೭. ನತುಮ್ಹಸುತ್ತವಣ್ಣನಾ

೩೭. ನ ತುಮ್ಹಾಕನ್ತಿ ಕಾಯಸ್ಸ ಅನತ್ತನಿಯಭಾವದಸ್ಸನಮೇವ ಪನೇತನ್ತಿ ಯಾ ತಸ್ಸ ಅನತ್ತನಿಯತಾ, ತಂ ದಸ್ಸೇತುಂ ‘‘ಅತ್ತನಿ ಹೀ’’ತಿಆದಿ ವುತ್ತಂ. ಯದಿ ನ ಅತ್ತನಿಯಂ, ಪರಕಿಯಂ ನಾಮ ಸಿಯಾತಿ, ತಮ್ಪಿ ನತ್ಥೀತಿ ದಸ್ಸೇನ್ತೋ ‘‘ನಾಪಿ ಅಞ್ಞೇಸ’’ನ್ತಿ ಆಹ. ನಯಿದಂ ಪುರಾಣಕಮ್ಮಮೇವಾತಿ ‘‘ಇದಂ ಕಾಯೋ’’ತಿ ವುತ್ತಸರೀರಂ ಪುರಾಣಕಮ್ಮಮೇವ ನ ಹೋತಿ. ನ ಹಿ ಕಾಯೋ ವೇದನಾಸಭಾವೋ. ಪಚ್ಚಯವೋಹಾರೇನಾತಿ ಕಾರಣೋಪಚಾರೇನ. ಅಭಿಸಙ್ಖತನ್ತಿಆದಿ ನಪುಂಸಕಲಿಙ್ಗವಚನಂ. ಪುರಿಮಲಿಙ್ಗಸಭಾಗತಾಯಾತಿ ‘‘ಪುರಾಣಮಿದಂ ಕಮ್ಮ’’ನ್ತಿ ಏವಂ ವುತ್ತಪುರಿಮನಪುಂಸಕಲಿಙ್ಗಸಭಾಗತಾಯ. ಅಞ್ಞಮಞ್ಞಾಭಿಮುಖೇಹಿ ಸಮೇಚ್ಚ ಪಚ್ಚಯೇಹಿ ಕತೋ ಅಭಿಸಙ್ಖತೋತಿ ಆಹ ‘‘ಪಚ್ಚಯೇಹಿ ಕತೋತಿ ದಟ್ಠಬ್ಬೋ’’ತಿ. ಅಭಿಸಞ್ಚೇತಯಿತನ್ತಿ ತಥಾ ಅಭಿಸಙ್ಖತತ್ತಸಙ್ಖಾತೇನ ಅಭಿಮುಖಭಾವೇನ ಚೇತಯಿತಂ ಪಕಪ್ಪಿತಂ, ಪವತ್ತಿತನ್ತಿ ಅತ್ಥೋ. ಚೇತನಾವತ್ಥುಕೋತಿ ಚೇತನಾಹೇತುಕೋ. ವೇದನಿಯನ್ತಿ ವೇದನಾಯ ಹಿತಂ ವತ್ಥಾರಮ್ಮಣಭಾವೇನ ವೇದನಾಯ ಪಚ್ಚಯಭಾವತೋ. ತೇನಾಹ ‘‘ವೇದನಿಯವತ್ಥೂ’’ತಿ.

ನತುಮ್ಹಸುತ್ತವಣ್ಣನಾ ನಿಟ್ಠಿತಾ.