ಪಾರಿವಾಸಿಕಕ್ಖನ್ಧಕಕಥಾವಣ್ಣನಾ

೨೭೪೮. ಏವಂ ಮಹಾವಗ್ಗವಿನಿಚ್ಛಯಂ ಸಙ್ಖೇಪೇನ ದಸ್ಸೇತ್ವಾ ಚೂಳವಗ್ಗಾಗತವಿನಿಚ್ಛಯಂ ದಸ್ಸೇತುಮಾಹ ‘‘ತಜ್ಜನೀಯ’’ನ್ತಿಆದಿ. ತಜ್ಜನೀಯನ್ತಿ ಕಲಹಕಾರಕಾನಂ ಭಿಕ್ಖೂನಂ ತತೋ ವಿರಮನತ್ಥಾಯ ನಿಗ್ಗಹವಸೇನ ಅನುಞ್ಞಾತಂ ಞತ್ತಿಚತುತ್ಥಂ ತಜ್ಜನೀಯಕಮ್ಮಞ್ಚ. ನಿಯಸ್ಸನ್ತಿ ಬಾಲಸ್ಸ ಅಬ್ಯತ್ತಸ್ಸ ಆಪತ್ತಿಬಹುಲಸ್ಸ ಅನಪದಾನಸ್ಸ ಅನನುಲೋಮಿಕೇಹಿ ಗಿಹಿಸಂಸಗ್ಗೇಹಿ ಸಂಸಟ್ಠಸ್ಸ ವಿಹರತೋ ಭಿಕ್ಖುನೋ ನಿಗ್ಗಹವಸೇನ ನಿಸ್ಸಾಯ ವಸನತ್ಥಾಯ ಕಾತುಂ ಅನುಞ್ಞಾತಂ ಞತ್ತಿಚತುತ್ಥಂ ನಿಯಸ್ಸಕಮ್ಮಞ್ಚ.

ಪಬ್ಬಾಜನ್ತಿ ಕುಲದೂಸಕಸ್ಸ ಭಿಕ್ಖುನೋ ಯತ್ಥ ತೇನ ಕುಲದೂಸನಂ ಕತಂ, ತತ್ಥ ನ ಲಭಿತಬ್ಬಆವಾಸತ್ಥಾಯ ನಿಗ್ಗಹವಸೇನ ಅನುಞ್ಞಾತಂ ಞತ್ತಿಚತುತ್ಥಂ ಪಬ್ಬಾಜನೀಯಕಮ್ಮಞ್ಚ. ಪಟಿಸಾರಣನ್ತಿ ಸದ್ಧಸ್ಸ ಉಪಾಸಕಸ್ಸ ದಾಯಕಸ್ಸ ಕಾರಕಸ್ಸ ಸಙ್ಘುಪಟ್ಠಾಕಸ್ಸ ಜಾತಿಆದೀಹಿ ಅಕ್ಕೋಸವತ್ಥೂಹಿ ಅಕ್ಕೋಸಕಸ್ಸ ಭಿಕ್ಖುನೋ ತಂಖಮಾಪನತ್ಥಾಯ ನಿಗ್ಗಹವಸೇನ ಅನುಞ್ಞಾತಂ ಞತ್ತಿಚತುತ್ಥಂ ಪಟಿಸಾರಣೀಯಕಮ್ಮಞ್ಚ.

ತಿವಿಧುಕ್ಖೇಪನನ್ತಿ ಆಪತ್ತಿಯಾ ಅದಸ್ಸನೇ, ಆಪತ್ತಿಯಾ ಅಪ್ಪಟಿಕಮ್ಮೇ, ಪಾಪಿಕಾಯ ದಿಟ್ಠಿಯಾ ಅಪ್ಪಟಿನಿಸ್ಸಗ್ಗೇ ಚ ತತೋ ಓರಮಿತುಂ ನಿಗ್ಗಹವಸೇನ ಅನುಞ್ಞಾತಂ ಞತ್ತಿಚತುತ್ಥಂ ತಿವಿಧಂ ಉಕ್ಖೇಪನೀಯಕಮ್ಮಞ್ಚಾತಿ. ದೀಪಯೇತಿ ಪಾಳಿಯಾ, ಅಟ್ಠಕಥಾಯ ಚ ವುತ್ತನಯೇನ ಪಕಾಸೇಯ್ಯಾತಿ ಅತ್ಥೋ.

ತಜ್ಜನೀಯಾದಿಕಮ್ಮಾನಂ ಓಸಾರಣನಿಸ್ಸಾರಣವಸೇನ ಪಚ್ಚೇಕಂ ದುವಿಧತ್ತೇಪಿ ತಂ ಭೇದಂ ಅನಾಮಸಿತ್ವಾ ಕೇವಲಂ ಜಾತಿವಸೇನ ‘‘ಸತ್ತ ಕಮ್ಮಾನೀ’’ತಿ ವುತ್ತನ್ತಿ ವೇದಿತಬ್ಬಂ. ಯಥಾ ದಸ್ಸಿತೋ ಪನೇತೇಸಂ ವಿಸೇಸೋ ಅತ್ಥುಪ್ಪತ್ತಿವಸೇನಾತಿ ದಟ್ಠಬ್ಬೋ. ವಿತ್ಥಾರೋ ಪನೇಸಂ ಕಮ್ಮಕ್ಖನ್ಧಕತೋ ವೇದಿತಬ್ಬೋ.

೨೭೪೯. ಖನ್ಧಕೇ ಕಮ್ಮಸಙ್ಖಾತೇ ಖನ್ಧಕೇ ಆಗತಾನಿ ತೇಚತ್ತಾಲೀಸ ವತ್ತಾನಿ. ತದನನ್ತರೇತಿ ತಸ್ಸ ಕಮ್ಮಕ್ಖನ್ಧಕಸ್ಸ ಅನನ್ತರೇ. ಖನ್ಧಕೇತಿ ಪಾರಿವಾಸಿಕಕ್ಖನ್ಧಕೇ. ನವ ಅಧಿಕಾನಿ ಯೇಸಂ ತೇ ನವಾಧಿಕಾನಿ ತಿಂಸೇವ ವತ್ತಾನಿ, ಏಕೂನಚತ್ತಾಲೀಸ ವತ್ತಾನೀತಿ ವುತ್ತಂ ಹೋತಿ.

