೬. ಸೇನಾಸನಕ್ಖನ್ಧಕಂ

ವಿಹಾರಾನುಜಾನನಕಥಾ

೨೯೪. ಸೇನಾಸನಕ್ಖನ್ಧಕೇ ಅಪಞ್ಞತ್ತಂ ಹೋತೀತಿ ಏತ್ಥ ನ ಞಪಧಾತು ಹೋತಿ, ಅಪಿಚ ಞಾಧಾತುಯೇವ, ಸೋ ಚ ಖೋ ಅನುಜಾನನತ್ಥೋತಿ ಆಹ ‘‘ಅನನುಞ್ಞಾತಂ ಹೋತೀ’’ತಿ. ಇಮಿನಾ ಞಾಧಾತುಸ್ಸ ಅವಬೋಧನಾದಯೋ ಅತ್ಥೇ ನಿವತ್ತೇತಿ, ಅನುಜಾನನತ್ಥಂಯೇವ ದಸ್ಸೇತಿ. ಅಡ್ಢಯೋಗಾದೀನಂ ವಿಸುಂ ಗಹಿತತ್ತಾ ವಿಹಾರಸದ್ದೇನ ಪಾರಿಸೇಸತೋ ಅವಸೇಸಾವಾಸೋವ ಗಹೇತಬ್ಬೋತಿ ಆಹ ‘‘ಅಡ್ಢಯೋಗಾದಿಮುತ್ತಕೋ ಅವಸೇಸಾವಾಸೋ’’ತಿ. ಸುವಣ್ಣವಙ್ಕಗೇಹನ್ತಿ ಸುವಣ್ಣವಙ್ಕಛದನೇನ ಛಾದಿತಂ ಗೇಹಂ. ಇಟ್ಠಕಾಗುಹಾತಿ ಇಟ್ಠಕಾಯ ಕತಾ ಗುಹಾ. ಏಸೇವ ನಯೋ ಸೇಸೇಸುಪಿ. ಆಗತಸ್ಸ ಚ ಅನಾಗತಸ್ಸ ಚಾತಿ ಏತ್ಥ ಚಸದ್ದೇನ ದ್ವನ್ದವಾಕ್ಯಂ ದಸ್ಸೇತಿ. ಆಗಚ್ಛತೀತಿ ಆಗತೋ, ನ ಆಗತೋ ಅನಾಗತೋ, ಸಙ್ಘೋ. ಆಗತೋ ಚ ಅನಾಗತೋ ಚ ಆಗತಾನಾಗತೋ, ಸಮಾಹಾರದ್ವನ್ದೋ ಪುಂಲಿಙ್ಗೋ, ತಸ್ಸ. ‘‘ಅಪ್ಪಟಿಹತಚಾರಸ್ಸಾ’’ತಿ ಇಮಿನಾ ಚತೂಸು ದಿಸಾಸು ಅಪ್ಪಟಿಹತಚಾರೋ ಚಾತುದ್ದಿಸೋತಿ ವಚನತ್ಥಂ ದಸ್ಸೇತಿ.

೨೯೫. ಅನುಮೋದನಗಾಥಾಸು ಏವಂ ವಿನಿಚ್ಛಯೋ ವೇದಿತಬ್ಬೋತಿ ಯೋಜನಾ. ಉತುವಿಸಭಾಗವಸೇನಾತಿ ಸೀತಉಣ್ಹಾನಂ ಉತೂನಂ ವಿಸಭಾಗವಸೇನ. ಸಂಫುಸಿತಕವಾತೋತಿ ಸಹ ಉದಕಬಿನ್ದುನಾ ಆಗತೋ ವಾತೋ. ಏತ್ಥ ಹಿ ಸಂಸದ್ದೋ ಸಹತ್ಥೋ, ಫುಸಿತಸದ್ದೋ ಉದಕಬಿನ್ದುವಾಚಕೋ. ಉಜುಕಮೇಘವುಟ್ಠಿಯೋ ಏವಾತಿ ವಾತೇನ ಅಪಹರಿತತ್ತಾ ಉಜುಕಂ ಪತಿತಾ ಮೇಘವುಟ್ಠಿಯೋ ಏವ. ಪಾಳಿಯಂ ತತೋತಿ ಏತ್ಥ ತೋಪಚ್ಚಯೋ ಪಚ್ಚತ್ತತ್ಥೇ ವತ್ತತಿ. ಸೋ ವಿಹಾರೋತಿ ಹಿ ಅತ್ಥೋ. ವಾಳಮಿಗಾನಿ ಚಾತಿ ವಾಳಮಿಗೇ ಚ. ಲಿಙ್ಗವಿಪಲ್ಲಾಸೋ ಹೇಸ. ಏತಾನಿ ಸಬ್ಬಾನೀತಿ ‘‘ಸೀತ’’ನ್ತಿಆದೀನಿ ಸಬ್ಬಾನಿ ಸತ್ತ ಪದಾನಿ. ಯೋಜೇತಬ್ಬಾನೀತಿ ಸೋ ವಿಹಾರೋ ಸೀತಂ ಪಟಿಹನತಿ…ಪೇ… ವುಟ್ಠಿಯೋ ಪಟಿಹನತೀತಿ ಯೋಜೇತಬ್ಬಾನೀತಿ ಅತ್ಥೋ.

‘‘ವಿಹಾರೇನಾ’’ತಿ ಇಮಿನಾ ಪಾಳಿಯಂ ತತೋತಿ ಏತ್ಥ ತೋಪಚ್ಚಯೋ ಕತ್ತುತ್ಥೇ ಹೋತೀತಿ ದಸ್ಸೇತಿ, ತೇನ ವಿಹಾರೇನಾತಿ ಅತ್ಥೋ. ಪಟಿಹಞ್ಞತೀತಿ ಪಟಿಹನೀಯತಿ. ಸುಖತ್ಥನ್ತಿ ಏತ್ಥ ಉತ್ತರಪದಲೋಪೋತಿ ಆಹ ‘‘ಸುಖವಿಹಾರತ್ಥ’’ನ್ತಿ. ‘‘ಲೇಣತ್ಥಞ್ಚ ಸುಖತ್ಥಞ್ಚಾ’’ತಿ ಪದದ್ವಯಂ ‘‘ಹೋತೀ’’ತಿ ಪಾಠಸೇಸೇನ ಯೋಜೇತಬ್ಬಂ. ವಿಹಾರದಾನಂ ಲೇಣತ್ಥಞ್ಚ ಸುಖತ್ಥಞ್ಚ ಹೋತೀತಿ ಹಿ ಅತ್ಥೋ. ಇದನ್ತಿ ಅಯಂ ಅಧಿಪ್ಪಾಯೋ. ವುತ್ತನ್ತಿ ವುತ್ತೋ. ವಿಹಾರದಾನಂ ಸುಖತ್ಥಞ್ಚ ಹೋತೀತಿ ಯೋಜನಾ. ಝಾಯಿತುಂ ವಿಪಸ್ಸಿತುಞ್ಚ ಯಂ ಸುಖಂ ಅತ್ಥೀತಿ ಸಮ್ಬನ್ಧೋ. ತದತ್ಥನ್ತಿ ತಸ್ಸ ಸುಖಸ್ಸ ಅತ್ಥಾಯ. ಪರಪದೇನಪೀತಿ ‘‘ಝಾಯಿತುಞ್ಚ ವಿಪಸ್ಸಿತು’’ನ್ತಿ ಪದದ್ವಯತೋ ಪರಂ ಠಿತೇನ ‘‘ವಿಹಾರದಾನ’’ನ್ತಿ ಪದೇನಪಿ. ಇಧಾತಿ ಇಮಸ್ಮಿಂ ವಿಹಾರೇ. ವಿಹಾರದಾನನ್ತಿ ವಿಹಾರಸ್ಸ ದಾನಂ, ದಾತಬ್ಬವಿಹಾರಂ ವಾ, ವಣ್ಣಿತನ್ತಿ ಸಮ್ಬನ್ಧೋ. ವುತ್ತನ್ತಿ ಸಂಯುತ್ತನಿಕಾಯೇ ವುತ್ತಂ. ಸಾಧಕಪಾಳಿಯಂ ಯೋ ಉಪಸ್ಸಯಂ ದದಾತಿ, ಸೋ ಚ ಸಬ್ಬದದೋ ಸಬ್ಬೇಸಂ ಬಲಾದೀನಂ ದದೋ ಹೋತೀತಿ ಯೋಜನಾ. ಸೋ ಚಾತಿ ಏತ್ಥ ಚಸದ್ದೋ ಅವಧಾರಣತ್ಥೋ. ಸೋ ಏವಾತಿ ಹಿ ಅತ್ಥೋ.

‘‘ವಿಹಾರೇ’’ತಿ ಇಮಿನಾ ವಾಸಯೇತ್ಥಾತಿ ಏತ್ಥ ಏತಸದ್ದಸ್ಸ ವಿಸಯಂ ದಸ್ಸೇತಿ. ವಾಸಯೇತಿ ವಾಸೇಯ್ಯ. ತೇಸಂ ಅನ್ನಞ್ಚಾತಿ ಏತ್ಥ ‘‘ತೇಸ’’ನ್ತಿ ಪದಂ ‘‘ಅನುಚ್ಛವಿಯ’’ನ್ತಿ ಪಾಠಸೇಸೇನ ಯೋಜೇತಬ್ಬನ್ತಿ ದಸ್ಸೇನ್ತೋ ಆಹ ‘‘ತೇಸಂ ಅನುಚ್ಛವಿಯ’’ನ್ತಿ. ತತ್ಥ ಅನುಚ್ಛವಿಯಂ ಅನ್ನಞ್ಚ ಅನುಚ್ಛವಿಯಾನಿ ವತ್ಥಾನಿ ಚಾತಿ ಯೋಜನಾ. ಅಥ ವಾ ತೇಸನ್ತಿ ಭುಮ್ಮತ್ಥೇ ಸಮ್ಪದಾನವಚನನ್ತಿ ದಸ್ಸೇನ್ತೋ ಆಹ ‘‘ತೇಸೂ’’ತಿ, ಭಿಕ್ಖೂಸೂತಿ ಅತ್ಥೋ. ಉಜುಭೂತೇಸೂತಿ ಏತ್ಥ ಸಮ್ಪದಾನತ್ಥೇ ಭುಮ್ಮವಚನಂ ಕತ್ವಾ ಉಜುಭೂತಾನಂ ತೇಸಂ ಭಿಕ್ಖೂನಂ ದದೇಯ್ಯಾತಿ ಅತ್ಥೋಪಿ ಯುಜ್ಜತೇವ. ‘‘ಅಕುಟಿಲಚಿತ್ತೇಸೂ’’ತಿ ಇಮಿನಾ ‘‘ಉಜುಭೂತೇಸೂ’’ತಿ ಏತ್ಥ ಉಜುಸದ್ದಸ್ಸ ಅಕುಟಿಲತ್ಥಞ್ಚ ಭೂತಸದ್ದೇನ ಬಾಹಿರತ್ಥಸಮಾಸಞ್ಚ ದಸ್ಸೇತಿ. ಉಜುಭೂತಂ ಚಿತ್ತಮೇತೇಸನ್ತಿ ಉಜುಭೂತಾತಿ ವಚನತ್ಥೋ ಕಾತಬ್ಬೋ. ನಿದಹೇಯ್ಯಾತಿ ನಿಖಣಿತ್ವಾ ಠಪೇಯ್ಯ. ‘‘ನ ಚಿತ್ತಪಸಾದಂ ವಿರಾಧೇತ್ವಾ’’ತಿ ಇಮಿನಾ ವಿಪ್ಪಸನ್ನೇನ ಚೇತಸಾತಿ ಏತ್ಥ ಏವತ್ಥಫಲಂ ವಾ ಅಞ್ಞತ್ಥಾಪೋಹನಂ ವಾ ದಸ್ಸೇತಿ. ಹೀತಿ ಫಲಜೋತಕೋ. ಏವಂ ವಿಪ್ಪಸನ್ನಚಿತ್ತಸ್ಸ ತಸ್ಸ ವಿಹಾರದಾಯಕಸ್ಸ ತೇ ಭಿಕ್ಖೂ ಧಮ್ಮಂ ದೇಸೇನ್ತೀತಿ ಯೋಜನಾ.

೨೯೬. ಆವಿಞ್ಛನಛಿದ್ದನ್ತಿ ಅಙ್ಗುಲಿಂ ಅವ ಪವೇಸೇತ್ವಾ ಅಞ್ಛತಿ ಆಕಡ್ಢತಿ ಏತ್ಥ, ಏತೇನಾತಿ ವಾ ಆವಿಞ್ಛನಂ. ಅವಪುಬ್ಬೋ ಅಛಿಧಾತು, ಉಪಸಗ್ಗಅಕಾರಸ್ಸ ದೀಘಂ ಕತ್ವಾ, ಧಾತುಅಕಾರಸ್ಸ ಚ ಇಕಾರಂ ಕತ್ವಾ ‘‘ಆವಿಞ್ಛನ’’ನ್ತಿ ವುತ್ತಂ, ತಮೇವ ಛಿದ್ದಂ ಆವಿಞ್ಛನಛಿದ್ದಂ. ಆವಿಞ್ಛನರಜ್ಜುನ್ತಿ ಕವಾಟಚ್ಛಿದ್ದೇ ಅವ ಪವೇಸೇತ್ವಾ ಅಞ್ಛತಿ ಆಕಡ್ಢತಿ ಇಮಾಯಾತಿ ಆವಿಞ್ಛನಾ, ಸಾಯೇವ ರಜ್ಜೂತಿ ಆವಿಞ್ಛನರಜ್ಜು. ಕಾಚಿ ರಜ್ಜು ನ ನ ವಟ್ಟತೀತಿ ಯೋಜನಾ. ಅಥ ವಾ ನ ವಟ್ಟತಿ ನ ಹೋತಿ, ವಟ್ಟತಿಯೇವಾತಿ ಯೋಜನಾ. ತೀಣಿ ತಾಲಾನೀತಿ ಏತ್ಥ ತಾಲಸದ್ದೋ ಕುಞ್ಚಿಕಾಪರಿಯಾಯೋತಿ ಆಹ ‘‘ತಿಸ್ಸೋ ಕುಞ್ಚಿಕಾಯೋ’’ತಿ. ಇಮಿನಾ ತಾಲಸದ್ದಸ್ಸ ರುಕ್ಖತೂರಿಯವಿಸೇಸೇ ನಿವತ್ತೇತಿ. ಯಂ ಯನ್ತಿ ಉಪಕರಣಂ. ತಸ್ಸಾತಿ ಯನ್ತಕಸ್ಸ. ವೇದಿಕಾವಾತಪಾನನ್ತಿ ವಾತಂ ಪಿವತಿ ಅನೇನಾತಿ ವಾತಪಾನಂ, ವೇದಿಕಾಯ ಕತಂ ವಾತಪಾನಂ ವೇದಿಕಾವಾತಪಾನಂ. ಚಕ್ಕಲಿಕನ್ತಿ ಏತ್ಥ ಚಕ್ಕಾಕಾರೇನ ಅಲತಿ ಪವತ್ತತೀತಿ ಚಕ್ಕಲಂ, ಚೋಳಕಪಾದಪುಞ್ಜನಂ. ತೇನ ಬನ್ಧಿತಬ್ಬನ್ತಿ ಚಕ್ಕಲಿಕನ್ತಿ ದಸ್ಸೇನ್ತೋ ಆಹ ‘‘ಚೋಳಕಪಾದಪುಞ್ಜನಂ ಬನ್ಧಿತು’’ನ್ತಿ. ‘‘ವಾತಪಾನಪ್ಪಮಾಣೇನ ಭಿಸಿಂ ಕತ್ವಾ’’ತಿ ಇಮಿನಾ ವಾತಪಾನಪಮಾಣೇನ ಕತಾ ಭಿಸಿ ವಾತಪಾನಭಿಸೀತಿ ವಚನತ್ಥಂ ದಸ್ಸೇತಿ.

೨೯೭. ‘‘ಉಚ್ಚಕಮ್ಪಿ ಆಸನ್ದಿಕ’’ನ್ತಿ ವಚನತೋ ವಟ್ಟತೀತಿ ವೇದಿತಬ್ಬೋತಿ ಸಮ್ಬನ್ಧೋ. ಏಕತೋಭಾಗೇನ ದೀಘಪೀಠಂ ಅಟ್ಠಙ್ಗುಲಪಾದಕಮೇವ ವಟ್ಟತೀತಿ ಯೋಜನಾ. ತತೋ ಅಧಿಕಂ ನ ವಟ್ಟತೀತಿ ಅಧಿಪ್ಪಾಯೋ. ಪಮಾಣಾತಿಕ್ಕನ್ತೋಪೀತಿ ಪಿಸದ್ದೋ ಪಮಾಣಯುತ್ತೋ ಪನ ಪಗೇವಾತಿ ದಸ್ಸೇತಿ. ಸತ್ತಙ್ಗೋತಿ ತೀಸು ದಿಸಾಸು ಅಪಸ್ಸಯೋ, ಚತ್ತಾರೋ ಪಾದಾತಿ ಸತ್ತ ಅಙ್ಗಾನಿ ಏತಸ್ಸಾತಿ ಸತ್ತಙ್ಗೋ. ಅಯಮ್ಪೀತಿ ಪಿಸದ್ದೋ ಆಸನ್ದಿಕಂ ಅಪೇಕ್ಖತಿ. ಏಳಕಪಾದಪೀಠಂ ನಾಮ ವುಚ್ಚತೀತಿ ಸಮ್ಬನ್ಧೋ. ಏಳಕಸ್ಸ ಪಾದೋ ವಿಯ ಪಾದೋ ಏತ್ಥಾತಿ ಏಳಕಪಾದಂ, ತಮೇವ ಪೀಠಂ ಏಳಕಪಾದಪೀಠಂ. ಆಮಲಕವಣ್ಣಿಕಪೀಠನ್ತಿ ಆಮಲಕಾಯ ವಣ್ಣೋ ಸಣ್ಠಾನೋ ಆಮಲಕವಣ್ಣೋ, ತೇನ ಯೋಜಿತಂ ಆಮಲಕವಣ್ಣಿಕಂ, ತದೇವ ಪೀಠಂ ಆಮಲಕವಣ್ಣಿಕಪೀಠಂ. ‘‘ಆಕಾರೇನಾ’’ತಿ ಇಮಿನಾ ವಣ್ಣಸದ್ದಸ್ಸ ಸಣ್ಠಾನತ್ಥಂ ದಸ್ಸೇತಿ. ಇಮಾನೀತಿ ಪೀಠಾನಿ. ಏತ್ಥಾತಿ ಪೀಠೇ. ಮುಞ್ಚಪಬ್ಬಜಮಯನ್ತಿ ಮುಞ್ಜೇನ ಚ ಪಬ್ಬಜೇನ ಚ ಕತಂ.

ಮನುಸ್ಸಾನನ್ತಿ ವಡ್ಢಕೀಮನುಸ್ಸಾನಂ. ಛವಿಸಂರಕ್ಖನತ್ಥಾಯಾತಿ ಛವಿಯಾ ವಿನಾಸನತೋ ಸುಟ್ಠು ರಕ್ಖನತ್ಥಾಯ. ಸಿಮ್ಬಲಿರುಕ್ಖಾದೀನನ್ತಿಆದಿಸದ್ದೇನ ತೂಲನಿಬ್ಬತ್ತಕೇ ಸಬ್ಬರುಕ್ಖೇ ಸಙ್ಗಣ್ಹಾತಿ. ಖೀರವಲ್ಲಿಆದೀನನ್ತಿಆದಿಸದ್ದೇನ ತೂಲನಿಬ್ಬತ್ತಕಾ ಸಬ್ಬಾ ಲತಾಯೋ ಸಙ್ಗಣ್ಹಾತಿ. ಪೋಟಕೀತಿಣಾದೀನನ್ತಿಆದಿಸದ್ದೇನ ತೂಲನಿಬ್ಬತ್ತಕಾ ಸಬ್ಬಾ ತಿಣಜಾತಿಯೋ ಸಙ್ಗಣ್ಹಾತಿ. ತೀಹೀತಿ ರುಕ್ಖಲತಾಪೋಟಕೀಹಿ. ನನು ಭೂತಗಾಮಾನಂ ಅನೇಕತ್ತಾ ಏತೇಹಿ ತೀಹಿ ಮುತ್ತೋ ಭೂತಗಾಮೋ ಅತ್ಥಿ, ಕಸ್ಮಾ ಪನ ಸಬ್ಬಭೂತಗಾಮಾ ಸಙ್ಗಹಿತಾ ಹೋನ್ತೀತಿ ಆಹ ‘‘ರುಕ್ಖವಲ್ಲಿತಿಣಜಾತಿಯೋ ಹೀ’’ತಿಆದಿ. ತತ್ಥ ಹಿ ಯಸ್ಮಾ ನತ್ಥಿ, ತಸ್ಮಾ ಸಙ್ಗಹಿತಾ ಹೋನ್ತೀತಿ ಯೋಜನಾ. ತಸ್ಮಾತಿ ಯಸ್ಮಾ ನತ್ಥಿ, ತಸ್ಮಾ. ಸಬ್ಬಮ್ಪಿ ಏತಂ ತೂಲನ್ತಿ ಯೋಜನಾ. ಬಿಬ್ಬೋಹನೇ ಲೋಮಮ್ಪಿ ವಟ್ಟತೀತಿ ಸಮ್ಬನ್ಧೋ. ಲೋಮಮ್ಪೀತಿ ಪಿಸದ್ದೇನ ತೂಲಂ ಅಪೇಕ್ಖತಿ. ಯಂಕಿಞ್ಚಿ ಪುಪ್ಫನ್ತಿ ಸಬ್ಬಂ ಪುಪ್ಫಂ. ಪತ್ತಂ ಪಾಪುಣಿತ್ವಾ ಸುದ್ಧಂ ತಮಾಲಪತ್ತಮೇವ ನ ವಟ್ಟತಿ, ಅವಸೇಸಂ ಸಬ್ಬಂ ಪತ್ತಂ ಸುದ್ಧಮ್ಪಿ ವಟ್ಟತೀತಿ ಅಧಿಪ್ಪಾಯೋ. ಪಞ್ಚವಿಧನ್ತಿ ಉಣ್ಣಚೋಳವಾಕತಿಣಪಣ್ಣವಸೇನ ಪಞ್ಚಪಕಾರಂ.

‘‘ಉಪಡ್ಢಕಾಯಪಮಾಣಾನೀ’’ತಿ ಇಮಿನಾ ಅದ್ಧಕಾಯಿಕಾನೀತಿ ಏತ್ಥ ಅದ್ಧಸ್ಸ ಕಾಯಸ್ಸ ಪಮಾಣೇನ ಕತಾನಿ ಅದ್ಧಕಾಯಿಕಾನೀತಿ ಅತ್ಥಂ ದಸ್ಸೇತಿ. ಯೇಸು ಬಿಬ್ಬೋಹನೇಸು ಕಟಿತೋ ಪಟ್ಠಾಯ ಯಾವ ಸೀಸಂ ಉಪದಹನ್ತಿ, ತಾನಿ ಬಿಬ್ಬೋಹನಾನಿ ಅದ್ಧಕಾಯಿಕಾನಿ ನಾಮಾತಿ ಯೋಜನಾ. ಯಸ್ಸಾತಿ ಬಿಬ್ಬೋಹನಸ್ಸ. ವಿತ್ಥಾರತೋ ಮುಟ್ಠಿರತನಂ ಹೋತೀತಿ ಸಮ್ಬನ್ಧೋ. ಇಮಿನಾ ಯತ್ಥ ಸಹ ಗೀವಾಯ ಸಕಲಂ ಸೀಸಂ ಠಪೇತುಂ ಸಕ್ಕಾ, ತಸ್ಸ ಮುಟ್ಠಿರತನಂ ವಿತ್ಥಾರಪಮಾಣನ್ತಿ ದಸ್ಸೇತಿ. ‘‘ತೀಸು ಕಣ್ಣೇಸು ದ್ವಿನ್ನಂ ಕಣ್ಣಾನ’’ನ್ತಿ ಇದಂ ಬಿಬ್ಬೋಹನಸ್ಸ ಉಭೋಸು ಅನ್ತೇಸು ಠಪೇತಬ್ಬಚೋಳಪಮಾಣಂ ಸನ್ಧಾಯ ವುತ್ತಂ. ಇದಂ ಪನ ಬಿಬ್ಬೋಹನಸ್ಸ ಉಭೋಸು ಅನ್ತೇಸು ಠಪಿತಚೋಳಸ್ಸ ಕೋಟಿಯಾ ಕೋಟಿಂ ಆಹಚ್ಚ ದ್ವಿಗುಣಂ ಕತಂ ತಿಕಣ್ಣಂ ಹೋತಿ, ತೇಸು ತೀಸು ಕಣ್ಣೇಸು ದ್ವಿನ್ನಂ ಕಣ್ಣಾನಮನ್ತರಂ ವಿದತ್ಥಿ ಚತುರಙ್ಗುಲಂ ಹೋತಿ, ಮಜ್ಝಟ್ಠಾನಂ ಕೋಟಿತೋ ಕೋಟಿಮಾಹಚ್ಚ ಮುಟ್ಠಿರತನಂ ಹೋತಿ, ಇದಂ ಪನ ಬಿಬ್ಬೋಹನಂ ತಿಕಣ್ಣಂ ಹೋತಿ. ವಟ್ಟಂ ವಾ ಚತುರಸ್ಸಾದಿಂ ವಾ ಕತ್ವಾ ಸಿಬ್ಬಿತಂ ಯಥಾ ಕೋಟಿತೋ ಕೋಟಿ ವಿತ್ಥಾರತೋ ಪುಥುಲಟ್ಠಾನಂ ಮುಟ್ಠಿರತನಂ ಹೋತಿ, ಏವಂ ಸಿಬ್ಬಿತಬ್ಬಂ. ಇತೋ ಅಧಿಕಂ ನ ವಟ್ಟತಿ, ಊನಂ ಪನ ವಟ್ಟತಿಯೇವ. ಸೀಸೂಪಧಾನನ್ತಿ ಸೀಸಂ ಉಪದಹನ್ತಿ ಠಪೇನ್ತಿ ಏತ್ಥಾತಿ ಸೀಸೂಪಧಾನಂ. ಬಿಬ್ಬೋಹನಾನೀತಿ ವಿಸೇಸೇನ, ವಿಸೇಸಂ ವಾ ಸುಖಂ ವಹನ್ತೀತಿ ಬಿಬ್ಬೋಹನಾನಿ. ಉಪರೀತಿ ಬಿಬ್ಬೋಹನಾನಂ ಉಪರಿ. ಯಾನಿ ಪನ ಕಪ್ಪಿಯತೂಲಾನಿ ಸನ್ತೀತಿ ಯೋಜನಾ. ಮಹನ್ತಮ್ಪೀತಿ ಪಿಸದ್ದೋ ಖುದ್ದಕಂ ಪನ ಪಗೇವಾತಿ ದಸ್ಸೇತಿ. ವಿನಯಧರಉಪತಿಸ್ಸತ್ಥೇರೋ ಪನ ಆಹಾತಿ ಸಮ್ಬನ್ಧೋ. ‘‘ವಿನಯಧರ’’ ಇತಿ ಪದೇನ ಫುಸ್ಸದೇವತ್ಥೇರತೋ ವಿಸೇಸಂ ದಸ್ಸೇತಿ. ಅಕಪ್ಪಿಯತೂಲಂ ವಾತಿ ಭಿಸಿಯಂ ಅಕಪ್ಪಿಯತೂಲಂ ವಾ. ಬಿಬ್ಬೋಹನೇ ಹಿ ಅಕಪ್ಪಿಯತೂಲಂ ನಾಮ ನತ್ಥಿ.

ಪಞ್ಚಭಿಸಿಯೋತಿ ಏತ್ಥ ವಾಕ್ಯಭಾವಞ್ಚ ಅಸಮಾಹಾರದಿಗುಭಾವಞ್ಚ ಪಟಿಕ್ಖಿಪನ್ತೋ ಆಹ ‘‘ಪಞ್ಚಹಿ ಉಣ್ಣಾದೀಹಿ ಪೂರಿತಾ ಭಿಸಿಯೋ’’ತಿ. ಇಮಿನಾ ಪಞ್ಚಹಿ ಉಣ್ಣಾದೀಹಿ ಪೂರಿತಾ ಭಿಸಿಯೋ ಪಞ್ಚಭಿಸಿಯೋತಿ ವಚನತ್ಥಂ ದಸ್ಸೇತಿ. ಅತ್ಥತೋ ಪನ ವಾಕ್ಯಮ್ಪಿ ಅಸಮಾಹಾರದಿಗುಪಿ ಯುಜ್ಜತೇವ. ಕಸ್ಮಾ ಪಞ್ಚಗಣನಾ ಹೋತೀತಿ ಆಹ ‘‘ತೂಲಗಣನಾಯ ಹೀ’’ತಿಆದಿ. ಹಿ ಯಸ್ಮಾ ತೂಲಗಣನಾಯ ಏತಾಸಂ ಗಣನಾ ವುತ್ತಾ, ತಸ್ಮಾ ಪಞ್ಚಭಿಸಿಯೋ ಹೋನ್ತೀತಿ ಯೋಜನಾ. ತತ್ಥಾತಿ ಉಣ್ಣಾದೀಸು ಪಞ್ಚಸು. ಉಣ್ಣಗ್ಗಹಣೇನ ಗಹಿತನ್ತಿ ಸಮ್ಬನ್ಧೋ. ಕಮ್ಬಲಮೇವಾತಿ ಉಣ್ಣಾಮಯಂ ಕಮ್ಬಲಮೇವ. ಉಣ್ಣಾಯ, ಉಣ್ಣಂ ವಾ ಪಕ್ಖಿಪಿತ್ವಾ ಕತಾ ಭಿಸಿ ಉಣ್ಣಾಭಿಸಿ. ಏಸೇವ ನಯೋ ಚೋಳಭಿಸಿಆದೀಸು.

ಪಮಾಣನಿಯಮೋತಿ ಏತ್ತಕಾ ಪಮಾಣಾತಿ ಪಮಾಣಸ್ಸ ನಿಯಮೋ. ಮಞ್ಚೇ ಅತ್ಥರಿತಬ್ಬಾ ಭಿಸಿ ಮಞ್ಚಭಿಸಿ. ಏತಾಸನ್ತಿ ಮಞ್ಚಭಿಸಿಆದೀನಂ. ಯಂ ಏತಂ ತೂಲನ್ತಿ ಯೋಜನಾ. ಸೂರಕೇಪೀತಿ ಚಮ್ಮಮಯಭಿಸಿಯಮ್ಪಿ. ಏತೇನಾತಿ ಕುರುನ್ದಿಯಂ ವುತ್ತವಚನೇನ ಸಿದ್ಧಂ ಹೋತೀತಿ ಸಮ್ಬನ್ಧೋ.

ಮಞ್ಚಭಿಸಿನ್ತಿ ಮಞ್ಚೇ ಅತ್ಥರಿತಬ್ಬಂ ಭಿಸಿಂ. ‘‘ಅತ್ಥರಣತ್ಥಾಯ ಸಂಹರನ್ತೀತಿ ಯುಜ್ಜತೀ’’ತಿ ಇಮಿನಾ ‘‘ಅತ್ಥರನ್ತೀ’’ತಿ ಏತ್ಥ ಕಾರಿಯೂಪಚಾರೇನ ಅತ್ಥೋ ಗಹೇತಬ್ಬೋತಿ ದಸ್ಸೇತಿ. ಅತ್ಥರಣಾಯ ಹಿ ಸಂಹರಣಂ ಕಾರಣಂ ನಾಮ, ಅತ್ಥರಣಂ ಕಾರಿಯಂ ನಾಮ. ಉಪರೀತಿ ಭಿಸಿಛವಿಯಾ ಉಪರಿ. ಫುಸಿತಾನೀತಿ ಬಿನ್ದೂನಿ. ಭಿತ್ತಿಕಮ್ಮನ್ತಿ ಭಿತ್ತಿಯಂ ನಾನಾವಣ್ಣೇಹಿ ರಾಜಿಕರಣಂ ವಿಯ ಕತ್ತಬ್ಬಂ ಕಮ್ಮಂ.

೨೯೮. ‘‘ಇಕ್ಕಾಸ’’ನ್ತಿ ನಾಮಂ ನಿಯ್ಯಾಸಸಿಲೇಸಾನಂ ನಾಮನ್ತಿ ಆಹ ‘‘ರುಕ್ಖನಿಯ್ಯಾಸಂ ವಾ ಸಿಲೇಸಂ ವಾ’’ತಿ. ‘‘ಕುಣ್ಡಕಮಿಸ್ಸಕಮತ್ತಿಕ’’ನ್ತಿ ಇಮಿನಾ ಕುಣ್ಡಕೇನ ಮಿಸ್ಸಕಾ ಮತ್ತಿಕಾ ಕುಣ್ಡಕಮತ್ತಿಕಾತಿ ವಚನತ್ಥಂ ದಸ್ಸೇತಿ. ಸಾಸಪಪಿಟ್ಠನ್ತಿ ಸಾಸಪಚುಣ್ಣಂ. ‘‘ಬಿನ್ದು ಬಿನ್ದು ಹುತ್ವಾ’’ತಿ ಇಮಿನಾ ಅಚ್ಚುಸ್ಸನ್ನಂ ಹೋತೀತಿ ಏತ್ಥ ಕಾರಣೂಪಚಾರಂ ದಸ್ಸೇತಿ. ಅಚ್ಚುಸ್ಸನ್ನಞ್ಹಿ ಕಾರಣಂ ಹೋತಿ, ‘‘ಬಿನ್ದು ಬಿನ್ದು ಹುತ್ವಾ’’ತಿ ಠಾನಂ ಕಾರಿಯಂ ಹೋತಿ. ‘‘ಪುಞ್ಜಿತು’’ನ್ತಿ ಸೋಧೇತುಂ. ಗಣ್ಡುಪ್ಪಾದಗೂಥಮತ್ತಿಕನ್ತಿ ಮಹಿಲತಾಯ ಗೂಥಮಯಂ ಮತ್ತಿಕಂ. ಇಮಿನಾ ಲಣ್ಡಮತ್ತಿಕನ್ತಿ ಏತ್ಥ ಲಣ್ಡಸದ್ದೋ ಗೂಥಪರಿಯಾಯೋತಿ ದಸ್ಸೇತಿ.

