೧೧. ಅನುಸಯಸುತ್ತವಣ್ಣನಾ

೨೦೦. ದುತಿಯವಗ್ಗೇ ಅತ್ತನೋತಿ ಆಯಸ್ಮಾ ರಾಹುಲೋ ಅತ್ತನೋ ಸವಿಞ್ಞಾಣಕಂ ಕಾಯಂ ದಸ್ಸೇತಿ. ಪರಸ್ಸಾತಿ ಪರಸ್ಸ ಅವಿಞ್ಞಾಣಕಕಾಯಂ ದಸ್ಸೇತಿ. ಪರಸನ್ತಾನೇ ವಾ ಅರೂಪೇ ಧಮ್ಮೇ ಅಗ್ಗಹೇತ್ವಾ ರೂಪಕಾಯಮೇವ ಗಣ್ಹನ್ತೋ ವದತಿ. ಅಪರೇ ‘‘ಅಸಞ್ಞಸತ್ತಾನಂ ಅತ್ತಭಾವಂ ಸನ್ಧಾಯ ತಥಾ ವುತ್ತ’’ನ್ತಿ ವದನ್ತಿ. ಪುರಿಮೇನಾತಿ ‘‘ಇಮಸ್ಮಿಂ ಸವಿಞ್ಞಾಣಕೇ ಕಾಯೇ’’ತಿ ಇಮಿನಾ ಪದೇನ. ಪಚ್ಛಿಮೇನಾತಿ ‘‘ಬಹಿದ್ಧಾ’’ತಿ ಇಮಿನಾ ಪದೇನ. ಏತೇ ಕಿಲೇಸಾತಿ ಏತೇ ದಿಟ್ಠಿತಣ್ಹಾಮಾನಸಞ್ಞಿತಾ ಕಿಲೇಸಾ. ಏತೇಸು ವತ್ಥೂಸೂತಿ ಅಜ್ಝತ್ತಬಹಿದ್ಧಾವತ್ಥೂಸು. ಸಮ್ಮ…ಪೇ… ಪಸ್ಸತೀತಿ ಪುಬ್ಬಭಾಗೇ ವಿಪಸ್ಸನಾಞಾಣೇನ ಸಮ್ಮಸನವಸೇನ, ಮಗ್ಗಕ್ಖಣೇ ಅಭಿಸಮಯವಸೇನ ಸುಟ್ಠು ಅತ್ತಪಚ್ಚಕ್ಖೇನ ಞಾಣೇನ ಪಸ್ಸತಿ.

ಅನುಸಯಸುತ್ತವಣ್ಣನಾ ನಿಟ್ಠಿತಾ.