ಕಮ್ಮಕ್ಖನ್ಧಕೇ ತಾವ –

‘‘ಆಪತ್ತಿಯಾ ಅದಸ್ಸನೇ ಉಕ್ಖೇಪನೀಯಕಮ್ಮಕತೇನ, ಭಿಕ್ಖವೇ, ಭಿಕ್ಖುನಾ ಸಮ್ಮಾ ವತ್ತಿತಬ್ಬಂ. ತತ್ರಾಯಂ ಸಮ್ಮಾವತ್ತನಾ – ನ ಉಪಸಮ್ಪಾದೇತಬ್ಬಂ, ನ ನಿಸ್ಸಯೋ ದಾತಬ್ಬೋ, ನ ಸಾಮಣೇರೋ ಉಪಟ್ಠಾಪೇತಬ್ಬೋ, ನ ಭಿಕ್ಖುನೋವಾದಕಸಮ್ಮುತಿ ಸಾದಿತಬ್ಬಾ, ಸಮ್ಮತೇನಾಪಿ ಭಿಕ್ಖುನಿಯೋ ನ ಓವದಿತಬ್ಬಾ, ಯಾಯ ಆಪತ್ತಿಯಾ ಸಙ್ಘೇನ ಆಪತ್ತಿಯಾ ಅದಸ್ಸನೇ ಉಕ್ಖೇಪನೀಯಕಮ್ಮಂ ಕತಂ ಹೋತಿ, ಸಾ ಆಪತ್ತಿ ನ ಆಪಜ್ಜಿತಬ್ಬಾ, ಅಞ್ಞಾ ವಾ ತಾದಿಸಿಕಾ, ತತೋ ವಾ ಪಾಪಿಟ್ಠತರಾ, ಕಮ್ಮಂ ನ ಗರಹಿತಬ್ಬಂ, ಕಮ್ಮಿಕಾ ನ ಗರಹಿತಬ್ಬಾ, ನ ಪಕತತ್ತಸ್ಸ ಭಿಕ್ಖುನೋ ಅಭಿವಾದನಂ ಪಚ್ಚುಟ್ಠಾನಂ ಅಞ್ಜಲಿಕಮ್ಮಂ ಸಾಮೀಚಿಕಮ್ಮಂ ಆಸನಾಭಿಹಾರೋ ಸೇಯ್ಯಾಭಿಹಾರೋ ಪಾದೋದಕಂ ಪಾದಪೀಠಂ ಪಾದಕಥಲಿಕಂ ಪತ್ತಚೀವರಪಟಿಗ್ಗಹಣಂ ನಹಾನೇ ಪಿಟ್ಠಿಪರಿಕಮ್ಮಂ ಸಾದಿತಬ್ಬಂ, ನ ಪಕತತ್ತೋ ಭಿಕ್ಖು ಸೀಲವಿಪತ್ತಿಯಾ ಅನುದ್ಧಂಸೇತಬ್ಬೋ, ನ ಆಚಾರವಿಪತ್ತಿಯಾ ಅನುದ್ಧಂಸೇತಬ್ಬೋ, ನ ದಿಟ್ಠಿವಿಪತ್ತಿಯಾ ಅನುದ್ಧಂಸೇತಬ್ಬೋ, ನ ಆಜೀವವಿಪತ್ತಿಯಾ ಅನುದ್ಧಂಸೇತಬ್ಬೋ, ನ ಭಿಕ್ಖು ಭಿಕ್ಖೂಹಿ ಭೇದೇತಬ್ಬೋ, ನ ಗಿಹಿದ್ಧಜೋ ಧಾರೇತಬ್ಬೋ, ನ ತಿತ್ಥಿಯದ್ಧಜೋ ಧಾರೇತಬ್ಬೋ, ನ ತಿತ್ಥಿಯಾ ಸೇವಿತಬ್ಬಾ, ಭಿಕ್ಖೂ ಸೇವಿತಬ್ಬಾ, ಭಿಕ್ಖುಸಿಕ್ಖಾಯ ಸಿಕ್ಖಿತಬ್ಬಂ, ನ ಪಕತತ್ತೇನ ಭಿಕ್ಖುನಾ ಸದ್ಧಿಂ ಏಕಚ್ಛನ್ನೇ ಆವಾಸೇ ವತ್ಥಬ್ಬಂ, ನ ಏಕಚ್ಛನ್ನೇ ಅನಾವಾಸೇ ವತ್ಥಬ್ಬಂ, ನ ಏಕಚ್ಛನ್ನೇ ಆವಾಸೇ ವಾ ಅನಾವಾಸೇ ವಾ ವತ್ಥಬ್ಬಂ, ಪಕತತ್ತಂ ಭಿಕ್ಖುಂ ದಿಸ್ವಾ ಆಸನಾ ವುಟ್ಠಾತಬ್ಬಂ, ನ ಪಕತತ್ತೋ ಭಿಕ್ಖು ಆಸಾದೇತಬ್ಬೋ ಅನ್ತೋ ವಾ ಬಹಿ ವಾ, ನ ಪಕತತ್ತಸ್ಸ ಭಿಕ್ಖುನೋ ಉಪೋಸಥೋ ಠಪೇತಬ್ಬೋ, ನ ಪವಾರಣಾ ಠಪೇತಬ್ಬಾ, ನ ಸವಚನೀಯಂ ಕಾತಬ್ಬಂ, ನ ಅನುವಾದೋ ಪಟ್ಠಪೇತಬ್ಬೋ, ನ ಓಕಾಸೋ ಕಾರೇತಬ್ಬೋ, ನ ಚೋದೇತಬ್ಬೋ, ನ ಸಾರೇತಬ್ಬೋ, ನ ಭಿಕ್ಖೂಹಿ ಸಮ್ಪಯೋಜೇತಬ್ಬ’’ನ್ತಿ (ಚೂಳವ. ೫೧) –

ಏವಂ ಚೇತಾನಿ ತೇಚತ್ತಾಲೀಸ ವತ್ತಾನಿ ಸನ್ಧಾಯ ವುತ್ತಂ ‘‘ತೇಚತ್ತಾಲೀಸ ವತ್ತಾನಿ, ಖನ್ಧಕೇ ಕಮ್ಮಸಞ್ಞಿತೇ’’ತಿ.

ಪಾರಿವಾಸಿಕಕ್ಖನ್ಧಕೇ (ಚೂಳವ. ೭೬-೮೨) –

‘‘ಪಾರಿವಾಸಿಕೇನ, ಭಿಕ್ಖವೇ, ಭಿಕ್ಖುನಾ ಸಮ್ಮಾ ವತ್ತಿತಬ್ಬಂ. ತತ್ರಾಯಂ ಸಮ್ಮಾವತ್ತನಾ – ನ ಉಪಸಮ್ಪಾದೇತಬ್ಬಂ, ನ ನಿಸ್ಸಯೋ ದಾತಬ್ಬೋ, ನ ಸಾಮಣೇರೋ ಉಪಟ್ಠಾಪೇತಬ್ಬೋ, ನ ಭಿಕ್ಖುನೋವಾದಕಸಮ್ಮುತಿ ಸಾದಿತಬ್ಬಾ, ಸಮ್ಮತೇನಪಿ ಭಿಕ್ಖುನಿಯೋ ನ ಓವದಿತಬ್ಬಾ, ಯಾಯ ಆಪತ್ತಿಯಾ ಸಙ್ಘೇನ ಪರಿವಾಸೋ ದಿನ್ನೋ ಹೋತಿ, ಸಾ ಆಪತ್ತಿ ನ ಆಪಜ್ಜಿತಬ್ಬಾ, ಅಞ್ಞಾ ವಾ ತಾದಿಸಿಕಾ, ತತೋ ವಾ ಪಾಪಿಟ್ಠತರಾ, ಕಮ್ಮಂ ನ ಗರಹಿತಬ್ಬಂ, ಕಮ್ಮಿಕಾ ನ ಗರಹಿತಬ್ಬಾ, ನ ಪಕತತ್ತಸ್ಸ ಭಿಕ್ಖುನೋ ಉಪೋಸಥೋ ಠಪೇತಬ್ಬೋ, ನ ಪವಾರಣಾ ಠಪೇತಬ್ಬಾ, ನ ಸವಚನೀಯಂ ಕಾತಬ್ಬಂ, ನ ಅನುವಾದೋ ಪಟ್ಠಪೇತಬ್ಬೋ, ನ ಓಕಾಸೋ ಕಾರೇತಬ್ಬೋ, ನ ಚೋದೇತಬ್ಬೋ, ನ ಸಾರೇತಬ್ಬೋ, ನ ಭಿಕ್ಖೂಹಿ ಸಮ್ಪಯೋಜೇತಬ್ಬಂ.

‘‘ನ, ಭಿಕ್ಖವೇ, ಪಾರಿವಾಸಿಕೇನ ಭಿಕ್ಖುನಾ ಪಕತತ್ತಸ್ಸ ಭಿಕ್ಖುನೋ ಪುರತೋ ಗನ್ತಬ್ಬಂ, ನ ಪುರತೋ ನಿಸೀದಿತಬ್ಬಂ, ಯೋ ಹೋತಿ ಸಙ್ಘಸ್ಸ ಆಸನಪರಿಯನ್ತೋ ಸೇಯ್ಯಾಪರಿಯನ್ತೋ ವಿಹಾರಪರಿಯನ್ತೋ, ಸೋ ತಸ್ಸ ಪದಾತಬ್ಬೋ, ತೇನ ಚ ಸೋ ಸಾದಿತಬ್ಬೋ.

‘‘ನ, ಭಿಕ್ಖವೇ, ಪಾರಿವಾಸಿಕೇನ ಭಿಕ್ಖುನಾ ಪಕತತ್ತಸ್ಸ ಭಿಕ್ಖುನೋ ಪುರೇಸಮಣೇನ ವಾ ಪಚ್ಛಾಸಮಣೇನ ವಾ ಕುಲಾನಿ ಉಪಸಙ್ಕಮಿತಬ್ಬಾನಿ, ನ ಆರಞ್ಞಿಕಙ್ಗಂ ಸಮಾದಾತಬ್ಬಂ, ನ ಪಿಣ್ಡಪಾತಿಕಙ್ಗಂ ಸಮಾದಾತಬ್ಬಂ, ನ ಚ ತಪ್ಪಚ್ಚಯಾ ಪಿಣ್ಡಪಾತೋ ನೀಹರಾಪೇತಬ್ಬೋ ‘ಮಾ ಮಂ ಜಾನಿಂಸೂ’ತಿ.

‘‘ಪಾರಿವಾಸಿಕೇನ, ಭಿಕ್ಖವೇ, ಭಿಕ್ಖುನಾ ಆಗನ್ತುಕೇನ ಆರೋಚೇತಬ್ಬಂ, ಆಗನ್ತುಕಸ್ಸ ಆರೋಚೇತಬ್ಬಂ, ಉಪೋಸಥೇ ಆರೋಚೇತಬ್ಬಂ, ಪವಾರಣಾಯ ಆರೋಚೇತಬ್ಬಂ, ಸಚೇ ಗಿಲಾನೋ ಹೋತಿ, ದೂತೇನಪಿ ಆರೋಚೇತಬ್ಬಂ.

‘‘ನ, ಭಿಕ್ಖವೇ, ಪಾರಿವಾಸಿಕೇನ ಭಿಕ್ಖುನಾ ಸಭಿಕ್ಖುಕಾ ಆವಾಸಾ ಅಭಿಕ್ಖುಕೋ ಆವಾಸೋ ಗನ್ತಬ್ಬೋ ಅಞ್ಞತ್ರ ಪಕತತ್ತೇನ ಅಞ್ಞತ್ರ ಅನ್ತರಾಯಾ.

