೯. ಥೇರವಗ್ಗೋ

೧. ಆನನ್ದಸುತ್ತವಣ್ಣನಾ

೮೩. ಪಟಿಚ್ಚಾತಿ ನಿಸ್ಸಯಂ ಕತ್ವಾ. ‘‘ಏಸೋಹಮಸ್ಮೀ’’ತಿ ದಿಟ್ಠಿಗ್ಗಾಹೋ, ‘‘ಸೇಯ್ಯೋಹಮಸ್ಮೀ’’ತಿ ಮಾನಗ್ಗಾಹೋ ಚ ತಣ್ಹಾವಸೇನೇವ ಹೋನ್ತೀತಿ ತಣ್ಹಾಪಿ ತಥಾಪವತ್ತಿಯಾ ಪಚ್ಚಯಭೂತಾ ತಥಾಪವತ್ತಿ ಏವಾತಿ ವುತ್ತಂ ‘‘ಅಸ್ಮೀತಿ ಏವಂ ಪವತ್ತಂ ತಣ್ಹಾಮಾನದಿಟ್ಠಿಪಪಞ್ಚತ್ತಯಂ ಹೋತೀ’’ತಿ. ದಹರಸದ್ದೋ ಬಾಲದಾರಕೇಪಿ ಪವತ್ತತೀತಿ ತತೋ ವಿಸೇಸನತ್ಥಂ ‘‘ಯುವಾ’’ತಿ ವುತ್ತಂ. ಯುವಾಪಿ ಏಕೋ ಅಮಣ್ಡನಸೀಲೋತಿ ತತೋ ವಿಸೇಸನತ್ಥಂ ‘‘ಮಣ್ಡನಕಜಾತಿಕೋ’’ತಿ ವುತ್ತಂ. ತೇನ ಮುಖನಿಮಿತ್ತಪಚ್ಚವೇಕ್ಖಣಸ್ಸ ಸಬ್ಭಾವಂ ದಸ್ಸೇತಿ. ತನ್ತಿ ಆದಾಸಮಣ್ಡಲಂ ಓಲೋಕಯತೋ. ಪರಮ್ಮುಖಂ ಹುತ್ವಾ ಪಞ್ಞಾಯೇಯ್ಯಾತಿ ಯದಿ ಪುರತ್ಥಿಮದಿಸಾಭಿಮುಖಂ ಹುತ್ವಾ ಠಿತಂ, ಮುಖನಿಮಿತ್ತಮ್ಪಿ ಪುರತ್ಥಿಮದಿಸಾಭಿಮುಖಮೇವ ಹುತ್ವಾ ಪಞ್ಞಾಯೇಯ್ಯಾತಿ ಅತ್ಥೋ. ಯದಿಪಿ ಪರಸ್ಸ ಸದಿಸಸ್ಸ ಮುಖಂ ಭವೇಯ್ಯ, ತಥಾಪಿ ಕಾಚಿ ಅಸದಿಸತಾ ಭವೇಯ್ಯಾತಿ ವುತ್ತಂ ‘‘ವಣ್ಣಾದೀಹಿ ಅಸದಿಸಂ ಹುತ್ವಾ ಪಞ್ಞಾಯೇಯ್ಯಾ’’ತಿ. ನಿಭಾಸರೂಪನ್ತಿ ಪಟಿಭಾಸರೂಪಂ. ನಿಭಾಸರೂಪಂ ತಾವ ಕಂಸಾದಿಮಯೇ ಪಭಸ್ಸರೇ ಮಣ್ಡಲೇ ಪಞ್ಞಾಯತು, ಉದಕೇ ಪನ ಕಥನ್ತಿ ‘‘ಕೇನ ಕಾರಣೇನಾ’’ತಿ ಪುಚ್ಛತಿ. ಇತರೋ ‘‘ಮಹಾಭೂತಾನಂ ವಿಸುದ್ಧತಾಯಾ’’ತಿ ವದನ್ತೋ ತತ್ಥಾಪಿ ಯಥಾಲದ್ಧಪಭಸ್ಸರಭಾವೇನೇವಾತಿ ದಸ್ಸೇತಿ. ಏತ್ಥ ಚ ಮಣ್ಡನಜಾತಿಕೋ ಪುರಿಸೋ ವಿಯ ಪುಥುಜ್ಜನೋ, ಆದಾಸತಲಾದಯೋ ವಿಯ ಪಞ್ಚಕ್ಖನ್ಧಾ, ಮುಖನಿಮಿತ್ತಂ ವಿಯ ‘‘ಅಸ್ಮೀ’’ತಿ ಗಹಣಂ, ಮುಖನಿಮಿತ್ತಂ ಉಪಾದಾಯ ದಿಸ್ಸಮಾನರೂಪಾದಿ ವಿಯ ‘‘ಅಸ್ಮೀ’’ತಿ ಸತಿ ‘‘ಅಹಮಸ್ಮೀ’’ತಿ ‘‘ಪರೋಸ್ಮೀ’’ತಿಆದಯೋ ಗಾಹವಿಸೇಸಾ. ಅಭಿಸಮೇತೋತಿ ಅಭಿಸಮಿತೋ, ಅಯಮೇವ ವಾ ಪಾಠೋ.