೨೯೯. ನ ಭಿಕ್ಖವೇ ಪಟಿಭಾನಚಿತ್ತನ್ತಿ ಏತ್ಥ ‘‘ಇತ್ಥಿರೂಪಕಂ ಪುರಿಸರೂಪಕ’’ನ್ತಿ ಪಾಳಿಯಂ ವುತ್ತತ್ತಾ ಕಿಂ ಇತ್ಥಿಪುರಿಸರೂಪಮೇವ ನ ವಟ್ಟತೀತಿ ಆಹ ‘‘ನ ಕೇವಲ’’ನ್ತಿಆದಿ. ತಿರಚ್ಛಾನರೂಪಮ್ಪಿ ಕಾತುಂ ವಾ ‘‘ಕರೋಹೀ’’ತಿ ವತ್ತುಂ ವಾ ನ ವಟ್ಟತೀತಿ ಸಮ್ಬನ್ಧೋ. ದ್ವಾರಪಾಲನ್ತಿ ದ್ವಾರಪಾಲರೂಪಂ. ಪಸಾದನೀಯಾನೀತಿ ಪಸಾದೇತಬ್ಬಾನಿ, ಪಸಾದೇತುಂ ಅರಹಾನೀತಿ ಅತ್ಥೋ.

೩೦೦. ಏಕಙ್ಗಣಾತಿ ಅವಿಹಾರಟ್ಠಾನೇನ ಸಮಾನಭೂಮಿಭಾಗಾ. ಮುಣ್ಡಚ್ಛೇದನಗಬ್ಭೋತಿ ಮುಣ್ಡೇನ ಛಾದೇತಬ್ಬೋ ಗಬ್ಭೋ.

ತತ್ಥಾತಿ ವಿಜ್ಝಿತಬ್ಬರುಕ್ಖೇ. ‘‘ಕತ’’ನ್ತಿ ಇಮಿನಾ ಕುಲಙ್ಕಪಾದಕನ್ತಿ ಏತ್ಥ ಣಿಕಪಚ್ಚಯಸ್ಸ ಅತ್ಥಂ ದಸ್ಸೇತಿ. ತಂ ಆಹರಿಮಂ ಭಿತ್ತಿಪಾದಂ ಪತಿಟ್ಠಾಪೇತುನ್ತಿ ಸಮ್ಬನ್ಧೋ. ವಸ್ಸಪರಿತ್ತಾಣತ್ಥನ್ತಿ ವಸ್ಸೋದಕಪರಿತ್ತಾಣತ್ಥಂ. ‘‘ಮದ್ದಿತಮತ್ತಿಕ’’ನ್ತಿ ಇಮಿನಾ ಉದ್ದಸುಧನ್ತಿ ಏತ್ಥ ಸುಧಾಸದ್ದಸ್ಸ ಲೇಪನಸುಧಂ ದಸ್ಸೇತಿ, ಭೋಜನಸುಧಂ ನಿವತ್ತೇತಿ.

ಪಮುಖನ್ತಿ ವಿಹಾರಸ್ಸ ಪಮುಖಂ. ಯನ್ತಿ ಪದೇಸಂ, ಹನನ್ತೀತಿ ಸಮ್ಬನ್ಧೋ. ತಸ್ಸ ಕತಪದೇಸಸ್ಸಾತಿ ಯೋಜನಾ. ‘‘ಪಘಾನ’’ನ್ತಿಪಿ ವುಚ್ಚತೀತಿ ದೀಘವಸೇನ ‘‘ಪಘಾನ’’ನ್ತಿಪಿ ವುಚ್ಚತಿ. ಇಮಿನಾ ಪುರಿಮಪಾಠೇ ರಸ್ಸಭಾವಂ ದೀಪೇತಿ. ‘‘ಪಕುಟ್ಟ’’ನ್ತಿಪಿ ಪಾಠೋತಿ ಸಸಂಯೋಗವಸೇನ ‘‘ಪಕುಟ್ಟ’’ನ್ತಿಪಿ ಪಾಠೋ. ಇಮಿನಾ ಪುರಿಮಪಾಠೇ ನಿಸಂಯೋಗಭಾವಂ ದಸ್ಸೇತಿ. ವಂಸನ್ತಿ ವೇಳುಂ. ತತೋತಿ ವಂಸತೋ. ‘‘ಓಸಾರೇತ್ವಾ ಕತ’’ನ್ತಿ ಇಮಿನಾ ಓಸಾರೇತ್ವಾ ಕತಂ ಓಸಾರಕನ್ತಿ ವಚನತ್ಥಂ ದಸ್ಸೇತಿ. ‘‘ಛದನಪಮುಖ’’ನ್ತಿ ಇಮಿನಾ ಣಿಕಪಚ್ಚಯಸ್ಸ ಸರೂಪಂ ದಸ್ಸೇತಿ. ಚಕ್ಕಲಯುತ್ತೋತಿ ಚಕ್ಕಲೇನ ಯುತ್ತೋ.

೩೦೧. ಪಾನೀಯದಾನಭಾಜನನ್ತಿ ಪಾನೀಯಂ ದೇತಿ ಅನೇನಾತಿ ಪಾನೀಯದಾನಂ, ತಮೇವ ಭಾಜನಂ ಪಾನೀಯದಾನಭಾಜನಂ. ‘‘ಉಳುಙ್ಕೋ ಚ ಥಾಲಕಞ್ಚಾ’’ತಿ ಇಮಿನಾ ದ್ವೇ ಪಾನೀಯಸಙ್ಖಸ್ಸ ಅನುಲೋಮಾನೀತಿ ಯೋಜನಾ.

೩೦೩. ದ್ವಾರಥಕನಕನ್ತಿ ದ್ವಾರಂ ಥಕೇತಿ ಅನೇನಾತಿ ದ್ವಾರಥಕನಕಂ. ಗಾಮದ್ವಾರೇಸು ದ್ವಾರಥಕನಕಂ ವಿಯ ಚಕ್ಕಲಯುತ್ತಂ ದ್ವಾರಥಕನಕನ್ತಿ ಯೋಜನಾ.

೩೦೫. ಅಸ್ಸತರಿರಥಾತಿ ಅಸ್ಸಾನಂ ವಿಸೇಸೇನ, ಅತಿಸಯೇನ ವಾತಿ ಅಸ್ಸತರೋ, ಅಥ ವಾ ಪಕತಿಅಸ್ಸೇ ತರತಿ ಅತಿಕ್ಕಮತೀತಿ ಅಸ್ಸತರೋ, ಸೋ ಏತೇಸು ರಥೇಸು ಯುಜ್ಜಿತಬ್ಬೋತಿ ಅಸ್ಸತರೀ, ತೇಯೇವ ರಥಾತಿ ಅಸ್ಸತರಿರಥಾತಿ ದಸ್ಸೇನ್ತೋ ಆಹ ‘‘ಅಸ್ಸತರಯುತ್ತಾ ರಥಾ ಅಸ್ಸತರಿರಥಾ’’ತಿ. ತತ್ಥ ‘‘ಅಸ್ಸತರಯುತ್ತಾ’’ತಿ ಇಮಿನಾ ‘‘ಅಸ್ಸತರೀ’’ತಿ ಪದಸ್ಸ ಅಸ್ಸತ್ಥಿತದ್ಧಿತಂ ದಸ್ಸೇತಿ. ಆಮುತ್ತಮಣಿಕುಣ್ಡಲಾತಿ ಪದಸ್ಸ ‘‘ಸತಂ ಕಞ್ಞಾ ಸಹಸ್ಸಾನೀ’’ತಿ ಪದೇನ ಸಮ್ಬನ್ಧಿತಬ್ಬತ್ತಾ ವುತ್ತಂ ‘‘ಆಮುತ್ತಮಣಿಕುಣ್ಡಲಾನೀ’’ತಿ. ಇಮಿನಾ ನಿಕಾರಸ್ಸ ಆಕಾರೋ ಹೋತೀತಿ ದಸ್ಸೇತಿ. ಕಣ್ಣೇಸು ಆಮುತ್ತಂ ಮಣಿಕುಣ್ಡಲಂ ಏತಾಸನ್ತಿ ಆಮುತ್ತಮಣಿಕುಣ್ಡಲಾ ಕಞ್ಞಾಯೋ.

ಖನ್ಧಪರಿನಿಬ್ಬಾನೇನ ಪರಿನಿಬ್ಬುತೋತಿ ಅತ್ಥಂ ಪಟಿಕ್ಖಿಪನ್ತೋ ಆಹ ‘‘ಕಿಲೇಸಪರಿನಿಬ್ಬಾನೇನ ಪರಿನಿಬ್ಬುತೋ’’ತಿ. ಸೀತಿಭೂತೋತಿ ಏತ್ಥ ಕಿಲೇಸಾತಪಾನಂ ಅಭಾವೇನೇವ ಸೀತಿಭೂತೋ, ನ ಅಞ್ಞೇಸನ್ತಿ ಆಹ ‘‘ಕಿಲೇಸಾತಪಾಭಾವೇನಾ’’ತಿ. ‘‘ಕಿಲೇಸೂಪಧಿಅಭಾವೇನಾ’’ತಿ ಇಮಿನಾ ನಿರುಪಧೀತಿ ಏತ್ಥ ಖನ್ಧೂಪಧಿಅಭಿಸಙ್ಖಾರೂಪಧಿಅಭಾವೇನಾತಿ ಅತ್ಥಂ ಪಟಿಕ್ಖಿಪತಿ.

ಆಸತ್ತಿಯೋತಿ ಏತ್ಥ ಪುನಪ್ಪುನಂ ವಿಸಯೇಸು, ಭವೇಸು ವಾ ಸಞ್ಜನ್ತೀತಿ ಆಸತ್ತಿಯೋತಿ ದಸ್ಸೇನ್ತೋ ಆಹ ‘‘ರೂಪಾದೀಸೂ’’ತಿಆದಿ. ಪತ್ಥನಾಯೋತಿ ತಣ್ಹಾಯೋ. ಇಮಿನಾ ಆಸತ್ತೀನಂ ಸರೂಪಂ ದಸ್ಸೇತಿ. ‘‘ಛಿನ್ದಿತ್ವಾ’’ತಿ ಇಮಿನಾ ಛೇತ್ವಾತಿ ಏತ್ಥ ಛೇಧಾತುಯಾ ಛೇದನತ್ಥಂ ದಸ್ಸೇತಿ. ವಿನೇಯ್ಯಹದಯೇ ದರನ್ತಿ ಏತ್ಥ ‘‘ವಿನೇಯ್ಯಾ’’ತಿ ಪದಸ್ಸ ತ್ವಾಪಚ್ಚಯನ್ತಭಾವಞ್ಚ ಹದಯಸದ್ದಸ್ಸ ಚಿತ್ತವಾಚಕಭಾವಞ್ಚ ದರಥಸರೂಪಞ್ಚ ದಸ್ಸೇನ್ತೋ ಆಹ ‘‘ಚಿತ್ತೇ ಕಿಲೇಸದರಥಂ ವಿನೇತ್ವಾ’’ತಿ. ತತ್ಥ ‘‘ಚಿತ್ತೇ’’ತಿ ಇಮಿನಾ ಹದಯಸದ್ದಸ್ಸತ್ಥಂ ದಸ್ಸೇತಿ, ‘‘ಕಿಲೇಸ’’ ಇತಿ ಪದೇನ ದರಥಸರೂಪಂ, ‘‘ವಿನೇತ್ವಾ’’ತಿ ಇಮಿನಾ ತ್ವಾಪಚ್ಚಯನ್ತಭಾವಂ ದಸ್ಸೇತಿ. ವಯಕರಣನ್ತಿ ಪರಿಬ್ಬಯಮೂಲಂ. ತಞ್ಹಿ ವಯಂ ಕರಿಯತಿ ಅನೇನಾತಿ ವಯಕರಣನ್ತಿ ವುಚ್ಚತಿ. ಇಮಿನಾ ವಯಸ್ಸ ಕರಣಂ ವಯಾಯಿಕಂ, ಕರಣತ್ಥೇ ಆಯಿಕಪಚ್ಚಯೋ, ವಯಾಯಿಕಮೇವ ವೇಯ್ಯಾಯಿಕನ್ತಿ ಅತ್ಥಂ ದಸ್ಸೇತಿ.

೩೦೭. ಆದೇಯ್ಯವಾಚೋತಿ ಏತ್ಥ ಆದಿಯಿತಬ್ಬಾತಿ ಆದೇಯ್ಯಾ, ಸಾ ವಾಚಾ ಏತಸ್ಸಾತಿ ಆದೇಯ್ಯವಾಚೋತಿ ದಸ್ಸೇನ್ತೋ ಆಹ ‘‘ತಸ್ಸ ವಚನ’’ನ್ತಿಆದಿ. ತತ್ಥ ತಸ್ಸಾತಿ ಅನಾಥಪಿಣ್ಡಿಕಸ್ಸ. ಸಧನಾತಿ ಸಂವಿಜ್ಜಮಾನ ಧನಾ, ಅತ್ತನೋ ವಾ ಧನವನ್ತೋ. ಮನ್ದಧನಾತಿ ಅಪ್ಪಧನಾ. ಅದಾಸೀತಿ ಅನಾಥಪಿಣ್ಡಿಕೋ ಅದಾಸಿ. ಇತೀತಿ ಏವಂ, ದತ್ವಾ ಕತ್ವಾತಿ ಸಮ್ಬನ್ಧೋ. ಸೋತಿ ಅನಾಥಪಿಣ್ಡಿಕೋ, ಅಗಮಾಸೀತಿ ಸಮ್ಬನ್ಧೋ.

ಕಹಾಪಣೇ ಸನ್ಥರೀತಿ ಸಮ್ಬನ್ಧೋ. ಕೋಟಿಯಾ ಕರಣಭೂತಾಯ, ಆಧಾರಭೂತಾಯ ವಾ. ಪಟಿಪಾತೇತ್ವಾತಿ ಪಟಿಹನಾಪೇತ್ವಾ. ತತ್ಥ ತಸ್ಮಿಂ ಠಾನೇ ಯೇ ರುಕ್ಖಾ ವಾ ಯಾ ಪೋಕ್ಖರಣಿಯೋ ವಾ ತಿಟ್ಠನ್ತೀತಿ ಯೋಜನಾ. ತೇಸನ್ತಿ ತಾಸಂ ರುಕ್ಖಪೋಕ್ಖರಣೀನಂ. ಸಾಮಞ್ಞಞ್ಹಿ ಅಪೇಕ್ಖಿತ್ವಾ ಪುಲ್ಲಿಙ್ಗವಸೇನ ವುತ್ತಂ. ಪರಿಕ್ಖೇಪಪಮಾಣನ್ತಿ ಪರಿಣಾಹಸ್ಸ ಪಮಾಣಂ. ಅಸ್ಸಾತಿ ಅನಾಥಪಿಣ್ಡಿಕಸ್ಸ.

ಏವಂ ಬಹುಧನಂ ಚಜನ್ತಸ್ಸಾಪಿ ಗಹಪತಿನೋತಿ ಯೋಜನಾ. ಕೋಟ್ಠಕಂ ಮಾಪೇಸೀತಿ ಏತ್ಥ ಅಞ್ಞೇ ಕೋಟ್ಠಕೇ ಪಟಿಕ್ಖಿಪನ್ತೋ ಆಹ ‘‘ದ್ವಾರಕೋಟ್ಠಕಪಾಸಾದ’’ನ್ತಿ.

ವಿಹಾರಾದಯೋತಿ ಏತ್ಥ ಆದಿಸದ್ದೇನ ಪಾಳಿಯಂ ಆಗತೇ ಪರಿವೇಣಾದಯೋ ಚುದ್ದಸ ಉಪಕರಣೇ ಸಙ್ಗಣ್ಹಾತಿ. ಅಮ್ಹಾಕಂ ಭಗವತೋ ವಿಹಾರಕಾರಾಪನಪಸಙ್ಗೇನ ಸತ್ತನ್ನಮ್ಪಿ ಬುದ್ಧಾನಂ ವಿಹಾರಕಾರಾಪನಂ ದಸ್ಸೇನ್ತೋ ಆಹ ‘‘ವಿಪಸ್ಸಿಸ್ಸಾ’’ತಿಆದಿ. ತತ್ಥ ವಿಪಸ್ಸಿಸ್ಸ ಭಗವತೋ ವಿಹಾರಂ (ದೀ. ನಿ. ಅಟ್ಠ. ೨.೧೨) ಕಾರಾಪೇಸೀತಿ ಸಮ್ಬನ್ಧೋ. ತಿಗಾವುತಪ್ಪಮಾಣಂ ಭೂಮಿಂ ಸುವಣ್ಣಯಟ್ಠಿಸನ್ಥರೇನ ಕಿಣಿತ್ವಾ ವಿಹಾರಂ ಕಾರಾಪೇಸೀತಿ ಯೋಜನಾ. ಏಸೇವ ನಯೋ ಪರತೋಪಿ. ಅಟ್ಠಕರೀಸಪ್ಪಮಾಣಾ ಭೂಮಿ ಉಸಭೇನ ದಸಉಸಭಪ್ಪಮಾಣಾ ಯಟ್ಠಿಯಾ ದ್ವಿಸತಯಟ್ಠಿಪ್ಪಮಾಣಾ ಹೋತೀತಿ ದಟ್ಠಬ್ಬಂ. ‘‘ಏವಂ ಅನುಪುಬ್ಬೇನ ಪರಿಹಾಯನ್ತೀ’’ತಿ ವತ್ವಾ ಸಬ್ಬಜನಂ ಸಂವೇಜೇನ್ತೋ ಆಹ ‘‘ಸಮ್ಪತ್ತಿಯೋ ಹೀ’’ತಿಆದಿ. ತತ್ಥ ಯಸ್ಮಾ ಸಮ್ಪತ್ತಿಯೋ ಪರಿಹಾಯನ್ತಿ, ತಸ್ಮಾ ಅಲಮೇವ ಸಬ್ಬಸಮ್ಪತ್ತೀಸು ವಿರಜ್ಜಿತುಂ, ಅಲಂ ಏವ ಸಬ್ಬಸಮ್ಪತ್ತೀಹಿ ವಿಮುಚ್ಚಿತುನ್ತಿ ಯೋಜನಾ. ‘‘ಸಬ್ಬಸಮ್ಪತ್ತೀಸೂ’’ತಿ ಪದಞ್ಹಿ ‘‘ವಿಮುಚ್ಚಿತು’’ನ್ತಿ ಪದೇನ ವಿಭತ್ತಿಪರಿಣಾಮಂ ಕತ್ವಾ ಸಮ್ಬನ್ಧಿತಬ್ಬಂ.

೩೦೮. ಖಣ್ಡಫುಲ್ಲಸದ್ದಾನಂ ಅಧಿಕರಣಭಾವಂ ದಸ್ಸೇನ್ತೋ ಆಹ ‘‘ಖಣ್ಡನ್ತಿ ಛಿನ್ನೋಕಾಸೋ. ಫುಲ್ಲನ್ತಿ ಫಲಿತೋಕಾಸೋ’’ತಿ. ತತ್ಥ ‘‘ಛಿನ್ನೋಕಾಸೋ’’ತಿ ಇಮಿನಾ ಖಣ್ಡತಿ ಛಿಜ್ಜತಿ ಏತ್ಥಾತಿ ಖಣ್ಡನ್ತಿ ವಚನತ್ಥಂ ದಸ್ಸೇತಿ. ‘‘ಫಲಿತೋಕಾಸೋ’’ತಿ ಇಮಿನಾ ಫುಲ್ಲತಿ ಫಲತಿ ಏತ್ಥಾತಿ ಫುಲ್ಲನ್ತಿ ವಚನತ್ಥಂ ದಸ್ಸೇತಿ. ಪಟಿಸಙ್ಖರಿಸ್ಸತೀತಿ ಏತ್ಥ ಪಾಟಿಸದ್ದಸ್ಸ ಪಾಕತಿಕತ್ಥಭಾವಂ, ಸಙ್ಖರಿಸ್ಸತಿಸದ್ದಸ್ಸ ಚ ಕರಧಾತುಯಾ ನಿಪ್ಫನ್ನಭಾವಂ ದಸ್ಸೇತುಂ ವುತ್ತಂ ‘‘ಪಾಕತಿಕಂ ಕರಿಯತೀ’’ತಿ.

೩೧೦. ಥೇರೋತಿ ಸಾರಿಪುತ್ತತ್ಥೇರೋ, ಆಗಚ್ಛತೀತಿ ಸಮ್ಬನ್ಧೋ. ಇದನ್ತಿ ಗಿಲಾನಪಟಿಜಗ್ಗನಾದಿ. ಅಸ್ಸಾತಿ ಥೇರಸ್ಸ. ಅಗ್ಗಾಸನನ್ತಿಆದೀಸು ಅಗ್ಗಸದ್ದೋ ಪಠಮತ್ಥೋಪಿ ಉತ್ತಮತ್ಥೋಪಿ ಯುಜ್ಜತಿ. ತೇನ ವುತ್ತಂ ‘‘ಥೇರಾಸನ’’ನ್ತಿಆದಿ. ಅನ್ತರಾ ಸತ್ಥೀನನ್ತಿ ಏತ್ಥ ಅನ್ತರಾತಿ ಭುಮ್ಮತ್ಥೇ ನಿಸ್ಸಕ್ಕವಚನಂ. ಸತ್ಥಿಸದ್ದೋ ಚ ಊರುಸಙ್ಖಾತೋ ಪಾದವಾಚಕೋತಿ ಆಹ ‘‘ಚತುನ್ನಂ ಪಾದಾನಂ ಅನ್ತರೇ’’ತಿ.

೩೧೫. ಪತಿಟ್ಠಾಪೇಸೀತಿ ಏತ್ಥ ಕಂ ವಯಂ ಕತ್ವಾ ಪತಿಟ್ಠಾಪೇಸೀತಿ ಆಹ ‘‘ಅಟ್ಠಾರಸಕೋಟಿಪರಿಚ್ಚಾಗಂ ಕತ್ವಾ’’ತಿ. ಏವನ್ತಿಆದಿ ನಿಗಮನಂ.

ಆಸನಪ್ಪಟಿಬಾಹನಾದಿಕಥಾ

೩೧೬. ವಿಪ್ಪಕತಭೋಜನೇನಾತಿ ಏತ್ಥ ವಿಪ್ಪಕತಸದ್ದೋ ಅನಿಟ್ಠಿತಪರಿಯಾಯೋತಿ ಆಹ ‘‘ಅನಿಟ್ಠಿತೇ ಭೋಜನೇ’’ತಿ. ಪಕಿರಿಯಿತ್ಥ, ಪಕಿರಿಯಿಸ್ಸತೇ ವಾ ಪಕತಂ, ನ ಪಕತಂ ವಿಪ್ಪಕತನ್ತಿ ವಿಗ್ಗಹೋ ಕಾತಬ್ಬೋ, ಅತ್ಥತೋ ಪನ ‘‘ಕರಿಯಮಾನೋ ಅನಿಟ್ಠಿತೋ’’ತಿ ವುತ್ತಂ ಹೋತಿ. ಏತ್ಥಾತಿ ಠಾನೇ. ಅತಿಸಮೀಪನ್ತಿ ಭುಞ್ಜಮಾನಸ್ಸ ಭಿಕ್ಖುಸ್ಸ ಅತಿಆಸನ್ನಂ. ತಸ್ಸಾತಿ ಭುಞ್ಜಮಾನಸ್ಸ ಭಿಕ್ಖುಸ್ಸ. ಪಿವಿತ್ವಾ ವಾತಿ ಯಾಗುಂ ಪಿವಿತ್ವಾ ವಾ. ಖಾದಿತ್ವಾ ವಾತಿ ಖಜ್ಜಕಂ ಖಾದಿತ್ವಾ ವಾ. ರಿತ್ತಹತ್ಥಮ್ಪೀತಿ ತುಚ್ಛಹತ್ಥಮ್ಪಿ. ಪಿಸದ್ದೇನ ಆಮಿಸಹತ್ಥಂ ಪನ ಪಗೇವಾತಿ ದಸ್ಸೇತಿ. ಹೀತಿ ಸಚ್ಚಂ, ಯಸ್ಮಾ ವಾ. ಸೋತಿ ರಿತ್ತಹತ್ಥೋ ಭಿಕ್ಖು.

ಆಪತ್ತಿನ್ತಿ ದುಕ್ಕಟಾಪತ್ತಿಂ. ಯನ್ತಿ ವಿಪ್ಪಕತಭೋಜನಂ ಭಿಕ್ಖುಂ. ಸೋತಿ ಪಚ್ಛಾ ಆಗತೋ ಭಿಕ್ಖು. ಅಯಞ್ಚ ಭಿಕ್ಖೂತಿ ವಿಪ್ಪಕತಭೋಜನೋ ಅಯಞ್ಚ ಭಿಕ್ಖು. ತೇನಾತಿ ವಿಪ್ಪಕತಭೋಜನೇನ ನವಕೇನ ವಾ ವುಡ್ಢತರೇನ ವಾ ಭಿಕ್ಖುನಾ. ಕಿಂ ನವಕೇನ ವುಡ್ಢತರಂ ಆಣಾಪೇತುಂ ವಟ್ಟತೀತಿ ಆಹ ‘‘ವುಡ್ಢತರಂ ಹೀ’’ತಿಆದಿ. ಹೀತಿ ಸಚ್ಚಂ, ಯಸ್ಮಾ ವಾ. ಸೋತಿ ವುಡ್ಢತರೋ ಭಿಕ್ಖು. ತತೋತಿ ಉದಕಂ ಆಹರಾಪೇತುಂ ಆಣತ್ತಿತೋ. ಯನ್ತಿ ಕಮ್ಮಂ.

ಯೋತಿ ಭಿಕ್ಖು. ‘‘ಏವರೂಪಸ್ಸಾ’’ತಿ ಪದೇನ ತಸ್ಸ ನಿಯಮನಂ ವೇದಿತಬ್ಬಂ. ಕಾಸಸ್ಸ ಖೇಳಮಲ್ಲಕಂ ಠಪೇತಬ್ಬಂ. ಭಗನ್ದರಅತಿಸಾರಾನಂ ವಚ್ಚಕಪಾಲಂ ಠಪೇತಬ್ಬಂ. ಅಞ್ಞೇಸಂ ಅಞ್ಞಾನಿ ಠಪೇತಬ್ಬಾನಿ ಹೋನ್ತಿ. ತೇನ ವುತ್ತಂ ‘‘ಖೇಳ…ಪೇ… ಹೋನ್ತೀ’’ತಿ. ಯಸ್ಮಿಂತಿ ಯಸ್ಮಿಂ ಗಿಲಾನೇ. ಯೋಪಿ ಭೇಸಜ್ಜಂ ಕರೋತೀತಿ ಸಮ್ಬನ್ಧೋ. ಲೇಸಕಪ್ಪೇನಾತಿ ಏತ್ಥ ಲೇಸಕಪ್ಪಸದ್ದಾನಂ ಅತ್ಥತೋ ಏಕತ್ತಾ ವುತ್ತಂ ‘‘ಅಪ್ಪಕೇನ ಸೀಸಾಬಾಧಾದಿಮತ್ತೇನಾ’’ತಿ. ಭಿಕ್ಖೂ ಗಣೇತ್ವಾತಿ ಏತ್ಥ ಗಣಂ ಞತ್ವಾತಿ ದಸ್ಸೇನ್ತೋ ಆಹ ‘‘ಪರಿಚ್ಛೇದಂ ಞತ್ವಾ’’ತಿ. ತತ್ಥ ‘‘ಪರಿಚ್ಛೇದ’’ನ್ತಿ ಇಮಿನಾ ಗಣಸದ್ದಸ್ಸ ಅಧಿಪ್ಪಾಯತ್ಥಂ ದಸ್ಸೇತಿ. ‘‘ಞತ್ವಾ’’ತಿ ಇಮಿನಾ ಇಧಾತುಯಾ ಅತ್ಥಂ ದಸ್ಸೇತಿ.

ಸೇನಾಸನಗ್ಗಾಹಕಥಾ

೩೧೮. ಸೇಯ್ಯಾತಿ ಕಾಯಪಸಾರಣಸಙ್ಖಾತಂ ಸಯನಕಿರಿಯಂ ಪಟಿಕ್ಖಿಪಿತ್ವಾ ಸೇನಾಸನಸಙ್ಖಾತಂ ಸೇಯ್ಯಂ ದಸ್ಸೇನ್ತೋ ಆಹ ‘‘ಮಞ್ಚಟ್ಠಾನಾನೀ’’ತಿ. ‘‘ಸೇಯ್ಯಾಪರಿಚ್ಛೇದೇನಾ’’ತಿ ಇಮಿನಾ ಸೇಯ್ಯಗ್ಘೇನಾತಿ ಏತ್ಥ ಅಗ್ಘಸದ್ದಸ್ಸ ಪೂಜನತ್ಥಂ ಪಟಿಕ್ಖಿಪಿತ್ವಾ ಪರಿಚ್ಛೇದನತ್ಥಂ ದೀಪೇತಿ. ಏತ್ಥ ಚ ಅಗ್ಘಸದ್ದಸ್ಸ ಚತುತ್ಥಕ್ಖರೇನ ಯುತ್ತಭಾವೋ ಹೇಟ್ಠಾ ಸಮುಚ್ಚಯಕ್ಖನ್ಧಕವಣ್ಣನಾ (ಚೂಳವ. ಅಟ್ಠ. ೧೦೨) ಯೋಜನಾಯ ವುತ್ತೋಯೇವ. ಕಾಲನ್ತಿ ಸೇಯ್ಯಾಪಟಿಗ್ಗಹಣಸ್ಸ ಕಾಲಂ. ಗಾಹಿಯಮಾನಾತಿ ಗಾಹಾಪಿಯಮಾನಾ. ‘‘ಅತಿರೇಕಾನಿ ಅಹೇಸು’’ನ್ತಿ ಇಮಿನಾ ಉಸ್ಸಾರಯಿಂಸೂತಿ ಏತ್ಥ ಉದ್ಧಂ ಸಾರಯಿಂಸು ಗಚ್ಛಿಂಸು ಪವತ್ತಿಂಸೂತಿ ಅತ್ಥಂ ದಸ್ಸೇತಿ. ಅತಿರೇಕಾನೀತಿ ಚ ಭಿಕ್ಖುಪರಿಚ್ಛೇದತೋ ಸೇಯ್ಯಾಪರಿಚ್ಛೇದಾನಿ ಅತಿರೇಕಾನಿ. ಅನುಭಾಗನ್ತಿ ಏತ್ಥ ಅನು ಪಚ್ಛಾ ದಾತಬ್ಬೋ ಭಾಗೋ ಅನುಭಾಗೋತಿ ದಸ್ಸೇನ್ತೋ ಆಹ ‘‘ಪುನ ಅಪರಮ್ಪಿ ಭಾಗಂ ದಾತು’’ನ್ತಿ. ಅತಿಮನ್ದೇಸೂತಿಆದಿವಚನೇನ ಕಿಞ್ಚಿಮನ್ದೇಸು ಭಿಕ್ಖೂಸು ಏಕೇಕಸ್ಸ ಭಿಕ್ಖುನೋ ದ್ವೇ ತಿಸ್ಸೋ ಸೇಯ್ಯಾ ದಾತಬ್ಬಾ. ಯತೋ ಕಿಞ್ಚಿಮನ್ದೇಸು ಭಿಕ್ಖೂಸು ದ್ವೇ ತಯೋ ವಿಹಾರಾ ದಾತಬ್ಬಾತಿ ಅತ್ಥೋಪಿ ಗಹೇತಬ್ಬೋ. ತತ್ಥಾತಿ ‘‘ನ ಅಕಾಮಾ ದಾತಬ್ಬೋ’’ತಿ ವಚನೇ. ಅನುಭಾಗೇ ಗಹಿತೇತಿ ಯೋಜನಾ. ಯೇನ ಅನುಭಾಗೋ ಚ ಪಠಮಭಾಗೋ ಚ ಗಹಿತೋ, ಸೋ ಭಿಕ್ಖೂತಿ ಯೋಜನಾ.

‘‘ಉಪಚಾರಸೀಮತೋ ಬಹೀ’’ತಿ ಇಮಿನಾ ನಿಸ್ಸೀಮೇತಿ ಏತ್ಥ ಸೀಮತೋ ಬಹಿ ನಿಕ್ಖನ್ತಂ, ನಿಸಿನ್ನಂ ವಾ ನಿಸ್ಸೀಮನ್ತಿ ಅತ್ಥಂ ದಸ್ಸೇತಿ. ಉಪಚಾರಸೀಮಾಯ ಆವಾಸವಡ್ಢನವಸೇನ ಅತಿವಿತ್ಥಾರತ್ತಾ ವುತ್ತಂ ‘‘ದೂರೇ ಠಿತಸ್ಸಾಪೀ’’ತಿ. ಉತುಕಾಲೇಪೀತಿ ಹೇಮನ್ತಗಿಮ್ಹಕಾಲೇಪಿ. ತಸ್ಮಿಞ್ಹಿ ಕಾಲೇ ಸೀತಉಣ್ಹಉತು ತಿಖಿಣೋ ಹೋತಿ, ತಸ್ಮಾ ತಸ್ಸೇವ ವಿಸೇಸೇನ ಉತುಕಾಲೋತಿ ನಾಮಂ ಪಾಕಟಂ ಹೋತಿ. ತೇನ ವುತ್ತಂ ‘‘ಹೇಮನ್ತಗಿಮ್ಹಕಾಲೇಪೀ’’ತಿ. ಪಿಸದ್ದೇನ ವಸ್ಸಕಾಲಂ ಅಪೇಕ್ಖತಿ. ಪುರಿಮವಸ್ಸೂಪನಾಯಿಕದಿವಸೇ ಗಾಹೋ ಪುರಿಮಕೋ, ಪಚ್ಛಿಮವಸ್ಸೂಪನಾಯಿಕದಿವಸೇ ಗಾಹೋ ಪಚ್ಛಿಮಕೋ.

ಅನ್ತರಾ ದ್ವೀಹಿ ವಸ್ಸೂಪನಾಯಿಕದಿವಸೇಹಿ ಮುತ್ತೇ ಕಾಲೇ ಗಾಹೋ ಅನ್ತರಾಮುತ್ತಕೋ. ಏಕಸ್ಮಿಂ ವಿಹಾರೇತಿ ಏಕಿಸ್ಸಂ ವಿಹಾರಸೀಮಾಯಂ. ಸೇನಾಸನಸಾಮಿಕಾತಿ ಸೇನಾಸನದಾಯಕಾ, ದೇನ್ತೀತಿ ಸಮ್ಬನ್ಧೋ. ತನ್ತಿ ಸೇನಾಸನಂ. ಆವಾಸಿಕಾ ನ ಓಲೋಕೇನ್ತೀತಿ ಸಮ್ಬನ್ಧೋ. ಏತ್ಥಾತಿ ಸೇನಾಸನೇ. ಪಲುಜ್ಜನ್ತಮ್ಪೀತಿ ವಿನಸ್ಸನ್ತಮ್ಪಿ. ಭಗವಾ ಆಹಾತಿ ಸಮ್ಬನ್ಧೋ. ತಸ್ಸಾತಿ ಸೇನಾಸನಸ್ಸ. ಅಪರಜ್ಜೂತಿ ಅಪರಸ್ಮಿಂ ಅಹನಿ ಅಪರಜ್ಜು. ಗತಾಯಾತಿ ಅತಿಕ್ಕಮಿತಾಯ. ಪವಾರಣಾಯ ಗತಾಯ ಪವಾರಣದಿವಸೇ ಅತಿಕ್ಕಮಿತೇ ಸತಿ ಅಪರಜ್ಜು ಅನ್ತರಾಮುತ್ತಕೋ ಗಾಹೇತಬ್ಬೋತಿ ಯೋಜನಾ.

