ಮಹಾಸಙ್ಗಾಮಂ

ವೋಹರನ್ತೇನ ಜಾನಿತಬ್ಬಾದಿವಣ್ಣನಾ

೩೬೮-೭೪. ಮಹಾಸಙ್ಗಾಮೇ ಏತೇನೇವ ನಯೇನ ವೇದಿತಬ್ಬನ್ತಿ ಸಮ್ಬನ್ಧೋ. ವತ್ಥುಸಙ್ಕಮನಾಕಾರಂ ದಸ್ಸೇತ್ವಾ ಅವಜಾನನಪಟಿಜಾನನಾಕಾರಂ ದಸ್ಸೇನ್ತೋ ಆಹ ‘‘ಯೋ ಪನಾ’’ತಿಆದಿ. ಯೋ ಪನ ವದತೀತಿ ಸಮ್ಬನ್ಧೋ. ಏಸೇವಾತಿ ಏಸೋ ಏವ, ಅವಜಾನನಪಟಿಜಾನನಭಿಕ್ಖೂತಿ ಅತ್ಥೋ.

೩೭೫. ನೀಲಾದಿವಣ್ಣಾವಣ್ಣವಸೇನಾತಿ ನೀಲಾದಿವಣ್ಣವಸೇನ ಚ ಆರೋಗ್ಯತ್ಥಾದಿಅವಣ್ಣವಸೇನ ಚ. ಸಞ್ಚರಿತ್ತಂ ಯಸ್ಮಾ ಅನೇನ ಸಿಕ್ಖಾಪದೇನ ಧನಂ ಅನುಪದೀಯತಿ, ತಸ್ಮಾ ಧನಮನುಪ್ಪದಾನನ್ತಿ ವುಚ್ಚತಿ. ಪುಬ್ಬಪಯೋಗೋತಿ ಪುಬ್ಬೇ ಪಯುಜ್ಜಿತಬ್ಬೋ.

ಅಗತಿಅಗನ್ತಬ್ಬವಣ್ಣನಾ

೩೭೯. ಬಹುಜನಅಹಿತಾಯ ಪಟಿಪನ್ನೋ ಹೋತೀತಿ ಪಾಳಿಂ ವಿತ್ಥಾರೇನ್ತೋ ಆಹ ‘‘ವಿನಯಧರೇನ ಹೀ’’ತಿಆದಿ. ತತ್ಥ ವಿನಯಧರೇನಾತಿ ಅನುವಿಜ್ಜಕೇನ, ವಿನಿಚ್ಛಿತೇತಿ ಸಮ್ಬನ್ಧೋ. ಓವಾದೂಪಜೀವಿನಿಯೋತಿ ಭಿಕ್ಖೂನಂ ಓವಾದಂ ಉಪನಿಸ್ಸಾಯ ಜೀವಿನಿಯೋ. ಉಪಾಸಕಾಪೀತಿ ರತನತ್ತಯಂ ಪಟಿಸ್ಸರಣನ್ತಿ ಉಪಾಸಕಾಪಿ. ದಾಯಕಾಪೀತಿ ಭಿಕ್ಖೂನಂ ಪಚ್ಚಯದಾಯಕಾಪಿ. ತೇಸನ್ತಿ ಉಪಾಸಕಾದೀನಂ. ತಥೇವಾತಿ ಯಥಾ ಉಪಾಸಕಾದಯೋ ದ್ವಿಧಾ ಭಿಜ್ಜನ್ತಿ, ತಥೇವ. ತತೋತಿ ಆರಕ್ಖದೇವತಾಹಿ ಪರನ್ತಿ ಸಮ್ಬನ್ಧೋ. ತೇನಾತಿ ದ್ವಿಧಾಕಾರಣೇನ.

೩೮೨. ಗಹನನಿಸ್ಸಿತೋತಿ ಏತ್ಥ ಗಹನಸದ್ದೋ ದಿಟ್ಠಿಪರಿಯಾಯೋತಿ ಆಹ ‘‘ಮಿಚ್ಛಾದಿಟ್ಠಿಅನ್ತಗ್ಗಾಹಿಕದಿಟ್ಠಿಸಙ್ಖಾತಂ ಗಹನ’’ನ್ತಿ.

೩೯೩. ತಸ್ಸ ಅವಜಾನನ್ತೋತಿ ಏತ್ಥ ‘‘ತಸ್ಸಾ’’ತಿ ಪದಂ ‘‘ವಚನ’’ನ್ತಿ ಪಾಠಸೇಸೇನ ಸಮ್ಬನ್ಧಿತಬ್ಬನ್ತಿ ಆಹ ‘‘ತಸ್ಸ ವಚನ’’ನ್ತಿ. ತಸ್ಸಾತಿ ನವಕಸ್ಸ. ತನ್ತಿ ನವಕಂ.

೩೯೪. ‘‘ಯಂಅತ್ಥಾಯಾ’’ತಿ ಏಸೋ ಸದ್ದೋ ಸಮಾಸೋತಿ ಆಹ ‘‘ಯದತ್ಥಾಯಾ’’ತಿ. ‘‘ತಂ ಅತ್ಥ’’ನ್ತಿ ಏಸೋ ಸದ್ದೋ ಲಿಙ್ಗವಿಪಲ್ಲಾಸೋತಿ ಆಹ ‘‘ಸೋ ಅತ್ಥೋ’’ತಿ. ಅತ್ಥಸದ್ದೋ ಹಿ ಪುಲ್ಲಿಙ್ಗೋ, ಪಾಳಿಯಂ ನ ಪರಿಹಾಪೇತಬ್ಬನ್ತಿ ಏತ್ಥಾಪಿ ಲಿಙ್ಗವಿಪಲ್ಲಾಸೋ ವೇದಿತಬ್ಬೋ. ಸಬ್ಬತ್ಥಾತಿ ಸಬ್ಬಸ್ಮಿಂ ಮಹಾಸಙ್ಗಾಮೇ.

ಇತಿ ಮಹಾಸಙ್ಗಾಮವಣ್ಣನಾಯ ಯೋಜನಾ ಸಮತ್ತಾ.