ಆನನ್ದಸುತ್ತವಣ್ಣನಾ ನಿಟ್ಠಿತಾ.

೨. ತಿಸ್ಸಸುತ್ತವಣ್ಣನಾ

೮೪. ಮಧುರಕಂ ವುಚ್ಚತಿ ಕಾಯೇ ವಿಭಾರನ್ತಿ ಆಹ – ‘‘ಮಧುರಕಜಾತೋ ವಿಯಾತಿ ಸಞ್ಜಾತಗರುಭಾವೋ ವಿಯಾ’’ತಿ. ಗರುಭಾವೇ ಸತಿ ಲಹುತಾ ಅನೋಕಾಸಾವ, ತಥಾ ಮುದುತಾ ಕಮ್ಮಞ್ಞತಾ ಚಾತಿ ವುತ್ತಂ ‘‘ಅಕಮ್ಮಞ್ಞೋ’’ತಿ. ‘‘ಕಾಯೇ’’ತಿ ಆನೇತ್ವಾ ವತ್ತಬ್ಬಂ. ನ ಪಕ್ಖಾಯನ್ತೀತಿ ಪಕಾಸಾ ಹುತ್ವಾ ನ ಖಾಯನ್ತಿ. ತೇನಾಹ ‘‘ನ ಪಾಕಟಾ ಹೋನ್ತೀ’’ತಿ. ಉಪಟ್ಠಹನ್ತೀತಿ ಉಪತಿಟ್ಠನ್ತಿ. ನ ದಿಸ್ಸತೀತಿ ಗಹಣಂ ನ ಗಚ್ಛತಿ. ಮಹಾವಿಚಿಕಿಚ್ಛಾತಿ ಅಟ್ಠವತ್ಥುಕಾ ಸೋಳಸವತ್ಥುಕಾ ಚ ವಿಮತಿ. ನ ಹಿ ಉಪ್ಪಜ್ಜತಿ ಪರಿಪಕ್ಕಕುಸಲಮೂಲತ್ತಾ.

ಕಾಮಾನಮೇತಂ ಅಧಿವಚನನ್ತಿ ಪದಂ ಉದ್ಧರಿತ್ವಾ ಯೇನ ಅಧಿಪ್ಪಾಯೇನ ಭಗವತಾ ನಿನ್ನಂ ಪಲ್ಲಲಂ ಕಾಮಾನಂ ನಿದಸ್ಸನಭಾವೇನ ಆಭತಂ, ತಂ ಅಧಿಪ್ಪಾಯಂ ವಿಭಾವೇತುಂ ‘‘ಯಥಾ ಹೀ’’ತಿಆದಿ ವುತ್ತಂ.

