೭. ಸಙ್ಘಭೇದಕಕ್ಖನ್ಧಕಂ

ಛಸಕ್ಯಪಬ್ಬಜ್ಜಾಕಥಾ

೩೩೦. ಸಙ್ಘಭೇದಕಕ್ಖನ್ಧಕೇ ಅಭಿಞ್ಞಾತಾ ಅಭಿಞ್ಞಾತಾತಿ ಏತ್ಥ ಅಭಿಪುಬ್ಬೋ ಞಾತಸದ್ದೋ ಪಾಕಟತ್ಥೋತಿ ಆಹ ‘‘ಪಾಕಟಾ ಪಾಕಟಾ’’ತಿ. ಕಾಳುದಾಯಿಪ್ಪಭೂತಯೋತಿ ಕಾಳುದಾಯಿಆದಯೋ. ಪರಿವಾರೇಹಿ ಸದ್ಧಿಂ ದಸ ದೂತಾ ಚ ಅಞ್ಞೇ ಚ ಬಹೂ ಜನಾ ಸಕ್ಯಕುಮಾರಾ ನಾಮಾತಿ ಯೋಜನಾ. ಅಮ್ಹೇಸೂತಿ ಸಕ್ಯಕುಲಸಙ್ಖಾತೇಸು ಅಮ್ಹೇಸು, ನಿದ್ಧಾರಣೇ ಭುಮ್ಮಂ. ಇಮಿನಾ ಪಾಠಸೇಸಂ ದಸ್ಸೇತಿ. ‘‘ಕುಲತೋ’’ತಿ ಇಮಿನಾ ‘‘ಕುಲಾ’’ತಿ ಏತ್ಥ ನಿಸ್ಸಕ್ಕತ್ಥೇ ನಿಸ್ಸಕ್ಕವಚನನ್ತಿ ದಸ್ಸೇತಿ. ಘರಾವಾಸತ್ಥನ್ತಿ ಏತ್ಥ ಘರೇ ಆವಸನ್ತಾನಂ ಮನುಸ್ಸಾನಂ ಕಿಚ್ಚನ್ತಿ ದಸ್ಸೇನ್ತೋ ಆಹ ‘‘ಘರಾವಾಸೇ ಯ’’ನ್ತಿಆದಿ. ತತ್ಥ ಯನ್ತಿ ಯಂಕಿಞ್ಚಿ. ಉದಕಂ ನಿನ್ನೇತಬ್ಬನ್ತಿ ಏತ್ಥ ಉದಕಂ ನೀಹರಿತ್ವಾ ನೇತಬ್ಬಂ ಅಪನೇತಬ್ಬನ್ತಿ ದಸ್ಸೇನ್ತೋ ಆಹ ‘‘ಯಥಾ ಉದಕಂ ಸಬ್ಬಟ್ಠಾನೇಸು ಸುಸಂ ಹೋತೀ’’ತಿ. ಸುಸನ್ತಿ ಸುಕ್ಖಂ. ತಿಣಾನೀತಿ ಸಸ್ಸದೂಸಕಾನಿ ತಿಣಾನಿ. ‘‘ಉದ್ಧರಿತಬ್ಬಾನೀ’’ತಿ ಇಮಿನಾ ನಿದ್ಧಾಪೇತಬ್ಬನ್ತಿ ಏತ್ಥ ಧುಧಾತುಯಾ ಪಪ್ಫೋಟನಧಂಸನತ್ಥೇ ದಸ್ಸೇತಿ. ಭುಸಾತಿ ಸಸ್ಸನಾಳದಣ್ಡಾ, ತೇಹಿ ಮಿಸ್ಸಾ ಪಲಾಲಾ ಭುಸಿಕಾ. ಓಫುಣಾಪೇತಬ್ಬನ್ತಿ ಏತ್ಥ ಫುಣಧಾತುಯಾ ಅವಕಿರಣತ್ಥಂ ದಸ್ಸೇನ್ತೋ ಆಹ ‘‘ಅಪನೇತಬ್ಬ’’ನ್ತಿ. ತ್ವಞ್ಞೇವ ಘರಾವಾಸತ್ಥೇನ ಉಪಜಾನಾತಿ ಏತ್ಥ ಘರಾವಾಸತ್ಥೇನಾತಿ ಉಪಯೋಗತ್ಥೇ ಕರಣವಚನಂ. ಉಪಜಾನಾತಿ ಉಪತ್ಯೂಪಸಗ್ಗೋ ಧಾತ್ವತ್ಥಾನುವತ್ತಕೋ, ಹಿವಿಭತ್ತಿ ಚ ಲೋಪೋ ಹೋತಿ, ತೇನ ವುತ್ತಂ ‘‘ತ್ವಞ್ಞೇವ ಘರಾವಾಸತ್ಥಂ ಜಾನಾಹೀ’’ತಿ. ಅಹನ್ತಿ ಭದ್ದಿಯಕುಮಾರನಾಮಕೋ ಅಹಂ. ತಯಾತಿ ಅನುರುದ್ಧಕುಮಾರನಾಮಕೇನ ತಯಾ. ‘‘ಸದ್ಧಿಂ ಪಬ್ಬಜಿಸ್ಸಾಮೀ’’ತಿ ಇಮಿನಾ ಪಾಠಸೇಸಂ ದಸ್ಸೇತಿ. ಸೇಸನ್ತಿ ‘‘ಸದ್ಧಿಂ ಪಬ್ಬಜಿಸ್ಸಾಮೀ’’ತಿ ವಚನಂ.

೩೩೧. ನಿಪ್ಪಾತಿತಾತಿ ಏತ್ಥ ನಿಕ್ಖಮಿತ್ವಾ ಗಮಾಪಿತಾತಿ ದಸ್ಸೇನ್ತೋ ಆಹ ‘‘ನಿಕ್ಖಾಮಿತಾ’’ತಿ. ಮಾನಸ್ಸಿನೋತಿ ಏತ್ಥ ಮಾನಂ ಸಯನ್ತಿ ನಿಸ್ಸಯನ್ತೀತಿ ಮಾನಸ್ಸಿನೋತಿ ದಸ್ಸೇನ್ತೋ ಆಹ ‘‘ಮಾನಸ್ಸಯಿನೋ’’ತಿ.

