೨. ದುತಿಯವಗ್ಗೋ

೧೧. ಅನುಸಯಸುತ್ತವಣ್ಣನಾ

೨೦೦. ದುತಿಯವಗ್ಗೇ ಅತ್ತನೋತಿ ಆಯಸ್ಮಾ ರಾಹುಲೋ ಅತ್ತನೋ ಸವಿಞ್ಞಾಣಕಂ ಕಾಯಂ ದಸ್ಸೇತಿ. ಪರಸ್ಸಾತಿ ಪರಸ್ಸ ಅವಿಞ್ಞಾಣಕಕಾಯಂ ದಸ್ಸೇತಿ. ಪರಸನ್ತಾನೇ ವಾ ಅರೂಪೇ ಧಮ್ಮೇ ಅಗ್ಗಹೇತ್ವಾ ರೂಪಕಾಯಮೇವ ಗಣ್ಹನ್ತೋ ವದತಿ. ಅಪರೇ ‘‘ಅಸಞ್ಞಸತ್ತಾನಂ ಅತ್ತಭಾವಂ ಸನ್ಧಾಯ ತಥಾ ವುತ್ತ’’ನ್ತಿ ವದನ್ತಿ. ಪುರಿಮೇನಾತಿ ‘‘ಇಮಸ್ಮಿಂ ಸವಿಞ್ಞಾಣಕೇ ಕಾಯೇ’’ತಿ ಇಮಿನಾ ಪದೇನ. ಪಚ್ಛಿಮೇನಾತಿ ‘‘ಬಹಿದ್ಧಾ’’ತಿ ಇಮಿನಾ ಪದೇನ. ಏತೇ ಕಿಲೇಸಾತಿ ಏತೇ ದಿಟ್ಠಿತಣ್ಹಾಮಾನಸಞ್ಞಿತಾ ಕಿಲೇಸಾ. ಏತೇಸು ವತ್ಥೂಸೂತಿ ಅಜ್ಝತ್ತಬಹಿದ್ಧಾವತ್ಥೂಸು. ಸಮ್ಮ…ಪೇ… ಪಸ್ಸತೀತಿ ಪುಬ್ಬಭಾಗೇ ವಿಪಸ್ಸನಾಞಾಣೇನ ಸಮ್ಮಸನವಸೇನ, ಮಗ್ಗಕ್ಖಣೇ ಅಭಿಸಮಯವಸೇನ ಸುಟ್ಠು ಅತ್ತಪಚ್ಚಕ್ಖೇನ ಞಾಣೇನ ಪಸ್ಸತಿ.

ಅನುಸಯಸುತ್ತವಣ್ಣನಾ ನಿಟ್ಠಿತಾ.

೧೨. ಅಪಗತಸುತ್ತವಣ್ಣನಾ

೨೦೧. ‘‘ಅಹಮೇತ’’ನ್ತಿ ಅಹಂಕಾರಾದೀನಂ ಅನವಸೇಸಪ್ಪಹಾನೇನ ಅಚ್ಚನ್ತಮೇವ ಅಪಗತಂ.

ಅಪಗತಸುತ್ತವಣ್ಣನಾ ನಿಟ್ಠಿತಾ.

ದುತಿಯವಗ್ಗವಣ್ಣನಾ ನಿಟ್ಠಿತಾ.

ದ್ವೀಸೂತಿ ಪಠಮವಗ್ಗಾದೀಸು. ದೇಸನಾಯ ಅಸೇಕ್ಖಭೂಮಿಯಾ ದೇಸಿತತ್ತಾ ಅಸೇಕ್ಖಭೂಮಿ ಕಥಿತಾ. ಪಠಮೋತಿ ಪಠಮವಗ್ಗೋ ‘‘ಸಾಧು ಮೇ, ಭನ್ತೇ, ಭಗವಾ’’ತಿಆದಿನಾ ಆಯಾಚನ್ತಸ್ಸ, ದುತಿಯೋ ಅನಾಯಾಚನ್ತಸ್ಸ ಥೇರಸ್ಸ ಅಜ್ಝಾಸಯವಸೇನ ಕಥಿತೋ. ವಿಮುತ್ತಿಪರಿಪಾಚನೀಯಧಮ್ಮಾ ನಾಮ ವಿವಟ್ಟಸನ್ನಿಸ್ಸಿತಾ ಸದ್ಧಿನ್ದ್ರಿಯಾದಯೋ. ತೇನ ಪನ ವಿಪಸ್ಸನಾಯ ಕಥಿತತ್ತಾ ಕಥಿತಾ ಏವಾತಿ. ತಂತಂದೇಸನಾನುಸಾರೇನ ಹಿ ಥೇರೋ ತೇ ಧಮ್ಮೇ ಪರಿಪಾಕಂ ಪಾಪೇಸಿ. ತಥಾ ಹಿ ಭಗವಾ ದುತಿಯವಗ್ಗಂ ಅನಾಯಾಚಿತೋಪಿ ದೇಸೇಸಿ.

ಸಾರತ್ಥಪ್ಪಕಾಸಿನಿಯಾ ಸಂಯುತ್ತನಿಕಾಯ-ಅಟ್ಠಕಥಾಯ

ರಾಹುಲಸಂಯುತ್ತವಣ್ಣನಾಯ ಲೀನತ್ಥಪ್ಪಕಾಸನಾ ಸಮತ್ತಾ.