ತಿಸ್ಸಸುತ್ತವಣ್ಣನಾ ನಿಟ್ಠಿತಾ.

೩. ಯಮಕಸುತ್ತವಣ್ಣನಾ

೮೫. ದಿಟ್ಠಿ ಏವ ದಿಟ್ಠಿಗತಂ ‘‘ಗೂಥಗತಂ ಮುತ್ತಗತ’’ನ್ತಿ (ಮ. ನಿ. ೨.೧೧೯; ಅ. ನಿ. ೯.೧೧) ಯಥಾ. ದಿಟ್ಠಿಗತಂ ನಾಮ ಜಾತಂ ಖನ್ಧವಿನಿಮುತ್ತಸ್ಸ ಸತ್ತಸ್ಸ ಗಹಿತತ್ತಾ.

ಕುಪಿತೇತಿ ದಿಟ್ಠಿಸಙ್ಖಾತರೋಗೇನ ಕುಪಿತೇ. ಪಗ್ಗಯ್ಹಾತಿ ತೇಸಂ ಭಿಕ್ಖೂನಂ ಸನ್ತಿಕೇ ವಿಯ ಥೇರಸ್ಸ ಸಾರಿಪುತ್ತಸ್ಸ ಸಮ್ಮುಖಾ ಅತ್ತನೋ ಲದ್ಧಿಂ ಪಗ್ಗಯ್ಹ ‘‘ಏವಂ ಖ್ವಾಹ’’ನ್ತಿ ಏವಂ ನಿಚ್ಛಯೇನ ವತ್ತುಂ ಅಸಕ್ಕೋನ್ತೋ.

ಅನುಯೋಗವತ್ತಂ ನಾಮ ಯೇನ ಯುತ್ತೋ, ತಸ್ಸ ಅತ್ತನೋ ಗಾಹಂ ನಿಜ್ಝಾನಕ್ಖನ್ತಿಯಾವ ಯಾಥಾವತೋ ಪವೇದನಂ. ಥೇರಸ್ಸ ಅನುಯೋಗೇ ಭುಮ್ಮನ್ತಿ ‘‘ತಂ ಕಿಂ ಮಞ್ಞಸಿ, ಆವುಸೋ ಯಮಕಾ’’ತಿಆದಿನಾ ಥೇರೇನ ಕಥಿತಪುಚ್ಛಾಯ ಭುಮ್ಮನಿದ್ದೇಸೋ. ಸಚೇ ತಂ ಆವುಸೋತಿ ಇದನ್ತಿ ‘‘ಸಚೇ ತಂ, ಆವುಸೋ’’ತಿ ಏವಮಾದಿಕಂ ಇದಂ ವಚನಂ. ಏತನ್ತಿ ಯಮಕತ್ಥೇರಂ. ಅಞ್ಞನ್ತಿ ಅರಹತ್ತಂ. ವತ್ತಬ್ಬಾಕಾರೇನ ವದನ್ತೋ ಅತ್ಥತೋ ಅರಹತ್ತಂ ಬ್ಯಾಕರೋನ್ತೋ ನಾಮ ಹೋತೀತಿ ಅಧಿಪ್ಪಾಯೇನ ವದತಿ.

ಏತಸ್ಸ ಪಠಮಮಗ್ಗಸ್ಸಾತಿ ಏತಸ್ಸ ಇದಾನಿಯೇವ ತಿಪರಿವಟ್ಟದೇಸನಾವಸಾನೇ ತಯಾ ಅಧಿಗತಸ್ಸ ಪಠಮಮಗ್ಗಸ್ಸ. ಚತೂಹಿ ಯೋಗೇಹೀತಿ ಅತ್ತತೋ ಪಿಯತೋ ಉದಾಸಿನತೋ ವೇರಿತೋತಿ ಚತೂಹಿಪಿ ಉಪ್ಪಜ್ಜನಅನತ್ಥಯೋಗೇಹಿ.