೩೩೨. ಯಸ್ಸನ್ತರತೋ ನ ಸನ್ತಿ ಕೋಪಾತಿ ಏತ್ಥ ಅನ್ತರಸದ್ದೋ ಚಿತ್ತವಾಚಕೋ, ತೋಪಚ್ಚಯೋ ಚ ಸತ್ತಮ್ಯತ್ಥವಾಚಕೋತಿ ದಸ್ಸೇನ್ತೋ ಆಹ ‘‘ಯಸ್ಸ ಚಿತ್ತೇ’’ತಿ. ಕಸ್ಮಾ ಕೋಪಾ ನ ಸನ್ತೀತಿ ಆಹ ‘‘ತತಿಯಮಗ್ಗೇನ ಸಮೂಹತತ್ತಾ’’ತಿ. ಅನಾಗಾಮಿಮಗ್ಗೇನ ದೋಸಸ್ಸ ಸಮೂಹತತ್ತಾ ಯಸ್ಸ ಖೀಣಾಸವಸ್ಸ ಚಿತ್ತೇ ಕೋಪಾ ನ ಸನ್ತೀತಿ ಅಧಿಪ್ಪಾಯೋ. ಇತಿ ಭವಾಭವತಞ್ಚ ವೀತಿವತ್ತೋತಿ ಏತ್ಥ ಅತ್ಥಂ ದಸ್ಸೇನ್ತೋ ಆಹ ‘‘ಯಸ್ಮಾ ಪನಾ’’ತಿಆದಿ. ತತ್ಥ ಯಸ್ಮಾ ಪನ ವುಚ್ಚತಿ, ತಸ್ಮಾ ಏವಮತ್ಥೋ ದಟ್ಠಬ್ಬೋತಿ ಯೋಜನಾ. ವಿಭವೋತಿ ಪಾಪಂ ವುಚ್ಚತೀತಿ ಸಮ್ಬನ್ಧೋ. ನನು ಪಾಳಿಯಂ ‘‘ವಿಭವೋ’’ತಿ ನತ್ಥಿ, ‘‘ಅಭವೋ’’ತಿ ಏವ ಅತ್ಥಿ, ಅಥ ಕಸ್ಮಾ ‘‘ವಿಭವೋತಿ ಅಭವೋ’’ತಿ ವುತ್ತನ್ತಿ ಆಹ ‘‘ವಿಭವೋತಿ ಚ ಅಭವೋತಿ ಚ ಅತ್ಥತೋ ಏಕಮೇವಾ’’ತಿ. ಇಮಿನಾ ಸದ್ದತೋಯೇವ ನಾನನ್ತಿ ದಸ್ಸೇತಿ. ಯಾ ಏಸಾ ಭವಾಭವತಾ ವುಚ್ಚತೀತಿ ಸಮ್ಬನ್ಧೋ. ‘‘ಅನೇಕಪ್ಪಕಾರಾ’’ತಿ ಇಮಿನಾ ಇತಿಸದ್ದಸ್ಸ ಪಕಾರತ್ಥಂ ದಸ್ಸೇತಿ. ಚತೂಹಿಪಿ ಮಗ್ಗೇಹಿ ವೀತಿವತ್ತೋತಿ ಸಮ್ಬನ್ಧೋ. ತಸ್ಸಾತಿ ಖೀಣಾಸವಸ್ಸ.

೩೩೩. ಅಹಿಮೇಖಲಿಕಾತಿ ಮೇಖಲಾ ವಿಯ ಮೇಖಲಿಕಾ, ಅಹಿಮೇವ ಮೇಖಲಿಕಾ ಅಹಿಮೇಖಲಿಕಾ. ತಮೇವತ್ಥಂ ದಸ್ಸೇನ್ತೋ ಆಹ ‘‘ಅಹಿಂ ಕಟಿಯಂ ಬನ್ಧಿತ್ವಾ’’ತಿ.

೩೩೪. ಸಮ್ಮನ್ನತೀತಿ ಏತ್ಥ ‘‘ಸಮ್ಮಾನೇತೀ’’ತಿ ಚುರಾದಿಗಣಿಕಧಾತುವಸೇನ ವತ್ತಬ್ಬೇ ದಿವಾದಿಗಣಿಕಧಾತುವಸೇನ ವುತ್ತನ್ತಿ ದಸ್ಸೇನ್ತೋ ಆಹ ‘‘ಸಮ್ಮಾನೇತೀ’’ತಿ. ಅಚಿನ್ತೇಯ್ಯೋ ಹಿ ಪಾಳಿನಯೋ. ಸಮ್ಮಾನೇತೀತಿ ಸಮ್ಮಾನಂ ಕರೋತಿ. ಯನ್ತಿ ಕಮ್ಮಂ. ಸೋತಿ ಸತ್ಥಾ. ಇಮಿನಾ ಯಂ ತುಮೋತಿ ಏತ್ಥ ತುಮೋತಿ ರುಳ್ಹೀಸದ್ದೋ ಇಧ ‘‘ಸೋ’’ತಿ ಸಬ್ಬನಾಮಸದ್ದೇನ ಸದಿಸತ್ಥೋತಿ ದಸ್ಸೇತಿ.

ಪಕಾಸನೀಯಕಮ್ಮಾದಿಕಥಾ

೩೩೬. ‘‘ಖೇಳಸದಿಸಾ’’ತಿ ಇಮಿನಾ ಮಿಚ್ಛಾಜೀವೇನ ಉಪ್ಪನ್ನಪಚ್ಚಯಾನಂ ಸದಿಸೂಪಚಾರೇನ ಖೇಳಭಾವಂ ದಸ್ಸೇತಿ. ತಸ್ಮಾ ಖೇಳಾ ವಿಯಾತಿ ಖೇಳೋ, ಮಿಚ್ಛಾಜೀವಪಚ್ಚಯಾ, ಖೇಳೇ ಅಸತಿ ಭಕ್ಖತಿ ಅಜ್ಝೋಹರತೀತಿ ಖೇಳಾಸಕೋತಿ ವಚನತ್ಥೋ ಕಾತಬ್ಬೋ. ಏತರಹಿ ಪಾಳಿಯಂ, ಅಟ್ಠಕಥಾಯಞ್ಚ ‘‘ಖೇಳಾಪಕಸ್ಸಾ’’ತಿ ಓಟ್ಠಜೇನ ಪಠಮಕ್ಖರೇನ ಪಾಠೋ ಅತ್ಥಿ.

೩೪೦. ಪತ್ಥದ್ಧೇನಾತಿ ಏತ್ಥ ಭೂಸೋ ಥದ್ಧೋ ಪತ್ಥದ್ಧೋ, ಬಾಳ್ಹಥದ್ಧೋತಿ ಅತ್ಥೋ. ತೇನ ವುತ್ತಂ ‘‘ನಿಚ್ಚಲೇನಾ’’ತಿ. ಪೋತ್ಥಕರೂಪಸದಿಸೇನಾತಿ ಏತ್ಥ ಪೋತ್ಥಕರೂಪಂ ನಾಮ ವತ್ಥದನ್ತಾದಿಮಯಂ, ತೇನ ಸದಿಸೋ ಪೋತ್ಥಕರೂಪಸದಿಸೋ, ತೇನ.

