೯. ಪಠಮಪಜ್ಜುನ್ನಧೀತುಸುತ್ತವಣ್ಣನಾ

೩೯. ಚಾತುಮಹಾರಾಜಿಕಸ್ಸಾತಿ ಚಾತುಮಹಾರಾಜಿಕಕಾಯಿಕಸ್ಸ. ಧಮ್ಮೋ ಅನುಬುದ್ಧೋತಿ ಚತುಸಚ್ಚಧಮ್ಮೋ ಪರಿಞ್ಞೇಯ್ಯಾದಿಭಾವಸ್ಸ ಅನುರೂಪತೋ ಬುದ್ಧೋ. ಪಚ್ಚಕ್ಖಮೇವಾತಿ ಪರಪತ್ತಿಯಾ ಅಹುತ್ವಾ ಅತ್ತಪಚ್ಚಕ್ಖಮೇವ ಕತ್ವಾ ಜಾನಾಮಿ. ಧಮ್ಮಂ ಗರಹನ್ತಾ ನಾಮ ಸದ್ದದೋಸವಸೇನ ವಾ ಅತ್ಥದೋಸವಸೇನ ವಾ ಗರಹೇಯ್ಯುನ್ತಿ ತಂ ದಸ್ಸೇನ್ತೋ ‘‘ಹೀನಕ್ಖರ…ಪೇ… ಕೋತಿವಾ’’ತಿ ಆಹ. ಸಾ ಪನ ‘‘ತೇಸಂ ವಿಗರಹಾ ದುಮ್ಮೇಧತಾಯ ಮಹಾನತ್ಥಾವಹಾವಾ’’ತಿ ದಸ್ಸೇನ್ತೀ ದೇವತಾ ಆಹ ‘‘ದುಮ್ಮೇಧಾ ಉಪೇನ್ತಿ ರೋರುವ’’ನ್ತಿ. ವಿಸುಂ ಹೋತೀತಿ ಅವೀಚಿಮಹಾನಿರಯತೋ ವಿಸುಂ ಏವ ಹೋತಿ. ಖನ್ತಿಯಾತಿ ಞಾಣಖನ್ತಿಯಾ. ಉಪಸಮೇನಾತಿ ರಾಗಾದೀನಂ ಸಬ್ಬಸೋ ವೂಪಸಮೇನ. ತೇನಾಹ ‘‘ರುಚ್ಚಿತ್ವಾ’’ತಿಆದಿ.

ಪಠಮಪಜ್ಜುನ್ನಧೀತುಸುತ್ತವಣ್ಣನಾ ನಿಟ್ಠಿತಾ.