಙ್ಗಹೋತಿ ಪುರಿಮಪದದ್ವಯಂ ಕಪ್ಪಿಯವತ್ಥುದುಕ್ಕಟವತ್ಥೂನಂ ವಸೇನ ವುತ್ತಂ, ಅವಸಾನಪದಮೇವ ಕಪ್ಪಿಯವತ್ಥುವಸೇನ ವುತ್ತ’’ನ್ತಿ ವದನ್ತಿ, ತಂ ನ ಯುಜ್ಜತಿ ಅನಾಪತ್ತಿಮಿಸ್ಸಿತೇ ಅವಸಾನತ್ತಿಕೇ ಸಞ್ಞಾನಾನತ್ತಂ ಠಪೇತ್ವಾ ವತ್ಥುನಾನತ್ತಸ್ಸ ಅಭಾವತೋ. ದುಕ್ಕಟವತ್ಥುನಾ ಪನ ದುಕ್ಕಟವತ್ಥುನೋ ಚೇತಾಪನಂ ನೇವ ಇಧ, ನ ತತ್ಥ ಪಾಳಿಯಂ ವುತ್ತನ್ತಿ ವಚನಮೇತ್ಥ ಸಾಧಕಂ. ಯಂ ಅತ್ತನೋ ಧನೇನ ಪರಿವತ್ತತಿ, ತಸ್ಸ ವಾ ಧನಸ್ಸ ವಾ ರೂಪಿಯಭಾವೋ ಚೇವ, ಪರಿವತ್ತನಞ್ಚಾತಿ ಇಮಾನೇತ್ಥ ದ್ವೇ ಅಙ್ಗಾನಿ.

ರೂಪಿಯಸಂವೋಹಾರಸಿಕ್ಖಾಪದವಣ್ಣನಾ ನಿಟ್ಠಿತಾ.

೧೦. ಕಯವಿಕ್ಕಯಸಿಕ್ಖಾಪದವಣ್ಣನಾ

೫೯೩. ಕಯವಿಕ್ಕಯಸಿಕ್ಖಾಪದೇ ಪಾಳಿಯಂ ಜಾನಾಹೀತಿ ಏತ್ಥ ಉಪಧಾರೇಹೀತಿ ಅತ್ಥೋ, ಸುಟ್ಠು ಉಪಧಾರೇತ್ವಾ ಗಣ್ಹ, ಇದಂ ನ ಮನಾಪನ್ತಿ ಪುನ ದಾತುಂ ನ ಸಕ್ಖಿಸ್ಸಸೀತಿ ಅಧಿಪ್ಪಾಯೋ.

೫೯೪-೫೯೫. ಕಯನ್ತಿ ಪರಭಣ್ಡಸ್ಸ ಗಹಣಂ. ವಿಕ್ಕಯನ್ತಿ ಅತ್ತನೋ ಭಣ್ಡಸ್ಸ ದಾನಂ. ತೇನಾಹ ‘‘ಇಮಿನಾ ಇಮಂ ದೇಹೀ’’ತಿಆದಿ. ಯಸ್ಮಾ ಕಯಿತಂ ನಾಮ ಪರಸ್ಸ ಹತ್ಥತೋ ಗಹಿತಂ ವುಚ್ಚತಿ, ವಿಕ್ಕೀತಞ್ಚ ಪರಸ್ಸ ಹತ್ಥೇ ದಿನ್ನಂ, ತಸ್ಮಾ ‘‘ಕಯಿತಞ್ಚ ಹೋತಿ ಪರಭಣ್ಡಂ ಅತ್ತನೋ ಹತ್ಥಗತಂ ಕರೋನ್ತೇನ, ವಿಕ್ಕೀತಞ್ಚ ಅತ್ತನೋ ಭಣ್ಡಂ ಪರಹತ್ಥಗತಂ ಕರೋನ್ತೇನಾ’’ತಿ ವುತ್ತಂ. ಯದಿ ಏವಂ ಪಾಳಿಯಂ ಪರತೋ ‘‘ಕಯಿತಞ್ಚ ಹೋತಿ ವಿಕ್ಕಯಿತಞ್ಚಾ’’ತಿ ವತ್ವಾ ‘‘ಅತ್ತನೋ ಭಣ್ಡಂ ಪರಹತ್ಥಗತಂ ಪರಭಣ್ಡಂ ಅತ್ತನೋ ಹತ್ಥಗತ’’ನ್ತಿ ಕಸ್ಮಾ ವುತ್ತನ್ತಿ ಆಹ ‘‘ಇಮಿನಾ ಇಮನ್ತಿಆದಿವಚನಾನುರೂಪತೋ ಪನಾ’’ತಿಆದಿ. ಇಮಿನಾತಿ ಹಿ ಸಕಸನ್ತಕಂ ವುತ್ತಂ. ತದನುರೂಪತೋ ಪಾಳಿಯಂ ಪಠಮಂ ಅತ್ತನೋ ಭಣ್ಡಂ ದಸ್ಸಿತಂ, ನ ಕಯವಿಕ್ಕಯಪದಾನುರೂಪತೋ. ತಞ್ಹಿ ವಿಪರೀತತೋ ಪರಸನ್ತಕಗ್ಗಹಣಂ ಪುರಕ್ಖತ್ವಾ ಠಿತಂ.