ತನ್ತಿ ಅನ್ತರಾಮುತ್ತಕಂ. ಗಾಹೇನ್ತೇನಾತಿ ಗಾಹಾಪೇನ್ತೇನ. ತೇನಾತಿ ಗಣ್ಹನ್ತೇನ. ಅಟ್ಠಮಾಸೇತಿ ಚತ್ತಾರೋ ಹೇಮನ್ತಮಾಸೇ, ಚತ್ತಾರೋ ಚ ಗಿಮ್ಹಮಾಸೇತಿ ಅಟ್ಠಮಾಸೇ. ಕದಾಚಿ ಪಞ್ಚ ಗಿಮ್ಹಮಾಸೇತಿ ನವಮಾಸೇ ವಾ. ಖಣ್ಡಂ ವಾತಿ ಛಿನ್ನಟ್ಠಾನಂ ವಾ. ಫುಲ್ಲಂ ವಾತಿ ಫಲಿತಟ್ಠಾನಂ ವಾ. ಪಟಿಸಙ್ಖರಿತಬ್ಬನ್ತಿ ಪಾಕತಿಕಂ ಕಾತಬ್ಬಂ. ದಿವಸಂ ಖೇಪೇತ್ವಾತಿ ಪರಿವೇಣೇ ದಿವಸಂ ಖೇಪೇತ್ವಾ. ತತ್ಥಾತಿ ಗಹಿತಸೇನಾಸನೇ. ರತ್ತಿನ್ದಿವನ್ತಿ ರತ್ತಿ ಚ ದಿವೋ ಚ ರತ್ತಿನ್ದಿವಂ, ಸಮಾಹಾರದ್ವನ್ದೋ, ಅಚ್ಚನ್ತಸಂಯೋಗೇ ಚೇತಂ ಉಪಯೋಗವಚನಂ. ನ ಲಬ್ಭತೀತಿ ಸಙ್ಘತ್ಥೇರೇನ ನ ಲಬ್ಭತಿ. ಇದನ್ತಿ ಸೇನಾಸನಂ.

ಅನ್ತರಾಮುತ್ತಕಗಾಹೇನ ಅಗಹೇತಬ್ಬಸೇನಾಸನಂ ದಸ್ಸೇನ್ತೋ ಆಹ ‘‘ಯಸ್ಮಿಂ ಪನಾ’’ತಿಆದಿ. ತೇಮಾಸಚ್ಚಯೇನ ತೇಮಾಸಚ್ಚಯೇನಾತಿ ತಿಣ್ಣಂ ಮಾಸಾನಂ ಅತಿಕ್ಕಮೇನ ತಿಣ್ಣಂ ಮಾಸಾನಂ ಅತಿಕ್ಕಮೇನ. ಹೀತಿ ಸಚ್ಚಂ, ಯಸ್ಮಾ ವಾ. ಯಸ್ಮಿಂ ಪನಾತಿ ಸೇನಾಸನೇ ಪನ. ಸಕಿದೇವಾತಿ ಏಕವಾರಮೇವ. ಅಯನ್ತಿ ಏಸಾ ಕಥಾ.

ತತ್ಥಾತಿ ದುವಿಧೇಸು ಸೇನಾಸನಗ್ಗಾಹೇಸು. ಉತುಕಾಲನ್ತಿ ಉತುಕಾಲೇ ಆಗಚ್ಛನ್ತೀತಿ ಸಮ್ಬನ್ಧೋ. ತೇಸಂ ತದಾವ ದಾತಬ್ಬನ್ತಿ ಸಮ್ಬನ್ಧೋ. ಅಕಾಲೋ ನಾಮಾತಿ ಉಟ್ಠಾಪನಸ್ಸ ಅಕಾಲೋ ನಾಮ ನತ್ಥಿ. ಏಕಂ ವಾ ಮಞ್ಚಟ್ಠಾನಂ ವಾ ಠಪೇತಬ್ಬನ್ತಿ ಯೋಜನಾ. ಏಕೋ ವಾ ಥೇರೋ ಆಗಚ್ಛತೀತಿ ಯೋಜನಾ. ಉಬ್ಭಣ್ಡಿಕಾತಿ ಉಕ್ಖಿತ್ತಭಣ್ಡಿಕಾ.

ಬಹೂಸೂತಿ ತಯೋ ಆದಿಂ ಕತ್ವಾ ಬಹೂಸು ಭಿಕ್ಖೂಸು. ಪಹೋತೀತಿ ಏಕೇಕಸ್ಸ ಭಿಕ್ಖುಸ್ಸ ಪಹೋತಿ. ತತ್ಥಾತಿ ಪರಿವೇಣೇ. ತಸ್ಸೇವಾತಿ ಪರಿವೇಣಸಾಮಿಕಸ್ಸೇವ. ಏವಂ ಅಪಹೋನ್ತೇಸೂತಿ ಏವಂ ಪರಿವೇಣಗ್ಘೇನ ಅಪಹೋನ್ತೇಸು. ಪಾಸಾದಗ್ಘೇನಾತಿ ವಿಹಾರಸಙ್ಖಾತಸ್ಸ ಪಾಸಾದಸ್ಸ ಪರಿಚ್ಛೇದೇನ. ಓವರಕಗ್ಘೇನಾತಿ ಗಬ್ಭಸ್ಸ ಪರಿಚ್ಛೇದೇನ. ಸೇಯ್ಯಗ್ಘೇನಾತಿ ಚತುಪಞ್ಚಹತ್ಥಪ್ಪಮಾಣಾಯ ಸೇಯ್ಯಾಯ ಪರಿಚ್ಛೇದೇನ. ಮಞ್ಚಟ್ಠಾನೇನಾತಿ ದ್ವಿಹತ್ಥವಿತ್ಥಾರಸ್ಸ ಚತುಹತ್ಥಆಯಾಮಸ್ಸ ಮಞ್ಚಸ್ಸ ಠಾನೇನ. ಏಕಮಞ್ಚಟ್ಠಾನಸ್ಸ ದ್ವಿನ್ನಂ ಪೀಠಕಾನಂ ಠಾನತ್ತಾ ವುತ್ತಂ ‘‘ಏಕಪೀಠಕಟ್ಠಾನವಸೇನಾ’’ತಿ. ಇದಂ ನಿಸೀದಿತುಂ ಸಕ್ಕುಣೇಯ್ಯವಸೇನ ವುತ್ತಂ. ಸಚೇ ನ ಸಕ್ಕಾ ನಿಸೀದಿತುಂ, ನ ದಾತಬ್ಬಂ. ತೇನ ವುತ್ತಂ ‘‘ಭಿಕ್ಖುನೋ ಪನ ಠಿತೋಕಾಸಮತ್ತಂ ನ ಗಾಹೇತಬ್ಬ’’ನ್ತಿ. ಏತನ್ತಿ ಠಿತೋಕಾಸಮತ್ತಂ. ಹೀತಿ ಸಚ್ಚಂ, ಯಸ್ಮಾ ವಾ. ಏಕಮಞ್ಚಟ್ಠಾನಸ್ಸ ತಿಣ್ಣಂ ಜನಾನಂ ಏಕಪೀಠಕಟ್ಠಾನಭಾವೇನ ಅಪಹೋನ್ತತ್ತಾ ವುತ್ತಂ ‘‘ಏಕಂ ಮಞ್ಚಟ್ಠಾನಂ ವಾ ತಿಣ್ಣಂ ಜನಾನಂ ದಾತಬ್ಬ’’ನ್ತಿ. ಹೀತಿ ಸಚ್ಚಂ. ‘‘ಸೀತಸಮಯೇ’’ತಿ ಇಮಿನಾ ಉಣ್ಹಸಮಯೇಪಿ ಸಬ್ಬದಿವಸಂ ಅಜ್ಝೋಕಾಸೇ ವಸಿತುಂ ನ ಸಕ್ಕಾತಿ ದೀಪೇತಿ. ಪರಿಳಾಹಸಮಯೇ ಪನ ಸಕ್ಕಾ ಸಬ್ಬರತ್ತಿಂ ಅಜ್ಝೋಕಾಸೇ ವಸಿತುಂ. ಕಿಞ್ಚಾಪಿ ಸಕ್ಕಾ, ಸೀತುಣ್ಹಕಾಲೇ ಪನ ನ ದಾತಬ್ಬತ್ತಾ ಪರಿಳಾಹಸಮಯೇಪಿ ನ ದಾತಬ್ಬನ್ತಿ ವೇದಿತಬ್ಬಂ. ಏಕಮಞ್ಚಟ್ಠಾನೇ ವಾ ಏಕಪೀಠಕಟ್ಠಾನೇ ವಾ ತಿಣ್ಣಂ ಜನಾನಂ ನಿಸೀದನಾಕಾರಂ ದಸ್ಸೇನ್ತೋ ಆಹ ‘‘ಮಹಾಥೇರೇನಾ’’ತಿಆದಿ. ತತ್ಥ ಮಹಾಥೇರೇನ ವತ್ತಬ್ಬನ್ತಿ ಸಮ್ಬನ್ಧೋ. ನಿದ್ದಾಗರುಕೋತಿ ನಿದ್ದಾಯ ಗರುಕಾರಕೋ. ಸೀತಂ ಅನುದಹತೀತಿ ಸೀತಂ ಮಂ ಪೀಳೇತಿ. ತೇನಾತಿ ಮಹಾಥೇರೇನ. ದುತಿಯತ್ಥೇರೇನಾಪೀತಿ ಪಿಸದ್ದೋ ಮಹಾಥೇರಂ ಅಪೇಕ್ಖತಿ. ವುತ್ತನಯೇನೇವಾತಿ ‘‘ಉಕ್ಕಾಸಿತ್ವಾ’’ತಿಆದಿನಾ ವುತ್ತನಯೇನೇವ. ಏವನ್ತಿಆದಿ ನಿಗಮನಂ. ಜಮ್ಬುದೀಪೇ ಪನ ಏಕಚ್ಚೇ ಭಿಕ್ಖೂ ಗಾಹೇನ್ತೀತಿ ಸಮ್ಬನ್ಧೋ. ಕಿಞ್ಚಿದೇವ ಮಞ್ಚಟ್ಠಾನಂ ವಾ ಪೀಠಟ್ಠಾನಂ ವಾತಿ ಯೋಜನಾ. ಅಯನ್ತಿಆದಿ ಪುರಿಮವಚನಸ್ಸ ನಿಗಮನವಸೇನ ಪಚ್ಛಿಮವಚನಸ್ಸ ಕಥನತ್ಥಾಯ ವುತ್ತವಚನಂ.

ವಸ್ಸಾವಾಸೇ ಸೇನಾಸನಗ್ಗಾಹೋ ಏವಂ ವೇದಿತಬ್ಬೋತಿ ಯೋಜನಾ. ಆಗನ್ತುಕವತ್ತನ್ತಿ ಆಗನ್ತುಕಸ್ಸ ವತ್ತಂ. ಅಞ್ಞತ್ಥಾತಿ ಅಞ್ಞಸ್ಮಿಂ ಠಾನೇ. ಗನ್ತ್ವಾ ವಸಿತುಕಾಮೇನ ಆಗನ್ತುಕೇನಾತಿ ಯೋಜನಾ. ವಸ್ಸೂಪನಾಯಿಕದಿವಸಮೇವಾತಿ ವಸ್ಸಂ ಉಪಗಮನದಿವಸೇಯೇವ. ತತ್ಥಾತಿ ಅಞ್ಞಂ ಠಾನಂ. ನಗನ್ತಬ್ಬಕಾರಣಂ ದಸ್ಸೇನ್ತೋ ಆಹ ‘‘ವಸನಟ್ಠಾನಂ ವಾ ಹೀ’’ತಿಆದಿ. ಹೀತಿ ಯಸ್ಮಾ. ತತ್ರಾತಿ ಅಞ್ಞಸ್ಮಿಂ ಠಾನೇ. ತೇನಾತಿ ಸಮ್ಬಾಧಅಸಮ್ಪಜ್ಜನಕಾರಣಾ. ತಸ್ಮಾತಿ ಯಸ್ಮಾ ನ ಫಾಸುಂ ವಿಹರೇಯ್ಯ, ತಸ್ಮಾ. ತಂ ವಿಹಾರನ್ತಿ ಯಸ್ಮಿಂ ವಸಿತುಕಾಮೋ, ತಂ ವಿಹಾರಂ. ತತ್ಥಾತಿ ವಿಹಾರೇ, ವಸನ್ತೋ ಸುಖಂ ವಸಿಸ್ಸತೀತಿ ಸಮ್ಬನ್ಧೋ. ಉದ್ದೇಸತ್ಥಿಕೋತಿ ಉದ್ದೇಸಂ ಅತ್ಥಿಕೋ, ಉದ್ದೇಸೇನ ವಾ. ಕಮ್ಮಟ್ಠಾನಸಪ್ಪಾಯತನ್ತಿ ಕಮ್ಮಟ್ಠಾನೇನ, ಕಮ್ಮಟ್ಠಾನಸ್ಸ ವಾ ಸಪ್ಪಾಯಭಾವಂ.

ತತ್ಥಾತಿ ಅಞ್ಞವಿಹಾರಂ. ಗಚ್ಛನ್ತೇನ ಘಟ್ಟೇತಬ್ಬೋತಿ ಸಮ್ಬನ್ಧೋ. ಘಟ್ಟೇತಬ್ಬಾಕಾರಂ ದಸ್ಸೇನ್ತೋ ಆಹ ‘‘ನ ತತ್ಥಾ’’ತಿಆದಿ. ತತ್ಥ ತತ್ಥಾತಿ ಸಕಟ್ಠಾನೇ. ಕಿಂ ನ ವತ್ತಬ್ಬಾತಿ ಆಹ ‘‘ತುಮ್ಹೇ’’ತಿಆದಿ. ಸಲಾಕಭತ್ತಾದೀನಿ ವಾ ಯಾಗುಖಜ್ಜಕಾದೀನಿ ವಾ ನತ್ಥಿ ನ ವಿಜ್ಜನ್ತೀತಿ ಯೋಜನಾ. ಉಪೋಸಥಾಗಾರಸ್ಸ ಪರಿಕ್ಖಾರೋತಿ ಸಮ್ಬನ್ಧೋ. ತುಮ್ಹಾಕಂ ವಿಹಾರಸ್ಸ ಇದಂ ತಾಳಞ್ಚೇವ ಇಮಂ ಸೂಚಿಞ್ಚ ಸಮ್ಪಟಿಚ್ಛಥಾತಿ ಯೋಜನಾ. ಗಮಿಯವತ್ತನ್ತಿ ಗಮಿಕಾನಂ ಭಿಕ್ಖೂನಂ ವತ್ತಂ. ‘‘ದಹರೇಹೀ’’ತಿ ಪದಂ ‘‘ಉಕ್ಖಿಪಾಪೇತ್ವಾ’’ತಿ ಚ ‘‘ಗಾಹಾಪೇತ್ವಾ’’ತಿ ಚ ಪದದ್ವಯೇ ಕಾರಿತಕಮ್ಮಂ, ‘‘ಪತ್ತಚೀವರಭಣ್ಡಿಕಾಯೋ’’ತಿ ಪದಂ ‘‘ಉಕ್ಖಿಪಾಪೇತ್ವಾ’’ತಿ ಪದೇ ಧಾತುಕಮ್ಮಂ, ‘‘ತೇಲನಾಳಿಕತ್ತರದಣ್ಡಾದೀನೀ’’ತಿ ಪದಂ ‘‘ಗಾಹಾಪೇತ್ವಾ’’ತಿ ಪದೇ ಧಾತುಕಮ್ಮಮೇವ. ಅತ್ತಾನಂ ದಸ್ಸೇನ್ತೇನಾತಿ ಅತ್ತಾನಂ ಮನುಸ್ಸಾನಂ ಪಕಾಸೇನ್ತೇನ. ವಿತಕ್ಕನ್ತಿ ಪಚ್ಚಯಬಾಹುಲ್ಲಿಕವಿತಕ್ಕಂ. ‘‘ಸಪರಿವಾರ’’ನ್ತಿ ಪದಂ ‘‘ಗಚ್ಛನ್ತಞ್ಚಾ’’ತಿ ಪದೇ ಕಿರಿಯಾವಿಸೇಸನಂ. ಏವಞ್ಹಿ ಸತಿ ಸಪರಿವಾರಂ ಗಚ್ಛನ್ತಞ್ಚಾತಿ ಸಮ್ಬನ್ಧೋ. ‘‘ನ’’ನ್ತಿ ಪದೇ ಪನ ಕಾರಕವಿಸೇಸನಂ. ಏವಞ್ಹಿ ಸತಿ ಸಪರಿವಾರಂ ನಂ ಭಿಕ್ಖುನ್ತಿ ಸಮ್ಬನ್ಧೋ. ‘‘ದಿಸ್ವಾ’’ತಿ ಪದೇ ಚ ಕಿರಿಯಾವಿಸೇಸನಮೇವ. ಏವಞ್ಹಿ ಸತಿ ಗಚ್ಛನ್ತಞ್ಚ ನಂ ಭಿಕ್ಖುಂ ಸಪರಿವಾರಂ ದಿಸ್ವಾತಿ ಸಮ್ಬನ್ಧೋ. ಮನುಸ್ಸಾ ವದನ್ತೀತಿ ಸಮ್ಬನ್ಧೋ. ತೇಸೂತಿ ಮನುಸ್ಸೇಸು. ಏಕೋ ಪಣ್ಡಿತಮನುಸ್ಸೋತಿ ಸಮ್ಬನ್ಧೋ. ಅಯಂ ಕಾಲೋ ವಸ್ಸೂಪನಾಯಿಕಕಾಲೋ ನಾಮಾತಿ ಯೋಜನಾ. ಯತ್ಥಾತಿ ಠಾನೇ. ತಸ್ಸಾತಿ ಏಕಸ್ಸ ಪಣ್ಡಿತಮನುಸ್ಸಸ್ಸ, ವಚನನ್ತಿ ಸಮ್ಬನ್ಧೋ. ತೇ ಮನುಸ್ಸಾ ಯಾಚನ್ತೀತಿ ಸಮ್ಬನ್ಧೋ. ಅಞ್ಞತ್ಥಾತಿ ಅಞ್ಞಂ ಠಾನಂ. ಮೇಜ್ಜನ್ತಿ ಅಞ್ಞಮಞ್ಞಂ ಸಿನೇಹನ್ತೀತಿ ಮಿತ್ತಾ. ಸುಖದುಕ್ಖೇಸು ಅಮಾ ಸಹ ವತ್ತನ್ತೀತಿ ಅಮಚ್ಚಾ. ಮಿತ್ತಾಯೇವ ಅಮಚ್ಚಾತಿ ಮಿತ್ತಾಮಚ್ಚಾ, ತೇ. ಸಮ್ಮನ್ತಯಿತ್ವಾತಿ ಸಮಂ, ಸಮ್ಮಾ ವಾ ಮನ್ತಯಿತ್ವಾ. ಇಧೇವಾತಿ ಗಾಮೇ ಏವ, ವಿಹಾರೇ ಏವ ವಾ. ಕಸ್ಮಾ ಸಾದಿತುಂ ವಟ್ಟತಿ, ನನು ಸಬ್ಬಮೇತಂ ಅಕಪ್ಪಿಯಞ್ಚ ಸಾವಜ್ಜಞ್ಚಾತಿ ಆಹ ‘‘ಸಬ್ಬಞ್ಹೇತಂ ಕಪ್ಪಿಯಞ್ಚೇವ ಅನವಜ್ಜಞ್ಚಾ’’ತಿ. ಹಿ ಯಸ್ಮಾ ಏತಂ ಸಬ್ಬಂ ಕಪ್ಪಿಯಞ್ಚ ಅನವಜ್ಜಞ್ಚ, ತಸ್ಮಾ ಸಬ್ಬಂ ಸಾದಿತುಂ ವಟ್ಟತೀತಿ ಯೋಜನಾ. ಕುರುನ್ದಿಯಂ ಪನ ವುತ್ತನ್ತಿ ಸಮ್ಬನ್ಧೋ. ಉಭಯಮ್ಪೀತಿ ಮಹಾಅಟ್ಠಕಥಾಕುರುನ್ದೀಸು ವುತ್ತವಚನವಸೇನ ಉಭಯಮ್ಪಿ ಏತಂ ವಚನನ್ತಿ ಸಮ್ಬನ್ಧೋ.

ಆವಾಸಿಕವತ್ತಂ ವಿತ್ಥಾರೇನ್ತೋ ಆಹ ‘‘ಪಟಿಕಚ್ಚೇವ ಹೀ’’ತಿಆದಿ. ತತ್ಥ ಪಟಿಕಚ್ಚೇವಾತಿ ಆಗನ್ತುಕಾನಂ ಆಗತತೋ ಪಠಮಮೇವ. ಪಧಾನಘರವಿಹಾರಮಗ್ಗೋತಿ ಪಧಾನಘರಮಗ್ಗೋ ಚ ವಿಹಾರಮಗ್ಗೋ ಚ. ಮುದ್ದವೇದಿಕಾಯಾತಿ ಚೇತಿಯಸ್ಸ ಹಮ್ಮಿಯವೇದಿಕಾಯ. ಕಸ್ಮಾ ಇದಮ್ಪಿ ಸಬ್ಬಂ ಕಾತಬ್ಬನ್ತಿ ಆಹ ‘‘ವಸ್ಸಂ ವಸಿತುಕಾಮಾ ಹೀ’’ತಿಆದಿ. ಹೀತಿ ಸಚ್ಚಂ, ಯಸ್ಮಾ ವಾ. ವಸ್ಸಂ ವಸಿತುಕಾಮಾ ಸುಖಂ ವಸಿಸ್ಸನ್ತೀತಿ ಸಮ್ಬನ್ಧೋ. ಕತಪರಿಕಮ್ಮೇಹಿ ಆವಾಸಿಕೇಹೀತಿ ಸಮ್ಬನ್ಧೋ. ಯತೋ ಕುಲತೋ ಪಕತಿಯಾ ಲಬ್ಭತಿ, ತಸ್ಮಿಂ ಕುಲೇ ವಸ್ಸಾವಾಸಿಕಂ ಪುಚ್ಛಿತಬ್ಬನ್ತಿ ಯೋಜನಾ. ನ ದಿನ್ನಪುಬ್ಬನ್ತಿ ಪುಬ್ಬೇ ನ ದಿನ್ನಂ. ಹೀತಿ ಯಸ್ಮಾ. ಉಪದ್ದುತಾತಿ ಉಪಗನ್ತ್ವಾ, ಭುಸಂ ವಾ ಪೀಳಿತಾ. ತತ್ಥಾತಿ ಮನುಸ್ಸೇಸು. ಯೇತಿ ಮನುಸ್ಸಾ. ವಸ್ಸಾವಾಸಿಕೇ ಗಾಹಿತೇತಿ ವಸ್ಸಾವಾಸಿಕೇ ಸೇನಾಸನೇ ಗಾಹಾಪಿಯಮಾನೇ. ಗಾಹಿತಭಿಕ್ಖೂನನ್ತಿ ಗಾಹಾಪಿತಭಿಕ್ಖೂನಂ. ವಸ್ಸಾವಾಸಿಕನ್ತಿ ವಸ್ಸಂ ಆವಸನ್ತಾನಂ ದಾತಬ್ಬಂ ಚೀವರಂ. ಗಾಹಣಕಾಲೋತಿ ಗಾಹಾಪನಕಾಲೋ. ಉಪಕಟ್ಠೋತಿ ಆಸನ್ನೋ. ಛಾತಕಾದೀಹೀತಿ ಆದಿಸದ್ದೇನ ರೋಗಾದಯೋ ಸಙ್ಗಣ್ಹಾತಿ. ಯನ್ತಿ ಚೀವರಂ. ತತೋತಿ ಚೀವರತೋ. ತನ್ತಿ ವಚನಂ. ತದನುರೂಪೇನಾತಿ ತೇಸಂ ಮನುಸ್ಸಾನಂ ವಚನಸ್ಸಾನುರೂಪೇನ. ತೇಸಂ ತೇಸನ್ತಿ ಮನುಸ್ಸಾನಂ, ವಸ್ಸಾವಾಸಿಕಂ ಚೀವರನ್ತಿ ಸಮ್ಬನ್ಧೋ.

ಯಸ್ಸಾತಿ ಭಿಕ್ಖುನೋ. ಸೋತಿ ಭಿಕ್ಖು. ಇತಿ ವದನ್ತೀತಿ ಯೋಜನಾ. ತನ್ತಿ ಚೀವರಂ. ಪಟಿಕ್ಕಮ್ಮಾತಿ ಪಟಿಕ್ಕಮಿತ್ವಾ. ವಿಹಾರತೋ ಅಪಸಕ್ಕಿತ್ವಾತಿ ಅತ್ಥೋ. ತತ್ರಾತಿ ಗಾಮೇ. ಉಪನಿಕ್ಖೇಪಂ ಠಪೇತ್ವಾತಿ ಕಪ್ಪಿಯವತ್ಥುಂ ವಾ ಅಕಪ್ಪಿಯವತ್ಥುಂ ವಾ ಆರಾಮಿಕಾದೀನಂ ಹತ್ಥೇ ಉಪನಿಕ್ಖೇಪಂ ಠಪೇತ್ವಾ. ವಿಹಾರೇತಿ ವಿಹಾರಸ್ಸ, ವಿಹಾರೇ ವಸ್ಸಂ ವಸನ್ತಸ್ಸ ವಾ. ಅಪುಚ್ಛಿತ್ವಾಪೀತಿ ಪಿಸದ್ದೇನ ‘‘ಪುಚ್ಛಿತ್ವಾಪೀ’’ತಿ ಅತ್ಥಂ ದಸ್ಸೇತಿ. ತೇಸನ್ತಿಕುಲಾನಂ. ವತ್ತನ್ತಿ ಜಗ್ಗನಾದಿವತ್ತಂ. ತೇಸನ್ತಿ ಕುಲಾನಂ. ಆಗತಞ್ಚ ತನ್ತಿ ತಂ ಪಂಸುಕೂಲಿಕಂ ಆಗತಞ್ಚ ವದನ್ತೀತಿ ಸಮ್ಬನ್ಧೋ. ತೇನಾತಿ ಪಂಸುಕೂಲಿಕೇನ. ದಾತುಂ ನ ಇಚ್ಛನ್ತೀತಿ ಸಙ್ಘಸ್ಸ ಆಚಿಕ್ಖನ್ತೇಪಿ ಸಙ್ಘಸ್ಸ ದಾತುಂ ನ ಇಚ್ಛನ್ತಿ. ಸಭಾಗೋ ಭಿಕ್ಖೂತಿ ಅತ್ತನಾ ಸಭಾಗೋ ಭಿಕ್ಖು. ಏತನ್ತಿ ವಸ್ಸಾವಾಸಿಕಂ. ಪಂಸುಕೂಲಿಕಸ್ಸ ನ ವಟ್ಟತಿ, ಕಸ್ಮಾ? ಗಹಪತಿಚೀವರತ್ತಾ. ಇತೀತಿಆದಿ ನಿಗಮನಂ. ಸದ್ಧಾದೇಯ್ಯೇತಿ ಸದ್ಧಾಯ ದಾತಬ್ಬೇ ವಸ್ಸಾವಾಸಿಕಲಾಭವಿಸಯೇ.

ತತ್ರುಪ್ಪಾದೇತಿ ತಸ್ಮಿಂ ವಿಹಾರೇ ಉಪ್ಪಜ್ಜನಕಲಾಭವಿಸಯೇ. ಭಣ್ಡಪಟಿಚ್ಛಾದನನ್ತಿ ಪಟಿಚ್ಛಾದನಚೀವರಭಣ್ಡಂ. ಚೀವರಭಣ್ಡಮೇವ ಹಿ ಯಸ್ಮಾ ಅನೇನ ಸರೀರಂ ಪಟಿಚ್ಛಾದಿಯತಿ, ತಸ್ಮಾ ಭಣ್ಡಪಟಿಚ್ಛಾದನನ್ತಿ ವುಚ್ಚತಿ. ಗಾಹೇಥಾತಿ ಭಿಕ್ಖೂಹಿ ಗಾಹಾಪೇಥ. ಗಾಹೇತಬ್ಬನ್ತಿ ಭಿಕ್ಖೂಹಿ ಗಾಹಾಪೇತಬ್ಬಂ. ವತ್ಥು ಪನಾತಿ ಸಾಟಕತೋ ಅಞ್ಞಂ ಕಪ್ಪಿಯಂ ವಾ ಅಕಪ್ಪಿಯಂ ವಾ ವತ್ಥು ಪನ. ಕಸ್ಮಾ ವಟ್ಟತಿಯೇವ, ನನು ಅಕಪ್ಪಿಯವತ್ಥು ನ ವಟ್ಟತೀತಿ ಆಹ ‘‘ಕಪ್ಪಿಯಕಾರಕಾನಞ್ಹಿ’’ತಿಆದಿ. ತತ್ಥ ಹಿ ಯಸ್ಮಾ ಅನುಞ್ಞಾತಂ, ತಸ್ಮಾ ವಟ್ಟತಿಯೇವಾತಿ ಯೋಜನಾ. ದಿನ್ನವತ್ಥುತೋ ಉಪ್ಪನ್ನನ್ತಿ ಸಮ್ಬನ್ಧೋ.

ಯನ್ತಿ ವತ್ಥು ದಿನ್ನನ್ತಿ ಸಮ್ಬನ್ಧೋ. ಏತ್ಥಾತಿ ಕಪ್ಪಿಯಕಾರಕಾನಂ ಹತ್ಥೇ ದಿನ್ನವತ್ಥೂಸು. ತನ್ತಿ ವತ್ಥು ಉಪನಾಮೇನ್ತೇಹೀತಿ ಸಮ್ಬನ್ಧೋ. ಗರುಭಣ್ಡಂ ಹೋತಿ, ಗರುಭಣ್ಡತ್ತಾ ಅಞ್ಞೇಸು ಪಚ್ಚಯೇಸು ನ ಉಪನಾಮೇತಬ್ಬನ್ತಿ ಅಧಿಪ್ಪಾಯೋ. ಪುಗ್ಗಲವಸೇನೇವಾತಿ ‘‘ಭಿಕ್ಖೂ ಚೀವರೇನ ಕಿಲಮನ್ತಿ, ಏತ್ತಕಂ ನಾಮ ತಣ್ಡುಲಭಾಗಂ ಭಿಕ್ಖೂನಂ ಚೀವರಂ ಕಾತುಂ ರುಚ್ಚತಿ ಸಙ್ಘಸ್ಸಾ’’ತಿಆದಿನಾ ಪುಗ್ಗಲಂ ಪರಾಮಸಿತ್ವಾ ಪುಗ್ಗಲವಸೇನೇವ. ಸಙ್ಘವಸೇನಾತಿ ‘‘ಸಙ್ಘೋ ಚೀವರೇನ ಕಿಲಮತೀ’’ತಿಆದಿನಾ ಸಙ್ಘವಸೇನ ನ ಕಾತಬ್ಬನ್ತಿ ಸಮ್ಬನ್ಧೋ. ಏವಂ ಪುಗ್ಗಲವಸೇನ ಅಪಲೋಕನಕಮ್ಮಸ್ಸ ಅಕತ್ತಬ್ಬತಂ ದಸ್ಸೇತ್ವಾ ಇದಾನಿ ವತ್ಥುವಸೇನ ತಸ್ಸೇವ ಅಕತ್ತಬ್ಬತಂ ದಸ್ಸೇನ್ತೋ ಆಹ ‘‘ಜಾತರೂಪರಜತವಸೇನಾಪೀ’’ತಿಆದಿ. ಕಪ್ಪಿಯಭಣ್ಡವಸೇನಾತಿ ಚೀವರತಣ್ಡುಲೇಹಿ ಅವಸೇಸಸ್ಸ ಕಪ್ಪಿಯಭಣ್ಡಸ್ಸ ವಸೇನ. ಚೀವರತಣ್ಡುಲಾನಞ್ಹಿ ವಿಸುಂ ಗಹಿತತ್ತಾ ‘‘ಕಪ್ಪಿಯಭಣ್ಡವಸೇನಾ’’ತಿ ಏತ್ಥ ತೇಹಿ ಅವಸೇಸೋ ಕಪ್ಪಿಯಭಣ್ಡೋವ ಗಹೇತಬ್ಬೋ. ತಂ ಪನಾತಿ ಅಪಲೋಕನಕಮ್ಮಂ ಪನ. ಕತ್ತಬ್ಬಾಕಾರಂ ದಸ್ಸೇನ್ತೋ ಆಹ ‘‘ಇದಾನೀ’’ತಿಆದಿ. ಸುಭಿಕ್ಖನ್ತಿ ಸಮಿದ್ಧಭಿಕ್ಖಂ. ಸುಲಭಪಿಣ್ಡನ್ತಿ ಸುಖೇನ ಲಭಪಿಣ್ಡಂ. ದ್ವೀಹಿ ಪದೇಹಿ ಅಞ್ಞಮಞ್ಞಸ್ಸ ಕಾರಣಂ ದಸ್ಸೇತಿ, ಸುಭಿಕ್ಖತ್ತಾ ಸುಲಭಪಿಣ್ಡಂ, ಸುಲಭಪಿಣ್ಡತ್ತಾ ಸುಭಿಕ್ಖನ್ತಿ ವುತ್ತಂ ಹೋತಿ.

