(೨) ಪಾರಾಜಿಕಾದಿಪಞ್ಹಾವಣ್ಣನಾ

೪೮೦. ಸನ್ಥತಪೇಯ್ಯಾಲಞ್ಚಾತಿ ಪಠಮಪಾರಾಜಿಕವಿಭಙ್ಗೇ (ಪಾರಾ. ೬೫) ವುತ್ತಂ ಸನ್ಥತಪೇಯ್ಯಾಲಞ್ಚ.

ಲಿಙ್ಗಪರಿವತ್ತಂ ಸನ್ಧಾಯಾತಿ ಸತಿ ಲಿಙ್ಗೇ ಪರಿವತ್ತೇ ಪಟಿಗ್ಗಹಣಸ್ಸ ವಿಜಹನಂ ಸನ್ಧಾಯ ವುತ್ತಂ.

ಯೋತಿ ಭಿಕ್ಖು, ಪರಿಣಾಮೇತೀತಿ ಸಮ್ಬನ್ಧೋ. ಅತ್ತನೋ ಅತ್ಥಾಯಾತಿ ಯೋಜನಾ.

ಅಸ್ಸಾತಿ ಗಾಥಾಯ. ಕಾಕಉಹದನ್ತಿ ಕಾಕೇಹಿ ಕರೀಸುಸ್ಸಗ್ಗಂ. ಕದ್ದಮಮಕ್ಖಿತನ್ತಿ ಕದ್ದಮೇನ ಮಕ್ಖಿತಂ. ಕಾಯಗತಾನೇವ ಹುತ್ವಾತಿ ಸಮ್ಬನ್ಧೋ.

ಹೀತಿ ವಿತ್ಥಾರೋ. ಅನರಿಯಂ ತಂ ಇತ್ಥಿಂ ವಾ ತಂ ಪುರಿಸಂ ವಾ ಹನೇಯ್ಯಾತಿ ಯೋಜನಾ. ಲಿಙ್ಗಪರಿವತ್ತೇನ ಹೇತುಭೂತೇನ ಇತ್ಥಿಭೂತಂ, ಪುರಿಸಭೂತಞ್ಚಾತಿ ಸಮ್ಬನ್ಧೋ. ಇತ್ಥಿಭೂತನ್ತಿ ಚ ಇತ್ಥೀ ಹುತ್ವಾ ಭೂತಂ, ಇತ್ಥಿಭಾವಂ ವಾ ಪತ್ತಂ.

ಮಿಗಸಿಙ್ಗತಾಪಸಸೀಹಕುಮಾರಾದೀನಂ ತಿರಚ್ಛಾನಗತಮಾತಾಪಿತರೋ ವಿಯಾತಿ ಯೋಜನಾ. ಮಿಗಸಿಙ್ಗತಾಪಸೋತಿ ಮಿಗಸಿಙ್ಗನಾಮಕೋ (ಜಾ. ಅಟ್ಠ. ೫.೧೭.೯೬ ಆದಯೋ) ತಾಪಸೋ. ಸೀಹಕುಮಾರೋತಿ ಸೀಹಬಾಹುಕುಮಾರೋ. ಆದಿಸದ್ದೇನ ಭೂರಿದತ್ತಾದಯೋ ಸಙ್ಗಣ್ಹಾತಿ.

ಕುರುನ್ದಿಯಂ ಆಗತನ್ತಿ ಸಮ್ಬನ್ಧೋ.

‘‘ಸಚ್ಚಂ ಭಣನ್ತೋತಿ ಗಾಥಾಯಾ’’ತಿ ಪದಂ ‘‘ಸಚ್ಚಂ ಭಾಸತೋ ಲಹುಕಾಪತ್ತಿ ಹೋತೀ’’ತಿ ಏತ್ಥ ಇತಿಸದ್ದೇನ ಸಮ್ಬನ್ಧಿತಬ್ಬಂ. ‘‘ಸಚ್ಚಂ ಭಣನ್ತೋ’’ತಿ ಗಾಥಾಯ ಇತಿ ಅತ್ಥೋತಿ ಯೋಜನಾ.