ಕಾಮಂ ಸೇಸಞಾತಕೇಪಿ ‘‘ಇಮಂ ದೇಹೀ’’ತಿ ವದತೋ ವಿಞ್ಞತ್ತಿ ನ ಹೋತಿ, ಸದ್ಧಾದೇಯ್ಯವಿನಿಪಾತನಸ್ಸಪಿ ಪನ ಅಭಾವಂ ದಸ್ಸೇತುಕಾಮೋ ‘‘ಮಾತರಂ ಪನ ಪಿತರಂ ವಾ’’ತಿ ಆಹ. ವಿಞ್ಞತ್ತಿ ನ ಹೋತೀತಿ ಇದಂ ವಿಸುಂ ವಿಞ್ಞಾಪನಂ ಸನ್ಧಾಯ ವುತ್ತಂ. ಅಞ್ಞಂ ಕಿಞ್ಚಿ ಅವತ್ವಾ ಏವಂ ವದನ್ತೋ ಅಞ್ಞಾತಕಂ ವಿಞ್ಞಾಪೇತಿ ನಾಮಾತಿ ಆಹ – ‘‘ಅಞ್ಞಾತಕಂ ‘ಇಮಂ ದೇಹೀ’ತಿ ವದತೋ ವಿಞ್ಞತ್ತೀ’’ತಿ. ಅಞ್ಞಂ ಕಿಞ್ಚಿ ಅವತ್ವಾ ‘‘ಇಮಂ ಗಣ್ಹಾಹೀ’’ತಿ ದಿನ್ನಂ ಅಞ್ಞಾತಕಸ್ಸ ದಿನ್ನಂ ನಾಮ ಹೋತೀತಿ ವುತ್ತಂ ‘‘ಸದ್ಧಾದೇಯ್ಯವಿನಿಪಾತನ’’ನ್ತಿ. ತಿಸ್ಸೋ ಆಪತ್ತಿಯೋತಿ ಅಞ್ಞಾತಕವಿಞ್ಞತ್ತಿಸದ್ಧಾದೇಯ್ಯವಿನಿಪಾತನಕಯವಿಕ್ಕಯಾಪತ್ತಿಸಙ್ಖಾತಾ ತಿಸ್ಸೋ ಆಪತ್ತಿಯೋ.

ಇಮಂ ನಾಮ ಕರೋಹೀತಿ ವದತಿ, ವಟ್ಟತೀತಿ ಏತ್ಥ ಭುತ್ತೋಸಿ, ಇದಾನಿ ಕಸ್ಮಾ ನ ಕರೋಸೀತಿ ವತ್ಥುಮ್ಪಿ ವಟ್ಟತಿ. ‘‘ನಿಸ್ಸಗ್ಗಿಯಂ ಪಾಚಿತ್ತಿಯ’’ನ್ತಿ ಕಿಞ್ಚಾಪಿ ಸತಿಯೇವ ನಿಸ್ಸಗ್ಗಿಯವತ್ಥುಮ್ಹಿ ಪಾಚಿತ್ತಿಯಂ ವುತ್ತಂ, ಅಸತಿಪಿ ಪನ ತಸ್ಮಿಂ ಪಾಚಿತ್ತಿಯನ್ತಿ ಇದಂ ಅಟ್ಠಕಥಾಪಮಾಣೇನ ಗಹೇತಬ್ಬನ್ತಿ ದಸ್ಸೇತುಂ ‘‘ಕಿಞ್ಚಾಪೀ’’ತಿಆದಿ ವುತ್ತಂ. ಪರಿಭುತ್ತೇತಿ ಸಪ್ಪಿಆದಿಂ ಸನ್ಧಾಯ ವುತ್ತಂ. ಯಂ ಅತ್ತನೋ ಧನೇನ ಪರಿವತ್ತೇತಿ, ಯೇನ ಚ ಪರಿವತ್ತೇತಿ, ತೇಸಂ ಕಪ್ಪಿಯವತ್ಥುತಾ, ಅಸಹಧಮ್ಮಿಕತಾ, ಕಯವಿಕ್ಕಯಾಪಜ್ಜನಞ್ಚಾತಿ ಇಮಾನೇತ್ಥ ತೀಣಿ ಅಙ್ಗಾನಿ.

ಕಯವಿಕ್ಕಯಸಿಕ್ಖಾಪದವಣ್ಣನಾ ನಿಟ್ಠಿತಾ.

ನಿಟ್ಠಿತೋ ಕೋಸಿಯವಗ್ಗೋ ದುತಿಯೋ.