೧೦. ಪುಪ್ಫವಗ್ಗೋ

೧. ನದೀಸುತ್ತವಣ್ಣನಾ

೯೩. ಪಬ್ಬತೇಯ್ಯಾತಿ ಪಬ್ಬತತೋ ಆಗತಾ. ತತೋ ಏವ ಓಹಾರಿನೀ. ತೇನಸ್ಸಾ ಚಣ್ಡಸೋತತಂ ದಸ್ಸೇತಿ. ದೂರಂ ಗಚ್ಛತೀತಿ ದೂರಙ್ಗಮಾ. ತೇನಸ್ಸಾ ಮಹೋಘತಂ ದಸ್ಸೇತಿ.

ಸೋತೇತಿ ವಟ್ಟಸೋತೇ. ಚತೂಹಿ ಗಾಹೇಹೀತಿ ‘‘ರೂಪಂ ಅತ್ತತೋ ಸಮನುಪಸ್ಸತೀ’’ತಿಆದಿನಯಪ್ಪವತ್ತೇಹಿ ಚತೂಹಿ ಗಾಹೇಹಿ. ಪಲುಜ್ಜನತ್ತಾತಿ ಛಿನ್ನತ್ತಾ. ಸೋಕಾದಿಬ್ಯಸನಪ್ಪತ್ತೀತಿ ಸೋಕಾದಿಅನತ್ಥುಪ್ಪತ್ತಿ.

ನದೀಸುತ್ತವಣ್ಣನಾ ನಿಟ್ಠಿತಾ.

೨. ಪುಪ್ಫಸುತ್ತವಣ್ಣನಾ

೯೪. ವಿವದತೀತಿ ವಿವಾದಂ ಕರೋತಿ. ವದನ್ತೋತಿ ಅಯಥಾಸಭಾವೇನ ವದನ್ತೋ. ವಿವದತಿ ಧಮ್ಮತಾಯ ವಿರುದ್ಧಂ ಕತ್ವಾ ವದತಿ. ಲೋಕಧಮ್ಮೋತಿ ಲುಜ್ಜನಸಭಾವಧಮ್ಮೋ. ಕೋ ಪನ ಸೋತಿ ಆಹ ‘‘ಖನ್ಧಪಞ್ಚಕ’’ನ್ತಿ. ತೇನಾಹ ‘‘ತಂ ಹೀ’’ತಿಆದಿ. ಕಥಂ ಕರೋಮೀತಿ ಕೇನ ಪಕಾರೇನಾಹಂ ಬಾಲಂ ಅಜಾನನ್ತಂ ಕರೋಮಿ. ತೇನಾಹ ‘‘ಮಯ್ಹಂ ಹೀ’’ತಿಆದಿ. ತಥಾ ಚಾಹ ‘‘ಅಕ್ಖಾತೋ ವೋ ಮಯಾ ಮಗ್ಗೋ’’ತಿಆದಿ (ಧ. ಪ. ೨೭೫). ‘‘ತಯೋ ಲೋಕಾ ಕಥಿತಾ’’ತಿ ವತ್ವಾ ತಂ ವಿವರಿತುಂ ‘‘ನಾಹಂ, ಭಿಕ್ಖವೇ’’ತಿಆದಿಮಾಹ.

ಪುಪ್ಫಸುತ್ತವಣ್ಣನಾ ನಿಟ್ಠಿತಾ.

೩. ಫೇಣಪಿಣ್ಡೂಪಮಸುತ್ತವಣ್ಣನಾ

೯೫. ಕೇನಚಿ ಕಾರಣೇನ ಯುಜ್ಝಿತ್ವಾ ಗಹೇತುಂ ನ ಸಕ್ಕಾತಿ ಅಯುಜ್ಝಾ ನಾಮ. ನಿವತ್ತನಟ್ಠಾನೇತಿ ಉದಕಪ್ಪವಾಹಸ್ಸ ನಿವತ್ತಿತಟ್ಠಾನೇ.

ಅನುಸೋತಾಗಮನೇತಿ ಅನುಸೋತಂ ಆಗಮನಹೇತು, ‘‘ಅನುಸೋತಾಗಮನೇನಾ’’ತಿ ವಾ ಪಾಠೋ. ಅನುಪುಬ್ಬೇನ ಪವಡ್ಢಿತ್ವಾತಿ ತತ್ಥ ತತ್ಥ ಉಟ್ಠಿತಾನಂ ಖುದ್ದಕಮಹನ್ತಾನಂ ಫೇಣಪಿಣ್ಡಾನಂ ಸಂಸಗ್ಗೇನ ಪಕಾರತೋ ವುದ್ಧಿಂ ಪತ್ವಾ. ಆವಹೇಯ್ಯಾತಿ ಆನೇತ್ವಾ ವಹೇಯ್ಯ. ಕಾರಣೇನ ಉಪಪರಿಕ್ಖೇಯ್ಯಾತಿ ಞಾಣೇನ ವೀಮಂಸೇಯ್ಯ. ‘‘ಸಾರೋ ನಾಮ ಕಿಂ ಭವೇಯ್ಯಾ’’ತಿ ವತ್ವಾ ಸಬ್ಬಸೋ ತದಭಾವಂ ದಸ್ಸೇನ್ತೋ ‘‘ವಿಲೀಯಿತ್ವಾ ವಿದ್ಧಂಸೇಯ್ಯೇವಾ’’ತಿ ಆಹ. ತೇನ ರೂಪಮ್ಪಿ ನಿಸ್ಸಾರತಾಯ ಭಿಜ್ಜತೇವಾತಿ ದಸ್ಸೇತಿ. ಯಥಾ ಹಿ ಅನಿಚ್ಚತಾಯ ಅಸಾರತಾಸಿದ್ಧಿ, ಏವಂ ಅಸಾರತಾಯಪಿ ಅನಿಚ್ಚತಾಸಿದ್ಧೀತಿ ಅನಿಚ್ಚತಾಯ ಏವ ನಿಚ್ಚಸಾರಂ ಥಿರಭಾವಸಾರಂ ಧುವಸಾರಂ ಸಾಮೀನಿವಾಸೀಕಾರಕಭೂತಸ್ಸ ಅತ್ತನೋ ವಸೇ ಪವತ್ತನಮ್ಪೇತ್ಥ ನತ್ಥೀತಿ ಆಹ ‘‘ರೂಪಮ್ಪಿ…ಪೇ… ನಿಸ್ಸಾರಮೇವಾ’’ತಿ. ಸೋತಿ ಫೇಣಪಿಣ್ಡೋ. ಗಹಿತೋಪಿ ಉಪಾಯೇನ ತಮತ್ಥಂ ನ ಸಾಧೇತಿ ಅನರಹತ್ತಾ. ಅನೇಕಸನ್ಧಿಘಟಿತೋ ತಥಾ ತಥಾ ಘಟಿತೋ ಹುತ್ವಾ.