೩೪೨. ರಾಜಞಾತಕಾ ನಾಮಾತಿ ಏತ್ಥ ರಞ್ಞಾ ಜಾನಿಯನ್ತಿ ‘‘ಅಮ್ಹಾಕಂ ಗರೂ’’ತಿ ರಾಜಞಾತಾ, ತೇಯೇವ ರಾಜಞಾತಕಾತಿ ಅತ್ಥೋ ದಟ್ಠಬ್ಬೋ. ತದತ್ಥಂ ಅಧಿಪ್ಪಾಯೇನ ದಸ್ಸೇನ್ತೋ ಆಹ ‘‘ರಾಜಾ ಅಮ್ಹೇ ಜಾನಾತೀ’’ತಿಆದಿ. ಪಹಟ್ಠಕಣ್ಣವಾಲೋತಿ ಪಹಟ್ಠೋ ಕಣ್ಣೋ ಚ ವಾಲೋ ಚ ಏತಸ್ಸಾತಿ ಪಹಟ್ಠಕಣ್ಣವಾಲೋ. ಬನ್ಧನಿಚ್ಚಲೇತಿ ರಜ್ಜುವಲ್ಲೀಹಿ ಬನ್ಧೋ ವಿಯ ನಿಚ್ಚಲೇ, ಪಹಟ್ಠಕಣ್ಣವಾಲೇತಿ ಸಮ್ಬನ್ಧೋ. ‘‘ಕತ್ವಾ’’ತಿ ಇಮಿನಾ ‘‘ಅಭಿಧಾವೀ’’ತಿ ಪದೇ ಕಿರಿಯಾವಿಸೇಸನಭಾವಂ ದಸ್ಸೇತಿ.

ದುಕ್ಖಞ್ಹಿ ಕುಞ್ಜರ ನಾಗಮಾಸದೋತಿ ಏತ್ಥ ಕುಞ್ಜರಸದ್ದಸ್ಸ ಆಮನ್ತನಪದಭಾವಂ ಆವಿಕರೋನ್ತೋ ಆಹ ‘‘ಭೋ ಕುಞ್ಜರಾ’’ತಿ. ನಾಗಸದ್ದಸ್ಸ ಅಹಿನಾಗಹತ್ಥಿನಾಗೇಸು ಪವತ್ತನತೋ ವುತ್ತಂ ‘‘ಬುದ್ಧನಾಗ’’ನ್ತಿ. ಆಸದೋತಿ ಪದಸ್ಸ ಆಕೋಧೇನ ಸದನಂ ಉಪಗಮನಂ ಆಸದೋತಿ ದಸ್ಸೇನ್ತೋ ಆಹ ‘‘ವಧಕಚಿತ್ತೇನ ಉಪಗಮನಂ ನಾಮಾ’’ತಿ. ದುಕ್ಖನ್ತಿ ಏತರಹಿ ಚ ಆಯತಿಞ್ಚ ದುಕ್ಖಕಾರಣಂ. ದುಕ್ಖಂ ಹೀತಿ ಹಿಸದ್ದೋ ಪದಪೂರಣಮತ್ತಂ, ಅಥ ವಾ ದುಕ್ಖಮೇವಾತಿ ಅತ್ಥೋ. ‘‘ಬುದ್ಧನಾಗಂ ಘಾತಕಸ್ಸಾ’’ತಿ ಇಮಿನಾ ನಾಗಂ ಹನತೀತಿ ನಾಗಹತೋತಿ ವಚನತ್ಥಂ ದಸ್ಸೇತಿ.

ಪಟಿಕುಟಿಯೋವ ಓಸಕ್ಕೀತಿ ಏತ್ಥ ತಥಾಗತಸ್ಸ ಪಟಿಮುಖಂ ಕುಟೇನ ಗಮನಮೇತಸ್ಸಾತಿ ಪಟಿಕುಟಿಯೋ, ಪಟಿಕುಟಿಯೋ ಏವ ಹುತ್ವಾ ಓಸಕ್ಕೀತಿ ದಸ್ಸೇನ್ತೋ ಆಹ ‘‘ತಥಾಗತಾಭಿಮುಖೋಯೇವ ಪಿಟ್ಠಿಮೇಹಿ ಪಾದೇಹಿ ಓಸಕ್ಕೀ’’ತಿ. ‘‘ನ ಜಾನಾತೀ’’ತಿ ಇಮಿನಾ ಲಕ್ಖ ದಸ್ಸನಙ್ಕೇಸೂತಿ ಧಾತುಪಾಠೇಸು (ಪಾಣಿನೀ ೧೫೩೯ ಸದ್ದನೀತಿಧಾತುಮಾಲಾಯಂ ೧೮ ದಕಾರನ್ತಧಾತು) ವುತ್ತೇಸು ಅತ್ಥೇಸು ಇಧ ದಸ್ಸನತ್ಥೋತಿ ದಸ್ಸೇತಿ. ನ ಲಕ್ಖಿತಬ್ಬೋತಿ ಅಞ್ಞೇಹಿ ಸಪ್ಪುರಿಸೇಹಿ ನ ಲಕ್ಖಿತಬ್ಬೋತಿ ಅತ್ಥೋ. ಏತ್ಥ ಣ್ಯಪಚ್ಚಯೋ ಕತ್ತುಕಮ್ಮೇಸು ಹೋತಿ, ಯಕಾರಸ್ಸ ಕಕಾರಂ ಕತ್ವಾ ಅಲಕ್ಖಿಕೋತಿ ವುತ್ತಂ.