ಉಪೇತೀತಿ ತಣ್ಹುಪಯದಿಟ್ಠುಪಯೇಹಿ ಉಪಾದಿಯತಿ ತಣ್ಹಾದಿಟ್ಠಿವತ್ಥುಂ ಪಪ್ಪೋತಿ. ಉಪಾದಿಯತೀತಿ ದಳ್ಹಗ್ಗಾಹಂ ಗಣ್ಹಾತಿ. ಅಧಿತಿಟ್ಠತೀತಿ ಅಭಿನಿವಿಸ್ಸ ತಿಟ್ಠತಿ. ಕಿನ್ತಿ? ‘‘ಅತ್ತಾ ಮೇ’’ತಿ. ಪಚ್ಚತ್ಥಿಕಾ ಮೇ ಏತೇತಿ ಏತೇ ರೂಪವೇದನಾದಯೋ ಪಞ್ಚುಪಾದಾನಕ್ಖನ್ಧಾ ಮಯ್ಹಂ ಪಚ್ಚತ್ಥಿಕಾ ಅನತ್ಥಾವಹತ್ತಾತಿ ವಿಪಸ್ಸನಾಞಾಣೇನ ಞತ್ವಾ. ವಿಪಸ್ಸನಾಯ ಯೋಜೇತ್ವಾತಿ ವಿಪಸ್ಸನಾಯ ಖನ್ಧೇ ಯೋಜೇತ್ವಾ.

ಯಮಕಸುತ್ತವಣ್ಣನಾ ನಿಟ್ಠಿತಾ.

೪. ಅನುರಾಧಸುತ್ತವಣ್ಣನಾ

೮೬. ತಸ್ಸೇವ ವಿಹಾರಸ್ಸಾತಿ ಮಹಾವನೇ ಯಸ್ಮಿಂ ವಿಹಾರೇ ಭಗವಾ ವಿಹರತಿ, ತಸ್ಸೇವ ವಿಹಾರಸ್ಸ. ಇಮೇತಿ ಅಞ್ಞತಿತ್ಥಿಯಾ. ಯಸ್ಮಾ ಅಯಂ ಥೇರೋ ಠಪನೀಯಂ ಪಞ್ಹಂ ಠಪನೀಯಭಾವೇನ ನ ಠಪೇಸಿ, ತಸ್ಮಾ. ಅಞ್ಞತಿತ್ಥಿಯಾ…ಪೇ… ಏತದವೋಚುಂ. ತೇನಾಹ ‘‘ಏಕದೇಸೇನ ಸಾಸನಸಮಯಂ ಜಾನನ್ತಾ’’ತಿ.

ಗಹಿತಮೇವ ಹೋತಿ ತತೋ ಪಗೇವ ಸಿದ್ಧತ್ತಾ. ತೇನಾಹ ‘‘ತಸ್ಸ ಮೂಲತ್ತಾ’’ತಿ. ಏವನ್ತಿ ‘‘ದುಕ್ಖಞ್ಚೇವ ಪಞ್ಞಪೇಮಿ, ದುಕ್ಖಸ್ಸ ಚ ನಿರೋಧ’’ನ್ತಿ ಏವಂ. ವಟ್ಟವಿವಟ್ಟಮೇವಾತಿ ಪಞ್ಚನ್ನಂ ಪನ ಖನ್ಧಾನಂ ಸಮನುಪಸ್ಸನಾಯ ವಸೇನ ವಟ್ಟಂ, ‘‘ಏವಂ ಪಸ್ಸ’’ನ್ತಿಆದಿನಾ ವಿವಟ್ಟಂ ಕಥಿತಮೇವ.

ಅನುರಾಧಸುತ್ತವಣ್ಣನಾ ನಿಟ್ಠಿತಾ.

