೭. ರಾಹುಲಸಂಯುತ್ತಂ

೧. ಪಠಮವಗ್ಗೋ

೧-೮. ಚಕ್ಖುಸುತ್ತಾದಿವಣ್ಣನಾ

೧೮೮-೧೯೫. ಏಕವಿಹಾರೀತಿ ಚತೂಸುಪಿ ಇರಿಯಾಪಥೇಸು ಏಕಾಕೀ ಹುತ್ವಾ ವಿಹರನ್ತೋ. ವಿವೇಕಟ್ಠೋತಿ ವಿವಿತ್ತಟ್ಠೋ, ತೇನಾಹ ‘‘ನಿಸ್ಸದ್ದೋ’’ತಿ. ಸತಿಯಾ ಅವಿಪ್ಪವಸನ್ತೋತಿ ಸತಿಯಾ ಅವಿಪ್ಪವಾಸೇನ ಠಿತೋ, ಸಬ್ಬದಾ ಅವಿಜಹನವಸೇನ ಪವತ್ತೋ. ಆತಾಪೀತಿ ವೀರಿಯಸಮ್ಪನ್ನೋತಿ ಸಬ್ಬಸೋ ಕಿಲೇಸಾನಂ ಆತಾಪನಪರಿತಾಪನವಸೇನ ಪವತ್ತವೀರಿಯಸಮಙ್ಗೀಭೂತೋ. ಪಹಿತತ್ತೋತಿ ತಸ್ಮಿಂ ವಿಸೇಸಾಧಿಗಮೇ ಪೇಸಿತಚಿತ್ತೋ, ತತ್ಥ ನಿನ್ನೋ ತಪ್ಪಬ್ಭಾರೋತಿ ಅತ್ಥೋ. ಹುತ್ವಾ ಅಭಾವಾಕಾರೇನಾತಿ ಉಪ್ಪತ್ತಿತೋ ಪುಬ್ಬೇ ಅವಿಜ್ಜಮಾನೋ ಪಚ್ಚಯಸಮವಾಯೇನ ಹುತ್ವಾ ಉಪ್ಪಜ್ಜಿತ್ವಾ ಭಙ್ಗುಪರಮಸಙ್ಖಾತೇನ ಅಭಾವಾಕಾರೇನ. ಅನಿಚ್ಚನ್ತಿ ನಿಚ್ಚಧುವತಾಭಾವತೋ. ಉಪ್ಪಾದವಯವನ್ತತಾಯಾತಿ ಖಣೇ ಖಣೇ ಉಪ್ಪಜ್ಜಿತ್ವಾ ನಿರುಜ್ಝನತೋ. ತಾವಕಾಲಿಕತಾಯಾತಿ ತಙ್ಖಣಿಕತಾಯ. ವಿಪರಿಣಾಮಕೋಟಿಯಾತಿ ವಿಪರಿಣಾಮವನ್ತತಾಯ. ಚಕ್ಖುಞ್ಹಿ ಉಪಾದಾಯ ವಿಕಾರಾಪಜ್ಜನೇನ ವಿಪರಿಣಮನ್ತಂ ವಿನಾಸಂ ಪಟಿಪೀಳಂ ಪಾಪುಣಾತಿ. ನಿಚ್ಚಪಟಿಕ್ಖೇಪತೋತಿ ನಿಚ್ಚತಾಯ ಪಟಿಕ್ಖಿಪಿತಬ್ಬತೋ ಲೇಸಮತ್ತಸ್ಸಪಿ ಅನುಪಲಬ್ಭನತೋ. ದುಕ್ಖಮನಟ್ಠೇನಾತಿ ನಿರನ್ತರದುಕ್ಖತಾಯ ದುಕ್ಖೇನ ಖಮಿತಬ್ಬತೋ. ದುಕ್ಖವತ್ಥುಕಟ್ಠೇನಾತಿ ನಾನಪ್ಪಕಾರದುಕ್ಖಾಧಿಟ್ಠಾನತೋ. ಸತತಸಮ್ಪೀಳನಟ್ಠೇನಾತಿ ಅಭಿಣ್ಹತಾಪಸಭಾವತೋ. ಸುಖಪಟಿಕ್ಖೇಪೇನಾತಿ ಸುಖಭಾವಸ್ಸ ಪಟಿಕ್ಖಿಪಿತಬ್ಬತೋ. ತಣ್ಹಾಗಾಹೋ ಮಮಂಕಾರಭಾವತೋ. ಮಾನಗಾಹೋ ಅಹಂಕಾರಭಾವತೋ. ದಿಟ್ಠಿಗಾಹೋ ‘‘ಅತ್ತಾ ಮೇ’’ತಿ ವಿಪಲ್ಲಾಸಭಾವತೋ. ವಿರಾಗವಸೇನಾತಿ ವಿರಾಗಗ್ಗಹಣೇನ. ತಥಾ ವಿಮುತ್ತಿವಸೇನಾತಿ ವಿಮುತ್ತಿಗ್ಗಹಣೇನ.

