೭. ಧಮ್ಮದೇಸನಾಸಿಕ್ಖಾಪದವಣ್ಣನಾ

೬೬. ‘‘ವಿಞ್ಞೂ ಪಟಿಬಲಾ’’ತಿ ವಚನತೋ ಅವಿಞ್ಞೂ ಇತ್ಥಿಯಾಪಿ ದೇಸೇನ್ತಸ್ಸ ಅನಾಪತ್ತಿ. ಇಧ ಯಕ್ಖೀಆದಯೋ ಮನುಸ್ಸಿತ್ಥೀ ವಿಯ ಅನೋಳಾರಿಕತ್ತಾ ದುಕ್ಕಟವತ್ಥುಕಾ ಜಾತಾ. ತಿರಚ್ಛಾನಗತಮನುಸ್ಸವಿಗ್ಗಹಿತ್ಥಿಯಾ ಪಟಿಬಲತಾಯ ವುತ್ತತ್ತಾ ಇತರಾಪಿ ದುಕ್ಕಟವತ್ಥುಯೇವಾತಿ ಏಕೇ. ‘‘ಮಾತುಗಾಮಾಯಾ’’ತಿ ಲಿಙ್ಗವಿಪಲ್ಲಾಸೇನ ವುತ್ತಂ. ‘‘ಅಟ್ಠಕಥಾದಿಪಾಠಂ ಠಪೇತ್ವಾ ದಮಿಳಾದಿನಾ ಯಥಾರುಚಿ ಕಥೇತುಂ ಲಭತಿ ಕಿರಾ’’ತಿ ಲಿಖಿತಂ, ಯಥಾ ಯಕ್ಖೀಆದಯೋ ದುಕ್ಕಟವತ್ಥುಕಾ ಜಾತಾ, ತಥಾ ಪುರಿಸವಿಗ್ಗಹಂ ಗಹೇತ್ವಾ ಠಿತೇನ ಯಕ್ಖಾದಿನಾ ಸದ್ಧಿಂ ಠಿತಸ್ಸ ಮಾತುಗಾಮಸ್ಸ ಧಮ್ಮಂ ದೇಸೇನ್ತೋ ದುಕ್ಕಟಂ ಅನಾಪಜ್ಜಿತ್ವಾ ಕಸ್ಮಾ ಪಾಚಿತ್ತಿಯಮಾಪಜ್ಜತೀತಿ ಚೇ? ಈಸಕಮ್ಪಿ ದುತಿಯಪಕ್ಖಂ ಅಭಜನತೋ. ಮನುಸ್ಸಮಾತುಗಾಮೋಪಿ ನ ದುತಿಯೋ, ಪಗೇವ ಯಕ್ಖಾದಯೋತಿ. ನ ದುತಿಯಾನಿಯತೇ ತಸ್ಸ ದುತಿಯತ್ತಾತಿ ಚೇ? ನ ತತ್ಥ ದುಟ್ಠುಲ್ಲವಾಚಾಪೇಕ್ಖಾ ದುತಿಯತಾ, ಕಿನ್ತು ನಿಸಜ್ಜಾಪೇಕ್ಖಾ, ಇಧ ಚ ನ ನಿಸಜ್ಜಮತ್ತಂ, ಕಿನ್ತು ದೇಸನಾ ಇಧಾಧಿಪ್ಪೇತಾ. ಸಾ ಚ ನಿಪಜ್ಜನತೋ ಓಳಾರಿಕಾ, ತಸ್ಮಾ ಅಸಮತ್ಥನಿದಸ್ಸನಂ.

ಧಮ್ಮದೇಸನಾಸಿಕ್ಖಾಪದವಣ್ಣನಾ ನಿಟ್ಠಿತಾ.