೧. ಅನ್ತೇಪುರಸಿಕ್ಖಾಪದವಣ್ಣನಾ

೪೯೪-೭. ಯಥಾ ಭಗವನ್ತಂ ಪಯಿರುಪಾಸತಿ, ಏವಮಾಕಾರೇನ ನಾರಹತಾಯಂ ಪುರಿಸೋ ಪಾಪೋ ಹೋತುಂ, ನ ಹೋತಿ ಪಾಪೋತಿ ಅತ್ಥೋ, ಕಾರಣತ್ಥಂ ವಾ. ತನ್ತಿ ನಿಪಾತಮತ್ತಂ, ಯತೋತಿ ವಾ ಅತ್ಥೋ. ಹತ್ಥಿಸಮ್ಮದ್ದನ್ತಿ ಸಙ್ಘಾಟಸಮ್ಮದ್ದೋ, ಅಕ್ಕಮನಂ ಚುಣ್ಣತಾತಿ ಅತ್ಥೋ.

೪೯೮. ರತನಂ ನಾಮ ಅಗ್ಗಮಹೇಸೀ, ತಥಾಪಿ ಇಧ ಅಞ್ಞಾಪಿ ದೇವಿಗೋತ್ತಾ ನ ರಕ್ಖತಿ, ಅನಾಪತ್ತಿವಾರೇ ‘‘ನ ಮಹೇಸೀ ಹೋತೀ’’ತಿ ವಚನಾಭಾವತೋ. ಸಚೇ ಖತ್ತಿಯೋವ ಹೋತಿ, ನಾಭಿಸಿತ್ತೋ. ಅಭಿಸಿತ್ತೋಯೇವ ಹೋತಿ, ನ ಖತ್ತಿಯೋ ರಕ್ಖತೀತಿ ಆಚರಿಯೋ. ಅನಾಪತ್ತಿವಾರೇ ಮಾತಿಕಾಟ್ಠಕಥಾಯಂ ಅಙ್ಗಭಾವೇನ ಚ ವುತ್ತತ್ತಾ ಅಭಿಸಿತ್ತಭಾವೋವಪಮಾಣಂ. ಸೇಸಂ ಉಕ್ಕಟ್ಠಪರಿಚ್ಛೇದೋತಿ ಏಕೇ.

೫೦೦-೫೦೧. ‘‘ನ ಸಯನಿಘರೇ ಸಯನಿಘರಸಞ್ಞೀ’’ತಿ ತಿಕಚ್ಛೇದೋಪಿ ಏತ್ಥ ಲಬ್ಭತಿ. ನ ಸಯನಿಘರಂ ನಾಮ ಅಪರಿಕ್ಖಿತ್ತರುಕ್ಖಮೂಲಾದಿ.

ಅನ್ತೇಪುರಸಿಕ್ಖಾಪದವಣ್ಣನಾ ನಿಟ್ಠಿತಾ.