೩೪೩. ‘‘ಭುಞ್ಜಿತಬ್ಬಭೋಜನ’’ನ್ತಿ ಇಮಿನಾ ತಿಕಭೋಜನನ್ತಿ ಏತ್ಥ ಯುಪಚ್ಚಯಸ್ಸ ಕಮ್ಮತ್ಥಭಾವಂ ದಸ್ಸೇತಿ. ತನ್ತಿ ತಿಕಭೋಜನಂ. ಯಥಾಧಮ್ಮೋತಿ ‘‘ಗಣಭೋಜನೇ ಪಾಚಿತ್ತಿಯ’’ನ್ತಿ (ಪಾಚಿ. ೨೦೯) ವುತ್ತಾಯ ಮಾತಿಕಾವಿಭಙ್ಗಪಾಳಿಯಾ ಅನುರೂಪಂ. ಪಞ್ಚವತ್ಥುಯಾಚನಕಥಾತಿ ಪಞ್ಚ ವತ್ಥೂನಿ ಯಾಚನಸ್ಸ ಕಥಾ. ಆಯುಕಪ್ಪನ್ತಿ ಅವೀಚಿಮಹಾನಿರಯೇ ಆಯುಕಪ್ಪಂ ಸನ್ಧಾಯ ವುತ್ತಂ. ಅವೀಚಿಮಹಾನಿರಯೇ ಆಯುಕಪ್ಪೋ ನಾಮ ಏಕೋ ಅನ್ತರಕಪ್ಪೋತಿ ಜಿನಾಲಙ್ಕಾರಟೀಕಾದೀಸು (ಮಿ. ಪ. ೪.೧.೩; ಕಥಾ. ಅಟ್ಠ. ೬೫೪-೬೫೭; ಇತಿವು. ಅಟ್ಠ. ೧೮; ಸಾರತ್ಥ. ಟೀ. ಚೂಳವಗ್ಗ ೩.೩೪೩; ಅ. ನಿ. ಟೀ. ೩.೬೬೨) ವುತ್ತೋ. ‘‘ಏಕೋ ಅಸಙ್ಖ್ಯೇಯ್ಯಕಪ್ಪೋ’’ತಿ ಸಮ್ಮೋಹವಿನೋದನಾದೀಸು (ವಿಭ. ಅಟ್ಠ. ೮೦೯; ಮ. ನಿ. ಅಟ್ಠ. ೩.೧೨೮; ವಿ. ವಿ. ಟೀ. ೧.೪೧೦; ವಜಿರ. ಟೀ. ಪಾರಾಜಿಕಣ್ಡ ೪೧೦) ವುತ್ತೋ. ಸೇಟ್ಠಂ ಪುಞ್ಞನ್ತಿ ಮಹನ್ತಂ ಪುಞ್ಞಂ. ಇಮಿನಾ ಬ್ರಹಂ ಪುಞ್ಞನ್ತಿ ಬ್ರಹಸದ್ದೋ ಮಹನ್ತತ್ಥೋತಿ ದಸ್ಸೇತಿ. ಬ್ರಹ ವುದ್ಧಿಯನ್ತಿ ಧಾತುಪಾಠೇಸು (ಪಾಣಿನೀ ೭೩೫; ಸದ್ದನೀತಿಧಾತುಮಾಲಾಯಂ ೧೬ ಹಕಾರನ್ತಧಾತು) ವುತ್ತತ್ತಾ ಬ್ರಹಸದ್ದೋ ಮಹನ್ತವಾಚಕೋ ಹೋತಿ. ಬ್ರಹಧಾತುತೋ ಅಪಚ್ಚಯಂ ಕತ್ವಾ ‘‘ಬ್ರಹಾ’’ತಿಪಿ, ಮಪಚ್ಚಯಂ ಕತ್ವಾ ‘‘ಬ್ರಹ್ಮಾ’’ತಿಪಿ ಪಾಠೋ ಅತ್ಥಿ. ಆಯುಕಪ್ಪಮೇವಾತಿ ಸಗ್ಗೇಸು ಆಯುಕಪ್ಪಮೇವ.

ಸಙ್ಘಭೇದಕಥಾ

೩೪೪. ಸೋತಿ ದೇವದತ್ತೋ, ಗತೋ ಕಿರಾತಿ ಸಮ್ಬನ್ಧೋ. ತತ್ಥೇವಾತಿ ವಿಹಾರಸೀಮಾಯಮೇವ. ಆವೇಣಿಕನ್ತಿ ಭಿಕ್ಖುಸಙ್ಘತೋ ಆವೇಣಿಕಂ.

೩೪೫. ಆಗಿಲಾಯತೀತಿ ಏತ್ಥ ಆತ್ಯೂಪಸಗ್ಗೋ ಅಭಿಭವನತ್ಥೋ, ಗಿಲೇಧಾತು ಬಾಧನತ್ಥೋತಿ ಆಹ ‘‘ವೇದನಾಭಿಭೂತಾ ಬಾಧತೀ’’ತಿ. ತನ್ತಿ ಪಿಟ್ಠಿಂ. ಪರಸ್ಸ ಚಿತ್ತಂ ಆದಿಸಿತ್ವಾ ದೇಸಯತಿ ಏತಾಯಾತಿ ಆದೇಸನಾ, ಸಾ ಏವ ಪಾಟಿಹಾರಿಯಂ ಆದೇಸನಾಪಾಟಿಹಾರಿಯಂ. ಅನುಸಾಸತಿ ಏತಾಯಾತಿ ಅನುಸಾಸನೀ, ಇಮಮೇವತ್ಥಂ ದಸ್ಸೇನ್ತೋ ಆಹ ‘‘ಏವಮ್ಪಿ ತೇ’’ತಿಆದಿ.

೩೪೬. ಮಮಾನುಕ್ರುಬ್ಬನ್ತಿ ಏತ್ಥ ಅನುತ್ಯೂಪಸಗ್ಗೋ ಅನುಕಿರಿಯತ್ಥೋ ಕರಧಾತು ಅನ್ತಪಚ್ಚಯೋ ಗಚ್ಛನ್ತಾದಿಗಣೋತಿ ದಸ್ಸೇನ್ತೋ ಆಹ ‘‘ಮಮಾನುಕಿರಿಯಂ ಕುರುಮಾನೋ’’ತಿ. ‘‘ದುಕ್ಖಿತೋ’’ತಿ ಇಮಿನಾ ಕಪಣೋತಿ ಏತ್ಥ ಕಪಧಾತು ಹಿಂಸನತ್ಥೋತಿ ದಸ್ಸೇತಿ. ಮಹಾವರಾಹಸ್ಸಾತಿ ವರಾಹಸದ್ದಸ್ಸ ಸೂಕರತ್ಥಂ ಪಟಿಕ್ಖಿಪನ್ತೋ ಆಹ ‘‘ಮಹಾನಾಗಸ್ಸಾ’’ತಿ. ‘‘ಪಥವಿ’’ನ್ತಿ ಇಮಿನಾ ಮಹಿಂ ವಿಕುಬ್ಬತೋತಿ ಏತ್ಥ ಮಹೀಸದ್ದಸ್ಸ ಏವಂನಾಮಕಂ ಮಹಾನದಿಂ ಪಟಿಕ್ಖಿಪತಿ. ‘‘ಪದಾಲೇನ್ತಸ್ಸಾ’’ತಿ ಇಮಿನಾ ಕರಧಾತುಯಾ ವಿತ್ಯೂಪಸಗ್ಗವಸೇನ ಪದಾಲನತ್ಥಂ ದಸ್ಸೇತಿ. ಭಿಸಂ ಘಸಮಾನಸ್ಸಾತಿ ಏತ್ಥ ಮಾನಸದ್ದೋ ಕತ್ವತ್ಥೋತಿ ಆಹ ‘‘ಭಿಸಂ ಘಸನ್ತಸ್ಸಾ’’ತಿ. ಘಸನ್ತಸ್ಸಾತಿ ಭಕ್ಖನ್ತಸ್ಸ. ನದೀನಾಮಕಂ ತಂ ಪೋಕ್ಖರಣಿನ್ತಿ ಯೋಜನಾ. ಇಮಿನಾ ನದೀಸು ಜಗ್ಗತೋತಿ ಏತ್ಥ ನದೀ ನಾಮ ಪೋಕ್ಖರಣೀತಿ ದಸ್ಸೇತಿ. ಜಗ್ಗತೋತಿ ಹತ್ಥಿಯೂಥಂ ಪಾಲೇನ್ತಸ್ಸ.