ಬ್ಯಾಮಮತ್ತಮ್ಪಿ ಏತರಹಿ ಮನುಸ್ಸಾನಂ ವಸೇನ. ಅವಸ್ಸಮೇವ ಭಿಜ್ಜತಿ ತರಙ್ಗಬ್ಭಾಹತಂ ಹುತ್ವಾ.

ತಸ್ಮಿಂ ತಸ್ಮಿಂ ಉದಕಬಿನ್ದುಮ್ಹಿ ಪತಿತೇ. ಉದಕತಲನ್ತಿ ಉದಕಪಿಟ್ಠಿಂ. ಅಞ್ಞತೋ ಪತನ್ತಂ ಉದಕಬಿನ್ದುಂ. ಉದಕಜಲ್ಲನ್ತಿ ಸನ್ತಾನಕಂ ಹುತ್ವಾ ಠಿತಂ ಉದಕಮಲಂ. ತಞ್ಹಿ ಸಂಕಡ್ಢಿತ್ವಾ ತತೋ ಉದಕಂ ಪುಟಂ ಕರೋತಿ, ತಸ್ಮಿಂ ಪುಟೇ ಪುಬ್ಬುಳಸಮಞ್ಞಾ. ವತ್ಥುನ್ತಿ ಚಕ್ಖಾದಿವತ್ಥುಂ. ಆರಮ್ಮಣನ್ತಿ ರೂಪಾದಿಆರಮ್ಮಣಂ. ಕಿಲೇಸಜಲ್ಲನ್ತಿ ಪುರಿಮಸಿದ್ಧಂ, ಪಟಿಲಬ್ಭಮಾನಂ ವಾ ಕಿಲೇಸಮಲಂ. ಫಸ್ಸಸಙ್ಘಟ್ಟನನ್ತಿ ಫಸ್ಸಸಮೋಧಾನಂ. ಪುಬ್ಬುಳಸದಿಸಾ ಮುಹುತ್ತರಮಣೀಯತಾಯ. ಯಸ್ಮಾ ಘಮ್ಮಕಾಲೇ ಸೂರಿಯಾತಪಸನ್ತಾಪಾಭಿನಿಬ್ಬತ್ತರಸ್ಮಿಜಾಲನಿಪಾತೇ ತಾದಿಸೇ ಭೂಮಿಪದೇಸೇ ಇತೋ ಚಿತೋ ಸಮುಗ್ಗತವಾತವೇಗಸಮುದ್ಧಟವಿರುಳ್ಹಸಙ್ಖಾತೇಸು ಪರಿಬ್ಭಮನ್ತೇಸು ಅಣುಪರಮಾಣುತಜ್ಜಾರಿಪ್ಪಕಾರೇಸು ಭೂತಸಙ್ಘಾತೇಸು ಮರೀಚಿಸಮಞ್ಞಾ, ತಸ್ಮಾ ಸಬ್ಬಸೋ ಸಾರವಿರಹಿತಾತಿ ವುತ್ತಂ ‘‘ಸಞ್ಞಾಪಿ ಅಸಾರಕಟ್ಠೇನ ಮರೀಚಿಸದಿಸಾ’’ತಿ. ಯಸ್ಮಾ ಚ ಪಸ್ಸನ್ತಾನಂ ಯೇಭುಯ್ಯೇನ ಉದಕಾಕಾರೇನ ಖಾಯತಿ, ತಸ್ಮಾ ‘‘ಗಹೇತ್ವಾ ಪಿವಿತುಂ ವಾ’’ತಿಆದಿ ವುತ್ತಂ. ನೀಲಾದಿಅನುಭವನತ್ಥಾಯಾತಿ ನೀಲಾದಿಆರಮ್ಮಣಸ್ಸ ಅನುಭವನತ್ಥಾಯ. ಫನ್ದತೀತಿ ಫನ್ದನಾಕಾರಪ್ಪತ್ತಾ ವಿಯ ಹೋತಿ ಅಪ್ಪಹೀನತಣ್ಹಸ್ಸ ಪುಗ್ಗಲಸ್ಸ. ವಿಪ್ಪಲಮ್ಭೇತಿ ಅಪ್ಪಹೀನವಿಪಲ್ಲಾಸಂ ಪುಗ್ಗಲಂ. ತೇನಾಹ ‘‘ಇದಂ ನೀಲಕ’’ನ್ತಿಆದಿ. ಸಞ್ಞಾವಿಪಲ್ಲಾಸತೋ ಹಿ ಚಿತ್ತವಿಪಲ್ಲಾಸೋ, ತತೋ ದಿಟ್ಠಿವಿಪಲ್ಲಾಸೋತಿ. ವಿಪ್ಪಲಮ್ಭನೇನಾತಿ ವಿಪ್ಪಕಾರವಸೇನೇವ ಆರಮ್ಮಣಸ್ಸ ಲಮ್ಭನೇನ. ವಿಪ್ಪಕಾರವಸೇನ ಹಿ ಏತಂ ಲಮ್ಭನಂ, ಯದಿದಂ ಅನುದಕಮೇವ ಉದಕಂ ಕತ್ವಾ ದಸ್ಸನಂ ಅನಗರಮೇವ ನಗರಂ ಕತ್ವಾ ಗನ್ಧಬ್ಬನಾಟಕಾದಿದಸ್ಸನಂ.

ಕುಕ್ಕುಕಂ ವುಚ್ಚತಿ ಕದಲಿಕ್ಖನ್ಧಸ್ಸ ಸಬ್ಬಪತ್ತವಟ್ಟೀನಂ ಅಬ್ಭನ್ತರೇ ದಣ್ಡಕನ್ತಿ ಆಹ ‘‘ಅಕುಕ್ಕುಕಜಾತನ್ತಿ ಅನ್ತೋ ಅಸಞ್ಜಾತಘನದಣ್ಡಕ’’ನ್ತಿ. ನ ತಥಾ ಹೋತೀತಿ ಯದತ್ಥಾಯ ಉಪನೀತಂ, ತದತ್ಥಾಯ ನ ಹೋತಿ. ನಾನಾಲಕ್ಖಣೋತಿ ನಾನಾಸಭಾವೋ. ಸಙ್ಖಾರಕ್ಖನ್ಧೋವಾತಿ ಏಕೋ ಸಙ್ಖಾರಕ್ಖನ್ಧೋತ್ವೇವ ವುಚ್ಚತಿ.