ಏವಂ ಚೀವರಪಚ್ಚಯಂ ಸಲ್ಲಕ್ಖೇತ್ವಾ ಸೇನಾಸನಂ ಸಲ್ಲಕ್ಖೇತಬ್ಬನ್ತಿ ಸಮ್ಬನ್ಧೋ. ಕಾಲೇತಿ ಗಾಹಾಪನಸ್ಸ ಕಾಲೇ. ವುತ್ತನ್ತಿ ಮಹಾಅಟ್ಠಕಥಾಯ ವುತ್ತಂ. ಕಸ್ಮಾ ದ್ವೇ ಸಮ್ಮನ್ನಿತಬ್ಬಾ, ನನು ಏಕಮ್ಪಿ ಸಮ್ಮನ್ನಿತುಂ ವಟ್ಟತೀತಿ ಆಹ ‘‘ಏವಞ್ಹೀ’’ತಿಆದಿ. ತತ್ಥ ಹಿ ಯಸ್ಮಾ ಗಾಹೇಸ್ಸತಿ, ತಸ್ಮಾ ದ್ವೇ ಸಮ್ಮನ್ನಿತಬ್ಬಾತಿ ಯೋಜನಾ. ಏಕೇನ ಹಿ ಸಮ್ಮುತಿಲದ್ಧೇನ ಸಕ್ಕಾ ಪರಂ ಗಾಹಾಪೇತುಂ, ಅತ್ತನಾ ಪನ ಅತ್ತನೋ ಪಾಪೇತುಂ ನ ಸಕ್ಕಾ, ತಸ್ಮಾ ದ್ವೀಸು ಸಮ್ಮತೇಸು ನವಕೋ ವುಡ್ಢಸ್ಸ, ವುಡ್ಢೋ ಚ ನವಕಸ್ಸಾತಿ ಉಭೋ ಅಞ್ಞಮಞ್ಞಂ ಗಾಹೇಸ್ಸನ್ತೀತಿ ಅಧಿಪ್ಪಾಯೋ. ಸಮ್ಮನ್ನಿತಬ್ಬಾತಿ ಏಕತೋ ಸಮ್ಮನ್ನಿತಬ್ಬಾ. ಅಟ್ಠಪಿ ಸೋಳಸಪೀತಿ ಏತ್ಥ ಪಿಸದ್ದೇನ ತತೋ ಅಧಿಕಮ್ಪಿ ಏಕತೋ ಸಮ್ಮನ್ನಿತುಂ ವಟ್ಟತೀತಿ ದೀಪೇತಿ. ಸತ್ತಸತಿಕಕ್ಖನ್ಧಕೇ ಉಬ್ಬಾಹಿಕಸಮ್ಮುತಿಯಂ (ಚೂಳವ. ೪೫೬) ಅಟ್ಠಪಿ ಜನಾ ಏಕತೋವ ಸಮ್ಮತಾತಿ ವಚನಞ್ಚೇತ್ಥ ಸಾಧಕಂ. ನಿಗ್ಗಹಕಮ್ಮಮೇವ ಹಿ ಸಙ್ಘೋ ಸಙ್ಘಸ್ಸ ನ ಕರೋತೀತಿ ದಟ್ಠಬ್ಬಂ. ತೇಸನ್ತಿ ಅಟ್ಠಸೋಳಸಜನಾನಂ, ಸಮ್ಮುತಿ ವಟ್ಟತಿಯೇವಾತಿ ಸಮ್ಬನ್ಧೋ. ಕಿನ್ತಿ ಸಲ್ಲಕ್ಖೇತಬ್ಬನ್ತಿ ಆಹ ‘‘ಚೇತಿಯಘರ’’ನ್ತಿಆದಿ.

ಆಸನಘರನ್ತಿ ಪಟಿಮಾಘರಂ. ಮಗ್ಗಪೋಕ್ಖರಣೀನಂ ಸಮೀಪೇ ಕತಾ ಸಾಲಾಯೋ ಉಪಚಾರವಸೇನ ವುಚ್ಚನ್ತಿ ‘‘ಮಗ್ಗೋ’’ತಿ ಚ ‘‘ಪೋಕ್ಖರಣೀ’’ತಿ ಚ. ತಾ ಹಿ ಸಾಲಾಯೋ ಉಪಚಾರಸೀಮಬ್ಭನ್ತರಗತೇ ಗಾಮಾಭಿಮುಖಮಗ್ಗೇ ಚ ಅನ್ತೋಉಪಚಾರಸೀಮಾಯಂ ಖಣಿತಾ ಯತ್ಥ ಕತ್ಥಚಿ ಪೋಕ್ಖರಣಿಯೋ ಚ ಕರೀಯನ್ತಿ, ಇತಿ ಸಲ್ಲಕ್ಖೇತಬ್ಬನ್ತಿ ಯೋಜನಾ. ಅಸೇನಾಸನಂ ದಸ್ಸೇತ್ವಾ ಸೇನಾಸನಂ ದಸ್ಸೇನ್ತೋ ಆಹ ‘‘ವಿಹಾರೋ’’ತಿಆದಿ. ರುಕ್ಖಮೂಲನ್ತಿ ಛನ್ನಕವಾಟಬದ್ಧರುಕ್ಖಮೂಲಂ. ಏಸೇವ ನಯೋ ವೇಳುಗುಮ್ಬೇಪಿ. ಗಾಹೇನ್ತೇನ ಚ ಗಾಹೇತಬ್ಬಾನೀತಿ ಸಮ್ಬನ್ಧೋ. ಸಙ್ಘಿಕೋತಿ ತತ್ರುಪ್ಪಾದೋ. ತೇಸೂತಿ ದ್ವೀಸು ಚೀವರಪಚ್ಚಯೇಸು. ಯನ್ತಿ ಚೀವರಪಚ್ಚಯಂ. ತಸ್ಸಾತಿ ಚೀವರಪಚ್ಚಯಸ್ಸ. ಠಿತಿಕತೋತಿ ಪಬನ್ಧವಸೇನ ಠಿತಟ್ಠಾನತೋ. ಇತರೋತಿ ಪಠಮಂ ಗಹಿತಚೀವರಪಚ್ಚಯತೋ ಇತರೋ.

ಅಪ್ಪತಾಯಾತಿ ಅಪ್ಪಭಾವತೋ, ಗಾಹಿಯಮಾನೇತಿ ಸಮ್ಬನ್ಧೋ. ಪರಿವೇಣಗ್ಘೇನಾತಿ ಪರಿವೇಣಪರಿಚ್ಛೇದೇನ. ಲಭನ್ತೀತಿ ಪರಿವೇಣಸಾಮಿಕಾ ಭಿಕ್ಖೂ ಲಭನ್ತಿ. ತನ್ತಿ ಪರಿವೇಣಂ. ವಿಜಟೇತ್ವಾತಿ ವಿಜಟಂ ಕತ್ವಾ, ದ್ವೇ ವಾ ತಯೋ ವಾ ಕೋಟ್ಠಾಸೇ ಕತ್ವಾತಿ ಅತ್ಥೋ. ಪಕ್ಖಿಪಿತ್ವಾತಿ ಭಾಗಕೋಟ್ಠಾಸಂ ಪಕ್ಖಿಪಿತ್ವಾ. ನ ಏವಂ ಕಾತಬ್ಬನ್ತಿ ಯಥಾ ಮಹಾಸುಮತ್ಥೇರೋ ಆಹ, ತಥಾ ನ ಕಾತಬ್ಬನ್ತಿ ಅತ್ಥೋ. ಅಕಾತಬ್ಬಕಾರಣಂ ದಸ್ಸೇನ್ತೋ ಆಹ ‘‘ಮನುಸ್ಸಾ ಹೀ’’ತಿಆದಿ. ತತ್ಥಾತಿ ಪರಿವೇಣೇ, ಪವಿಸಿತಬ್ಬಂ ಇತಿ ಆಹಾತಿ ಯೋಜನಾ. ಏತ್ಥಾತಿ ಏತಸ್ಮಿಂ ಗಾಹಣಟ್ಠಾನೇ. ಪಟಿಕ್ಕೋಸತೀತಿ ಪಟಿಸೇಧೇತಿ. ಪಟಿಕ್ಕೋಸನಾಕಾರಂ ದಸ್ಸೇನ್ತೋ ಆಹ ‘‘ಮಾ ಆವುಸೋ’’ತಿಆದಿ. ಇತಿ ವುತ್ತಂ, ಇತಿ ಪಟಿಕ್ಕೋಸತೀತಿ ಯೋಜನಾ. ಏಕೋ ಹಿ ಇತಿಸದ್ದೋ ಲುತ್ತನಿದ್ದಿಟ್ಠೋ. ತಸ್ಸಾತಿ ಮಹಾಥೇರಸ್ಸ. ಸಙ್ಗಹನ್ತಿ ಭಿಕ್ಖೂನಂ ಸಙ್ಗಹಂ. ತನ್ತಿ ಮಹಾಥೇರಂ.

ಏವಂ ವತ್ತಬ್ಬನ್ತಿ ಏವಂ ವಕ್ಖಮಾನನಯೇನ ವತ್ತಬ್ಬಂ. ಪಚ್ಚಯಂ ಧಾರೇಥ, ಇತಿ ವತ್ತಬ್ಬನ್ತಿ ಯೋಜನಾ. ಪಾಪುಣಾತಿ ಆವುಸೋ ಇತಿ ವುತ್ತೇತಿ ಯೋಜನಾ. ‘‘ಗಹಿತಂ ಹೋತೀ’’ತಿ ಇಮಿನಾ ‘‘ಗಣ್ಹಥ, ಗಣ್ಹಾಮೀ’’ತಿ ಪಚ್ಚುಪ್ಪನ್ನಕಾಲವಸೇನ ವುತ್ತತ್ತಾ ಗಹಿತಂ ಹೋತೀತಿ ದಸ್ಸೇತಿ. ಅತೀತಅನಾಗತಕಾಲವಸೇನ ಅಗಹಿತಭಾವಂ ದಸ್ಸೇನ್ತೋ ಆಹ ‘‘ಸಚೇ ಪನಾ’’ತಿಆದಿ. ಸತುಪ್ಪಾದಮತ್ತನ್ತಿ ಗಹಣೇ ಸತಿಯಾ ಉಪ್ಪಾದನಮತ್ತಂ. ಏತ್ಥಾತಿ ಸೇನಾಸನಪಚ್ಚಯಗಹಣಟ್ಠಾನೇ.

ಯೋಪೀತಿ ಯಮ್ಪಿ. ಉಪಯೋಗತ್ಥೇ ಚೇತಂ ಪಚ್ಚತ್ತವಚನಂ, ಯಮ್ಪಿ ಪಚ್ಚಯಂ ವಿಸ್ಸಜ್ಜೇತೀತಿ ಯೋಜನಾ. ಪಚ್ಚಯನ್ತಿ ಚ ಚೀವರಪಚ್ಚಯಂ. ಅಯಮ್ಪೀತಿ ಅಯಮ್ಪಿ ಪಚ್ಚಯೋ. ಪಿಸದ್ದೋ ಮಹಾಲಾಭಪರಿವೇಣೇ ಪಚ್ಚಯಂ ಸಮ್ಪಿಣ್ಡೇತಿ. ತಸ್ಮಿಂಯೇವ ಪರಿವೇಣೇತಿ ತಸ್ಮಿಂ ಪಂಸುಕೂಲಿಕೇನ ಗಹಿತಪರಿವೇಣೇ ಏವ. ಅಞ್ಞಸ್ಸಾತಿ ಪಂಸುಕೂಲಿಕತೋ ಅಞ್ಞಸ್ಸ ಭಿಕ್ಖುಸ್ಸ. ಪಂಸುಕೂಲಿಕೋ ‘‘ಅಹಂ ವಸಾಮೀ’’ತಿ ಸೇನಾಸನಂ ಜಗ್ಗಿಸ್ಸತಿ. ಇತರೋ ‘‘ಅಹಂ ಪಚ್ಚಯಂ ಗಣ್ಹಾಮೀ’’ತಿ ಸೇನಾಸನಂ ಜಗ್ಗಿಸ್ಸತೀತಿ ಯೋಜನಾ. ದ್ವೀಹಿ ಕಾರಣೇಹೀತಿ ವಸನಗಹಣವಸೇನ ದ್ವೀಹಿ ಕಾರಣೇಹಿ. ಪಂಸುಕೂಲಿಕೇ ಗಣ್ಹನ್ತೇತಿ ಸಮ್ಬನ್ಧೋ. ಇಧಾತಿ ಸೇನಾಸನೇ. ತೇನಾತಿ ಪಂಸುಕೂಲಿಕೇನ. ಹೇಟ್ಠಾತಿ ಸೇನಾಸನಸ್ಸ ಹೇಟ್ಠಾ, ಠಿತಂ ಅಞ್ಞಂ ಭಿಕ್ಖುನ್ತಿ ಸಮ್ಬನ್ಧೋ. ತೇನಾತಿ ಪಂಸುಕೂಲಿಕೇನ, ಕಿಞ್ಚಿ ವಚನನ್ತಿ ಸಮ್ಬನ್ಧೋ. ವುತ್ಥವಸ್ಸಸ್ಸ ಪಂಸುಕೂಲಿಕಸ್ಸಾತಿ ಯೋಜನಾ. ವಟ್ಟತೀತಿ ಪಂಸುಕೂಲಿಕಸ್ಸ ವಟ್ಟತಿ. ತಸ್ಮಿಂ ಸೇನಾಸನೇತಿ ಪಂಸುಕೂಲಿಕೇನ ಗಹಿತಸೇನಾಸನೇ. ಯೇಸಂ ಪನಾತಿ ಮನುಸ್ಸಾನಂ ಪನ. ತೇಸನ್ತಿ ಮನುಸ್ಸಾನಂ.

ಥೂಪಂ ಕತ್ವಾತಿ ಚೇತಿಯಂ ಕತ್ವಾ. ತಸ್ಸಾತಿ ಥೂಪಸ್ಸ. ತೇನ ಭಿಕ್ಖುನಾತಿ ವಸ್ಸಾವಾಸಿಕಂ ಗಾಹಕಭಿಕ್ಖುನಾ. ತನ್ತಿ ಭೋಜನಸಾಲಂ. ಗಾಹೇತುಂ ವಟ್ಟತೀತಿ ಸಮ್ಬನ್ಧೋ. ಸಬ್ಬಮಿದನ್ತಿ ಸಬ್ಬಂ ಇದಂ ವಚನಂ.

ಪಾಟಿಪದಅರುಣತೋತಿ ವಸ್ಸೂಪನಾಯಿಕದಿವಸಸಙ್ಖಾತಸ್ಸ ಪಾಟಿಪದಸ್ಸ ಅರುಣುಗ್ಗಮನತೋ. ವಿತಕ್ಕಚಾರಿಕೋತಿ ‘‘ಕತ್ಥ ನು ಖೋ ವಸಿಸ್ಸಾಮೀ’’ತಿಆದಿನಾ ವಿತಕ್ಕೇನ ಚರಣೇ ಅನುಯುತ್ತೋ. ಸೇನಾಸನಂ ಯಾಚತೀತಿ ಸೇನಾಸನಗ್ಗಾಹಾಪಕಂ ಸೇನಾಸನಂ ಯಾಚತಿ. ಗಹಿತನ್ತಿ ಸಙ್ಘೇನ ಗಹಿತಂ. ಯತ್ಥಾತಿ ಠಾನೇ. ವಸ್ಸೂಪಗತೇಹಿ ವತ್ತಬ್ಬಾತಿ ಸಮ್ಬನ್ಧೋ. ಪುನಪ್ಪುನಂ, ಸಮಂ ವಾ ಚೇತಿಯಙ್ಗಣಾದಿಂ ಮುಞ್ಚನ್ತಿ ಸೋಧೇನ್ತಿ ಇಮಾಹೀತಿ ಸಮ್ಮುಞ್ಚನಿಯೋ. ಮುಚಿಧಾತು ಸೋಧನತ್ಥೇ ಯುಪಚ್ಚಯೋ ಕರಣತ್ಥೇ ಹೋತಿ. ತಾಲುಜೋ ಪಠಮಕ್ಖರೋ. ಸುಲಭಾ ಚೇ ದಣ್ಡಕಾ, ಏಕೇಕೇನ ದ್ವೇ ತಿಸ್ಸೋ ಯಟ್ಠಿಸಮ್ಮುಞ್ಚನಿಯೋ ಬನ್ಧಿತಬ್ಬಾ. ಸುಲಭಾ ಚೇ ಸಲಾಕಾ, ಛಪಞ್ಚಮುಟ್ಠಿಸಮ್ಮುಞ್ಚನಿಯೋ ಬನ್ಧಿತಬ್ಬಾತಿ ಅತ್ಥೋ. ಪಞ್ಚ ಪಞ್ಚ ಉಕ್ಕಾತಿ ಅರಞ್ಞವಿಹಾರೇಸು ಪರಿಸ್ಸಯವಿಜಾನನತ್ಥಂ ಪಞ್ಚ ಪಞ್ಚ ಅಗ್ಗಿಉಕ್ಕಾ ಕೋಟ್ಟೇತಬ್ಬಾ ಛಿನ್ದಿತಬ್ಬಾತಿ ಅತ್ಥೋ.

‘‘ನಿಬದ್ಧವತ್ತಂ ಠಪೇತ್ವಾ’’ತಿ ಏತ್ಥ ಅಕತ್ತಬ್ಬವತ್ತಂ ದಸ್ಸೇನ್ತೋ ಆಹ ‘‘ವತ್ತಂ ಕರೋನ್ತೇಹಿ ಚಾ’’ತಿಆದಿ. ತತ್ಥ ವತ್ತಂ ಕರೋನ್ತೇಹಿ ಚ ಏವರೂಪಂ ಅಧಮ್ಮಿಕವತ್ತಂ ನ ಕಾತಬ್ಬನ್ತಿ ಸಮ್ಬನ್ಧೋ. ಹಿ ಸಚ್ಚಂ, ಸಬ್ಬೇವ ಏತೇ ಉದ್ದೇಸಾದಯೋ ಪಪಞ್ಚಾತಿ ಯೋಜನಾ. ಪಪಞ್ಚೇನ್ತಿ ಸಂಸಾರೇ ಚಿರಂ ಠಪೇನ್ತೀತಿ ಪಪಞ್ಚಾ. ಮೂಗಬ್ಬತನ್ತಿ ಮೂಗಾನಂ ವತಂ, ಮೂಗೇಹಿ ಕತ್ತಬ್ಬಂ ವಾ, ಮೂಗೇನ ವಿಯ ವಾ ಅಮೂಗೇಹಿ ಕತ್ತಬ್ಬಂ ವತಂ. ಏವಂ ಅಕಾತಬ್ಬವತ್ತಂ ದಸ್ಸೇತ್ವಾ ಇದಾನಿ ಕಾತಬ್ಬವತ್ತಂ ದಸ್ಸೇನ್ತೋ ಆಹ ‘‘ಪರಿಯತ್ತಿಧಮ್ಮೋ ನಾಮಾ’’ತಿಆದಿ. ತಿವಿಧಮ್ಪೀತಿ ಪರಿಯತ್ತಿಪಟಿಪತ್ತಿಪಟಿವೇಧವಸೇನ ತಿಪ್ಪಕಾರಮ್ಪಿ. ಅವಯವಪರಿಯತ್ತಿಧಮ್ಮೋಪಿ ಅವಯವಿಪರಿಯತ್ತಿಧಮ್ಮಂ, ಅವಯವಿಪರಿಯತ್ತಿಧಮ್ಮೋ ವಾ ಅವಯವಪರಿಯತ್ತಿಧಮ್ಮಂ ಪತಿಟ್ಠಾಪೇತಿ, ತಸ್ಮಾ ಪರಿಯತ್ತಿಧಮ್ಮೋ ಅತ್ತನಾಪಿ ಅತ್ತಾನಂ ಪತಿಟ್ಠಾಪೇಸೀತಿ ವೇದಿತಬ್ಬಂ. ಉದ್ದಿಸಥಾತಿ ಪರಿಯತ್ತಿಂ ಉದ್ದಿಸಥ. ಸೋಧೇತ್ವಾ…ಪೇ… ಉಪಸಮ್ಪಾದೇಥಾತಿ ಏತ್ಥ ಸೋಧನಂ ನಾಮ ಸಬ್ಬೇಸಂ ಆಚಾರಕುಲಪುತ್ತಾನಂ ಉಪಪರಿಕ್ಖನಂ. ಸೋಧೇತ್ವಾ ನಿಸ್ಸಯಂ ದೇಥಾತಿ ಏತ್ಥ ಸೋಧನಂ ನಾಮ ಭಿಕ್ಖುಸಭಾಗತಂ ಉಪಪರಿಕ್ಖನಂ. ಹೀತಿ ಸಚ್ಚಂ. ಕುಲಪುತ್ತೋತಿ ಆಚಾರಕುಲಪುತ್ತೋ. ಯತ್ತಕಾನಿ ಧುತಙ್ಗಾನಿ ಸಮಾದಿಯಿತುಂ ಸಕ್ಕೋಥಾತಿ ಯೋಜನಾ. ಅನ್ತೋವಸ್ಸಂ ನಾಮೇತನ್ತಿ ಭುಮ್ಮತ್ಥೇ ಉಪಯೋಗವಚನಮೇತಂ. ಏತಸ್ಮಿಂ ಅನ್ತೋವಸ್ಸೇತಿ ಹಿ ಅತ್ಥೋ, ಭವಿತಬ್ಬನ್ತಿಆದೀಸು ಸಮ್ಬನ್ಧಿತಬ್ಬಂ. ಸಕಲದಿವಸನ್ತಿ ಸಕಲದಿವಸಮ್ಹಿ, ಅಪ್ಪಮತ್ತೇಹೀತಿ ಸಮ್ಬನ್ಧೋ. ಏಕಚಾರಿಕವತ್ತನ್ತಿ ಏಕಕೇನ ಚರಿತಬ್ಬಂ ವತ್ತಂ. ಭಸ್ಸೇತಿ ವಚನೇ. ದಸವತ್ಥುಕಕಥನ್ತಿ ಅಪ್ಪಿಚ್ಛತಾದಿದಸವತ್ಥುಕ ಕಥಂ.

ವಿಗ್ಗಾಹಿಕಪಿಸುಣಫರುಸವಚನಾನೀತಿ ವಿಗ್ಗಹಂ ಕಲಹಂ ಜನೇತೀತಿ ವಿಗ್ಗಾಹಿಕಂ, ವಿಗ್ಗಾಹಿಕವಚನಞ್ಚ ಪಿಸುಣವಚನಞ್ಚ ಫರುಸವಚನಞ್ಚ ವಿಗ್ಗಾಹಿಕಪಿಸುಣಫರುಸವಚನಾನಿ. ಮನಸಿಕಾರಬಹುಲಾ ವಿಹರಥ ಇತಿ ಓವದಿತಬ್ಬಾತಿ ಯೋಜನಾ. ದನ್ತಕಟ್ಠಖಾದನವತ್ತನ್ತಿ ಹೇಟ್ಠಾ ಅದಿನ್ನಾದಾನವಣ್ಣನಾಯಂ ವುತ್ತಂ ದನ್ತಕಟ್ಠಖಾದನೇ, ದನ್ತಕಟ್ಠಖಾದನಸ್ಸ ವಾ ವತ್ತಂ. ‘‘ಪತ್ತಂ ಥವಿಕಾಯ ಪಕ್ಖಿಪನ್ತೇನ ನ ಕಥೇತಬ್ಬ’’ನ್ತಿ ಇಮಿನಾ ಕಥೇನ್ತೇ ಪಮಾದೇನ ಪತ್ತೋ ಭಿಜ್ಜೇಯ್ಯಾತಿ ಪತ್ತಸ್ಸ ಗುತ್ತತ್ಥಾಯ ಕಥನಂ ನಿವಾರೇತಿ. ಆಚಿಕ್ಖಿತಬ್ಬಾತಿ ಇತಿಸದ್ದೋ ಪರಿಸಮಾಪನತ್ಥೋ.

ಕೋಚಿ ದಾಯಕೋತಿ ಸಮ್ಬನ್ಧೋ. ಆಗನ್ತುಕೋ ಭಿಕ್ಖೂತಿ ಚೀವರಗ್ಗಾಹಿತತೋ ಪಚ್ಛಾ ಆಗತೋ ಆಗನ್ತುಕೋ ಭಿಕ್ಖು. ಸಙ್ಘತ್ಥೇರೋತಿ ಆವಾಸಿಕಸಙ್ಘತ್ಥೇರೋ. ಪಠಮಭಾಗನ್ತಿ ಪುಬ್ಬೇ ಗಾಹಿತಂ ಪಠಮಭಾಗಂ, ಪರಿವತ್ತೇತ್ವಾತಿ ಪುಬ್ಬೇ ಗಾಹಿತಭಾಗೇನ ಪಚ್ಛಾ ದಾತಬ್ಬಂ ವಸ್ಸಾವಾಸಿಕಂ ಪರಿವತ್ತೇತ್ವಾ. ಆಗನ್ತುಕಸ್ಸ ವಸ್ಸಗ್ಗೇನ ಪತ್ತಟ್ಠಾನೇ ಆಗನ್ತುಕಸ್ಸ ದಾತಬ್ಬನ್ತಿ ಯೋಜನಾ. ‘‘ಆಗನ್ತುಕಸ್ಸಾ’’ತಿ ಪದಂ ಪುಬ್ಬಾಪರಂ ಅಪೇಕ್ಖತಿ. ತಸ್ಮಾ ದ್ವಿನ್ನಂ ಪದಾನಂ ಮಜ್ಝೇ ವುತ್ತಂ. ಪಠಮವಸ್ಸೂಪಗತಾತಿ ಪಠಮವಸ್ಸೂಪನಾಯಿಕದಿವಸೇ ವಸ್ಸೂಪಗತಾ. ‘‘ದ್ವೇ ತೀಣಿ ಚತ್ತಾರೀ’’ತಿ ವಚನಸ್ಸ ವಾ ಬಹೂನಂ ಭಿಕ್ಖೂನಂ ವಾ ಬ್ಯಾಪನತ್ಥಾಯ ‘‘ಲದ್ಧಂ ಲದ್ಧ’’ನ್ತಿ ವಿಚ್ಛಾವಸೇನ ವುತ್ತಂ. ತೇನ ಪನಾತಿ ಆಗನ್ತುಕೇನ ಪನ. ಪಠಮವಸ್ಸೂಪಗತೇಹಿ ಅಪ್ಪಕೇ ಲದ್ಧೇ ಪಚ್ಛಿಮವಸ್ಸೂಪನಾಯಿಕದಿವಸೇ ದಾತಬ್ಬಾನಂ ವಸ್ಸಾವಾಸಿಕಾನಂ ಬಹುಕೇಪಿ ಅಯಂ ನಯೋ ಞಾತಬ್ಬೋತಿ ಕತ್ವಾ ನ ವುತ್ತೋ.

ದ್ವೀಸುಪೀತಿ ಪಠಮ ದುತಿಯವಸೇನ ದ್ವೀಸುಪಿ. ವಸ್ಸೂಪಗತಾ ಭಿಕ್ಖೂ ಭಿಕ್ಖಾಯ ಕಿಲಮನ್ತಾ ವದನ್ತೀತಿ ಸಮ್ಬನ್ಧೋ. ಇಧಾತಿ ಠಾನೇ. ವಸನ್ತಾತಿ ಏಕತೋ ವಸನ್ತಾ. ದ್ವೇ ಭಾಗಾ ಹೋಮ ಸಾಧು ವತಾತಿ ಯೋಜನಾ. ಸಾಧು ವತಾತಿ ಏಕಂಸೇನ ಸುನ್ದರಾ ಭವೇಯ್ಯುನ್ತಿ ಅತ್ಥೋ. ಯೇಸನ್ತಿ ಭಿಕ್ಖೂನಂ. ತತ್ಥಾತಿ ಞಾತಿಪವಾರಿತಟ್ಠಾನೇಸು. ಪವಾರಣಾಯಾತಿ ಪವಾರಣಾದಿವಸೇ. ತೇಸೂತಿ ಭಿಕ್ಖೂಸು. ಯೇತಿ ಭಿಕ್ಖೂ. ತತ್ಥಾತಿ ಞಾತಿಪವಾರಿತಟ್ಠಾನೇಸು. ಕಸ್ಮಾ ಅಪಲೋಕೇತ್ವಾ ದಾತಬ್ಬಂ, ನನು ತೇ ಸಾದಿಯನ್ತೀತಿ ಆಹ ‘‘ಸಾದಿ ಯನ್ತಾಪಿ ಹೀ’’ತಿಆದಿ. ತತ್ಥ ಹೀತಿ ಯಸ್ಮಾ. ‘‘ನೇವ ವಸ್ಸಾವಾಸಿಕಸ್ಸ ಸಾಮಿನೋ’’ತಿ ಇಮಿನಾ ತೇಸಂ ವಸ್ಸಚ್ಛಿನ್ನತಂ ದೀಪೇತಿ. ನೇವ ಅದಾತುಂ ಲಭನ್ತೀತಿ ಪಠಮಮೇವ ಕತಿಕವತ್ತಸ್ಸ ಕತತ್ತಾ ಅದಾತುಂ ನೇವ ಲಭನ್ತಿ, ಸಬ್ಬೇಸಂ ನೋ ಅಮ್ಹಾಕನ್ತಿ ಯೋಜನಾ. ಇಧಾತಿ ಠಾನೇ. ತನ್ತಿ ಕತಿಕವತ್ತಂ. ಏಕೋ ಭಿಕ್ಖೂತಿ ಸಮ್ಬನ್ಧೋ. ತೇಸನ್ತಿ ಭಿಕ್ಖೂನಂ. ತತ್ಥಾತಿ ಸಭಾಗಟ್ಠಾನೇ. ವಸಿತ್ವಾ ಆಗತಾನಂ ತೇಸಂ ಭಿಕ್ಖೂನನ್ತಿ ಯೋಜನಾ. ನ ಲಬ್ಭತಿ ಇತಿ ವುತ್ತನ್ತಿ ಯೋಜನಾ. ಇಮೇಸನ್ತಿ ವಸ್ಸಾವಾಸಿಅಪ್ಪತ್ತಕಾನಂ ಏಕಚ್ಚಾನಂ. ಗಾಹಿತಸದಿಸಮೇವಾತಿ ವಸ್ಸಾವಾಸಿಕಸ್ಸ ಗಾಹಿತೇನ ಸದಿಸಮೇವ. ತೇಸಮೇವಾತಿ ಏಕಚ್ಚಾನಮೇವ.

ಪಕ್ಕನ್ತೋಪೀತಿ ಅಞ್ಞಂ ಠಾನಂ ಪಕ್ಕಮನ್ತೋಪಿ. ಹೀತಿ ಸಚ್ಚಂ, ಯಸ್ಮಾ ವಾ. ತೇನ ಭಿಕ್ಖುನಾ ಕತಂ ಪಾನೀಯಉಪಟ್ಠಪನಾದಿಕಮ್ಮಂ ಭತಿನಿವಿಟ್ಠಂ ಭತಿಯಾ ಠಿತನ್ತಿ ಯೋಜನಾ. ಅಪಲೋಕನಕಮ್ಮಂ ಕತ್ವಾ ಗಾಹಿತಂ ಸಙ್ಘಿಕನ್ತಿ ಸಮ್ಬನ್ಧೋ. ಸಙ್ಘಿಕನ್ತಿ ತತ್ರುಪ್ಪಾದಂ ಸನ್ಧಾಯ ವುತ್ತಂ. ವಿಬ್ಭನ್ತೋಪೀತಿ ಪಿಸದ್ದೋ ಪಗೇವ ಛಿನ್ನವಸ್ಸೋತಿ ದಸ್ಸೇತಿ. ಪಚ್ಚಯವಸೇನೇವಾತಿ ಸದ್ಧಾದೇಯ್ಯಪಚ್ಚಯವಸೇನ. ವದನ್ತೀತಿ ಕೇಚಿ ವದನ್ತಿ.

ದಿಸಂಗಮಿಕೋ ಭಿಕ್ಖು ವಿಬ್ಭಮತೀತಿ ಸಮ್ಬನ್ಧೋ. ಮನುಸ್ಸೇತಿ ವಸ್ಸಾವಾಸಿಕದಾಯಕಮನುಸ್ಸೇ. ಸಮ್ಮುಖಾತಿ ಆವಾಸಿಕಸ್ಸ ಸಮ್ಮುಖಾ. ಸಮ್ಪಟಿಚ್ಛಾಪೇತ್ವಾತಿ ‘‘ಸುಟ್ಠು ದಸ್ಸಾಮಾ’’ತಿ ಪಟಿಚ್ಛಾಪೇತ್ವಾ. ಯಸ್ಸ ಗಾಹಿತನ್ತಿ ಯಸ್ಸ ಭಿಕ್ಖುನೋ ಸೇನಾಸನಂ ಗಾಹಿತಂ. ಸೇನಾಸನಸಾಮಿಕಸ್ಸಾತಿ ಸೇನಾಸನದಾಯಕಸ್ಸ ಪುತ್ತಧೀತಾದಯೋತಿ ಸಮ್ಬನ್ಧೋ. ಸೇನಾಸನೇ ದೇಮಾತಿ ಸೇನಾಸನಸ್ಸ ದೇಮ. ತತ್ಥಾತಿ ಸೇನಾಸನೇ. ಏಕಮೇವ ವತ್ಥಂ ದಾತಬ್ಬಂ. ಕಸ್ಮಾ? ಪುಗ್ಗಲಸ್ಸ ಅದತ್ವಾ ಸೇನಾಸನಸ್ಸೇವ ದಾತಬ್ಬತ್ತಾ. ವಸ್ಸಾವಾಸಿಕಟ್ಠಿತಿಕಾಯಾತಿ ವಸ್ಸಾವಾಸಿಕಗಾಹಿತಸ್ಸ ಠಿತಿಕಾಯ. ಏಸೇವ ನಯೋತಿ ಸೇನಾಸನಸ್ಸೇವ ದಿನ್ನತ್ತಾ ಏಸೇವ ನಯೋ. ತಸ್ಸೇವ ಹೋನ್ತೀತಿ ಪುಗ್ಗಲಸ್ಸೇವ ದಿನ್ನತ್ತಾ ತಸ್ಸೇವ ಹೋನ್ತಿ.

ದುತಿಯೋ ಥೇರಾಸನೇ ಗಾಹಿತೋ ಹೋತೀತಿ ಸಮ್ಬನ್ಧೋ. ಪಠಮಭಾಗಸ್ಸ ಸಾಮಣೇರಸ್ಸ ಗಾಹಿತತ್ತಾ ವುತ್ತಂ ‘‘ವರಭಾಗಂ ಸಾಮಣೇರಸ್ಸ ದತ್ವಾ’’ತಿ. ಉಭೋಪೀತಿ ದ್ವೇ ಥೇರಸಾಮಣೇರೇಪಿ. ಸಯಮೇವಾತಿ ದಾಯಕೋ ಸಯಮೇವ. ಯನ್ತಿ ವಸ್ಸಾವಾಸಿಕಂ. ಯಸ್ಸಾತಿ ಥೇರಸ್ಸ ವಾ ಸಾಮಣೇರಸ್ಸ ವಾ.

