೮. ಕಣ್ಡುಪಟಿಚ್ಛಾದಿಸಿಕ್ಖಾಪದವಣ್ಣನಾ

೫೩೯. ಯದಿ ಕಣ್ಡುಪಟಿಚ್ಛಾದಿ ನಾಮ ಅಧೋನಾಭಿ ಉಬ್ಭಜಾಣುಮಣ್ಡಲಾ ಉಪ್ಪನ್ನಕಣ್ಡುಪೀಳಕಾದಿಪಟಿಚ್ಛಾದಿಕಾ ಅಧಿಪ್ಪೇತಾ, ತಸ್ಸ ಸುಗತಸ್ಸ ಸುಗತವಿದತ್ಥಿಯಾ ದೀಘಸೋ ಚತಸ್ಸೋ ವಿದತ್ಥಿಯೋ ತಿರಿಯಂ ದ್ವೇತಿ ಇದಮ್ಪಿ ಅತಿಮಹನ್ತಂ ಪಮಾಣಂ ದಿಸ್ಸತಿ. ಸಬ್ಬೋ ಹಿ ಪುರಿಸೋ ಅತ್ತನೋ ಅತ್ತನೋ ವಿದತ್ಥಿಯಾ ಸತ್ತವಿದತ್ಥಿಕೋ ಹೋತಿ, ಸುಗತಸ್ಸ ಚ ಏಕಾವಿದತ್ಥಿ ಮಜ್ಝಿಮಸ್ಸ ಪುರಿಸಸ್ಸ ತಿಸ್ಸೋ ವಿದತ್ಥಿಯೋ ಹೋನ್ತಿ, ತಸ್ಮಾ ಕಣ್ಡುಪಟಿಚ್ಛಾದಿ ಪಕತಿಪುರಿಸಸ್ಸ ಪಮಾಣಂ ಆಪಜ್ಜತಿ ತಿರಿಯಂ, ದೀಘಸೋ ಪನ ದಿಗುಣಂ ಆಪಜ್ಜತೀತಿ. ಆಪಜ್ಜತು, ಉಕ್ಕಟ್ಠಪರಿಚ್ಛೇದೋ ತಸ್ಸಾ, ಚೇ ಇಚ್ಛತಿ, ಸಬ್ಬಮ್ಪಿ ಸರೀರಂ ಪಟಿಚ್ಛಾದೇಸ್ಸತಿ, ಸಬ್ಬಸರೀರಗತಸಙ್ಘಾಟಿ ವಿಯ ಬಹುಗುಣಂ ಕತ್ವಾ ನಿವಾಸೇತುಕಾಮೋ ನಿವಾಸೇಸ್ಸತೀತಿ ಅಯಂ ಭಗವತೋ ಅಧಿಪ್ಪಾಯೋ ಸಿಯಾ.

ಕಣ್ಡುಪಟಿಚ್ಛಾದಿಸಿಕ್ಖಾಪದವಣ್ಣನಾ ನಿಟ್ಠಿತಾ.