ಅಸ್ಸಾತಿ ಪುರಿಸಸ್ಸ. ಅಪಗತಪಟಲಪಿಳಕನ್ತಿ ಅಪಗತಪಟಲದೋಸಞ್ಚೇವ ಅಪಗತಪಿಳಕದೋಸಞ್ಚ. ಅಸಾರಭಾವದಸ್ಸನಸಮತ್ಥನ್ತಿ ಅಸಾರಸ್ಸ ಅಸಾರಭಾವದಸ್ಸನಸಮತ್ಥಂ. ಇತ್ತರಾತಿ ಪರಿತ್ತಕಾಲಾ, ನ ಚಿರಟ್ಠಿತಿಕಾ. ತೇನಾಹ ‘‘ಲಹುಪಚ್ಚುಪಟ್ಠಾನಾ’’ತಿ. ಅಞ್ಞದೇವ ಚ ಆಗಮನಕಾಲೇ ಚಿತ್ತನ್ತಿ ಇದಞ್ಚ ಓಳಾರಿಕವಸೇನೇವ ವುತ್ತಂ. ತಥಾ ಹಿ ಏಕಚ್ಛರಕ್ಖಣೇ ಅನೇಕಕೋಟಿಸತಸಹಸ್ಸಸಙ್ಖಾನಿ ಚಿತ್ತಾನಿ ಉಪ್ಪಜ್ಜಿತ್ವಾ ನಿರುಜ್ಝನ್ತಿ. ಮಾಯಾಯ ದಸ್ಸಿತಂ ರೂಪಂ ಮಾಯಾತಿ ವುತ್ತಂ. ಯಂಕಿಞ್ಚಿದೇವ ಕಪಾಲಿಟ್ಠಕಪಾಸಾಣವಾಲಿಕಾದಿಂ. ವಞ್ಚೇತೀತಿ ಅಸುವಣ್ಣಮೇವ ಸುವಣ್ಣನ್ತಿ, ಅಮುತ್ತಮೇವ ಮುತ್ತಾತಿಆದಿನಾ ವಞ್ಚೇತಿ. ನನು ಚ ಸಞ್ಞಾಪಿ ಮರೀಚಿ ವಿಯ ವಿಪ್ಪಲಮ್ಭೇತಿ ವಞ್ಚೇತಿ, ಇದಮ್ಪಿ ವಿಞ್ಞಾಣಂ ಮಾಯಾ ವಿಯ ವಞ್ಚೇತೀತಿ ಕೋ ಇಮೇಸಂ ವಿಸೇಸೋತಿ? ವಚನತ್ಥೋ ನೇಸಂ ಸಾಧಾರಣೋ. ತಥಾಪಿ ಸಞ್ಞಾ ಅನುದಕಂಯೇವ ಉದಕಂ ಕತ್ವಾ ಗಾಹಾಪೇನ್ತೀ, ಅಪುರಿಸಞ್ಞೇವ ಪುರಿಸಂ ಕತ್ವಾ ಗಾಹಾಪೇನ್ತೀ ವಿಪ್ಪಲಮ್ಭನವಸೇನ ಅಪ್ಪವಿಸಯಾ, ವಿಞ್ಞಾಣಂ ಪನ ಯಂ ಕಿಞ್ಚಿ ಅತಂಸಭಾವಂ ತಂ ಕತ್ವಾ ದಸ್ಸೇನ್ತೀ ಮಾಯಾ ವಿಯ ಮಹಾವಿಸಯಾ. ತೇನಾಹ ‘‘ಯಂಕಿಞ್ಚಿದೇವಾ’’ತಿಆದಿ. ಏವಮ್ಪೀತಿ ಅತಿವಿಯ ಲಹುಪರಿವತ್ತಿಭಾವೇನಪಿ ಮಾಯಾಸದಿಸನ್ತಿ.

ದೇಸಿತಾತಿ ಏವಂ ದೇಸಿತಾ ಫೇಣಪಿಣ್ಡಾದಿಉಪಮಾಹಿ.

ಭೂರಿ ವುಚ್ಚತಿ ಪಥವೀ, ಸಣ್ಹಟ್ಠೇನ ವಿಪುಲಟ್ಠೇನ ಚ ಭೂರಿಸದಿಸಪಞ್ಞತಾಯ ಭೂರಿಪಞ್ಞೋ. ತೇನಾಹ ‘‘ಸಣ್ಹಪಞ್ಞೇನ ಚೇವಾ’’ತಿಆದಿ. ಕಿಮಿಗಣಾದೀನನ್ತಿ ಆದಿ-ಸದ್ದೇನ ಅನೇಕಗಿಜ್ಝಾದಿಕೇ ಸಙ್ಗಣ್ಹಾತಿ. ಪವೇಣೀತಿ ಧಮ್ಮಪಬನ್ಧೋ. ಬಾಲಲಾಪಿನೀ ‘‘ಅಹಂ ಮಮಾ’’ತಿಆದಿನಾ. ಸೇಸಧಾತುಯೋ ಗಹೇತ್ವಾವ ಭಿಜ್ಜತಿ ಏಕುಪ್ಪಾದೇಕನಿರೋಧತ್ತಾ, ವತ್ಥುರೂಪನಿಸ್ಸಯಪಚ್ಚಯತ್ತಾ ‘‘ಅಯ’’ನ್ತಿ ನ ವಿಸುಂ ಗಹಿತಂ. ವಧಭಾವತೋತಿ ವಧಸ್ಸ ಮರಣಸ್ಸ ಅತ್ಥಿಭಾವತೋ. ಸರಣನ್ತಿ ಪಟಿಸರಣಂ.

ಫೇಣಪಿಣ್ಡೂಪಮಸುತ್ತವಣ್ಣನಾ ನಿಟ್ಠಿತಾ.

