೫. ಧಮ್ಮಿಕಾಧಮ್ಮಿಕಪಾತಿಮೋಕ್ಖಟ್ಠಪನಕಥಾ

೩೮೭. ತೇನ ಪುಗ್ಗಲೇನಾತಿ ತೇನ ಚುದಿತಕೇನ ಪುಗ್ಗಲೇನ. ಸಾ ವಿಪತ್ತೀತಿ ಸೀಲವಿಪತ್ತಿಆದಿಸಙ್ಖಾತಾ ಸಾ ವಿಪತ್ತಿ. ಸಞ್ಞಾಅಮೂಲಿಕವಸೇನಾತಿ ‘‘ಕತಾ’’ ಇತಿ ಸಞ್ಞಾಯ ಅಮೂಲಿಕವಸೇನ. ಕತಞ್ಚಾತಿ ಏಕನ್ತೇನ ಕತಞ್ಚ. ಅಕತಞ್ಚಾತಿ ಏಕನ್ತೇನ ಅಕತಞ್ಚ.

ಕೋಪೇತುಕಾಮತಾಯ ನೇವ ಆಗಚ್ಛತೀತಿ ಸಮ್ಬನ್ಧೋ. ತೇನಾತಿ ಅನಾಗಮನಾದಿಕಾರಣೇನ. ಆಪಜ್ಜತೀತಿ ಪಾತಿಮೋಕ್ಖಟ್ಠಪನಕೋ ಆಪಜ್ಜತಿ. ಇಚ್ಚಸ್ಸಾಪೀತಿ ಇತಿ ಏವಂ ಅಸ್ಸ ಪಾತಿಮೋಕ್ಖಟ್ಠಪನಕಸ್ಸಾಪಿ. ಪಚ್ಚಾದಿಯತೀತಿ ಪತಿ ಆದಿಯತಿ, ‘‘ಅಕತಂ ಕಮ್ಮಂ, ಪುನ ಕಾತಬ್ಬಂ ಕಮ್ಮ’’ನ್ತಿಆದಿನಾ ಪುನ ಆದೀಯತಿ, ಪುನ ಆರಭತೀತಿ ಅತ್ಥೋ.