೧೬೯. ಹತ್ಥಿಮಂಸಾದಿಪಟಿಕ್ಖೇಪಕಥಾ

೨೮೧. ಅರಞ್ಞಕೋಕಾ ನಾಮಾತಿ ಸಸಬಿಳಾಲಾದಯೋ ಸತ್ತೇ ಖಾದನತ್ಥಾಯ ಕುಕತಿ ಆದದಾತೀತಿ ಕೋಕೋ ಅರಞ್ಞೇ ಜಾತೋ ಕೋಕೋ ಅರಞ್ಞಕೋಕೋ, ಸುನಖಸದಿಸಾತಿ ಗಾಮಸುನಖೇನ ಸದಿಸಾ. ತೇಸನ್ತಿ ಅರಞ್ಞಕೋಕಾನಂ. ಯೋ ಪನಾತಿ ಸುನಖೋ ಪನ, ಉಪ್ಪನ್ನೋತಿ ಸಮ್ಬನ್ಧೋ. ಗಾಮಸುನಖಿಯಾತಿ ಸಾಮ್ಯತ್ಥೇ ಸಾಮಿವಚನಂ. ಕೋಕೇನಾತಿ ಸಹಾದಿಯೋಗೇ ಕರಣವಚನಂ. ತಾನಿ ಪದಾನಿ ‘‘ಸಂಯೋಗೇನಾ’’ತಿ ಪದೇನ ಯೋಜೇತಬ್ಬಾನಿ. ತಸ್ಸಾತಿ ಸುನಖಸ್ಸ.

ಏತ್ಥಾತಿ ಮನುಸ್ಸಮಂಸಾದೀಸು. ಸಜಾತಿಕತಾಯಾತಿ ಸಮಾನಜಾತಿಕಭಾವತೋ. ಅನುಪದ್ದವತ್ಥಾಯಾತಿ ಅನುಪದ್ದವತ್ಥಂ, ಪಟಿಕ್ಖಿತ್ತಾನೀತಿ ಸಮ್ಬನ್ಧೋ. ಆಪತ್ತೀತಿ ಮನುಸ್ಸಮಂಸೇ ಥುಲ್ಲಚ್ಚಯೇನ, ಸೇಸೇ ದುಕ್ಕಟೇನ ಆಪತ್ತಿ. ಉದ್ದಿಸ್ಸ ಕತಂ ಪನಾತಿ ಭಿಕ್ಖುಂ ಉದ್ದಿಸ್ಸ ಕತಮಂಸಂ ಪನ.