೪-೬. ಗೋಮಯಪಿಣ್ಡಸುತ್ತಾದಿವಣ್ಣನಾ

೯೬-೯೮. ಸಸ್ಸತಂ ಸಬ್ಬಕಾಲಂ ಯಾವ ಕಪ್ಪವುಟ್ಠಾನಾ ಹೋನ್ತೀತಿ ಸಸ್ಸತಿಯೋ, ಸಿನೇರುಆದಯೋ. ತಾಹಿ ಸಮಂ ಸಮಕಾಲಂ. ಅನೇನಾತಿ ಭಗವತಾ. ನಯಿದನ್ತಿ ಏತ್ಥ ಯ-ಕಾರೋ ಪದಸನ್ಧಿಕರೋ, ಇದನ್ತಿ ನಿಪಾತಪದಂ. ತಂ ಪನ ಯೇನ ಯೇನ ಸಮ್ಬನ್ಧೀಯತಿ, ತಂ ತಿಲಿಙ್ಗೋವ ಹೋತೀತಿ ‘‘ಅಯಂ ಮಗ್ಗಬ್ರಹ್ಮಚರಿಯವಾಸೋ’’ತಿ ವುತ್ತಂ. ‘‘ನ ಪಞ್ಞಾಯೇಯ್ಯಾ’’ತಿ ವತ್ವಾ ತಮತ್ಥಂ ವಿವರಿತುಂ ‘‘ಮಗ್ಗೋ ಹೀ’’ತಿಆದಿ ವುತ್ತಂ. ವಿವಟ್ಟೇನ್ತೋತಿ ವಿನಿವಟ್ಟೇನ್ತೋ ಅಪ್ಪವತ್ತಿಂ ಕರೋನ್ತೋ.

ರಾಜಧಾನೀತಿ ರಞ್ಞೋ ನಿವಾಸನಗರಂ. ಸುತ್ತಮಯನ್ತಿ ಚಿತ್ತವಣ್ಣವಟ್ಟಿಕಾಮಯಂ.

ಗೋಮಯಪಿಣ್ಡಸುತ್ತಾದಿವಣ್ಣನಾ ನಿಟ್ಠಿತಾ.

೭. ಗದ್ದುಲಬದ್ಧಸುತ್ತವಣ್ಣನಾ

೯೯. ಯಂ ಮಹಾಸಮುದ್ದೋತಿ ಏತ್ಥ ಯನ್ತಿ ಸಮಯಸ್ಸ ಪಚ್ಚಾಮಸನಂ. ಭುಮ್ಮತ್ಥೇ ಚೇತಂ ಪಚ್ಚತ್ತವಚನನ್ತಿ ಆಹ ‘‘ಯಸ್ಮಿಂ ಸಮಯೇ’’ತಿ. ಸೋ ಚ ಸಮಯೋ ಅಯನ್ತಿ ದಸ್ಸೇನ್ತೋ ‘‘ಪಞ್ಚಮೇ ಸೂರಿಯೇ ಉಟ್ಠಿತೇ’’ತಿ ಆಹ. ಪರಿಚ್ಛೇದಂ ನ ವದಾಮಿ ಪರಿಚ್ಛೇದಕಾರಿಕಾಯ ಅಗ್ಗಮಗ್ಗವಿಜ್ಜಾಯ ಅನಧಿಗತತ್ತಾ. ಸುನಖೋ ವಿಯ ವಟ್ಟನಿಸ್ಸಿತೋ ಬಾಲೋ ಅಸವಸಭಾವತೋ. ಗದ್ದುಲೋ ವಿಯ ದಿಟ್ಠಿಬನ್ಧೋ. ಸಕ್ಕಾಯೋ ತಸ್ಸ ಅಸವಸಭಾವತೋ. ಪುಥುಜ್ಜನಸ್ಸ ಸಕ್ಕಾಯಾನುಪರಿವತ್ತನನ್ತಿ ‘‘ಸನ್ತಾನೇ ಸತ್ತವೋಹಾರೋ’’ತಿ ತಂ ತತೋ ಅಞ್ಞಂ ಕತ್ವಾ ಭೇದೇನ ನಿದ್ದೇಸೋ.

ಗದ್ದುಲಬದ್ಧಸುತ್ತವಣ್ಣನಾ ನಿಟ್ಠಿತಾ.

೮. ದುತಿಯಗದ್ದುಲಬದ್ಧಸುತ್ತವಣ್ಣನಾ

೧೦೦. ದಿಟ್ಠಿಗದ್ದುಲನಿಸ್ಸಿತಾಯಾತಿ ಸಹಜಾತಾದಿಪಚ್ಚಯವಸೇನ ದಿಟ್ಠಿಗದ್ದುಲನಿಸ್ಸಿತಾಯ ನಿಸ್ಸಾಯೇವ ಪವತ್ತತಿ ತತೋ ಅತ್ತಾನಂ ವಿವೇಚೇತುಂ ಅಸಕ್ಕುಣೇಯ್ಯತ್ತಾ. ಚಿತ್ತಸಂಕಿಲೇಸೇನೇವಾತಿ ದಸವಿಧಕಿಲೇಸವತ್ಥುವಸೇನ ಚಿತ್ತಸ್ಸ ಸಂಕಿಲಿಟ್ಠಭಾವೇನ. ಅರಿಯಮಗ್ಗಾಧಿಗಮನೇನ ಚಿತ್ತಸ್ಸ ವೋದಾನತ್ತಾ ವೋದಾಯನ್ತಿ ವಿಸುಜ್ಝನ್ತಿ.

