ಉಪೋಸಥಾದಿಪುಚ್ಛಾವಿಸ್ಸಜ್ಜನಾ

೩೩೨. ವಿಸ್ಸಜ್ಜನೇ ಏವಮತ್ಥೋ ವೇದಿತಬ್ಬೋತಿ ಯೋಜನಾ. ಕಾಯಸಾಮಗ್ಗೀ ಆದಿ ನಾಮಾತಿ ಯೋಜನಾ. ಓಸಾರಣಕಿರಿಯಾತಿ ಕಥನಕಿರಿಯಾ. ಛನ್ದಪವಾರಣಂ ಆಹರಿತ್ವಾತಿ ಛನ್ದಞ್ಚ ಪವಾರಣಞ್ಚ ಆಹರಿತ್ವಾ. ಪವಾರಣಾಕಥಾತಿ ‘‘ಸಙ್ಘಂ ಭನ್ತೇ ಪವಾರೇಮೀ’’ತಿಆದಿಕಾ (ಮಹಾವ. ೨೧೦) ಪವಾರಣಾಕಥಾ. ತಜ್ಜನೀಯಕಮ್ಮಾದೀಸು ವತ್ಥು ನಾಮ ಕಿಂ? ಪುಗ್ಗಲೋ ನಾಮ ಕೋತಿ ಆಹ ‘‘ವತ್ಥು ನಾಮಾ’’ತಿಆದಿ. ತತ್ಥ ಯೇನ ವತ್ಥುನಾತಿ ಭಣ್ಡನಕಾರಕಾದಿನಾ ಯೇನ ವತ್ಥುನಾ ಕರಣಭೂತೇನ, ಹೇತುಭೂತೇನ ವಾ. ಯೇನಾತಿ ಪುಗ್ಗಲೇನ ಕತ್ತುಭೂತೇನ, ಕತನ್ತಿ ಸಮ್ಬನ್ಧೋ. ‘‘ತಸ್ಸಾ ತಸ್ಸಾ ಕಮ್ಮವಾಚಾಯಾ’’ತಿ ಪದಂ ‘‘ಅವಸಾನವಚನ’’ನ್ತಿ ಪದೇ ಅವಯವಿಸಮ್ಬನ್ಧೋ. ಸಬ್ಬತ್ಥಾತಿ ಸಬ್ಬೇಸು ವಿಸ್ಸಜ್ಜನೇಸು.

ಇತಿ ಉಪೋಸಥಾದಿಪುಚ್ಛಾವಿಸ್ಸಜ್ಜನವಣ್ಣನಾಯ ಯೋಜನಾ

ಸಮತ್ತಾ.

ಅತ್ಥವಸಪಕರಣವಣ್ಣನಾ

೩೩೪. ಅತ್ಥವಸಪಕರಣೇತಿ ಅವಯವಿಆಧಾರೋ. ದಸ ಅತ್ಥವಸೇತಿಆದೀಸೂತಿ ಅವಯವಾಧಾರೋ. ಯನ್ತಿ ವಚನಂ. ಉಪರಿಮಂ ಉಪರಿಮಂ ಪದನ್ತಿ ‘‘ಸಙ್ಘಫಾಸುತಾಯಾ’’ತಿಆದಿಕಂ ಉತ್ತರುತ್ತರಿ ವುತ್ತಂ ಪದಂ. ಹೇಟ್ಠಿಮಸ್ಸ ಹೇಟ್ಠಿಮಸ್ಸ ಪದಸ್ಸಾತಿ ‘‘ಸಙ್ಘಸುಟ್ಠುತಾಯಾ’’ತಿಆದಿಕಸ್ಸ ಅಧೋ ಅಧೋ ವುತ್ತಸ್ಸ ಪದಸ್ಸ.