‘‘ನ, ಭಿಕ್ಖವೇ, ಪಾರಿವಾಸಿಕೇನ ಭಿಕ್ಖುನಾ ಸಭಿಕ್ಖುಕಾ ಆವಾಸಾ ಅಭಿಕ್ಖುಕೋ ಅನಾವಾಸೋ ಗನ್ತಬ್ಬೋ ಅಞ್ಞತ್ರ ಪಕತತ್ತೇನ ಅಞ್ಞತ್ರ ಅನ್ತರಾಯಾ. ನ, ಭಿಕ್ಖವೇ, ಪಾರಿವಾಸಿಕೇನ ಭಿಕ್ಖುನಾ ಸಭಿಕ್ಖುಕಾ ಆವಾಸಾ ಅಭಿಕ್ಖುಕೋ ಆವಾಸೋ ವಾ ಅನಾವಾಸೋ ವಾ ಗನ್ತಬ್ಬೋ ಅಞ್ಞತ್ರ ಪಕತತ್ತೇನ ಅಞ್ಞತ್ರ ಅನ್ತರಾಯಾ.

‘‘ನ, ಭಿಕ್ಖವೇ, ಪಾರಿವಾಸಿಕೇನ ಭಿಕ್ಖುನಾ ಸಭಿಕ್ಖುಕಾ ಅನಾವಾಸಾ ಅಭಿಕ್ಖುಕೋ ಆವಾಸೋ ಗನ್ತಬ್ಬೋ ಅಞ್ಞತ್ರ ಪಕತತ್ತೇನ ಅಞ್ಞತ್ರ ಅನ್ತರಾಯಾ. ನ, ಭಿಕ್ಖವೇ, ಪಾರಿವಾಸಿಕೇನ ಭಿಕ್ಖುನಾ ಸಭಿಕ್ಖುಕಾ ಅನಾವಾಸಾ ಅಭಿಕ್ಖುಕೋ ಅನಾವಾಸೋ ಗನ್ತಬ್ಬೋ ಅಞ್ಞತ್ರ ಪಕತತ್ತೇನ ಅಞ್ಞತ್ರ ಅನ್ತರಾಯಾ. ನ, ಭಿಕ್ಖವೇ, ಪಾರಿವಾಸಿಕೇನ ಭಿಕ್ಖುನಾ ಸಭಿಕ್ಖುಕಾ ಅನಾವಾಸಾ ಅಭಿಕ್ಖುಕೋ ಆವಾಸೋ ವಾ ಅನಾವಾಸೋ ವಾ ಗನ್ತಬ್ಬೋ ಅಞ್ಞತ್ರ ಪಕತತ್ತೇನ ಅಞ್ಞತ್ರ ಅನ್ತರಾಯಾ.

‘‘ನ, ಭಿಕ್ಖವೇ, ಪಾರಿವಾಸಿಕೇನ ಭಿಕ್ಖುನಾ ಸಭಿಕ್ಖುಕಾ ಆವಾಸಾ ವಾ ಅನಾವಾಸಾ ವಾ ಅಭಿಕ್ಖುಕೋ ಆವಾಸೋ ಗನ್ತಬ್ಬೋ ಅಞ್ಞತ್ರ ಪಕತತ್ತೇನ ಅಞ್ಞತ್ರ ಅನ್ತರಾಯಾ. ನ, ಭಿಕ್ಖವೇ, ಪಾರಿವಾಸಿಕೇನ ಭಿಕ್ಖುನಾ ಸಭಿಕ್ಖುಕಾ ಆವಾಸಾ ವಾ ಅನಾವಾಸಾ ವಾ ಅಭಿಕ್ಖುಕೋ ಅನಾವಾಸೋ ಗನ್ತಬ್ಬೋ ಅಞ್ಞತ್ರ ಪಕತತ್ತೇನ ಅಞ್ಞತ್ರ ಅನ್ತರಾಯಾ. ನ, ಭಿಕ್ಖವೇ, ಪಾರಿವಾಸಿಕೇನ ಭಿಕ್ಖುನಾ ಸಭಿಕ್ಖುಕಾ ಆವಾಸಾ ವಾ ಅನಾವಾಸಾ ವಾ ಅಭಿಕ್ಖುಕೋ ಆವಾಸೋ ವಾ ಅನಾವಾಸೋ ವಾ ಗನ್ತಬ್ಬೋ ಅಞ್ಞತ್ರ ಪಕತತ್ತೇನ ಅಞ್ಞತ್ರ ಅನ್ತರಾಯಾ.

‘‘ನ, ಭಿಕ್ಖವೇ, ಪಾರಿವಾಸಿಕೇನ ಭಿಕ್ಖುನಾ ಸಭಿಕ್ಖುಕಾ ಆವಾಸಾ ಸಭಿಕ್ಖುಕೋ ಆವಾಸೋ ಗನ್ತಬ್ಬೋ ಯತ್ಥಸ್ಸು ಭಿಕ್ಖೂ ನಾನಾಸಂವಾಸಕಾ ಅಞ್ಞತ್ರ ಪಕತತ್ತೇನ ಅಞ್ಞತ್ರ ಅನ್ತರಾಯಾ. ನ, ಭಿಕ್ಖವೇ, ಪಾರಿವಾಸಿಕೇನ ಭಿಕ್ಖುನಾ ಸಭಿಕ್ಖುಕಾ ಆವಾಸಾ ಸಭಿಕ್ಖುಕೋ ಅನಾವಾಸೋ ಗನ್ತಬ್ಬೋ ಯತ್ಥಸ್ಸು ಭಿಕ್ಖೂ ನಾನಾಸಂವಾಸಕಾ ಅಞ್ಞತ್ರ ಪಕತತ್ತೇನ ಅಞ್ಞತ್ರ ಅನ್ತರಾಯಾ. ನ, ಭಿಕ್ಖವೇ, ಪಾರಿವಾಸಿಕೇನ ಭಿಕ್ಖುನಾ ಸಭಿಕ್ಖುಕಾ ಆವಾಸಾ ಸಭಿಕ್ಖುಕೋ ಆವಾಸೋ ವಾ ಅನಾವಾಸೋ ವಾ ಗನ್ತಬ್ಬೋ ಯತ್ಥಸ್ಸು ಭಿಕ್ಖೂ ನಾನಾಸಂವಾಸಕಾ ಅಞ್ಞತ್ರ ಪಕತತ್ತೇನ ಅಞ್ಞತ್ರ ಅನ್ತರಾಯಾ.

‘‘ನ, ಭಿಕ್ಖವೇ, ಪಾರಿವಾಸಿಕೇನ ಭಿಕ್ಖುನಾ ಸಭಿಕ್ಖುಕಾ ಅನಾವಾಸಾ ಸಭಿಕ್ಖುಕೋ ಆವಾಸೋ ಗನ್ತಬ್ಬೋ ಯತ್ಥಸ್ಸು ಭಿಕ್ಖೂ ನಾನಾಸಂವಾಸಕಾ ಅಞ್ಞತ್ರ ಪಕತತ್ತೇನ ಅಞ್ಞತ್ರ ಅನ್ತರಾಯಾ. ನ, ಭಿಕ್ಖವೇ, ಪಾರಿವಾಸಿಕೇನ ಭಿಕ್ಖುನಾ ಸಭಿಕ್ಖುಕಾ ಅನಾವಾಸಾ ಸಭಿಕ್ಖುಕೋ ಅನಾವಾಸೋ ಗನ್ತಬ್ಬೋ ಯತ್ಥಸ್ಸು ಭಿಕ್ಖೂ ನಾನಾಸಂವಾಸಕಾ ಅಞ್ಞತ್ರ ಪಕತತ್ತೇನ ಅಞ್ಞತ್ರ ಅನ್ತರಾಯಾ. ನ, ಭಿಕ್ಖವೇ, ಪಾರಿವಾಸಿಕೇನ ಭಿಕ್ಖುನಾ ಸಭಿಕ್ಖುಕಾ ಅನಾವಾಸಾ ಸಭಿಕ್ಖುಕೋ ಆವಾಸೋ ವಾ ಅನಾವಾಸೋ ವಾ ಗನ್ತಬ್ಬೋ ಯತ್ಥಸ್ಸು ಭಿಕ್ಖೂ ನಾನಾಸಂವಾಸಕಾ ಅಞ್ಞತ್ರ ಪಕತತ್ತೇನ ಅಞ್ಞತ್ರ ಅನ್ತರಾಯಾ.