ವಿಚರಣಚಿತ್ತನ್ತಿ ಗಹೇತ್ವಾ ವಿಚರಣವಸೇನ ವಿಚರಣಚಿತ್ತಂ. ಸಙ್ಖಾನಾಮಾತಿ ಏವಂನಾಮಕಾ. ಬ್ರಾಹ್ಮಣಪಾಸಣ್ಡಿಕಾತಿ ಜಾತಿಯಾ ಬ್ರಾಹ್ಮಣಾ, ಛನ್ನವುತಿಯಾ ಪಾಸಣ್ಡೇಸು ತಂ ಸಙ್ಖಾಸಞ್ಞಿತಂ ಪಾಸಣ್ಡಂ ಪಗ್ಗಯ್ಹ ವಿಚರಣಕಾ. ಪಟಕೋಟ್ಠಕನ್ತಿ ದುಸ್ಸಾಪಣಕಂ. ದಸ್ಸೇನ್ತಾತಿ ಯಥಾಗತಿಕಮ್ಮವಿಪಾಕಚಿತ್ತತಂ ದಸ್ಸೇನ್ತಾ. ತಂ ಚಿತ್ತನ್ತಿ ತಂ ಪಟಕೋಟ್ಠಕಚಿತ್ತಂ ಗಹೇತ್ವಾ ವಿಚರನ್ತಿ. ಚಿನ್ತೇತ್ವಾ ಕತತ್ತಾತಿ ‘‘ಇಮಸ್ಸ ರೂಪಸ್ಸ ಏವಂ ಹತ್ಥಪಾದಾ, ಏವಂ ಮುಖಂ ಲಿಖಿತಬ್ಬಂ, ಏವಂ ಆಕಾರವತ್ಥಗ್ಗಹಣಾನಿ, ಏವಂ ಕಿರಿಯಾವಿಸೇಸಾ, ಏವಂ ಕಿರಿಯಾವಿಭಾಗಂ, ಸತ್ತವಿಸೇಸಾನಂ ವಿಭಾಗಂ ಕಾತಬ್ಬ’’ನ್ತಿ ತಸ್ಸ ಉಬ್ಬತ್ತನಖಿಪನಪವತ್ತನಾದಿಪಯೋಜನಞ್ಚಾತಿ ಸಬ್ಬಮೇತಂ ತಥಾ ಚಿನ್ತೇತ್ವಾ ಕತತ್ತಾ ಚಿತ್ತೇನ ಮನಸಾ ಚಿನ್ತಿತಂ ನಾಮ. ಉಪಾಯಪರಿಯೇಸನಚಿತ್ತನ್ತಿ ‘‘ಹತ್ಥಪಾದಾ ಏವಂ ಲಿಖಿತಬ್ಬಾ’’ತಿಆದಿನಾ ಯಥಾವುತ್ತಉಪಾಯಸ್ಸ ಚೇವ ಪುಬ್ಬೇ ಪವತ್ತಸ್ಸ ಭೂಮಿಪರಿಕಮ್ಮವಣ್ಣಧಾತುಸಮ್ಮಾಯೋಜನುಪಾಯಸ್ಸ ಚ ವಸೇನ ಪವತ್ತಂ ಚಿತ್ತಂ. ತತೋಪಿ ಚಿತ್ತತರನ್ತಿ ತತೋ ಚಿತ್ತಕಮ್ಮತೋಪಿ ಚಿತ್ತತರಂ ಚಿತ್ತಕಾರೇನ ಚಿನ್ತಿತಪ್ಪಕಾರಾನಂ ಸಬ್ಬೇಸಂಯೇವ ಚಿತ್ತಕಮ್ಮೇ ಅನಿಪ್ಫಜ್ಜನತೋ. ಕಮ್ಮಚಿತ್ತೇನಾತಿ ಕಮ್ಮವಿಞ್ಞಾಣೇನ. ಕಮ್ಮಚಿತ್ತೇನಾತಿ ವಾ ಕಮ್ಮಸ್ಸ ಚಿತ್ತಭಾವೇನ. ಸೋ ಕಮ್ಮಸ್ಸ ವಿಚಿತ್ತಭಾವೋ ತಣ್ಹಾವಸೇನ ಜಾಯತೀತಿ ವೇದಿತಬ್ಬೋ. ಸ್ವಾಯಮತ್ಥೋ ಅಟ್ಠಸಾಲಿನೀಟೀಕಾಯಂ ವಿಭಾವಿತೋ. ಏವಂ ಚಿತ್ತಾತಿ ಏವಂ ಚಿತ್ತರೂಪವಿಸೇಸಾ. ಯೋನಿಂ ಉಪನೇತೀತಿ ತಂ ತಂ ಅಣ್ಡಜಾದಿಭೇದಂ ಯೋನಿವಿಸೇಸಂ ಪಾಪೇತಿ ವಣ್ಣವಿಸೇಸೋ ವಿಯ ಫಲಿಕಮಣಿಕಂ. ನ ಹಿ ವಿಸೇಸಾ ಹಿತವಿಚಿತ್ತಸಾಮತ್ಥಿಯಕಮ್ಮಂ ಯೋನಿಂ ಉಪನೇತಿ, ತಸ್ಸ ತಸ್ಸ ವಿಪಾಕುಪ್ಪತ್ತಿಯಾ ಪಚ್ಚಯೋ ಹೋತಿ. ಯೋನಿಮೂಲಕೋ ತೇಸಂ ಚಿತ್ತಭಾವೋತಿ ಯಂ ಯಂ ಯೋನಿಂ ಕಮ್ಮಂ ಸತ್ತೇ ಉಪನೇತಿ, ತಂತಂಯೋನಿಮೂಲಕೋ ತೇಸಂ ಸತ್ತಾನಂ ಚಿತ್ತವಿಚಿತ್ತಭಾವೋ. ತೇನಾಹ ‘‘ಯೋನಿಉಪಗತಾ’’ತಿಆದಿ. ಸದಿಸಚಿತ್ತಾವ ಸದಿಸಚಿತ್ತಭಾವಾ ಏವ. ಇತೀತಿಆದಿ ವುತ್ತಸ್ಸೇವ ಅತ್ಥಸ್ಸ ಉಪ್ಪಟಿಪಾಟಿಯಾ ನಿಗಮನಂ.

ತಿರಚ್ಛಾನಗತಚಿತ್ತಭಾವತೋ ಚಿತ್ತಸ್ಸೇವ ಸವಿಸೇಸಂ ಚಿತ್ತಭಾವಕರಣಂ ದಸ್ಸೇತುಂ ‘‘ಅಪಿಚಾ’’ತಿಆದಿ ವುತ್ತಂ. ತತ್ಥ ಚಿತ್ತಂ ನಾಮೇತಂ ಚಿತ್ತತರಮೇವ ವೇದಿತಬ್ಬನ್ತಿ ಸಮ್ಬನ್ಧೋ. ಸಹಜಾತಧಮ್ಮಚಿತ್ತತಾಯಾತಿ ರಾಗಾದಿಸದ್ಧಾದಿಧಮ್ಮವಿಚಿತ್ತಭಾವೇನ. ಭೂಮಿಚಿತ್ತತಾಯಾತಿ ಅಧಿಟ್ಠಾನಚಿತ್ತತಾಯ. ಕಮ್ಮನಾನತ್ತಂ ಮೂಲಂ ಕಾರಣಂ ಏತೇಸನ್ತಿ ಕಮ್ಮನಾನತ್ತಮೂಲಕಾ, ತೇಸಂ. ಲಿಙ್ಗನಾನತ್ತಂ ಇತ್ಥಿಲಿಙ್ಗಾದಿನಾನತ್ತವಸೇನ ಚೇವ ತಂತಂಸಣ್ಠಾನನಾನತ್ತವಸೇನ ಚ ವೇದಿತಬ್ಬಂ. ಸಞ್ಞಾನಾನತ್ತಂ ಇತ್ಥಿಪುರಿಸದೇವಮನುಸ್ಸಾದಿಸಞ್ಞಾನಾನತ್ತವಸೇನ. ವೋಹಾರನಾನತ್ತಂ ತಿಸ್ಸೋತಿಆದಿವೋಹಾರನಾನತ್ತವಸೇನ. ಚಿತ್ತಾನಂ ವಿಚಿತ್ತಾನಂ. ತಂತಂವೋಹಾರನಾನತ್ತಮ್ಪಿ ಚಿತ್ತೇನೇವ ಪಞ್ಞಪೀಯತಿ. ರಙ್ಗಜಾತರೂಪಸಮುಟ್ಠಾಪನಾದಿನಾ ವತ್ಥಂ ರಞ್ಜಯತೀತಿ ರಜಕೋ, ವಣ್ಣಕಾರೋ. ಪುಥುಜ್ಜನಸ್ಸ ಅತ್ತಭಾವಸಞ್ಞಿತರೂಪಸಮುಟ್ಠಾಪನತಾ ನಿಯತಾ ಏಕನ್ತಿಕಾತಿ ಪುಥುಜ್ಜನಗ್ಗಹಣಂ. ‘‘ಅಭಿರೂಪಂ ರೂಪಂ ಸಮುಟ್ಠಾಪೇತೀ’’ತಿ ಆನೇತ್ವಾ ಸಮ್ಬನ್ಧೋ.