೩೪೭. ‘‘ಸುತಾತಿ ಸೋತಾ’’ತಿ ಇಮಿನಾ ಪಾಳಿಯಾ ದ್ವಿಧಾಭಾವಂ ದಸ್ಸೇತಿ. ‘‘ನಿಸ್ಸನ್ದೇಹೋ’’ತಿ ಇಮಿನಾ ಅಸನ್ದಿದ್ಧೋತಿ ಏತ್ಥ ದಿಹಧಾತುಂ ದಸ್ಸೇತಿ, ದಿಸಧಾತುಂ ನಿವತ್ತೇತಿ.

೩೫೦. ಬುದ್ಧಸಹಸ್ಸೇನಪೀತಿ ಪಿಸದ್ದೋ ಗರಹತ್ಥೋ, ಪಗೇವ ಏಕೇನ ಬುದ್ಧೇನಾತಿ ದಸ್ಸೇತಿ.

‘‘ಸತ್ತೋ’’ತಿ ಇಮಿನಾ ಕೋಚಿಸದ್ದಸ್ಸ ಪಧಾನಪದಂ ದಸ್ಸೇತಿ. ಅಟ್ಠಾತಿ ಆಖ್ಯಾತಪದಸ್ಸ ಅತ್ಥಂ ದಸ್ಸೇನ್ತೋ ಆಹ ‘‘ಠಿತೋ’’ತಿ. ದೇವದತ್ತೋತಿ ಮೇ ಸುತನ್ತಿ ಏತ್ಥ ‘‘ಮೇ’’ತಿ ಪದಂ ಭಗವನ್ತಂ ಸನ್ಧಾಯ ವುತ್ತನ್ತಿ ಆಹ ‘‘ಭಗವತಾ’’ತಿ. ತದೇವಾತಿ ಸುತಮೇವ. ಇದನ್ತಿ ‘‘ದೇವದತ್ತೋತಿ ಮೇ ಸುತ’’ನ್ತಿ ವಚನಂ. ಅನುಚಿನಾತೀತಿ ಅನುವಡ್ಢೇತಿ. ‘‘ಪತ್ವಾ’’ತಿ ಇಮಿನಾ ಆಸಜ್ಜನನ್ತಿ ಏತ್ಥ ಸದಧಾತುಯಾ ಗತ್ಯತ್ಥಂ, ಕಿರಿಯಾವಿಸೇಸನಞ್ಚ ದಸ್ಸೇತಿ. ಅವೀಚಿನಿರಯಂ ಪತ್ತೋತಿ ಏತ್ಥ ಇದಾನಿ ನ ದೇವದತ್ತೋ ಅವೀಚಿನಿರಯಂ ಪತ್ತೋ ಹೋತಿ, ಆಯತಿಂ ಪನ ಅವೀಚಿನಿರಯೇ ಅವಸ್ಸಮ್ಭಾವಿಯತ್ತಾ ‘‘ಅವೀಚಿನಿರಯಂ ಪತ್ತೋ’’ತಿ ವುತ್ತನ್ತಿ ಆಹ ‘‘ಆಸಂಸಾಯಂ ಅತೀತವಚನ’’ನ್ತಿ. ಆಸಂಸಾಯನ್ತಿ ಅವಸ್ಸಮ್ಭಾವಿಯತ್ಥೇ. ಭೇಸ್ಮಾ ಹಿ ಉದಧೀ ಮಹಾತಿ ಏತ್ಥ ಭೇಸ್ಮಾಸದ್ದೋ ಭಯಾನಕಪರಿಯಾಯೋತಿ ಆಹ ‘‘ಭಯಾನಕೋ’’ತಿ.

ಉಪಾಲಿಪಞ್ಹಾಕಥಾ

೩೫೧. ಏಕತೋತಿ ಏತ್ಥ ತೋಪಚ್ಚಯಸ್ಸ ಸತ್ತಮ್ಯತ್ಥೇ ಪವತ್ತಭಾವಂ ದಸ್ಸೇನ್ತೋ ಆಹ ‘‘ಧಮ್ಮವಾದೀಪಕ್ಖೇ’’ತಿ. ‘‘ಅನುನಯನ್ತೋ’’ತಿ ಇಮಿನಾ ಅನುಸ್ಸಾವೇತೀತಿ ಏತ್ಥ ಅನುಸದ್ದಸ್ಸ ಅತ್ಥಂ ದಸ್ಸೇತಿ. ಅನುನಯನ್ತೋತಿ ಪುನಪ್ಪುನಂ ನಯನ್ತೋ. ಸಾವನಾಕಾರಂ ದಸ್ಸೇನ್ತೋ ಆಹ ‘‘ನ ತುಮ್ಹಾಕಂಯೇವಾ’’ತಿಆದಿ. ಅಯಂ ಅಧಮ್ಮೋ ವಾ ಅಯಂ ಅವಿನಯೋ ವಾ ಇದಂ ಅಸತ್ಥುಸಾಸನಂ ವಾ ಯದಿ ಭವೇಯ್ಯಾತಿ ಯೋಜನಾ. ‘‘ಬೋಧೇತೀ’’ತಿ ಇಮಿನಾ ಸಾವೇತೀತಿ ಏತ್ಥ ಸುಧಾತುಯಾ ಅತ್ಥಂ ದಸ್ಸೇತಿ. ‘‘ಅನುಸ್ಸಾವೇತ್ವಾ’’ತಿ ಇಮಿನಾ ‘‘ಅನುಸ್ಸಾವೇತಿ, ಸಲಾಕಂ ಗಾಹೇತೀ’’ತಿ ಏತ್ಥ ಅನುಸ್ಸಾವನಕಿರಿಯಾ ಪುಬ್ಬಭಾಗೇ ಪವತ್ತಾ, ಸಲಾಕಗ್ಗಾಹಕಿರಿಯಾ ಪಚ್ಛಾಭಾಗೇತಿ ದಸ್ಸೇತಿ.