‘‘ನ, ಭಿಕ್ಖವೇ, ಪಾರಿವಾಸಿಕೇನ ಭಿಕ್ಖುನಾ ಸಭಿಕ್ಖುಕಾ ಆವಾಸಾ ವಾ ಅನಾವಾಸಾ ವಾ ಸಭಿಕ್ಖುಕೋ ಆವಾಸೋ ಗನ್ತಬ್ಬೋ ಯತ್ಥಸ್ಸು ಭಿಕ್ಖೂ ನಾನಾಸಂವಾಸಕಾ ಅಞ್ಞತ್ರ ಪಕತತ್ತೇನ ಅಞ್ಞತ್ರ ಅನ್ತರಾಯಾ. ನ, ಭಿಕ್ಖವೇ, ಪಾರಿವಾಸಿಕೇನ ಭಿಕ್ಖುನಾ ಸಭಿಕ್ಖುಕಾ ಆವಾಸಾ ವಾ ಅನಾವಾಸಾ ವಾ ಸಭಿಕ್ಖುಕೋ ಅನಾವಾಸೋ ಗನ್ತಬ್ಬೋ ಯತ್ಥಸ್ಸು ಭಿಕ್ಖೂ ನಾನಾಸಂವಾಸಕಾ ಅಞ್ಞತ್ರ ಪಕತತ್ತೇನ ಅಞ್ಞತ್ರ ಅನ್ತರಾಯಾ. ನ, ಭಿಕ್ಖವೇ, ಪಾರಿವಾಸಿಕೇನ ಭಿಕ್ಖುನಾ ಸಭಿಕ್ಖುಕಾ ಆವಾಸಾ ವಾ ಅನಾವಾಸಾ ವಾ ಸಭಿಕ್ಖುಕೋ ಆವಾಸೋ ವಾ ಅನಾವಾಸೋ ವಾ ಗನ್ತಬ್ಬೋ ಯತ್ಥಸ್ಸು ಭಿಕ್ಖೂ ನಾನಾಸಂವಾಸಕಾ ಅಞ್ಞತ್ರ ಪಕತತ್ತೇನ ಅಞ್ಞತ್ರ ಅನ್ತರಾಯಾ.

‘‘ಗನ್ತಬ್ಬೋ, ಭಿಕ್ಖವೇ, ಪಾರಿವಾಸಿಕೇನ ಭಿಕ್ಖುನಾ ಸಭಿಕ್ಖುಕಾ ಆವಾಸಾ ಸಭಿಕ್ಖುಕೋ ಆವಾಸೋ ಯತ್ಥಸ್ಸು ಭಿಕ್ಖೂ ಸಮಾನಸಂವಾಸಕಾ ಯಂ ಜಞ್ಞಾ ‘ಸಕ್ಕೋಮಿ ಅಜ್ಜೇವ ಗನ್ತು’ನ್ತಿ.

‘‘ಗನ್ತಬ್ಬೋ, ಭಿಕ್ಖವೇ, ಪಾರಿವಾಸಿಕೇನ ಭಿಕ್ಖುನಾ ಸಭಿಕ್ಖುಕಾ ಆವಾಸಾ ಸಭಿಕ್ಖುಕೋ ಅನಾವಾಸೋ ಯತ್ಥಸ್ಸು ಭಿಕ್ಖೂ ಸಮಾನಸಂವಾಸಕಾ ಯಂ ಜಞ್ಞಾ ‘ಸಕ್ಕೋಮಿ ಅಜ್ಜೇವ ಗನ್ತು’ನ್ತಿ.

‘‘ಗನ್ತಬ್ಬೋ, ಭಿಕ್ಖವೇ, ಪಾರಿವಾಸಿಕೇನ ಭಿಕ್ಖುನಾ ಸಭಿಕ್ಖುಕಾ ಆವಾಸಾ ಸಭಿಕ್ಖುಕೋ ಆವಾಸೋ ವಾ ಅನಾವಾಸೋ ವಾ ಯತ್ಥಸ್ಸು ಭಿಕ್ಖೂ ಸಮಾನಸಂವಾಸಕಾ ಯಂ ಜಞ್ಞಾ ‘ಸಕ್ಕೋಮಿ ಅಜ್ಜೇವ ಗನ್ತು’ನ್ತಿ.

‘‘ಗನ್ತಬ್ಬೋ, ಭಿಕ್ಖವೇ, ಪಾರಿವಾಸಿಕೇನ ಭಿಕ್ಖುನಾ ಸಭಿಕ್ಖುಕಾ ಅನಾವಾಸಾ ಸಭಿಕ್ಖುಕೋ ಆವಾಸೋ ಯತ್ಥಸ್ಸು ಭಿಕ್ಖೂ ಸಮಾನಸಂವಾಸಕಾ ಯಂ ಜಞ್ಞಾ ‘ಸಕ್ಕೋಮಿ ಅಜ್ಜೇವ ಗನ್ತು’ನ್ತಿ.

‘‘ಗನ್ತಬ್ಬೋ, ಭಿಕ್ಖವೇ, ಪಾರಿವಾಸಿಕೇನ ಭಿಕ್ಖುನಾ ಸಭಿಕ್ಖುಕಾ ಅನಾವಾಸಾ ಸಭಿಕ್ಖುಕೋ ಅನಾವಾಸೋ ಯತ್ಥಸ್ಸು ಭಿಕ್ಖೂ ಸಮಾನಸಂವಾಸಕಾ ಯಂ ಜಞ್ಞಾ ‘ಸಕ್ಕೋಮಿ ಅಜ್ಜೇವ ಗನ್ತು’ನ್ತಿ.

‘‘ಗನ್ತಬ್ಬೋ, ಭಿಕ್ಖವೇ, ಪಾರಿವಾಸಿಕೇನ ಭಿಕ್ಖುನಾ ಸಭಿಕ್ಖುಕಾ ಅನಾವಾಸಾ ಸಭಿಕ್ಖುಕೋ ಆವಾಸೋ ವಾ ಅನಾವಾಸೋ ವಾ ಯತ್ಥಸ್ಸು ಭಿಕ್ಖೂ ಸಮಾನಸಂವಾಸಕಾ ಯಂ ಜಞ್ಞಾ ‘ಸಕ್ಕೋಮಿ ಅಜ್ಜೇವ ಗನ್ತು’ನ್ತಿ.

‘‘ಗನ್ತಬ್ಬೋ, ಭಿಕ್ಖವೇ, ಪಾರಿವಾಸಿಕೇನ ಭಿಕ್ಖುನಾ ಸಭಿಕ್ಖುಕಾ ಆವಾಸಾ ವಾ ಅನಾವಾಸಾ ವಾ ಸಭಿಕ್ಖುಕೋ ಆವಾಸೋ ಯತ್ಥಸ್ಸು ಭಿಕ್ಖೂ ಸಮಾನಸಂವಾಸಕಾ ಯಂ ಜಞ್ಞಾ ‘ಸಕ್ಕೋಮಿ ಅಜ್ಜೇವ ಗನ್ತು’ನ್ತಿ.

‘‘ಗನ್ತಬ್ಬೋ, ಭಿಕ್ಖವೇ, ಪಾರಿವಾಸಿಕೇನ ಭಿಕ್ಖುನಾ ಸಭಿಕ್ಖುಕಾ ಆವಾಸಾ ವಾ ಅನಾವಾಸಾ ವಾ ಸಭಿಕ್ಖುಕೋ ಅನಾವಾಸೋ ಯತ್ಥಸ್ಸು ಭಿಕ್ಖೂ ಸಮಾನಸಂವಾಸಕಾ ಯಂ ಜಞ್ಞಾ ‘ಸಕ್ಕೋಮಿ ಅಜ್ಜೇವ ಗನ್ತು’ನ್ತಿ.

‘‘ಗನ್ತಬ್ಬೋ, ಭಿಕ್ಖವೇ, ಪಾರಿವಾಸಿಕೇನ ಭಿಕ್ಖುನಾ ಸಭಿಕ್ಖುಕಾ ಆವಾಸಾ ವಾ ಅನಾವಾಸಾ ವಾ ಸಭಿಕ್ಖುಕೋ ಆವಾಸೋ ವಾ ಅನಾವಾಸೋ ವಾ ಯತ್ಥಸ್ಸು ಭಿಕ್ಖೂ ಸಮಾನಸಂವಾಸಕಾ ಯಂ ಜಞ್ಞಾ ‘ಸಕ್ಕೋಮಿ ಅಜ್ಜೇವ ಗನ್ತು’ನ್ತಿ.

‘‘ನ, ಭಿಕ್ಖವೇ, ಪಾರಿವಾಸಿಕೇನ ಭಿಕ್ಖುನಾ ಪಕತತ್ತೇನ ಭಿಕ್ಖುನಾ ಸದ್ಧಿಂ ಏಕಚ್ಛನ್ನೇ ಆವಾಸೇ ವತ್ಥಬ್ಬಂ, ನ ಏಕಚ್ಛನ್ನೇ ಅನಾವಾಸೇ ವತ್ಥಬ್ಬಂ, ನ ಏಕಚ್ಛನ್ನೇ ಆವಾಸೇ ವಾ ಅನಾವಾಸೇ ವಾ ವತ್ಥಬ್ಬಂ, ಪಕತತ್ತಂ ಭಿಕ್ಖುಂ ದಿಸ್ವಾ ಆಸನಾ ವುಟ್ಠಾತಬ್ಬಂ, ಪಕತತ್ತೋ ಭಿಕ್ಖು ಆಸನೇನ ನಿಮನ್ತೇತಬ್ಬೋ, ನ ಪಕತತ್ತೇನ ಭಿಕ್ಖುನಾ ಸದ್ಧಿಂ ಏಕಾಸನೇ ನಿಸೀದಿತಬ್ಬಂ, ನ ನೀಚೇ ಆಸನೇ ನಿಸಿನ್ನೇ ಉಚ್ಚೇ ಆಸನೇ ನಿಸೀದಿತಬ್ಬಂ, ನ ಛಮಾಯಂ ನಿಸಿನ್ನೇ ಆಸನೇ ನಿಸೀದಿತಬ್ಬಂ, ನ ಏಕಚಙ್ಕಮೇ ಚಙ್ಕಮಿತಬ್ಬಂ, ನ ನೀಚೇ ಚಙ್ಕಮೇ ಚಙ್ಕಮನ್ತೇ ಉಚ್ಚೇ ಚಙ್ಕಮೇ ಚಙ್ಕಮಿತಬ್ಬಂ, ನ ಛಮಾಯಂ ಚಙ್ಕಮನ್ತೇ ಚಙ್ಕಮೇ ಚಙ್ಕಮಿತಬ್ಬಂ.