೫. ವಕ್ಕಲಿಸುತ್ತವಣ್ಣನಾ

೮೭. ನಗರಮಜ್ಝೇ ಮಹಾಆಬಾಧೋ ಉಪ್ಪಜ್ಜೀತಿ ನಗರಮಜ್ಝೇನ ಆಗಚ್ಛನ್ತೋ ಕಮ್ಮಸಮುಟ್ಠಾನೋ ಮಹನ್ತೋ ಆಬಾಧೋ ಉಪ್ಪಜ್ಜತಿ. ಸಮನ್ತತೋ ಅಧೋಸೀತಿ ಸಬ್ಬಭಾಗೇನ ಪರಿಪ್ಫನ್ದಿ. ಇರಿಯಾಪಥಂ ಯಾಪೇತುನ್ತಿ ಸಯನನಿಸಜ್ಜಾದಿಭೇದಂ ಇರಿಯಾಪಥಂ ಪವತ್ತೇತುಂ. ನಿವತ್ತನ್ತೀತಿ ಓಸಕ್ಕನ್ತಿ, ಪರಿಹಾಯನ್ತೀತಿ ಅತ್ಥೋ. ಅಧಿಗಚ್ಛನ್ತೀತಿ ವಡ್ಢನ್ತಿ. ಸತ್ಥು ಗುಣಸರೀರಂ ನಾಮ ನವವಿಧಲೋಕುತ್ತರಧಮ್ಮಾಧಿಗಮಮೂಲನ್ತಿ ಕತ್ವಾ ವುತ್ತಂ ‘‘ನವವಿಧೋ ಹಿ…ಪೇ… ಕಾಯೋ ನಾಮಾ’’ತಿ, ಯಥಾ ಸತ್ತಾನಂ ಕಾಯೋ ಪಟಿಸನ್ಧಿಮೂಲಕೋ.

ಕಾಳಸಿಲಾಯಂ ಕತವಿಹಾರೋ ಕಾಳಸಿಲಾವಿಹಾರೋ. ಮಗ್ಗವಿಮೋಕ್ಖತ್ಥಾಯಾತಿ ಅಗ್ಗಮಗ್ಗವಿಮೋಕ್ಖಾಧಿಗಮಾಯ. ದೇವತಾತಿ ಸುದ್ಧಾವಾಸದೇವತಾ. ಅಲಾಮಕಂ ನಾಮ ಪುಥುಜ್ಜನಕಾಲಕಿರಿಯಾಯ ಅಭಾವತೋ. ತೇನಾಹ ‘‘ಥೇರೋ ಕಿರಾ’’ತಿಆದಿ. ಏಕಂ ದ್ವೇ ಞಾಣಾನೀತಿ ಏಕಂ ದ್ವೇ ಪಚ್ಚವೇಕ್ಖಣಞಾಣಾನಿ ಸಭಾವತೋ ಅವಸ್ಸಂ ಉಪ್ಪಜ್ಜನ್ತಿ, ಅಯಂ ಧಮ್ಮತಾ. ಮಗ್ಗಫಲನಿಬ್ಬಾನಪಚ್ಚವೇಕ್ಖಣಾನಿ ತಂತಂಮಗ್ಗವುಟ್ಠಾನೇ ಉಪ್ಪಜ್ಜನ್ತಿ ಏವ. ಏಕಂ ದ್ವೇತಿ ವಚನಂ ಉಪ್ಪನ್ನಭಾವದಸ್ಸನತ್ಥಂ ವುತ್ತಂ.

ಧೂಮಾಯನಭಾವೋ ಧೂಮಾಕಾರತಾ, ತಥಾ ತಿಮಿರಾಯನಭಾವೋ.

ವಕ್ಕಲಿಸುತ್ತವಣ್ಣನಾ ನಿಟ್ಠಿತಾ.