ಏತ್ತಾವತಾತಿ ಏತ್ತಕೇನ ಅನುಸ್ಸಾವನಸಲಾಕಗ್ಗಾಹಮತ್ತೇನ. ನ ಪನ ಸಙ್ಘೋ ಭಿನ್ನೋ ಹೋತಿ, ಅನುಸ್ಸಾವೇತ್ವಾ ಸಲಾಕಂ ಗಾಹೇತ್ವಾ ಆವೇಣಿಕಂ ಸಙ್ಘಕಮ್ಮೇ ಕತೇಯೇವ ಸಙ್ಘೋ ಭಿನ್ನೋ ಹೋತೀತಿ ಅಧಿಪ್ಪಾಯೋ.

ಏತ್ಥ ಠತ್ವಾ ಕಸ್ಸಚಿ ಚೋದಕಸ್ಸ ಅನುಯೋಗೋ ಸಿಯಾತಿ ಯೋಜನಾ. ಕಿನ್ತಿ ಸಿಯಾತಿ ಆಹ ‘‘ಏವಂ ದೇವದತ್ತೋ’’ತಿಆದಿ. ತತ್ಥ ಏವನ್ತಿ ಪಕತತ್ತೇ ಸಙ್ಘೇ ಭಿನ್ದೇ ಸತೀತಿ ಅತ್ಥೋ. ಕಥನ್ತಿ ಕೇನಾಕಾರೇನ. ಪುನ ಕಥನ್ತಿ ಕಸ್ಮಾ ಕಾರಣಾ. ರಞ್ಞೋತಿ ಅಜಾತಸತ್ತುರಞ್ಞೋ, ಕಾರಿತಕಮ್ಮಂ. ‘‘ಘಾತಾಪಿತತ್ತಾ’’ತಿ ಬಿಮ್ಬಿಸಾರರಾಜಾನಂ ಘಾತಾಪಿತತ್ತಾ. ತತ್ಥಾತಿ ‘‘ಭಿಕ್ಖು ಖೋ ಉಪಾಲೀ’’ತಿಆದಿವಚನೇ, ಠತ್ವಾ ಪರಿಹಾರಂ ವದಾಮಾತಿ ಯೋಜನಾ. ವಿರದ್ಧತ್ತಾತಿ ವಿರಾಧಿತತ್ತಾ. ತಮತ್ಥಂ ವಿತ್ಥಾರೇನ್ತೋ ಆಹ ‘‘ತೇನ ಹೀ’’ತಿಆದಿ. ತತ್ಥ ತೇನ ಹೀತಿ ಉಯ್ಯೋಜನತ್ಥೇ ನಿಪಾತೋ. ಏವಞ್ಹೀತಿ ಏವಮೇವ. ತಸ್ಸಾತಿ ದೇವದತ್ತಸ್ಸ. ಕುಮಾರೋ ಪನಾತಿ ಅಜಾತಸತ್ತುಕುಮಾರೋ ಪನ, ಕತಮತ್ತೇಯೇವ ನ ವುತ್ತಾತಿ ಸಮ್ಬನ್ಧೋ. ತಸ್ಸಾತಿ ದೇವದತ್ತಸ್ಸ. ತಸ್ಮಾತಿ ಯಸ್ಮಾ ಸಙ್ಘಭೇದತೋ ಪುಬ್ಬೇ ರುಹಿತುಪ್ಪಾದಕಮ್ಮಂ ಕರೋನ್ತಸ್ಸಾಪಿ ಪಚ್ಛಾ ಅಭಬ್ಬಭಾವೋ ರೋಪಿತೋ, ತಸ್ಮಾ.

ಭೇದಕರವತ್ಥೂಸು ಏವಂ ವಿನಿಚ್ಛಯೋ ವೇದಿತಬ್ಬೋತಿ ಯೋಜನಾ. ಧಮ್ಮಾಧಮ್ಮಾದೀನಂ ಸುತ್ತನ್ತವಿನಯಪರಿಯಾಯೇನ ವಿಸೇಸಂ ದಸ್ಸೇನ್ತೋ ಆಹ ‘‘ಸುತ್ತನ್ತಪರಿಯಾಯೇನಾ’’ತಿಆದಿ. ತತ್ಥ ಸುತ್ತನ್ತಪರಿಯಾಯೇನಾತಿ ಸುತ್ತನ್ತದೇಸನಾಯ, ಸುತ್ತನ್ತದೇಸನಾನಯತೋತಿ ವುತ್ತಂ ಹೋತಿ. ತಥಾತಿ ತತೋ ಅಞ್ಞಥಾ.

ತತ್ಥಾತಿ ದ್ವೀಸು ಧಮ್ಮಾಧಮ್ಮೇಸು. ಏವಂ ಅಮ್ಹಾಕನ್ತಿ ಏವಂ ಕರಿಯಮಾನೇ ಅಮ್ಹಾಕಂ. ಏವಂ ಸುತ್ತನ್ತಪರಿಯಾಯೇನ ಧಮ್ಮಾಧಮ್ಮಾನಂ ವಿಸೇಸಂ ದಸ್ಸೇತ್ವಾ ಇದಾನಿ ವಿನಯಪರಿಯಾಯೇನ ತೇಸಂ ತಂ ದಸ್ಸೇನ್ತೋ ಆಹ ‘‘ವಿನಯಪರಿಯಾಯೇನ ಪನಾ’’ತಿಆದಿ. ಭೂತೇನ ವತ್ಥುನಾ ಕಾತಬ್ಬನ್ತಿ ಸಮ್ಬನ್ಧೋ. ಏವಂ ‘‘ಅಭೂತೇನ ವತ್ಥುನಾ’’ತಿ ಏತ್ಥಾಪಿ.

ಏವಂ ದ್ವಿನ್ನಂ ಪರಿಯಾಯಾನಂ ವಸೇನ ಧಮ್ಮಾಧಮ್ಮದುಕಸ್ಸ ವಿಸೇಸಂ ದಸ್ಸೇತ್ವಾ ಇದಾನಿ ವಿನಯಾವಿನಯದುಕಸ್ಸ ವಿಸೇಸಂ ದಸ್ಸೇನ್ತೋ ಆಹ ‘‘ಸುತ್ತನ್ತಪರಿಯಾಯೇನಾ’’ತಿಆದಿ. ತತ್ಥ ಸುತ್ತನ್ತನಯೇನ ರಾಗಾದಯೋ ವಿನೇತೀತಿ ವಿನಯೋ, ವಿನಯನಯೇನ ಕಾಯಂ ವಾಚಂ ವಿನೇತೀತಿ ವಿನಯೋತಿ ವಚನತ್ಥೋ ಕಾತಬ್ಬೋ.