‘‘ನ, ಭಿಕ್ಖವೇ, ಪಾರಿವಾಸಿಕೇನ ಭಿಕ್ಖುನಾ ಪಾರಿವಾಸಿಕೇನ ವುಡ್ಢತರೇನ ಭಿಕ್ಖುನಾ ಸದ್ಧಿಂ…ಪೇ… ಮೂಲಾಯಪಟಿಕಸ್ಸನಾರಹೇನ ಭಿಕ್ಖುನಾ ಸದ್ಧಿಂ…ಪೇ… ಮಾನತ್ತಾರಹೇನ ಭಿಕ್ಖುನಾ ಸದ್ಧಿಂ…ಪೇ… ಮಾನತ್ತಚಾರಿಕೇನ ಭಿಕ್ಖುನಾ ಸದ್ಧಿಂ…ಪೇ… ಅಬ್ಭಾನಾರಹೇನ ಭಿಕ್ಖುನಾ ಸದ್ಧಿಂ ಏಕಚ್ಛನ್ನೇ ಆವಾಸೇ ವತ್ಥಬ್ಬಂ, ನ ಏಕಚ್ಛನ್ನೇ ಅನಾವಾಸೇ ವತ್ಥಬ್ಬಂ, ನ ಏಕಚ್ಛನ್ನೇ ಆವಾಸೇ ವಾ ಅನಾವಾಸೇ ವಾ ವತ್ಥಬ್ಬಂ, ನ ಏಕಾಸನೇ ನಿಸೀದಿತಬ್ಬಂ, ನ ನೀಚೇ ಆಸನೇ ನಿಸಿನ್ನೇ ಉಚ್ಚೇ ಆಸನೇ ನಿಸೀದಿತಬ್ಬಂ, ನ ಛಮಾಯಂ ನಿಸಿನ್ನೇ ಆಸನೇ ನಿಸೀದಿತಬ್ಬಂ, ನ ಏಕಚಙ್ಕಮೇ ಚಙ್ಕಮಿತಬ್ಬಂ, ನ ನೀಚೇ ಚಙ್ಕಮೇ ಚಙ್ಕಮನ್ತೇ ಉಚ್ಚೇ ಚಙ್ಕಮೇ ಚಙ್ಕಮಿತಬ್ಬಂ, ನ ಛಮಾಯಂ ಚಙ್ಕಮನ್ತೇ ಚಙ್ಕಮೇ ಚಙ್ಕಮಿತಬ್ಬಂ.

‘‘ಪಾರಿವಾಸಿಕಚತುತ್ಥೋ ಚೇ, ಭಿಕ್ಖವೇ, ಪರಿವಾಸಂ ದದೇಯ್ಯ, ಮೂಲಾಯ ಪಟಿಕಸ್ಸೇಯ್ಯ, ಮಾನತ್ತಂ ದದೇಯ್ಯ, ತಂವೀಸೋ ಅಬ್ಭೇಯ್ಯ, ಅಕಮ್ಮಂ ನ ಚ ಕರಣೀಯ’’ನ್ತಿ (ಚೂಳವ. ೭೬-೮೨) –

ಏವಂ ಪಾರಿವಾಸಿಕಾನಂ ಚತುನವುತಿ ವತ್ತಾನಿ.

ಸಾ ಚ ನೇಸಂ ಚತುನವುತಿಸಙ್ಖಾ ಏವಂ ವೇದಿತಬ್ಬಾ – ನಉಪಸಮ್ಪಾದನಾದಿನಕಮ್ಮಿಕಗರಹಪರಿಯೋಸಾನಾನಿ ನವ ವತ್ತಾನಿ, ತತೋ ಪಕತತ್ತಸ್ಸ ಉಪೋಸಥಟ್ಠಪನಾದಿಭಿಕ್ಖೂಹಿಸಮ್ಪಯೋಜನಪರಿಯೋಸಾನಾನಿ ಅಟ್ಠ, ತತೋ ನಪುರತೋಗಮನಾದೀ ಪಞ್ಚ, ನಪುರೇಗಮನಾದೀ ಚತ್ತಾರಿ, ಆಗನ್ತುಕೇನ ಆರೋಚನಾದೀ ಚತ್ತಾರೀತಿ ತಿಂಸ, ಸಭಿಕ್ಖುಕಾವಾಸಾದಿತೋ ಅಭಿಕ್ಖುಕಾವಾಸಾದಿಗಮನಪಅಸಂಯುತ್ತಾನಿ ತೀಣಿ ನವಕಾನಿ ಚಾತಿ ಸತ್ತಪಞ್ಞಾಸ, ತತೋ ನಪಕತತ್ತೇನ ಸದ್ಧಿಂ ಏಕಚ್ಛನ್ನವಾಸಾದಿಪಟಿಸಂಯುತ್ತಾನಿ ಏಕಾದಸ, ತತೋ ನಪಾರಿವಾಸಿಕವುಡ್ಢತರಮೂಲಾಯಪಟಿಕಸ್ಸನಾರಹಮಾನತ್ತಾರಹಮಾನತ್ತಚಾರಿಕಅಬ್ಭಾನಾರಹೇಹಿ ಸದ್ಧಿಂ ಏಕಚ್ಛನ್ನವಾಸಾದಿಪಟಿಸಂಯುತ್ತಾನಿ ಪಚ್ಚೇಕಂ ಏಕಾದಸ ಕತ್ವಾ ಪಞ್ಚಪಞ್ಞಾಸಾಯ ವತ್ತೇಸು ಪಾರಿವಾಸಿಕವುಡ್ಢತರಮೂಲಾಯಪಟಿಕಸ್ಸನಾರಹಮಾನತ್ತಾರಹಾನಂ ತಿಣ್ಣಂ ಸಮಾನತ್ತಾ ತೇಸು ಏಕಂ ಏಕಾದಸಕಂ, ಮಾನತ್ತಚಾರಿಕಅಬ್ಭಾನಾರಹಾನಂ ದ್ವಿನ್ನಂ ಸಮಾನತ್ತಾ ತೇಸು ಏಕಂ ಏಕಾದಸಕನ್ತಿ ದುವೇ ಏಕಾದಸಕಾನಿ, ಅನ್ತೇ ಪಾರಿವಾಸಿಕಚತುತ್ಥಸ್ಸ ಸಙ್ಘಸ್ಸ ಪರಿವಾಸಾದಿದಾನಚತುಕ್ಕೇ ಗಣಪೂರಣತ್ಥದೋಸತೋ ನಿವತ್ತಿವಸೇನ ಚತ್ತಾರಿ ಚತ್ತಾರೀತಿ ಚತುನವುತಿ ವತ್ತಾನಿ. ತಾನಿ ಅಗ್ಗಹಿತಗ್ಗಹಣೇನ ಏಕೂನಚತ್ತಾಲೀಸವತ್ತಾನಿ ನಾಮ. ಆದಿತೋ ನವ, ಉಪೋಸಥಟ್ಠಪನಾದೀನಿ ಅಟ್ಠ, ಪಕತತ್ತೇನ ಏಕಚ್ಛನ್ನವಾಸಾದೀ ಚತ್ತಾರಿ ಚಾತಿ ಏಕವೀಸತಿ ವತ್ತಾನಿ ಕಮ್ಮಕ್ಖನ್ಧಕೇ ಗಹಿತತ್ತಾ ಇಧ ಗಣನಾಯ ಅಗ್ಗಹೇತ್ವಾ ತತೋ ಸೇಸೇಸು ತೇಸತ್ತತಿಯಾ ವತ್ತೇಸು ಪಾರಿವಾಸಿಕವುಡ್ಢತರಾದೀಹಿ ಏಕಚ್ಛನ್ನೇ ವಾಸಾದಿಪಟಿಸಂಯುತ್ತಾನಿ ದ್ವಾವೀಸತಿ ವತ್ತಾನಿ ಪಕತತ್ತೇಹಿ ಸಮಾನತ್ತಾ ತಾನಿ ಚ ‘‘ಗನ್ತಬ್ಬೋ ಭಿಕ್ಖವೇ’’ತಿಆದಿಕಂ ನವಕಂ ತಥಾ ಗಚ್ಛನ್ತಸ್ಸ ಅನಾಪತ್ತಿದಸ್ಸನಪರಂ, ನ ಆವಾಸತೋ ಗಚ್ಛನ್ತಸ್ಸ ಆಪತ್ತಿದಸ್ಸನಪರನ್ತಿ ತಞ್ಚ ಅಗ್ಗಹೇತ್ವಾ ಅವಸೇಸೇಸು ದ್ವಾಚತ್ತಾಲೀಸವತ್ತೇಸು ಪಾರಿವಾಸಿಕಚತಉತ್ಥಾದಿಕಮ್ಮಚತುಕ್ಕಂ ಗರುಕಾಪತ್ತಿವುಟ್ಠಾನಾಯ ಗಣಪೂರಣತ್ಥಸಾಮಞ್ಞೇನ ಏಕಂ ಕತ್ವಾ ತಯೋ ಅಪನೇತ್ವಾ ಗಣಿತಾನಿ ಏಕೂನಚತ್ತಾಲೀಸಾನಿ ಹೋನ್ತೀತಿ ವುತ್ತಂ ‘‘ನವಾಧಿಕಾನಿ ತಿಂಸೇವ, ಖನ್ಧಕೇ ತದನನ್ತರೇ’’ತಿ.