ಇತೋತಿ ವುತ್ತನಯತೋ. ದಹರಸಾಮಣೇರಸ್ಸಾತಿ ತರುಣಸ್ಸ ಸಾಮಣೇರಸ್ಸ. ಸೋತಿ ಘರಸಾಮಿಕೋ. ನನ್ತಿ ಪತ್ತಜನಂ. ಯಸ್ಸಾತಿ ಭಿಕ್ಖುನೋ. ತೇಸನ್ತಿ ಮನುಸ್ಸಾನಂ. ಯಥಾಭೂತಂ ಆಚಿಕ್ಖಿತಬ್ಬನ್ತಿ ವಿಬ್ಭಮಕಾಲಙ್ಕತಕಾರಣಂ ಯಥಾಭೂತಂ ಆಚಿಕ್ಖಿತಬ್ಬಂ. ಸುದ್ಧಪಂಸುಕೂಲಿಕಾಯೇವಾತಿ ಅಞ್ಞೇಹಿ ಅಮಿಸ್ಸಾ ಸುದ್ಧಾ ಪಂಸುಕೂಲಿಕಾಯೇವಾತಿ. ಇದಂ ನೇವಾಸಿಕವತ್ತನ್ತಿ ನಿಗಮನಂ.

ಉಪನನ್ದವತ್ಥುಕಥಾ

೩೧೯. ಅಯಮತ್ಥೋತಿ ಅಯಂ ವಕ್ಖಮಾನೋ ಅತ್ಥೋ, ಏವಂ ವೇದಿತಬ್ಬೋತಿ ಸಮ್ಬನ್ಧೋ. ತತ್ಥಾತಿ ಗಾಮಕೇ. ತನ್ತಿ ಸೇನಾಸನಂ, ಗಣ್ಹನ್ತೇನೇವಾತಿ ಸಮ್ಬನ್ಧೋ. ಇಧಾತಿ ಸಾವತ್ಥಿಯಂ. ಮುತ್ತನ್ತಿ ತೇ ಸೇನಾಸನಂ ಮುಞ್ಚಿತಂ ಹೋತಿ. ತತ್ರಾಪೀತಿ ಗಾಮಕೇಪಿ. ಉಭಯತ್ಥಾತಿ ಸಾವತ್ಥಿಯಂ, ಗಾಮಕೇ ಚಾತಿ ಉಭಯತ್ಥ.

ಏತ್ಥಾತಿ ಉಪನನ್ದವತ್ಥುಸ್ಮಿಂ. ಕಥನ್ತಿ ಕೇನ ಪಕಾರೇನ ಪಟಿಪ್ಪಸ್ಸಮ್ಭತಿ. ಇಧಾತಿ ಸಾಸನೇ. ಏಕಚ್ಚೋ ಗಣ್ಹಾತೀತಿ ಸಮ್ಬನ್ಧೋ. ತತ್ರಾಪೀತಿ ಸಾಮನ್ತವಿಹಾರೇಪಿ. ತಸ್ಸಾತಿ ಭಿಕ್ಖುಸ್ಸ. ಇಧಾತಿ ಸೇನಾಸನೇ. ಆಲಯಮತ್ತನ್ತಿ ಚಿತ್ತುಪ್ಪಾದಮತ್ತಂ. ಇಚ್ಚಸ್ಸಾತಿ ಇತಿ ಅಸ್ಸ, ಏವಂ ಅಸ್ಸ ಭಿಕ್ಖುಸ್ಸಾತಿ ಅತ್ಥೋ. ಸಬ್ಬತ್ಥಾತಿ ಸಬ್ಬಸ್ಮಿಂ ‘‘ಗಹಣೇನ ಗಹಣ’’ನ್ತಿಆದಿಕೇ ಚತುಕ್ಕೇ. ಯೋ ಪನ ಗಚ್ಛತೀತಿ ಸಮ್ಬನ್ಧೋ. ಉಪಚಾರಸೀಮಾತಿಕ್ಕಮೇತಿ ನಿಮಿತ್ತತ್ಥೇ ಚೇತಂ ಭುಮ್ಮವಚನಂ, ಭಾವೇನ ಭಾವಲಕ್ಖಣೇ ವಾ. ತತ್ಥಾತಿ ಅಞ್ಞಸ್ಮಿಂ ವಿಹಾರೇ ಪಚ್ಚಾಗಚ್ಛತಿ, ವಟ್ಟತಿ, ಸೇನಾಸನಗ್ಗಾಹೋ ನ ಪಟಿಪ್ಪಸ್ಸಮ್ಭತೀತಿ ಅಧಿಪ್ಪಾಯೋ.

೩೨೦. ಯೋತಿ ಭಿಕ್ಖು. ಮಹನ್ತತರೋ ವಾ ದಹರತರೋ ವಾತಿ ಅತ್ತನೋ ಮಹನ್ತತರೋ ವಾ ದಹರತರೋ ವಾ ಹೋತಿ. ಸೋ ಭಿಕ್ಖು ತಿವಸ್ಸನ್ತರೋ ನಾಮಾತಿ ಯೋಜನಾ. ಏಕಸ್ಸ ಭಿಕ್ಖುನೋ ತಿಣ್ಣಂ ವಸ್ಸಾನಮನ್ತರೇ ಠಿತೋ ತಿವಸ್ಸನ್ತರೋ ಅಞ್ಞೋ ಭಿಕ್ಖು. ತತ್ಥಾತಿ ಭಿಕ್ಖೂಸು. ಇಮೇ ಸಬ್ಬೇತಿ ತಿವಸ್ಸನ್ತರದ್ವಿವಸ್ಸನ್ತರಸಮಾನವಸ್ಸಿಕೇ ಇಮೇ ಭಿಕ್ಖೂ, ಲಭನ್ತೀತಿ ಸಮ್ಬನ್ಧೋ. ಯಂ ತಿಣ್ಣಂ ಪಹೋತೀತಿ ಮಞ್ಚಪೀಠವಿನಿಮುತ್ತಂ ಯಂ ಆಸನಂ ತಿಣ್ಣಂ ಸುಖಂ ನಿಸೀದಿತುಂ ಪಹೋತಿ, ತಥಾರೂಪೇ ಆಸನೇಪಿ ದ್ವೇ ದ್ವೇ ಹುತ್ವಾ ನಿಸೀದಿತುಂ ಲಭನ್ತೀತಿ ಯೋಜನಾ. ಅಪಿಸದ್ದೇನ ಮಞ್ಚಪೀಠಾನಿ ಅಪೇಕ್ಖತಿ. ಇದಂ ಪಚ್ಛಿಮದೀಘಾಸನಂ. ಅನುಪಸಮ್ಪನ್ನೇನಾಪೀತಿ ಪಿಸದ್ದೋ ಪಗೇವ ಉಪಸಮ್ಪನ್ನೇನಾತಿ ದಸ್ಸೇತಿ.

ಹತ್ಥಿಕುಮ್ಭೇತಿ ಹತ್ಥಿಸಿರೋಪಿಣ್ಡೇ. ಇಮಿನಾ ಹತ್ಥಿಸದ್ದೇನ ಹತ್ಥಿಕುಮ್ಭೋ ಗಹಿತೋ ಅವಯವೂಪಚಾರೇನ ವಾ ಉತ್ತರಪದಲೋಪೇನ ವಾತಿ ದಸ್ಸೇತಿ. ಹತ್ಥೀ ವಿಯಾತಿ ಹತ್ಥೀ, ಭೂಮಿಭಾಗೋ, ಹತ್ಥಿಮ್ಹಿ ಪತಿಟ್ಠಿತೋ ಪಾದಸಙ್ಖಾತೋ ನಖೋ ಇಮಸ್ಸಾತಿ ಹತ್ಥಿನಖಕೋ, ಪಾಸಾದೋ. ಏತಂ ‘‘ಹತ್ಥಿನಖಕೋ’’ತಿ ನಾಮಂ ಏವಂಕತಸ್ಸ ಪಾಸಾದಸ್ಸ ನಾಮನ್ತಿ ಯೋಜನಾ. ‘‘ಸುವಣ್ಣರಜತಾದಿವಿಚಿತ್ರಾನೀ’’ತಿ ಪದಂ ‘‘ಕವಾಟಾನಿ ಮಞ್ಚಪೀಠಾನಿ ತಾಲವಣ್ಟಾನೀ’’ತಿ ಸಬ್ಬಪದೇಸು ಯೋಜೇತಬ್ಬಂ. ಯಂಕಿಞ್ಚಿ ಚಿತ್ತಕಮ್ಮಕತಂ ಅತ್ಥಿ, ಸಬ್ಬಂ ವಟ್ಟತೀತಿ ಯೋಜನಾ. ಪಾಸಾದಸ್ಸ ದೇಮಾತಿ ಸಮ್ಬನ್ಧೋ. ಪಾಟೇಕ್ಕನ್ತಿ ಪಾಸಾದತೋ ವಿಸುಂ. ಪಟಿಗ್ಗಹಿತಮೇವಾತಿ ಸಬ್ಬಂ ಪಟಿಗ್ಗಹಿತಮೇವ ಹೋತಿ. ಗೋನಕಾದೀನಿ ಅಟ್ಠಾರಸ ಅತ್ಥರಣಾನಿ ಪರಿಭುಞ್ಜಿತುನ್ತಿ ಸಮ್ಬನ್ಧೋ. ಗಿಹಿವಿಕಟನೀಹಾರೇನಾತಿ ಗಿಹೀಹಿ ವಿಸೇಸೇನ ಯಥಾಕಾಮಂ ಕರಿಯತೀತಿ ಗಿಹಿವಿಕಟಂ, ಗಿಹಿಸನ್ತಕಂ. ‘‘ಗಿಹಿವಿಕಟ’’ನ್ತಿ ನೀಹಾರೋ ಅಭಿನೀಹಾರೋ ಗಿಹಿವಿಕಟನೀಹಾರೋ, ತೇನ. ಲಬ್ಭನ್ತೀತಿ ನಿಸೀದಿತುಮೇವ ಲಬ್ಭನ್ತಿ. ತತ್ರಾಪೀತಿ ಧಮ್ಮಾಸನೇಪಿ.

ಅವಿಸ್ಸಜ್ಜಿಯವತ್ಥುಕಥಾ

೩೨೧. ಏತಾನೀತಿ ಗರುಭಣ್ಡಾನಿ. ತತ್ಥಾತಿ ರಾಸಿವಸೇನ ಪಞ್ಚಸು ಸರೂಪವಸೇನ ಪಞ್ಚವೀಸತಿಯಾ ಗರುಭಣ್ಡೇಸು. ಆಗನ್ತ್ವಾ, ಆಭುಸೋ ವಾ ರಮನ್ತಿ ಏತ್ಥಾತಿ ಆರಾಮೋ. ತೇಸಂಯೇವಾತಿ ಪುಪ್ಫಾರಾಮಫಲಾರಾಮಾನಮೇವ. ‘‘ಠಪಿತೋಕಾಸೋ’’ತಿ ಇಮಿನಾ ವತ್ಥುಸದ್ದಸ್ಸ ಭೂಮಿಭೇದತ್ಥಂ ದಸ್ಸೇತಿ. ವಸತಿ ಆರಾಮೋ ಪತಿಟ್ಠಹತಿ ಏತ್ಥಾತಿ ಆರಾಮವತ್ಥು. ತೇಸು ವಾತಿ ಏತ್ಥ ವಾಸದ್ದೇನ ನವಭೂಮಿಭಾಗತೋ ಅಞ್ಞಸ್ಸ ಪೋರಾಣಭೂಮಿಭಾಗಸ್ಸಪಿ ಆರಾಮವತ್ಥುಭಾವಂ ವಿಕಪ್ಪೇತಿ. ವಿಸೇಸೇನ ಚತುಇರಿಯಾಪಥೇ ಹರತಿ ಪವತ್ತೇತಿ ಏತ್ಥಾತಿ ವಿಹಾರೋ. ತಸ್ಸಾತಿ ವಿಹಾರಸ್ಸ. ಚತುನ್ನಂ ಮಞ್ಚಾನನ್ತಿ ನಿದ್ಧಾರಣತ್ಥೇ ಸಾಮಿವಚನಂ. ಅಞ್ಞತರೋ ಮಞ್ಚೋ ನಾಮಾತಿ ಯೋಜನಾ. ಏಸೇವ ನಯೋ ಸೇಸೇಸುಪಿ. ‘‘ಲೋಹೇನ ಕತಾ ಕುಮ್ಭೀ’’ತಿ ಇಮಿನಾ ಲೋಹಕುಮ್ಭೀತಿ ಏತ್ಥ ಮಜ್ಝೇಲೋಪಸಮಾಸಂ ದಸ್ಸೇತಿ. ಲೋಹಮಯಾ ಕುಮ್ಭೀ ಲೋಹಕುಮ್ಭೀತಿ ವಚನತ್ಥೋಪಿ ಯುಜ್ಜತೇವ. ‘‘ಏಸೇವ ನಯೋ’’ತಿ ಇಮಿನಾ ಲೋಹೇನ ಕತಂ ಭಾಣಕಂ, ಲೋಹೇನ ಕತೋ ವಾರಕೋ, ಲೋಹೇನ ಕತಂ ಕಟಾಹನ್ತಿ ಅತ್ಥಂ ಅತಿದಿಸತಿ. ಏತ್ಥಾತಿ ಭಾಣಕವಾರಕಕಟಾಹೇಸು. ಅರಞ್ಜರೋತಿ ಅತಿಮಹನ್ತತ್ತಾ ಅರಂ ಖಿಪ್ಪಂ ಜರತಿ ವಿನಾಸೇತೀತಿ ಅರಞ್ಜರೋ. ಅಥ ವಾ ಜಲಂ ಗಣ್ಹಿತುಂ ಅಲನ್ತಿ ಅರಞ್ಜರೋ ಲಕಾರಾನಂ ರಕಾರೇ ಕತ್ವಾ.

ಗಾಥಾವಸೇನ ನಿಗಮನಂ ದಸ್ಸೇನ್ತೋ ಆಹ ‘‘ಏವ’’ನ್ತಿಆದಿ. ತತ್ಥ ಏವಂ ಪಕಾಸಯೀತಿ ಸಮ್ಬನ್ಧೋ. ದ್ವೇ ಗರುಭಣ್ಡಾನಿ ದ್ವಿಸಙ್ಗಹಾನಿ ಹೋನ್ತಿ, ತತಿಯಂ ಗರುಭಣ್ಡಂ ಚತುಸಙ್ಗಹಂ ಹೋತಿ, ಚತುತ್ಥಂ ಗರುಭಣ್ಡಂ ನವಕೋಟ್ಠಾಸಂ ಹೋತಿ, ಪಞ್ಚಮಂ ಗರುಭಣ್ಡಂ ಅಟ್ಠಭೇದನಂ ಹೋತಿ, ಇತಿ ಇಮಿನಾ ಪಕಾರೇನ ಪಞ್ಚನಿಮ್ಮಲಲೋಚನೋ ನಾಥೋ ಪಞ್ಚಹಿ ರಾಸೀಹಿ ಪಞ್ಚವೀಸವಿಧಂ ಗರುಭಣ್ಡಂ ಪಕಾಸಯೀತಿ ಯೋಜನಾ.

ತತ್ರಾತಿ ಗರುಭಣ್ಡೇ. ಹೀತಿ ವಿತ್ಥಾರೋ. ಸಬ್ಬಮ್ಪಿ ಇದಂ ಗರುಭಣ್ಡಂ ಅವಿಸ್ಸಜ್ಜಿಯನ್ತಿ ವುತ್ತನ್ತಿ ಯೋಜನಾ. ಇಧಾತಿ ಇಮಸ್ಮಿಂ ವತ್ಥುಸ್ಮಿಂ. ಪರಿವಾರೇ ಪನ ಆಗತನ್ತಿ ಸಮ್ಬನ್ಧೋ.

ಪಞ್ಚ ರಾಸಯೋ ಮಹೇಸಿನಾ ವುತ್ತಾತಿ ಯೋಜನಾ. ಏತ್ಥಾತಿ ಪರಿವಾರೇ.

ತತ್ರಾತಿ ‘‘ಪರಿವತ್ತನವಸೇನಾ’’ತಿ ವಚನೇ. ಇದಂ ಗರುಭಣ್ಡಂ ಉಪನೇತುನ್ತಿ ಸಮ್ಬನ್ಧೋ. ನಿಚ್ಚಂ ತಿಟ್ಠನ್ತೀತಿ ಥಾವರಾ, ಠಾಧಾತು ವರಪಚ್ಚಯೋ, ಠಾಕಾರಸ್ಸ ಥಾಕಾರೋ. ಇಮಿನಾ ಆರಾಮಆರಾಮವತ್ಥುವಿಹಾರವಿಹಾರವತ್ಥೂನಿ ಗಹೇತಬ್ಬಾನಿ. ಅವಿಸ್ಸಜ್ಜಿಯಅವೇಭಙ್ಗೀಯತ್ತಾ ಗರು ಅಲಹುಕಂ ಭಣ್ಡಂ ಗರುಭಣ್ಡಂ. ಇಮಿನಾ ಮಞ್ಚಾದೀನಿ ಏಕವೀಸತಿ ಗರುಭಣ್ಡಾನಿ ಗಹೇತಬ್ಬಾನಿ. ಥಾವರೇತಿ ಆಧಾರೇ ಭುಮ್ಮಂ, ಪರಿಯಾಪನ್ನನ್ತಿ ಸಮ್ಬನ್ಧೋ. ಅಥ ವಾ ನಿದ್ಧಾರಣೇ ಭುಮ್ಮಂ, ಥಾವರೇಸೂತಿ ಹಿ ಅತ್ಥೋ, ಖೇತ್ತನ್ತಿಆದೀಸು ಸಮ್ಬನ್ಧಿತಬ್ಬಂ. ಖಿಪತಿ ಪುಬ್ಬಣ್ಣಬೀಜಮೇತ್ಥಾತಿ ಖೇತ್ತಂ. ವಸತಿ ಅಪರಣ್ಣಬೀಜಂ ಪತಿಟ್ಠಾತಿ ಏತ್ಥಾತಿ ವತ್ಥು, ತಲೇ ಭೂಮಿಭಾಗೇ ಏಕತೋ ವಾ ದ್ವೀಹಿ ವಾ ತೀಹಿ ವಾ ಠಾನೇಹಿ ಆವರಣಂ ಕರೀಯತಿ ಏತ್ಥಾತಿ ತಳಾಕೋ, ಸರೋ. ಕಸ್ಸಕಾನಂ ಮತೇನ ಕತ್ತಬ್ಬಾತಿ ಮಾತಿಕಾ. ಆರಾಮೇನ ಪರಿವತ್ತೇತುನ್ತಿ ಸಮ್ಬನ್ಧೋ. ಕಾನಿ ಪರಿವತ್ತೇತುನ್ತಿ ಆಹ ‘‘ಇಮಾನಿ ಚತ್ತಾರಿಪೀ’’ತಿ. ಪಿಸದ್ದೋ ಅವಯವಸಮ್ಪಿಣ್ಡನೋ.

ತತ್ರಾತಿ ‘‘ಪರಿವತ್ತೇತುಂ ವಟ್ಟತೀ’’ತಿ ವಚನೇ. ದೂರೇತಿ ಸಙ್ಘಾರಾಮತೋ ದೂರಟ್ಠಾನೇ. ಯಮ್ಪೀತಿ ನಾಳಿಕೇರಫಲಮ್ಪಿ. ಹರನ್ತೀತಿ ಸಙ್ಘಸ್ಸ ಹರನ್ತಿ. ಅಞ್ಞೇಸನ್ತಿ ಸಙ್ಘತೋ ಅಞ್ಞೇಸಂ ಮನುಸ್ಸಾನನ್ತಿ ಸಮ್ಬನ್ಧೋ. ತೇತಿ ಮನುಸ್ಸಾ. ಸಙ್ಘೇನ ಸಮ್ಪಟಿಚ್ಛಿತಬ್ಬೋತಿ ಸಮ್ಬನ್ಧೋ. ರುಚ್ಚತೀತಿ ಸಙ್ಘಸ್ಸಾರಾಮೇನ ಮನುಸ್ಸಾನಮಾರಾಮಂ, ಮನುಸ್ಸಾನಮಾರಾಮೇನ ವಾ ಸಙ್ಘಸ್ಸಾರಾಮಂ ಪರಿವತ್ತೇತುಂ ರುಚೀಯತಿ ಇಚ್ಛೀಯತಿ. ಭಿಕ್ಖೂನಂ ಆರಾಮೋತಿ ಸಮ್ಬನ್ಧೋ. ಅಯನ್ತಿ ಮನುಸ್ಸಾನಮಾರಾಮೋ. ಖುದ್ದಕೋತಿ ಸಙ್ಘಾರಾಮತೋ ಖುದ್ದಕೋ. ಆಯನ್ತಿ ಅಯತಿ ಆಯಸಾಮಿಕೋ ಧನೇನ ವಡ್ಢಿಂ ಗಚ್ಛತಿ ಅನೇನಾತಿ ಆಯೋ, ತಂ. ಸಮಕಮೇವಾತಿ ಸಮಪ್ಪಮಾಣಮೇವ, ಆಯಂ ಸಚೇ ದೇತೀತಿ ಸಮ್ಬನ್ಧೋ. ಪಮಾಣತ್ಥೇ ಕಪಚ್ಚಯೋ. ಮನುಸ್ಸಾನಂ ರುಕ್ಖಾತಿ ಸಮ್ಬನ್ಧೋ. ಅತಿರೇಕಂ ಸಙ್ಘಸ್ಸ ದೇಮಾತಿ ಸಮ್ಬನ್ಧೋ. ಜಾನಾಪೇತ್ವಾತಿ ‘‘ಸಙ್ಘೇ ದಿನ್ನಂ ಮಹಪ್ಫಲ’’ನ್ತಿ (ಮ. ನಿ. ೩.೩೭೬) ಸಙ್ಘಸ್ಸ ದಿನ್ನದಾನಸ್ಸ ಆನಿಸಂಸಂ ಮನುಸ್ಸಾನಂ ಜಾನಾಪೇತ್ವಾ. ಫಲಧಾರಿನೋ ಹೋನ್ತಿ ನನೂತಿ ಯೋಜನಾ. ಏವನ್ತಿಆದಿ ನಿಗಮನಂ. ಏತೇನೇವ ನಯೇನಾತಿ ಯೇನ ನಯೇನ ಆರಾಮೋ ಆರಾಮೇನ ಪರಿವತ್ತೇತಬ್ಬೋ, ಏತೇನೇವ ನಯೇನ. ಮಹನ್ತೇನ ವಾ ಖುದ್ದಕೇನ ವಾ ಆರಾಮವತ್ಥುನಾ ಚಾತಿ ಯೋಜನಾ. ಆರಾಮ ಆರಾಮವತ್ಥುವಿಹಾರವಿಹಾರವತ್ಥೂನಿ ಪರಿವತ್ತೇತಬ್ಬಾನೀತಿ ಸಮ್ಬನ್ಧೋ.

ಉಭೋಪೀತಿ ಗೇಹಪಾಸಾದವಸೇನ ಉಭೋಪಿ. ತತ್ಥಾತಿ ಗೇಹೇ. ಇದಂ ಪನಾತಿ ಪಾಸಾದಸಙ್ಖಾತಂ ಗೇಹಂ, ಮನುಸ್ಸಾನಂ ಗೇಹನ್ತಿ ಸಮ್ಬನ್ಧೋ. ಮಹಗ್ಘೇನ ವಾ ಅಪ್ಪಗ್ಘೇನ ವಾ ವಿಹಾರವತ್ಥುನಾ ಚಾತಿ ಯೋಜನಾ. ವಿಹಾರವಿಹಾರವತ್ಥುಆರಾಮಆರಾಮವತ್ಥೂನಿ ಪರಿವತ್ತೇತಬ್ಬಾನೀತಿ ಸಮ್ಬನ್ಧೋ. ಏವನ್ತಿಆದಿ ನಿಗಮನಂ.

ಗರುಭಣ್ಡೇನ ಗರುಭಣ್ಡಪರಿವತ್ತನೇ ಏವಂ ವಿನಿಚ್ಛಯೋ ವೇದಿತಬ್ಬೋತಿ ಯೋಜನಾ. ಪಂಸ್ವಾಗಾರಕೇಸೂತಿ ಪಂಸುಕೀಳನತ್ಥಾಯ ಕತೇಸು ಅಗಾರಕೇಸು. ಕಪ್ಪಿಯಮಞ್ಚಾತಿ ಸಙ್ಘಗಣಪುಗ್ಗಲಾನಂ ಕಪ್ಪಿಯಾ ಸುವಣ್ಣರಜತಾದೀಹಿ ಅಕತಾ ಮಞ್ಚಾ. ವಿಹಾರಸ್ಸ ಪನ ಸುವಣ್ಣರಜತಮಯಾದಿಕಾಪಿ ಕಪ್ಪಿಯಾ ಮಞ್ಚಾ ದಾತಬ್ಬಾತಿ ಸಮ್ಬನ್ಧೋ. ಬಹಿಸೀಮಾಯಾತಿ ಉಪಚಾರಸೀಮತೋ ಬಹಿ. ತತ್ಥಾತಿ ಸಙ್ಘತ್ಥೇರಸ್ಸ ವಸನಟ್ಠಾನೇ. ತತ್ಥಾತಿ ತಸ್ಸ ಭಿಕ್ಖುನೋ ವಸನಟ್ಠಾನೇ. ‘‘ಮಹಗ್ಘೇನಾ’’ತಿ ವುತ್ತವಚನಂ ನಿಯಮೇನ್ತೋ ಆಹ ‘‘ಸತಗ್ಘನಕೇನ ವಾ ಸಹಸ್ಸಗ್ಘನಕೇನ ವಾ’’ತಿ. ಮಞ್ಚಸತನ್ತಿ ಮಞ್ಚಬಹುಂ. ಏತೇಸುಪೀತಿ ಪೀಠಭಿಸಿಬಿಬ್ಬೋಹನೇಸುಪಿ. ತತ್ಥಾತಿ ಪೀಠಭಿಸಿಬಿಬ್ಬೋಹನೇಸು. ಕಪ್ಪಿಯಂ ಪೀಠಾದೀತಿ ಸಮ್ಬನ್ಧೋ. ಅಕಪ್ಪಿಯಂ ವಾ ಮಹಗ್ಘಂ ಕಪ್ಪಿಯಂ ವಾತಿ ಕಪ್ಪಿಯೇನ ವಾ ಮಹಗ್ಘಕಪ್ಪಿಯೇನ ವಾ ಪರಿವತ್ತೇತ್ವಾತಿ ಸಮ್ಬನ್ಧೋ. ‘‘ವುತ್ತವತ್ಥೂನೀ’’ತಿ ಪದಂ ‘‘ಪರಿವತ್ತೇತ್ವಾ’’ತಿ ಪದೇ ಅವುತ್ತಕಮ್ಮಂ, ‘‘ಗಹೇತಬ್ಬಾನೀ’’ತಿ ಪದೇ ವುತ್ತಕಮ್ಮಂ, ಪುಬ್ಬಾಪರಾಪೇಕ್ಖಪದಂ.

ಪಸತಮತ್ತಉದಕಗಣ್ಹಕಾನಿಪೀತಿ ಏತ್ಥ ಪಸತೋ ನಾಮ ಕುಞ್ಚಿತಪಾಣಿ. ಸೀಹಳದೀಪೇತಿ ಸೀಹಂ ಲಾತಿ ಗಣ್ಹಾತೀತಿ ಸೀಹಳೋ ಲಕಾರಸ್ಸ ಳಕಾರಂ ಕತ್ವಾ, ಸೀಹಬಾಹುನಾಮಕೋ ರಾಜಾ, ತಸ್ಸ ಪುತ್ತತ್ತಾ ವಿಜಯಕುಮಾರೋಪಿ ಸೀಹಳೋ ನಾಮ, ತೇನ ಆದಿಮ್ಹಿ ನಿವಾಸಭಾವೇನ ಗಹಿತತ್ತಾ ದೀಪೋ ಸೀಹಳದೀಪೋ ನಾಮ, ತಸ್ಮಿಂ. ಪಾದಂ ಗಣ್ಹಾತೀತಿ ಪಾದಗಣ್ಹನೋ, ಸೋಯೇವ ಪಾದಗಣ್ಹನಕೋ. ಪಾದೋ ನಾಮಾತಿ ‘‘ಪಾದಗಣ್ಹನಕೋ’’ತಿ ಏತ್ಥ ಪಾದೋ ನಾಮ. ಯೋ ಲೋಹವಾರಕೋ ಮಗಧನಾಳಿಯಾ ಪಞ್ಚನಾಳಿಮತ್ತಂ ಗಣ್ಹಾತಿ, ಸೋ ಲೋಹವಾರಕೋ ಪಾದೋ ನಾಮಾತಿ ಯೋಜನಾ. ಇಮಿನಾ ಪಮಾಣಸ್ಸ ನಾಮಂ ಪಮಾಣವನ್ತೇ ಉಪಚಾರತೋ ವೋಹಾರನಯಂ ದಸ್ಸೇತಿ. ತತೋತಿ ಪಞ್ಚನಾಳಿಮತ್ತಗಣ್ಹನಕವಾರಕತೋ. ಇಮಾನೀತಿ ಲೋಹಕುಮ್ಭೀಆದೀನಿ.

ಭಿಙ್ಗಾರ …ಪೇ… ಕಟಚ್ಛುಆದೀನೀತಿ ಭಿಙ್ಗಾರೋ ಚ ಪಟಿಗ್ಗಹೋ ಚ ಉಳುಙ್ಕೋ ಚ ದಬ್ಬಿ ಚ ಕಟಚ್ಛು ಚ ಪಾತಿ ಚ ತಟ್ಟಕೋ ಚ ಸರಕೋ ಚ ಸಮುಗ್ಗೋ ಚ ಅಙ್ಗಾರಕಪಲ್ಲೋ ಚ ಧೂಮಕಟಚ್ಛು ಚ ಭಿಙ್ಗಾರ…ಪೇ… ಧೂಮಕಟಚ್ಛುಯೋ, ತಾ ಆದಿ ಯೇಸಂ ತಾನೀತಿ ಭಿಙ್ಗಾರ…ಪೇ… ಕಟಚ್ಛುಆದೀನಿ. ಆದಿಸದ್ದೇನ ಅಞ್ಞಾನಿ ಉಪಕರಣಾನಿ ಗಹೇತಬ್ಬಾನಿ. ಭಾಜನೀಯಾನೀತಿ ಭಾಜೇತಬ್ಬಾನಿ. ಕಂಸಲೋಹಾದೀತಿಆದಿಸದ್ದೇನ ವಟ್ಟಲೋಹಂ ಸಙ್ಗಣ್ಹಾತಿ. ವಟ್ಟಲೋಹಂ ನಾಮ ಪೀತಲೋಹಂ. ಹೀತಿ ಸಚ್ಚಂ, ಯಸ್ಮಾ ವಾ. ಪಾರಿಹಾರಿಯನ್ತಿ ಸಙ್ಘಿಕಪರಿಭೋಗಂ ಪರಿಹರಿತ್ವಾ ಅಪನೇತ್ವಾ ಪುಗ್ಗಲಿಕಪರಿಭೋಗೇನ ಪರಿಭುಞ್ಜನಂ, ‘‘ಅತ್ತಸನ್ತಕ’’ನ್ತಿ ವಾ ಪರಿಗ್ಗಹೇನ ಹರಿತ್ವಾ ಭುಞ್ಜನಂ ನ ವಟ್ಟತಿ. ಗಿಹಿವಿಕಟನೀಹಾರೇನೇವಾತಿ ‘‘ಗಿಹಿವಿಕಟ’’ನ್ತಿ ಅಭಿನೀಹಾರೇನೇವ.

ಅಞ್ಞಸ್ಮಿಮ್ಪಿ ಕಪ್ಪಿಯಲೋಹಭಣ್ಡೇ ಪರಿಯಾಪನ್ನಾ ಅಞ್ಜನೀತಿ ಯೋಜನಾ. ಅಥ ವಾ ಕಪ್ಪಿಯಲೋಹಭಣ್ಡೇತಿ ನಿದ್ಧಾರಣೇ ಭುಮ್ಮಂ, ‘‘ಅಞ್ಜನೀ’’ತಿಆದಿನಾ ಸಮ್ಬನ್ಧಿತಬ್ಬಂ. ಸೂಚೀತಿ ಚೀವರಾದಿಸಿಬ್ಬನಕಾ ಸೂಚಿ. ಪಣ್ಣಸೂಚೀತಿ ಪಣ್ಣೇ ಲಿಖನಾ ಸೂಚಿ. ಅಞ್ಞಮ್ಪೀತಿ ಅಞ್ಜನಿಆದಿತೋ ಅಞ್ಞಮ್ಪಿ. ಧೂಮನೇತ್ತಞ್ಚ ಫಾಲಞ್ಚ ದೀಪರುಕ್ಖೋ ಚ ದೀಪಕಪಲ್ಲಕೋ ಚ ಓಲಮ್ಬಕದೀಪೋ ಚ ಧೂಮನೇತ್ತ…ಪೇ… ಓಲಮ್ಬಕದೀಪಾ. ಇತ್ಥಿಪುರಿಸತಿರಚ್ಛಾನಗತಸಙ್ಖಾತಾನಿ ರೂಪಾನಿ ಏತೇಸು ಅತ್ಥೀತಿ ಇತ್ಥಿಪುರಿಸತಿರಚ್ಛಾನಗತರೂಪಕಾನಿ. ಧೂಮನೇತ್ತ…ಪೇ… ಓಲಮ್ಬಕದೀಪಾ ಚ ತೇ ಇತ್ಥಿಪುರಿಸತಿರಚ್ಛಾನಗತರೂಪಕಾನಿ ಚೇತಿ ಧೂಮನೇತ್ತ…ಪೇ… ರೂಪಕಾನಿ, ವಿಸೇಸನಪರನಿಪಾತೋ. ತಾನಿ ವಾ ಅಞ್ಞಾನಿ ವಾ ಭಿತ್ತಿಚ್ಛದನಕವಾಟಾದೀಸು ಉಪನೇತಬ್ಬಾನಿ ಲೋಹಭಣ್ಡಾನೀತಿ ಸಮ್ಬನ್ಧೋ. ಲೋಹಖಿಲಕನ್ತಿ ಲೋಹಮಯಂ ಆಣಿಂ. ಪರಿಹರಿತ್ವಾತಿ ‘‘ಅತ್ತನೋ ಸನ್ತಕ’’ನ್ತಿ ಪರಿಗ್ಗಹೇನ ಹರಿತ್ವಾ, ಸಙ್ಘಿಕಪರಿಭೋಗಗಿಹಿವಿಕಟಾನಿ ವಾ ಅಪನೇತ್ವಾ. ಖೀರಪಾಸಾಣಮಯಾನೀತಿ ಖೀರವಣ್ಣೇನ ಪಾಸಾಣೇನ ಕತಾನಿ.

