೧೨. ಸತ್ತಸತಿಕಕ್ಖನ್ಧಕವಣ್ಣನಾ

ದಸವತ್ಥುಕಥಾವಣ್ಣನಾ

೪೪೬. ನಿಕ್ಖಿತ್ತಮಣಿಸುವಣ್ಣಾತಿ ಸಿಕ್ಖಾಪದೇನೇವ ಪಟಿಕ್ಖಿತ್ತಮಣಿಸುವಣ್ಣಾ. ತತ್ಥ ಮಣಿಗ್ಗಹಣೇನ ಸಬ್ಬಂ ದುಕ್ಕಟವತ್ಥು, ಸುವಣ್ಣಗ್ಗಹಣೇನ ಸಬ್ಬಂ ಪಾಚಿತ್ತಿಯವತ್ಥು ಗಹಿತಂ ಹೋತಿ. ಭಿಕ್ಖಗ್ಗೇನ ಭಿಕ್ಖುಗಣನಾಯಾತಿ ವುತ್ತಂ ಹೋತಿ.

೪೪೭. ಮಹಿಕಾತಿ ಹಿಮಂ. ಪೋಸಾತಿ ಸತ್ತಾ. ಸರಜಾತಿ ಸಕಿಲೇಸರಜಾ. ಮಗಾತಿ ಮಗಸದಿಸಾ. ತಸ್ಮಿಂ ತಸ್ಮಿಂ ವಿಸಯೇ, ಭವೇ ವಾ ನೇತೀತಿ ನೇತ್ತಿ, ತಣ್ಹಾಯೇತಂ ಅಧಿವಚನಂ, ತಾಯ ಸಹ ವತ್ತನ್ತೀತಿ ಸನೇತ್ತಿಕಾ.

೪೫೦-೨. ಅಹೋಗಙ್ಗೋತಿ ಪಬ್ಬತಸ್ಸ ನಾಮಂ. ಅನುಮಾನೇಸ್ಸಾಮಾತಿ ಪಞ್ಞಾಪೇಸ್ಸಾಮ. ಆಸುತಾತಿ ಸಜ್ಜಿತಾ, ‘‘ಅಸುತ್ತಾ’’ತಿ ವಾ ಪಾಠೋ, ಅನಾವಿಲಾ ಅಪಕ್ಕಾ ತರುಣಾ.

೪೫೩. ಉಜ್ಜವಿಂಸು ಪಟಿಸೋತೇನ ಗಚ್ಛಿಂಸು.

೪೫೫. ಅಪ್ಪೇವ ನಾಮಾತಿ ಸಾಧು ನಾಮ. ಮೂಲಾ ದಾಯಕಾ ಪೇಸಲಕಾ. ‘‘ಕುಲ್ಲಕವಿಹಾರೇನಾತಿ ಖುದ್ದಕವಿಹಾರೇನಾ’’ತಿ ಲಿಖಿತಂ. ರೂಪಾವತಾರತ್ತಾ ಕುಲ್ಲಕವಿಹಾರೋ ನಾಮ. ಕಥಂ ಪನೇತಂ ಪಞ್ಞಾಯತಿ, ಯೇನ ಸನ್ನಿಧಿಕತಂ ಯಾವಜೀವಿಕಂ ಯಾವಕಾಲಿಕೇನ ತದಹುಪಟಿಗ್ಗಹಿತೇನ ಸಮ್ಭಿನ್ನರಸಂ ತದಹುಪಟಿಗ್ಗಹಿತಸಙ್ಖಯಂ ಆಗನ್ತ್ವಾ ಸನ್ನಿಧಿಕತಾಮಿಸಸಙ್ಖ್ಯಮೇವ ಗಚ್ಛತೀತಿ? ವುಚ್ಚತೇ – ‘‘ಯಾವಕಾಲಿಕೇನ, ಭಿಕ್ಖವೇ, ಯಾವಜೀವಿಕಂ ತದಹುಪಟಿಗ್ಗಹಿತ’’ನ್ತಿ ವಚನತೋ ಪುರೇಪಟಿಗ್ಗಹಿತಂ ಯಾವಜೀವಿಕಂ ತದಹುಪಟಿಗ್ಗಹಿತೇನಾಮಿಸೇನ ಚೇ ಸಮ್ಭಿನ್ನಂ, ಪುರೇಪಟಿಗ್ಗಹಿತಸಙ್ಖ್ಯಮೇವ ಗಚ್ಛತೀತಿ ಸಿದ್ಧಂ. ಅಞ್ಞಥಾ ‘‘ಸತ್ತಾಹಕಾಲಿಕೇನ, ಭಿಕ್ಖವೇ, ಯಾವಜೀವಿಕಂ ಪಟಿಗ್ಗಹಿತಂ ಸತ್ತಾಹಂ ಕಪ್ಪತೀ’’ತಿ (ಮಹಾವ. ೩೦೫) ವುತ್ತಟ್ಠಾನೇ ವಿಯ ಇಧಾಪಿ ‘‘ಯಾವಕಾಲಿಕೇನ, ಭಿಕ್ಖವೇ, ಯಾವಜೀವಿಕಂ ಪಟಿಗ್ಗಹಿತಂ ಕಾಲೇ ಕಪ್ಪತೀ’’ತಿ ವದೇಯ್ಯ, ತಞ್ಚಾವುತ್ತಂ. ತಸ್ಮಾ ಪುರೇಪಟಿಗ್ಗಹಿತಂ ತಂ ಆಮಿಸಸಮ್ಭಿನ್ನಂ ಆಮಿಸಗತಿಕಮೇವಾತಿ ವೇದಿತಬ್ಬಂ. ಗಣ್ಠಿಪದೇ ಪನ ‘‘ಸನ್ನಿಧಿಕಾರಕಂ ಖಾದನೀಯಂ ವಾ ಭೋಜನೀಯಂ ವಾ’’ತಿ (ಪಾಚಿ. ೨೫೩) ವುತ್ತಂ. ಬ್ಯಞ್ಜನಮತ್ತಂ ನ ಗಹೇತಬ್ಬಂ.

