೫. ವಕ್ಕಲಿಸುತ್ತವಣ್ಣನಾ

೮೭. ನಗರಮಜ್ಝೇ ಮಹಾಆಬಾಧೋ ಉಪ್ಪಜ್ಜೀತಿ ನಗರಮಜ್ಝೇನ ಆಗಚ್ಛನ್ತೋ ಕಮ್ಮಸಮುಟ್ಠಾನೋ ಮಹನ್ತೋ ಆಬಾಧೋ ಉಪ್ಪಜ್ಜತಿ. ಸಮನ್ತತೋ ಅಧೋಸೀತಿ ಸಬ್ಬಭಾಗೇನ ಪರಿಪ್ಫನ್ದಿ. ಇರಿಯಾಪಥಂ ಯಾಪೇತುನ್ತಿ ಸಯನನಿಸಜ್ಜಾದಿಭೇದಂ ಇರಿಯಾಪಥಂ ಪವತ್ತೇತುಂ. ನಿವತ್ತನ್ತೀತಿ ಓಸಕ್ಕನ್ತಿ, ಪರಿಹಾಯನ್ತೀತಿ ಅತ್ಥೋ. ಅಧಿಗಚ್ಛನ್ತೀತಿ ವಡ್ಢನ್ತಿ. ಸತ್ಥು ಗುಣಸರೀರಂ ನಾಮ ನವವಿಧಲೋಕುತ್ತರಧಮ್ಮಾಧಿಗಮಮೂಲನ್ತಿ ಕತ್ವಾ ವುತ್ತಂ ‘‘ನವವಿಧೋ ಹಿ…ಪೇ… ಕಾಯೋ ನಾಮಾ’’ತಿ, ಯಥಾ ಸತ್ತಾನಂ ಕಾಯೋ ಪಟಿಸನ್ಧಿಮೂಲಕೋ.

ಕಾಳಸಿಲಾಯಂ ಕತವಿಹಾರೋ ಕಾಳಸಿಲಾವಿಹಾರೋ. ಮಗ್ಗವಿಮೋಕ್ಖತ್ಥಾಯಾತಿ ಅಗ್ಗಮಗ್ಗವಿಮೋಕ್ಖಾಧಿಗಮಾಯ. ದೇವತಾತಿ ಸುದ್ಧಾವಾಸದೇವತಾ. ಅಲಾಮಕಂ ನಾಮ ಪುಥುಜ್ಜನಕಾಲಕಿರಿಯಾಯ ಅಭಾವತೋ. ತೇನಾಹ ‘‘ಥೇರೋ ಕಿರಾ’’ತಿಆದಿ. ಏಕಂ ದ್ವೇ ಞಾಣಾನೀತಿ ಏಕಂ ದ್ವೇ ಪಚ್ಚವೇಕ್ಖಣಞಾಣಾನಿ ಸಭಾವತೋ ಅವಸ್ಸಂ ಉಪ್ಪಜ್ಜನ್ತಿ, ಅಯಂ ಧಮ್ಮತಾ. ಮಗ್ಗಫಲನಿಬ್ಬಾನಪಚ್ಚವೇಕ್ಖಣಾನಿ ತಂತಂಮಗ್ಗವುಟ್ಠಾನೇ ಉಪ್ಪಜ್ಜನ್ತಿ ಏವ. ಏಕಂ ದ್ವೇತಿ ವಚನಂ ಉಪ್ಪನ್ನಭಾವದಸ್ಸನತ್ಥಂ ವುತ್ತಂ.

ಧೂಮಾಯನಭಾವೋ ಧೂಮಾಕಾರತಾ, ತಥಾ ತಿಮಿರಾಯನಭಾವೋ.

ವಕ್ಕಲಿಸುತ್ತವಣ್ಣನಾ ನಿಟ್ಠಿತಾ.