ದುತಿಯಗದ್ದುಲಬದ್ಧಸುತ್ತವಣ್ಣನಾ ನಿಟ್ಠಿತಾ.

೯. ವಾಸಿಜಟಸುತ್ತವಣ್ಣನಾ

೧೦೧. ಅತ್ಥಸ್ಸಾತಿ ಹಿತಸ್ಸ. ಅಸಾಧಿಕಾ ‘‘ಭಾವನಾನುಯೋಗಂ ಅನನುಯುತ್ತಸ್ಸಾ’’ತಿ ಅನನುಯುತ್ತಸ್ಸ ವುತ್ತತ್ತಾ. ಇತರಾತಿ ಸುಕ್ಕಪಕ್ಖಉಪಮಾ. ಸಾಧಿಕಾ ಭಾವನಾಯೋಗಸ್ಸ ಅನುಯುತ್ತತ್ತಾ. ತಞ್ಹಿ ತಸ್ಸ ಸಾಧಿಕಾ ವೇದಿತಬ್ಬಾ. ಸಮ್ಭಾವನತ್ಥೇತಿ ಪರಮತ್ಥಸಮ್ಭಾವನೇ. ಏವಞ್ಹಿ ಕಣ್ಹಪಕ್ಖೇಪಿ ಅಪಿಸದ್ದಗ್ಗಹಣಂ ಸಮತ್ಥಿತಂ ಹೋತಿ. ಸಮ್ಭಾವನತ್ಥೇತಿ ವಾ ಪರಿಕಪ್ಪನತ್ಥೇತಿ ಅತ್ಥೋ. ಸಙ್ಖಾತಬ್ಬೇ ಅತ್ಥೇ ಅನಿಯಮತೋ ವುಚ್ಚಮಾನೇ ಸಙ್ಖಾತೋ ಅನಿಯಮತ್ಥೋ ವಾಸದ್ದೋ ವತ್ತಬ್ಬೋತಿ ‘‘ಅಟ್ಠ ವಾ’’ತಿಆದಿ ವುತ್ತಂ. ಊನಾಧಿಕಾನೀತಿ ಊನಾನಿಪಿ ಅಧಿಕಾನಿಪಿ ಕಿಞ್ಚಾಪಿ ಹೋನ್ತಿ, ಏಕಂಸೋ ಪನ ಗಹೇತಬ್ಬೋತಿ ‘‘ಅಟ್ಠ ವಾ ದಸ ವಾ ದ್ವಾದಸ ವಾ’’ತಿ ವುತ್ತಂ. ಏವಂ ವಚನಂ ಸನ್ಧಾಯ ‘‘ವಚನಸಿಲಿಟ್ಠತಾಯಾ’’ತಿಆದಿ ವುತ್ತಂ. ಪಾದನಖಸಿಖಾಹಿ ಅಕೋಪನವಸೇನ ಸಮ್ಮಾ ಅಧಿಸಯಿತಾನಿ. ಉತುನ್ತಿ ಉಣ್ಹಉತುಂ ಕಾಯುಸ್ಮಾವಸೇನ. ತೇನಾಹ ‘‘ಉಸ್ಮೀಕತಾನೀ’’ತಿ. ಭಾವಿತಾನೀತಿ ಕುಕ್ಕುಟವಾಸನಾಯ ವಾಸಿತಾನಿ. ಸಮ್ಮಾಅಧಿಸಯನಾದಿತಿವಿಧಕಿರಿಯಾಕರಣೇನ ಇಮಂ ಅಪ್ಪಮಾದಂ ಕತ್ವಾ. ಸೋತ್ಥಿನಾ ಅಭಿನಿಬ್ಭಿಜ್ಜಿತುನ್ತಿ ಅನನ್ತರಾಯೇನ ತತೋ ನಿಕ್ಖಮಿತುಂ. ಇದಾನಿ ತಮತ್ಥಂ ವಿವರನ್ತೋ ‘‘ತೇ ಹೀ’’ತಿಆದಿಮಾಹ. ಸಯಮ್ಪೀತಿ ಅಣ್ಡಾನಿ. ಪರಿಣಾಮನ್ತಿ ಪರಿಪಕ್ಕಂ ಬಹಿನಿಕ್ಖಮನಯೋಗ್ಗತಂ.

ತನ್ತಿ ಓಪಮ್ಮಸಮ್ಪಟಿಪಾದನಂ. ಏವನ್ತಿ ಇದಾನಿ ವುಚ್ಚಮಾನಾಕಾರೇನ. ಅತ್ಥೇನಾತಿ ಉಪಮೇಯ್ಯತ್ಥೇನ. ಸಂಸನ್ದಿತ್ವಾ ಸಮ್ಮಾ ಯೋಜೇತ್ವಾ. ಸಮ್ಪಯುತ್ತಧಮ್ಮವಸೇನ ಞಾಣಸ್ಸ ತಿಕ್ಖಾದಿಭಾವೋ ವೇದಿತಬ್ಬೋ. ಞಾಣಸ್ಸ ಹಿ ಸಭಾವತೋ ಸತಿನೇಪಕ್ಕತೋ ಚ ತಿಕ್ಖಭಾವೋ, ಸಮಾಧಿವಸೇನ ಸೂರಭಾವೋ, ಸದ್ಧಾವಸೇನ ವಿಪ್ಪಸನ್ನಭಾವೋ, ವೀರಿಯವಸೇನ ಪರಿಣಾಮಭಾವೋ. ಪರಿಣಾಮಕಾಲೋತಿ ಬಲವವಿಪಸ್ಸನಾಕಾಲೋ. ವಡ್ಢಿತಕಾಲೋತಿ ವುಟ್ಠಾನಗಾಮಿನಿವಿಪಸ್ಸನಾಕಾಲೋ. ಅನುಲೋಮಟ್ಠಾನಸ್ಸ ಹಿ ವಿಪಸ್ಸನಾ ಗಹಿತಗಬ್ಭಾ ನಾಮ ತದಾ ಮಗ್ಗಗಬ್ಭಸ್ಸ ಗಹಿತತ್ತಾ. ತಜ್ಜಾತಿಕನ್ತಿ ತಸ್ಸ ವಿಪಸ್ಸನಾನುಯೋಗಸ್ಸ ಅನುರೂಪಂ. ಸತ್ಥಾಪಿ ಗಾಥಾಯ ಅವಿಜ್ಜಣ್ಡಕೋಸಂ ಪಹರತಿ ಭಿನ್ದಾಪೇತಿ.

