೧. ಕೋಸಿಯಸಿಕ್ಖಾಪದವಣ್ಣನಾ

೫೪೨. ಪಾಳಿಯಂ ‘‘ಕೋಸಿಯಕಾರಕೇ’’ತಿ ಏತ್ಥ ಕೋಸಂ ಕರೋನ್ತೀತಿ ಕೋಸಕಾರಕಾತಿ ಲದ್ಧವೋಹಾರಾನಂ ಪಾಣಕಾನಂ ಕೋಸತೋ ನಿಬ್ಬತ್ತಂ ಕೋಸಿಯಂ, ತಂ ಕರೋನ್ತೀತಿ ಕೋಸಿಯಕಾರಕಾ, ತನ್ತವಾಯಾ. ಸಂಹನನಂ ಸಙ್ಘಾತೋ, ವಿನಾಸೋತಿ ಅತ್ಥೋ. ಕೋಸಿಯಮಿಸ್ಸಕನ್ತಿ ಕೋಸಿಯತನ್ತುನಾ ಮಿಸ್ಸಂ. ‘‘ಅವಾಯಿಮ’’ನ್ತಿ ವುತ್ತತ್ತಾ ವಾಯಿತ್ವಾ ಚೇ ಕರೋನ್ತಿ, ಅನಾಪತ್ತಿ. ಅನಾಪತ್ತಿ ವಿತಾನಂ ವಾತಿಆದಿನಾ ವಿತಾನಾದೀನಂ ಅತ್ಥಾಯ ಕರಣೇಪಿ ತೇನಾಕಾರೇನ ಪರಿಭೋಗೇಪಿ ಅನಾಪತ್ತಿ ವುತ್ತಾ.

ಏವಮ್ಪಿ ಮಿಸ್ಸೇತ್ವಾ ಕತಮೇವ ಹೋತೀತಿ ಇಮಿನಾ ವಾತೇನ ಆಹರಿತ್ವಾ ಪಾತಿತೇಪಿ ಅಚಿತ್ತಕತ್ತಾ ಆಪತ್ತಿಯೇವಾತಿ ದಸ್ಸೇತಿ. ಕೋಸಿಯಮಿಸ್ಸಕತಾ, ಅತ್ತನೋ ಅತ್ಥಾಯ ಸನ್ಥತಸ್ಸ ಕರಣಂ ಕಾರಾಪನಂ, ಪಟಿಲಾಭೋ ಚಾತಿ ಇಮಾನೇತ್ಥ ತೀಣಿ ಅಙ್ಗಾನಿ.

ಕೋಸಿಯಸಿಕ್ಖಾಪದವಣ್ಣನಾ ನಿಟ್ಠಿತಾ.

೫೪೭. ಸುದ್ಧಕಾಳಕಸಿಕ್ಖಾಪದಂ ಉತ್ತಾನತ್ಥಮೇವ.