ಪಸಾದಾವ ಗಹಿತಾ ದ್ವಾರಭಾವಪ್ಪತ್ತಸ್ಸ ಅಧಿಪ್ಪೇತತ್ತಾ. ಸಮ್ಮಸನಚಾರಚಿತ್ತಂ ದ್ವಾರಭೂತಮನೋತಿ ಅಧಿಪ್ಪಾಯೋ.

ಛಟ್ಠೇ ಆರಮ್ಮಣೇ ತೇಭೂಮಕಧಮ್ಮಾ ಸಮ್ಮಸನಚಾರಸ್ಸ ಅಧಿಪ್ಪೇತತ್ತಾ. ಯಥಾ ಪಠಮಸುತ್ತೇ ಪಞ್ಚ ಪಸಾದಾ ಗಹಿತಾ, ನ ಸಸಮ್ಭಾರಚಕ್ಖುಆದಯೋ, ಏವಂ ತತಿಯಸುತ್ತೇ ನ ಪಸಾದವತ್ಥುಕಚಿತ್ತಮೇವ ಗಹಿತಂ. ನ ತಂಸಮ್ಪಯುತ್ತಾ ಧಮ್ಮಾ. ಏವಞ್ಹಿ ಅವಧಾರಣಂ ಸಾತ್ಥಕಂ ಹೋತಿ ಅಞ್ಞಥಾ ತೇನ ಅಪನೇತಬ್ಬಸ್ಸ ಅಭಾವತೋ. ಸಬ್ಬತ್ಥಾತಿ ಸಬ್ಬೇಸು ಚತುತ್ಥಸುತ್ತಾದೀಸು. ಜವನಪ್ಪತ್ತಾತಿ ಜವನಚಿತ್ತಸಂಯುತ್ತಾ.

ಚಕ್ಖುಸುತ್ತಾದಿವಣ್ಣನಾ ನಿಟ್ಠಿತಾ.

೯. ಧಾತುಸುತ್ತವಣ್ಣನಾ

೧೯೬. ಆಕಾಸಧಾತು ರೂಪಪರಿಚ್ಛೇದತಾಯ ರೂಪಪರಿಯಾಪನ್ನನ್ತಿ ಅಧಿಪ್ಪಾಯೇನ ‘‘ಸೇಸಾಹಿ ರೂಪ’’ನ್ತಿ ವುತ್ತಂ. ನಾಮರೂಪನ್ತಿ ತೇಭೂಮಕಂ ನಾಮಂ ರೂಪಞ್ಚ ಕಥಿತಂ.

ಧಾತುಸುತ್ತವಣ್ಣನಾ ನಿಟ್ಠಿತಾ.

೧೦. ಖನ್ಧಸುತ್ತವಣ್ಣನಾ

೧೯೭. ಸಬ್ಬಸಙ್ಗಾಹಿಕಪರಿಚ್ಛೇದೇನಾತಿ ಧಮ್ಮಸಙ್ಗಣ್ಹನಪರಿಯಾಯೇನ. ಇಧಾತಿ ಇಮಸ್ಮಿಂ ಸುತ್ತೇ. ತೇಭೂಮಕಾತಿ ಗಹೇತಬ್ಬಾ ಸಮ್ಮಸನಚಾರಸ್ಸ ಅಧಿಪ್ಪೇತತ್ತಾ.

ಖನ್ಧಸುತ್ತವಣ್ಣನಾ ನಿಟ್ಠಿತಾ.

ಪಠಮವಗ್ಗವಣ್ಣನಾ ನಿಟ್ಠಿತಾ.