ಓಲಮ್ಬಕಸಙ್ಖಾತನ್ತಿ ಓಲಮ್ಬಕಸುತ್ತಸಙ್ಖಾತಂ. ಪಲನ್ತಿ ತಸ್ಸ ಸುತ್ತಸ್ಸ ನಾಮಂ. ಧಾರೇತ್ವಾತಿ ದಾರೂನಂ ಹೇಯ್ಯಾದಿಜಾನನತ್ಥಂ ಉಪನೇತ್ವಾ. ದಾರೂನಂ ಗಣ್ಡಂ ಹರತೀತಿ ಪಲಗಣ್ಡೋತಿ ಏತೇನ ಪಲೇನ ಗಣ್ಡಹಾರೋ ‘‘ಪಲಗಣ್ಡೋ’’ತಿ ಪಚ್ಛಿಮಪದೇ ಉತ್ತರಪದಲೋಪೇನ ನಿದ್ದೇಸೋತಿ ದಸ್ಸೇತಿ. ಗಹಣಟ್ಠಾನೇತಿ ಹತ್ಥೇನ ಗಹೇತಬ್ಬಟ್ಠಾನೇ. ಸಮ್ಮದೇವ ಖೇಪೀಯನ್ತಿ ಏತೇನ ಕಾಯದುಚ್ಚರಿತಾದೀನೀತಿ ಸಙ್ಖೇಪೋ, ತೇನ. ವಿಪಸ್ಸನಂ ಅನುಯುಞ್ಜನ್ತಸ್ಸ ಪುಗ್ಗಲಸ್ಸೇವ ದಿವಸೇ ದಿವಸೇ ಆಸವಾನಂ ಪರಿಕ್ಖಯೋ ಇಧ ‘‘ವಿಪಸ್ಸನಾಯಾನಿಸಂಸೋ’’ತಿ ಅಧಿಪ್ಪೇತೋ. ಹೇಮನ್ತಿಕೇನ ಕರಣಭೂತೇನ. ಭುಮ್ಮತ್ಥೇ ವಾ ಏತಂ ಕರಣವಚನಂ, ಹೇಮನ್ತಿಕೇತಿ ಅತ್ಥೋ. ಪಟಿಪ್ಪಸ್ಸಮ್ಭನ್ತೀತಿ ಪಟಿಪ್ಪಸ್ಸದ್ಧಫಲಾನಿ ಹೋನ್ತಿ. ತೇನಾಹ ‘‘ಪೂತಿಕಾನಿ ಭವನ್ತೀ’’ತಿ.

ಮಹಾಸಮುದ್ದೋ ವಿಯ ಸಾಸನಂ ಸಭಾವಗಮ್ಭೀರಭಾವತೋ. ನಾವಾ ವಿಯ ಯೋಗಾವಚರೋ ಮಹೋಘುತ್ತರಣತೋ. ಪರಿಯಾದಾನಂ ವಿಯಾತಿ ಪರಿತೋ ಅಪರಿಪೂರಣಂ ವಿಯ. ಖಜ್ಜಮಾನಾನನ್ತಿ ಸಙ್ಖಾದನ್ತೇನ ವಿಯ ಉದಕೇನ ಖೇಪಿಯಮಾನಾನಂ ಬನ್ಧನಾನಂ. ತನುಭಾವೋತಿ ಪರಿಯುಟ್ಠಾನುಪ್ಪತ್ತಿಯಾ ಅಸಮತ್ಥತಾಯ ದುಬ್ಬಲಭಾವೋ. ವಿಪಸ್ಸನಾಞಾಣಪೀತಿಪಾಮೋಜ್ಜೇಹೀತಿ ವಿಪಸ್ಸನಾಞಾಣಸಮುಟ್ಠಿತೇಹಿ ಪೀತಿಪಾಮೋಜ್ಜೇಹಿ. ಓಕ್ಖಾಯಮಾನೇ ಪಕ್ಖಾಯಮಾನೇತಿ ವಿವಿಧಪಟಿಪತ್ತಿಯಾ ಉಕ್ಖಾಯಮಾನೇ ಪಟಿಸಙ್ಖಾನುಪಸ್ಸನಾಯ ಪಕ್ಖಾಯಮಾನೇ. ದುಬ್ಬಲತಾ ದೀಪಿತಾ ‘‘ಅಪ್ಪಕಸಿರೇನೇವ ಸಂಯೋಜನಾನಿ ಪಟಿಪ್ಪಸ್ಸಮ್ಭನ್ತಿ, ಪೂತಿಕಾನಿ ಭವನ್ತೀ’’ತಿ ವುತ್ತತ್ತಾ.

ವಾಸಿಜಟಸುತ್ತವಣ್ಣನಾ ನಿಟ್ಠಿತಾ.

೧೦. ಅನಿಚ್ಚಸಞ್ಞಾಸುತ್ತವಣ್ಣನಾ

೧೦೨. ಭಾವೇನ್ತಸ್ಸಾತಿ ವಿಪಸ್ಸನಾಯ ಮಗ್ಗಂ ಭಾವೇನ್ತಸ್ಸ ಉಪ್ಪನ್ನಸಞ್ಞಾ. ತೇನಾಹ – ‘‘ಸಬ್ಬಂ ಕಾಮರಾಗಂ ಪರಿಯಾದಿಯತೀ’’ತಿಆದಿ. ಸನ್ತಾನೇತ್ವಾತಿ ಕಸನಟ್ಠಾನಂ ಸಬ್ಬಸೋ ವಿತನೇತ್ವಾ ಪತ್ಥರಿತ್ವಾ. ಕಿಲೇಸಾತಿ ಉಪಕ್ಕಿಲೇಸಪ್ಪಭೇದಾ ಕಿಲೇಸಾ. ಅನಿಚ್ಚಸಞ್ಞಾಞಾಣೇನಾತಿ ಅನಿಚ್ಚಸಞ್ಞಾಸಹಗತೇನ ಞಾಣೇನ.