ಯದೇತಂ ಪದಸತಂ ವುತ್ತನ್ತಿ ಯೋಜನಾ. ತತ್ಥಾತಿ ತಸ್ಮಿಂ ಪದಸತೇ, ನಿದ್ಧಾರಣೇ ಭುಮ್ಮಂ, ಅತ್ಥಸತನ್ತಿ ಅಭಿಧೇಯ್ಯಸತಂ. ಧಮ್ಮಸತನ್ತಿಅಭಿಧಾನಸತಂ, ಪಾಳಿಸತನ್ತಿ ಅತ್ಥೋ. ‘‘ಅತ್ಥಸತಂ ಧಮ್ಮಸತ’’ನ್ತಿ ಪದಾನಂ ಅತ್ಥನ್ತರವಿಕಪ್ಪಂ ದಸ್ಸೇನ್ತೋ ಆಹ ‘‘ಅಥ ವಾ’’ತಿಆದಿ. ತತ್ಥ ಯೇ ದಸ ಅತ್ಥವಸೇ ಪಟಿಚ್ಚ ಪಞ್ಞತ್ತಂ, ತೇಸಂ ದಸಅತ್ಥವಸಾನನ್ತಿ ಯೋಜನಾ, ಯೇ ದಸ ಅತ್ಥವಸೇ ಪುಬ್ಬೇ ವಣ್ಣಿತಾ, ತೇಸಂ ದಸಅತ್ಥವಸಾನನ್ತಿ ಯೋಜನಾ. ಪಠಮಪಾರಾಜಿಕವಣ್ಣನಾಯಂ (ಪಾರಾ. ಅಟ್ಠ. ೧.೩೯) ವಣ್ಣಿತಾತಿ ಸಮ್ಬನ್ಧೋ. ತತ್ಥಾತಿ ‘‘ಸಙ್ಘಸುಟ್ಠುತಾಯಾ’’ತಿಆದಿಪಾಠೇ. ಸುಟ್ಠು ದೇವಾತಿ ಸುಟ್ಠು ಮಹಾರಾಜ. ಹಿ ಯಸ್ಮಾ ಆಣಾಬಲಭೋಗಬಲಇಸ್ಸರಿಯಬಲೇಹಿ ದಿಬ್ಬತಿ, ತಸ್ಮಾ ದೇವೋತಿ ವುಚ್ಚತಿ. ಯೋ ಚಾತಿ ಗಹಟ್ಠೋ ವಾ ಪಬ್ಬಜಿತೋ ವಾ, ಸಮ್ಪಟಿಚ್ಛತೀತಿ ಸಮ್ಬನ್ಧೋ. ತಸ್ಮಾತಿ ಯಸ್ಮಾ ಹಿತಾಯ ಸುಖಾಯ ಹೋತಿ, ತಸ್ಮಾ. ಆನಿಸಂಸಂ ದಸ್ಸೇತ್ವಾ ಪಞ್ಞಪೇಸ್ಸಾಮೀತಿ ಸಮ್ಬನ್ಧೋ. ಅಭಿಭವಿತ್ವಾ ನ ಪಞ್ಞಪೇಸ್ಸಾಮೀತಿ ಯೋಜನಾ. ಇಧಾತಿ ಅತ್ಥವಸಪಕರಣೇ. ತದತ್ಥಜೋತಕಾನನ್ತಿ ಸೋಯೇವ ಅತ್ಥೋ ತದತ್ಥೋ, ತಸ್ಸ ಜೋತಕಾ ತದತ್ಥಜೋತಕಾ, ತೇಸಂ. ಇದಾನಿ ವೇದಿತಬ್ಬಾನೀತಿ ಸಮ್ಬನ್ಧೋ. ಅತ್ಥಂ ಜೋತೇನ್ತೀತಿ ಅತ್ಥಜೋತಕಾ, ಸದ್ದಾ. ನೀಹರಿತ್ವಾ, ನಿಯಮೇತ್ವಾ ವಾ ಅತ್ಥೋ ವುಚ್ಚತೇ ಇಮಾಹಿ ಸದ್ದಪಞ್ಞತ್ತೀಹೀತಿ ನಿರುತ್ತಿಯೋ.

ಅತ್ಥಸತನ್ತಿ ಗಾಥಾಯಂ ಅತ್ಥವಸೇ ಪಕರಣೇ ಅತ್ಥಸತಂ ವೇದಿತಬ್ಬನ್ತಿಆದಿನಾ ಯೋಜನಾ ಕಾತಬ್ಬಾ. ಇತಿ ಹೀತಿ ಇತಿ ಏವ. ಹಿಸದ್ದೋ ಹಿ ಏವಸದ್ದತ್ಥೋ. ಇದನ್ತಿ ‘‘ಅತ್ಥಸತ’’ನ್ತಿಆದಿವಚನಂ, ವುತ್ತನ್ತಿ ಸಮ್ಬನ್ಧೋ. ಏತನ್ತಿ ಯಥಾವುತ್ತಂ ಅತ್ಥಂ ಪಟಿಚ್ಚಾತಿ ಸಮ್ಬನ್ಧೋ.

ಇತಿ ಸಮನ್ತಪಾಸಾದಿಕಾಯ ವಿನಯಸಂವಣ್ಣನಾಯ

ಮಹಾವಗ್ಗವಣ್ಣನಾಯ

ಯೋಜನಾ ಸಮತ್ತಾ.