೩. ಗಮಿಕವತ್ತಕಥಾ

೩೬೦. ಗಮಿಕವತ್ತೇ ಏವಂ ವಿನಿಚ್ಛಯೋ ವೇದಿತಬ್ಬೋತಿ ಯೋಜನಾ. ತತ್ಥಾತಿ ಸೇನಾಸನಕ್ಖನ್ಧಕೇ. ತಂ ಸಬ್ಬಂ ಪಟಿಸಾಮೇತ್ವಾತಿ ಸಮ್ಬನ್ಧೋ. ಯತ್ಥ ಯೇಸು ಪಾಸಾಣಪಿಟ್ಠಿಪಾಸಾಣತ್ಥಮ್ಭೇಸು ಉಪಚಿಕಾ ನಾರೋಹನ್ತಿ, ತಸ್ಸಂ ಪಾಸಾಣಪಿಟ್ಠಿಯಂ ವಾ ತೇಸು ಪಾಸಾಣತ್ಥಮ್ಭೇಸು ವಾ ಯಂ ಕತಸೇನಾಸನಂ ಅತ್ಥಿ, ತಂ ಅನಾಪುಚ್ಛನ್ತಸ್ಸಾಪಿ ಅನಾಪತ್ತೀತಿ ಯೋಜನಾ. ಚತೂಸು ಪಾಸಾಣೇಸೂತಿಆದಿ ವುತ್ತನ್ತಿ ಸಮ್ಬನ್ಧೋ, ಉಪಚಿಕಾನಂ ಉಪ್ಪತ್ತಿಟ್ಠಾನೇ ಕತೇತಿ ಸಮ್ಬನ್ಧೋ. ಅಯನ್ತಿ ಆನಿಸಂಸೋ. ಓವಸ್ಸಕಗೇಹೇ ಪನ ಠಪಿತಾನಂ ಮಞ್ಚಪೀಠಾನನ್ತಿ ಸಮ್ಬನ್ಧೋ.