೪-೬. ಗೋಮಯಪಿಣ್ಡಸುತ್ತಾದಿವಣ್ಣನಾ

೯೬-೯೮. ಸಸ್ಸತಂ ಸಬ್ಬಕಾಲಂ ಯಾವ ಕಪ್ಪವುಟ್ಠಾನಾ ಹೋನ್ತೀತಿ ಸಸ್ಸತಿಯೋ, ಸಿನೇರುಆದಯೋ. ತಾಹಿ ಸಮಂ ಸಮಕಾಲಂ. ಅನೇನಾತಿ ಭಗವತಾ. ನಯಿದನ್ತಿ ಏತ್ಥ ಯ-ಕಾರೋ ಪದಸನ್ಧಿಕರೋ, ಇದನ್ತಿ ನಿಪಾತಪದಂ. ತಂ ಪನ ಯೇನ ಯೇನ ಸಮ್ಬನ್ಧೀಯತಿ, ತಂ ತಿಲಿಙ್ಗೋವ ಹೋತೀತಿ ‘‘ಅಯಂ ಮಗ್ಗಬ್ರಹ್ಮಚರಿಯವಾಸೋ’’ತಿ ವುತ್ತಂ. ‘‘ನ ಪಞ್ಞಾಯೇಯ್ಯಾ’’ತಿ ವತ್ವಾ ತಮತ್ಥಂ ವಿವರಿತುಂ ‘‘ಮಗ್ಗೋ ಹೀ’’ತಿಆದಿ ವುತ್ತಂ. ವಿವಟ್ಟೇನ್ತೋತಿ ವಿನಿವಟ್ಟೇನ್ತೋ ಅಪ್ಪವತ್ತಿಂ ಕರೋನ್ತೋ.

ರಾಜಧಾನೀತಿ ರಞ್ಞೋ ನಿವಾಸನಗರಂ. ಸುತ್ತಮಯನ್ತಿ ಚಿತ್ತವಣ್ಣವಟ್ಟಿಕಾಮಯಂ.

ಗೋಮಯಪಿಣ್ಡಸುತ್ತಾದಿವಣ್ಣನಾ ನಿಟ್ಠಿತಾ.