ಸುವಣ್ಣಞ್ಚ ರಜತಞ್ಚ ಹಾರಕೂಟಞ್ಚ ಜಾತಿಫಲಿಕಞ್ಚ ಸುವಣ್ಣ…ಪೇ… ಜಾತಿಫಲಿಕಾನಿ, ತೇಹಿ ಕತಾನಿ ಭಾಜನಾನಿ ಸುವಣ್ಣ…ಪೇ… ಭಾಜನಾನಿ. ಸಬ್ಬನ್ತಿ ಸುವಣ್ಣರಜತಾದಿಸಬ್ಬಂ. ವಟ್ಟತೀತಿ ಸಙ್ಘಗಣಪುಗ್ಗಲಾನಂ ವಟ್ಟತಿ.

ವಾಸಿಆದೀಸು ಏವಂ ವಿನಿಚ್ಛಯೋ ವೇದಿತಬ್ಬೋತಿ ಯೋಜನಾ, ನಿದ್ಧಾರಣೇ ವಾ ಭುಮ್ಮಂ. ಯಾಯ ವಾಸಿಯಾ ನ ಸಕ್ಕಾತಿ ಸಮ್ಬನ್ಧೋ. ತತೋತಿ ವಾಸಿತೋ. ಮಹತ್ತರೀಸದ್ದೋ ಮಹನ್ತಪರಿಯಾಯೋ ಅನಿಪ್ಫನ್ನಪಾಟಿಪದಿಕೋ. ಮಹತ್ತರೀ ವಾಸೀತಿ ಸಮ್ಬನ್ಧೋ. ವೇಜ್ಜಾನನ್ತಿ ಭಿಸಕ್ಕಾನಂ. ಸಿರಾವೇಧನಫರಸುಪೀತಿ ಪಿಸದ್ದೇನ ತತೋ ಮಹನ್ತಂ ಪನ ಪಗೇವಾತಿ ದಸ್ಸೇತಿ. ಯಾ ಪನ ಕುಠಾರೀ ಆವುಧಸಙ್ಖೇಪೇನ ಕತಾತಿ ಸಮ್ಬನ್ಧೋ. ಅಥ ವಾ ಆವುಧಸಙ್ಖೇಪೇನ ಕತಾ ಯಾ ಪನ ಕುಠಾರೀ ಅತ್ಥೀತಿ ಯೋಜನಾ. ಅನಾಮಾಸಾತಿ ಅನಾಮಸಿತಬ್ಬಾ, ಅನಾಮಾಸಾರಹಾತಿ ಅತ್ಥೋ. ಚತುರಙ್ಗುಲಮತ್ತೋಪೀತಿ ಪಿಸದ್ದೋ ತತೋ ಅಧಿಕೋ ಪನ ಪಗೇವಾತಿ ದಸ್ಸೇತಿ. ನಿಖಣಿತ್ವಾ ಖಾದತೀತಿ ನಿಖಾದನಂ. ಚತುರಸ್ಸಂ ಮುಖಮೇತಸ್ಸಾತಿ ಚತುರಸ್ಸಮುಖಂ. ದೋಣಿಸದಿಸಂ ಮುಖಮೇತಸ್ಸಾತಿ ದೋಣಿಮುಖಂ. ಸಮ್ಮುಞ್ಚನಿದಣ್ಡವೇಧನಮ್ಪಿ ನಿಖಾದನಂ ದಣ್ಡಬದ್ಧಂ ಹೋತಿ ಚೇತಿ ಯೋಜನಾ. ದಣ್ಡೇನ ಬನ್ಧಿತಬ್ಬನ್ತಿ ದಣ್ಡಬದ್ಧಂ, ದಣ್ಡಂ ಬದ್ಧಮೇತಸ್ಸಾತಿ ವಾ ದಣ್ಡಬದ್ಧಂ. ‘‘ಅದಣ್ಡಕ’’ನ್ತಿ ವತ್ವಾ ತಸ್ಸೇವತ್ಥಂ ದಸ್ಸೇತುಂ ವುತ್ತಂ ‘‘ಫಲಮತ್ತಮೇವಾ’’ತಿ. ನತ್ಥಿ ದಣ್ಡಮೇತಸ್ಸಾತಿ ಅದಣ್ಡಕಂ. ಯನ್ತಿ ನಿಖಾದನಂ. ಪರಿಹರಿತುನ್ತಿ ಪುಗ್ಗಲಿಕಭಾವೇನ ಪರಿಗ್ಗಹೇತ್ವಾ ಹರಿತುಂ, ಸಙ್ಘಿಕಭಾವಂ ಅಪನೇತುಂ ವಾ. ಸಿಖರಮ್ಪಿ ನಿಖಾದನೇನೇವ ಸಙ್ಗಹಿತಂ ಲಕ್ಖಣಹಾರನಯೇನ ಸಮಾನಕಿಚ್ಚಭಾವತೋ. ಸಿಖರನ್ತಿ ಯೇನ ಪರಿಬ್ಭಮಿತ್ವಾ ಛಿನ್ದನ್ತಿ, ಯೇಹಿ ಮನುಸ್ಸೇಹಿ ದಿನ್ನಾನೀತಿ ಸಮ್ಬನ್ಧೋ. ತೇತಿ ಮನುಸ್ಸಾ, ವದನ್ತೀತಿ ಸಮ್ಬನ್ಧೋ. ನೋತಿ ಅಮ್ಹಾಕಂ. ಪಾಕತಿಕೇತಿ ಪಕತಿಯಾ ಠಿತೇ, ಯಥಾ ಪಠಮಂ ಠಿತಾ ಹೋನ್ತಿ, ತಥಾ ಕರಿಸ್ಸಾಮಾತಿ ಅತ್ಥೋ. ಸಚೇ ಆಹರನ್ತೀತಿ ಸಚೇ ಆಯಾಚನಂ ಅಕತ್ವಾ ಹರನ್ತಿ. ಅನಾಹರನ್ತಾಪೀತಿ ಪುನ ಅನಾಹರನ್ತಾಪಿ.

ಕಮ್ಮಾರೋ ಚ ತಟ್ಟಕಾರೋ ಚ ಚುನ್ದಕಾರೋ ಚ ನಳಕಾರೋ ಚ ಮಣಿಕಾರೋ ಚ ಪತ್ತಬನ್ಧಕೋ ಚ ಕಮ್ಮಾರ…ಪೇ… ಪತ್ತಬನ್ಧಕಾ, ತೇಸಂ. ಅಧಿಕರಣೀ ಚ ಮುಟ್ಠಿಕೋ ಚ ಸಣ್ಡಾಸೋ ಚ ತುಲಾ ಚ ಅಧಿಕರಣಿ…ಪೇ… ತುಲಾ. ಸಙ್ಘೇ ದಿನ್ನಕಾಲತೋತಿ ಸಙ್ಘಸ್ಸ ದಿನ್ನಕಾಲತೋ. ತಿಪುಂ ಛಿನ್ದತಿ ಅನೇನಾತಿ ತಿಪುಚ್ಛೇದನಂ, ತಮೇವ ಸತ್ಥಕಂ ತಿಪುಚ್ಛೇದನಸತ್ಥಕಂ. ಮಹಾಕತ್ತರಿಞ್ಚ ಮಹಾಸಣ್ಡಾಸಞ್ಚ ಮಹಾಪಿಪ್ಫಿಲಿಕಞ್ಚ ಠಪೇತ್ವಾತಿ ಯೋಜನಾ. ಕಸ್ಮಾ ಠಪಿತಾನೀತಿ ಆಹ ‘‘ಮಹಾಕತ್ತರಿಆದೀನಿ ಗರುಭಣ್ಡಾನೀ’’ತಿ. ತತ್ಥ ಯಸ್ಮಾ ಮಹಾಕತ್ತರಿಆದೀನಿ ಗರುಭಣ್ಡಾನಿ, ತಸ್ಮಾ ‘‘ಠಪೇತ್ವಾ ಮಹಾಕತ್ತರಿ’’ನ್ತಿ ಆದಿ ಮಯಾ ವುತ್ತನ್ತಿ ಯೋಜನಾ.

ವಲ್ಲಿಆದೀಸು ಏವಂ ವಿನಿಚ್ಛಯೋ ವೇದಿತಬ್ಬೋತಿ ಯೋಜನಾ. ವೇತ್ತವಲ್ಲಿಆದಿಕಾತಿ ವೇತ್ತಸಙ್ಖಾತವಲ್ಲಿಆದಿಕಾ. ಅಡ್ಢಬಹುಪ್ಪಮಾಣಾತಿ ಏತ್ಥ –

‘‘ಬ್ಯಾಮೋ ಸಹಕರಾ ಬಾಹು, ದ್ವೇಪಸ್ಸದ್ವಯವಿತ್ಥತಾ’’ತಿ. –

ಅಭಿಧಾನೇ (ಅಭಿಧಾನಪ್ಪದೀಪಿಕಾಯಂ ೨೬೯ ಗಾಥಾಯಂ) ವುತ್ತತ್ತಾ ಬಾಹು ನಾಮ ಇಧ ಬ್ಯಾಮೋವ ಅಧಿಪ್ಪೇತೋ. ತಸ್ಮಾ ದ್ವೀಸು ಪಸ್ಸೇಸು ವಿತ್ಥತಾನಂ ಬ್ಯಾಮಸಙ್ಖಾತಾನಂ ಸಹಕರಾನಂ ದ್ವಿನ್ನಂ ಬಾಹೂನಂ ಅಡ್ಢೋತಿ ಅಡ್ಢಬಾಹು, ತಸ್ಸ ಪಮಾಣಮೇತಸ್ಸಾತಿ ಅಡ್ಢಬಾಹುಪ್ಪಮಾಣಾತಿ ವಚನತ್ಥೋ ಕಾತಬ್ಬೋ, ದೀಘತೋ ದ್ವಿಹತ್ಥಾ ವಲ್ಲೀತಿ ವುತ್ತಂ ಹೋತಿ. ತತ್ಥಜಾತಕಾತಿ ತಿಸ್ಸಂ ಸಙ್ಘಸ್ಸ ಭೂಮಿಯಂ ಜಾತಕಾ. ರಕ್ಖಿತಗೋಪಿತಾತಿ ಸಙ್ಘೇನ ಸಯಂ ರಕ್ಖಿತಾ, ಪರೇಹಿ ಗೋಪಿತಾ. ಇಮಿನಾ ಅರಕ್ಖಿತಅಗೋಪಿತಾ ಗರುಭಣ್ಡಂ ನ ಹೋತೀತಿ ದಸ್ಸೇತಿ. ಸಾತಿ ವಲ್ಲಿ. ಅತಿರೇಕಾ ಹೋತೀತಿ ಸಮ್ಬನ್ಧೋ. ಉಪನೇತುನ್ತಿ ತಂ ವಲ್ಲಿಂ ಉಪನೇತುಂ. ಸುತ್ತಞ್ಚ ಮಕಚಿವಾಕಞ್ಚ ನಾಳಿಕೇರಹೀರಞ್ಚ ಚಮ್ಮಞ್ಚ ಸುತ್ತ…ಪೇ… ಚಮ್ಮಾನಿ, ತೇಹಿ ಕತಾ ಸುತ್ತ…ಪೇ… ಚಮ್ಮಮಯಾ. ರಜ್ಜುಕಾ ವಾ ಯೋತ್ತಾನಿ ವಾ ಗರುಭಣ್ಡಂ ಹೋತೀತಿ ಸಮ್ಬನ್ಧೋ. ಏಕವಟ್ಟಾ ವಾ ದ್ವಿವಟ್ಟಾ ವಾತಿ ಏತ್ಥ ವಾಸದ್ದೇನ ತಿವಟ್ಟಾದಿಂ ಸಙ್ಗಣ್ಹಾತಿ. ಅವಟ್ಟೇತ್ವಾ ದಿನ್ನಂ ಸುತ್ತಞ್ಚ ಅವಟ್ಟೇತ್ವಾ ದಿನ್ನಾ ಮಕಚಿವಾಕನಾಳಿಕೇರಹೀರಾ ಚಾತಿ ಯೋಜನಾ.

ಯೋ ಕೋಚಿ ವೇಳೂತಿ ಸಮ್ಬನ್ಧೋ. ಸೋಪೀತಿ ವೇಳುಪಿ ವಟ್ಟತೀತಿ ಸಮ್ಬನ್ಧೋ. ಪಿಸದ್ದೇನ ವಲ್ಲಿಂ ಅಪೇಕ್ಖತಿ. ಇದಮೇತ್ಥಾತಿ ಇದಂ ಸಬ್ಬಂ ಏತ್ಥ ವೇಳುಮ್ಹಿ, ವೇಳೂಸು ವಾ ಇದನ್ತಿ ಸಮ್ಬನ್ಧೋ. ಸಮಕಂ ವಾತಿ ಗಹಿತವೇಳುನಾ ಸಮಪ್ಪಮಾಣಂ ವಾ. ಅತಿರೇಕಂ ವಾತಿ ತತೋ ಅತಿರೇಕಂ ವಾ. ತಂಅಗ್ಘನಕನ್ತಿ ತಸ್ಸ ವೇಳುನೋ ಅಗ್ಘನಾರಹಂ. ಫಾತಿಕಮ್ಮನ್ತಿ ವಡ್ಢಿಕಮ್ಮಂ. ತತ್ಥೇವಾತಿ ಗಣ್ಹನಟ್ಠಾನೇವ. ಗಮನಕಾಲೇತಿ ಗಣ್ಹನಟ್ಠಾನತೋ ಅಞ್ಞತ್ಥ ಗಮನಕಾಲೇ. ‘‘ಪಹಿಣಿತ್ವಾ ದಾತಬ್ಬೋ’’ತಿ ಇಮಿನಾ ಸಯಂ ವಾ ಆಗನ್ತ್ವಾ ದಾತಬ್ಬೋತಿ ಅತ್ಥೋಪಿ ಲಕ್ಖಣಹಾರನಯೇನ ಗಹೇತಬ್ಬೋ ಸಮಾನಕಿಚ್ಚತ್ತಾ.

ಮುಞ್ಜಪಬ್ಬಜಸದ್ದೇನ ಮುಞ್ಜಪಬ್ಬಜತಿಣಾನಂ ಪಾಳಿಯಂ ವಿಸುಂ ಗಹಿತತ್ತಾ ತಿಣಸದ್ದೇನ ತಾನಿ ಠಪೇತ್ವಾ ಪಾರಿಸೇಸಞಾಯೇನ ಅವಸೇಸತಿಣಮೇವ ಗಹೇತಬ್ಬನ್ತಿ ದಸ್ಸೇನ್ತೋ ಆಹ ‘‘ಮುಞ್ಜಂ ಪಬ್ಬಜಞ್ಚ ಠಪೇತ್ವಾ’’ತಿಆದಿ. ಸಮಾನಫಲತ್ತಾ ಲಕ್ಖಣಹಾರನಯೇನ ಪಣ್ಣಮ್ಪಿ ತಿಣೇನೇವ ಸಙ್ಗಹಿತನ್ತಿ ದಸ್ಸೇನ್ತೋ ಆಹ ‘‘ಯತ್ಥಾ’’ತಿಆದಿ. ತತ್ಥ ಯತ್ಥಾತಿ ಯಸ್ಮಿಂ ಠಾನೇ, ಇತೀತಿ ಏವಂ. ತಿಣಞ್ಚ ಗರುಭಣ್ಡಂ ಹೋತೀತಿ ಸಮ್ಬನ್ಧೋ. ತತ್ಥಜಾತಕಂ ವಾತಿ ತಸ್ಮಿಂ ಸಙ್ಘಾರಾಮೇ ಜಾತಕಂ ವಾ. ಬಹಾರಾಮೇತಿ ಸಙ್ಘಾರಾಮತೋ ಬಹಿ. ತಮ್ಪೀತಿ ತಿಣಮ್ಪಿ. ಪಿಸದ್ದೇನ ವಲ್ಲಿವೇಳೂ ಅಪೇಕ್ಖತಿ. ಅಟ್ಠಙ್ಗುಲಪ್ಪಮಾಣೋಪೀತಿ ದೀಘತೋ ಅಟ್ಠಙ್ಗುಲಪಮಾಣೋಪಿ. ರಿತ್ತಪೋತ್ಥಕೋತಿ ಅಲಿಖಿತತ್ತಾ ತುಚ್ಛೋ ಮಕಚಿವತ್ಥಾದಿಕೋಪಿ ಪಣ್ಣಮಯೋಪಿ ಪೋತ್ಥಕೋ. ಇದಞ್ಚ ಪಣ್ಣಪಸಙ್ಗೇನ ವುತ್ತಂ.

ಪಞ್ಚವಣ್ಣಾ ವಾತಿ ನೀಲಪೀತಲೋಹಿತೋದಾತಮಞ್ಜಿಟ್ಠವಸೇನ ಪಞ್ಚವಣ್ಣನಾ ವಾ. ತಮ್ಪೀತಿ ಮತ್ತಿಕಮ್ಪಿ. ಪಿಸದ್ದೇನ ವಲ್ಲಿವೇಳುತಿಣಾನಿ ಅಪೇಕ್ಖತಿ.

ದಾರುಭಣ್ಡೇ ಏವಂ ವಿನಿಚ್ಛಯೋ ವೇದಿತಬ್ಬೋತಿ ಯೋಜನಾ. ರಕ್ಖಿತಗೋಪಿತೋ ಯೋ ಕೋಚಿ ದಾರುಭಣ್ಡಕೋ ಅತ್ಥೀತಿ ಯೋಜನಾ. ಮಹಾಅಟ್ಠಕಥಾಯಂ ಪನ ವುತ್ತೋತಿ ಸಮ್ಬನ್ಧೋ.

ತತ್ರಾತಿ ಮಹಾಅಟ್ಠಕಥಾಯಂ, ‘‘ತೇನ ಖೋ ಪನ ಸಮಯೇನಾ’’ತಿ ಪಾಳಿಯಂ ವಾ. ಇಮೇಸೂತಿ ಆಸನ್ದಿಕಾದೀಸು. ಏತ್ಥಾತಿ ಪೀಠೇಸು, ಪಲಾಲಪೀಠೇನಾತಿ ಸಮ್ಬನ್ಧೋ. ಬ್ಯಗ್ಘಚಮ್ಮಓನದ್ಧನ್ತಿ ಬ್ಯಗ್ಘಚಮ್ಮೇನ ಅವನದ್ಧಂ. ವಾಳರೂಪಪರಿಕ್ಖಿತ್ತನ್ತಿ ವಾಳರೂಪೇಹಿ ಪರಿವಾರಿತಂ. ರತನಪರಿಸಿಬ್ಬಿತನ್ತಿ ರತನಸುತ್ತೇನ ಸಮನ್ತತೋ ಸಿಬ್ಬಿತಂ.

ಏತೇಸುಪೀತಿ ವಙ್ಕಫಲಕಾದೀಸುಪಿ. ‘‘ಸಙ್ಖಥಾಲಕಂ ಪನ ಭಾಜನೀಯ’’ನ್ತಿ ಪಾಠಸ್ಸಾನನ್ತರಂ ‘‘ತಥಾ’’ತಿ ಪಾಠೋ ಅತ್ಥಿ, ಸೋ ಏತ್ಥ ನ ಯುಜ್ಜತಿ, ಪರತೋ ಪನ ‘‘ಯೇನ ಕೇನಚಿ ಕತಂ ಗರುಭಣ್ಡಮೇವಾ’’ತಿ ಪಾಠಸ್ಸಾನನ್ತರಂ ಯುಜ್ಜತಿ. ತತ್ಥ ಹಿ ಯಥಾ ಯೇನ ಕೇನಚಿ ಕತಂ ಗರುಭಣ್ಡಮೇವ ಹೋತಿ, ತಥಾ ಥಮ್ಭತುಲಾಸೋಪಾನಫಲಕಾದೀಸು ದಾರುಮಯಂ ವಾ ಪಾಸಾಣಮಯಂ ವಾ ಯಂಕಿಞ್ಚಿ ಗೇಹಸಮ್ಭಾರರೂಪಂ ಗರುಭಣ್ಡಮೇವಾತಿ ಅತ್ಥೋ.

ಸಬ್ಬನ್ತಿ ಸಕಲಂ ಉದಕತುಮ್ಬಪಾದಕಥಲಿಕಮಣ್ಡಲಂ. ಏತೇಸುಪೀತಿ ಆಧಾರಕಾದೀಸುಪಿ. ತಥಾ ಥಮ್ಭತಲಾತಿ ಏತ್ಥ ತಥಾಸದ್ದೇನ ‘ಗರುಭಣ್ಡಮೇವಾ’’ತಿ ಪದಂ ಅತಿದಿಸತಿ. ಸಙ್ಘೇ ದಿನ್ನನ್ತಿ ಸಙ್ಘಸ್ಸ ದಿನ್ನಂ. ಭೂಮತ್ಥರಣನ್ತಿ ಭೂಮಿಯಂ ಅತ್ಥರಿತಬ್ಬಂ. ತಮ್ಪೀತಿ ಏಳಕಚಮ್ಮಮ್ಪಿ.

ಉದುಕ್ಖಲಂ ಗರುಭಣ್ಡಮೇವಾತಿ ಸಮ್ಬನ್ಧೋ. ಏಸೇವ ನಯೋ ಮುಸಲನ್ತಿಆದೀಸುಪಿ. ಏತೇಸೂತಿ ಮಞ್ಚಪಾದಾದೀಸು. ಅನುಞ್ಞಾತವಾಸಿಯಾತಿ ಭಾಜನತ್ಥಾಯ ಅನುಞ್ಞಾತವಾಸಿಯಾ. ಧಮಕರಣೋತಿ ಏತ್ಥ ‘‘ಸಙ್ಖಂ ಧಮತಿ, ಸಙ್ಖಧಮಕೋ’’ತಿಆದೀಸು ವಿಯ ನಿಸ್ಸಂಯೋಗಪಾಠೋಯೇವ ಯುಜ್ಜತಿ. ತಸ್ಮಾ ಧಮತಿ ವಾತೇನ ಪವತ್ತತೀತಿ ಧಮೋ, ವಾತಹೇತುಕೋ ಸದ್ದೋ, ಧಮಂ ಕರೋತೀತಿ ಧಮಕರಣೋತಿ ವಚನತ್ಥೋ ಕಾತಬ್ಬೋ. ಸಬ್ಬಮೇತನ್ತಿ ಅನುಞ್ಞಾತವಾಸಿದಣ್ಡಾದಿಕಂ ಏತಂ ಸಬ್ಬಂ. ತತೋತಿ ಅನುಞ್ಞಾತವಾಸಿದಣ್ಡಾದಿಕತೋ, ಮಹನ್ತತರಂ ವಾಸಿದಣ್ಡಾದಿಕಂ ಗರುಭಣ್ಡನ್ತಿ ಯೋಜನಾ.

ಯಥಾಜಾತಮೇವಾತಿ ಯಥಾಪವತ್ತಮೇವ. ತೇಹೀತಿ ಹತ್ಥಿದನ್ತಾದೀಹಿ, ‘‘ಕತ’’ಇತಿ ಪದೇನ ಸಮ್ಬನ್ಧಿತಬ್ಬಂ. ತಚ್ಛಿತನಿಟ್ಠಿತೋಪೀತಿ ತಚ್ಛಿತಕಮ್ಮೇನ ನಿಟ್ಠಿತೋಪಿ.

ಮತ್ತಿಕಾಭಣ್ಡೇ ಏವಂ ವಿನಿಚ್ಛಯೋ ವೇದಿತಬ್ಬೋತಿ ಯೋಜನಾ, ಉಪಭೋಗೋ ಚ ಪರಿಭೋಗೋ ಚ ಉಪಭೋಗಪರಿಭೋಗಂ, ಸಮಾಹಾರದ್ವನ್ದೋ. ಇದಂ ಪದಂ ‘‘ಘಟಪಿಧಾನಾದಿಕುಲಾಲಭಾಜನ’’ನ್ತಿ ಪದೇನೇವ ಸಮ್ಬನ್ಧಿತಬ್ಬಂ. ಥುಪಿಕಾತೀತಿ ಏತ್ಥ ಇತಿಸದ್ದೋ ಇಮಸದ್ದತ್ಥೋ. ಇದಂ ಸಬ್ಬಂ ಸಙ್ಘಸ್ಸ ದಿನ್ನಕಾಲತೋ ಪಟ್ಠಾಯ ಗರುಭಣ್ಡನ್ತಿ ಯೋಜನಾ. ‘‘ಅನತಿರಿತ್ತಪಮಾಣೋ’’ತಿ ವಿಸೇಸನಪದಂ ‘‘ಘಟಕೋ’’ತಿ ವಿಸೇಸ್ಯಪದೇನೇವ ಸಮ್ಬನ್ಧಿತಬ್ಬಂ. ಏತ್ಥಾತಿ ಮತ್ತಿಕಾಭಣ್ಡೇ, ಆಧಾರೇ ವಾ ನಿದ್ಧಾರಣೇ ವಾ ತ್ಥ ಪಚ್ಚಯೋ. ಮತ್ತಿಕಾಭಣ್ಡೇ ಕುಣ್ಡಿಕಾ ಭಾಜನೀಯಕೋಟ್ಠಾಸಂ ಭಜತಿ, ಏವಂ ಲೋಹಭಣ್ಡೇಪೀತಿ ಯೋಜನಾ. ಏತ್ಥಾತಿ ಗರುಭಣ್ಡವಿನಿಚ್ಛಯೇ.

ನವಕಮ್ಮದಾನಕಥಾ

೩೨೩. ಭಣ್ಡಿಕಾಟ್ಠಪನಮತ್ತೇನಾತಿ ಏತ್ಥ ಭಣ್ಡಿಕಾಟ್ಠಪನಂ ನಾಮ ಭಣ್ಡಿಕಯೋಜನನ್ತಿ ಆಹ ‘‘ಕಪೋತಭಣ್ಡಿಕಯೋಜನಮತ್ತೇನಾ’’ತಿ. ಅಸ್ಸಾತಿ ಭಿಕ್ಖುಸ್ಸ. ಚಿತಕಧೂಮೋತಿ ಚಿತಕೇ ಉಟ್ಠಿತೋ ಧೂಮೋ. ಏತಸ್ಸೇವಾತಿ ಭಿಕ್ಖುಸ್ಸ ಏವ ವಿಹಾರೋತಿ ಸಮ್ಬನ್ಧೋ. ಧೂಮಕಾಲೇತಿ ಧೂಮಸ್ಸ ಉಟ್ಠಿತಕಾಲೇ. ‘‘ಅಪಲೋಕೇತ್ವಾ’’ತಿ ಇಮಿನಾ ಧೂಮಕಾಲೇ ಅಪಲೋಕಿತಂ ಧೂಮಕಾಲಿಕಂ. ಧೂಮಕಾಲಿಕಂ ಹುತ್ವಾತಿ ಅತ್ಥಯೋಜನಂ ಕತ್ವಾ ಪಾಳಿಯಂ ‘‘ಪರಿಯೋಸಿತವಿಹಾರ’’ನ್ತಿ ಪದೇನ ಸಮ್ಬನ್ಧಿತಬ್ಬಭಾವಂ ದಸ್ಸೇತಿ. ಕತಪರಿಯೋಸಿತವಿಹಾರನ್ತಿ ಕತಪರಿಯೋಸಿತೋ ವಿಹಾರೋ ಇಮಸ್ಸ ನವಕಮ್ಮಸ್ಸಾತಿ ಕತಪರಿಯೋಸಿತವಿಹಾರಂ. ಇದಂ ನವಕಮ್ಮಂ ದೇನ್ತೀತಿ ಸಮ್ಬನ್ಧೋ. ಯಾವ ಗೋಪಾನಸಿಯೋ ನ ಆರೋಹನ್ತಿ, ತಾವ ವಿಪ್ಪಕತೋ ನಾಮಾತಿ ಯೋಜನಾ. ತತೋತಿ ಗೋಪಾನಸಿಆರೋಹನತೋ. ಕಞ್ಚಿದೇವ ಸಮಾದಪೇತ್ವಾ ಕಾರೇಸ್ಸತೀತಿ ವಿಹಾರಸಾಮಿಕೋಯೇವ ಕಞ್ಚಿ ಭಿಕ್ಖುಂಸಮಾದಪೇತ್ವಾ ಕಾರೇಸ್ಸತಿ. ಪಞ್ಚಹತ್ಥೇ ವಿಹಾರೇತಿ ಸಮ್ಬನ್ಧೋ. ಛವಸ್ಸಿಕಂ ನವಕಮ್ಮನ್ತಿ ಸಮ್ಬನ್ಧೋ. ಏತ್ಥಾತಿ ಅಡ್ಢಯೋಗೇ. ಸೋತಿ ಅಡ್ಢಯೋಗೋ. ಮಹಲ್ಲಕಂ ನಿಯಾಮೇತ್ವಾ ದಸ್ಸೇನ್ತೋ ಆಹ ‘‘ದಸಹತ್ಥೇ ಏಕಾದಸಹತ್ಥೇ’’ತಿ. ದಸವಸ್ಸಿಕಂ ವಾ ಏಕಾದಸವಸ್ಸಿಕಂ ವಾ ನವಕಮ್ಮನ್ತಿ ಸಮ್ಬನ್ಧೋ. ತತೋತಿ ದ್ವಾದಸಹತ್ಥತೋ. ಲೋಹಪಾಸಾದಸದಿಸೇಪಿ ಪಾಸಾದೇತಿ ಸಮ್ಬನ್ಧೋ. ತತೋತಿ ದ್ವಾದಸವಸ್ಸಿಕನವಕಮ್ಮತೋ.

ನವಕಮ್ಮಿಕೋತಿ ನವಕಮ್ಮೇ ಯುತ್ತಪಯುತ್ತೋ. ಉತುಕಾಲೇತಿ ಹೇಮನ್ತಗಿಮ್ಹಕಾಲೇ. ಪಟಿಬಾಹಿತುನ್ತಿ ಅಞ್ಞೇಸಂ ಸಮ್ಪತ್ತಭಿಕ್ಖೂನಂ ಪಟಿಸೇಧೇತುಂ. ಆವಾಸಸಾಮಿಕಸ್ಸಾತಿ ಆವಾಸದಾಯಕಸ್ಸ. ತಸ್ಸಾತಿ ಆವಾಸಸಾಮಿಕಸ್ಸ. ವಂಸೇತಿ ಅನ್ವಯೇ. ತೇತಿ ತವ. ಸೋತಿ ಆವಾಸಸಾಮಿಆದಿಕೋ. ಭಿಕ್ಖೂಹಿ ಜಗ್ಗಿತಬ್ಬೋತಿ ಸಮ್ಬನ್ಧೋ. ತೇಪೀತಿ ಞಾತಿಉಪಟ್ಠಾಕಾಪಿ. ತಸ್ಮಿಮ್ಪೀತಿ ಸಙ್ಘಿಕಪಚ್ಚಯೇಪಿ. ಬಹೂ ಆವಾಸೇತಿ ಸಮ್ಬನ್ಧೋ. ಏಕಂ ಆವಾಸನ್ತಿ ಯೋಜನಾ.

ಏಕಂ ವಾ ಆವಾಸನ್ತಿ ಸಮ್ಬನ್ಧೋ. ತತೋತಿ ವಿಸಜ್ಜಿತಾವಾಸೇಹಿ, ಉಪ್ಪನ್ನಾನೀತಿ ಸಮ್ಬನ್ಧೋ. ಕುರುನ್ದಿಯಂ ಪನ ವುತ್ತಂ, ಕಿನ್ತಿ ವುತ್ತನ್ತಿ ಯೋಜನಾ. ಏಕಂ ಮಞ್ಚಟ್ಠಾನಂ ಗಹೇತ್ವಾತಿ ಏಕಂ ಮಞ್ಚಟ್ಠಾನಂ ಪುಗ್ಗಲಿಕಭಾವೇನ ಗಹೇತ್ವಾ. ತಿಭಾಗನ್ತಿ ತತಿಯಭಾಗಂ. ಅಯಮೇವ ವಾ ಪಾಠೋ. ಏತ್ಥಾತಿ ನಟ್ಠವಿಹಾರೇ. ಪುಗ್ಗಲಿಕಮೇವಾತಿ ಪುಗ್ಗಲಿಕಂ ಏವ, ಪುಗ್ಗಲಿಕಂ ಇವ ವಾ. ಜಗ್ಗಾತಿ ಜಗ್ಗಾಹಿ. ಹೀತಿ ಫಲಜೋತಕೋ. ಏವಂ ಜಗ್ಗಿತೋ ಪನಾತಿ ಏವಂ ಜಗ್ಗಿತೋ ವಿಹಾರೋ ಪನ. ತಸ್ಮಿನ್ತಿ ಜಗ್ಗನ್ತೇ. ಸದ್ಧಿವಿಹಾರಿಕಾದೀನಂ ದಾತುಕಾಮೋ ಹೋತೀತಿ ಸಙ್ಘಸ್ಸ ಭಣ್ಡಟ್ಠಪನಂ ವಾ ನವಕಾನಂ ವಸನಟ್ಠಾನಂ ವಾ ಅದತ್ವಾ ಅತ್ತನೋಯೇವ ಸದ್ಧಿವಿಹಾರಿಕಾದೀನಂ ದಾತುಕಾಮೋ ಹೋತಿ. ಸದ್ಧಿವಿಹಾರಿಕಾದೀನಂ ದಾತುಂ ಲಬ್ಭತೀತಿ ಸಬ್ಬವಿಹಾರಂ ಪುಗ್ಗಲಿಕಭಾವೇನ ಅಗ್ಗಹೇತ್ವಾ ಏಕದೇಸಸ್ಸೇವ ಗಹಿತತ್ತಾ ಸದ್ಧಿವಿಹಾರಿಕಾದೀನಂ ದಾತುಂ ಲಬ್ಭತೀತಿ ಅತ್ಥೋ. ಜಗ್ಗಾಪೇತಬ್ಬೋ ಇತಿ ವುತ್ತನ್ತಿ ಯೋಜನಾ. ಏತ್ಥ ‘‘ವುತ್ತ’’ನ್ತಿ ಪಾಠೋ ಅತ್ಥಿ, ಸೋ ಅಪಾಠೋಯೇವ ‘‘ಕುರುನ್ದಿಯಂ ಪನ ವುತ್ತ’’ನ್ತಿ ಪದಸ್ಸ ಆಕಾರತ್ತಾ.