ಲಾಯನನ್ತಿ ಲಾಯನಂ ವಿಯ ನಯನಂ ವಿಯ ನಿಚ್ಛೋಟನಂ ವಿಯ ಚ ಅನಿಚ್ಚಸಞ್ಞಾಞಾಣಂ. ಇಮಿನಾ ಅತ್ಥೇನಾತಿ ಇಮಿನಾ ಯಥಾವುತ್ತೇನ ಪಾಳಿಯಾ ಅತ್ಥೇನ, ಉಪಮಾ ಸಂಸನ್ದೇತಬ್ಬಾತಿ ಏತ್ಥ ಪಬ್ಬಜಲಾಯಕೋ ವಿಯ ಯೋಗಾವಚರೋ. ಲಾಯನಾದಿನಾ ತಸ್ಸ ತತ್ಥ ಕತಕಿಚ್ಚತಾಯ ಪರಿತುಟ್ಠಿ ವಿಯ ಇಮಸ್ಸ ಕಿಲೇಸೇ ಸಬ್ಬಸೋ ಛಿನ್ದಿತ್ವಾ ಫಲಸಮಾಪತ್ತಿಸುಖೇನ ಕಾಲಸ್ಸ ವೀತಿನಾಮನಾ.

ಕೂಟಂ ಗಚ್ಛನ್ತೀತಿ ಪಾರಿಮನ್ತೇನ ಕೂಟಂ ಗಚ್ಛನ್ತಿ. ಕೂಟಂ ಪವಿಸನಭಾವೇನಾತಿ ಕೂಟಚ್ಛಿದ್ದಂ ಅಗ್ಗೇನ ಪವಿಸನವಸೇನ. ಸಮೋಸರಿತ್ವಾತಿ ಛಿದ್ದೇ ಅನುಪವಿಸನವಸೇನ ಚ ಆಹಚ್ಚ ಅವಟ್ಠಾನೇನ ಚ ಸಮೋಸರಿತ್ವಾ ಠಿತಾ. ಕೂಟಂ ವಿಯ ಅನಿಚ್ಚಸಞ್ಞಾ ಅನಿಚ್ಚಾನುಪಸ್ಸನಾವಸೇನ ಅವಟ್ಠಾನಸ್ಸ ಮೂಲಭಾವತೋ. ಗೋಪಾನಸಿಯೋ ವಿಯ ಚತುಭೂಮಕಕುಸಲಾ ಧಮ್ಮಾ ಅನಿಚ್ಚಸಞ್ಞಾಮೂಲಕತ್ತಾ. ಕೂಟಂ ಅಗ್ಗಂ ಸಬ್ಬಗೋಪಾನಸೀನಂ ತಥಾಅಧಿಟ್ಠಾನಸ್ಸ ಪಧಾನಕಾರಣತ್ತಾ. ಅನಿಚ್ಚಸಞ್ಞಾ ಅಗ್ಗಾತಿ ಏತ್ಥಾಪಿ ಏಸೇವ ನಯೋ. ಅನಿಚ್ಚಸಞ್ಞಾ ಲೋಕಿಯಾತಿ ಇದಂ ಅನಿಚ್ಚಸಞ್ಞಾನುಪಸ್ಸನಂ ಸನ್ಧಾಯ ವುತ್ತಂ. ಅನಿಚ್ಚಾನುಪಸ್ಸನಾಮುಖೇನ ಅಧಿಗತಅರಿಯಮಗ್ಗೇ ಉಪ್ಪನ್ನಸಞ್ಞಾ ಅನಿಚ್ಚಸಞ್ಞಾತಿ ವತ್ತಬ್ಬತಂ ಲಭತೀತಿ ‘‘ಅನಿಚ್ಚಸಞ್ಞಾ, ಭಿಕ್ಖವೇ, ಭಾವಿತಾ ಬಹುಲೀಕತಾ ಸಬ್ಬಂ ಕಾಮರಾಗಂ ಪರಿಯಾದಿಯತೀ’’ತಿಆದಿ ವುತ್ತಂ. ತಥಾ ಹಿ ಧಮ್ಮಸಙ್ಗಹೇ (ಧ. ಸ. ೩೫೭, ೩೬೦) ‘‘ಯಸ್ಮಿಂ ಸಮಯೇ ಲೋಕುತ್ತರಂ ಸಞ್ಞಂ ಭಾವೇತೀ’’ತಿಆದಿನಾ ಸಞ್ಞಾಪಿ ಉದ್ಧಟಾ. ಸಬ್ಬಾಸು ಉಪಮಾಸೂತಿ ಮೂಲಸನ್ತಾನಉಪಮಾದೀಸು ಪಞ್ಚಸು ಉಪಮಾಸು. ಪುರಿಮಾಹೀತಿ ಕಸ್ಸಕಪಬ್ಬಜಲಾಯನಅಮ್ಬಪಿಣ್ಡಿಉಪಮಾಹಿ ಅನಿಚ್ಚಸಞ್ಞಾಯ ಕಿಚ್ಚಂ ವುತ್ತಂ ಮೂಲಸನ್ತಾನಕಪದಾಲನಪಬ್ಬಜಲಾಯನವಣ್ಟಚ್ಛೇದನಪದೇಸೇನ ಅನಿಚ್ಚಸಞ್ಞಾಯ ಪಟಿಪಕ್ಖಪಚ್ಛೇದನಸ್ಸ ದಸ್ಸಿತತ್ತಾ. ಪಚ್ಛಿಮಾಹಿ ಬಲಂ ದಸ್ಸಿತಂ ಪಟಿಪಕ್ಖಾತಿಭಾವಸ್ಸ ಜೋತಿತತ್ತಾ.

ಅನಿಚ್ಚಸಞ್ಞಾಸುತ್ತವಣ್ಣನಾ ನಿಟ್ಠಿತಾ.

ಪುಪ್ಫವಗ್ಗವಣ್ಣನಾ ನಿಟ್ಠಿತಾ.

ಮಜ್ಝಿಮಪಣ್ಣಾಸಕೋ ಸಮತ್ತೋ.