ಏವಂ ದ್ವಿನ್ನಂ ಪರಿಯಾಯಾನಂ ವಸೇನ ವಿನಯಾವಿನಯದುಕಸ್ಸ ವಿಸೇಸಂ ದಸ್ಸೇತ್ವಾ ಇದಾನಿ ಭಾಸಿತಾಭಾಸಿತದುಕಸ್ಸ ವಿಸೇಸಂ ದಸ್ಸೇನ್ತೋ ಆಹ ‘‘ಸುತ್ತನ್ತಪರಿಯಾಯೇನ ಚತ್ತಾರೋ ಸತಿಪಟ್ಠಾನಾ’’ತಿಆದಿ. ತತ್ಥ ‘‘ಅಟ್ಠಙ್ಗಿಕೋ ಮಗ್ಗೋ’’ತಿ ಇದಂ ವಚನಂ ತಥಾಗತೇನ ಭಾಸಿತಂ ಲಪಿತನ್ತಿ ಯೋಜನಾ.

ಏವಂ ದ್ವಿನ್ನಂ ಪರಿಯಾಯಾನಂ ವಸೇನ ಭಾಸಿತಾಭಾಸಿತದುಕಸ್ಸ ವಿಸೇಸಂ ದಸ್ಸೇತ್ವಾ ಇದಾನಿ ಆಚಿಣ್ಣಾನಾಚಿಣ್ಣದುಕಸ್ಸ ವಿಸೇಸಂ ದಸ್ಸೇನ್ತೋ ಆಹ ‘‘ಸುತ್ತನ್ತಪರಿಯಾಯೇನ ದೇವಸಿಕ’’ನ್ತಿಆದಿ. ತತ್ಥ ‘‘ದೇವಸಿಕ’’ನ್ತಿ ಪದಂ ‘‘ಸಮಾಪಜ್ಜನಂ, ವೋಲೋಕನ’’ನ್ತಿ ತೀಸುಯೇವ ಪದೇಸು ಯೋಜೇತಬ್ಬಂ. ಅಟ್ಠುಪ್ಪತ್ತಿವಸೇನಾತಿ ಕಾರಣುಪ್ಪತ್ತಿವಸೇನ. ಕಾರಣಞ್ಹಿ ಅರತಿ ಫಲಂ ಏತಸ್ಮಾತಿ ಅತ್ಥೋತಿ ವುಚ್ಚತಿ, ಅತ್ಥಸ್ಸ ಉಪ್ಪತ್ತಿ ಅತ್ಥುಪ್ಪತ್ತಿ, ಸಾಯೇವ ಅಟ್ಠುಪ್ಪತ್ತಿ ತ್ಥಕಾರಸ್ಸ ಟ್ಠಕಾರಂ ಕತ್ವಾ, ಅಟ್ಠುಪ್ಪತ್ತಿಯಾ ವಸೋ ಅಟ್ಠುಪ್ಪತ್ತಿವಸೋ, ತೇನ. ಇದಂ ಪದಂ ‘‘ಸುತ್ತನ್ತದೇಸನಾ ಜಾತಕಕಥಾ’’ತಿ ದ್ವೀಹಿಪಿ ಪದೇಹಿ ಯೋಜೇತಬ್ಬಂ. ಇದನ್ತಿ ಫಲಸಮಾಪತ್ತಿಸಮಾಪಜ್ಜನಾದಿ. ಆಚಿಣ್ಣನ್ತಿ ಆ ಬನ್ಧಿತಂ, ಪುನಪ್ಪುನಂ ವಾ ಉಪಚಿತಂ ವಡ್ಢಿತಂ, ಪಗುಣಂ ವಾ. ಚಾರಿಯಪಕ್ಕಮನನ್ತಿ ಚಾರಿಯತ್ಥಂ ಪಕ್ಕಮನಂ.

ಏವಂ ದ್ವಿನ್ನಂ ಪರಿಯಾಯಾನಂ ವಸೇನ ಆಚಿಣ್ಣಾನಾಚಿಣ್ಣದುಕಸ್ಸ ವಿಸೇಸಂ ದಸ್ಸೇತ್ವಾ ಇದಾನಿ ಪಞ್ಞತ್ತದುಕಸ್ಸ ವಿಸೇಸಂ ದಸ್ಸೇನ್ತೋ ಆಹ ‘‘ಸುತ್ತನ್ತಪರಿಯಾಯೇನ ಚತ್ತಾರೋ ಸತಿಪಟ್ಠಾನಾ’’ತಿಆದಿ. ತಂ ಭಾಸಿತಾಭಾಸಿತದುಕಸದಿಸಮೇವ. ಏವಂ ದ್ವಿನ್ನಂ ಸುತ್ತನ್ತವಿನಯಪರಿಯಾಯಾನಂ ವಸೇನ ಪಞ್ಚನ್ನಂ ದುಕಾನಂ ವಿಸೇಸೋ ದಸ್ಸಿತೋ.

ಆಪತ್ತಾನಾಪತ್ತಿದುಕೇ ‘‘ನ ಮೋಚನಾಧಿಪ್ಪಾಯಸ್ಸಾ’’ತಿ ಪಾಠಸ್ಸ ಅನನ್ತರೇ ಪಚ್ಛಿಮವಾಕ್ಯೇ ಠಿತೋ ಆದಿಸದ್ದೋ ಆನೇತಬ್ಬೋ. ಇತಿ ಆದಿನಾ ನಯೇನಾತಿ ಹಿ ಅತ್ಥೋ. ತತ್ಥ ತತ್ಥಾತಿ ತಸ್ಮಿಂ ತಸ್ಮಿಂ ಸಿಕ್ಖಾಪದೇ. ಇದಂ ಪದಂ ಪಚ್ಛಿಮವಾಕ್ಯೇಪಿ ಅನುವತ್ತೇತಬ್ಬಂ.

ಲಹುಕಗರುಕದುಕೇ ಪಞ್ಚಾಪತ್ತಿಕ್ಖನ್ಧಾತಿ ಥುಲ್ಲಚ್ಚಯಪಾಚಿತ್ತಿಯಪಾಟಿದೇಸನೀಯದುಕ್ಕಟದುಬ್ಭಾಸಿತವಸೇನ ಪಞ್ಚ ಆಪತ್ತಿರಾಸಯೋ. ದ್ವೇ ಆಪತ್ತಿಕ್ಖನ್ಧಾತಿ ಪಾರಾಜಿಕಸಙ್ಘಾದಿಸೇಸವಸೇನ ದ್ವೇ ಆಪತ್ತಿರಾಸಯೋ.