೬. ಅಸ್ಸಜಿಸುತ್ತವಣ್ಣನಾ

೮೮. ಪಸ್ಸಮ್ಭಿತ್ವಾತಿ ನಿರೋಧೇತ್ವಾ. ನೋ ಚ ಸ್ವಾಹನ್ತಿ ನೋ ಚ ಸು ಅಹಂ. ಪರಿಹಾಯಿ ಕುಪ್ಪಧಮ್ಮತ್ತಾ. ಏತನ್ತಿ ಸಮಾಧಿಮತ್ತಸಾರಂ, ಸೀಲಮತ್ತೇ ಪನ ವತ್ತಬ್ಬಮೇವ ನತ್ಥಿ. ಕಥಂ ಹೋತೀತಿ ಕಥಂ ಅಭಿನನ್ದನಾ ಹೋತಿ. ದುಕ್ಖಂ ಪತ್ವಾತಿ ದುಕ್ಖುಪ್ಪತ್ತಿಹೇತು ಸುಖಂ ಪತ್ಥೇತಿ ‘‘ಏವಂ ಮೇ ದುಕ್ಖಪರಿಳಾಹೋ ನ ಭವಿಸ್ಸತೀ’’ತಿ. ಯದಗ್ಗೇನಾತಿ ಯೇನ ಭಾಗೇನ. ‘‘ದುಕ್ಖಂ ಪತ್ಥೇತಿಯೇವಾ’’ತಿ ವತ್ವಾ ತತ್ಥ ಕಾರಣಮಾಹ ‘‘ಸುಖವಿಪರಿಣಾಮೇನ ಹೀ’’ತಿಆದಿ. ಸುಖವಿಪರಿವತ್ತೇ ಸುಖವಿಪರಿಣಾಮದುಕ್ಖಂ, ತಸ್ಮಾ ಸುಖಂ ಅಭಿನನ್ದನ್ತೋ ಅತ್ಥತೋ ದುಕ್ಖಂ ಅಭಿನನ್ದತಿ ನಾಮ.

ಅಸ್ಸಜಿಸುತ್ತವಣ್ಣನಾ ನಿಟ್ಠಿತಾ.

೭. ಖೇಮಕಸುತ್ತವಣ್ಣನಾ

೮೯. ಅತ್ತನಿಯನ್ತಿ ದಿಟ್ಠಿಗತಿಕಪರಿಕಪ್ಪಿತಸ್ಸ ಅತ್ತನೋ ಸನ್ತಕಂ. ತೇನಾಹ ‘‘ಅತ್ತನೋ ಪರಿಕ್ಖಾರಜಾತ’’ನ್ತಿ. ತಣ್ಹಾಮಾನೋ ಅಧಿಗತೋ ಅರಹತ್ತಸ್ಸ ಅನಧಿಗತತ್ತಾ, ನೋ ದಿಟ್ಠಿಮಾನೋ ಅಧಿಗತೋ, ತಥಾ ಕಾಮರಾಗಬ್ಯಾಪಾದಾಪಿ. ಅನಾಗಾಮೀ ಕಿರ ಖೇಮಕತ್ಥೇರೋ, ‘‘ಸಕದಾಗಾಮೀ’’ತಿ ಕೇಚಿ ವದನ್ತಿ. ಸನ್ಧಾವನಿಕಾಯಾತಿ ಸಞ್ಚರಣೇನ. ತೇನಾಹ ‘‘ಪುನಪ್ಪುನಂ ಗಮನಾಗಮನೇನಾ’’ತಿ. ಚತುಕ್ಖತ್ತುಂ ಗಮನಾಗಮನೇನಾತಿ ಚತುಕ್ಖತ್ತುಂ ಗಮನೇನ ಚ ಆಗಮನೇನ ಚ. ತೇನಾಹ – ‘‘ತಂ ದಿವಸಂ ದ್ವಿಯೋಜನಂ ಅದ್ಧಾನಂ ಆಹಿಣ್ಡೀ’’ತಿ. ಞತ್ವಾತಿ ಅಜ್ಝಾಸಯಂ ಞತ್ವಾ. ಥೇರೋತಿ ಖೇಮಕತ್ಥೇರೋ.