೨೭೫೦. ಇಮಾನಿ ಏಕೂನಚತ್ತಾಲೀಸ ವತ್ತಾನಿ ಪುರಿಮೇಹಿ ತೇಚತ್ತಾಲೀಸವತ್ತೇಹಿ ಸದ್ಧಿಂ ದ್ವಾಸೀತಿ ಹೋನ್ತೀತಿ ಆಹ ‘‘ಏವಂ ಸಬ್ಬಾನಿ…ಪೇ… ಗಹಿತಾಗಹಣೇನ ತೂ’’ತಿ.

ಏವಂ ಕಮ್ಮಕ್ಖನ್ಧಕಪಾರಿವಾಸಿಕಕ್ಖನ್ಧಕೇಸು ಮಹೇಸಿನಾ ವುತ್ತಾನಿ ಖನ್ಧಕವತ್ತಾನಿ ಗಹಿತಾಗಹಣೇನ ದ್ವಾಸೀತಿ ಏವ ಹೋನ್ತೀತಿ ಯೋಜನಾ. ಏವಮೇತ್ಥ ದ್ವಾಸೀತಿಕ್ಖನ್ಧಕವತ್ತಾನಿ ದಸ್ಸಿತಾನಿ.

ಆಗಮಟ್ಠಕಥಾವಣ್ಣನಾಯಂ ಪನ –

‘‘ಪಾರಿವಾಸಿಕಾನಂ ಭಿಕ್ಖೂನಂ ವತ್ತಂ ಪಞ್ಞಪೇಸ್ಸಾಮೀತಿ (ಚೂಳವ. ೭೫) ಆರಭಿತ್ವಾ ‘ನ ಉಪಸಮ್ಪಾದೇತಬ್ಬಂ…ಪೇ… ನ ಛಮಾಯಂ ಚಙ್ಕಮನ್ತೇ ಚಙ್ಕಮೇ ಚಙ್ಕಮಿತಬ್ಬ’ನ್ತಿ (ಚೂಳವ. ೭೬-೮೧) ವುತ್ತಾವಸಾನಾನಿ ಛಸಟ್ಠಿ, ತತೋ ಪರಂ ‘ನ, ಭಿಕ್ಖವೇ, ಪಾರಿವಾಸಿಕೇನ ಭಿಕ್ಖುನಾ ಪಾರಿವಾಸಿಕೇನ ವುಡ್ಢತರೇನ ಭಿಕ್ಖುನಾ ಸದ್ಧಿಂ, ಮೂಲಾಯಪಟಿಕಸ್ಸನಾರಹೇನ, ಮಾನತ್ತಾರಹೇನ, ಮಾನತ್ತಚಾರಿಕೇನ, ಅಬ್ಭಾನಾರಹೇನ ಭಿಕ್ಖುನಾ ಸದ್ಧಿಂ ಏಕಚ್ಛನ್ನೇ ಆವಾಸೇ ವತ್ಥಬ್ಬ’ನ್ತಿಆದೀನಂ (ಚೂಳವ. ೮೨) ಪಕತತ್ತೇ ಚರಿತಬ್ಬೇಹಿ ಅನಞ್ಞತ್ತಾ ವಿಸುಂ ತೇ ಅಗಣೇತ್ವಾ ಪಾರಿವಾಸಿಕವುಡ್ಢತರಾದೀಸು ಪುಗ್ಗಲನ್ತರೇಸು ಚರಿತಬ್ಬತ್ತಾ ತೇಸಂ ವಸೇನ ಸಮ್ಪಿಣ್ಡೇತ್ವಾ ಏಕೇಕಂ ಕತ್ವಾ ಗಣಿತಾನಿ ಪಞ್ಚಾತಿ ಏಕಸತ್ತತಿ ವತ್ತಾನಿ, ಉಕ್ಖೇಪನೀಯಕಮ್ಮಕತವತ್ತೇಸು ವತ್ತಪಞ್ಞಾಪನವಸೇನ ವುತ್ತಂ ‘ನ ಪಕತತ್ತಸ್ಸ ಭಿಕ್ಖುನೋ ಅಭಿವಾದನಂ …ಪೇ… ನಹಾನೇ ಪಿಟ್ಠಿಪರಿಕಮ್ಮಂ ಸಾದಿತಬ್ಬ’ನ್ತಿ (ಚೂಳವ. ೫೧) ಇದಂ ಅಭಿವಾದನಾದೀನಂ ಅಸಾದಿಯನಂ ಏಕಂ, ‘ನ ಪಕತತ್ತೋ ಭಿಕ್ಖು ಸೀಲವಿಪತ್ತಿಯಾ ಅನುದ್ಧಂಸೇತಬ್ಬೋ’ತಿಆದೀನಿ ಚ ದಸಾತಿ ಏವಮೇತಾನಿ ದ್ವಾಸೀತಿ ಹೋನ್ತಿ. ಏತೇಸ್ವೇವ ಕಾನಿಚಿ ತಜ್ಜನೀಯಕಮ್ಮಾದಿವತ್ತಾನಿ, ಕಾನಿಚಿ ಪಾರಿವಾಸಿಕಾದಿವತ್ತಾನೀತಿ ಅಗ್ಗಹಿತಗ್ಗಹಣೇನ ದ್ವಾಸೀತಿ ಏವಾ’’ತಿ (ಮ. ನಿ. ಟೀ. ೨.೨೫; ಸಾರತ್ಥ. ಟೀ. ೨.೩೯; ವಿ. ವಿ. ಟೀ. ೧.೩೯) –

ವುತ್ತಂ. ಏತಾನಿ ಪನ ವತ್ತಾನಿ ಕದಾಚಿ ತಜ್ಜನೀಯಕಮ್ಮಕತಾದಿಕಾಲೇ, ಪಾರಿವಾಸಿಕಾದಿಕಾಲೇ ಚ ಚರಿತಬ್ಬಾನಿ ಖುದ್ದಕವತ್ತಾನೀತಿ ಗಹೇತಬ್ಬಾನಿ ಆಗನ್ತುಕವತ್ತಾದೀನಂ ಚುದ್ದಸಮಹಾವತ್ತಾನಂ ವಕ್ಖಮಾನತ್ತಾ.

೨೭೫೧. ಇದಾನಿ ಪಾರಿವಾಸಿಕಸ್ಸ ಭಿಕ್ಖುನೋ ರತ್ತಿಚ್ಛೇದಂ, ವತ್ತಭೇದಞ್ಚ ದಸ್ಸೇತುಮಾಹ ‘‘ಪರಿವಾಸಞ್ಚ ವತ್ತಞ್ಚಾ’’ತಿಆದಿ. ಪರಿವಾಸಞ್ಚ ವತ್ತಞ್ಚ ಸಮಾದಿನ್ನಸ್ಸಾತಿ ‘‘ಪರಿವಾಸಂ ಸಮಾದಿಯಾಮೀ’’ತಿ ಪರಿವಾಸಞ್ಚ ‘‘ವತ್ತಂ ಸಮಾದಿಯಾಮೀ’’ತಿ ವತ್ತಞ್ಚ ಪಕತತ್ತಸ್ಸ ಭಿಕ್ಖುನೋ ಸನ್ತಿಕೇ ಉಕ್ಕುಟಿಕಂ ನಿಸೀದಿತ್ವಾ ಅಞ್ಜಲಿಂ ಪಗ್ಗಹೇತ್ವಾ ವಚೀಭೇದಂ ಕತ್ವಾ ಸಮಾದಿನ್ನಸ್ಸ. ಭಿಕ್ಖುನೋತಿ ಪಾರಿವಾಸಿಕಸ್ಸ ಭಿಕ್ಖುನೋ.

೨೭೫೨. ಸಹವಾಸಾದಯೋ ‘‘ಏಕಚ್ಛನ್ನೇ’’ತಿಆದಿನಾ ಸಯಮೇವ ವಕ್ಖತಿ. ಸಹವಾಸೋ, ವಿನಾವಾಸೋ, ಅನಾರೋಚನಮೇವ ಚಾತಿ ಇಮೇಹಿ ತೀಹಿ ಪಾರಿವಾಸಿಕಭಿಕ್ಖುಸ್ಸ ರತ್ತಿಚ್ಛೇದೋ ಚ ದುಕ್ಕಟಞ್ಚ ಹೋತೀತಿ ಯೋಜನಾ.

