೧೧. ಪಞ್ಚಸತಿಕಕ್ಖನ್ಧಕವಣ್ಣನಾ

ಸಙ್ಗೀತಿನಿದಾನಕಥಾವಣ್ಣನಾ

೪೩೭. ಛಿನ್ನಪಾತನ್ತಿ ಭಾವನಪುಂಸಕಂ, ತೇನಾಕಾರೇನ ಪತನ್ತೀತಿ ಅತ್ಥೋ. ಉಪದ್ದುತಾ ಚ ಮಯಂ ಹೋಮಾತಿ ಅತೀತತ್ಥೇ ವತ್ತಮಾನವಚನಂ, ಅಹುಮ್ಹಾತಿ ಅತ್ಥೋ. ಅಥ ವಾ ತಸ್ಮಿಂ ಸತಿ ಹೋಮ. ‘‘ಪಞ್ಚ ಭಿಕ್ಖುಸತಾನೀ’’ತಿ ಗಣನವಸೇನ ವತ್ವಾ ‘‘ವಸ್ಸಂ ವಸನ್ತಾ’’ತಿ ಪುಗ್ಗಲನಿದ್ದೇಸೋ ಕತೋ.

ಖುದ್ದಾನುಖುದ್ದಕಕಥಾವಣ್ಣನಾ

೪೪೩. ‘‘ವಸ್ಸಿಕಸಾಟಿಕಂ ಅಕ್ಕಮಿತ್ವಾ’’ತಿ ವಚನತೋ ಭಗವತೋ ಚತುತ್ಥಚೀವರಮ್ಪಿ ಅತ್ಥೀತಿ ಸಿದ್ಧಂ. ತೇನೇವಾಹ ಚೀವರಕ್ಖನ್ಧಕೇ ‘‘ಚತುತ್ಥಂ ಚೀವರಂ ಪಾರುಪೀ’’ತಿ.

೪೪೪. ‘‘ಅಪಿಚ ಯಥೇವ ಮಯಾ’’ತಿಆದಿ ಸಙ್ಗೀತಿಯಾ ಅಗ್ಗಹಣಾಧಿಪ್ಪಾಯವಸೇನ ವುತ್ತಂ, ಕಿನ್ತು ಸುಸಙ್ಗೀತಾ ಆವುಸೋ ಥೇರೇಹಿ ಧಮ್ಮೋ ಚ ವಿನಯೋ ಚ. ಅಪಿಚಾಹಂ ನಾಮ ತಥೇವಾಹಂ ಧಾರೇಸ್ಸಾಮೀತಿ ಯಥೇವ ಮಯಾ ಭಗವತೋ ಸಮ್ಮುಖಾ ಸುತಂ ಸಮ್ಮುಖಾ ಪಟಿಗ್ಗಹಿತಂ, ತಥೇವ ಥೇರೇಹಿ ಭಗವತಾ ಸಯಮೇವ ಏತದಗ್ಗಂ ಆರೋಪಿತೇಹಿ, ತಸ್ಮಾ ಸುಸಙ್ಗಹಿತಾ ಸಙ್ಗೀತೀತಿ ವುತ್ತಂ ಹೋತಿ.

ಬ್ರಹ್ಮದಣ್ಡಕಥಾವಣ್ಣನಾ

೪೪೫. ‘‘ತ್ವಂಯೇವ ಆಣಾಪೇಹೀ’’ತಿ ಏತ್ತಕಮೇವ ವುತ್ತಂ, ಥೇರಾ ಪನ ಬ್ರಹ್ಮದಣ್ಡಂ ಕತ್ವಾ ವುತ್ತಂಯೇವ ‘‘ಛನ್ನಸ್ಸಾ’’ತಿಆದಿಮಾಹಂಸೂತಿ ವೇದಿತಬ್ಬಂ. ಏತ್ಥ ಚ ಆನನ್ದತ್ಥೇರೋ ವಿಯ ಅಞ್ಞೋಪಿ ಸಙ್ಘೇನ ಆಣತ್ತೋ ಭಿಕ್ಖು ಬ್ರಹ್ಮದಣ್ಡಕತೇನ ಭಿಕ್ಖುನಾ ಆಲಪಿತುಂ ಲಭತಿ, ನ ಅಞ್ಞೋ. ಉಜ್ಜವನಿಕಾಯಾತಿ ಪಟಿಸೋತಗಾಮಿನಿಯಾ. ಆಗಮಾ ನು ಖೋ ಇಧ ಆಗಮಾ ನು ಖ್ವಿಧ. ಆಗಮಾ ಖೋ ಇಧ, ತೇ ಓರೋಧಾ ಇಧ ಆಗಮಾ ಖೋ. ‘‘ಭಿಸಿಚ್ಛವೀತಿ ಭಿಸಿತ್ಥವಿಕಾ’’ತಿ ಲಿಖಿತಂ. ಸಬ್ಬೇವಿಮೇತಿ ಸಬ್ಬಮೇವ. ಕುಲವಂ ಗಮೇನ್ತೀತಿ ನಿರತ್ಥಕವಿನಾಸಂ ಗಮೇನ್ತಿ. ಕುಚ್ಛಿತೋ ಲವೋ ಕುಲವೋ, ಅನಯವಿನಾಸೋತಿ ವುತ್ತಂ ಹೋತಿ. ಇಮಾಯ ಖೋ ಪನ ‘‘ಧಮ್ಮವಿನಯಸಙ್ಗೀತಿಯಾ’’ತಿ ವತ್ತಬ್ಬೇ ವಿಸೇಸೇನ ವಿನಯಸ್ಸ ಸಾಸನಮೂಲಭಾವದಸ್ಸನತ್ಥಂ, ತಸ್ಮಿಂ ಠಿತೇ ಸಕಲಸಾಸನಠಿತಿಸಿದ್ಧಿದೀಪನತ್ಥಞ್ಚ ‘‘ಇದಂ ವೋ ಕಪ್ಪತಿ, ಇದಂ ವೋ ನ ಕಪ್ಪತೀ’’ತಿ ವತ್ಥುಸ್ಮಿಂ ಆರದ್ಧತ್ತಾ, ಇಮಿಸ್ಸಾ ಚ ಪರಿಯತ್ತಿಯಾ ವಿನಯಪಿಟಕತ್ತಾ ‘‘ವಿನಯಸಙ್ಗೀತಿಯಾ’’ತಿ ಇಧ ವುತ್ತಂ.

ಪಞ್ಚಸತಿಕಕ್ಖನ್ಧಕವಣ್ಣನಾ ನಿಟ್ಠಿತಾ.