ರೂಪಮೇವ ಅಸ್ಮೀತಿ ವದತೀತಿ ರೂಪಕ್ಖನ್ಧಮೇವ ‘‘ಅಸ್ಮೀ’’ತಿ ಗಾಹಸ್ಸ ವತ್ಥುಂ ಕತ್ವಾ ವದತಿ. ಅಧಿಗತೋ ತಣ್ಹಾಮಾನೋ.

ಅಣುಸಹಗತೋತಿ ಅಣುಭಾವಂ ಗತೋ. ತೇನಾಹ ‘‘ಸುಖುಮೋ’’ತಿ. ತಯೋ ಖಾರಾ ವಿಯ ತಿಸ್ಸೋ ಅನುಪಸ್ಸನಾ ಚಿತ್ತಸಂಕಿಲೇಸಸ್ಸ ವಿಸೋಧನತೋ. ಸೀಲಗನ್ಧಾದೀಹಿ ಗುಣಗನ್ಧೇಹಿ.

ಕಥೇತುನ್ತಿ ಉದ್ದೇಸವಸೇನ ಕಥೇತುಂ. ಪಕಾಸೇತುನ್ತಿ ನಿದ್ದೇಸವಸೇನ ತಮತ್ಥಂ ಪಕಾಸೇತುಂ. ಜಾನಾಪೇತುನ್ತಿ ಕಾರಣವಸೇನ ಜಾನಾಪೇತುಂ. ಪತಿಟ್ಠಾಪೇತುನ್ತಿ ಕಥಾಪೇತುಂ. ವಿವಟಂ ಕಾತುನ್ತಿ ಉದಾಹರಣಂ ವಣ್ಣೇತ್ವಾ ಪಾಕಟಂ ಕಾತುಂ. ಸುವಿಭತ್ತಂ ಕಾತುನ್ತಿ ಅನ್ವಯತೋ ಬ್ಯತಿರೇಕತೋ ಸುಟ್ಠು, ವಿಭತ್ತಂ ಕಾತುಂ. ಉತ್ತಾನಕಂ ಕಾತುನ್ತಿ ಉಪನಯನಿಗಮೇಹಿ ತಮತ್ಥಂ ವಿಭೂತಂ ಕಾತುಂ. ಅಞ್ಞೇನ ನೀಹಾರೇನಾತಿ ವಿಪಸ್ಸನಾವಿಮುತ್ತೇನ ಚಿತ್ತಾಭಿನೀಹಾರೇನ.

ಖೇಮಕಸುತ್ತವಣ್ಣನಾ ನಿಟ್ಠಿತಾ.

೮. ಛನ್ನಸುತ್ತವಣ್ಣನಾ

೯೦. ಮಕ್ಖೀತಿ ಗುಣಮಕ್ಖನಲಕ್ಖಣೇನ ಮಕ್ಖೇನ ಸಮನ್ನಾಗತೋ. ಪಳಾಸೀತಿ ಯುಗಗ್ಗಾಹಲಕ್ಖಣೇನ ಪಳಾಸೇನ ಸಮನ್ನಾಗತೋ. ಏತಂ ಅವೋಚಾತಿ ‘‘ಓವದನ್ತು ಮಂ…ಪೇ… ಪಸ್ಸೇಯ್ಯ’’ನ್ತಿ ಏತಂ ಅವೋಚ.