೪೫೭. ಇಧಾತಿ ಇಮಸ್ಮಿಂ ಪಾಠೇ. ‘‘‘ಕಾಲೇ ಕಪ್ಪತಿ, ವಿಕಾಲೇ ನ ಕಪ್ಪತೀ’ತಿ (ಮಹಾವ. ೩೦೫) ವುತ್ತವಚನಮತ್ತೇನ ‘ವಿಕಾಲೇ ಕಪ್ಪತೀ’ತಿ ವಿಕಾಲಭೋಜನಪಾಚಿತ್ತಿಯಂ ಆವಹಂ ಹೋತೀತಿ ಅತ್ಥೋ, ‘ನ ಕಪ್ಪತೀ’ತಿ ಸನ್ನಿಧಿಭೋಜನಪಾಚಿತ್ತಿಯಂ ಆವಹಂ ಹೋತೀತಿ ಅತ್ಥೋ, ಯದಿ ಸಮ್ಭಿನ್ನರಸಂ ಅಜ್ಜಪಟಿಗ್ಗಹಿತಮ್ಪಿ ಯಾವಜೀವಿಕನ್ತಿ ಅತ್ಥೋ’’ತಿ ಲಿಖಿತಂ. ಸುತ್ತವಿಭಙ್ಗೇತಿ ಮಾತಿಕಾಸಙ್ಖಾತೇ ಸುತ್ತೇ ಚ ತಸ್ಸ ಪದಭಾಜನೀಯಸಙ್ಖಾತೇ ವಿಭಙ್ಗೇ ಚಾತಿ ಅತ್ಥೋ. ಇದಂ ಆಗತಮೇವ. ಕತರನ್ತಿ? ‘‘ಅತಿಕ್ಕಾಮಯತೋ ಛೇದನಕ’’ನ್ತಿ ಇದಂ.

ತಿವಿದತ್ಥಿಪಮಾಣಞ್ಚೇ, ಅದಸಂ ತಂ ನಿಸೀದನಂ;

ನಿಸೀದನಂ ಕಥಂ ಹೋತಿ, ಸದಸಂ ತಞ್ಹಿ ಲಕ್ಖಣಂ.

ತಿವಿದತ್ಥಿಪಮಾಣಂ ತಂ, ದಸಾ ತತ್ಥ ವಿದತ್ಥಿ ಚೇ;

ತಂನಿಸೀದನನಾಮತ್ತಾ, ತಸ್ಮಿಂ ಛೇದನಕಂ ಸಿಯಾ.

ಅನಿಸೀದನನಾಮಮ್ಹಿ, ಕಥಂ ಛೇದನಕಂ ಭವೇ;

ಇತಿ ಚೇ ನೇವ ವತ್ತಬ್ಬಂ, ನಿಸೀದನವಿದತ್ಥಿತೋ.

ಕಪ್ಪತೇ ಸದಸಾಮತ್ತಂ, ನಿಸೀದನಮಿತಿ ಕಾರಣಂ;

ಕಥಂ ಯುಜ್ಜತಿ ನೋ ಚೇತಂ, ನಿಸೀದನಸ್ಸ ನಾಮಕಂ.

ನಿಸೀದನನ್ತಿ ವುತ್ತತ್ತಾ, ಪಮಾಣಸಮತಿಕ್ಕಮಾ;

ತಸ್ಸಾನುಮತಿಹೇತುತ್ತಾ, ತತ್ಥ ಛೇದನಕಂ ಭವೇ.

ಜಾತರೂಪಕಪ್ಪೇ –

ಜಾತರೂಪಂ ಪಟಿಕ್ಖಿತ್ತಂ, ಪುಗ್ಗಲಸ್ಸೇವ ಪಾಳಿಯಂ;

ನ ಸಙ್ಘಸ್ಸಾತಿ ಸಙ್ಘಸ್ಸ, ತಞ್ಚೇ ಕಪ್ಪತಿ ಸಬ್ಬಸೋ.

ವಿಕಾಲಭೋಜನಞ್ಚಾಪಿ, ಪುಗ್ಗಲಸ್ಸೇವ ವಾರಿತಂ;

ನ ಸಙ್ಘಸ್ಸಾತಿ ಸಙ್ಘಸ್ಸ, ಕಪ್ಪತೀತಿ ಕಥಂ ಸಮಂ.

ಸತ್ತಸತಿಕಕ್ಖನ್ಧಕವಣ್ಣನಾ ನಿಟ್ಠಿತಾ.

ಚೂಳವಗ್ಗವಣ್ಣನಾ ನಿಟ್ಠಿತಾ.

ನಮೋ ತಸ್ಸ ಭಗವತೋ ಅರಹತೋ ಸಮ್ಮಾಸಮ್ಬುದ್ಧಸ್ಸ