ಅಞ್ಞಂ ಇದಮ್ಪಿ ಚ ವಕ್ಖಮಾನವಚನಂ ತತ್ಥೇವ ಕುರುನ್ದಿಯಂ ವುತ್ತನ್ತಿ ಯೋಜನಾ. ಕಿನ್ತಿ ವುತ್ತನ್ತಿ ಆಹ ‘‘ದ್ವೇ ಭಿಕ್ಖೂ’’ತಿಆದಿ. ದ್ವೇ ಭಿಕ್ಖೂ ಕರೋನ್ತೀತಿ ಸಮ್ಬನ್ಧೋ. ಯೇನಾತಿ ಭಿಕ್ಖುನಾ. ಸೋಯೇವ ಸಾಮೀತಿ ಯೇನ ಸಾ ಭೂಮಿ ಪಠಮಂ ಗಹಿತಾ, ಸೋಯೇವ ಸಾಮೀತಿ ಅತ್ಥೋ. ಪತಿರೂಪೇ ಠಾನೇತಿ ಪತಿರೂಪೇ ಸೇನಾಸನಟ್ಠಾನೇ. ತನ್ತಿ ಪುಗ್ಗಲಿಕಕರಣಂ. ಯಂ ಪನ ವಯಕಮ್ಮನ್ತಿ ಯೋಜನಾ. ಏತ್ಥ ಚ ವಯಕಮ್ಮನ್ತಿ ತಸ್ಮಿಂ ವಿಹಾರೇ ಕತಸ್ಸ ಕಮ್ಮಸ್ಸ ಮೂಲಂ. ವಿಹಾರಸ್ಸ ಮೂಲಂ ದಾತಬ್ಬನ್ತಿ ವುತ್ತಂ ಹೋತಿ. ತಸ್ಸಾತಿ ಸಙ್ಘಿಕಂ ಕರೋನ್ತಸ್ಸ. ತತ್ಥೇವಾತಿ ಕತವಿಹಾರೇ ಏವ. ಕತಾವಾಸೇತಿ ಸಮೀಪತ್ಥೇ ಭುಮ್ಮವಚನಂ, ಕತಾವಾಸಸಮೀಪೇತಿ ವುತ್ತಂ ಹೋತಿ. ಛಾಯೂಪಗಫಲೂಪಗಾತಿ ಛಾಯಂ ಉಪಗಚ್ಛನ್ತಾ ಚ ಫಲಂ ಉಪಗಚ್ಛನ್ತಾ ಚ, ಛಾಯಾಫಲಾನಿ ಉಪಹರನ್ತಾತಿ ಅತ್ಥೋ. ಅಪಲೋಕೇತ್ವಾತಿ ಸಙ್ಘಂ ಅಪಲೋಕೇತ್ವಾ. ಸಾಮಿಕಾತಿ ರುಕ್ಖಸಾಮಿಕಾ. ಹಾರೇತಬ್ಬಾತಿ ಅಪನೇತಬ್ಬಾ.

‘‘ಸಙ್ಘಿಕವಲ್ಲಿಮತ್ತಮ್ಪಿ ಅಗ್ಗಹೇತ್ವಾ’’ತಿ ಇಮಿನಾ ಸಙ್ಘಿಕಂ ಗಹೇತ್ವಾ ಸಙ್ಘಿಕಾಯ ಭೂಮಿಯಾ ಸಚೇ ವಿಹಾರಂ ಕರೋತಿ, ಸಙ್ಘಿಕಮೇವಾತಿ ದಸ್ಸೇತಿ. ದ್ವಿಭೂಮಕತಿಭೂಮಕಾದೀಸು ಪಾಸಾದೇಸು ಉಪಡ್ಢಭಾಗಂ ದಸ್ಸೇನ್ತೋ ಆಹ ‘‘ಪಾಸಾದೋ ಚೇವ ಹೋತೀ’’ತಿಆದಿ. ಉಪರಿ ಪಾಸಾದೋತಿ ಸಮ್ಬನ್ಧೋ. ಸೋತಿ ವಿಹಾರಕಾರಕೋ ಭಿಕ್ಖು, ತಸ್ಸ ಹೇಟ್ಠಾಪಾಸಾದೋತಿ ಸಮ್ಬನ್ಧೋ. ವಿಹಾರೇತಿ ಸಙ್ಘಿಕವಿಹಾರೇ, ವಿಹಾರಸಮೀಪೇತಿ ಅತ್ಥೋ. ಅಕತಟ್ಠಾನೇತಿ ಚಯಪಮುಖಾನಂ ಅಕತಪುಬ್ಬಟ್ಠಾನೇ. ಚಯಂ ವಾ ಪಮುಖಂ ವಾತಿ ಸಙ್ಘಿಕವಿಹಾರಸ್ಸ ಚಯಂ ವಾ ಪಮುಖಂ ವಾ. ಬಹಿಕುಟ್ಟೇತಿ ಕುಟ್ಟಸ್ಸ, ಕುಟ್ಟತೋ ವಾ ಬಹಿ. ತಸ್ಸಾತಿ ಚಯಪಮುಖಕಾರಕಸ್ಸ ಭಿಕ್ಖುಸ್ಸ ಹೋತೀತಿ ಸಮ್ಬನ್ಧೋ. ವಿಸಮಂ ಪಬ್ಬತಕನ್ದರಾದಿನ್ತಿ ಸಮ್ಬನ್ಧೋ. ಅಪದೇತಿ ಸುಕರಸ್ಸ ಅಕಾರಣೇ. ಕತಂ ಹೋತೀತಿ ಚಯಂ ವಾ ಪಮುಖಂ ವಾ ಕತಂ ಹೋತಿ. ತತ್ಥಾತಿ ಚಯಪಮುಖೇಸು, ಸಙ್ಘೋ ಅನಿಸ್ಸರೋ ಇತಿ ವುತ್ತನ್ತಿ ಯೋಜನಾ.

ವರಸೇಯ್ಯಂ ಗಹೇತುನ್ತಿ ಸಮ್ಬನ್ಧೋ.

ಪುನ ಆಗನ್ತ್ವಾತಿ ಪಕ್ಕಮಿತ್ವಾ ಪುನ ಆಗನ್ತ್ವಾ. ತಸ್ಸಾತಿ ನವಕಮ್ಮಗಾಹಕಸ್ಸ ಭಿಕ್ಖುಸ್ಸ. ಏತನ್ತಿ ಸೇನಾಸನಂ.

ಅಞ್ಞತ್ರಪರಿಭೋಗಪಟಿಕ್ಖೇಪಾದಿಕಥಾ

೩೨೪. ನಾತಿಹರನ್ತೀತಿ ಏತ್ಥ ಅತಿಸದ್ದೋ ಹರಣತ್ಥೋ, ಹರಸದ್ದೋ ಪರಿಭುಞ್ಜನತ್ಥೋತಿ ಆಹ ‘‘ಅಞ್ಞತ್ರ ಹರಿತ್ವಾ ನ ಪರಿಭುಞ್ಜನ್ತೀ’’ತಿ. ಯಂ ಮಞ್ಚಪೀಠಾದೀತಿ ಯೋಜನಾ. ತತ್ಥಾತಿ ಉನ್ದ್ರಿಯಮಹಾವಿಹಾರೇ. ತನ್ತಿ ಮಞ್ಚಪೀಠಾದಿಂ. ತಸ್ಮಾತಿ ಯಸ್ಮಾ ಅನುಜಾನಾತಿ, ತಸ್ಮಾ. ತನ್ತಿ ಮಞ್ಚಪೀಠಾದಿಂ. ಅಞ್ಞತ್ರಾತಿ ಅಞ್ಞಂ ವಿಹಾರಂ. ಅರೋಗನ್ತಿ ಅನಟ್ಠಾಜಿಣ್ಣತ್ತಾ ಅರೋಗಂ. ತಸ್ಮಿಂ ವಿಹಾರೇತಿ ಉನ್ದ್ರಿಯವಿಹಾರೇ. ತಸ್ಮಿನ್ತಿ ಉನ್ದ್ರಿಯವಿಹಾರೇ. ತತೋತಿ ಉನ್ದ್ರಿಯವಿಹಾರತೋ. ಸುಯೋಜಿತಾನೀತಿ ಸುಟ್ಠು ಯೋಜಿತಾನಿ. ಮೂಲದಾನಂ ವಾ ಪಟಿಪಾಕತಿಕಂ ವಾ ನತ್ಥೀತಿ ಅಧಿಪ್ಪಾಯೋ. ಛಡ್ಡಿತವಿಹಾರತೋತಿ ಭಿಕ್ಖೂಹಿ ಅನಪೇಕ್ಖೇನ ಛಡ್ಡಿತಸಙ್ಘಿಕವಿಹಾರತೋ ಚ ಪುಗ್ಗಲೇನ ಸಾಪೇಕ್ಖೇನ ಛಡ್ಡಿತಪುಗ್ಗಲಿಕವಿಹಾರತೋ ಚ. ಆವಾಸಿಕಕಾಲೇತಿ ಆವಾಸಿಕಾನಂ ಠಿತಕಾಲೇ. ತತೋತಿ ಛಡ್ಡಿತವಿಹಾರತೋ.

ಫಾತಿಕಮ್ಮತ್ಥಾಯಾತಿ ಏತ್ಥ ಫಾತಿಸದ್ದೋ ವಡ್ಢನತ್ಥೋತಿ ಆಹ ‘‘ವಡ್ಢಿಕಮ್ಮತ್ಥಾಯಾ’’ತಿ. ಏತ್ಥಾತಿ ‘‘ಫಾತಿಕಮ್ಮತ್ಥಾಯಾ’’ತಿ ಪಾಠೇ.

ಚಕ್ಕಲಿಕನ್ತಿ ಚಕ್ಕಾಕಾರೇನ ಲಾತಿ ಪವತ್ತತಿ, ಚಕ್ಕಾಕಾರಂ ವಾ ಲಾತಿ ಗಣ್ಹಾತೀತಿ ಚಕ್ಕಲಂ, ತದೇವ ಚಕ್ಕಲಿಕಂ, ಪಾದಪುಞ್ಜನಂ, ‘‘ಕಮ್ಬಲಾದೀಹಿ ವೇಠೇತ್ವಾ ಕತ’’ನ್ತಿ ಇಮಿನಾ ತಸ್ಸ ಕರಣಾಕಾರಂ ದಸ್ಸೇತಿ. ಯೇಹೀತಿ ಪಾದೇಹಿ. ಉದಕನ್ತಿ ಸೇನಾಸನಸ್ಸ ತಿನ್ತಕಂ ಉದಕಂ. ಉದಕಂ ನ ಪಞ್ಞಾಯತೀತಿ ಯೋಜನಾ. ಸಉಪಾಹನೇನ ಅಕ್ಕಮಿತುಂ ನ ವಟ್ಟತೀತಿ ಯೋಜನಾ.

ಸುಧಾಭೂಮಿಯನ್ತಿ ಸುಧಾಯ ಲಿತ್ತಾಯಂ ಭೂಮಿಯಂ. ಪರಿಭಣ್ಡಭೂಮಿಯನ್ತಿ ಗೋಮಯಕಸಾವಪರಿಭಣ್ಡಭೂಮಿಯಂ. ಪಾದಾತಿ ಮಞ್ಚಪಾದಾ. ತಸ್ಮಿನ್ತಿ ಚೋಳಕೇ. ಠಪೇನ್ತಸ್ಸಾತಿ ಮಞ್ಚಪಾದೇ ಠಪೇನ್ತಸ್ಸ. ತತ್ಥಾತಿ ತೇಸು ಭಿಕ್ಖೂಸು. ನೇವಾಸಿಕಾತಿ ನಿಬದ್ಧಂ ವಸನ್ತೀತಿ ನೇವಾಸಿಕಾ. ಠಪೇನ್ತೀತಿ ಮಞ್ಚಪಾದೇ ಠಪೇನ್ತಿ. ತಥೇವಾತಿ ಯಥಾ ನೇವಾಸಿಕಾ ವಳಞ್ಜನ್ತಿ, ತಥೇವ ಆಗನ್ತುಕೇಹಿ ವಳಞ್ಜಿತುಂ ವಟ್ಟತೀತಿ ಅತ್ಥೋ.

ಸೇತಭಿತ್ತಿ ವಾತಿ ಏತ್ಥ ವಾಸದ್ದೇನ ನೀಲಭಿತ್ತಿಆದಯೋ ಸಮ್ಪಿಣ್ಡೇತಿ. ‘‘ದ್ವಾರಮ್ಪಿ ವಾತಪಾನಮ್ಪೀ’’ತಿಆದಿನಾ ಸಾಮಞ್ಞತೋ ವುತ್ತತ್ತಾ ದ್ವಾರವಾತಪಾನಾದಯೋ ಅಪರಿಕಮ್ಮಕತಾಪಿ ನ ಅಪಸ್ಸಯಿತಬ್ಬಾ. ಕೇನಚಿ ವಾ ವತ್ಥಾದಿನಾತಿ ಸಮ್ಬನ್ಧೋ.

‘‘ಹುತ್ವಾ’’ತಿ ಇಮಿನಾ ‘‘ಧೋತಪಾದಕಾ’’ತಿ ಪದಸ್ಸ ‘‘ನಿಪಜ್ಜಿತು’’ನ್ತಿ ಪದೇ ಕಿರಿಯಾವಿಸೇಸನಭಾವಂ ದಸ್ಸೇತಿ, ‘‘ಭಿಕ್ಖೂ’’ತಿ ಪದೇ ಕಾರಕವಿಸೇಸನಭಾವಂ ನಿವತ್ತೇತಿ. ಕಸ್ಮಿಂ ಠಾನೇ ನಿಪಜ್ಜಿತುಂ ಕುಕ್ಕುಚ್ಚಾಯನ್ತೀತಿ ಆಹ ‘‘ಧೋತೇಹಿ ಪಾದೇಹಿ ಅಕ್ಕಮಿತಬ್ಬಟ್ಠಾನೇ’’ತಿ. ‘‘ಅಕ್ಕಮಿತಬ್ಬಟ್ಠಾನಸ್ಸೇತಂ ಅಧಿವಚನ’’ನ್ತಿ ಇಮಿನಾ ‘‘ಧೋತಪಾದಕೇ’’ತಿ ಪಾಠಸ್ಸ ಧೋತೋ ಪಾದೋ ತಿಟ್ಠತಿ ಏತ್ಥ ಠಾನೇತಿ ಧೋತಪಾದಕಂ, ತಸ್ಮಿಂ ಧೋತಪಾದಕೇತಿ ಅತ್ಥಂ ದಸ್ಸೇತಿ. ಏತನ್ತಿ ‘‘ಧೋತಪಾದಕೇ’’ತಿ ನಾಮಂ. ‘‘ಪಚ್ಚತ್ಥರಿತ್ವಾ’’ತಿ ಏತ್ಥ ಕೇನ ಪಚ್ಚತ್ಥರಿತ್ವಾತಿ ಆಹ ‘‘ಪಚ್ಚತ್ಥರಣೇನಾ’’ತಿ. ‘‘ಅತ್ತನೋ ಸನ್ತಕೇನಾ’’ತಿ ಇಮಿನಾ ಸಙ್ಘಿಕೇನ ಪಚ್ಚತ್ಥರಣೇನ ಪಚ್ಚತ್ಥರಣಂ ಪಟಿಕ್ಖಿಪತಿ. ನಿದ್ದಾಯತೋಪೀತಿ ನಿದ್ದಾಯಕಾರಣಾಪಿ, ಸಂಕುಟಿತೇತಿ ಸಮ್ಬನ್ಧೋ. ಅಥ ವಾ ನಿದ್ದಾಯತೋಪೀತಿ ನಿದ್ದಾಯನ್ತಸ್ಸಪಿ. ‘‘ಸರೀರಾವಯವೋ’’ತಿ ಪದೇ ಸಾಮ್ಯತ್ಥಛಟ್ಠೀ, ‘‘ಆಪತ್ತಿಯೇವಾ’’ತಿ ಪದೇ ಸಮ್ಪದಾನಂ. ಲೋಮೇಸು ಫುಸನ್ತೇಸೂತಿ ಸಮ್ಬನ್ಧೋ. ‘‘ಪರಿಭೋಗಸೀಸೇನಾ’’ತಿ ಇಮಿನಾ ಪರಿಭೋಗಂ ಅಕತ್ವಾ ಕೇನಚಿ ಕಮ್ಮೇನ ಸರೀರಾವಯವೇನ ಫುಸನ್ತಸ್ಸ ಅನಾಪತ್ತೀತಿ ದಸ್ಸೇತಿ. ಹತ್ಥತಲೇನ ಫುಸಿತುಂ ಪಾದತಲೇನ ಫುಸಿತುಂ ವಾ ಅಕ್ಕಮಿತುಂ ವಾತಿ ಯಥಾಲಾಭಯೋಜನಾ ದಟ್ಠಬ್ಬಾ. ‘‘ಪರಿಭೋಗಸೀಸೇನಾ’’ತಿ ಪದಸ್ಸ ಅತ್ಥಂ ದಸ್ಸೇನ್ತೋ ಆಹ ‘‘ಮಞ್ಚಪೀಠಂ ನೀಹರನ್ತಸ್ಸಾ’’ತಿಆದಿ.

ಸಙ್ಘಭತ್ತಾದಿಅನುಜಾನನಕಥಾ

೩೨೫. ‘‘ಸಙ್ಘಸ್ಸ ಭತ್ತ’’ನ್ತಿ ಇಮಿನಾ ಸಙ್ಘಭತ್ತನ್ತಿ ಪದಸ್ಸ ಛಟ್ಠೀಸಮಾಸಂ ದಸ್ಸೇತಿ. ಸಙ್ಘಸ್ಸ ಅತ್ಥಾಯ ಆಭತಂ ಭತ್ತಂ ಕಾತುಂ ನ ಸಕ್ಕೋನ್ತೀತಿ ಯೋಜನಾ. ಉದ್ದೇಸಭತ್ತನ್ತಿಆದೀಸು ಏವಮತ್ಥೋ ವೇದಿತಬ್ಬೋತಿ ಯೋಜನಾ. ‘‘ಉದ್ದೇಸೇನ ಲದ್ಧಭಿಕ್ಖೂನಂ ಭತ್ತಂ ಕಾತು’’ನ್ತಿ ಇಮಿನಾ ಉದ್ದೇಸೇನ ಲದ್ಧಭಿಕ್ಖೂನಂ ಕಾತಬ್ಬಂ ಭತ್ತಂ ಉದ್ದೇಸಭತ್ತನ್ತಿ ವಚನತ್ಥಂ ದಸ್ಸೇತಿ. ತಥೇವಾತಿ ಯಥಾ ಸಙ್ಘತೋ ಉದ್ದಿಸಿತ್ವಾ ಲದ್ಧಭಿಕ್ಖೂ, ತಥೇವ. ಪರಿಚ್ಛಿನ್ದಿತ್ವಾತಿ ‘‘ಏಕಂ ವಾ’’ತಿಆದಿನಾ ಪರಿಚ್ಛಿನ್ದಿತ್ವಾ. ತೇಸನ್ತಿ ಲದ್ಧಭಿಕ್ಖೂನಂ. ಇಮಿನಾ ನಿಮನ್ತೇತ್ವಾ ಲದ್ಧಭಿಕ್ಖೂನಂ ಕಾತಬ್ಬಂ ಭತ್ತಂ ನಿಮನ್ತನಭತ್ತನ್ತಿ ವಚನತ್ಥಂ ದಸ್ಸೇತಿ. ‘‘ಸಲಾಕಾಯೋ ಛಿನ್ದಿತ್ವಾ’’ತಿ ಇಮಿನಾ ಸಲಾಕಾಯೋ ಛಿನ್ದಿತ್ವಾ ಕಾತಬ್ಬಂ ಭತ್ತಂ ಸಲಾಕಭತ್ತನ್ತಿ ವಚನತ್ಥಂ ದಸ್ಸೇತಿ. ಪಕ್ಖಿಕನ್ತಿ ಉಪೋಸಥಿಕನ್ತಿ ಪಾಟಿಪದಿಕನ್ತಿ ಏವಂ ನಿಯಾಮೇತ್ವಾತಿ ಯೋಜನಾ. ಪಞ್ಚಮೀಆದೀಸು ಪಕ್ಖೇಸು ಕಾತಬ್ಬಂ ಪಕ್ಖಿಕಂ. ಉಪೋಸಥೇ ಕಾತಬ್ಬಂ ಉಪೋಸಥಿಕಂ. ಪಾಟಿಪದೇ ಕಾತಬ್ಬಂ ಪಾಟಿಪದಿಕಂ, ತಮೇವ ಭತ್ತಂ ಪಾಟಿಪದಿಕಭತ್ತಂ. ಉದ್ದೇಸಭತ್ತಂ ನಿಮನ್ತನನ್ತಿ ಏತ್ಥ ಇತಿಸದ್ದೋ ಆದ್ಯತ್ಥೋ, ಉದ್ದೇಸಭತ್ತಂ ನಿಮನ್ತನನ್ತಿಆದಿಂ ಇಮಂ ವೋಹಾರಂ ಪತ್ತಾನೀತಿ ಹಿ ಅತ್ಥೋ. ಉದ್ದೇಸಭತ್ತಾದೀನಿಯೇವ ಅನುಜಾನನಮಕತ್ವಾ ಕಸ್ಮಾ ಸಙ್ಘಭತ್ತಮ್ಪಿ ಅನುಜಾನಾತೀತಿ ಆಹ ‘‘ಯಸ್ಮಾ ಪನಾ’’ತಿಆದಿ. ತತ್ಥ ಯಸ್ಮಾ ಸಕ್ಖಿಸ್ಸನ್ತೀತಿ ಸಮ್ಬನ್ಧೋ. ತೇತಿ ಮನುಸ್ಸಾ. ತಮ್ಪೀತಿ ಸಙ್ಘಭತ್ತಮ್ಪಿ. ಪಿಸದ್ದೇನ ಉದ್ದೇಸಭತ್ತಾದೀನಿ ಅಪೇಕ್ಖತಿ.

ಸಙ್ಘಭತ್ತಾದೀನಂ ವಿತ್ಥಾರಂ ದಸ್ಸೇನ್ತೋ ಆಹ ‘‘ತತ್ಥಾ’’ತಿಆದಿ. ತತ್ಥ ತತ್ಥಾತಿ ‘‘ಸಙ್ಘಭತ್ತಂ ಉದ್ದೇಸಭತ್ತ’’ನ್ತಿಆದಿಪಾಠೇ, ಏವಂ ವಿನಿಚ್ಛಯೋ ವೇದಿತಬ್ಬೋತಿ ಯೋಜನಾ, ಸಙ್ಘಭತ್ತಾದೀಸು ವಾ ನಿದ್ಧಾರಣೇ ಭುಮ್ಮಂ, ಭುಞ್ಜನ್ತಾನಂ ಅಮ್ಹಾಕಂ ಅಜ್ಜ ದಸ ದ್ವಾದಸ ದಿವಸಾ ಅಹೇಸುನ್ತಿ ಯೋಜನಾ. ಅಞ್ಞತೋತಿ ಅಞ್ಞಸ್ಮಾ ಠಾನಾ. ತತ್ಥಾತಿ ಸಙ್ಘಭತ್ತೇ. ವತ್ತಬ್ಬಾತಿ ಮನುಸ್ಸಾ ವತ್ತಬ್ಬಾ. ತನ್ತಿ ಸಙ್ಘಭತ್ತಂ, ಧಾತುಕಮ್ಮಂ, ‘‘ಅಮ್ಹಾಕ’’ನ್ತಿ ಕಾರಿತಕಮ್ಮಂ. ತನ್ತಿ ಸಙ್ಘಭತ್ತಂ.

ಉದ್ದೇಸಭತ್ತಕಥಾ

ಅಯಂ ನಯೋ ಏವಂ ವೇದಿತಬ್ಬೋತಿ ಯೋಜನಾ. ರಞ್ಞಾ ವಾ ಪಹಿತೇತಿ ಸಮ್ಬನ್ಧೋ. ಸಚೇ ಅತ್ಥೀತಿ ಸಚೇ ಠಿತಿಕಾ ಅತ್ಥಿ. ಉದ್ದೇಸಕೇನಾತಿ ಭತ್ತುದ್ದೇಸಕೇನ. ನ ಅತಿಕ್ಕಾಮೇತಬ್ಬನ್ತಿ ಉದ್ದೇಸಭತ್ತಂ ನ ಅತಿಕ್ಕಾಮೇತಬ್ಬಂ. ತೇ ಪನಾತಿ ಪಿಣ್ಡಪಾತಿಕಾ ಪನ. ಠಿತಿಕಂ ಠಪೇತ್ವಾತಿ ಠಿತಿಕಂ ಠಿತಟ್ಠಾನೇ ಠಪೇತ್ವಾ ಮುಞ್ಚಿತ್ವಾತಿ ಅತ್ಥೋ. ತೇಸನ್ತಿ ಮಹಾಥೇರಾನಂ. ಯೋಜನನ್ತರಿಕವಿಹಾರತೋಪೀತಿ ಯೋಜನೇನ ಬ್ಯವಧಾನೇ ಠಿತವಿಹಾರತೋಪಿ. ಠಿತಟ್ಠಾನತೋತಿ ಠಿತಿಕಾಯ ಠಿತಟ್ಠಾನತೋ. ಅಸಮ್ಪತ್ತಾನಮ್ಪೀತಿ ಭತ್ತುದ್ದೇಸಟ್ಠಾನಂ ಅಸಮ್ಪತ್ತಾನಮ್ಪಿ. ವಡ್ಢಿತಾ ನಾಮ ಸೀಮಾತಿ ಉಪಚಾರಸೀಮಾ ವಡ್ಢಿತಾ ನಾಮ. ಸಙ್ಘನವಕಸ್ಸ ದಿನ್ನೇಪೀತಿ ಯಾವ ದುತಿಯಭಾಗೋ ನ ದಾತಬ್ಬೋ, ತಾವ ಸಙ್ಘನವಕಸ್ಸ ದಿನ್ನೇಪಿ. ವಸ್ಸಗ್ಗೇನಾತಿ ಗಣಿಯತೀತಿ ಗಂ, ವಸ್ಸಮೇವ ಗಂ ವಸ್ಸಗ್ಗಂ, ತೇನ ವಸ್ಸಗ್ಗೇನ, ವಸ್ಸಗಣನಾಯಾತಿ ವುತ್ತಂ ಹೋತಿ. ಯದಿ ‘‘ವಸ್ಸಗ್ಘೇನಾ’’ತಿ ಚತುತ್ಥಕ್ಖರೇನ ಪಾಠೋ ಭವೇಯ್ಯ, ಏವಂ ಸತಿ ವಸ್ಸಪರಿಚ್ಛೇದೇನಾತಿ ಅತ್ಥೋ ದಟ್ಠಬ್ಬೋ, ಅಯಮೇವ ಯುತ್ತತರೋ.

ಏಕಸ್ಮಿಂ ವಿಹಾರೇತಿ ಏಕಿಸ್ಸಂ ವಿಹಾರಸೀಮಾಯಂ. ತಸ್ಮಿಂಯೇವ ಭತ್ತುದ್ದೇಸಟ್ಠಾನೇತಿ ಏತ್ಥ ಏವಸದ್ದೇನ ಅಞ್ಞಸ್ಮಿಂ ಠಾನೇ ಗಾಹಣಂ ಪಟಿಕ್ಖಿಪತಿ. ಏಕೋತಿ ಏಕೋ ದಾಯಕೋ. ತೇನಾತಿ ಪಹಿತಭಿಕ್ಖುನಾ. ಸೋ ಅತ್ಥೋತಿ ಸೋ ಹೇತು. ತಂದಿವಸನ್ತಿ ತಸ್ಮಿಂ ಪಹಿತದಿವಸೇ. ಪಮುಸ್ಸತೀತಿ ಸತಿಪವಾಸೇನ ಮುಸ್ಸತಿ. ಭೋಜನಸಾಲಾಯಾತಿ ಭತ್ತುದ್ದೇಸಟ್ಠಾನಸಙ್ಖಾತಾಯ ಭೋಜನಸಾಲಾಯ. ಯಾ ಪಕತಿಟ್ಠಿತಿಕಾತಿ ಯೋಜನಾ. ‘‘ಏಕಾಬದ್ಧಾ ಹೋನ್ತೀ’’ತಿ ವುತ್ತವಚನಸ್ಸ ಅತ್ಥಂ ದಸ್ಸೇನ್ತೋ ಆಹ ‘‘ಅಞ್ಞಮಞ್ಞಂ ದ್ವಾದಸಹತ್ಥನ್ತರಂ ಅವಿಜಹಿತ್ವಾ’’ತಿ. ನವಂ ಠಿತಿಕನ್ತಿ ಭತ್ತುದ್ದೇಸಟ್ಠಾನೇ ಠಪಿತಪಕತಿಟ್ಠಿತಿಕತೋ ಅಞ್ಞಂ ನವಂ ಠಿತಿಕಂ. ಹೀತಿ ಸಚ್ಚಂ, ಯಸ್ಮಾ ವಾ. ಏತನ್ತಿ ಉದ್ದೇಸಭತ್ತಂ. ‘‘ಸ್ವೇ’’ತಿ ನಿಯಾಮೇತ್ವಾ ವುತ್ತತ್ತಾ ದುತಿಯದಿವಸೇ ನ ಲಬ್ಭತಿ.

ಕೋಚೀತಿ ದಾಯಕೋ. ಸಕವಿಹಾರೇ ಠೀತಿಕಾವಸೇನೇವ ಗಾಹೇತಬ್ಬನ್ತಿ ಯಂ ವಿಹಾರಂ ಗಚ್ಛನ್ತಿ, ತತ್ಥ ಅಪವಿಟ್ಠತ್ತಾ ಸಕವಿಹಾರೇ ಠಿತಿಕಾವಸೇನೇವ ಗಾಹೇತಬ್ಬಂ. ದಿನ್ನಂ ಪನ ಭತ್ತಂ ಗಾಹೇತಬ್ಬನ್ತಿ ಸಮ್ಬನ್ಧೋ. ಸಮ್ಪತ್ತಾನನ್ತಿ ದಿನ್ನಟ್ಠಾನಂ ಸಮ್ಪತ್ತಾನಂ. ತತ್ಥಾತಿ ದಿನ್ನಟ್ಠಾನಂ, ಸಮ್ಪತ್ತಾನಂಯೇವಾತಿ ಸಮ್ಬನ್ಧೋ. ತಸ್ಸ ವಿಹಾರಸ್ಸಾತಿ ಪವಿಟ್ಠವಿಹಾರಸ್ಸ. ತಸ್ಮಿಂ ತಸ್ಮಿಂ ಠಾನೇತಿ ಗಾಮದ್ವಾರವೀಥಿಚತುಕ್ಕಸಙ್ಖಾತೇ ತಸ್ಮಿಂ ತಸ್ಮಿಂ ಠಾನೇ. ಅನ್ತೋಉಪಚಾರಗತಾನನ್ತಿ ಏತ್ಥ ಅನ್ತೋಉಪಚಾರೋ ನಾಮ ದ್ವಾದಸಹತ್ಥಬ್ಭನ್ತರಂ.

ಗಾಮದ್ವಾರೂಪಚಾರ ವೀಥಿಚತುಕ್ಕೂಪಚಾರ ಘರೂಪಚಾರೇಸು ತೀಸು ಘರೂಪಚಾರಸ್ಸ ವಿಸೇಸಂ ದಸ್ಸೇನ್ತೋ ಆಹ ‘‘ಘರೂಪಚಾರೋ ಚೇತ್ಥಾ’’ತಿಆದಿ. ಏತ್ಥಾತಿ ತೀಸು ಉಪಚಾರೇಸು. ಘರೂಪಚಾರೋ ವೇದಿತಬ್ಬೋತಿ ಸಮ್ಬನ್ಧೋ. ಏಕೋ ಉಪಚಾರೋ ಏತ್ಥಾತಿ ಏಕೂಪಚಾರಂ ಘರಂ. ಇಮೇಸನ್ತಿ ಚತುನ್ನಂ ಘರಾನಂ. ತತ್ಥಾತಿ ಚತೂಸು ಘರೇಸು. ಏಕಕುಲಸ್ಸ ಯಂ ಘರನ್ತಿ ಸಮ್ಬನ್ಧೋ. ಏಕವಳಞ್ಜನ್ತಿ ಏಕದ್ವಾರೇನ ಸಮಾನಪರಿಭೋಗಂ. ತತ್ಥಾತಿ ಏಕೂಪಚಾರೇ.

ಯಂ ಪನ ಏಕಂ ಘರಂ ಕತನ್ತಿ ಸಮ್ಬನ್ಧೋ. ಸುಖವಿಹಾರತ್ಥಾಯಾತಿ ಕಲಹಂ ವಿಚ್ಛಿನ್ದಿತ್ವಾ ಸುಖವಿಹಾರತ್ಥಾಯ. ತಸ್ಮಿಂ ತಸ್ಮಿಂ ಠಾನೇತಿ ಭಿತ್ತಿಯಾ ಪರಿಚ್ಛಿನ್ನೇ ತಸ್ಮಿಂ ತಸ್ಮಿಂ ಠಾನೇ.

ಯಸ್ಮಿಂ ಪನ ಘರೇ ನಿಸೀದಾಪೇನ್ತೀತಿ ಸಮ್ಬನ್ಧೋ. ಯಮ್ಪಿ ನಿವೇಸನನ್ತಿ ಯೋಜನಾ.

ಯೋ ಪನ ಉದ್ದೇಸಲಾಭೋ ಉಪ್ಪಜ್ಜತಿ, ಸೋ ಪಾಪುಣಾತೀತಿ ಯೋಜನಾ. ಕಿಞ್ಚಾಪಿ ದಿಸ್ಸನ್ತಿ, ತಥಾಪೀತಿ ಯೋಜನಾ.

ಯೋ ಪನಾತಿ ಭಿಕ್ಖು ಪನ, ಲಭತೀತಿ ಸಮ್ಬನ್ಧೋ. ಅಞ್ಞಸ್ಮಿನ್ತಿ ಅತ್ತನಾ ಅಞ್ಞಸ್ಮಿಂ. ತೇನಾತಿ ಉದ್ದೇಸಭತ್ತಂ ಲಭನ್ತೇನ ಭಿಕ್ಖುನಾ.

ಕಾಲಂ ಪಟಿಮಾನೇನ್ತೇಸೂತಿ ಭೋಜನಕಾಲಂ ಪಟಿಮಾನೇನ್ತೇಸು ಭಿಕ್ಖೂಸು, ನಿಸಿನ್ನೇಸೂತಿ ಸಮ್ಬನ್ಧೋ. ಕೋಚಿ ಮನುಸ್ಸೋ ವದತೀತಿ ಸಮ್ಬನ್ಧೋ. ಸಙ್ಘುದ್ದೇಸಪತ್ತಂ ದೇಥ ಇತಿ ವಾತಿ ಯೋಜನಾ. ‘‘ಏಸೇವ ನಯೋ’’ತಿ ಇಮಿನಾ ಪತ್ತಸ್ಸ ಠಾನೇ ಭಿಕ್ಖುಂ ಪಕ್ಖಿಪಿತ್ವಾ ವುತ್ತೇ ಅತಿದಿಸತಿ.