೨೭೫೩. ಉದಕಪಾತೇನ ಸಮನ್ತಾ ನಿಬ್ಬಕೋಸಸ್ಸ ಉದಕಪಾತಟ್ಠಾನೇನ. ಏಕಚ್ಛನ್ನೇತಿ ಏಕಚ್ಛನ್ನೇ ಪರಿಚ್ಛನ್ನೇ ವಾ ಅಪರಿಚ್ಛನ್ನೇ ವಾ ಆವಾಸೇ. ಪಕತತ್ತೇನ ಭಿಕ್ಖುನಾ ಸಹ ಉಕ್ಖಿತ್ತಸ್ಸ ನಿವಾಸೋ ನಿವಾರಿತೋತಿ ಯೋಜನಾ. ‘‘ನಿವಾರಿತೋ’’ತಿ ಇಮಿನಾ ದುಕ್ಕಟಂ ಹೋತೀತಿ ದೀಪೇತಿ.

೨೭೫೪. ಅನ್ತೋಯೇವಾತಿ ಏಕಚ್ಛನ್ನಸ್ಸ ಆವಾಸಪರಿಚ್ಛೇದಸ್ಸ ಅನ್ತೋಯೇವ. ‘‘ನ ಲಬ್ಭತೀ’’ತಿ ಇಮಿನಾ ರತ್ತಿಚ್ಛೇದೋ ಚ ದುಕ್ಕಟಞ್ಚ ಹೋತೀತಿ ದೀಪೇತಿ.

೨೭೫೫. ಮಹಾಅಟ್ಠಕಥಾದಿಸೂತಿ ಆದಿ-ಸದ್ದೇನ ಕುರುನ್ದಟ್ಠಕಥಾದಿಂ ಸಙ್ಗಣ್ಹಾತಿ. ಉಭಿನ್ನನ್ತಿ ಉಕ್ಖಿತ್ತಕಪಾರಿವಾಸಿಕಾನಂ. ಇತಿ ಅವಿಸೇಸೇನ ನಿದ್ದಿಟ್ಠನ್ತಿ ಯೋಜನಾ.

೨೭೫೬. ಇಮಿನಾ ಸಹವಾಸೇನ ರತ್ತಿಚ್ಛೇದಞ್ಚ ದುಕ್ಕಟಞ್ಚ ದಸ್ಸೇತ್ವಾ ವಿನಾವಾಸೇನ ದಸ್ಸೇತುಮಾಹ ‘‘ಅಭಿಕ್ಖುಕೇ ಪನಾವಾಸೇ’’ತಿ. ಆವಾಸೇತಿ ವಸನತ್ಥಾಯ ಕತಸೇನಾಸನೇ. ಅನಾವಾಸೇತಿ ವಾಸತ್ಥಾಯ ಅಕತೇ ಚೇತಿಯಘರೇ ವಾ ಬೋಧಿಘರೇ ವಾ ಸಮ್ಮಜ್ಜನಿಅಟ್ಟಕೇ ವಾ ದಾರುಅಟ್ಟಕೇ ವಾ ಪಾನೀಯಮಾಳೇ ವಾ ವಚ್ಚಕುಟಿಯಂ ವಾ ದ್ವಾರಕೋಟ್ಠಕೇ ವಾ ಅಞ್ಞತ್ರ ವಾ ಯತ್ಥ ಕತ್ಥಚಿ ಏವರೂಪೇ ಠಾನೇ. ವಿಪ್ಪವಾಸಂ ವಸನ್ತಸ್ಸಾತಿ ಪಕತತ್ತೇನ ವಿನಾ ವಾಸಂ ಕಪ್ಪೇನ್ತಸ್ಸ. ರತ್ತಿಚ್ಛೇದೋ ಚ ದುಕ್ಕಟನ್ತಿ ರತ್ತಿಚ್ಛೇದೋ ಚೇವ ವತ್ತಭೇದದುಕ್ಕಟಞ್ಚ ಹೋತಿ.

೨೭೫೭. ಏವಂ ವಿಪ್ಪವಾಸೇನ ರತ್ತಿಚ್ಛೇದದುಕ್ಕಟಾನಿ ದಸ್ಸೇತ್ವಾ ಅನಾರೋಚನೇನ ದಸ್ಸೇತುಮಾಹ ‘‘ಪಾರಿವಾಸಿಕಭಿಕ್ಖುಸ್ಸಾ’’ತಿಆದಿ. ಭಿಕ್ಖುಂ ದಿಸ್ವಾನಾತಿ ಆಕಾಸೇನಾಪಿ ಗಚ್ಛನ್ತಂ ಸಮಾನಸಂವಾಸಕಂ ಆಗನ್ತುಕಂ ಭಿಕ್ಖುಂ ದಿಸ್ವಾ. ತಙ್ಖಣೇತಿ ತಸ್ಮಿಂ ದಿಟ್ಠಕ್ಖಣೇಯೇವ. ‘‘ಅನಾರೋಚೇನ್ತಸ್ಸ ಏವ ಏತಸ್ಸಾ’’ತಿ ಪದಚ್ಛೇದೋ. ಏವಕಾರೇನ ರತ್ತಿಚ್ಛೇದೋ ಚ ದುಕ್ಕಟಞ್ಚಾತಿ ಉಭಯಂ ಏತಸ್ಸ ಹೋತೀತಿ ದೀಪೇನ್ತೇನ ಅದಿಟ್ಠೋ ಚೇ, ರತ್ತಿಚ್ಛೇದೋವ ಹೋತೀತಿ ಞಾಪೇತಿ. ಯಥಾಹ – ‘‘ಸೋಪಿಸ್ಸ ರತ್ತಿಚ್ಛೇದಂ ಕರೋತಿ, ಅಞ್ಞಾತತ್ತಾ ಪನ ವತ್ತಭೇದದುಕ್ಕಟಂ ನತ್ಥೀ’’ತಿ (ಚೂಳವ. ಅಟ್ಠ. ೭೫). ನಾನಾಸಂವಾಸಕೇನ ಸಹ ವಿನಯಕಮ್ಮಂ ಕಾತುಂ ನ ವಟ್ಟತಿ, ತಸ್ಸ ಅನಾರೋಚನೇಪಿ ರತ್ತಿಚ್ಛೇದೋ ನ ಹೋತಿ.

೨೭೫೮-೯. ಪಾರಿವಾಸಿಕೋ ಭಿಕ್ಖು ಯತ್ಥ ಸಙ್ಘನವಕಟ್ಠಾನೇ ಠಿತೋ, ತತ್ಥೇವ ತಸ್ಮಿಂಯೇವ ಠಾನೇ ಠತ್ವಾ ಯಥಾವುಡ್ಢಂ ಪಕತತ್ತೇಹಿಪಿ ಸದ್ಧಿಂ ವುಡ್ಢಪಟಿಪಾಟಿಯಾ ಪಞ್ಚ ಕಿಚ್ಚಾನಿ ಕಾತುಂ ವಟ್ಟತೀತಿ ಯೋಜನಾ.

ತಾನಿ ಸರೂಪತೋ ದಸ್ಸೇತುಮಾಹ ‘‘ಉಪೋಸಥಪವಾರಣ’’ನ್ತಿಆದಿ. ಉಪೋಸಥಪವಾರಣಂ ಯಥಾವುಡ್ಢಂ ಕಾತುಂ ಲಭತೀತಿ ಯೋಜನಾ. ದೇನ್ತೀತಿ ಏತ್ಥ ‘‘ಘಣ್ಟಿಂ ಪಹರಿತ್ವಾ’’ತಿ ಸೇಸೋ. ಸಙ್ಘದಾಯಕಾತಿ ಕಮ್ಮಧಾರಯಸಮಾಸೋ. ಸಙ್ಘಸ್ಸ ಏಕತ್ತೇಪಿ ಗರೂಸು ಬಹುವಚನನಿದ್ದೇಸೋ. ‘‘ದೇತಿ ಚೇ ಸಙ್ಘದಾಯಕೋ’’ತಿಪಿ ಪಾಠೋ. ತತ್ಥ ಘಣ್ಟಿಂ ಪಹರಿತ್ವಾ ಭಾಜೇತ್ವಾ ದೇನ್ತೋ ಸಙ್ಘೋ ವಸ್ಸಿಕಸಾಟಿಕಂ ದೇತಿ ಚೇ, ಪಾರಿವಾಸಿಕೋ ಯಥಾವುಡ್ಢಂ ಅತ್ತನೋ ಪತ್ತಟ್ಠಾನೇ ಲಭತೀತಿ ಯೋಜನಾ.