ಸಾವಸೇಸಾನಾವಸೇಸದುಕೇ ಛ ಆಪತ್ತಿಕ್ಖನ್ಧಾತಿ ಪಾರಾಜಿಕಾಪತ್ತಿತೋ ಅವಸೇಸಾ ಛ ಆಪತ್ತಿರಾಸಯೋ.

ದುಟ್ಠುಲ್ಲಾದುಟ್ಠುಲ್ಲದುಕೇ ಲಹುಕಗರುಕದುಕಸದಿಸಮೇವ. ಅಯಂ ಪನ ವಿಸೇಸೋ – ಗರುಕಾಪತ್ತಿ ದುಟ್ಠುಲ್ಲಾ ನಾಮ, ಲಹುಕಾಪತ್ತಿ ಅದುಟ್ಠುಲ್ಲಾ ನಾಮಾತಿ ಏವಂ ವಿನಯಪರಿಯಾಯವಸೇನೇವ ಚತುನ್ನಂ ದುಕಾನಂ ವಿಸೇಸೋ ದಸ್ಸಿತೋ.

ಏತ್ಥಾತಿ ‘‘ಅಧಮ್ಮಂ ಧಮ್ಮೋತಿ ದೀಪೇನ್ತೀ’’ತಿಆದಿವಚನೇ. ಚತುನ್ನಂ ಸಙ್ಘಕಮ್ಮಾನನ್ತಿ ಅಪಲೋಕನಾದಿವಸೇನ ಚತುನ್ನಂ ಸಙ್ಘಕಮ್ಮಾನಂ. ಕರೋನ್ತೇಹಿ ಹೇತುಭೂತೇಹಿ, ಹೇತ್ವತ್ಥೇ ಚೇತಂ ಕರಣವಚನಂ.

ತತ್ಥಾತಿ ‘‘ತೇ ಇಮೇಹೀ’’ತಿಆದಿವಚನೇ. ಅಪಕಸ್ಸನ್ತೀತಿ ಏತ್ಥ ಕಸಧಾತುಸ್ಸ ಗತ್ಯತ್ಥಂ ದಸ್ಸೇನ್ತೋ ಆಹ ‘‘ಪರಿಸಂ ಆಕಡ್ಢನ್ತೀ’’ತಿ. ವಿಜಟೇನ್ತೀತಿ ವಿಜಟಂ ಕರೋನ್ತಿ, ವಿಸುಂ ಕರೋನ್ತೀತಿ ಅತ್ಥೋ. ಏಕಮನ್ತಂ ಉಸ್ಸಾದೇನ್ತೀತಿ ಏಕಸ್ಮಿಂ ಅನ್ತೇ ಉಸ್ಸದಂ ಕರೋನ್ತಿ. ಅವಪಕಸ್ಸನ್ತೀತಿ ಏತ್ಥ ದ್ವಿನ್ನಂ ಉಪಸಗ್ಗಾನಂ ವಸೇನ ಅತಿವಿಯತ್ಥೋ ದಟ್ಠಬ್ಬೋತಿ ಆಹ ‘‘ಅತಿ ವಿಯ ಆಕಡ್ಢನ್ತೀ’’ತಿ. ಅತಿವಿಯತ್ಥಂ ಆವಿಕರೋನ್ತೋ ಆಹ ‘‘ಯಥಾ ವಿಸಂಸಟ್ಠಾವ ಹೋನ್ತಿ, ಏವಂ ಕರೋನ್ತೀ’’ತಿ. ಯಥಾತಿ ಯೇನಾಕಾರೇನ ಕರಿಯಮಾನೇತಿ ಸಮ್ಬನ್ಧೋ. ‘‘ವಿಸು’’ನ್ತಿ ಇಮಿನಾ ಆವೇಣಿಸದ್ದೋ ‘‘ವಿಸು’’ನ್ತಿಅತ್ಥವಾಚಕೋ ಅನಿಪ್ಫನ್ನಪಾಟಿಪದಿಕೋತಿ ದಸ್ಸೇತಿ. ವತ್ಥೂಸೂತಿ ಭೇದಕರವತ್ಥೂಸು. ಇಮಂ ಗಣ್ಹಥಾತಿ ಇಮಂ ವಾದಂ ಗಣ್ಹಥ. ವಿಸುನ್ತಿ ಆವೇಣಿಂ. ಇಮಸ್ಮಿಂ ಖನ್ಧಕೇ ವುತ್ತವಚನಂ ಪರಿವಾರಪಾಳಿಯಾ ಸಂಸನ್ದೇನ್ತೋ ಆಹ ‘‘ಪರಿವಾರೇ ಪನಾ’’ತಿಆದಿ. ತತ್ಥ ಪಞ್ಚಹಿ ಆಕಾರೇಹೀತಿ ‘‘ಕಮ್ಮೇನ ಉದ್ದೇಸೇನ ವೋಹರನ್ತೋ ಅನುಸ್ಸಾವನೇನ ಸಲಾಕಗ್ಗಾಹೇನಾ’’ತಿ (ಪರಿ. ೪೫೮) ಏವಂ ಪಞ್ಚಹಿ ಕಾರಣೇಹಿ. ತಸ್ಸಾತಿ ಪರಿವಾರೇ ವುತ್ತವಚನಸ್ಸ. ಇಧಾತಿ ಇಮಸ್ಮಿಂ ಸಙ್ಘಭೇದಕಕ್ಖನ್ಧಕೇ, ವುತ್ತೇನ ಇಮಿನಾ ಸಙ್ಘಭೇದಲಕ್ಖಣೇನಾತಿ ಯೋಜನಾ. ‘‘ಅತ್ಥತೋ ನಾನಾಕರಣಂ ನತ್ಥೀ’’ತಿ ಇಮಿನಾ ಸದ್ದತೋ ನಾನಾಕರಣಂ ಅತ್ಥೀತಿ ದೀಪೇತಿ. ಅಸ್ಸಾತಿ ಸಙ್ಘಭೇದಲಕ್ಖಣಸ್ಸ. ತಂ ಪನ ನಾನಾಕರಣಾಭಾವನ್ತಿ ಯೋಜನಾ. ತತ್ಥೇವಾತಿ ಪರಿವಾರೇ ಏವ. ಸಬ್ಬತ್ಥಾತಿ ಸಬ್ಬಸ್ಮಿಂ ಸಙ್ಘಭೇದಕಕ್ಖನ್ಧಕೇ.

ಇತಿ ಸಙ್ಘಭೇದಕಕ್ಖನ್ಧಕವಣ್ಣನಾಯ ಯೋಜನಾ ಸಮತ್ತಾ.