೨. ದುತಿಯವಗ್ಗೋ

೧೧. ಅನುಸಯಸುತ್ತವಣ್ಣನಾ

೨೦೦. ದುತಿಯವಗ್ಗೇ ಅತ್ತನೋತಿ ಆಯಸ್ಮಾ ರಾಹುಲೋ ಅತ್ತನೋ ಸವಿಞ್ಞಾಣಕಂ ಕಾಯಂ ದಸ್ಸೇತಿ. ಪರಸ್ಸಾತಿ ಪರಸ್ಸ ಅವಿಞ್ಞಾಣಕಕಾಯಂ ದಸ್ಸೇತಿ. ಪರಸನ್ತಾನೇ ವಾ ಅರೂಪೇ ಧಮ್ಮೇ ಅಗ್ಗಹೇತ್ವಾ ರೂಪಕಾಯಮೇವ ಗಣ್ಹನ್ತೋ ವದತಿ. ಅಪರೇ ‘‘ಅಸಞ್ಞಸತ್ತಾನಂ ಅತ್ತಭಾವಂ ಸನ್ಧಾಯ ತಥಾ ವುತ್ತ’’ನ್ತಿ ವದನ್ತಿ. ಪುರಿಮೇನಾತಿ ‘‘ಇಮಸ್ಮಿಂ ಸವಿಞ್ಞಾಣಕೇ ಕಾಯೇ’’ತಿ ಇಮಿನಾ ಪದೇನ. ಪಚ್ಛಿಮೇನಾತಿ ‘‘ಬಹಿದ್ಧಾ’’ತಿ ಇಮಿನಾ ಪದೇನ. ಏತೇ ಕಿಲೇಸಾತಿ ಏತೇ ದಿಟ್ಠಿತಣ್ಹಾಮಾನಸಞ್ಞಿತಾ ಕಿಲೇಸಾ. ಏತೇಸು ವತ್ಥೂಸೂತಿ ಅಜ್ಝತ್ತಬಹಿದ್ಧಾವತ್ಥೂಸು. ಸಮ್ಮ…ಪೇ… ಪಸ್ಸತೀತಿ ಪುಬ್ಬಭಾಗೇ ವಿಪಸ್ಸನಾಞಾಣೇನ ಸಮ್ಮಸನವಸೇನ, ಮಗ್ಗಕ್ಖಣೇ ಅಭಿಸಮಯವಸೇನ ಸುಟ್ಠು ಅತ್ತಪಚ್ಚಕ್ಖೇನ ಞಾಣೇನ ಪಸ್ಸತಿ.

ಅನುಸಯಸುತ್ತವಣ್ಣನಾ ನಿಟ್ಠಿತಾ.

೧೨. ಅಪಗತಸುತ್ತವಣ್ಣನಾ

೨೦೧. ‘‘ಅಹಮೇತ’’ನ್ತಿ ಅಹಂಕಾರಾದೀನಂ ಅನವಸೇಸಪ್ಪಹಾನೇನ ಅಚ್ಚನ್ತಮೇವ ಅಪಗತಂ.

ಅಪಗತಸುತ್ತವಣ್ಣನಾ ನಿಟ್ಠಿತಾ.

ದುತಿಯವಗ್ಗವಣ್ಣನಾ ನಿಟ್ಠಿತಾ.

ದ್ವೀಸೂತಿ ಪಠಮವಗ್ಗಾದೀಸು. ದೇಸನಾಯ ಅಸೇಕ್ಖಭೂಮಿಯಾ ದೇಸಿತತ್ತಾ ಅಸೇಕ್ಖಭೂಮಿ ಕಥಿತಾ. ಪಠಮೋತಿ ಪಠಮವಗ್ಗೋ ‘‘ಸಾಧು ಮೇ, ಭನ್ತೇ, ಭಗವಾ’’ತಿಆದಿನಾ ಆಯಾಚನ್ತಸ್ಸ, ದುತಿಯೋ ಅನಾಯಾಚನ್ತಸ್ಸ ಥೇರಸ್ಸ ಅಜ್ಝಾಸಯವಸೇನ ಕಥಿತೋ. ವಿಮುತ್ತಿಪರಿಪಾಚನೀಯಧಮ್ಮಾ ನಾಮ ವಿವಟ್ಟಸನ್ನಿಸ್ಸಿತಾ ಸದ್ಧಿನ್ದ್ರಿಯಾದಯೋ. ತೇನ ಪನ ವಿಪಸ್ಸನಾಯ ಕಥಿತತ್ತಾ ಕಥಿತಾ ಏವಾತಿ. ತಂತಂದೇಸನಾನುಸಾರೇನ ಹಿ ಥೇರೋ ತೇ ಧಮ್ಮೇ ಪರಿಪಾಕಂ ಪಾಪೇಸಿ. ತಥಾ ಹಿ ಭಗವಾ ದುತಿಯವಗ್ಗಂ ಅನಾಯಾಚಿತೋಪಿ ದೇಸೇಸಿ.

ಸಾರತ್ಥಪ್ಪಕಾಸಿನಿಯಾ ಸಂಯುತ್ತನಿಕಾಯ-ಅಟ್ಠಕಥಾಯ

ರಾಹುಲಸಂಯುತ್ತವಣ್ಣನಾಯ ಲೀನತ್ಥಪ್ಪಕಾಸನಾ ಸಮತ್ತಾ.