ಏತ್ಥಾತಿ ಉದ್ದೇಸಭತ್ತೇ, ಏವಂವಚನೇ ವಾ. ಪೇಸಲೋತಿ ಪಿಯಸೀಲೋ. ತೇನಾತಿ ಉದ್ದೇಸಕೇನ. ಕಿನ್ತಿ ಜಾನಾತೀತಿ ಆಹ ‘‘ದಸವಸ್ಸೇನ ಲದ್ಧ’’ನ್ತಿ. ತಸ್ಸಾತಿ ಉದ್ದೇಸಕಸ್ಸ, ವಚನನ್ತಿ ಸಮ್ಬನ್ಧೋ. ಅಪ್ಪಸದ್ದಾತಿ ಸಣಿಕಸದ್ದಾ. ‘‘ಅಪಸದ್ದಾ’’ತಿಪಿ ಪಾಠೋ, ನಿಸ್ಸದ್ದಾತಿ ಅತ್ಥೋ. ಸಬ್ಬನವಕಸ್ಸಾತಿ ಸಬ್ಬೇಸಂ ಭಿಕ್ಖೂನಂ ನವಕಸ್ಸ. ಛಾಯಾಯಪಿ ಪುಚ್ಛಿಯಮಾನಾಯಾತಿ ಅನಾದರೇ ಭುಮ್ಮವಚನಂ, ಸಾಮಿವಚನಂ ವಾ. ನ ಲಭತೀತಿ ಪಾಪುಣಾಪಿತತ್ತಾ ನ ಲಭತಿ. ನಿಸಿನ್ನಸ್ಸಾಪಿ ನಿದ್ದಾಯನ್ತಸ್ಸಾಪೀತಿ ಅನಾದರೇ ಸಾಮಿವಚನಂ, ಭಿಕ್ಖುಸ್ಸ ನಿಸಿನ್ನಸ್ಸಾಪಿ ನಿದ್ದಾಯನ್ತಸ್ಸಾಪೀತಿ ಅತ್ಥೋ. ಹೀತಿ ಸಚ್ಚಂ. ಏತಂ ಭಾಜನೀಯಭಣ್ಡಂ ನಾಮಾತಿ ಯೋಜನಾ. ತತ್ಥಾತಿ ‘‘ಸಮ್ಪತ್ತಸ್ಸೇವ ಪಾಪುಣಾತೀ’’ತಿ ವಚನೇ. ಉಪಚಾರೇನಾತಿ ದ್ವಾದಸಹತ್ಥೂಪಚಾರೇನ. ತಸ್ಮಿನ್ತಿ ಅನ್ತೋಪರಿಕ್ಖೇಪೇ.

ಕೋಚಿ ಉಪಾಸಕೋ ಪಹಿಣಾತೀತಿ ಸಮ್ಬನ್ಧೋ. ಪಣೀತಭೋಜನಾನನ್ತಿ ಪಣೀತಭೋಜನೇಹಿ. ಉದಕಸ್ಸಾತಿ ಉದಕೇನ, ಪೂರೇತ್ವಾತಿ ಸಮ್ಬನ್ಧೋ. ಆಗತಾ ಮನುಸ್ಸಾತಿ ಸಮ್ಬನ್ಧೋ. ಯೇನಾತಿ ಭಿಕ್ಖುನಾ. ಯನ್ತಿ ವತ್ಥು. ತಿಚೀವರಪರಿವಾರನ್ತಿ ತಿಚೀವರೇನ ಪರಿವಾರಿತಂ, ತಿಚೀವರಪರಿವಾರವನ್ತಂ ವಾ ಉದ್ದೇಸಭತ್ತನ್ತಿ ಅತ್ಥೋ. ಹಿ ಸಚ್ಚಂ ಅಸ್ಸ ಭಿಕ್ಖುಸ್ಸ ಪುಞ್ಞವಿಸೇಸೋ ಈದಿಸೋತಿ ಯೋಜನಾ. ನನು ಉದಕಂಪಿಸ್ಸ ಪುಞ್ಞವಿಸೇಸಂ, ಕಸ್ಮಾ ಅಞ್ಞಂ ಉದ್ದೇಸಭತ್ತಂ ಲಭತೀತಿ ಆಹ ‘‘ಉದಕಂ ಪನಾ’’ತಿಆದಿ.

ಗಹೇತ್ವಾ ಆಗತಾ ತೇ ಮನುಸ್ಸಾತಿ ಯೋಜನಾ. ತೇಸನ್ತಿ ಮಹಾಥೇರಾದೀನಂ. ದಹರಸಾಮಣೇರೇಹೀತಿ ದಹರೇಹಿ ಸಾಮಣೇರೇಹಿ, ಲದ್ಧೇಸೂತಿ ಸಮ್ಬನ್ಧೋ.

ತತ್ಥಾತಿ ಉದ್ದೇಸಭತ್ತೇ. ಪುರತೋತಿ ಮಹಾಥೇರಾನಂ ಪುರತೋ. ಪತ್ತೇತಿ ಸಙ್ಘುದ್ದೇಸಪತ್ತೇ, ಅಗಾಹಿತೇಯೇವಾತಿ ಸಮ್ಬನ್ಧೋ. ಆಹಟಮ್ಪಿ ಉದ್ದೇಸಭತ್ತನ್ತಿ ಸಮ್ಬನ್ಧೋ.

ಏಕೋ ವದತೀತಿ ಸಮ್ಬನ್ಧೋ. ಸೋತಿ ಮನುಸ್ಸೋ, ಭಣತೀತಿ ಸಮ್ಬನ್ಧೋ. ಯಥಾ ತೇ ರುಚ್ಚತಿ, ತಥಾ ವತ್ವಾ ಆಹರಾತಿ ಯೋಜನಾ. ವಿಸ್ಸಟ್ಠದೂತೋ ನಾಮಾತಿ ಅತ್ತನೋ ರುಚಿಂ ವಿಸ್ಸಜ್ಜಿತ್ವಾ ತಸ್ಸ ರುಚಿಯಾ ವಿಸ್ಸಟ್ಠೋ ದೂತೋ ನಾಮ. ಪಟಿಪಾಟಿಪತ್ತಂ ವಾತಿ ಸಙ್ಘತೋ ಪಟಿಪಾಟಿಯಾ ಲದ್ಧಂ ಪತ್ತಂ ವಾ, ಇದಂ ನಿಮನ್ತನಭತ್ತಂ ಸನ್ಧಾಯ ವುತ್ತಂ. ಯಂ ಇಚ್ಛತೀತಿ ವಿಸ್ಸಟ್ಠದೂತೋ ಯಂ ಇಚ್ಛತಿ. ಸೋತಿ ಬಾಲೋ, ನ ವತ್ತಬ್ಬೋತಿ ಸಮ್ಬನ್ಧೋ. ಪುಚ್ಛಾಸಭಾಗೇನ ವದೇಯ್ಯಾತಿ ಸಮ್ಬನ್ಧೋ. ತತೋತಿ ವದನಕಾರಣಾ.

ಕೂಟಟ್ಠಿತಿಕಾ ನಾಮಾತಿ ಅಞ್ಞೇಹಿ ಉದ್ದೇಸಭತ್ತೇಹಿ ಮಿಸ್ಸೇತ್ವಾ ಉಜುಕಟ್ಠಿತಿಕಾಯ ಪವತ್ತಿತ್ವಾ ಕೂಟೇನ ಪವತ್ತಾ ಠಿತಿಕಾ ನಾಮ ಹೋತಿ. ತಮೇವತ್ಥಂ ವಿತ್ಥಾರೇನ್ತೋ ಆಹ ‘‘ರಞ್ಞೋ ವಾ ಹೀ’’ತಿಆದಿ. ಏಕಚಾರಿಕಭತ್ತಾನೀತಿ ಪತಿ ಏಕಂ ಕತ್ವಾ ಚರಿತಬ್ಬಾನಿ ಭಕ್ಖಿತಬ್ಬಾನೀತಿ ಏಕಚಾರಿಕಾನಿ, ಅಞ್ಞೇಹಿ ಉದ್ದೇಸಭತ್ತೇಹಿ ಅಮಿಸ್ಸೇತ್ವಾ ಪತಿ ಏಕಂ ಕತ್ವಾ ಭಕ್ಖಿತಬ್ಬಾನೀತಿ ವುತ್ತಂ ಹೋತಿ, ತಾನಿಯೇವ ಭತ್ತಾನಿ ಏಕಚಾರಿಕಭತ್ತಾನಿ. ಏಕಚ್ಚೇ ಭಿಕ್ಖೂ ಗತಾತಿ ಸಮ್ಬನ್ಧೋ. ತೇಸೂತಿ ಏಕಚ್ಚೇಸು ಭಿಕ್ಖೂಸು. ತಙ್ಖಣಂಯೇವಾತಿ ತಸ್ಮಿಂ ನಿಸಿನ್ನಕ್ಖಣೇಯೇವ. ಪುನ ತಙ್ಖಣಂಯೇವಾತಿ ತಸ್ಮಿಂ ಗಾಹಣಕ್ಖಣೇಯೇವ. ‘‘ಪಣೀತಭತ್ತ’’ನ್ತಿ ವುತ್ತೇ ‘‘ಕತಿವಸ್ಸತೋ ಪಟ್ಠಾಯಾ’’ತಿ ವದನ್ತಿ, ‘‘ಏತ್ತಕವಸ್ಸತೋ ನಾಮಾ’’ತಿ ವುತ್ತೇತಿ ಯೋಜನಾ. ಗಾಹಿತೇತಿ ಠಿತಿಕಂ ಅಜಾನನ್ತೇಹಿ ಆಗನ್ತುಕೇಹಿ ಪತ್ತೇ ಗಾಹಿತೇ. ಆಗತೇಹಿಪಿ ಠಿತಿಕಂ ಜಾನನಕಭಿಕ್ಖೂಹೀತಿ ಸಮ್ಬನ್ಧೋ. ಏಸೇವ ನಯೋ ಪರತೋಪಿ. ಭಿಕ್ಖೂಯೇವ ಆಗಚ್ಛನ್ತೂತಿ ಪತ್ತಂ ಅಗ್ಗಹೇತ್ವಾ ಭಿಕ್ಖೂಯೇವ ಆಗಚ್ಛನ್ತೂತಿ ಅಧಿಪ್ಪಾಯೋ.

ನೇತಿ ಠಿತಿಕಂ ಅಜಾನನ್ತೇ ಆಗನ್ತುಕೇ. ರಾಜಾ ಭೋಜೇತ್ವಾತಿ ರಾಜಾ ಅತ್ತನೋ ಗೇಹೇ ಭೋಜೇತ್ವಾ. ನೇಸನ್ತಿ ಆಗನ್ತುಕಾನಂ, ಪತ್ತೇಪೀತಿ ಸಮ್ಬನ್ಧೋ. ಯಂ ಆಹಟನ್ತಿ ಯಂ ಭತ್ತಂ ಅಭುಞ್ಜಿತ್ವಾ ಆಹಟಂ. ತಂ ನ ಗಾಹೇತಬ್ಬನ್ತಿ ತಂ ಭತ್ತಂ ಠಿತಿಕಾಯ ನ ಗಾಹೇತಬ್ಬಂ ಥೋಕತ್ತಾ. ನೇಸನ್ತಿ ಆಗನ್ತುಕಾನಂ. ಗೀವಾ ಹೋತೀತಿ ಇಣಂ ಹೋತಿ. ಇಣಂ ನಾಮ ಪಟಿದಾತಬ್ಬಸಭಾವೋ ಹೋತಿ, ತಸ್ಮಾ ಪಟಿದಾತಬ್ಬನ್ತಿ ಅಧಿಪ್ಪಾಯೋ. ಏತ್ಥಾತಿ ಠಿತಿಕಂ ಅಜಾನಿತ್ವಾ ಭುತ್ತಟ್ಠಾನೇ. ತಾವ ನಿಸೀದಿತಬ್ಬನ್ತಿ ತಾವ ಆಗಮೇತ್ವಾ ನಿಸೀದಿತಬ್ಬಂ. ಪತ್ತಟ್ಠಾನೇನ ಗಾಹಣಮ್ಪಿ ಗೀವಾಸದಿಸೋತಿ ಪುರಿಮಥೇರಸ್ಸ ಮತಿ ಭವೇಯ್ಯ. ಏವಞ್ಹಿ ಸತಿ ದ್ವಿನ್ನಂ ಥೇರಾನಂ ವಾದೋ ಸದಿಸೋಯೇವ.

ಏಕೋ ಪಿಣ್ಡಪಾತೋತಿ ಸಮ್ಬನ್ಧೋ. ತಥಾರೂಪೋತಿ ತಿಚೀವರಪರಿವಾರೋ ಸತಗ್ಘನಕೋ. ಅಯನ್ತಿ ಪಿಣ್ಡಪಾತೋ. ಇತಿ ವುತ್ತಂ ಅಟ್ಠಕಥಾಸು.

ಏಕೋ ಭಿಕ್ಖೂತಿ ಸಮ್ಬನ್ಧೋ. ಅನ್ತರಾಭಟ್ಠಕೋತಿ ಉದ್ದೇಸಭತ್ತಸ್ಸ ಅನ್ತರೇ ವೇಮಜ್ಝೇ ಭಸ್ಸತಿ ಗಲತೀತಿ ಅನ್ತರಾಭಟ್ಠಕೋ. ಪರಿಪುಣ್ಣವಸ್ಸೋ ಯೋ ಪನ ಸಾಮಣೇರೋತಿ ಯೋಜನಾ. ತಸ್ಸ ಉಪಸಮ್ಪಜ್ಜಿತಸಾಮಣೇರಸ್ಸ ಠಿತಿಕಾ ಅತಿಕ್ಕನ್ತಾತಿ ಸಮ್ಬನ್ಧೋ. ಸೋತಿ ಉದ್ದೇಸಭತ್ತಪತ್ತೋ ಭಿಕ್ಖು. ಸಮೀಪೇತಿ ಅತ್ತನೋ ಸಮೀಪೇ. ತಞ್ಚೇ ಥೇಯ್ಯಾಯ ಹರನ್ತೀತಿ ತಂ ಪತ್ತಂ ಪತ್ತಹಾರಕಾ ಥೇಯ್ಯಾಯ ಹರನ್ತಿ ಚೇ. ಗೀವಾ ಹೋತೀತಿ ಪತ್ತದಾಪಕಸ್ಸ ಗೀವಾ ಹೋತಿ. ಸೋ ಭಿಕ್ಖೂತಿ ಸಮೀಪೇ ನಿಸಿನ್ನೋ ಸೋ ಭಿಕ್ಖು. ಅಸ್ಸಾತಿ ಪತ್ತದಾಪಕಸ್ಸ. ‘‘ಅಯ’’ನ್ತಿ ಪೋತ್ಥಕೇಸು ಪಾಠೋ ಅತ್ಥಿ, ಸೋ ನ ಸುನ್ದರೋ. ತತೋತಿ ಉದ್ದೇಸಭತ್ತಘರತೋ. ‘‘ಸುಹಟೋ’’ತಿ ವಚನಸ್ಸ ಅತ್ಥಂ ದಸ್ಸೇನ್ತೋ ಆಹ ‘‘ಭತ್ತಸ್ಸ ದಿನ್ನತ್ತಾ ಗೀವಾ ನ ಹೋತೀ’’ತಿ.

ಸಾದಿಯನಕೋತಿ ಉದ್ದೇಸಭತ್ತಸಾದಿಯನಕೋ, ಹೋತೀತಿ ಸಮ್ಬನ್ಧೋ. ದಸಹಿಪಿ ಪತ್ತೇಹಿ ಭತ್ತಂ ಆಹರಾಪೇತ್ವಾತಿ ಯೋಜನಾ. ಭಿಕ್ಖುದತ್ತಿಯಂ ನಾಮಾತಿ ಭಿಕ್ಖುನಾ ದತ್ತಿಯಂ ನಾಮ. ಸೋ ಭಿಕ್ಖೂತಿ ಸಾದಿಯನಕೋ ಸೋ ಭಿಕ್ಖು. ತೇ ಭಿಕ್ಖೂತಿ ಪಿಣ್ಡಪಾತಿಕೇ ತೇ ಭಿಕ್ಖೂ. ಏಥ ಭನ್ತೇ ಮಯ್ಹಂ ಸಹಾಯಾ ಹೋಥ ಇತಿ ವತ್ವಾತಿ ಸಮ್ಬನ್ಧೋ. ತಸ್ಸಾತಿ ಉಪಾಸಕಸ್ಸ. ತತ್ಥಾತಿ ಉಪಾಸಕಸ್ಸ ಘರೇ. ತಸ್ಸೇವಾತಿ ಸಾದಿಯನಕಸ್ಸೇವ. ಇತರೇತಿ ನವಪಿಣ್ಡಪಾತಿಕಾ. ನೇಸನ್ತಿ ದಸನ್ನಂ ಭಿಕ್ಖೂನಂ. ತಸ್ಸ ಭಿಕ್ಖುನೋತಿ ಸಾದಿಯನಕಸ್ಸ ಭಿಕ್ಖುನೋ. ಭುತ್ತಾವೀನನ್ತಿ ಭುತ್ತವನ್ತಾನಂ.

ತೇತಿ ನವಪಿಣ್ಡಪಾತಿಕಾ, ವುತ್ತಾ ಗಚ್ಛನ್ತೀತಿ ಸಮ್ಬನ್ಧೋ. ತತ್ಥಾತಿ ಉಪಾಸಕಸ್ಸ ಘರೇ. ತತ್ರಾತಿ ದಸಸು ಭಿಕ್ಖೂಸು. ಮಧುರೇನ ಸರೇನ ಅನುಮೋದನಂ ಕರೋನ್ತಸ್ಸ ಏಕಸ್ಸ ಧಮ್ಮಕಥಂ ಸುತ್ವಾತಿ ಯೋಜನಾ. ಅಕತಭಾಗೋ ನಾಮಾತಿ ಪುಬ್ಬೇ ನ ಕರಿಯಿತ್ಥಾತಿ ಅಕತೋ, ಸೋಯೇವ ಭಾಗೋ ಕೋಟ್ಠಾಸೋತಿ ಅಕತಭಾಗೋ, ಆಗನ್ತುಕಭಾಗೋ ನಾಮಾತಿ ಅತ್ಥೋ.

ಏಕೋ ಉಪಾಸಕೋ ದೇತೀತಿ ಸಮ್ಬನ್ಧೋ. ಇಮನ್ತಿ ಖಾದನೀಯಭೋಜನೀಯಂ. ಪತ್ತಸಾಮಿಕಸ್ಸ ದಾತಬ್ಬನ್ತಿ ಯೋಜನಾ. ಠಪೇತ್ವಾತಿ ಪಕತಿಯಾ ಠಪೇತ್ವಾ. ‘‘ಸಬ್ಬೋ ಸಙ್ಘೋ ಭುಞ್ಜತೂ’’ತಿ ವತ್ವಾ ಚ ಕಿಞ್ಚಿ ಅವತ್ವಾ ಚ ಗತೇಪಿ ಪಠಮಮೇವ ‘‘ಸಬ್ಬಂ ಸಙ್ಘಿಕಂ ಪತ್ತಂ ದೇಥಾ’’ತಿ ವುತ್ತತ್ತಾ ಭಾಜೇತ್ವಾ ಪರಿಭುಞ್ಜಿತಬ್ಬಂ.

ಪಾತಿಯಾ ಆಹರಿತ್ವಾತಿ ಸಮ್ಬನ್ಧೋ. ಏಕೇಕಂ ಆಲೋಪನ್ತಿ ಏಕೇಕಸ್ಸ ಭಿಕ್ಖುಸ್ಸ ಏಕೇಕಂ ಆಲೋಪಂ. ಅಚ್ಛತೀತಿ ವಸತಿ. ಕಸ್ಸ ತೇತಿ ಕಸ್ಸ ಅತ್ಥಾಯ ತಯಾ, ಆನೀತನ್ತಿ ಯೋಜನಾ. ‘‘ಏಕೇನ ಭಿಕ್ಖುನಾ’’ತಿ ಪದಂ ‘‘ಗಾಹೇತಬ್ಬ’’ನ್ತಿ ಪದೇ ಕಾರಿತಕಮ್ಮಂ, ‘‘ಭತ್ತ’’ನ್ತಿ ಧಾತುಕಮ್ಮಂ ತಬ್ಬಪಚ್ಚಯೋ ವದತಿ.

ಕಿಂ ಆಹರೀಯತೀತಿ ಅವತ್ವಾತಿ ಕಿಂ ವತ್ಥು ತಯಾ ಆಹರೀತೀತಿ ಉಪಾಸಕಂ ಅಪುಚ್ಛಿತ್ವಾ. ‘‘ಕಿಂ ಆಹರಿಸ್ಸಸೀ’’ತಿಪಿ ಪಾಠೋ, ಕಿಂ ವತ್ಥುಂ ತ್ವಂ ಆಹರಿಸ್ಸಸೀತಿ ಅತ್ಥೋ. ಸಪರಿವಾರಾಯ ಯಾಗುಯಾ ಚ ಮಹಗ್ಘಾನಂ ಫಲಾನಞ್ಚ ಪಣೀತಾನಂ ಖಜ್ಜಕಾನಞ್ಚ ತಥಾ ಆವೇಣಿಕಾ ಠಿತಿಕಾ ಕಾತಬ್ಬಾತಿ ಯೋಜನಾ. ಏಕಾ ಏವ ಠಿತಿಕಾತಿ ಸಮಾನಾ ಏವ ಠಿತಿಕಾ. ತಥಾ ಫಾಣಿತಸ್ಸಾತಿ ಏತ್ಥ ತಥಾಸದ್ದೇನ ‘‘ಏಕಾ ಏವ ಠಿತಿಕಾ ವಟ್ಟತೀ’’ತಿ ಪದಂ ಅತಿದಿಸತಿ.

ಇತಿ ಉದ್ದೇಸಭತ್ತಕಥಾಯ ಯೋಜನಾ ಸಮತ್ತಾ.

ನಿಮನ್ತನಭತ್ತಕಥಾ

ನಿಮನ್ತನಂ ಪುಗ್ಗಲಿಕಂ ಸಙ್ಘಿಕಞ್ಚಾತಿ ದುವಿಧಂ. ತತ್ಥ ಪುಗ್ಗಲಿಕಂ ಸನ್ಧಾಯ ವುತ್ತಂ ‘‘ಪುಗ್ಗಲಿಕಂ ಚೇ ಸಯಮೇವ ಇಸ್ಸರೋ’’ತಿ. ‘‘ಏತ್ತಕೇ ಭಿಕ್ಖೂ ಸಙ್ಘತೋ ಉದ್ದಿಸಥಾ’’ತಿಆದೀನಿ ಅವತ್ವಾ ‘‘ಏತ್ತಕಾನಂ ಭಿಕ್ಖೂನಂ ಭತ್ತಂ ಗಣ್ಹಥಾ’’ತಿ ನಿಮನ್ತೇತ್ವಾ ದಿನ್ನಂ ಸಙ್ಘಿಕಂ ನಿಮನ್ತನಂ ನಾಮ. ಏತ್ಥಾತಿ ನಿಮನ್ತನೇ. ಪಿಣ್ಡಪಾತಿಕಾನಮ್ಪಿ ವಟ್ಟತೀತಿ ‘‘ಭಿಕ್ಖ’’ನ್ತಿ ಕಪ್ಪಿಯವೋಹಾರೇನ ವುತ್ತತ್ತಾ ಪಿಣ್ಡಪಾತಿಕಾನಮ್ಪಿ ವಟ್ಟತಿ. ಪಟಿಪಾಟಿಯಾತಿ ಸಙ್ಘತೋ ಲದ್ಧಪಟಿಪಾಟಿಯಾ. ಆಗತಮನುಸ್ಸೋ ವದತೀತಿ ಸಮ್ಬನ್ಧೋ. ವಿಚ್ಛಿನ್ದಿತ್ವಾತಿ ‘‘ತುಮ್ಹೇ ಚ ಗಚ್ಛಥಾ’’ತಿ ವಚನಂ ವಿಚ್ಛಿನ್ದಿತ್ವಾ.

ನಿಮನ್ತನಭತ್ತಘರತೋತಿ ನಿಮನ್ತನಭತ್ತಸ್ಸ ದಿನ್ನಘರತೋ. ಏಕೋ ಆಹರತೀತಿ ಸಮ್ಬನ್ಧೋ. ಪೂರೇತ್ವಾತಿ ಭತ್ತಸ್ಸ ಪೂರೇತ್ವಾ. ತನ್ತಿ ಭತ್ತಂ. ಇಧಾಪೀತಿ ನಿಮನ್ತನೇಪಿ.

ತತೋತಿ ವದನಕಾರಣಾ. ‘‘ಸೋ ಭಿಕ್ಖೂ’’ತಿ ಪದಂ ‘‘ಅಸ್ಸಾ’’ತಿ ಪದೇ ಪಕತಿಕತ್ತಾ, ‘‘ಜಿಗುಚ್ಛನೀಯೋ’’ತಿ ಪದಂ ತತ್ಥೇವ ವಿಕತಿಕತ್ತಾ. ಅಸ್ಸಾತಿ ಭವೇಯ್ಯ, ಹೋತಿ ವಾ. ‘‘ಪತ್ತತ್ಥಾಯ ಆಗತೋಮ್ಹೀ’’ತಿ ವದನ್ತಸ್ಸ ತಸ್ಸ ಪತ್ತೋ ದಾತಬ್ಬೋತಿ ಯೋಜನಾ. ಭತ್ತಾಹರಣಕಪತ್ತನ್ತಿ ಭತ್ತಂ ಆಹರತಿ ಅನೇನಾತಿ ಭತ್ತಾಹರಣಕೋ, ಸೋಯೇವ ಪತ್ತೋ ಭತ್ತಾಹರಣಕಪತ್ತೋ, ತಂ. ಪಟಿಪಾಟಿಭತ್ತನ್ತಿ ಪಟಿಪಾಟಿಯಾ ಲದ್ಧಂ ಭತ್ತಂ.

ಆಲೋಪಭತ್ತಟ್ಠಿತಿಕತೋತಿ ಏಕೇಕಆಲೋಪೇನ ಲದ್ಧಸ್ಸ ಭತ್ತಸ್ಸ ಠಿತಿಕತೋ. ಆಲೋಪಸಙ್ಖೇಪೇನಾತಿ ಏಕೇಕಸ್ಮಿಂ ಆಲೋಪೇ ತಂಸಂಖಿಪನೇನ. ಅಯಂ ನಯೋ ಉದ್ದೇಸಭತ್ತತೋ ವಿಸೇಸೋ. ಕಸ್ಸ ತೇ ಆಭತನ್ತಿ ಕಸ್ಸ ಅತ್ಥಾಯ ತಯಾ ಆಭತನ್ತಿ ಯೋಜನಾ. ಸಙ್ಘಸ್ಸ ಮೇ ಭತ್ತನ್ತಿ ಸಙ್ಘಸ್ಸ ಅತ್ಥಾಯ ಮಯಾ ಭತ್ತಂ ಆಭತಂ. ಥೇರಾನಂ ಮೇ ಭತ್ತನ್ತಿ ಥೇರಾನಂ ಮಯಾ ಭತ್ತಂ ಆಭತಂ.

ಉಪಾಸಕೋ ಪಹಿಣಾತೀತಿ ಸಮ್ಬನ್ಧೋ. ಇಮೇ ತಯೋ ಜನಾತಿ ಸಙ್ಘತ್ಥೇರೋ ಚ ಗನ್ಥಧುತಙ್ಗವಸೇನ ಅಭಿಞ್ಞಾತೋ ಚ ಭತ್ತುದ್ದೇಸಕೋ ಚಾತಿ ಇಮೇ ತಯೋ ಜನಾ. ಪುಚ್ಛಿತುನ್ತಿ ‘‘ಕಿಂ ಸಙ್ಘತೋ ಗಣ್ಹಾಮಿ, ಉದಾಹು ಯೇ ಜಾನಾಮಿ, ತೇಹಿ ಸದ್ಧಿಂ ಆಗಚ್ಛಾಮೀ’’ತಿ ಪುಚ್ಛಿತುಂ. ಆರುಹಿಯಿತ್ಥಾತಿ ಆರೂಳ್ಹಾ. ಅತ್ತನವಮೇಹೀತಿ ಅತ್ತಾ ನವಮೋ ಏತೇಸನ್ತಿ ಅತ್ತನವಮಾ, ತೇಹಿ ಭಿಕ್ಖೂಹೀತಿ ಸಮ್ಬನ್ಧೋ. ಹೀತಿ ಯಸ್ಮಾ. ಏತೇ ಭಿಕ್ಖೂತಿ ಸಙ್ಘತ್ಥೇರಾದಯೋ ತಯೋ ಏತೇ ಭಿಕ್ಖೂ. ತೇನಾತಿ ಗನ್ಥಧುತಙ್ಗಾದೀಹಿ ಅನಭಿಞ್ಞಾತೇನ ಭಿಕ್ಖುನಾ ಪಟಿಪಜ್ಜಿತಬ್ಬನ್ತಿ ಸಮ್ಬನ್ಧೋ. ನಿಸ್ಸಿತಕೇ ವಾ, ಯೇ ಭಿಕ್ಖೂ ಜಾನಾಥ, ತೇ ಭಿಕ್ಖೂ ವಾ ಗಹೇತ್ವಾತಿ ಯೋಜನಾ. ಅತ್ತನಾ ಅಞ್ಞೋ ಗಾಮೋ ಗನ್ತಬ್ಬೋತಿ ಸಮ್ಬನ್ಧೋ. ಸೋಯೇವ ಗಾಮೋತಿ ನಿಮನ್ತನಗಾಮೋಯೇವ.

ತತ್ರಾತಿ ಅಸನಸಾಲಾಯಂ. ಉಸ್ಸವಾದೀಸೂತಿ ಛಣಾದೀಸು. ಆದಿಸದ್ದೇನ ಅಞ್ಞೇನ ಕೇನಚಿ ಕಾರಣೇನ ಮನುಸ್ಸಾನಂ ಬಹುಸನ್ನಿಪಾತಂ ಸಙ್ಗಣ್ಹಾತಿ. ತದಾತಿ ತಸ್ಮಿಂ ನಿಮನ್ತನಕಾಲೇ. ಸನ್ನಿಪಾತಟ್ಠಾನತೋತಿ ಭಿಕ್ಖೂನಂ ಸನ್ನಿಪಾತಟ್ಠಾನತೋ. ಯಥಾಸತ್ತೀತಿ ಸತ್ತಿಯಾ ಅನುರೂಪಂ, ಸತ್ತಿಂ ಅನತಿಕ್ಕಮಿತ್ವಾತಿ ಅತ್ಥೋ. ಏತ್ಥ ಚ ಸತ್ತಿಸದ್ದಸ್ಸ ಕುನ್ತಸಙ್ಖಾತಸ್ಸ ಸತ್ಥಸ್ಸಪಿ ವಾಚಕತ್ತಾ ತಂ ಪಟಿಕ್ಖಿಪನ್ತೋ ಆಹ ‘‘ಯಥಾಬಲ’’ನ್ತಿ.

ಸಙ್ಘತ್ಥೇರೋ ವಾ ಆಗಚ್ಛನ್ತೀತಿ ಸಮ್ಬನ್ಧೋ. ಬಹುಕತ್ತಾರಮಪೇಕ್ಖಿತ್ವಾ ‘‘ಆಗಚ್ಛನ್ತೀ’’ತಿ ಬಹುವಚನವಸೇನ ವುತ್ತಂ. ಏಕವಾರನ್ತಿ ಏಕಸ್ಮಿಂ ದಿವಸೇ, ಆಗಮನದಿವಸೇತಿ ಅತ್ಥೋ. ಪಟಿಬದ್ಧಕಾಲತೋತಿ ತತ್ಥೇವ ಸಕಟ್ಠಾನೇ ವಾಸಸ್ಸ ನಿಬದ್ಧಕಾಲತೋ. ದುತಿಯವಾರೇತಿ ದುತಿಯದಿವಸೇ. ಅಭಿನವಆಗನ್ತುಕಾವಾತಿ ಅನಾಗಮನಪುಬ್ಬಾ ಅಭಿನವಾ ಆಗನ್ತುಕಾವ. ತತ್ರಾತಿ ತಸ್ಮಿಂ ಪತ್ತಟ್ಠಾನೇ. ತೇಸನ್ತಿ ಅಭಿನವಆಗನ್ತುಕಾನಂ. ಏತ್ಥಾತಿ ಅನಾಗತಪುಬ್ಬಟ್ಠಾನೇ.

ಸಬ್ಬತ್ಥಾತಿ ಸಬ್ಬೇಸು ಸಕಟ್ಠಾನಆಗನ್ತುಕಟ್ಠಾನೇಸು. ತೇನಾತಿ ಅತಿಲಾಭಿನಾ ಭಿಕ್ಖುನಾ. ಅವಿಸೇಸೇತ್ವಾತಿ ವಿಸೇಸಮಕತ್ವಾ.

ಸಲಾಕಭತ್ತಕಥಾ

ಸಲಾಕಭತ್ತಂ ಪನ ಏವಂ ವೇದಿತಬ್ಬನ್ತಿ ಯೋಜನಾ. ‘‘ವಚನತೋ’’ತಿ ಪದಂ ‘‘ದಾತಬ್ಬಾ’’ತಿ ಪದೇ ಞಾಪಕಹೇತು. ಸಲಾಕಾಯ ವಾತಿ ಕುಸದಣ್ಡೇ ವಾ. ಅಸುಕಸ್ಸ ನಾಮಾತಿ ಅಸುಕಸ್ಸ ನಾಮ ಉಪಾಸಕಸ್ಸ. ಉಪನಿಬನ್ಧಿತ್ವಾತಿ ಲಿಖಿತ್ವಾ, ಛಿನ್ದಿತ್ವಾತಿ ಅತ್ಥೋ. ‘‘ಓಪುಞ್ಜಿತ್ವಾ’’ತಿ ಪದಸ್ಸ ಅತ್ಥಂ ದಸ್ಸೇನ್ತೋ ಆಹ ‘‘ಪುನಪ್ಪುನಂ ಹೇಟ್ಠುಪರಿಯವಸೇನ ಆಲೋಳೇತ್ವಾ’’ತಿ. ಭತ್ತುದ್ದೇಸಕೇನ ದಾತಬ್ಬಾತಿ ಸಮ್ಬನ್ಧೋ.