ಓಣೋಜನನ್ತಿ ವಿಸ್ಸಜ್ಜನಂ, ಸಙ್ಘತೋ ಅತ್ತನೋ ಪತ್ತಾನಂ ದ್ವಿನ್ನಂ, ತಿಣ್ಣಂ ವಾ ಉದ್ದೇಸಭತ್ತಾದೀನಂ ಅತ್ತನೋ ಪುಗ್ಗಲಿಕಭತ್ತಪಚ್ಚಾಸಾಯ ಪಟಿಗ್ಗಹೇತ್ವಾ ‘‘ಮಯ್ಹಂ ಅಜ್ಜ ಭತ್ತಪಚ್ಚಾಸಾ ಅತ್ಥಿ, ಸ್ವೇ ಗಣ್ಹಿಸ್ಸಾಮೀ’’ತಿ ವತ್ವಾ ಸಙ್ಘವಿಸ್ಸಜ್ಜನಂ ಲಭತೀತಿ ವುತ್ತಂ ಹೋತಿ. ಭತ್ತನ್ತಿ ಆಗತಾಗತೇಹಿ ವುಡ್ಢಪಟಿಪಾಟಿಯಾ ಗಹೇತ್ವಾ ಗನ್ತಬ್ಬಂ ವಿಹಾರೇ ಸಙ್ಘಸ್ಸ ಚತುಸ್ಸಾಲಭತ್ತಂ. ತಥಾ ಪಾರಿವಾಸಿಕೋ ಯಥಾವುಡ್ಢಂ ಲಭತೀತಿ ಯೋಜನಾ. ಇಮೇ ಪಞ್ಚಾತಿ ವುತ್ತಮೇವತ್ಥಂ ನಿಗಮಯತಿ.

ತತ್ರಾಯಂ ವಿನಿಚ್ಛಯೋ (ಚೂಳವ. ಅಟ್ಠ. ೭೫) – ಉಪೋಸಥಪವಾರಣೇ ತಾವ ಪಾತಿಮೋಕ್ಖೇ ಉದ್ದಿಸ್ಸಮಾನೇ ಹತ್ಥಪಾಸೇ ನಿಸೀದಿತುಂ ವಟ್ಟತಿ. ಮಹಾಪಚ್ಚರಿಯಂ ಪನ ‘‘ಪಾಳಿಯಾ ಅನಿಸೀದಿತ್ವಾ ಪಾಳಿಂ ವಿಹಾಯ ಹತ್ಥಪಾಸಂ ಅಮುಞ್ಚನ್ತೇನ ನಿಸೀದಿತಬ್ಬ’’ನ್ತಿ ವುತ್ತಂ. ಪಾರಿಸುದ್ಧಿಉಪೋಸಥೇ ಕರಿಯಮಾನೇ ಸಙ್ಘನವಕಟ್ಠಾನೇ ನಿಸೀದಿತ್ವಾ ತತ್ಥೇವ ನಿಸಿನ್ನೇನ ಅತ್ತನೋ ಪಾಳಿಯಾ ಪಾರಿಸುದ್ಧಿಉಪೋಸಥೋ ಕಾತಬ್ಬೋವ. ಪವಾರಣಾಯಪಿ ಸಙ್ಘನವಕಟ್ಠಾನೇ ನಿಸೀದಿತ್ವಾ ತತ್ಥೇವ ನಿಸಿನ್ನೇನ ಅತ್ತನೋ ಪಾಳಿಯಾ ಪವಾರೇತಬ್ಬಂ. ಸಙ್ಘೇನ ಘಣ್ಟಿಂ ಪಹರಿತ್ವಾ ಭಾಜಿಯಮಾನಂ ವಸ್ಸಿಕಸಾಟಿಕಮ್ಪಿ ಅತ್ತನೋ ಪತ್ತಟ್ಠಾನೇ ಗಹೇತುಂ ವಟ್ಟತಿ.

ಓಣೋಜನೇ ಸಚೇ ಪಾರಿವಾಸಿಕಸ್ಸ ದ್ವೇ ತೀಣಿ ಉದ್ದೇಸಭತ್ತಾದೀನಿ ಪಾಪುಣನ್ತಿ, ಅಞ್ಞಾ ಚಸ್ಸ ಪುಗ್ಗಲಿಕಭತ್ತಪಚ್ಚಾಸಾ ಹೋತಿ, ತಾನಿ ಪಟಿಪಾಟಿಯಾ ಗಹೇತ್ವಾ ‘‘ಭನ್ತೇ, ಹೇಟ್ಠಾ ಗಾಹೇಥ, ಅಜ್ಜ ಮಯ್ಹಂ ಭತ್ತಪಚ್ಚಾಸಾ ಅತ್ಥಿ, ಸ್ವೇವ ಗಣ್ಹಿಸ್ಸಾಮೀ’’ತಿ ವತ್ವಾ ವಿಸ್ಸಜ್ಜೇತಬ್ಬಾನಿ, ಏವಂ ತಾನಿ ಪುನದಿವಸೇಸು ಗಣ್ಹಿತುಂ ಲಭತಿ. ‘‘ಪುನದಿವಸೇ ಸಬ್ಬಪಠಮಂ ಏತಸ್ಸ ದಾತಬ್ಬ’’ನ್ತಿ ಕುರುನ್ದಿಯಂ ವುತ್ತಂ. ಯದಿ ಪನ ನ ಗಣ್ಹಾತಿ ನ ವಿಸ್ಸಜ್ಜೇತಿ, ಪುನದಿವಸೇ ನ ಲಭತಿ. ಇದಂ ಓಣೋಜನಂ ನಾಮ ಪಾರಿವಾಸಿಕಸ್ಸೇವ ಓದಿಸ್ಸ ಅನುಞ್ಞಾತಂ. ಕಸ್ಮಾ? ತಸ್ಸ ಹಿ ಸಙ್ಘನವಕಟ್ಠಾನೇ ನಿಸಿನ್ನಸ್ಸ ಭತ್ತಗ್ಗೇ ಯಾಗುಖಜ್ಜಕಾದೀನಿ ಪಾಪುಣನ್ತಿ ವಾ ನ ವಾ, ತಸ್ಮಾ ‘‘ಸೋ ಭಿಕ್ಖಾಹಾರೇನ ಮಾ ಕಿಲಮಿತ್ಥಾ’’ತಿ ಇದಮಸ್ಸ ಸಙ್ಗಹಕರಣತ್ಥಾಯ ಓದಿಸ್ಸ ಅನುಞ್ಞಾತಂ.

ಭತ್ತೇ ಚತುಸ್ಸಾಲಭತ್ತಂ ಯಥಾವುಡ್ಢಂ ಲಭತಿ, ಪಾಳಿಯಾ ಪನ ಗನ್ತುಂ ವಾ ಠಾತುಂ ವಾ ನ ಲಭತಿ. ತಸ್ಮಾ ಪಾಳಿತೋ ಓಸಕ್ಕಿತ್ವಾ ಹತ್ಥಪಾಸೇ ಠಿತೇನ ಹತ್ಥಂ ಪಸಾರೇತ್ವಾ ಯಥಾ ಸೇನೋ ನಿಪತಿತ್ವಾ ಗಣ್ಹಾತಿ, ಏವಂ ಗಣ್ಹಿತಬ್ಬಂ. ಆರಾಮಿಕಸಮಣುದ್ದೇಸೇಹಿ ಆಹರಾಪೇತುಂ ನ ಲಭತಿ. ಸಚೇ ಸಯಮೇವ ಆಹರನ್ತಿ, ವಟ್ಟತಿ. ರಞ್ಞೋ ಮಹಾಪೇಳಭತ್ತೇಪಿ ಏಸೇವ ನಯೋ. ಚತುಸ್ಸಾಲಭತ್ತೇ ಪನ ಸಚೇ ಓಣೋಜನಂ ಕತ್ತುಕಾಮೋ ಹೋತಿ, ಅತ್ತನೋ ಅತ್ಥಾಯ ಉಕ್ಖಿತ್ತೇ ಪಿಣ್ಡೇ ‘‘ಅಜ್ಜ ಮೇ ಭತ್ತಂ ಅತ್ಥಿ, ಸ್ವೇವ ಗಣ್ಹಿಸ್ಸಾಮೀ’’ತಿ ವತ್ತಬ್ಬಂ. ‘‘ಪುನದಿವಸೇ ದ್ವೇ ಪಿಣ್ಡೇ ಲಭತೀ’’ತಿ (ಚೂಳವ. ಅಟ್ಠ. ೭೫) ಮಹಾಪಚ್ಚರಿಯಂ ವುತ್ತಂ. ಉದ್ದೇಸಭತ್ತಾದೀನಿಪಿ ಪಾಳಿತೋ ಓಸಕ್ಕಿತ್ವಾವ ಗಹೇತಬ್ಬಾನಿ. ಯತ್ಥ ಪನ ನಿಸೀದಾಪೇತ್ವಾ ಪರಿವಿಸನ್ತಿ, ತತ್ಥ ಸಾಮಣೇರಾನಂ ಜೇಟ್ಠಕೇನ ಭಿಕ್ಖೂನಂ ಸಙ್ಘನವಕೇನ ಹುತ್ವಾ ನಿಸೀದಿತಬ್ಬನ್ತಿ.

ಪಾರಿವಾಸಿಕಕ್ಖನ್ಧಕಕಥಾವಣ್ಣನಾ.