ಥೇರನ್ತಿ ಛನ್ನತ್ಥೇರಂ. ಅತ್ತನೋ ದುಗ್ಗಹಣೇನ ಕಞ್ಚಿ ಉಪಾರಮ್ಭಮ್ಪಿ ಕರೇಯ್ಯ. ತೇನ ವುತ್ತಂ ‘‘ಏವಂ ಕಿರ ನೇಸಂ ಅಹೋಸೀ’’ತಿಆದಿ. ನಿದ್ದೋಸಮೇವಸ್ಸ ಕತ್ವಾತಿ ಆದಿತೋ ಅನುರೂಪತ್ತಮೇವ ಕತ್ವಾ ಸದ್ಧಮ್ಮಂ ಕಥೇಸ್ಸಾಮಾತಿ.

ಪರಿತಸ್ಸನಾ ಉಪಾದಾನನ್ತಿ ಭಯಪರಿತಸ್ಸನಾ ದಿಟ್ಠುಪಾದಾನಂ. ಅನತ್ತನಿ ಸತಿ ಅನತ್ತಕತಾನಿ ಕಮ್ಮಾನಿ ಕಮತ್ತಾನಂ ಫುಸಿಸ್ಸನ್ತೀತಿ ಭಯಪರಿತಸ್ಸನಾ ಚೇವ ದಿಟ್ಠುಪಾದಾನಞ್ಚ ಉಪ್ಪಜ್ಜತಿ. ಪಟಿನಿವತ್ತತೀತಿ ಯಥಾರದ್ಧವಿಪಸ್ಸನಾತೋ ಪಟಿನಿವತ್ತತಿ, ನಾಸಕ್ಖೀತಿ ಅತ್ಥೋ. ಕಸ್ಮಾ ಪನೇತಸ್ಸ ವಿಪಸ್ಸನಮನುಯುಞ್ಜನ್ತಸ್ಸ ಏವಂ ಅಹೋಸೀತಿ ತತ್ಥ ಕಾರಣಂ ವದತಿ ‘‘ಅಯಂ ಕಿರಾ’’ತಿಆದಿನಾ. ಏವನ್ತಿ ‘‘ಕೋ ನು ಖೋ ಮೇ ಅತ್ತಾ’’ತಿ ಏವಂ ನ ಹೋತಿ. ತಾವತಿಕಾ ವಿಸ್ಸತ್ಥೀತಿ ‘‘ಮಯ್ಹಂ ಧಮ್ಮಂ ದೇಸೇತೂ’’ತಿ ವುತ್ತವಿಸ್ಸಾಸೋ ಅತ್ಥೀತಿ ಅತ್ಥೋ. ಇದಂ ಕಚ್ಚಾನಸತ್ಥಂ ಅದ್ದಸಾತಿ ಯೋಜನಾ. ‘‘ದ್ವಯನಿಸ್ಸಿತೋ, ಕಚ್ಚಾನ, ಲೋಕೋ’’ತಿಆದಿ ದಿಟ್ಠಿವಿನಿವೇಠನಾ. ‘‘ಏತೇ ತೇ, ಕಚ್ಚಾನ, ಉಭೋ ಅನ್ತೇ ಅನುಪಗಮ್ಮಾ’’ತಿಆದಿ ಬುದ್ಧಬಲದೀಪನಾ.

ಛನ್ನಸುತ್ತವಣ್ಣನಾ ನಿಟ್ಠಿತಾ.

೯-೧೦. ರಾಹುಲಸುತ್ತಾದಿವಣ್ಣನಾ

೯೧-೯೨. ಏತಾನಿ ಸುತ್ತಾನಿ. ಇಧಾಗತಾನೀತಿ ಇಮಸ್ಮಿಂ ವಗ್ಗೇ ಆನೀತಾನಿ ಸಙ್ಗೀತಿಕಾರೇಹೀತಿ.

ರಾಹುಲಸುತ್ತಾದಿವಣ್ಣನಾ ನಿಟ್ಠಿತಾ.

ಥೇರವಗ್ಗವಣ್ಣನಾ ನಿಟ್ಠಿತಾ.